Дар шаҳри Бохтар (собиқ Қӯрғонтеппа) нархи гази моеъ боз гарон шуд. То дирӯз нархи 1 литр гази моеъ муътадил буд, яъне 4 сомонӣ. Ҳоло дар НФСҳои Бохтар нархи 1 литр газ ба 4.30 сомонӣ расидааст. Дар пайи ин ҳолат кирокашон-таксиронҳо роҳкирои самти Бохтар-Душанберо боз 5 сомонӣ бардоштанд, ки то дирӯз роҳкиро 15-20 сомонӣ буд, ҳоло 20-25 сомонист! Болоравии нархи газ дар ширкатҳои «Баҳор-ойл» ва «Фароз» бештар ба назар мерасад…

Сафири нави Иттиҳоди Аврупо дар Ҷумҳурии Тоҷикистон Мэрилин Йосефсон бо супоридани эътимодномаи худ ба президенти ҶТ Эмомалӣ Раҳмон ба вазифаи хеш ба ҳайси Сардори Намояндагии Иттиҳоди Аврупо дар ҶТ ба таври расмӣ оғоз кард.
   Чуноне ки ба мухбири СССР дар намояндагии ИА дар ҶТ хабар доданд, Мэрелин Йосефсон аз номи Иттиҳоди Аврупо ҷониби Тоҷикистонро ба муносибати дастоварди калон - ба кор даровардани агрегати якуми НБО “Роғун” табрик карда, гуфт, ки  ӯ кӯшишҳо ба харҷ медиҳад то Иттиҳоди Аврупо ва Тоҷикистон бо ҳам пайвастатар гарданд ва ӯ дар самти таҳким ва густариши муносибатҳои ҳамаҷониба фаъолона кор хоҳад кард.
   -Ҳамкории самараноки Иттиҳоди Аврупо ва Тоҷикистон дар ҳақиқат на танҳо матлуб, балки муҳим аст. Мо якҷоя бо мушкилоту ситезаҳои муштарак рӯ ба рӯ ҳастем. Хусусан ман инҷо дар назар сулҳу амниятро, тағйирёбии иқлим, идоракунии устувори захираҳои обию энергетикӣ, навоварӣ ва пешравии технологӣ, тараққиёти баробару устувор ва рушди тартиботи байналмилалӣ, волоияти қонун ва ҳуқуқҳои инсонро дорам. Ҳар ду ҷониб дар ин самт метавонанд саҳми арзандаи худро гузоранд. Бо идома додани ҳамкориҳои зич дар сатҳҳои дуҷониба, минтақавӣ ва байналмилалӣ атрофи мавзӯъҳои мухталиф ба мо имкон медиҳад, ки ободию бехатарию устувории халқҳоямонро ва ҷомеаҳои худамонро таъмин намоем. Охири ин ҳафта дар шаҳри Брюссел ҷаласаи Шӯрои ҳамкории миёни Иттиҳоди Аврупо ва Тоҷикистон ва вохӯрии Вазирони корҳои хориҷии Иттиҳоди Аврупо ва давлатҳои Осиёи Марказӣ баргузор мегарданд. Ин чорабиниҳои муҳим ба мо имкон медиҳанд, ки дар якҷоягӣ оиди роҳҳои таҳкими минбаъдаи ҳамкориҳоямон дар соҳаҳои мазкур андешаронӣ намоем, -гуфтааст Мэрилин Йосефсон.
   Қаблан хонум Йосефсон дар Намояндагии доимии Шветсия дар назди Иттиҳоди Аврупо дар ш.Брюссел кор мекард. Ғайр аз ин, ӯ таҷрибаи хуби меҳнатиро дар Хадамоти корҳои хориҷии Аврупо ва Созмони Миллали Муттаҳид ба даст овардааст.
 

   Шаби 18 ба 19-уми ноябри соли 2018, тахминан соати 01:30-дақиқа, шахсони номаълум ғайриқонунӣ ба хонаи истиқоматии бобои эшони Муҳриддин Ҳомидов, сокини 70-солаи ҷамоати деҳоти ба номи Кирови н.Вахш ворид шуда, бо олоти ба корд монанд ба ҳамсараш, зани 54-сола таҳдид намуда, 1-адад сандуқи оҳанинро, ки дар дохили он 6 ҳазору 350-доллари амрикоӣ ва 40000-сомонӣ буд, тасарруф намуда, аз ҷойи ҳодиса ғайб задаанд.
   Тавре аз маркази матбуоти ВКД ҶТ ба мухбири СССР хабар доданд, зимни доир намудани чорабиниҳои оперативӣ-ҷустуҷӯӣ аз ҷониби кормандони милитсия 4 нафар шаҳрвандон: 2 марди 24 ва 30-солаи сокинони н.Вахш ва 2 марди 28 ва 30-солаи сокинони н.Ҷ.Балхӣ ҳамчун гумонбар дар содир намудани ҷинояти роҳзанӣ дастгир карда шуданд. Аз рӯи ин ҳодиса парвандаи ҷиноятӣ оғоз гардида, тафтишот идома дорад.
   Бояд гуфт, ки ҳмачунин 1 ҳодиса 1 ҳафта пеш дар н.Ҷ.Балхӣ рух дода, дуздони роҳзан сокинони ҳам н. Ҷ.Балхӣ ва ҳам н.Вахш будаанд, ки ба таври оҷилӣ дастгир карда шудаанд.

 
   Дар натиҷаи пешбурди 1 қатор суҳбату вохӯриҳо ва корҳои фаҳмондадиҳии кормандони милитсияи ш.Душанбе ҳафтаи сипаришуда боз 3 нафар шаҳрвандон, ки бо моддаи 307 иловаи 3 (Ташкили фаъолияти ташкилоти экстремистӣ (ифротгароӣ))-и Кодекси ҷиноятии ҶТ дар ҷустуҷӯи расмӣ қарор доштанд, бо кӯмаки кормандони милитсия бо изҳори пушаймонӣ ва бо хоҳиши худ ба Ватан баргашта, ба мақомоти милитсияи пойтахт ҳозир шуданд.
   Чуноне ки ба мухбири мо дар маркази матбуоти РВКД дар ш.Душанбе хабар доданд, ин нафарон:
  1. Маҳмудов Назрӣ Назирмадович, соли таваллудаш 1964, истиқоматкунандаи ш.Душанбе, оиладор, номбурда аз 19-уми апрели соли 2016 бо моддаи 307 иловаи 3 Кодекси ҷиноятии ҶТ ҳамчун гумонбар дар ҷинояти ташкили фаъолияти ташкилоти экстремистӣ (ифротгароӣ) дар ҷустуҷӯи расмӣ қарор дошт;
2. Ҷобиров Олимҷон Ҳотамович, соли таваллудаш 1984, истиқоматкунандаи н.Ҳисор, ҷамоати Алмосӣ, деҳаи Суғдиён, оиладор, аз санаи 17-уми октябри соли 2016 бо моддаи 307 иловаи 3 Кодекси ҷиноятии ҶТ, ҳамчун гумонбар дар ҷинояти ташкили фаъолияти ташкилоти экстремистӣ (ифротгароӣ) дар ҷустуҷӯи расмӣ қарор дошт;
3. Қосимов Бахтиёр Шарифович, соли таваллудаш 1979, зодаи ноҳияи Восеи вилояти Хатлон, истиқоматкунандаи ш.Душанбе, оиладор, соҳиби 3 фарзанд, аз санаи 22-юми майи соли 2017 бо моддаи 307 иловаи 3 Кодекси ҷиноятии ҶТ, ҳамчун гумонбар дар ҷинояти ташкили фаъолияти ташкилоти экстремистӣ (ифротгароӣ) дар ҷустуҷӯи расмӣ қарор дошт. Мавриди зикр аст, ки ба ғайр аз худи Бахтиёр Қосимов бо кӯмаки мақомоти милитсияи пойтахт ҳамсар ва 3 нафар фарзандони ноболиғи 3, 6 ва 10-солаи номбурда ба Ватан баргардонида шуд.
    Бино ба иттилои тафтишот нафарони болозикргардида ҳамчун ҷинояткорони расман дар ҷустуҷӯ қарордошта давоми 3 сол, то ин вақт дар шаҳрҳои гуногуни кишварҳои хориҷӣ умр ба сар бурда, ҳафтаи сипаришуда бо кӯмак ва роҳнамоиҳои кормандони милитсияи ш.Душанбе аз кишварҳои гуногуни хориҷӣ ба Ватан баргардонида шудаанд. Зимни ба мақомоти милитсия ҳозир гардидан номбурдаҳо ба тафтишот изҳор доштаанд, ки аз кардаи худ сидқан пушаймон буда, аз сабаби гумроҳӣ шомили ҳизбу ҳаракатҳои ифротӣ гардидаанд. Айни ҳол нисбати ҳамаи онҳо эзоҳи моддаҳои болозикргардидаи Кодекси ҷиноятии Ҷумҳурии Тоҷикистон татбиқ карда шуда, онҳо дар ҳузури хонавода, хешу табор, падару модар ва ҳамсару фарзандонашон қарор доранд. 
    Вобаста ба ҳолатҳои мазкур, Раёсати ВКД дар ш.Душанбе ба таври расмӣ ба иттилои кулли сокинон ва шаҳрвандоне, ки дар ҷустуҷӯи байналмилалӣ қарор доранд, мерасонад, ки дар ҳолати бо иқрори пушаймонӣ ва хоҳиши худ ҳозир гардидан ба мақомоти ҳифзи ҳуқуқ, аз ҷумла мақомоти милитсияи ш.Душанбе дар доираи дастуру супоришҳои президенти ҶТ Эмомалӣ Раҳмон эзоҳи моддаҳои 401 иловаи 1 ва 307 иловаи 3-и Кодекси ҷиноятии Ҷумҳурии Тоҷикистон татбиқ карда шуда, аз ҷавобгарии ҷиноятӣ озод карда мешаванд.
   Чунончӣ зикр гардид, дар давраи 10 моҳи соли ҷорӣ танҳо аз ҷониби милитсияи пойтахт 10 нафар сокинони ш.Душанбе ва дигар минтақаҳои кишвар, ки бо моддаҳои 401 иловаи 1 (Ҷалб ва иштироки ғайриқонунии шаҳрвандони ҶТ ва шахсони бешаҳрванд дар воҳиди мусаллаҳ, задухурди мусаллаҳона ё амалиёти ҷангӣ дар қаламрави дигар давлатҳо) ва 307 иловаи 3 (Ташкили фаъолияти ташкилоти экстремистӣ (ифротгароӣ))-и Кодекси ҷиноятии ҶТ дар ҷустуҷӯи расмӣ қарор доштанд, бо изҳори пушаймонӣ ва бо хоҳиши худ ба Ватан баргардонида шудаанд.

Муҳриддин Исроилов, сокини шаҳри Ваҳдат (тел: 904 15 82 06) дар меҳмонии СССР гуфт, ки ман аз Ҳукумати марказӣ, аз мақомоти дахлдори кишвар эҳтиромона хоҳиш дорам, ки дар радиову ТВҳои давлатӣ чун мисли пештара барномаеро таҳти унвони «Микрофони озод» ташкил кунанд. Зеро мушкилоту дарду гуфтании мардум бениҳоят зиёд аст. Инро аз таҷрибаи худам мегӯям. Зеро вақте 1 одами чораҷӯ ба кадом вазорате мактубе мефиристад, дигар то 2 сол посухи номаро намегирад. Хуллас, чунин барномае лозим, то мардум андешаҳои худро озодона бигӯянд, на ба суду прокурору дигар мақомоти болоӣ муроҷиат кунем. Ба фикри ман, агар ҳамин намоишу гуфтори озоди радиоӣ ва ТВ ташкил шавад, 100% аминам, ки коррупсия ба таври автоматӣ аз байн хоҳад рафт. Зеро тибқи мушоҳидаи ман, баъзе корхонаҳои давлатӣ на ба нафъи халқу ватан, балки бештар ба фоидаи худашон амал мекунанд. Масалан, дар нотариуси ноҳия барои тасдиқи ҳуҷҷатҳо нарху навои ягон хел ҳуҷҷат дида намешавад ва чизе, ки аз даҳони намояндаҳо барояд нарх ҳамон ва қонун ҳамон! Шаҳрванди бечора маҷбур мешавад, ки ҳамон қадар маблағро супорад!

Нурсултон Назарбоев-президенти Қазоқистон дар ҷаласаи Шӯрои амнияти ин кишвар дар шаҳри Остона аз мансабдорон хост, ки муҳтавои паёми охири ӯро ба мардум расонанд ва монополистҳои бевиҷдонро ба ҷавобгарӣ кашанд. Ӯ гуфт, бар асоси таҳқиқоти сотсиологӣ, мардумро ба иловаи ташвишҳои дигар қимати хизматрасониҳои коммуналӣ, арзиши таҳсил ва табобат ғамгин кардааст. "Агар тарофаҳо ба таври сунъӣ гарон карда шаванд, пас ин боиси харҷи барзиёди хонаводаҳо мешаваду хилофи паёми ман аст", - гуфт президент.

Мақомоти ҳифзи ҳуқуқи Белорусия сардабири Агентии хусусии BelaPan ва сардабири портали TUT.by-ро ба дарёфти ғайриқонунии маълумот аз хабаргузории давлатии BelTA муттаҳам карданд. Ирина Леушина аз BelaPan ва Галина Уласик аз TUT.by ба хабарнигорон гуфтанд, ки онҳоро баъди даъват ба Кумитаи тафтишот айбдор карданд. Муфаттишон ҳамчунин идораҳои BelaPan ва TUT.by-ро кофтукоб кардаанд. Полиси Минск мегӯяд, хабарнигорони портали TUT.BY ва BelaPAN ба таври ғайриқонунӣ, тавассути интернет, аз хабаргузории давлатии BelTA маълумот мегирифтанд. Коршиносони сиёсии хориҷӣ мегӯянд, мақомот бо ин роҳ мехоҳанд даҳони мунаққидони президенти Беларуссия Александр Лукашенко ва ҳукумати ӯро банданд.

Апаи Гадобегим ва акаи Ғойиб қариб 30 сол ғам хӯрданд. Модари пуралам аз мардум гӯшанишинӣ карда, писари бенишон гумшудаашро нола мекард, то каме ҳам бошад ғубори дилро берун кунад. Дар ин муддат падари ғамзада аз олам даргузашт. Акнун барои Гадобегим вафоти шавҳар, ки якҷоя 50 сол умр ба сар бурда, 10 фарзандро ба воя расонидаанд, аз гум шудани фарзанд фоҷиаи камтар набуд. Гарчанде аз гум шудани фарзанд қариб 30 сол гузашта бошад ҳам, аммо дар 1 гӯшаи дилаш умеде дошт, ки фарзандаш зинда аст. Ҳарчанд ҳамсояҳо ва хешу табор тасаллӣ дода мегуфтанд, ки шукри боқимондаҳояшро кунад, аммо онҳо намедонистанд, ки дили модар барои ҳар 1 фарзанд ҷои алоҳида дорад ва онро танҳо ҳамон фарзанд метавонад пур кунад.

Гусели аскарбача
Соли 1988 акои Ғойиб чорпо кушта ҳаққу ҳамсояҳоро зиёфат дода, писараш Нодирро ҳамроҳи ҳамдеҳагонаш аз Автовокзали Норак ба сафи Армияи Советӣ тантанавор гусел кард. Дар муддати қариб 15 рӯз Нодир ба ҷои хизмат-Приморский край расида дар қисми сохтмончӣ адои хизмат мекунад. Дар арафаи “дембель” ба падараш телефон мекунад: “Падарҷон, имконият дошта бошед бароям пул фиристед, то ман бо либосҳои гражданӣ ба хона биёям”. Падар мегӯяд: “Писарам, аввал ин, ки аз рӯи қоидаи аскарӣ, ту то ҷои зистат бояд бо либосҳои аскарӣ омада, дар қайди комиссариати ҳарбӣ бимонӣ. Яъне, ки қарзи граждании худро адо кардаӣ, пасон чӣ хел либосе мепӯшӣ, ихтиёрат. Дуввум, ин ки мо ҳамроҳи модарат боз 9 тани дигар хӯранда дорем, шароити зиндагӣ хуб нест, вазъ ноором аст (с.1990)”...

Авлод Нодирро меҷӯяд
Намедонем аз чӣ бошад, ё номус ё ранҷиши ҷавонӣ, ки алоқа канда мешавад. Дар ин муддат Нодир дар яке аз заводҳои ш.Арсеновкаи кишвари Приморе, ки на чандон аз ҷои хизматаш дур буд, ба кор медарояд. Охири с.1990 ҳодисаҳои барҳамхурии СССР ва ҷанги шаҳрвандии Тоҷикистон пеш меояд. Ҳамон солҳо ӯ ҳамроҳи 1 ҳамкори хуҷандиаш, ки дар завод шинос шуда буданд, майли омадан ба Ватан мекунанд. Дар марзи Русияю Қазоқистон ҳуҷҷатҳои онҳоро тафтиш карда, милитсияҳо хуҷандиро куҷое мебаранд, 2 соат мегузад, аз ӯ дараке нест. Дар ин асно аз касе мешунавад, ки дар Тоҷикистон ҷанги шаҳрвандӣ сар шудаву ҳама роҳҳою сарҳадҳо бастаанд. Инро фаҳмида ноумед шуда, аз нияташ мегардад ва ба ҳамон ҷои кораш бармегардад. Бо ҳамин, риштаи муошират бо пайвандон то с.2015 канда мешавад.  Дар ин давом амакҳояш Ҳабиб, Насрулло ва Саъдӣ, ки одамони шинохтаи нораканд, талошҳо карданд то додарзодаашонро зинда ё мурдаашро пайдо кунанд. Аммо бе натиҷа...

Очаи чашмбароҳ
Тифоқо, зиндаву саломат будани ӯ вақте муайян мешавад, ки Абдулло-писари тағоиаш ба воситаи интернет бо духтаре шинос шуда, баъди пурсупоси зиёд духтар мегӯяд, “аз рӯзе худамро медонам, 1 тоҷики зардина дар гузари мо ба кори деҳқониву чорводорӣ машғул аст. Зану фарзанд дорад, аммо номашро намедонам”. Аз рӯи гуфтаи духтар бисёр нишона-параметрҳои ин нафар ба Нодир мувофиқ меоянд, синну солаш низ. Бо розигии духтар ба ҷои зисти гумшуда меоянд. Дар мулоқот Абдулло ӯро мешиносаду мепурсад: “Ту маро шинохтӣ?” Нодир мегӯяд: “Не”. Ман писари тағоят-Партов. Баъди каме сукут ҳар 2 якдигарро ба оғӯш гирифта, мегирянд. Нодир ҳамроҳи хонаводааш Абдуллоро меҳмоннавозӣ ва бо писари 23-солааш Денис ва духтари 10-солааш-Зарина шинос мекунад.

Бозгашти Юсуф
Дар ҳамон асно ба Норак дар бораи зиндаву саломат будани Юсуфов Нодир Ғойибович (соли тав. 1969, зодаи д.Даҳанаи ш.Норак) телефон мекунанд. Албатта, хурсандии модар, хоҳару бародар, хешу таборро тасвираш оҷиз аст. Рӯзи 3-ноябр борони бошиддат меборид, модари бечора аз Худои бузург илтиҷо мекард, ки рӯзи дидорбинӣ бо писари гумшудааш офтобӣ бошад. Худо сахист, илтиҷои модар ва наздиконро шунид: рӯзи беҳтарин-офтобӣ дар минтақа шуд. Лаҳзае модар фарзанди гумшудаашро ба оғуш кашид, ту гӯӣ баҳор дар олам ҳукмрон гардид...
Он рӯз Даҳана тантана дошт. Онҳое низ омаданд, ки 27 сол пеш чилу соли ӯро хӯрда буданд. Ин дидорбинӣ барои ҳама аҷибу ҳайратовар буд. Апаи Гадобегим 1 буқачаи 2-солаашро хун карда, ба омадаҳо ним коса шӯрбо мекашиду худ бо даст пешашон мегузошту шукри Худо мекард, ки Юсуфи гумшудаашро овардааст...

Пасгуфтор
Саргузашти Юсуфи канъонӣ ба саргузашти Нодир Юсуфи норакӣ шабоҳате дорад: давомнокии гумгаштаҳо ҳам-30 сол, ашкҳои шашқатори Ҳазрати Яъқуб ва апаи Гадобегим низ. Танҳо фарқ ин аст: ба Юсуф акаҳояш хиёнат карданд, ба Нодир замона-барҳамхӯрии СССР! Дигар тафовут: Юсуф дар Миср подшоҳ шуду Нодир дар Арсеновкаи Русия-чӯпон.
Юсуфи гумгашта боз ояд ба Канъон, ғам махӯр,
Кулбаи эҳзон шавад рӯзе гулистон, ғам махӯр!

Зиёратуллои Назрулло,
узви хонадон, ш.Душанбе