Дар маркази ш.Душанбе, дар шафати бинои собиқ Почтаи марказии кишвар ва дар ҷойи сутун бо нишони ҶШС Тоҷикистон манораи 18-метраи соати асосии кишвар бунёд карда мешавад.
 Гуфта мешавад, ки соати асосии мамлакат дар Туркия омода шуда, манора ва соат дар арафаи ҷашни байналмилалии Наврӯз дар соли 2019 ба истифода дода мешавад. Бояд қайд намуд, ки дар ин макон аз соли 1949 то соли 2015 сутун ва нишони ҶШС Тоҷикистон қомат афрохта, баъдан тахриб гардиданд.

Акс аз Ёкуб Халимов
 

 19.12.2018 дар Қасри фарҳанги Суғдиён мулоқоти Раиси шаҳри Истаравшан Баҳром Иноятзода бо донишҷӯёни истаравшание, ки дар донишгоҳу донишкадаҳои оливу касбии шаҳри Хуҷанд баргузор гардид. Дар мулоқот намояндаи мақомоти иҷроияи ҳокимияти давлатии вилоят, сардорони раёсатҳо, мудирони шуъбаву бахшҳои дастгоҳи раиси шаҳр, роҳбарони сохторҳои воҳидии шаҳр, намояндагони ВАО ва донишҷӯён иштирок намуданд.
    Чуноне ки ба мухбири мо котиби матбуотии раиси ш.Истаравшан Шералӣ Азимӣ хабар дод, зимни суханронии хеш раиси ш.Истаравшан Баҳром Иноятзода иброз дошт, ки мулоқоти роҳбарияти МИҲД шаҳр бо донишҷӯён ба ҳукми анъана даромада, ҳамасола чунин мулоқотҳо бо донишҷӯёни истаравшание, ки дар муассисаҳои таҳсилоти оли ва миёнаи касбии шаҳрҳои Душанбеву Хуҷанд таҳсил доранд, баргузор гардида истодааст.
   - Мақомоти иҷроияи ҳокимияти давлатии шаҳр баҳри дар амал татбиқ намудани сиёсати давлатии ҷавонон тадбирҳои зарурӣ андешидааст. Дар ин раванд, як зумра корҳо дар самти ҷавонон ва варзиш аз қабили мунтазам дастгириву пуштибонӣ намудан ва шароитҳои мусоид фароҳам овардан барои давом ва сайқал додани донишандӯзии ҷавонони соҳибзавқу болаёқат ва илмдӯст дар Донишгоҳҳои олии кишвар ва берун аз марзи он, сохта ба истифода додани майдонча ва толорҳои варзишӣ баҳри рушди нумӯи самти варзиш, ташкили вохӯриву суҳбатҳо бо мақсади вусъат бахшидан дар самти таълиму тарбияи насли ҷавон дар руҳияи баланди ватандӯстиву ифтихори миллӣ, меҳнатдӯстиву хештаншиносӣ, тарғиби тарзи ҳаёти солими ҷавонон, тарбияи ҷисмонии онҳо, меҳру муҳаббати беандоза доштан нисбат ба халқу ватан, пешгирӣ намудани қонуншиканиву шомил нагардидан ба ҳаргуна ҳизбу ҳаракатҳо ва дигар падидаҳои номатлуб миёни ҷавонон, ташкил ва гузаронидани мусобиқаҳои варзишӣ мисоли гуфтаҳои болоианд, афзуд, Баҳром Иноятзода.
    Дар мулоқоти мазкур инчунин Абдуллоев Акамал донишҷӯи Донишгоҳи давлатии ҳуқуқ, бизнес ва сиёсати Тоҷикистон, Ҳакимов Нозимҷон донишҷӯи Донишгоҳи давлатии Хуҷанд ба номи академик Бобоҷон Ғафуров, Сангинова Ҳалима донишҷӯи Донишгоҳи давлатии Хуҷанд ба номи академик Бобоҷон Ғафуров, Усмонов Хушбахт донишҷӯи Донишгоҳи давлатии Хуҷанд ба номи академик Бобоҷон Ғафуров, Исоева Зарнигор донишҷӯи Донишгоҳи давлатии Хуҷанд ба номи академик Бобоҷон Ғафуров, Тоҷибоев Шералӣ донишҷӯи Донишгоҳи давлатии ҳуқуқ, бизнес ва сиёсати Тоҷикистон ва ғайра баромад намуда, доир ба масъалаҳа ва мушкилотҳои ҷойдошта саволу пешниҳодҳои худро иброз намуданд.
    Аз ҷониби мақомоти иҷроияи ҳокимияти давлатии шаҳр ба 10 нафар донишҷӯёни фаъол сипоснома ва ба зиёда аз 50 нафар кӯмаки яквақтаи молиявӣ тақдим карда шуд.

Мақомоти расмии Туркманистон истифодаи акси хукро дар ёлка-ороишҳои солинавӣ манъ карданд. Дар мавриди манъи истифодаи тасвирҳои хук қарор ё фармони расмие содир нашудааст. Вале аз ҳозир дар ороишҳои шаҳр рамзи соли нав-ХУК дида намешавад. Чанде пеш президенти Туркманистон Қурбонгулӣ Бердимуҳаммадов аз ҳукумат хоста буд, ки шаҳрро дар арафаи соли нав бо шакли миллии туркманӣ ороиш диҳанд, яъне бе акси ХУК!

Кормандони мақомоти ҳифзби ҳуқуқ-милисаҳои н.Юқоричирчиқи вил.Тошканд дар ҳузури имом-хатиби ноҳия бо китоби Қуръон қасам хӯрдаанд, ки ҳаргиз пора намегиранд ва тамаъҷӯӣ намекунанд. Маросими савганди кормандони мақомоти ҳифзи ҳуқуқ дар чорчӯби барномаи давлатии мубориза бо коррупсия анҷом шуда, ҳадаф аз он- иҷрои қарори президент Шавкат Мирзиёев дар мавриди иҷрои талаботи қонуни мубориза бо коррупсия аст.

Психологияи миллӣ-9

Узви Ихвон-ал-СССР, Муҳриддин Исроилов, аз шаҳри Ваҳдат (тел: 904 15 82 08) дар меҳмонии СССР гуфт, қариб дар тамоми шаҳру ноҳияҳои мо мардум бо
Кумитаи идораи замин мушкил дорад. Масалан, касе, ки қарори ҳукуматро дар бораи замини наздиҳавлигӣ барои бунёди хонаи истиқоматӣ дорад, пас аз бунёди хонаи истиқоматӣ хонаю замин мерос ба фарзандону наберагон мемонад. Пас шарт нест, ки кумитаи заминсозӣ аз ӯ сертификати наздиҳавлигӣ талаб кунад, зеро заминро бо қарори ҳукумат барои бунёди хонаи истиқоматӣ гирифтааст. Ин амалро кумита ба фоидаи шахсии худ иҷро мекунад. Ҳуҷҷатҳои шахсии сертификатгиранда зина ба зина боло рафта, то ба зинаи охирон расидан он қадар маблағ сарф мешавад, ки аз хонаю замин ҳам безор мешавӣ! Ба фикрам барои замини наздиҳавлигӣ гирифтани сертификат шарт нест, аммо барои замини деҳқонӣ ва ё сохтани ягон мағоза, аптека  ва дигар иншооти ҷамъиятӣ доштани сертификат зарур аст. Ман аз масъулони соҳа хоҳиш ва илтимос мекунам, ки ин қонунро дида бароянд ва ба дарди мардум бирасанд! Фикр мекунам, тамоми депутатҳои мо дар ин боб медонанд, аммо гӯё, ки дарак надоранд.

Салому дуруди пурмеҳр ба аҳли эҷоди тими СССР-и азиз ва кулли хонандагон ва мухлисони ҳафтаномаи серхонандатарин дар ҷумҳурӣ ва берун аз он! Шаби 6.12.2018 дар ТВ Варзиш барномаеро оид ба ҳаёт ва фаъолияти варзишии паҳлавон, самбочии далери Тоҷик Акмалиддин Каримов дидаму ба 3 чиз қоил шудам:
1.Ба профессионализми журналистони ТВ Варзиш, бо роҳбарии гуруҳи эҷодии барнома Суҳробшоҳи Фаррухшоҳ ва ба ин гуруҳи эҷодӣ, ки тавонистанд самбочии муваффақи Тоҷикро муаррифӣ кунанд! Аҳсан ва офарин! Онҳо Тавонистанд, зеро гавҳаршиносанд!
2.Ба паҳлавон-самбочии шинохтаи Тоҷик Акмалиддин қоил шудам, зеро ӯ новобаста аз синну соли ҷавонӣ (28 сола!) аллакай беш аз 10 маротиба ҷоизадори мусобиқаҳои гуногуни ҷаҳонии самбо будааст. Дар байни наврасон ва ҷавонон ҷои 1-ум ва ҷойҳои 2-у 3-юм дар байни калонсолон. Зиёда аз 6 бор ҷоизадори ҷойҳои 1-у 2-юм ва 3-юми Бозиҳои Осиё, 14 карат чемпиони ҷумҳурӣ! Аҳсан, Акмалиддинҷон! Ифтихор аз ин самбочии Тоҷик ва аз дастовардҳои варзишии ӯ кардам! Новобаста аз он, ки ҷоизадори медали тиллои самбо дар байни калонсолон нашудааст, медалҳои нуқраю биринҷии ба даст овардаи ӯ қиматтар аз тиллост. Медали тилло нагирифтани ӯ аз номардии доварон аст. Ӯ барои ман чемпион аст! Акмалиддин ҳоло ҷавон аст ва Худо хоста бошад, дар сабқатҳои ояндаи ҷаҳонӣ соҳиби медали тилло гардад. Чунки ӯ низ Метавонад! Ба Акмалиддин гуфтаниям. Модарашро Худо шифо ато кунад, падарашро Худо раҳмат кунад.
3.Доварони сабқатҳои ҷаҳонии самбо аз диди ман-мухлиси ашаддии гӯштин, нисбати самбочиёни Тоҷик ноҳаққӣ ва номардиро раво мебинанд... Ин нуктаро дар ин барнома устод Маҳмадшариф Сулаймонов, устод Давлатхӯҷа Раҳимов ва худи Акмалиддин низ гуфтанд, ки доварон нисбати самбочиёни Тоҷик номардӣ ва мафиябозӣ мекунанд. Афсӯс аз он мехӯрам, ки мо Тоҷикон дар Федератсияҳои гуштинҳои ҷаҳонӣ ягон намоянда ва дастгир надорем, ки оид ба ноҳаққиҳо овоз барорад ва баҳс кунад. Новобаста аз мушкилиҳо ба ояндаи варзиши Тоҷик хушбинам. Дар кадом як шумораи СССР хонда будам, ки сармуҳаррир Сайёфи Мизроб мегуфт: "Асри 21 асри мо Тоҷикон аст!!!" Чаро не???

Мирзоназар Шарифов,
иқтисодшинос, н.Ёвон

Салом ва дуруди бепоён ба аҳли қалами рӯзномаи мардумии СССР. Ростӣ, кайҳо дар ин мавзӯъ андешаҳои худро гуфтанӣ будам, вале бо сабабҳои гуногун ногуфта монд. Вақте дар СССР (№48, 29.11.2018) дар саҳ.3 матлаби «Редаксия супориш дод: ТВ томошо кун»-ро хондам, ҳис кардам, ки муаллиф дарди дили маро низ гуфтааст.
Соли 1974 баъди хатми УДТ ба номи В.И.Ленин (ҳоло ДМТ) ва адои хизмати 2-солаи ҳарбӣ ба ҳайси афсар дар Округи ҳарбии Шарқи Дур қадамҳои аввалини худро ба касби пурмасъулият ва боифтихор-омӯзгорӣ гузоштам. 100% бовар дорам, афроде, ки синну солашон аз 50 болост, навиштаҳои маро тасдиқ мекунанд. Ҳар пагоҳӣ ҳангоми чойнушӣ медидам, ки дар кушода мешуду хаткашони маҳаллаи мо-зани рус, 1 даста рӯзномаю маҷаллаҳоро (нашриётҳое, ки ихтиёран ба он обуна мешудам!!!) дар гӯшае мегузошту мерафт. Лаҳзаҳое, ки мо бо он зан рӯ ба рӯ мешудем, баъди салому алейк бо лаҳҷаи бисёр ҳам хушу гуворо «Вашы газеты» гӯён нашрияву мактубҳоро ба дастам месупорид. То кор рафтан аз «Пионери Тоҷикистон» сар карда, то «Советский спорт» ҳамаи газетаҳоро як-як нигоҳ карда, бегоҳ бафурсат мехондам. Дар «Тоҷикистони советӣ», «Коммунист Таджикистана»… барномаҳои онрӯзаи ТВ нашр мешуд ва банда зери намоишҳое, ки тамошои онро ҳатмӣ меҳисобидам, бо қалами сурх хат мекашидам.
 
«Говорит Душанбе» ку?
Ҳатто дар кинотеатрҳои ш.Душанбе кадом филм дар кадом соат намоиш дода мешуд, чоп мекарданд, ки ин табъи дили мухлисони синамо буд. Ба ҳафтаномаи «Ин ҷо Душанбе» («Говорит Душанбе»), ки бо 2 забон нашр мешуд, обуна будам. Дар он барномаҳои ҳафтаномаи ТВ ва гуфторҳои радиоро нашр мекарданд, ки намоишҳои мақбули дилро дар соати муайян бемалол медидем. Ё худ ҳар пагоҳ пеш аз оғоз ва пас аз анҷоми барномаҳо ровиён пахши барномаҳои ТВро барои рӯзи оянда эълон мекарданд. Чӣ шуд, ки ҳоло рӯзнома бисёр шудаасту дар ягонтои он рӯз ва соати ин ё он барнома тариқи ягон шабакаи ТВТ нашр намешавад?
 Аксар вақт мо аз намоишҳое, ки бояд ҳатман онро тамошо кунем, хоҳ варзишӣ бошаду хоҳ илмию фарҳангӣ, бехабарем, зеро намедонем, он кай ва кадом соат, дар кадом шабака пахш мешавад. Чанд моҳ пеш, агар хато накунам тариқи муассисаи давлатии ТВ «Сафина» дар бораи ҳаёт ва фаъолияти сардабири рӯзномаи СССР-Сайёфи Мизроб (нисбати ин шахс эҳтироми зиёд дорам) намоиши бисёр ҳам хубе мерафт, вале афсус, вақте барномаро дидам, ки он дар арафаи анҷомёбӣ буд. Телефонро гирифтаму ба Шаҳрзоди Амин занг зада фаҳмиданӣ будам, ки аз намоиш огаҳ ҳаст, ё не? Вале аз чӣ сабаб бошад, ки он соат бо Ш.Амин алоқа нашуд. Чандин рӯзи дигар ба хотири дидани ин барнома пайиҳам он каналро меҷустам, вале беҳуда. Хуллас, он намоишномаро тамошо карда натавонистам…

Бо камоли эҳтиром Худодод Каримов,
омӯзгори собиқадор, ш.Ваҳдат