Шоми 30.11.2018 ба қисми навбатдории Раёсати ВКД дар ш.Душанбе оид ба сар задани ҷинояти роҳзанӣ дар к.Н.Қарабоеви н.Фирдавсии ш.Душанбе хабари телефонӣ аз Чекушина Гулнора Бегматовна дар мавриди ҳамлаи роҳзанӣ бо истифода аз электрошокер ворид гардид. Ҳангоми азназаргузаронии ҷои ҳодиса муайян карда шуд, ки 2 нафар ҷавони ниқобпӯш бо таҷҳизоти электрикии «электрошок» мусаллаҳ гардида, ба манзили истиқоматии шаҳрванд Чекушина Гулнора Бегматовна, соли таваллудаш 1959, ғайриқонунӣ ворид гардида, шавҳар ва духтарашро зери лату кӯб қарор дода, ҳамзамон бо скотч пойҳояшонро бастаанд.

    Чуноне ки ба мухбири СССР Мӯҳсинҷон Муҳаммадӣ, сардори маркази матбуотии РВКД дар ш.Душанбе хабар дод, зимни амалинамоии чорабиниҳои оперативӣ-ҷустуҷӯӣ ҳамчун гумонбар дар содир намудани ҷинояти роҳзании мазкур шаҳрвандон: Садиров Ҳувайдо Ҷаҳонгирович, соли таваллудаш 1983 ва Файзиев Рустам Ғуломалиевич, соли таваллудаш 1997, донишҷӯи бахши 4-уми Донишгоҳи молия ва иқтисоди Тоҷикистон дастгир шуданд. Ҳангоми пешбурди корҳои оперативӣ-тафтишотӣ муайян карда шуд, ки номбурдагон бо маслиҳати пешакӣ баҳри ба даст овардани маблағи калони пулӣ, дар рӯй ниқоб пӯшида, бо таҷҳизоти техникии «электрошок» мусаллаҳ шуда, ба манзили истиқоматии шаҳрванд Чекушина Гулнора, воқеъ дар кӯчаи Н.Қарабоеви н.Фирдавсӣ ворид гардида, шавҳараш Чекушин Шавкат Кашафович, соли таваллудаш 1955 ва духтараш Чекушина Юлия, соли таваллудаш 1981-ро бо таҷҳизоти техникии «электрошок» ба сару рӯяшон зарба зада, ҳамзамон бо скотч дастҳояшонро бастаанд.
    Гумонбаршудагон баҳри дарёфти маблағи пулӣ манзили истиқоматиро кофтуков намуда, аз онҷо 1200-сомонӣ маблағи пулӣ ва як миқдор ҷавоҳироти биҷутериро рабудаанд, ки бо ин амалашон ба ҷабрдидагон дар баробари зарари ҷисмониву маънавӣ расонидан, ба маблағи 1600-сомонӣ зарари пулӣ низ расонидаанд. Бо дастрасии далелҳои зикргардида, айни ҳол нисбати ҳодисаи мазкур тибқи талаботи моддаи 249 (Роҳзанӣ) Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, гумонбарон дар ҳабси пешакӣ қарор доранд.

Психологияи миллӣ-7

     Дар маркази ш.Хуҷанд, рӯбарӯйи маркази савдои «Авасто» то 10.12.2018 арчаи Соли навӣ ба андозаи 20 метр бо паҳноии 9 метр қомат афрохта шуда, бори аввал дар бистсолаи охир аст, ки чунин Арчаи Соли навӣ дар маркази маъмурии в.Суғд бо чунин шаҳомат зеб дода мешавад.
    Бино ба иттилои Маъмур Юсуфӣ, котиби матбуотии раиси ш.Хуҷанд, арчаи солинавии ш.Хуҷандро 40 000 чароғак дар 400 чароғноқили ороишдиҳанда бо зиёда аз 4000 бозичаҳои гуногун бо дизайни муосир зеб хоҳанд дод.  Чунин иқдом бо дастгирии раиси вилояти Суғд Раҷаббой Аҳмадзода амалӣ гардида, раванди афрохтани Арчаи Соли навӣ зери назорати доимии раиси ш.Хуҷанд Маъруф Муҳаммадзода қарор гирифтааст.

   Ба ҳама маълум аст, ки боду ҳавои имсола хеле гарм омада, қариб ба ҳамаи намуди маҳсулоти растанипарварӣ дар в.Хатлон зарари худро расонд. Тибқи иттилои сардори Сарраёсати кишоварзии в.Хатлон Сироҷев Меҳнатулло ба мухбири СССР, ҷамъоварии картошка дар 10 моҳи соли ҷорӣ 213,038 тонна, ки нисбати соли гузашта 54,380 тонна зиёд аст, ташкил додаст. Дурнамои пахта дар соли ҷорӣ 250 310 тонна муаян шудааст ва айни ҳол ҷамъоварии пахтаи 143 517 тонна-ро ташкил медиҳад. Ҷамъоварии ангур дар вилоят беш аз 96,000 тонна аст, аммо дар баробари ин аксарияти деҳконони ноҳияҳои Ҷ.Балхӣ, Ҷайҳун ва Дӯстӣ натавонистанд сари вақт ҳосили пиёзро ҷамъоварӣ намоянд.
   - Ростӣ, ҳосили имсола хеле хуб шудааст, аммо соҳибкорон хело нархи арзон пешниҳод мекунанд. Мо бозорҳои минтақаи Бохтарро дидем, савдогарон пиёзро то 1,20 то 1,50 сомонӣ барои ҳар кило мефурӯшанд. Соҳибкорон ё тоҷирон барои 1 кг ба мо 30 дирам пешниҳод мекунанд, магар ин аз рӯи инсоф аст!? Касе андеша намекунад, ки деҳқон чӣ қадар маблағ хароҷот мекунад барои кишти пиёз, нархи сӯзишвории дизелӣ низ ҳоло 8,20 сомонӣ аст, соли гузашта 4,50 сомониро ташкил мекард, 1 халта доруи минералӣ 200 сомонист, соли гузашта бошад аз 150 то 170 сомониро ташкил мекард. Бигзор ҳосил дар зери замин истад, аммо бо чунин нарх ба тоҷиру соҳибкор намефурӯшам. Акнун худатон хулоса бароред, ки бештар фоида мебинад, деҳқон ё тоҷир?, - таъкид намуд зимни сӯҳбат Ҳоҷиато Давлатов, яке аз кишоварзони н.Ҷ.Балхӣ.
   Ҳоҷиато Давлатов мегӯяд, ки чаро масъулин наметавонанд нархи сӯзишвории дизелиро ба танзим дароранд?
   Дар ин робита Исмонов Фирӯз, сардори Раёсати зиддинҳисории в.Хатлон дар сӯҳбати телефонӣ иброз дошт, ки нархи сӯзивории дизелӣ дар ҷаҳон гарон асту то нархи он дар биржаи ҷаҳонӣ поён нашавад, нархи он арзон намешавад. Аксарияти соҳибкорон, ки бо хариду фурӯши сӯзишворӣ машғуланд, низ намехоҳанд, ки нархи сӯзишворӣ баланд шавад, чунки агар нархи сӯзишворӣ боло равад, андозҳо ҳам боло  мераванд.

Баҳодур Уроқов, СССР, вилояти Хатлон
   

Президенти Украина-Петр Порошенко бинобар хавфи вазъ дар атрофи халиҷи Керч ва тасарруфи 3 киштии ҳарбии Украина аз тарафи Русия, зери фармони ҷорӣ шудани қуюди шабгардӣ имзо гузошт. Ҳолати низомӣ 2 моҳ-то 25 январ эълон шуд. Петр дар фармон рафтори Кремлро таҷовузи низомӣ номид. Ҳоло Порошенко аз Маскав талаб дорад, ки киштиҳоро бо маллоҳонаш дар зудтарин фурсат озод кунад.

Муаллими собиқадор Ҳасанбой Шерзода, аз деҳаи Миндонаи шаҳри Панҷакент (тел: 92 793 77 28) дар меҳмонии газетаи СССР гуфт, ки радиои маҳаллии ш.Панҷакент эълон кард, ки «рӯзҳои 29, 30 31-и октябр дар мағозаи қолинфурӯшии «Майсара» палосу қолинҳои истеҳсоли Қайроқум 20% арзон фурӯхта мешаванд». Хурсанд шуда, 3 ноябр ба дӯкон рафтам. Расул-соҳибдӯкони «Майсара» болои кат якпаҳлӯ зада, бо ғурур ба сару либоси харидор нигариста, нарх мегузошт. Ман, ки бо сару либоси деҳқонӣ омада будам, арзиши 5 метр палосро пурсидам. Расул гуфт: 600 сомонӣ! 600 сомонӣ дар дасташ дода палосро харидам. Яъне, ҳар метри палос 120 сомонӣ! Аз нархгузории ӯ ба шубҳа монда, рӯзи дигар бо тағйири сару либос ба ҳамон дӯкон рафта, аз дур назорат кардам. Расул метри ҳамон палосро бо қимати 90 сомонӣ мефурӯхт. Яъне ӯ аз ман 150 сомонӣ зиёд пул гирифтааст. Нархгузории Расул ба сару либоси харидор вобастагӣ дошта, ягон палос ва зарфҳои чинивориаш ҳам нархнома надошт. Чаро ташкилотҳои зидахли Ҳукумати ш.Панҷакент лаҷоми Расулро сар дода мондаанд?

Агар шахсе ба шаҳру ноҳияҳои Кӯлобу Бадахшон сафар намояд, гоҳо аз шоҳроҳи Бохтар-Данғара мегузарад. Дар 2 тарафи роҳ сохтмону иншооти зебою дилкаш, дарахтони гуногун ва буттаҳои ҳархела дида мешавад. Замони Иттиҳоди Шуравӣ дар заминҳои шафати шоҳроҳ, хосса, мавзеъи Паси Гаҷ  тахмин 40-50 сол пеш бо тавсияи олимон шинонидану парвариши дарахтони пистаро, ки ба пистаи бодғис шабоҳат дорад, ба сомон расониданд, ки ин мероси хуб аст, зеро мегӯянд дарахти писта 300 сол умр мебинад. Аммо дар баробари дарахтзоркунии кӯҳу доманаҳо ҳолати ҳузнангезе низ ба чашм мерасад, ки инсонро ба ғазаб меорад. Чунки зери пистазор аз шафати роҳ тақрибан дар масофаи 10-15 метр гӯристоне пайдо шудааст, ки аз рӯи одоб нест. Дар соли Рушди ҳунарҳои мардумӣ ва сайёҳӣ ҷаҳонгардон бештар аз ин масир убур мекарданд ва яқин, ки ба ин бархӯрди мо бо мурдагон назари нек надоштанд ва ин ҳол имиҷи пистаи тоҷикро низ поин мебарад.
 
Мазор ва писта
Аён, ки ин гӯристон солҳои 1990, дар замони ҷанги шаҳрвандӣ ба вуҷуд омадааст ва боварнокарданист, ки пистазори он соҳиб надошта бошад, ё хусусӣ нашудааст. Ё агар он дар мувозинати давлат аст, пас ин рафтор ба қаҳрамонҳои асари «Сафар аз Пертербург то Маскав» шабоҳат дорад. Дар одобу хиради ҳама динҳои ҷаҳонӣ, аз ҷумла, дини мубини Ислом ризқу рӯзии аз мазор ёфтанро маҳкум кардаанд. Дар Таърихи Табарии Балъамӣ, дар ҳошияи зикри насаби паёмбари Ислом (с.) оид ба дарёфти ризқу рӯзӣ аз қабристон таъкиди ҷиддӣ омадааст, ки ҳақ ба ҷониби ӯст. Дар ин маврид Ҷомӣ ҳам меафзояд:
Дорем зи шоҳи Ҳамадон чашм, ки боз,
Эмин шавад аз ҳаром, он роҳи дароз.
Аз ҳама ташвишовар, ин аст, ки муллое зери ин пистазор нишаста, тиловати Қуръон мекунад ва боз меваи  аз устухони одам баҳра гирифтаро барои истеъмоли худ ва барои фурӯш ҷамъ меорад. Хуб мешуд, ба муносибати 30 солагии Истиқлолияти давлатии ҶТ дар самти ба низом даровардани қабристонҳо муллоҳо ва ё имомхатибон дастур бигиранд.

Ҳоҷӣ Исмоил ва подачарои гӯристон
3-4 сол пеш зимни 1 ҷаноза дар н.Дӯстӣ (Ҷиликӯл) домуллои муътабари мо-Исмоил Пирмуҳаммадзода сухан гуфтанд. Ман ба ӯ рӯ оварда бо риояи одоби шарқиёна гуфтам, ки домулло хуб мешуд, оид ба подаи болои қабрҳо назари худро бигӯед. Домулло мардумро боздошта хитоб кард, ки «ин оғо дуруст мегӯяд, ин амал нохуб аст ва сари ислоҳи он бошед». Хуллас, бовар надорам, ки ин гӯристони навтаъсис бо қарори дахлдори мақомот ба вуҷуд омада бошад.

Талбон Сафарови Мункӣ,
собиқадори прокуратура, н.Вахш, тел: 93 551 64 48

Дар газетаи СССР (№30, 26.07.2018) мақолаи ман бо номи «Тақвими Шӯрои уламо ислоҳ намешавад?!) чоп шуда буд. Баъдан Раёсати Маркази Исломии ҶТ вокуниш навиштанд, ки «Тақвими рамазонӣ дуруст аст» (СССР, №34, 23.08.2018). Ва гунаҳкор карданд, ки гӯё бо ғалатгӯиҳоям мардумро ба иштибоҳ меандозам. Ҳоло исбот мекунам, ки кӣ ҳақ аст!