Нашунидам нагӯед!!!
Тулӯи навтарин ҷилои ахтарон дар осмони тарона бо устувортарин қадам дар саҳнаи овозхонӣ:
-Некрӯзи Зафар дар ҳамсадоӣ бо санами зеборух ва зебосадо-Шабнами Раҳмониён бо замзамаи ишқи руъёии таронаи Шоира Раҳимҷон – «Инқилоб мехоҳам» таҳия ва омода ба пахш аст.
Ин тарона рӯзҳои наздиктарин сабт, коргард, танзим ва монтаж шуда, тақдими ҳаводорони таронаҳои ҳирфаӣ хоҳад шуд. Интизор бошед, ки Мо Метавонем!!!

Маркази продюсерии «Шоира» дар назди газетаи СССР

   Субҳи имрӯз президенти ҶТ Эмомалӣ Раҳмон дар доираи сафари кории хеш ба вилояти Суғд ба ш.Истаравшан омада, аз мавзеҳои «Қизилӣ» ва «Сексарӣ» аз наздик ошно гашт. Пойгоҳҳои обкашии мавзеи ”Қизилӣ” ва “Сексарӣ” баъди таҷдид ва азнавсозӣ ба фаъолият шурӯъ карда, баъд аз 26 соли бекорхобидан боз аз нав обшор мегарданд.
   Бино ба итиллои расмӣ, баъди ба фаъолият оғоз кардани пойгоҳҳои обкашии “Қизилӣ” ва “Сексарӣ” ҳолати мелиоративии 4 ҳазор гектар замин беҳтар гашта, аз ҷумла, 1300 гектар замини аз кишт берунмонда ба гардиш дароварда шуда, аз ҳисоби заминҳои лалмӣ, чарогоҳ ва ғайрикишоварзӣ 1000 гектар замин аз худ карда мешавад. Масоҳати умумии заминҳои мавзеъ дар маҷмуъ 5 ҳазору 930 гектарро ташкил медиҳад, ки 3 ҳазору 300 гектараш замини корами обӣ мебошад.
Баъди обёрии заминҳо ва бунёди боғот дар ин минтақа 5500 оила соҳиби ҷойи кори доимӣ ва даромади хуби иқтисодӣ мегарданд, ки ин яке аз ҳадафҳои асосии сиёсати иҷтимоии роҳбарияти давлату ҳукумати мамлакат аст.
   Аз рӯи маълумоти мутахассисони соҳа дар минтақаи “Қизилӣ” соли 2017 — 1 ҳазору 279 гектар замин, аз ҷумла 716 гектар фонди махсус ва боқимонда заминҳои захираи давлатӣ аз сабаби номураттаб кор кардани пойгоҳҳои обкашӣ, таъмирталаб будани каналҳои обгузар ва беназорат мондан заминҳо аз гардиши кишоварзӣ берун монда буданд.
   Тибқи маълумот айни замон дар мавзеи “Қизилӣ” ва “Сексарӣ” беш аз 500 хоҷагии деҳқонӣ фаъолият дорад, ки дар ихтиёри онҳо зиёда аз 2 ҳазор гектар замини корами обӣ мавҷуд аст. Баъди таҷдиди хоҷагиҳои кишоварзӣ дар мавзеи мазкур 335 гектар замин ба 33 хоҷагии деҳқонии нав вогузор шуд. Ҳамзамон барои таъсиси 17 хоҷагии дигар ва ба гардиши кишоварзӣ даровардани боз 520 гектар замин корҳо идома доранд.
   Эмомалӣ Раҳмон пас аз шиносоӣ бо фаъолияти пойгоҳҳои обкашӣ дар 1 мавзеи хушбоду ҳавои байни ш.Истаравшан ва н.Деваштичи в.Суғд бо шинонидани ниҳол ба бунёди боғи интенсивӣ дар майдони 20 гектар асос гузоштанд. Дар боғи нави интенсивӣ ниҳоли дарахтони себ, олу, гелос ва дигар намуди дарахтони мевадиҳандаи содиротӣ шинонида шуд.
   Дар мавзеи “Қизилӣ” 5035 гектар заминҳои шаҳри Истравшан ва 3748 гектар заминҳои ноҳияи Деваштич мавҷуд аст, ки аз ин дар шаҳри Истаравшан 580 хоҷагии деҳқонӣ ва дар ноҳияи Деваштич 27 адад хоҷагиҳои деҳқонию инфиродӣ фаъолият доранд. Дар мавзеи “Қизилӣ” минбаъд парвариши 3 навъи себ, ду намуд олу, 3 навъи ток, аз ҷумла “Тоифии намрин”, “Кишмиши сиёҳ” ва “Ангури Ҳусайнӣ” ва як намуд олуча ба роҳ монда мешавад.
  

Минбаъд Амрико қобилияти таъмини чоряки буҷаи маблағи СММ-ро надорад. Дар ин бора намояндаи доимии Вашингтон дар СММ Никки Хейли изҳор намудааст. “Башардӯстӣ масъулияти баланди дастаҷамъист. Ҳар ҷониб бояд саҳми  беғарази худро дар роҳи дастгирӣ ба эҳтиёҷмандон гузорад ва дигаронро низ барои пурзӯр кардани кӯмаки ҳамаҷониба даъват кунад”, - гуфтааст ӯ.
Имсол, яъне с.2018 ҳаққи аъзогии ИМА аз ҳисоби умумии буҷаи СММ 28,5%-ро ташкил дод. Қайд карда мешавад, ҳатто Чини Бузург бо қудрати хело бузурги иқтисодии худ дар олам ҳамагӣ 10%-и буҷаи СММро мепардозаду тамом. Хейли ваъда додааст, ки ИМА аз рӯи инсофу хиради амрикоӣ амал карда, кам кардани хараҷоти ташкилотро чунон нозукона тарҳрезӣ хоҳад кард, ки ба фаъолияти ягон ташкилотҳои ҷаҳон зарратулмисқол ҳам бошад, зарар нахоҳад расид. Дар ассамблеяи навбатии СММ барои тасдиқи нақшаи кори с.2018 буҷаи он ба 5,39 млрд. доллари амрикоӣ расонида шуда буд, ки аз соли гузашта 166 млн. доллар камтар аст. Тарафдорони аз ҳама фаъоли қайчизании буҷаи ташкилот мансабдорони ИМА мебошанд, ки кӯшиш ба он доранд, буҷаро ба 250 млн. доллар камтар карда, миссияи СММро дар Покистон, Фаластин, Ливия ва Афғонистон тамоман қатъ намоянд. Баробари ин тарафи амрикоиҳо маҷбур карда истодаанд, ки музди меҳнати кормандони СММ ва як қатор барномаҳои рушди ин кишварҳо низ тамоман баста шавад. Ҳоло ҳақсупории ҳар давлат аз рӯи миқдори инкишофи иқтисодиёти он аст. 193 кишвар аъзои ин ташкилоти бонуфузи ҷаҳон буда, дафтари асосии он дар шаҳри Ню-Йорк воқеъ аст. Намояндагиҳои он дар шаҳрҳои Вена, Женева, Найроби, Москва ва Пекин низ амал мекунанд.

Шамсиддини Муқим,
хабарнигори махсуси “СССР” дар Россия

Дирӯз, бо ширкати президенти ҶТ Эмомалӣ Раҳмон дар ш.Панҷакент маросими пардабардорӣ аз рӯи муҷассамаи шоири халқии Тоҷикистон Лоиқ Шералӣ баргузор гардид. Муҷассамаи шоири тавоно дар саҳни Маҷмааи бузурги фарҳангию эҷодӣ гузошта шуда, он аз ҷониби ҳайкалтарошон Рустам Маҷидов ва Мансур Ҳоҷибоев бо маҳорати баланди эҷодӣ сохта шудааст. Баландии муҷассама 6,3 ва паҳноиаш 6 метрро ташкил медиҳад. Барои таҷдиди гулгашт ва бунёди муҷассама дар ин майдон аз ҳисоби мақомоти иҷроияи ҳокимияти давлатии в.Суғд қариб 1 млн. 400 ҳазор сомонӣ ҷудо гардида, он ба беҳтарин мавзеи истироҳату фароғат ва сайру саёҳати сокинону меҳмонони шаҳр табдил дода шудааст.
Бино ба итиллои расмӣ, масоҳати умумии гулгашти назди Маҷмааи фарҳангию эҷодӣ 3091 метри мураббаъро ташкил медиҳад. Лоиҳаи майдони мазкур аз ҷониби КВД «Лоиҳакаш» дар вилояти Суғд тарҳрезӣ шуда, пудратчиён ҶДММ «СУ-3» ва ҶДММ «Само» мебошанд. Дар давраи таҷдиди майдон ва гузоштани муҷассамаи шоири зиндаёд Лоиқ Шералӣ беш аз 80 нафар сокини маҳаллӣ ва сохтмончиёни соҳибтаҷриба бо ҷойи кор ва маоши хуб таъмин гардиданд. Муҷассама бо истифода аз металли ранга сохта шуда, таҳкурсӣ ва атрофи он бо санги хоро оро дода шудааст.
Дар атрофи муҷассама 4 фаввораи замонавӣ бунёд гардида, ҳамчунин гулҳои ранга ва дарахтони ҳамешасабзи ороишӣ шинонида шудаанд. Иншоот аз таҳхона ва 5 ошёна иборат буда, дорои 1 толори бузург бо 436 ҷойи нишаст, китобхона, маҷлисгоҳ, қаҳвахона, кинотеатр, толори варзишӣ ва утоқҳои корӣ мебошад.

5 нафар ҷавонмардони Тоҷик, ки дар 1 мағозаи фурӯшӣ пойафзол дар маркази савдои «Олучаи зимистона» кор мекарданд, ҳангоми сар задании сӯҳтор худро аз даст надода, ҷони худро ба хатар гузошта, беш аз 50 нафарро аз оташи марг наҷот доданд. Инҳо Фарзон Салимов ва Ҷамшед Абдуллозода аз Душанбе, Маҳмуд Хоҷаев аз Ҳисор ва Кароматулло Қурбонову Сӯҳроб аз Бохтар (Қӯрғонтеппа) мебошанд. Дар бораи қаҳрамонии ин ҷавонмардон пеш аз ҳама шабакаҳои телевизионии Россия хабар дода, таъкид ҳам кардаанд, ки ин бачаҳо имрӯз қаҳрамон ҳастанд.
Шабакаи телевизионии "Live”-и Русия бо 2 нафари онҳо – Фарзон Салимов ва Маҳмуд Хоҷаев мусоҳиба анҷом дода, онро нашр кард. Фарзон Салимов дар ин мусоҳиба мегӯяд, ки ӯ 29 сол ва 3 фарзанд дошта, ҳангоми сар задани сӯхтор пеш аз ҳама, 3 фарзандаш аз пеши чашмаш гузашт. Маҳмуд Хоҷаев, ки 19-сола аст, ҳанӯз издивоҷ накардааст. Бешак, ин бачаҳо қаҳрамонанд!

Генерал-полковники 67-сола Саидамир Зуҳуров-раиси собиқи КДАМ ва сардори Сарраёсати ҳифзи сирри давлатӣ дар назди ҳукумати Тоҷикистон, ки аз шоми 22.01.2018 дар пайи инсулт (хунрезии мағзӣ) дар реаниматсияи бемористони Қарияи Боло бистарӣ буд, ба хонааш ҷавоб шудааст. Ӯ, ки феълан мушовири ширкати мобилии "Билайн" аст, дар сӯҳбат бо хабарнигорон гуфтааст, иллати аслии беморияш солхӯрдагӣ буду фикри аз ҳадд зиёд. Зуҳуров гуфтааст, айни ҳол вазъи сиҳатияш мӯътадил асту таҳти назорати пизишкон қарор дорад. Бемории сангин бори дигар исми Сайдамир Зуҳуров-генерали касбии амният, чекисти машҳуртарини муосирро боз сари забонҳо кард. СССР низ тасмим гирифт бори дигар дар бораи ӯ нависад. Мо Метавонем!

Дар ҳоле, ки Кумитаи сайёҳӣ ва туризми мо дар хоби ноз аст, ширкатҳои туристии Қирғизистон бренди Помирро моҳирона истифода бурда, пул кор мекунанд!!!