Дар арафаи ҷашни 27 солагии истиқлолияти давлатии Ҷумҳурии Тоҷикистон бо Фармони президенти Ҷумҳурии Тоҷикистон Эмомалӣ Раҳмон барои фаъолияти арзандаву самаранок дар мақомоти маҳаллии ҳокимияти давлатӣ Рустами Эмомалӣ-раиси шаҳри Душанбе бо Ордени «Зарринтоҷ» дараҷаи 2 сарфароз гардид.
   Бино ба итиллои расмӣ, 30.08.2018 дар Қасри Миллат президенти ҶТ Эмомалӣ Раҳмон ба истиқболи 27-умин солгарди истиқлолияти давлатии Ҷумҳурии Тоҷикистон ба намояндагону касбу кори гуногуни кишвар мукофотҳои давлатӣ, рутбаҳои баланди низомӣ ва ҷоизаҳои давлатӣ супорид.
   Бо Фармони президенти Ҷумҳурии Тоҷикистон ин навбат ба ифтихори ҷашни 27-умин солгарди Истиқлолияти давлатӣ ба фаъолони кишвар Ордени «Зарринтоҷ» дараҷаи 2, Ордени «Дӯстӣ», Ордени «Шараф» дараҷаи 2, унвонҳоии фахрии «Ҳунарпешаи халқии Тоҷикистон», Арбоби илм ва техникаи Тоҷикистон, Ҳунарпешаи шоистаи Тоҷикистон, Корманди шоистаи Тоҷикистон, Медали «Хизмати шоиста», Ифтихорномаи Ҷумҳурии Тоҷикистон, Ордени «Спитамен» дараҷаи 2, Ордени «Шараф» дараҷаи 2, Медали «Ҷасорат», Медали «Марзбони шуҷои Тоҷикистон», ба хизматчиёни мақомоти ҳифзи ҳуқуқу тартибот, мудофиа, амният, суд ва агентиҳо рутбаҳои ҳарбии навбатӣ, дараҷавӣ ва махсус, ба олимони ҷавон Ҷоизаи Президенти Ҷумҳурии Тоҷикистон дар соҳаи маориф дар соли 2018, Ҷоизаи давлатии Ҷумҳурии Тоҷикистон ба номи Абӯалӣ ибни Сино дар соҳаи илм ва техника дар соли 2018 ва Ҷоизаи ба номи Исмоили Сомонӣ дар соли 2018 тақдим карда шуд.
   Бо Фармони президенти Ҷумҳурии Тоҷикистон инчунин дигар фаъолони касбу кори гуногун бо мукофотҳои давлатӣ қадршиносӣ гардиданд. 1 нафар бо Ордени «Дӯстӣ», 10 нафар бо Ордени «Шараф» дараҷаи 2, 1 нафар бо Унвони фахрии «Ҳунарпешаи халқии Тоҷикистон», 1 нафар бо Унвони фахрии «Арбоби илм ва техникаи Тоҷикистон», 2 кас бо Унвони фахрии «Ҳунарпешаи шоистаи Тоҷикистон», 18 нафар бо Унвони фахрии «Корманди шоистаи Тоҷикистон», 64 нафар бо Медали «Хизмати шоиста», 4 нафар бо «Ифтихорномаи Ҷумҳурии Тоҷикистон» қадрдонӣ карда шуданд.
   Барои хизмати намунавӣ ва саҳми арзанда дар таъмини ҳифзи ҳуқуқҳои конститутсионии шаҳрвандон, мубориза бо ҷинояткорӣ, нигоҳдории тартиботи ҷамъиятӣ ва ҷасорату фидокорӣ, кормандони мақомоти ҳифзи ҳуқуқ, ҳокимияти судӣ ва хизматчиёни ҳарбӣ — 4 нафар соҳиби Ордени «Спитамен» дараҷаи 2, 5 нафар бо Ордени «Шараф» дараҷаи 2, 12 нафар бо Медали «Ҷасорат»,10 кас бо Медали «Хизмати шоиста» ва 1 нафар бо Медали «Марзбони шуҷои Тоҷикистон»,  19 нафар бо рутбаҳои ҳарбии навбатӣ, дараҷавӣ ва махсус, аз қабили генерал —  полковники хизмати дохилӣ, генерал — майори гвардия, мушовири давлатии адлияи дараҷаи 2, генерал — лейтенанти адлия, генерал — лейтенанти милитсия, 2 нафар генерал — лейтенант, 4 нафар бо рутбаи генерал — майори милитсия, генерал — майори хизмати назорати маводи нашъаовар, генерал —  майори адлия, мушовири давлатии адлияи дараҷаи 3, генерал — майори адлия ва 3 нафар бо рутбаи навбатии генерал — майор шуданд.
   Бо Амри президенти Ҷумҳурии Тоҷикистон 5 нафар соҳиби Ҷоизаи Президенти Ҷумҳурии Тоҷиистон дар соҳаи маориф дар соли 2018, 3 нафар Ҷоизаи давлатии Ҷумҳурии Тоҷикистон ба номи Абӯалӣ ибни Сино дар соҳаи илм ва техника дар соли 2018 ва 12 соҳиби Ҷоизаи ба номи Исмоили Сомонӣ дар соли 2018 гардиданд.

Президенти Ҷумҳурии Тоҷикистон Эмомалӣ Раҳмон дирӯз зимни баргузории 1 ҷаласаи ҳукуматӣ қарори фурӯши сим-кортҳоро бо нархи 250 сомонӣ мутаваққиф кард. Бино ба иттилои сомонаи www.president.tj, президенти мамлакат ба роҳбарони вазорату идораҳои дахлдор супориш дод, ки фурӯши симкортҳоро бо нархи 250 сомонӣ то 1-уми январи соли 2019 мутаваққиф кунанд. Ба ин тартиб, то 4 моҳи дигар симкортҳо ба таври маъмулӣ фурӯхта хоҳанд шуда, мизоҷон имкон доранд бе навбатпоии дурудароз ва ҳаёҳӯй симкортҳои хешро рафта, дар марказҳои хизматрасонӣ дубора ба қайд бигиранд. Инчунин, бо дастури роҳбари давлат 1 комиссияи вежа таъсис ёфта, масъалаи нарх ва тартиби истифодабарии симкортҳо омӯхта мешаванд.

   Варзишгари маъруфи тоҷик Беҳрӯз Хоҷазода, дар Бозиҳои тобистонаи  Осиё-2018, ки дар шаҳрҳои Ҷакарта ва Палембанги Индонезия ҷараён дорад, дар мусобиқаи гуштии кураш дар вазни то  81 кило ҷойи дуюмро гирифта, соҳиби медали нуқра гардид.
   Ёдовар мешавем, ки Дилшод Назаров қаҳрамони бозиҳои Олимпии Рио-2016 аввалини медали нуқраро аз намуди гурзпартоӣ дар Бозиҳои Осиё-2018 бадаст оварда буд.

   Бино ба иттилои хабаргузориҳои Тошканд, президенти Ҷумҳурии Ӯзбекистон Шавкат Мирзиёев бо фармоне аз 29 август 1 қатор ходимони давлатию ҷамъиятӣ, намояндагони фарҳанг, илм ва тандурустии Тоҷикистонро бо мукофотҳои давлатӣ сарфароз гардонид. Дар баробари ин, Сарвазири ҶТ Қоҳир Расулзода ва Вазири корҳои хориҷии ҶТ Сироҷиддин Муҳриддин бо ордени «Фидокорона хизматлари учун» («Барои хизматҳои фидокорона») сарфароз гардонида шуданд. Низом Қосим – Раиси Иттифоқи нависандагони Тоҷикистон ва Тошпӯлод Гулмуродов – мудири кафедраи кардиохирургияи Донишкадаи таҳсили баъдидипломӣ дар соҳаи тандурустӣ бо ордени  «Меҳнат шуҳрати» қадршиносӣ шуданд.
Адҳам Холиқов-роҳбари бадеии Муассисаи давлатии «Театри опера ва балети ба номи С. Айнӣ» ва Давлатманд Холов-роҳбари бадеии ансамбли давлатии «Фалак»-и Кумитаи телевизион ва радиои назди Ҳукумати ҶТ бо унвони фахрии «Ҳунарпешаи халқии Ҷумҳурии Ӯзбекистон» қадрдонӣ шуданд.
Бо ордени «Дустлик» («Дӯстӣ») Алӣ Муҳамадиев — мудири шуъбаи Фонди мероси хаттии Академияи илмҳои Тоҷикистон, Ифтихор  Ҷӯраев — сардори Раёсати бозрасии назорати давлатии геодезӣ, делимитатсия ва демаркатсияи сарҳади Кумитаи давлатии идораи замин ва геодезии ҶТ, Раҳим Марупов — сарходими Институти физикаю техникаи ба номи С.Умарови АИ Тоҷикистон ва Ҳасан Бердиқулов-узви Иттифоқи нависандагони Тоҷикистон сарфарозонида шуданд.
   Гуфта мешавад, ки мукофотҳо барои саҳми сазовор дар таҳкими робитаҳои бисёрасраи дӯстӣ ва ҳусни ҳамҷаворӣ миёни халқҳои бародари Ӯзбекистону Тоҷикистон, фаъолиятҳои самарабахш ҷиҳати тавсеаи робитаҳои фарҳангию гуманитарӣ, ҳифз ва такмили мероси таърихии умумӣ, арзишҳои  маънавӣ ва анъанаҳо, хизмати шоиста дар рушди ҳамкории мутақобилан судманди тиҷоратию иқтисодӣ ва шарикии стратегии кишварҳои мо» сарфароз гардонида шуданд.

(ҷавоб ба саволҳои шаҳрванд Аброр Соқиев, (СССР, 12.07.2018, №28(513)

Ҳукумати Русия пешниҳод кардааст, ки ба президент Владимир Путин ваколати шахсан муайян кардани гурӯҳи шаҳрвандони хориҷиеро, ки ҳаққи гирифтани шаҳрвандии Русияро доранд, дода шавад. Бори аввал дар бораи зарурати ин тағйирот Путин 7 июн таъкид карда буд. Ӯ дар посух ба суол дар бораи шаҳрвандии Русия гуфт, ки кишвар бояд ин равандро содатар кунад. Тибқи қоидаҳои нав, агар касе шаҳрвандии Русияро бо низоми осон гирифта бошад, метавонад аз шаҳрвандии кишвари худ даст накашад.

Прокуратураи генералии Қазоқистон бо нашри 1 изҳорот Мухтор Аблязов-рақиби Нурсултон Назарбоев-президенти Қазоқистонро дар куштори мудири "Бонки Туран Алем" (БТА)-и ин кишвар Ержан Татишев дар с.2004 айбдор карда гуфт, ӯ дар созмон додани қатли барқасдонаи Ержан гумонбар аст. Ин ҷиноят ба гуфтаи прокуратура аз сӯи 1 гуруҳ бо маслиҳати пешакӣ анҷом шудааст. Аблязовро барои бозпурсӣ даъват ва ӯро огаҳ карда буданд, ки иштирокаш дар тафтишот ҳатмист, вале дар вақти муайяншуда ҳозир нашуд ва сабаби наомадани худро низ шарҳ надод. Ёдовар мешавем, ки Татишев декабри с.2004 дар вилояти Ҷамбул кушта шуд ва тафтишот низ он замон ба хулосае омад, ки ӯ ҳангоми шикор тасодуфан ҷон бохтааст.

Ҳунарманди машҳури 81-солаи собиқ Иттиҳоди Шӯравӣ Иосиф Давидович Кобзон пас аз бемории тӯлонии саратон даргузашт. Кобзон с.1937 дар Украина таваллуд шуда, вакили Маҷлиси Русия буд. Пештар хабар дода шуд, ки муовини аввали Кумитаи Маҷлиси Русия дар масоили фарҳангӣ Кобзон ба яке аз бемористонҳои Маскав бистарӣ гардид. Ӯ аз с.2005 инҷониб бо бемории саратон мубориза мебурд. Бо ҳофизони Тоҷикистон, аз ҷумла, ҳунарманди мардумии Иттиҳоди Шӯравӣ Ҷӯрабек Муродов дӯстиву иртибот дошт. Чанд маротиба дар Тоҷикистон консертҳояшро баргузор кардааст.