Марзи миллӣ-8

   Аламшозода Абдураҳмон Аламшо, муовини аввали вазири корҳои дохилии ҶТ бо фармони президенти мамлакат Эмомалӣ Раҳмон ҳамзамон сардори Раёсати ВКД дар ВМКБ таъин гардид. Ин таъинот рӯзи 18.09.2018 сурат гирифта, дар баробари ин сарвари давлат ба вазифаҳои сардорони Раёсати корҳои дохилӣ дар шаҳру ноҳияҳои вилоят, муовинони сардори Раёсат, сардорони шӯъбаҳои БДА, сардорони шӯъбаҳои ВКД дар ш.Хоруғ, ноҳияҳои Шуғнон, Ишкошим, Мурғоб ва Рӯшонро низ иваз намуд.
   Бояд қайд намуд, ки ин тағийрот дар роҳбарияти мақомоти милитсияи ВМКБ дар пайи интиқоди сахти президенти ҶТ Эмомалӣ Раҳмон дар робита ба 1 қатор қонуншиканиҳо дар вилоят ва бемасъулиятии кормандони милитсия сурат гирифта, ҳамчунин бо фармони президенти Ҷумҳурии Тоҷикистон Додихудозода Давлатмо Бахтибек аз вазифаи раиси суди Вилояти Мухтори Кӯҳистони  Бадахшон озод гардида, Усмонзода Шоғуфрон-раиси Суди Вилояти Мухтори Кӯҳистони Бадахшон таъин гардид.
   Мутобиқи моддаи 20 Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ» бо дастури президенти Ҷумҳурии Тоҷикистон муовинони раиси ВМКБ аз вазифа озод ва барои ба вазифаи муовини 1-уми раиси ВМКБ таъин намудани Мирзонаботов Алишер Худобердиевич, муовинони раиси ВМКБ таъин гардидани Амирбекзода Назира, Иматшозода Анвар Иматшо ва Носиров Умедҷон розигӣ дода шуд.
   Президенти мамлакат Эмомалӣ Раҳмон барои пешгирӣ кардани қочоқи маводи мухаддир, нигоҳ доштан ва бо худ гирифта гаштани силоҳ, убури гайриқонунии сарҳад, вайрон намудани тартиботи ҷамъиятӣ, мубориза бар зидди нашъамандӣ ва тарбияи насли солиму солеҳ дар назди кормандони мақомоти ҳифзи ҳуқуқ ва дигар хизматчиёни давлатӣ вазифаҳои мушаххас гузошт.

  МДК «Душанбенақлиётхадамотрасон» тасмим гирифтааст барои истифода аз нақлиёти ҷамъиятии пойтахт кортҳои нақлиётии якдафъаинаро ҷорӣ намояд. Ин пешниҳод аз ҷониби муассиса алакай ба ширкате, ки масъули тайёр намудани кортҳои нақлиётӣ ва ба системаи мазкур ворид намудани хизматрасонии нав аст, бо чунин пешниҳод муроҷиат кардааст.
   Дар МДК «Душанбенақлиётхадамотрасон» ба мухбири СССР гуфтанд, ки ин тасмим ба хотири мусофироне гирифта шудааст, ки аз нақлиёти ҷамъиятии пойтахт, хосса автобусу троллейбусҳо хеле кам истифода бурда, кортро танҳо барои 1 маротиба лозим доранду халос. Аз ҷумла, гуфта мешавад, ки кортҳои нақлиётии якдафъаина барои сайёҳону меҳмонони хориҷиву дохилӣ пешбинӣ шуда, онро дар дохили нақлиёт танҳо ронанда ҳуқуқи фурӯхтан хоҳад дошт.

   КВД «Обу коррези Душанбе» эълон менамояд, ки аз 15.10.2018 ҳаққи хизматрасониҳои таъминоти аҳолӣ бо оби нӯшокӣ ва қабули рафъи партобҳоро тибқи нархномаи нави аз ҷониби Хадамоти зиддиинҳисории мамлакат тасдиқшуда ба роҳ хоҳад монд.
    Инчунин, ин тасмим ба ташкилотҳои ғайрибуҷавӣ низ дахл дошта, барои ташкилоту муассисаҳои буҷавӣ бошад истифодаи оби ошомиданӣ аз рӯи нархномаи нав аз 01.01.2019 ба роҳ монда мешавад. Дар ин маврид алакай қарори марбутаи раиси ш.Душанбе Рустами Эмомалӣ ба тасвиб расидааст.

   Нерӯгоҳи барқи обии хурди «Тоҷикистон», ки ҳафтаи гузашта бо иштироки президенти ҶТ Эмомалӣ Раҳмон дар н.Мурғоб ифтитоҳ гашт, дорои иқтидори 1500 кВт буда он тамоми ташкилоту идора ва аҳолии н.Мурғобро пурра бо барқ таъмин хоҳад кард.
   Бояд қайд намуд, ки баландии сарбанди ин нерӯгоҳ 64 метр ва дарозиаш 12 метрро ташкил дода, сарбанди мазкур дар ҷумҳурӣ ягона сарбандест, ки дар он иншооти махсуси моҳигузар сохта шудааст. Ин сарбанд боис бар он мегардад, ки болотар аз он ҳаҷми нисбатан зиёди об ба андозаи 2 млн. метри мукааб ҷамъ шавад ва ҳам барои неругоҳи барқи обӣ ва ҳам барои ҳифзи экологӣ, аз ҷумла моҳиҳо қулай мебошад.
   Толори мошинҳо масоҳати 468 метри мураббаъро ташкил дода, он бо истифода аз конструксияи металӣ ва панелҳои махсус сохта шудааст. Ин масолеҳ қобилияти гарминигоҳдорӣ аз дохил ва қобилияти хунукинигоҳдориро аз берун дошта, дар шароити н.Мурғоб мувофиқ мебошад.

   Имрӯз дар фурудгоҳи байналмилалии шаҳри Душанбе ҳавопаймои насли навтарин Embraer E190-E-2 аз ҷониби ширкати ҳавопаймоии «Сомон эйр» ва ширкати ҳавопаймосозии бразилиягӣ «Эмбраер» муаррифӣ карда шуд. Ҳавопаймоҳои мазкур, ки аз лиҳози арзиш, истифодаи сӯзишворӣ ва мусофиркашӣ дар самтҳои на он қадар дур бокайфиятанд, метавонанд дар ояндаи наздик дар баъзе аз хатсайрҳои минтақавӣ парвоз кунанд.
   Чуноне ки зимни баромади хеш Томас Ҳаллам, директори генералии ширкати ҳавопаймоии «Сомон эйр» иброз дошт, дар хамкорӣ бо Embraer ширкати «Сомон эйр» тасмим дорад шабакаи парвозҳои минтақавиро вусъат дода, бо истифода аз ҳавопаймоҳои муосиру самаранок парвозҳоро ба шаҳрҳои минтақаи Осиёи Марказӣ, алалхусус шаҳрҳои Ӯзбекистони ҳамҷавор афзоиш диҳад.
- Барои расидан ба ин хадафҳо Embraer-190-Е2 воситаи беҳтарин мебошад ва тавассути онҳо мо метавонем хароҷотҳои ширкатро ба таври назаррас коҳиш дода, шумораи парвозҳоро дар хатсайрҳои мавҷуда зиёд кунем, - таъкид дошт Томас Ҳаллам.
   Дар идомаи маросими истиқболи ҳавопаймои мазкур ҳозирин дохили ҳавопаймои Embraer шуда, дар парвози нахустини тантанавӣ аз рӯи масири Душанбе-қуллаи И.Сомонӣ-Душанбе ширкат варзиданд. Мусофирон имкон пайдо карданд аз наздик бо сохти хавопаймо шинос шуда, манзараҳои зебои кӯҳистони Тоҷикро аз равзанаи ҳавопаймо тамошо намоянд.

СССР

  Рӯзи 12.09.2018 бо иштироки президенти ҶТ Эмомалӣ Раҳмон дар маркази Вилояти Мухтори Бадахшони Кӯҳӣ ба сохтмони бинои Мақомоти иҷроияи ҳокимияти маҳаллӣ дар ш.Хоруғ санги асос гузошта шуд.
   Бояд қайд намуд, ки бинои нави ҳукумат дар масоҳати 1 га. бунёд ёфта, он аз 7 ошёна иборат хоҳад шуд. Дар ошёнаҳои аз 1 то 7-уми бино ҳуҷраҳои кории роҳбарият, раёсатҳои мақомоти шаҳр, роҳбарони кумитаҳои маҳаллаҳои шаҳр, идораву ташкилотҳои давлатии шаҳрӣ, толори калони маҷлис бо 400 ҷой, ошхона бо 140 ҷой ва ғайра ҷойгир карда мешаванд. Дар маҷмӯъ, иншооти муосир дорои 150 ҳуҷра бо 300 ҷойи корӣ мегардад.
   Ёдовар мешавем, ки аз 11 то 15 сентябри соли ҷорӣ президенти ҶТ Эмомалӣ Раҳмон бо сафари кори дар шаҳру ноҳияҳои ВМБК қарор дошта, боздиди хешро нахуст аз ноҳияҳои Ванҷу Дарвоз оғоз намуда, сипас ба Рошқалъа ва Хоруғ сафар кардааст.