Усулан, ман ҳич намефаҳмидаму намефаҳмам, ки чаро мо-Тоҷикон пеши дом, подъезд ва пушти тирезаамонро ҳатман шиғ мегирем… Не, ман мефаҳмам, агар дар паси ин шиғ 1 ниҳолу гуле кишт кунем. Ан неъ! Мо, просто так, маҳкам мекунему бас. Аз ман!!! Дигар ягон кас ҳуқуқ надорад ки аз ин мавзеъ гузар кунад. Кӣ ба мо чунин ҳуқуқро додааст? Ин одати шиғбандиро аз қишлоқ кашида овардем, ки ун ҷо гову хару гусфанди ҳамсоя метавонад пеши хонаамонро чарад, пачақ кунад. О, дар пойтахт гову хар нест-ку? Пас, чаро шиғбандӣ идома дорад???
Ин шиғбандии мо дар ҳолест, ки ин замин моликияти истисноии Давлат аст ва онро маҳкам кардан, агар беодобӣ ҳам набошад, пас қонуншиканист! Фарзи мисол дар Аврупо замин моликияти истисноии давлат асту касе ҳаққу ҳуқ надорад, ки ҳатто ҳавлияшро шиғ кашаду маҳкам намояд! Хона аз туст, вале замин аз давлат, сокинон ва меҳмонони вай. Зимнан, дилхоҳ нафар метавонад ҳавлии шумо дарояду маишат карда шинад ва қандата хӯру пешаш кун. Шахсан ман чунин таҷрубаро дар Шветсия кардам ва соҳибони хона баромадаву саломам медоданду пайи кори хеш мешуданд… А, мо бошем, замини биноҳои баландошёнаро забт карда гирифтаем…
Чанде пеш дар Кӯлоб будам. Ин шаҳри бостонӣ, ки ҳаётан панҷарабандӣ намешуд, имрӯз 1 тюрма, зиндон, маҳбасро ба хотир меоварад. Дӯконҳое, ки дар маркази шаҳр, собиқ «Гастрономи 20» воқеанд, намедонам бо чӣ иллате панҷарабандӣ шудаанд. Комилан! Зеботарин меҳмонхонаро Бек Сабур сохтааст, дар маркази шаҳр, аммо рӯбаруи онро кадом горе-бизнесмен гирифтаву панҷарапеч кардааст. Аз меҳмонхона хориҷие сар кашад, фикр мекунад, ки паҳлӯву рӯбарӯи ӯ зиндонҳо қомат афрохтаанд. Умуман, тамомии ин шаҳрак чӣ дар кӯчаи марказӣ ва чӣ шафати он, собиқ кучаҳои Ленин ва Карл Маркс, ки ҳоло дақиқан намедонам номашон чист, яъне кӯчаҳои бару пеш панҷарапечанд. Ресторанҳо панҷарапеч, дӯконҳо панҷарапеч, кӯчаҳо панҷарапеч. Ба фикрам якумин коре, ки барои 30-солагии истиқлолият бояд пиёда кунанд, ин панҷараҳои шаҳрро бардоштан аст! Мо Метавонем!
Вале оё айни чунин манзара дар Хуҷанду Бохтар нест? Ҳаст! Ин панҷараҳоро низ бояд барчид. Ман медонам, ки замоне ҷанг буду мардум тарс доштанд, вале аз барои савоб, имрӯз Тоҷикистон аз амнтарин давлатҳои олам асту панҷараҳо барҷо. Бояд тарсро аз назарҳо, аз дилҳо, аз сарҳо низ барчид ва дар сурати аввал шиғу девораҳои оҳанинро бояд вардошт!
Рустами Эмомалӣ-шаҳрдори ҷавони мо воқеан ҳам пойтахтро замонавӣ ва зебо кардан дорад. Бинед, дигар истгоҳҳоро намешикананд, гулҳоро намечинанд, харакҳоро намекананд. Яъне чӣ? Яъне чашми мардум аз зебоӣ сер кард, одат кард, омӯхта шуд. Ҳамакнун бояд шиғу деворҳоро низ бардошт. Ва на танҳо дар пойтахт, ки дар кулли кӯчаҳои шаҳрҳои марказии мо. Маданияти шаҳрнишинӣ ҳаминро тақозо дорад. Зимнан, биё хонанда, бо шиори «Нест бод шиғ!» худамон аз пеши «дом»-амон сар кунем ва тамомии шиғу девору симхорҳоямонро канем. Тоҷикистон бидуни симхору шиғ… Тасаввур кунед, чӣ қадар зебо мешав(ем)ад…
Мо Метавонем!

Тибқи фармони президенти ҶТ Эмомалӣ Раҳмон раиси вилояти Хатлон Давлатшоҳ Гулмаҳмадзода ва раиси Кумитаи давлатии идораи замин ва геодезии Тоҷикистон Ҳакимзода Қурбон аз вазифаҳояшон озод гардида, ба ҷойи онҳо кадрҳои дигар таъин карда шуданд. Ҳамин тавр Гулмаҳмадзода Давлатшоҳ Қурбоналӣ бо сабаби ба кори дигар гузаштанаш аз вазифаи раиси вилояти Хатлон озод шуда, бо қарори Ҳукумати ҶТ  Давлатшоҳ Гулмаҳмадзода, раиси Кумитаи ҳифзи муҳити зисти назди Ҳукумати Ҷумҳурии Тоҷикистон таъин гардид. Мутобиқи моддаи 69 Конститутсияи ҶТ Ҳакимзода Қурбон ба вазифаи раиси вилояти Хатлон таъин гардид.

Ҳакимзода Қурбон, раиси нави вилояти Хатлон кист?
Ҳакимзода Қурбон соли 1966 дар ноҳияи Бобоҷон Ғафурови вилояти Суғд таваллуд шудааст, миллаташ тоҷик. Соли 1988 Донишгоҳи аграрии Тоҷикистон ба номи Шириншоҳ Шотемурро хатм кардааст. Номзади илмҳои кишоварзӣ мебошад.
Cолҳои 1988 – 1996 дар вазифаҳои агрономи хоҷагии ба номи С. Урунхоҷаеви ноҳияи Бобоҷон Ғафуров, раиси Иттиҳодияи истеҳсолии «Сельхозхимия»-и ноҳияи Бобоҷон Ғафуров, муовини раиси Иттиҳодияи истеҳсолии «Облсельхозхимия»-и шаҳри Хуҷанд ва мутахассиси шӯъбаи Комплекси агросаноатии Ҳукумати вилояти Суғд кор кардааст.
Солҳои 1996 – 2008 ҳамчун раиси Кумитаи заминсозии вилояти Суғд, сардори Идораи кишоварзии вилояти Суғд, муовини раиси ноҳияи Бобоҷон Ғафурови вилояти Суғд, муовини аввали сардори Идораи кишоварзии вилояти Суғд ва сардори  Идораи кишоварзии вилояти Суғд фаъолият намудааст.
Солҳои 2006 - 2008 Муовини раиси вилояти Суғд, солҳои 2008 - 2010 Раиси ноҳияи Зафарободи вилояти Суғд, солҳои 2010 - 2013 Раиси ноҳияи  Фархори вилояти Хатлон ва солҳои 2013 - 2018 Муовини якуми раиси вилояти Хатлон буд.
Аз соли 2018 то соли 2019 дар вазифаи Раиси Кумитаи давлатии идораи замин ва геодезии Ҷумҳурии Тоҷикистон кор кардааст.
Бо Фармони Президенти Ҷумҳурии Тоҷикистон аз 14 январи соли 2019, №1176 раиси вилояти Хатлон таъин гардид. Бо забонҳои русӣ, узбеки ва англисӣ озодона ҳарф мезанад. Бо медали ҷашнии 20 солагии Истиқлолияти Ҷумҳурии Тоҷикистон мукофотонида шудааст.
Оиладор, соҳиби 4 фарзанд.

Хоҷазода Ориф Ашӯрӣ -заминсози №1 Тоҷикистон интихоб шуд
Бо фармони президенти ҶТ Эмомалӣ Раҳмон Хоҷазода Ориф Ашӯрӣ, раиси Кумитаи давлатии идораи замин ва геодезии Ҷумҳурии Тоҷикистон таъин карда шуд. Ориф Хоҷазода, солҳои 2016-2019 ҳамчун муовини раиси вилояти Суғд оид ба масоили кишоварзӣ кор кардааст.
Раиси тозатаъини Кумитаи далатии идораи замин ва геодезии Ҷумҳурии Тоҷикистон Хоҷазода Ориф Ашӯрӣ 31 марти соли 1970 дар ноҳияи Бобоҷон Ғафурови вилояти Суғд таваллуд шудааст, миллаташ тоҷик.
Соли 1993 Донишгоҳи давлатии Хуҷанд ба номи академик Б.Ғафуров ва соли 2005 Донишгоҳи аграрии Тоҷикистон ба номи Шириншоҳ Шотемурро аз рӯйи ихтисоси муҳандис-заминсоз хатм кардааст.
Солҳои 1993-2015 дар вазифаҳои таъминотчии ЧФ МММ-ШИК, ёрдамчии раиси шаҳри Хуҷанд, мутахассиси дараҷаи якуми Кумитаи захира ва танзими замини шаҳри Хуҷанд, мутахассиси дараҷаи якум ва сармутахассиси Кумитаи заминсозии вилояти Суғд, раиси Кумитаи заминсозии ноҳияи Спитамен, раиси Кумитаи заминсозии шаҳри Қайроққум, муовини аввали раиси Кумитаи заминсозии вилояти Суғд ва Раиси Кумитаи идораи замини вилояти Суғд кор кардааст.
Аз соли 2015 то 2016 дар вазифаи раиси ноҳияи Спитамени вилояти Суғд фаъолият намудааст. Солҳои 2016-2019 ҳамчун муовини Раиси вилояти Суғд кор кардааст. Бо фармони Президенти Ҷумҳурии Тоҷикистон 14 январи соли 2019, №1174 раиси Раиси Кумитаи далатии идораи замин ва геодезии Ҷумҳурии Тоҷикистон таъин гардидааст.

   Сар аз 16.01.2019 ҳаракати микроавтобусҳои хатсайри №33, ки аз маҳаллаи Фучик то Терминали мусофирбари дарвозаи ҷанубӣ рафтуомад мекунанд, тавассути к.Н.Қаробоев манъ карда мешавад.
   Чуноне ки дар сомонаи расмии Мақомоти иҷроияи ҳокимияти давлатӣ дар ш.Душанбе омадааст, ин иқдом бо мақсади кам кардани шиддатнокии ҳаракат, танбашавии воситаҳои нақлиёт дар кӯчаю хиёбонҳои марказии шаҳр ва баланд бардоштани сатҳу сифати хизматрасонӣ ба мусофирон роҳандозӣ гардидааст.
   Бояд гуфт, ки дар ин ҳолат шумораи автобусҳои №2 (Терминали мусофирбарии Шарқ-транс — Терминали мусофирбарии дарвозаи ҷанубӣ), автобусҳои №18 (кӯчаи Гагарин — маҳаллаи Пахтакор), троллейбусҳои №4 (маҳаллаи Гулбутта — Фурудгоҳ), №12 (Маркази савдои Тоҷикистон – маҳаллаи Гулбутта) зиёд ва фосилаи ҳаракати онҳо кам карда мешавад.

Сарраёсати меъморӣ ва шаҳрсозии пойтахт озмуни худро дар мавзӯи «Тарабхонаи шаҳрӣ ва қаҳвахона бо терраса» ҷамъбаст намуда, тибқи натиҷаҳои озмун 3 ширкат барранда эълон гардиданд. Гуфта мешавад, ки ба озмун беш аз 50 лоиҳа пешниҳод гардида, Шӯрои шаҳрсозии Сарраёсати мазкур танҳо 3 лоиҳаро қабул ва ғолиб донистааст.
    Ҳамин тавр, ҷойи якум ба лоиҳаи тарабхонаи бразилиягӣ бо номи «Латино», ки аз тарафи ширкати Cool design тарҳрезӣ шуда буд, насиб гашт. Ин тарабхона барои 150 ҷойи нишаст бунёд хоҳад ёфт.
   Ҷойи дуюм насиби лоиҳаи тарабхонаи туркии "OZYURT" гардид, ки он аз ҷониби КВД «Лоиҳакаш» омода шуда, тарабхона бо назардошти 120 ҷойи нишаст сохта мешавад.
   Ҷойи сеюм ба лоиҳаи тарабхонаи миллӣ барои гузаронидани чорабиниҳои бошукӯҳ, ки аз тарафи Институти «Душанбешаҳрсоз» лоиҳакашӣ карда шудааст, дода шуд. Ин тарабхонаи миллӣ барои 160 нафар пешбинӣ шудааст.
   Бунёди ин тарабхонаҳо дар ояндаи наздик оғоз гашта, тӯҳфаест ба ҷашни 30 солагии Истиқлолияти давлатии Ҷумҳурии Тоҷикистон.

Вақтҳои охир аз беназорат будани автомашинаҳо дар назди баландошёнаҳо истифода карда, нафарони ҷиноятпеша дар вақти шабона бо шикастани оина аз дохили он маблағҳои пулию телефони мобилӣ, аккумулятору дигар қисмҳои эҳтиётӣ ва ҳар ашёҳои дигари арзишмандро аз они худ мекарданд. Бо чунин тарз содир гардидани ҷиноят, яъне шикастани тирезаву гум шудани маблағҳои пулӣ аз дохили воситаҳои нақлиёт дар ҳудуди пойтахт шаҳрвандонро ба ташвиш гузошта, ба кормандони милитсия муроҷиат менамуданд.
Ахиран бо бурдани коркардҳои оперативӣ-ҷустуҷӯӣ аз ҷониби кормандони милитсияи пойтахт муайян ва ошкор карда шуд, ки як гурӯҳ ҷавонон бо мақсади чандлаҳзаина дилхӯшӣ дар марказҳои фароғатӣ даст ба чунин кирдорҳои ғайриқонунӣ задаанд.
Аз ҷумла, дар гурӯҳи аввал кормандони милитсияи пойтахт дар ҳудуди н.Сино 1 нафар пешсудшуда, шаҳрванд Полвонов Диловар Зафарович, соли таваллудаш 1998, сокини ш.Ҳисор, ҷамоати деҳоти М.Ризоро санаи 8.01.2019 дар вақти шабона ҳангоми содир намудани ҷинояти навбатӣ дастгир намуданд.
Сипас, зимни гузаронидани чорабиниҳои тафтишотӣ муайян карда шуд, ки номбурда дар рӯй ниқоб пӯшида, бо отвёркаву болға мусаллаҳ гашта, дар ҳудуди кӯчаи Испечаки н.Сино силсилаҷиноятҳои дуздиро содир намудааст. Аз рӯи маводҳои тафтишотӣ дастгиршуда асосан воситаҳои нақлиёти ҷамъиятии тамғаи «Мерседес-Спринтер»-ро мавриди дуздӣ қарор додаст. Чунончи зимни пешбурди корҳои тафтишотӣ муайян карда шуд, ӯ бо чунин тарз, яъне шикастани оинаи автомашинаҳо аз дохили зиёда аз 15 воситаи нақлиёт маблағҳои пулӣ ва телефонҳои мобилиро рабудааст.
Ҳамчунин ба ин монанд, кормандони милитсия боз дар ҳудуди н.Сино гурӯҳи дуюми ҷиноятиро дар ҳайати 2 нафар, шаҳрвандон Наврӯзи Шералӣ, соли таваллудаш 1993, сокини н.Шамсиддин Шоҳин ва Валиев Фирӯз, соли таваллудаш 1997, истиқоматкунандаи н.Восеъро ҳамчун гумонбар дар содир намудани як қатор ҷиноятҳои дуздӣ санаи 3 январи соли 2019 дастгир намуданд.
Номбурдагон асосан дар ҳудуди маҳаллаи Гипрозем, кӯчаҳои А.Ҷомӣ ва кӯчаи Ҷ.Расулов, дар вақти шабона бо маслиҳати пешакӣ бо тариқи шикастани тирезаҳои воситаҳои нақлиёт маблағҳои пуливу дигар ашёҳои арзишмандро рабудаанд. Зимни пешбурди корҳои тафтишотӣ ошкор гардид, ки номбурдагон дар содир намудани 21 ҳолати ҷинояти дуздӣ гумонбар дониста шуда, зарари ба шаҳрвандон расонидаи онҳо зиёда аз 20-ҳазор сомониро ташкил медиҳад.
Инчунин, аз ҷониби кормандони милитсия гурӯҳи сеюми ҷиноятӣ дар ҳудуди н.Фирдавсӣ, боз дар ҳайати 2 нафар ҷинояткорон, шаҳрвандон Шарипов Толиб Ҷумаевич, соли таваллудаш 1995, истиқоматкунандаи ш.Душанбе, кӯчаи Фирдавсӣ ва Алиев Бахтиёр Неъматович, соли таваллудаш 1998 истиқоматкунандаи ш.Душанбе, кӯчаи А.Деҳотӣ санаи 8 январи соли ҷорӣ бо гумони содир намудани ҷинояти дуздӣ дастгир карда шуданд. Зимни пурсиши гумонбаршудагон маълум шуд, ки онҳо танҳо дар як шаб оинаҳои 6-воситаи нақлиётро шикаста маблағҳои пуливу дигар ашёҳои арзишмандро тасарруф намудаанд.
 Чуноне ки ба мухбири СССР дар маркази матбуоти ВКД ҶТ хабар доданд, танҳо давоми 8 рӯзи аввали соли 2019 аз ҷониби кормандони милитсияи пойтахт 42 ҳолати шикастани оинаи автомашинаҳо ва рабудани ашёву маблағҳои пулӣ аз ҷониби нафарони ҷиноятпеша ошкор карда шуда, корҳои тафтишотиву чорабиниҳои оперативӣ-ҷустуҷӯӣ дар ин самт идома доранд.
Гарчанде дар аксар маврид гумонбаршудагон аз дохили автомашинаҳои шаҳрвандон маблағҳои ками пулӣ гирифта бошанд, ҳам вале бо шикастани оинаҳои воситаи нақлиёт ба шаҳрвандон зарари калони молӣ расонидаанд.

Сокини ш.Левактанти вил.Хатлон, Асоева Раҷабгул аз шунидани бемориаш худро ба дор овехт. Мусоева Бибисоро-масъули шуъбаи кор бо занони шаҳр ин хабарро дар суҳбат бо СССР тасдиқ карда гуфт, ки Асоева донишҷуи курси 2-и Коллеҷи тиббии шаҳри Леваканти вилояти Хатлон  таҳсил мекард. Ӯ 10 январ, соати 2-и шаб худро ба дор овехтааст. Гуфта мешавад, ӯ аз бемории саратон азият мекашид, аммо сабаби бемориашро намедонист. Ӯ ҳамагӣ чанде пеш аз ин беморӣ огоҳ ва ба касалии равонӣ дучор шудааст. Айни ҳол аз ҷониби мақомоти қудратӣ таҳқиқот идома дорад.

Баҳодур Уроқов СССР вилояти Хатлон

Ягона ширкати ҳавопаймоии миллии Тоҷик-«Тоҷик эйр» ба дунболи қатъи парвозҳояш бештари кормандони худро ба рухсатии бемузд (отпуск без содержание) фиристод. Масъулони "Тоҷик Эйр" ба расонаҳои хабарӣ гуфтаанд, ки бо сабаби қатъи парвозҳо, нигоҳ доштани кормандон бар зарари ширкат аст. Ҳоло кормандони «Тоҷик-эйр» аз он амиқан норозиянд, ки чанд моҳ боз ҳаққулзаҳмати худро нагирифтаанд ва талаб доранд, аввал ҳаққи кори моҳҳои гузашта пардохт шавад ва сипас ба рухсатии бемузд раванд…