Раёсати ВУД-и ш.Душанбе хабар медиҳад, ки кормандони милитсия ғоратгари «пухта» Бозоров Раҳмиддини 21-сола (маъруф бо лақаби "Сангак"), сокини ноҳияи Синои пойтахтро боздошт намуданд. Ӯ ҳанӯз 25.09.2019, тахмин соати 02:00 шаб дар кӯч.Гипрозем, дар дохили тарабхонаи "Самира" қарор доштанаш, ошкоро 1 адад телефони мобилии шаҳрванд Шарифов Алишер (донишҷӯи курси 1-и Донишгоҳи соҳибкорӣ ва хизмат), ки 5500 сомонӣ арзиш доштааст, дуздида, аз ҷои ҳодиса гурехтааст. «Сангак» ҳамчунин дар 3 ҳолати дигари дуздӣ низ даст доштааст. Аз ҷумла, 1 адад телефони мобилии 1 нафар сокини пойтахтро, ки 2000 сомонӣ арзиш дошт, ба зӯрӣ аз худ намудааст. Инчунин, 1 ададӣ гарданбанди тиллогини 2 тан сокинони дигари пойтахтро низ ошкоро тасарруф намудааст. Феълан нисбати Бозоров тибқи моддаи 248 қисми 2 (Ғоратгарӣ) Кодекси ҷиноятии ҶТ парвандаи ҷиноӣ оғоз карда шуда, тафтишоти пешакӣ идома дорад.

Дар давраи советӣ дар 15 ҷумҳурии бародарии СССР соли таҳсили мактаббачагон 25 май ба охир мерасид. Хонандагони синфи 11 “Занги охирин”-ро бо хурсандӣ ҷашн гирифта, “хайр, мактаб” гуфта, бо мактабу муаллимон хайру хуш мекарданд. Ҳоло ин амалҳо дар мо несту хурсандии чандсоатаи хатмкунандагон бо фармони Вазорати маориф аз байн бардошта шуд. Ин ба кадом хотир буд, касе чизе намедонад, аммо ҳаминро медонем, ки педагогу психологҳои даврони советӣ то хурдтарин ҷузъиёти педагогикаю физиологияи одамро омӯхта, баъд реҷаи муайяншударо роҳандозӣ карда буданд. 3 ҳафта дароз кардани соли хониш ягон зарра ба манфиати талабаю хатмкунанда кӯмак намекунад. Муаллим баъди 25 май ба такрори дарсҳои гузашта мегузарад, ки ҳар 2 тараф аз ин такрорҳо хаста мешаванд, таъсири манфӣ ба саломатӣ ва психикаи хонандагон мерасонад, чунки ҳаво гарм ва қариб дар ҳама синфхонаҳои макотиби ҷумҳурӣ кондитсионер нест!!! Дар давраи таътили тобистона волидону фарзандон ба парваришу ҷамъоварии ҳосили парваридаи маҳсулоти кишоварзӣ машғул мешаванд. Ин заминаи асосӣ барои хариди сарулибоси мактабӣ, лавозимоту китобу дафтари мактабии соли хониши оянда мегардад.

Зайнулобиддин Ҳусейнов

н.Ёвон

Соли 1986 Кумитаи ҷавонони н.Колхозобод (ҳоло Ҷ.Балхӣ) мо-5 нафар ҷавонро ба курси кутоҳмуддати мактаби олии комсомол барои таҳсил фиристод. Дар вақти таҳсил мо худро аз ҷиҳати одобу фарҳанг мудом муаррифӣ мекардем. Дар як муддати кутоҳ маро сардори гуруҳ оид ба чорабиниҳои фарҳангӣ-адабӣ интихоб карданд. Ба тамошои ш.Маскав мебаромадем ва ҳар вақте пиронсолон вориди трамвай мешуданд, зуд аз ҷо хеста, ёрӣ мерасонидам. Онҳо бо изҳори сипос ба сару либосам чашм давонда мепурсиданд, ки аз кадом миллатам. Вақте бо виқор мегуфтам, ки «аз Тоҷикистон», харитаҳои дастиро бароварда, меҷустанд, ки дар ватани ман кадом миллатҳо истиқомат мекунанд. Харитаро нишон дода мегуфтам, ки кӯҳҳои баландтарини дунё дар Тоҷикистон-Помир аст. Онҳо ба калимаи Помир, нигариста мегуфтанд, ки «о, шумо аз Боми ҷаҳон (Крыша мира) ҳастед?». Фахр мекардем, Помир вилоятест дар Тоҷикистон. Боз суол мекарданд, ки оё ҳамаи тоҷикон чунин меҳрубону ғамхоранд? Бо фахр мегуфтам, ки бале!

Рӯзи дигараш ба тамошои Мавзолейи доҳии пролетариат В.И.Ленин рафтем. Дар вақти бо автобус сафар кардан бо донишҷӯёни Туркия ҳамсуҳбат шудем. Онҳо низ ба либоси миллии мо нигариста, саволборон мекарданд. Вақте фаҳмиданд, ки аз Тоҷикистонам, яке бо ҳаяҷон пурсид, ки «пас Одина Ҳошимро мешиносӣ?». Ҷавоб додам, ки бале! Ӯ қисса кард, ки падараш сафир асту боре бо корҳои давлатӣ ба Тоҷикистон сафар карда, мухлиси Одина Ҳошим шуда, «пластинка»-ҳои ӯро ба Туркия, ба аҳли оилааш туҳфа бурдааст. Ва оилаи онҳо давоми 10 соли охир сурудҳои ӯро гӯш ва роҳат мекардаанд. Ҳатто донишҷӯи турк суруди «Ало, хамзада кокул…»-и О.Ҳошимро каме зам-зама ҳам кард. Дар охир гуфт, ки орзу дорад боре ба ватани Одина Ҳошим сафар кунаду либоси миллии ин мардумро, ки дар тани ман дида буд, ба модару хоҳараш туҳфа барад. Суроғаамро ба ӯ навишта, ваъда додам, ки агар меҳмон шавад, худам ба ӯ 2 куртаи миллии зебои тоҷикиро туҳфа мекунам ва бо бародаронам ӯро ба зодгоҳи Устоди санъати тоҷик, булбули машриқзамин Одина Ҳошим мебарам.

Аз ман бисёр хоҳиш мекард, ки дар бораи аҳли хонаводаи ин булбули Шарқ маълумот диҳам. Мутаассифона, он давра дар бораи О.Ҳошим ва аҳли аёли ӯ дар рӯзномаҳо чизе нахонда будам. Бисёр афсӯс хӯрда, бахшиш пурсидаму дар дил гуфтам, ҳамин ки ба Тоҷикистон баргаштам, аз ҳаёту фаъолияти ситораҳои машҳури давр-Одина Ҳошим, Зафар Нозим, Ҷӯрабеки Мурод… албатта маълумот дарёфт мекунам. Хушбахтона с.2004 ба Коллеҷи санъати ш.Душанбе ба номи устод А.Бобоқулов ба кор омада, бо Фирдавс-набераи устод О.Ҳошим, ки дар курси 2-и шуъбаи «Сурудхонии анъанавӣ» таҳсил мекард, баъдтар бо устод З.Нозим ва бо писари хурдиаш-Қаландар, ки дар литсейи Коллеҷ мехонд, аз наздик шинос шудам. 

Гавҳар Муродова,

муовини директори Коллеҷи санъати ш.Душанбе ба номи А.Бобоқулов

Рақиби Равшани Турсунов

Сайфиддин Шарифов 2.03.1952 дар деҳаи Газаи Қипчоқи н.Муъминобод ба дунё омада, с.1960 ҳамроҳи аҳли оила ба н.Фархор мекӯчанд. Ӯ ба футболбозӣ аз 13-солагӣ шуғл варзида, парвардаи мактаби бачагонаи варзишии ноҳия буда, дар мусобиқаҳои футбол дар минтақаи Кӯлоб иштирок мекард. Ибрач Тӯрабоеви қазоқ, Главик Козлови рус ва Пётр Кими карес, ки он солҳо дар ин мактаб ба сифати мураббӣ фаъолият мекарданд, дар тарбияи Сайфиддин саҳми бориз доштанд. Солҳои 1971-73 ҳангоми дар сафи Қувваҳои Мусаллаҳ, дар шаҳри Владивостоки Русия хизмат кардан симои баҳодуронаву тану ҷуссаи рустамонаи ӯ диққати роҳбарони қисми ҳарбиро ба худ ҷалб месозад ва ӯро ба дастаи футболи «Звезда»-и қисми ҳарбӣ қабул намуданд. Чун таҷрибаи футболбозиро дар «Ҳосилот» омӯхта буд, ба фарқ аз дигар ҳамхизматонаш хеле хуб бозӣ мекард. Баъди адои хизмат ба Донишкадаи тарбияи ҷисмонӣ ҳуҷҷат супорида, солҳои 1971-74 дар ин боргоҳи паҳлавонӣ таҳсил кард. Солҳои 1974-81 дар «Ҳосилот» фаъолияти футболбозии худро идома дода, марҳила ба марҳила маҳорату касбияташ боло ва барои ҳамдастаҳояш намунаи ибрат мегардад. Ҳини суҳбати хоса ӯ ёди ҷавониҳояш карду гуфт: - Аввалин бозиям дар ҳайати «Ҳосилот» с.1974 бо дастаи овозадори «Равшан»-и ш.Кӯлоб буд. Он солҳо дар ин даста бозингарони соҳибтаҷриба ба мисли Валерий Турсунов, Валерий ва Володя Губановҳо бозӣ мекарданд. Гоҳ мо ғалаба мекардему гоҳ «Равшан». «Вахш»-и Қӯрғонтеппа низ ҳарифи пурзӯрамон буд. Ҳини бозӣ варзишгоҳҳои ҳар 2 даста моломоли тамошобин мешуд. 

Ҳарифи Гессу Муродов

Баъди ин 2 даста рақиби азалию пурзӯри «Ҳосилот» «Помир»-и ш.Душанбе буд. Солҳои 1976-77 бо ин даста, ки дар Лигаи якум ва баъдан Лигаи Олии СССР шуҳрати беандоза дошт, вохӯрдем. Он солҳо дар «Помир» беҳтарин бозингарон-Владимир Ғуломҳайдаров, Эдгар Гесс, Абдулло Муродов, Валерий Турсунов, Александр Азимов бозӣ мекарданд. Дар 2 бозие, ки «Ҳосилот» бо ин дастаи шуҳратёр дошт, бо ҳисоби 3:1 ва 4:1 бозиро бохтем. Мо бозингарони «Ҳосилот» ҳамчун узви 1 хонадон ва дар шодию нишоти якдигар шарик будем. Сармураббӣ Абдуғаффор Раҳимов моро мисли фарзандонаш тарбия менамуд ва мо низ ӯро чун падар дӯст медоштем. Ҳамдастаҳоямон Мирвалӣ Акрамов, Шариф Валиев, Мурод Арабов, Сайфулло Сафаралиев, Шариф Саидов, Ҷаҳонгир Абдуллоев, Юсуф Куганов, бародарон Абдулло, Нуралӣ ва Шералӣ Гулоновҳо, бародарон Владимир ва Виктор Скопиновҳо, дугоникҳо Николай ва Михаил Фёдоровҳои машҳур бо лақаби «Колмиш», Владимир Мамедов, Анатолий Холодников, Леонид Ким, Юрий Сталповский, Мӯсо Макоев, Олег Азарин, Александр Маркин, Женя Худжаков буданд.

Баъди хатми фаъолияти футболбозӣ С.Шарифовро дар даста ба вазифаҳои роҳбарикунанда даъват карданд. Даъватро бо хушнудӣ пазируфт. Солҳои 1995-2000 ба ҳайси муовини сардори «Ҳосилот» фаъолият карда, дар тарбияи чандин бозингарон саҳми босазо гузошт. Ӯ чун рамзи садоқат ба «Ҳосилот» ва ба хотири гиромидошти ҳамдастаҳояш, ки иддае аз онҳо дар қайди ҳаёт нестанд, ҳуҷҷат ва шиносномаҳои варзишии ҳамдастаҳояшро то ҳол чун гавҳараки чашм нигоҳ медорад. Шукргузор аз он аст, ки фарзандонаш Қурбоналӣ ва Саймуҳиддин ҷодаи футболро интихоб кардаанд. 

Акбар Абдусамадов,

мухлиси футбол, ш.Душанбе

Чанд нафар аз хонандагони газетаи мардумии СССР аз ноҳияҳои Шаҳристону Айнӣ, Балҷувону Ховалинг, ш.Панҷакент ба редаксия занг зада, дар мавриди буридани дарахтон, ҷаримаи он ва ба ҷавобгарӣ кашидани вайронкорон тибқи қонун пурсиданд. Дар пайи ин мо тасмим гирифтем бо масъулони Шӯъбаи милитсияи экологии ВКД ҶТ вохӯрда, дар бораи буриши ғайриқонунии ҷангалзор ва дарахтони сояафкан дар кишвар, чораҳои нисбати бурандагони дарахтон андешидашуда ва ба ҷавобгарӣ кашидани онҳо пурсон шавем.

Чинор ва арча-дарахтони муҳимтарин

Чуноне ки дар сӯҳбат бо мухбири СССР Раҷабалӣ Сафарзода, муовини сардори Шӯъбаи милитсияи экологии ВКД ҶТ иброз дошт, дар 6 моҳи аввали с.2019 аз ҷониби шӯъбаи мазкур доир ба буриши ғайриқонунии ҷангалзор ва дарахтони сояафкан 69 адад протоколҳои ҳуқуқвайронкунии маъмурӣ тартиб дода, ба миқдори 1174 м. куб ҳезум мусодира шудааст, ки ин назар ба ҳамин давраи с.2018 422,4 куб кам аст. Маблағи зарари он ба табиат дар ин давра 140880 сомонӣ (1 метри кубӣ ба ҳисоби миёна 120 сомонӣ) ҳисобида шудааст. 

Шӯъбаи милитсияи экологӣ дар ноҳияҳои тобеи марказ дар 6-моҳаи якуми соли ҷорӣ 10 протоколи ҳуқуқвайронкунии маъмурӣ тартиб дода, ба миқдори 215 метри кубӣ ҳезум мусодира кардааст. Дар ш.Душанбе бошад дар ин муддат 20 протоколи ҳуқуқвайронкунии маъмурӣ тартиб дода шуда, ба миқдори 272 м.кубӣ ҳезум мусодира шуда, дар вил.Суғд ин нишондод 30 протоколи ҳуқуқвайронкунии маъмурӣ ва мусодираи 142 м.кубӣ ҳезумро нишон медиҳад. Шӯъбаи милитсияи экологӣ дар вил.Хатлон бошад дар нимсолаи якуми соли равон 5 протоколи ҳуқуқвайронкунии маъмурӣ тартиб дода, 209 м.кубӣ ҳезум мусодира кардааст. Дар минтақа ва ноҳияҳои Кӯлоб 2 протоколи ҳуқуқвайронкунии маъмурӣ бо мусодираи 286 м.кубӣ ҳезум ва дар минтақа ва ноҳияҳои Рашт бошад дар ин муддат 1 протоколи ҳуқуқвайронкунии маъмурӣ бо мусодираи 50 м.кубӣ ҳезум ба қайд гирифта шудааст.

-Дарахтони чинору арча аҳамияти муҳим ва худсарона буридани онҳо ҷавобгарии ҷиддӣ доранд. Ғайр аз ҷарима зарари расидаи шаҳрванд ҳангоми буридани дарахт ба муҳити зист низ ҳисобида мешавад. Барои шахсони воқеӣ тибқи Кодекси ҳуқуқвайронкунии маъмурии ҶТ ҷаримаи ин амал аз 5 то 10 ва гоҳо аз 15 то 20 нишондодро ташкил менамояд. Барои шахсони мансабдор бошад ҷарима барои худсарона буридани дарахтон аз 50 то 60 нишондод ва барои шахсони ҳуқуқӣ тибқи чанд моддаи ин Кодекс аз 100 то 300 нишондодро тақозо менамояд, - таъкид медорад Р.Сафарзода.

Ҳезум ба ятимхонаҳо…

Ҳезуми мусодирашуда пас аз ба расмият даровардану ба тасвиб расидани асноди лозима, баррасӣ ва омӯзиш ба бархе аз муассисаҳои иҷтимоии мамлакат дода мешавад. Аз ҷумла, дар нимсолаи якуми с.2019 аз ҷониби Шӯъбаи милитсияи экологии ВКД ҶТ ба Хонаи кӯдакони ш.Турсунзода, ба Раёсати қушунҳои дохилаи ВКД ҶТ, ба «Хона-интернати пиронсолон ва маъюбони шаҳри Турсунзода», ба машқгоҳи Мағоб, ба қисми ҳарбии №5453, ба Коллеҷи оташнишонии ВКД ҶТ, ба 1 қатор мактабҳои таҳсилоти миёна ва мактаб-интернатҳои шаҳрҳои Хуҷанд, Конибодом, Панҷакент, Кӯлоб ва ноҳияҳои Б.Ғафуров, Айнӣ, Деваштич, Мӯъминобод, Тоҷикобод ва Рашт ба таври ройгон супорида шуд. 

Дарахти бесоҳиб нест!!!

Сафарзода таъкид медорад, дар Тоҷикистон дарахти бесоҳиб нест ва буриши ғайриқонунии он низ ҷиноят маҳсуб мешавад.

-Сокинони кишвар фикр накунанд, ки дарахтоне, ки дар кӯчаву хиёбон, талу теппаву адиру кӯҳистон месабзанд, соҳиб надоранду буридани онҳо осон аст. Ҳар 1 дарахти ҳудуди кишвар соҳиб дорад ва соҳиби ин дарахтон ҳукумати ҷумҳурист, ки назорати ҷангалзор ва дарахтзори мамлакатро тавассути сохтору ниҳодҳои зертобеаш пеш мебарад. Ғайр аз Шӯъбаи милитсияи экологии ВКД ҶТ боз Кумитаи ҳифзи муҳити зисти назди Ҳукумати ҶТ асту кормандони ин 2 сохтор дар самти эмин нигоҳ доштани ҷангалзор ва дарахтзори мамлакат якҷоя кор мекунанд. Сокинон бояд бидонанд, ки пеш аз буридани ҳар гуна дарахт, ҳатто хушкшуда пеш аз ҳама бояд ба идораи ҳифзи муҳити зисти маҳалашон муроҷиат кунанд ва танҳо пас аз ба даст овардани ҳуҷҷатҳои лозима метавонанд дарахтонро бибуранд, - афзуд Р.Сафарзода.

Ҷамила Ҳусейнова, СССР

Владимир Путин-президенти Русия гирифтани шаҳрвандиро барои шаҳрвандони хориҷии дорои маълумоти олӣ ва ҷои кор, осон кард. Тибқи қарори Путин, муҳлати таҷрибаи корӣ барои гирифтани шаҳрвандии Русия барои шаҳрвандони хориҷии соҳиби маълумоти олӣ, аз 3 ба 1 сол поин бурда шуд. Навгонӣ, аллакай аз 2.10.2019 мавриди амал қарор гирифт.

Паҳнкунандаи матбуоти даврӣ, мухлиси ашаддии газетаи мардумии СССР Бозорбой Пӯлодов аз ноҳияи Данғара (тел: 900 30 09 45) дар меҳмонии СССР гуфт, ки дар давраҳои солҳои Истиқлолият ноҳияи Данғара низ мисли дигар шаҳру навоҳии ҷумҳурӣ хеле рушд кард. Ин дар мисоли 2 донишгоҳи олӣ, 2 коллеҷ ва 1 литсейи касбӣ-техникӣ баръало мушоҳида мешавад ва боз биноҳои тамому нотамоми ин муассисаҳо... Вале дар маркази ноҳияи мо баъзе норасоиҳо ба назар мерасанд, ки ба ин пешравиву ободиҳо халал мерасонанд. Асосан дар маркази ноҳия ҳаммоми ҷамъиятӣ нест, то хонандагон-донишҷӯён, ки аз ҳар гӯшаю канори ҷумҳурӣ омадаанд, истифода бубаранд. Дар деҳаи Бошбулоқ ҳаммомҳои туркию чинӣ ҳаст, вале нархаш 100 сомонӣ!!! Бо ин қимат кадом студент метавонад ҳафтае 1 бор ҳаммом дарояд? Баъдан, масъалаи нақлиёт низ дар ноҳия бо 2 по мелангад. Соҳаи танзими нақлиёт аслан кор намекунад ва дар 2-4 км роҳ 2 сомонӣ меситонанд. Бозори меваю сабзавот низ аз маркази ноҳия хело дур воқеъ аст. Агар ин камбудиҳо ислоҳ шаванд, шароити донишҷӯён ва мардум боз беҳтар мегардид. Аминам, ки раҳбарияти ноҳия сари ин мушкилот меандешад ва шароити беҳтарро барои меҳмонон фароҳам месозад. Мо Метавонем!!!

Импичмент

Аввали октябри с.1993 дар ш.Маскав ҳаводисе сар заданд, ки ба задухӯрди мусаллаҳона оварда расонид ва боиси рехтани хуни мардум шуд. Дар натиҷа, тибқи ахбори расмӣ беш аз 150 тан ва тибқи сарчашмаҳои мустақил беш аз 1000 кас ҳалок шуд. Дар Русия баъди таъсиси мансаби президентӣ дар с.1990 як навъ дуҳокимиятӣ ба амал омад. Тибқи Сарқонуни Русия ҳокимияти олӣ дар ин кишвар ба Анҷумани вакилони мардумӣ тааллуқ дошт. Бештари вакилон дар Шӯрои Олии Руссия фаъолият карда, дар оғоз аз Елсин ва ҷонибдоронаш тарафдорӣ карданд. Ҳини аз миён бардоштани М.Горбачев вакилон дар канори Елсин қарор гирифтанд ва ин дуҳокимиятӣ дар кишвар чандон ба назар намерасид. Лек баъдан вазъ дигар шуд. Сиёсати иқтисодии Елсин норизогии тарафдорони дирӯзаашро ба миён овард ва вакилон бо сарварии Руслан Хасбулатови чечен зидди президенти Русия шӯриданд. Даргирии тарафайн декабри с.1992 дар Анҷумани 7-и вакилон оғоз шуд. Дар ин Анҷуман онҳо ва роҳбарияти Шӯрои Олӣ давлати Егор Гайдарро зери танқиди сахт қарор доданд. Анҷуман номзади "ислоҳотчии" Елсинро ба вазифаи Раиси нави давлат рад кард ва президент дар ҷавоб масъаларо ба референдуми умумихалқӣ кашид ва аз вакилони мардумӣ хост, бигзор худи мардум қазоват кунад. 20.03.1993 Елсин тариқи ТВ ба мардум муроҷиат ва эълон кард, ки Қонуни асосиро лағв ва дар идоракунии кишвар "тартиботи хос"-ро ҷорӣ мекунад. Баъди 3 рӯз Суди конститутсионӣ назари худро ироа кард ва амалкарди Елсинро хилофи Сарқонун номид. 28 март ба қазия Анҷумани вакилон ҳамроҳ шуда, пешниҳоди Президент "оид ба баргузории интихоботи пеш аз мӯҳлати президент ва вакилони мардумӣ"-ро рад ва дар навбати худ барои аз вазифа гирифтани президент овоздиҳиро роҳандозӣ намуданд. Аммо кӯшиши онҳо барои эълони "импичмент" (нобоварӣ) амалӣ нашуд. Барои сабукдӯш кардани президент аз вазифа 617 вакил овоз дод, аммо барои қабули ин қарор 689 овоз лозим буд.