ХАБАРИ ДОҒ
Ҷумъа, 15 Ноябр 2019 09:31

Ҷоми футболи СССР-2019 дар шаҳри Кӯлоб сар аз 14 ноябр то 17 ноябри соли 2019 идома мекунад. Ёдовар мешавем, ки Кубоки футболи СССР аз с.2008 то кунун идома дошта, дар он футболистони навраси кишвар аз тамоми шаҳру ноҳияҳо шомиланд.

 

Матлаб такмил мешавад…

 

Панҷшанбе, 14 Ноябр 2019 09:54

Бо ҳалномаи Суди Олии ҶТ аз 15.08.2019 аризаи Прокурори генералии ҶТ дар бораи иттиҳоди террористӣ-экстремистӣ эътироф намудани ташкилоти «Паймони миллии Тоҷикистон», манъ намудани фаъолияти он дар Ҷумҳурии Тоҷикистон, бастани сомонаҳои интернетии ин ташкилот ва манъ кардани воридоту паҳни аудиосабтҳо, видеонаворҳо ва адабиёту варақаҳои он ба ҳудуди Ҷумҳурии Тоҷикистон қонеъ карда шудааст. Ташкилоти «Паймони миллии Тоҷикистон» иттиҳоди террористӣ-экстремистӣ эътироф карда шуда, фаъолияти он дар Ҷумҳурии Тоҷикистон манъ карда шудааст.

Тавре маркази матбуоти Суди олии ҶТ хабар медиҳад, ҳамчунин бо ҳалномаи мазкур сомонаҳои интернетии «Nahzat.org», «Vostoknews.org», «Kimya Saadat», «Isloh.net», «Ozodandishon.org», «Zindoniyon.com», «Payom.net», «Tojik islom.ucoz.ru», «salafyink.com», «tajreform.org», «hawzah.net», «salafimasjid.com», «islamhouse. com/ru/», «hizb-russia.info», «sunna-portal.com», «toislam.ws», «mowahed.com», «tevhiddersleri.tv»,  «whyislam. com», «muhajeer. com», «abumuhammaddagestani.wordpreess.com», «new. sadaislam. com», «Группа24» ttps://www.facebook. com/grou Ds/ 1739568342 923996A.«ПАЁМИMAPflyM»(https://www.facebook. com/ groups / l 1019930964    88697/), «Хабарҳои n^M»fhttps://www.facebook.com/profile.php?id~100012780767765), «Бги Дега» (https://www. facebook.com/Bm-4era-3738158 50025587), «Radio Payom» (https ://voutube. com/channel/ UCvobZlG2 CmxvEkwYlXHY OvO). «Паймони Миллии Тоҷикистон» (https://www. voutube. com/ channel/UCiUldein02WcF1149h-m VA), «Payomi Mardum» (https: //www .youtube. com/channel/ U С v obZ 1 G2CMxy Ekw Y1XH Y OvQ),«Паймони Миллии Тоҷикистон» (https:// www. faceb00k. C0m/ naftM0roi – MKAHH - T04HKHCT0H - 596956310802091/). «Группа-24» (https://www. youtube. com/ channel/ Ucm CWlaokpZVoCrvi80UvIuA), «HAQTJ» (https:// www.youtube. com/channel/UCsWkRTYoK tENMHbelkgwGcO). «ПАЁМ tv» (https://www. youtube. com/ channel/ UCO qafr VhGQV pv8SsIu_wcxw), «POLITIK TJ» (https: //www. voutube.com/ channel/UCf9pX DJUFHotTGkMm80Jlw), «Ҳизби Наҳзати Ислом» (https://www.voutube.com/channel/  UCKvg Qh01VBbx Woito6xP Kg), «ГРУППА 24 LIVE» (https://www.voutube. com/channel/UC3iz3J495UOoSa Vg Bw GC 09 w), «Группа 24 Общественное политические движения» (https://www. facebook. com/ groups/guruhi24/), «Group-24» (https://www.facebook. com/ group 24net/) ва «Паёми Мардум» (https://www.facebook. com/pavomimardumA, ки ба ташкилотҳои террористӣ-экстремистии «Паймони миллии Тоҷикистон», «Ҳизби Наҳзати Исломии Тоҷикистон» ва дигар ташкилотҳои террористӣ-экстремистӣ хизмат мекунанд, баста шудааст.

 

Панҷшанбе, 14 Ноябр 2019 09:44

Шоираи Раҳимҷон, журналист, шоира ва продюсери маъруфи Тоҷик, ки ҳафтае қабл аз сафари тӯлонии Амрико баргашт, дар меҳмонии газетаи СССР қисса кард, ки Тоҷикони соҳиби «грин-корт» дар шаҳру штатҳои Амрико хеле зиёд шудаанд ва ҳама ҷои кор доранд. Амрико ҷоест, ки дилхоҳ нафар бо кор таъмин мешавад, чӣ дар соҳаи хизматрасонӣ ва чӣ иҷтимоиёт. Бо 1 ҳарф ба ҳама ҷои кор мерасад!!! Вале ошкоро мегӯям, ба кулли онҳое, ки дар орзуи «грин-корт»-анд, ҳаргиз фикр накунанд, ки зиндагии хусравонӣ меёбанд. Албатта сароғоз мушкил аст, вале ба оҳистагӣ ҳастанд тоҷиконе, ки муваффақ шудаанд. Амрико шаҳри орзуҳост. Фарзи мисол, Лоиқ Раҷабови Тоҷик, ки дар тӯли андак вақт чемпиони PFL шуд. Ӯ дар Лас-Вегас 3 бор пирӯз омад ва ифтихори мо-Тоҷикони амрикоӣ буд. Тоҷикони зиёд дар Нйю Йорк, Вашингтон, Колорадо, Массачусетс… кор мекунанд… Тасмим дорам, дар шумораҳои ояндаи СССР ҳатман сафаргуфтори худро чоп кунам. Амрико 1 вежагие дорад, ки ҳаргиз ба ранги пӯст ва дину мазҳабатон касе аҳамият намедиҳад. 4 моҳ будам ва бо табъизи нажодиву мазҳабӣ дучор наомадам, чи хеле ки дар Русия ба чашм мехӯрад. Бо ин ҳама ватан-ватан асту вақте аз самолет дар Душанбе фаромадам, хоки Ватанро бӯсидам. Бовар мекунед, ҳатто дашному ҳақорати тоҷикон самимист. Воқеан, баъдан ба Кобул рафтам ва медонед чӣ? Дасти Президенти кишвар Эмомалӣ Раҳмонро мебӯсам, ки чунин сулҳу оромишу зиндагонии осударо барои мо таҳия кардааст. Барои қадрдонии ин хидмати Президент бояд ҳар тоҷик ақаллан 1 бор Афғонистон равад ва бинад, ки сарватмандтарин афғону соҳибмансабтаринаш низ интизор аст, ки ҳамин ҳоло ӯро метарконанд ва ё мепарронанд. Садқаи хоку обу боду ҳатто дашному ҳақоратҳои Ватан!!! Мо Метавонем!!!

 

 

Чоршанбе, 13 Ноябр 2019 11:38

 Рустами Эмомалӣ, раиси ш.Душанбе ба муовинони соҳавӣ ва роҳбарони сохторҳои дахлдори пойтахт вобаста ба танзими қонунии манъи парвариш ва нигоҳдории чорво ва ҳайвоноти хонагӣ дар ҳудуди ш.Душанбе дастур дода, инчунин талаб намудааст, ки ҷиҳати иҷрои моддаи 7 Қонуни Ҷумҳурии Тоҷикистон «Дар бораи мақоми пойтахти Ҷумҳурии Тоҷикистон» дар самти пурра манъ гардидани парвариш ва нигоҳдории чорвои калони шохдор, чорвои хурд, инчунин асп, хар, парранда ва дигар ҳайвоноти хонагӣ, ба истиснои гурба, саг ва паррандаҳои хушхон ва хурди ғайриистеъмолӣ дар ҳудуди пойтахт фаъолиятро пурзӯр намоянд. Барои вайрон кардани талаботи мазкур тибқи қонунгузории Ҷумҳурии Тоҷикистон ҷавобгарии маъмурӣ пешбинӣ гардидааст.

     Дар асоси моддаи 480 Кодекси ҳуқуқвайронкунии маъмурии Ҷумҳурии Тоҷикистон ба шахсони воқеӣ барои ғайриқонунӣ дар ҳудуди маъмурию ҳудудии пойтахти Ҷумҳурии Тоҷикистон, ба ғайр аз минтақаҳое, ки бо қарори Маҷлиси вакилони халқи шаҳри Душанбе муайян гардидаанд, парвариш ва нигоҳдории чорвои калони шохдор, чорвои хурд, инчунин асп, хар, парранда ва дигар ҳайвоноти хонагӣ, ба истиснои гурба, саг ва паррандаҳои хурди ғайриистеъмолӣ (Қонуни ҶТ аз 30.05.2017 № 1418) ба андозаи аз 10 то 20 ва ба шахсони ҳуқуқӣ аз 100 то 300 нишондиҳанда барои ҳисобҳо ҷарима таъйин карда мешавад. Барои дар давоми 1 соли баъди таъйини ҷазои маъмурӣ такроран содир намудани кирдори дар қисми якуми ҳамин модда пешбинишуда, шахсони воқеӣ ба андозаи аз 20 то 50 ва  шахсони ҳуқуқӣ аз 300 то 400 нишондиҳанда барои ҳисобҳо ҷарима карда мешаванд.

 

 

Чоршанбе, 13 Ноябр 2019 11:36

    Абдулмуъмин Ҳалимов, сарвари "Осоишгоҳи Зумрад" варзишгарони номӣ, ғолибони имсолаи мусобиқа оид ба бокси касбӣ-«РМК Боксинг Промоушен» Асрор Воҳидов ва Муҳаммадҷон Ёқубовро ба ҳузур пазируфта, аз ҷумла изҳор дошт, ки ҷомеаи меҳнатии «Осоишгоҳи "Зумрад" дар қатори дигар сокинони шаҳру деҳоти Исфара аз муваффақиятҳои пайвастаи онҳо сарбаланд ва ифтихорманд буда, минбаъд ҳам омодааст варзишгарони умедбахшро дар ҳаллу фасли ҳамагуна масъалаҳои вобаста ба таъминоти моддиву маънавӣ дастгирӣ намояд. Дар ин бора ба мухбири СССР дар маркази матбуоти раиси ш.Исфара хабар доданд.

    Маврид ба зикр аст, ки таърихи 2-юми ноябр Асрор Воҳидов, чемпиони сабуквазни ҷаҳон (дар вазни 48 кг)-и соли 2011 миёни наврасон, Устоди дараҷаи байналмилалӣ дар мусобиқа оид ба бокси касбӣ-«РМК Боксинг Промоушен», ки дар шаҳри Екатеринбурги Федератсияи Россия баргузор гардид, намояндаи Федератсияи Россия Андрей Федортсовро шикаст дода, соҳиби унвони қаҳрамон дар вазни то 55, 2 кг. гардид. 

    Ифтихори дигари мардуми Исфарамарз варзишгари ҷавону умедбахш Муҳаммад Ёқубов бошад, бо варзишгари Мексика Абрахам Монтоя дар вазни то 59 кг. қувваозмоӣ намуда, унвони қаҳрамони худро дар бахши WBC International бори сеюм бо муваффақият ҳифз намуд.

    Лозим ба ёдоварист, ки вакили Маҷлиси вакилони халқи ш.Исфара, сарвари «Осоишгоҳи Зумрад» Абдумуъмин Ҳалимов мудом ҷавонони соҳиблаёқату боистеъдоди шаҳру деҳоти Исфараро чӣ дар таҳсил, чӣ дар мавриди азхудсозии касбу ҳунар ва чӣ дар варзиш ҳамаҷониба дастгирӣ менамояд. Варзишгарони шаҳр, аз ҷумла Асрор Воҳидов ва Муҳаммадхӯҷа Ёқубов низ ҳамешагӣ аз чунин кӯмаку ғамхориҳои сарвари «Осоишгоҳи Зумрад» бархӯрдоранд.

 

Чоршанбе, 13 Ноябр 2019 10:03

Михаил Горбачев-президенти собиқи СССР дар мусоҳиба бо ВВС гуфт, бо назардошти мухолифати Русия ва Ғарб, ки мусаллаҳ бо бомбаи атомиянд, ҷаҳон рӯ ба рӯи хатари азиме қарор дорад: “Тамоми кишварҳои ҷаҳон бояд эълон кунанд, ки аслиҳаи атомӣ бояд аз байн бурда шавад, то мо ва сайёраи мо наҷот ёбад. То замоне, ки аслиҳа ва пеш аз ҳама аслиҳаи атомӣ вуҷуд дорад, ин як хатари бисёр азим аст». Горбачёви хоин, ки СССР-ро барҳам зада буд, мехоҳад Русия низ бомбаҳои атомияшро нест кунад, то туъмаи НАТО қарор бигирад?

 

Чоршанбе, 13 Ноябр 2019 10:01

Агар дар с.1991 дар ҳудуди вил.Хатлон ҳамагӣ 75 корхонаи саноатӣ буд, пас имрӯз теъдоди чунин корхонаҳо аз садҳо адад болост. Дар 28 соли охир баҳри таъмини насли наврас ба шароити мусоиди таълим дар шаҳру навоҳии Хатлон шумораи зиёди мактабҳои таҳсилоти умумӣ сохта шуда, дар умум дар вилоят дар 2 соли оянда бунёди 6500 иншооти ҳаётан муҳим ба назар гирифта шудааст. Лозим ба ёдоварист, ки аз ин теъдод аллакай 1778 иншоот пурра сохта, мавриди истифода қарор гирифтаанд. Дӯстӣ дар миқёси мамлакат яке аз ноҳияҳои калон маҳсуб ёфта, гуфта мешавад, дар зарфи 2 соли оянда дар ин ноҳия боз 15 муасиссаи таълимиву томактабӣ сохта ба истифода дода мешавад. Тавре Идибекзода Ҷӯрабек, сармеъмори ноҳияи мазкур дар сӯҳбат бо мухбири СССР гуфт, сохтмони мактабу муассисаҳои томактабии нав тӯҳфаи хубест барои ҳам хонандагон ва ҳам маорифчиёни ноҳия. Бояд гуфт, ки ҳамзамон дар баробари дигар корҳо инчунин корҳои ободонӣ ва сарсабзу хуррамнамоӣ ҳам дар н.Дӯстӣ вусъати нав гирифта, дарвозаи даромадгоҳи ноҳия низ ба тозагӣ бунёд карда шудааст.

Баҳодури Абдусалом, вил.Хатлон 

 

Чоршанбе, 13 Ноябр 2019 09:11

Акаи Салмон Расулов сокини ҷамоати «Панҷоб»-и н.Ҳамадонӣ, соҳибистеъдоди фитрист. Бачагию наврасии акаи Салмон бо зиндаёд, ҳофизи машҳури машриқзамин-Одина Ҳошим гузашта, ҳамсабақи мактаби миёнаанд ва дӯстии онҳо то рӯзҳои вопасини умри ин абармарди санъат давом дошт. Ӯ дар бораи дӯсти номвараш хотираи зиёде дорад:

-Сароғоз Одина на аълохону на сустхон, ки миёнахон буд. Аммо дар давраи камолот бо суръати кайҳонӣ пеш рафт. Бе муболиға уқёнуси шеъру ғазал шуд. Чун дигар бачаҳои ин синну сол шӯху ҳазлкаш буд. Ҳамсинфон ҳам ҷои сусти ӯро ёфта буданд: Бисёр содаю зудбовар буд. Кадом 1 дурӯғеро, ки намудатро ҷиддӣ гирифтаю нақл мекардӣ, рост қабул мекард. Масалан, ба ӯ мегуфтанд, ки фалон муаллим суроғат дошт. Ҳамин кифоя буд, ки пайи ҷустуҷӯи муаллим равад. Баъди бо сари хам баргаштанаш қаҳқаҳаи бачаҳо ба осмон мерасид. Ҳамин содагию зудбоварӣ то охири умр ӯро тарк накард. Ҳамаи шикасту афтодагиҳо, нокомию садамаҳои зиндагӣ Одинаро аз ин қалби бузургу зудбовараш буданд. 

Фоҷеа дар консерти Ҷурбаек Муродов

Чӣ қадар таҳдиду озорҳое надид. Гуноҳ-ҳунари худододаш. Боре дар Театри опера ва балети ба номи С.Айнӣ шаби эҷодии Ҳунарманди халқии СССР-Ҷӯрабек Муродов мегузашт. Одина ҳам даъватӣ буд. Лаҳзаҳои дамгирии Ҷӯрабек ӯ табъи ҳозиринро хуш мегардонд. Ин замон касе омада, ба гӯшаш чизе мегӯяд. Ҳофиз саросемавор толорро тарк мекунад. Назди мошини сабукрави «Волга»-аш меояд. Ва мебинад, ки шишаҳои мошин зада шикастагию тунукаҳояш пачақ кардагӣ. Фиттаҳои сабти сурудҳои охираш, коғазхати ёрмандии ҳофиз ба Ветнам ва дигар ҳуҷҷатҳои муҳим рабуда…

-Дод аз дасти фалаки каҷрафтор ва ин кӯрдилони нобакор, - гуфта Одина Ҳошим ба замин нишаста мемонад.

Ин гуна пешподиҳиҳо, илҳомшиканиҳо дар ҳаёти ҳофиз кам набуд. 

«Фавт»-и нобиға дар Сочӣ

Боре ҳини ин гуна хастагиҳо дӯсти дигари Одина Ҳошим, собиқ раиси номдори хоҷагии ҷамоавии ба номи Ленини н.Москва (ҳоло Ҳамадонӣ) шодравон Иззатулло Шарифов ба ӯ таклиф мекунад, ки биё, барои рафъи ин кӯфтагиҳо ба истироҳатгоҳи Сочӣ равем. Ҳофиз қабул мекунад.

Истироҳатгоҳи машҳури Сочӣ. 1 рӯз онҳо вақти сайругашт бо гурӯҳи ҷавононе вохӯрданд, ки аз магнитофонашон суруди «Ало, хам зада кокул»-и Одина Ҳошим танинандоз буду онҳо бо шавқ мерақсиданд. Суруду рақс анҷом меёбад. 

-Гӯяндаи суруд кист?- мепурсад Иззатулло Шарифов.

-Марҳум оғои Одина Ҳошим, - ҷавоб медиҳад яке аз онон, ки аз даризабонони Афғонистон буданашон маълум буд.

-Барои чӣ марҳум? – сӯи Одина ноаён чашмак зада суол мекунад раис.

-Магар гузашта нашудааст? – нобоварона мепурсад ҷавони афғон.

-Ана наздатон истодааст-мегӯяд И.Шарифов.

Одина Ҳошим 2-3 сурудро бе мусиқӣ, аз ҷумла «Ало, хам зада кокул»-ро низ мехонад. Ҷавонони афғон пойҳои ҳофизро ба оғӯш мегиранду бахшиш мепурсанд ва бо шавқи зиёд аз ӯ соядаст мегиранд. Маълум мешавад, ки ин ҷавонон устодро дар Душанбе ҷустанӣ омада будаанд, вале касе аз «рафиқон»-и Одина гуфтааст, ки ӯ кайҳо мурда…

Мардакии Гулрухсор

Устод Одина бо муаллифи сатрҳо шиносоии наздик дошту асосан навиштани хотираи сафарҳояшро ба банда мефармуд. Вақтҳои бекориаш ба идораи рӯзнома омадану бо рӯзноманигорон сӯҳбат карданро дӯст медошт. Боре дар аснои сӯҳбат:

-Мирзо (вай маро бо насабам ном мебурд) медонӣ чӣ, Гулрухсор мардак будаст.

Устод бо ваҷоҳате гуфт, ки ман бо шигифт пурсидам:

-Чӣ хел?!

Устод бо ҳамон ваҷоҳат ҷавоб дод:

-Вақти ба ҷоизаи ба номи Рӯдакӣ пешниҳод шуданам, он ҷо 1 номзади ҳарифи ман пайдо мешавад. Шиносу ҳаммаҳаллаҳояш дар ҳайати комиссия зиёдтар будаанд, ки вай бартарӣ пайдо мекунаду ба ҷоизадор шуданаш лаҳзае мемонад. Ин дам Гулрухсор, ки ӯ низ узви комиссия буд, мушт болои миз зада аз ҷо бармехезад ва мегӯяд:

-Ҳой, мардум, як лаҳза аз аспи ҷаҳл фароед. Шумо чӣ кор карда истодаед? Одина Ҳошим куҷою ҳофизаки шумо куҷо? Охир Одина Ҳошимро Шарқ мешиносад. Агар ин тавр бошад, ман талаб мекунам, ки ҷоизабарӣ ба тариқи раъйпурсӣ гузаронида шавад. Мебинем, ки устод Одина Ҳошим раъй мегирад ё ҳофизаки шумо?!

Латтаи ҳакамони мухолиф ба об мезанад ва маро ҷонибдорӣ мекунанд. Магар мардак набудааст? - баъди шарҳ пурсид маро устод.

Ҷӯрабекро ба миллат баргардонед!

Одина Ҳошим, Зафар Нозим, Ҷӯрабек Муродов-3 хунёгари санъат, 3 ҳофизи соҳибмактаб, намояндаи 3 маҳалли Тоҷикистон-Хатлону Рашту Суғд ба сетор шабеҳ буданд. Имрӯз аз он 3 тор 2 тораш канда шуда, тори сеюмаш бурун аз пойтахт, ҷудо аз гӯшаку қуббааш шудааст, ки басо риққатовар аст. Аммо мо аминем, ки масъулони соҳа охирон ҳунарманди аршад-тори саввуми санъати миллӣ-Ҷӯрабеки Муродро дар зиндагониаш ба мо-Тоҷикон бармегардонанд.

Саъдулло Мирзоев,

н.Ҳамадонӣ

 

  •  << 
  •  < 
  •  1 
  •  2 
  •  3 
  •  4 
  •  5 
  •  6 
  •  > 
  •  >> 
саҳ 1 аз 6

Китобҳо

Flag Counter