Проблеми миллӣ-4

Ростӣ, дар ин бора кайҳо мехостам навистан, вале андеша мекардам, ки «Ба Кӣ мегӯӣ???»… Сӯҳбат сари имиҷ аст ва он ҳам имиҷи сарварони давлатҳо!

Дар илми сиёсат ва дипломатия самте ҳаст, ки онро ба забони содаву оммафаҳмтар «имиҷмейкер» мегӯянд (обрӯсоз). Машинаи бузурги идеологӣ имиҷи президентро месозад. Хоҳ вай раисиҷумҳури Амрикову Русия бошад ва ё Папуа-Гвинеяву Филиппин ва ғ. ва ҳ. Дар ин самт онҳое фаолият мебаранд, ки мактабҳои бузурги имиҷсозиро хатм кардаанд. Соҳа нав нест ва ягон зарфияту вежагии миллӣ ва нажодӣ надорад. Имиҷро бояд талқину ташвиқ намуд, сохт, банду баст намуд ва пешкаши раъият ва аҳли олам кард. Тамом ва-с-салом.

Шумо фикр доред, вақте Трамп, Макрон ё Ангела Меркел… баромад мекунанд,  пасашон мардуми тасодуфӣ саф задааст? Хестед, ки хобед. Ин сенария аст. Ягон нафари тасодуфӣ ба ҳадди 1 тиррас ба президентони абарқудрат наздик шуда наметавонад. 1001 тафтишу протседураро бояд паси сар кард, то дар ин саф қатор кашӣ. Аммо мардуми оддӣ бо шумули мо-Тоҷикон фикр мекунад, ки ана демократияву мана президенти мардумӣ… 

1 мисоли дигари ба баданамон наздиктар (своя рубашка ближе к телу-масали русӣ) меорам. Путинро. Дидаед, ки тамомии олами мутараққӣ зидди ҳокими Кремлин асту имиҷмейкерҳо аз ӯ чигуна Шахсияти барҷаста месозанд? Ин сенарияҳоро дида, фикр мекунӣ, ки баъди пайғамбар ягона шахсияти арзанда ва қобили парастиш ВВП асту бас. Ҳатто қатли Тоҷикони гастербайтер аз сӯи скинхедҳои зертобеи Кремл ба нақши 3 ва 4 мегузаранду дилҳомон саршор аз муҳаббат нисбат ба Ҳукумати Русия мегардад. 

  Чанде пеш Путин дар юбилейи Пахмутова-пианинонавози моҳир ва оҳангсози маъруфи собиқ давлати СССР ва ҳамакнун Русия ширкат дошт. Гулдастае худ бурда, ба Александра Николаевна тақдим намуд ва ҳатто шавҳараш-Николай Добронравов-шоири шӯридаро низ фаромӯш накард. Суханҳое гуфт, ки ҳатто Тоҷикон пасфардояш дар кӯчаҳо онҳоро такрор кардаву ашк мерехтанд…

Ва медонед маро чӣ ёд омад? Дидорҳои раисиҷумҳури ҶТ бо аҳли зиё. Охир Президенти мо аз Путин ҳам дида мардумитар, дилсӯзтар аст дар нисбат ба аҳли ҳунару фарҳанг. Фарзи мисол, дар ҳар чорабинӣ Эмомалӣ Раҳмон худаш микрофон гирифтаву бо сарояндагони маъруфу маҳбуб суруд мехонад, шеър мегӯяд, мерақсад, ҳар ҳунармандро алоҳида пурсупосу дилҷӯиву дилвардорӣ мекунад. Пас, пурсида мешавад, ки чаро имиҷмейкерҳои сарвари давлати мо ҳини пахши чунин барномаҳо тариқи ТВ ин ҳамаро қайчӣ мезананд? Охир бо мардум будан худ намои мардумӣ будани Президенти мост! Ҳар нафаре дар ин чорабиниҳо ширкат кардааст, медонад, ки толор ба ваҷд меояд, зеро ин ҳин воқеан дарк мекунӣ, ки Эмомалӣ Раҳмон бархоста аз миёни мардум аст, фарзанди ҳамин миллат, халқ ва сарзамин аст. Боварнокарданист, вале ӯ тақрибан аз ҳоли дили ҳама фарҳангиён бохабар асту бо проблемаҳояшон ошно ва ҳине бо онҳо сухан мекунад, фикр мекунед, ки падар бо фарзандонаш сӯҳбат дорад. Ин гирудорро аҳли толо мебинаду медонад ва гуфтаҳои маро тасдиқ хоҳанд кард. Вале мутаассуф, қайчибадастони имиҷмейкер 9 млн аҳолии Тоҷикистонро аз сӯҳбату баҳсҳои офарандаи раисиҷумҳури хеш маҳрум мекунанд!      Шахсан ман намедонам барои чӣ? Шояд онҳо фикр доранд, танҳо ҷиддияти Президентро ба намоиш гузоранд, имиҷи ҳукумат боло меравад? Аслан на! Замона дигар шудааст. Барои имиҷи муосир сохтан кӯшишу талоше ҳам лозим нест, зеро рафтору гуфтору доду ситади Президенти мо худ намунаи олии демокротӣ ва мардумсолории ӯст! Вале ҳайҳот, ки ин ҳама аз назарҳо ғоиб мемонад…

Дар тӯли чанд соли ахир, танҳо бозовардани Бозор Собир-шоири шӯрида ва Тимур Зулфиқоров-бузургтарин адиби русзабони Тоҷиктабор ба Душанбе ва дар биноҳои навбунёд (новостройка) соҳиби манзили зисти барҳаво сохтани ишон, кофист, ки имиҷи Президенти мо дар олам муаррифӣ мешуд, вале албатта, дар сурати амалан фаол гардидани обрӯсозон, яъне имиҷмейкерҳо…

Борҳо бо устод Бозору Тимур Касимович сӯҳбат кардаам. Суханҳое, ки ишон дар бораи одамгарӣ ва мардумсолории Президент мегуфтанд, худ басанда буд, ки имиҷи ӯ бар осмони 7-ум такя занад. Бозор Собир дигар нест ва назари неки худро ба гӯр бурд. Вале хушбахтона Тимур Зулфиқоров сиҳату саломатанд ва телевизиону радиои мо бояд ҳатман назари ӯро сабт ва пешкаши омма кунанд, ки ин басо хубтар аз шеъру таронасаройии чанд ҳофизаки тасодуфист. Зеро ин ҷо Шахсият дар бораи Шахсият сухан мекунад!!!. Фарзи мисол, Тимур Касимович, ки ҷаҳондидаанд боре ба ман гуфт:

-Сайёфчик, ты знаешь, когда я впервые встретился с Эмомалӣ Рахмоном, то почувствовал, что от нее веет лёгким ветерком симпатии. Такие дуновения идут от Великих сынов отчизни… (ниёз ба тарҷума нест, ки аксарият русиро хуб медонем)…

Вале аммо лекин… ин ҳама назари Шахсиятҳо, рафтору кирдору гуфтори мардумии сарвари давлати мо пушти саҳнаҳое мемонанд, ки қайчибадастон бо миқрози беалам аз назари 9 млн тоҷикистонӣ пинҳон сохтаанд. Мо Метавонем!

PS: Имиджмейкер — это особая профессия. Прежде всего, потому, что он занимается созданием не образа, а облика...

   Додгоҳи вил.Хатлон сокини н.Вахшро Маҳмсадшариф Раҷабовро бо моддаи 177 қисми 1, яъне  пардохт накардани алименти фарзандонаш гунаҳкор дониста, 1 сол аз озодӣ маҳрум кард.  

  Тавре Фатҳиддин Додоматзода, судяи суди вил.Хатлон ба мухбири СССР нисбати ин қазия иттиллоъ дод, Маҳмадшариф Раҷабов соли 2000 сол бо  ҷабрдида Б.Самадова бо бастани ақди никоҳи расмӣ ва урфу одатҳои милливу динӣ оила барпо намуда, дар давоми зиндагонии якҷояашон соҳиби 3 фарзанд гардидаанд. Онҳо 26.05.2006 аз ҳам ҷудо шуда, баъдан ҷабрдида Б.Самадова бо аризаи даъвогӣ ба суди н.Вахш муроҷиат кард. Дар асоси ҳалномаи суд барои таъминоти ҳар 1 фарзандаш ба андозаи 70 сомонӣ дар ҷамъ барои 3 фарзанд 210 сомонӣ ҳар моҳ алимент рӯёнда мешавад. Маҳмадшариф Раҷабов аз соли 2006 то моҳи марти 2019 ба ҳар баҳона алименти фарзандонашро пардохт накарда, дар маҷмӯъ то  6.03.2019, 15540 сомонӣ ба ҷабрдида зарари молиявии иҷтимоӣ расондааст.

    Фатҳиддин Додоматзода, иброз дошт, ки суди марҳилаи 1-ум Маҳмадшариф Раҷабовро 1 сол аз озодӣ маҳрум карда буд  ва  тибқи талаботи қисми 10 моддаи 49 КҶ Ҷумҳурии Тоҷикистон дар ҳолати иваз намудани ҷазои маҳрум сохтан аз озодӣ ба ҷазои ҷарима ва ё ҷазои ҷарима ба ҷазои маҳрум сохтан аз озодӣ 1 шабонарӯзи маҳрум сохтан аз озодӣ 50% 1 нишодиҳанда барои ҳисобҳо, ба истиснои ҷиноятҳои дар қисми 11 ҳамин мода пешбинишуда баробар аст.   Маҳкушуда М. Раҷабов аз санаи 6.03.2019 то 3.04.2019, яъне 29 шабонарӯз дар маҳбас буда тибқи талаботи қисми 10-и моддаи 49 КҶ Ҷумҳурии Тоҷикистон ин маблағ 14,5 нишондиҳанда барои ҳисобҳо баробар ба 797, 50 сомонӣ кам карда шудааст. 

Баҳодур Уроқзода, СССР, вил.Хатлон

 Маркази матбуоти Раёсати ВКД ҶТ дар ш.Душанбе дар бораи боздошти 1 ҷавоне хабар дод, ки солиму саломат буда, бо фиред худро маъюб вонамуд сохта, дар кӯчаҳои пойтахт ба талбандагӣ машғул мешудааст.

   Ин ҷавон шаҳрванд Зиёев Муборакшо Икромҷонович, соли таваллудаш 25.12. 1996, истиқоматкунандаи ш.Ваҳдат, дар х.Рӯдакии ш.Душанбе 2 адад асо (чигас) дар даст худро маъюб нишон дода, аз шаҳрвандону роҳгузарон талаби кумак мекард. Зимни санҷиш муайян карда шуд, ки номбурда дар асл сиҳату саломат буда, танҳо ба хотири ба даст овардани маблағ ба ин кор машғул будааст.

  Вобаста ба ҳолати мазкур нисбати номбурда барои ин амали нанговараш протоколи ҳуқуқвайронкунии маъмурӣ тартиб дода шуда, барои чораҷӯӣ ба Суди н.Шоҳмансур ирсол гардид. Суд дар навбати худ нисбати шаҳрванд Зиёев Муборакшо Икромҷонович ҷазо дар намуди ҳабси маъмурӣ ба муҳлати 5-шабонарӯз татбиқ намуд.

 Биёед соли 2020- ро “Соли таъмиру бунёди мактабҳои деҳот” эълон намоем. “Рӯшди сайёҳӣ” гуфта хело ободкорӣ кардем. Биёед дигар ба фикри шароити таҳсили хонандагони муассисаҳои таълимӣ, ки ояндаи кишваранд, бошем. Биёед, акнун муассисаҳои таҳсилоти ҳамагонии маҳалҳо ва ноҳияҳои дурдастро, ки баъзеяшон дар шароити хело бад қарор доранд, обод намоем!

Мунисаи Шоҳин

Ӯ 7 сол муқаддам зуҳур кард. Замоне, ки ҳамагӣ 13 сол дошт. Он ҳам дар намуди варзиши панкратион (аз юнонӣ – қудрат, қувват) – ҳарби тан ба тани олимпии қадим мебошад.  Яке аз дастовардҳои аввалини варзишгари наврас дар чемпионати Осиё, 23 – 28 июли соли 2012 буд, ки дар он Беҳрӯз Ҳалимов бо медали биринҷӣ сарфароз гардид. Ҳамон сол дар яке аз мусобиқаҳои бонуфузи ин намуди варзиш дар шаҳри Москва, 29. 09.2012 мақоми чаҳорумро касб кард.

Солҳои баъдӣ, бахусус 2016, 2017, 2018 барои варзишгари ҷавон бобарор омад. Дар зарфи ин солҳо вай дар мусобиқаҳои ҷумҳурӣ,  Россия ва кишварҳои Осиёи Марказӣ дар панкратион (фила), грепплинг ва самбои муҳорибавӣ ширкат варзида, ҷойҳои намоёнро соҳиб гашт.

Имрӯз Беҳрӯз Ҳалимови 20-соларо хориҷ аз кишвар ҳамчун варзишгари қавииродаву неруманд мешиносанду эҳтиром мегузоранд. Алҳол ин ҷавони зӯрманд таҳти роҳбарии мураббиёни хеш дарси маҳорат меандӯзад ва дар мусобиқоти гуногунсатҳ шарафи Тоҷикистонро ҳимоя менамояд.

Беҳрӯз Ҳалимов аллакай унвони баланди «Устоди варзиш оид ба самбои муҳорибавӣ» - ро ноил гаштаву дар Донишкадаи тарбияи ҷисмонии ба номи ҷаҳонпаҳлавон Саидмуъмин Раҳимов таҳсил менамояд. Вай бахусус аз ғамхориву сарпарастии ректори донишкада, устоди ғамхору сахтгири хеш Шодӣ Сафаров сипосгузор аст.

- Хоҳони онам, ки Тоҷикистони азиз ҳамеша осудаву шукуфон бошад. Ҳамчун варзишгар ва фарзанди ин сарзамин мекӯшам то барои ҳифзу осоиштагии ҳамватанон саҳми хешро гузошта бошам, - мегӯяд таҳамтани ҷавон Беҳрӯз Ҳалимов.

РУҶӮЪ ё худ роҳи чемпион

1. Соли 2016 (25 – 26 ноябр). Чемпионати Осиё оид ба грепплинг. Дар вазни то 57 кг, ҷойи 7 – ум.

2. Соли 2016 (17 – 18 декабр). Мусобиқаи кушоди Ҷумҳурии Тоҷикистон оид ба панкратион (фила), дар вазни 63 кг, ҷойи 1 – ум.

3. Соли 2017 (8 апрел), олимпиадаи маҳорати ҷангии Федератсияи самбои муҳорибавии Ҷумҳурии Тоҷикистон. Дар вазни то 57 кг, ҷойи 1 – ум.

4. Соли 2018 (30 декабр). Мусобиқаи ҷумҳуриявӣ оид ба самбои ҷумҳуриявӣ. Дар вазни 68 кг, ҷойи 1 – ум.

5. Соли 2019 (30 август). Мусобиқа оид ба «Кулатуу Эртаймаш» байни варзишгарони касбӣ дар ҷумҳурии Қирғизистон, шаҳри Боткент. Дар вазни 66 кг ҷойи 2

6. Соли 2019 (21 – 22 сентябр). Чемпионати Ҷумҳурии Тоҷикистон оид ба панкратион бахшида ба ҷашни Истиқлолияти давлатии Тоҷикистон. Дар вазни 74 кг, ҷойи 1 – ум.

***

Аммо ин ҳама тамрин ва зӯрозмоиҳо осон, бе латхӯрӣ намешавад. Беҳрӯз моҳи октябри соли 2019 ҳангоми тамрин аз по лат хӯрда, чанде табобат гирифт. Ҳини дидори навбатӣ (6. 12. 2019) ба назар хӯрд, ки ҷоғаш беҷо гаштаву дандонҳои зӯрманд симпеч аст…

Умед мебандем, ки варзишгари матинирода, Беҳрӯз Ҳалимов, донишҷӯи факултаи сайёҳии Донишкадаи тарбияи ҷисмонии Тоҷикистон ба номи Саидмуъмин Раҳимов, ки дар 3 намуди варзиши зӯрмандӣ: панкратион, грепплинг ва самбои муҳорибавӣ зӯрозмоӣ мекунад, ба қуллаҳои баланди варзишӣ мерасад.

Умари ШЕРХОН 

09. 12. 2019. Соати 14:15 дақиқа

Шиносномаивазкунӣ имрӯз шаҳрвандони кишварро нигарон кардааст, зеро ба ғайр аз маблағи иловагӣ, боз навбатпоӣ ва ҳаёҳӯй барои иваз кардани шиносномаҳои намунаи соли 1996 ба намунаи соли 2014 дар шуъбаҳои шиносномадиҳӣ мардумро саргардон мекунад. Бо супориши редаксия мо ҳафтаи равон аз вазъи шиносномаивазкунӣ дар 2 шуъбаи шиносномадиҳии ШВКД-ҳои пойтахт-Шоҳмансур ва Сино дидан кардем.

Навбатпоӣ ва саргардонӣ

09.12.2019. Соат бо вақти Душанбе 14:00 дақиқа. Дар назди шуъбаи шиносномадиҳии ШВКД дар н.Шоҳмансур новобаста аз ин вақти рӯз одам хеле зиёд ба назар мерасид. Бархе дар навбат барои супоридани ҳуҷҷатҳо, қисми дигар дар навбат барои иваз кардану гирифтани шиносномаҳои нав меистоданд. Аз рӯи мушоҳида наздики 40 нафар навбат гирифта буданд. Милисаҳои назди дами дар такрор ба такрор мардумро аз он огоҳ мекарданд, ки ҳарчӣ зудтар шиносномаҳои қоғазии хешро ба пастикӣ иваз кунанд, зеро баъдан, бо гузашти мӯҳлати шиносномаивазкунӣ, ба маблағи 150 сомонӣ ҷаримабандӣ карда мешаванд. Инчунин, ба гуфтаи милисаҳои посбон агар шаҳрвандон шиносномаҳои хешро иваз накунанд, бо шиносномаҳои қоғазӣ аз бонкҳо на пул гирифта метавонанд ва на равон карда, бо шиносномаи кӯҳна сим-кортҳоро низ дубора ба қайд гирифта намешавад. Тавре огаҳӣ ёфтем, дар шуъба барқ хомӯш шуда будаасту мардум беш аз 2 соат дар интизори омадани қувваи барқу навбати худ нишаста буданд. Маҳз ҳамин навбатпоии зиёд шаҳрвандонро нигарону нороҳат кардааст.

  Навбат, навбат ва боз навбат

Зимни суҳбат Гулҷеҳра Меҳрабоншоева, 1 сокини Душанбе, ки дар назди шуъбаи шиносномадиҳии ШВКД дар н.Синои пойтахт дар навбат меистод, чунин ибрози ақида кард: “Ман барои иваз намудани шиноснома худ 1 моҳ пеш ҳуҷҷатҳои лозимаро супорида, пас аз 30 рӯз дастрас намудам. Намедонам барои чӣ ин кор  лозим бошад, вале аз сабабе, ки қонун инро талаб мекунад, мо маҷбурем шиносномаҳоямонро иваз намоем. Хуб мешуд агар 1 реҷае барои қабул кардани сокинон муайян карда шавад, зеро мардум дар 1 шуъба ҷамъ шуда, барои навбат доду вой мекунанд. Барои иваз намудани шиноснома барои шаҳрвандон вақти  зиёд бояд диҳанд. Масъулон бояд бо тартиб корҳои худро анҷом диҳан, масалан ман чандин соат дар навбат истодаам”.

    Муттаҳир Маҳбачоев, ҳамсуҳабати дигарамон дар ин маврид афзуд, ки “шаҳрвандони тамоми кишварҳои ҷаҳон кайҳо ба шиносномаҳои пластикӣ гузаштаанду ин талаботи рӯз аст. Агар имрӯз аз ин навбатпоӣ хаста шуда бошем, фардо вақте ба даст шиносномаҳои худро мегирем, ҳатман хушҳол хоҳем шуд”.

 Санам Яқубова, яке аз масъулони шуъбаи шиносномадиҳии ШВКД дар н.Шоҳмансур мегӯяд, ки кор дар шуъбаҳои мазкур аз рӯи реҷаи махсус ташкил шуда, шаҳрвандон метавонанд аз соати 8-и субҳ то соати 22-и шаб бидуни навбатпоӣ ва ҳаёҳӯй бо пешниҳоди номгӯи тамоми ҳуҷчатҳои лозима барои шиносномаивазкунӣ дархост намоянд. Вале аз чӣ бошад, ки мардуми мо маҳз навбатпоиву субҳро авлавият медиҳанд. Вагарна бегоҳ шуъбачао қариб, ки холиянд...

Достиева Омирона ва Шарипова Саҳоба 

Коромӯзони СССР