Бахшида ба 19-умин солгарди Рӯзи таъсисёбии созмони хонандагон ба номи И.Сомонӣ дар майдони Парчам ҷамъомади тантанавии қабули аъзо ба сафи ин созмон зинаи “Ахтарон”, “Ворисони Сомониён” ва “Сомониён” бо иштироки муовини раиси ш.Бохтар Шоиста Абдуназарзода, мудири шуъбаи маорифи шаҳр Қурбонбӣ Забирзода ва хонандагону омӯзгорон баргузор шуд. Барои қабули хонандагон ба зинаи “Ахтарон”, “Ворисони Сомониён”, “Сомониён” сараввал дастаҳо гузориш дода, савганд ёд карданд, ки “ойинома ва низомномаи созмонро риоя карда, бо баҳои хубу аъло ва рафтори намунавӣ таҳсил намуда, дар корҳои ҷамъиятӣ фаъолона иштирок менамоем. Ва барои хизмати халқу ватани хеш доимо тайёрем”.
Баъди гузориши зинаҳо зери суруди тантанавии созмони хонандагон меҳмонон гарданбандҳои зинаҳоро бастанд.

СССР, Бохтар

 Сар аз 25.02.2019 дар ш.Душанбе хатсайри нави автобусии №29 ба фаъолият оғоз кард.
   Чуноне ки ба мухбири СССР аз МДК “Душанбенақлиётхадамотрасон” хабар доданд, хатсайри мазкур аз Беморхонаи Қарияи боло то маҳаллаи Пахтакор тӯл кашида, автобусҳо тавассути хиёбону кӯчаҳои А.Сино, С. Шерозӣ, Н. Қарабоев, Шестопалов ва Борбад ҳаракат менамоянд.

    Лоиқзода Қаноатшо Холиқ, раиси ноҳияи Рашт дирӯз бо Фармони Президенти ҶТ Эмомалӣ Раҳмон аз вазифа сабукдӯш гардида, ба ҷойи ӯ Муқимӣ Раҳимҷон Набизода иҷрокунандаи вазифаи раиси ноҳияи Рашт таъин карда шуд.
   Инчунин, тибқи Қарорҳои Ҳукумати ҶТ Раҳмонзода Лолахон Футур бо сабаби ба нафақа баромадан аз вазифаи директори Агентии таъминоти амволи махсуси назди Ҳукумати ҶТ озод гардида, Савзаалӣ Назирзода-директори Агентии таъминоти амволи махсуси назди Ҳукумати ҶТ ва Саидзода Бобоҷон Абдуқодир-муовини якуми директори Агентии  таъминоти амволи махсуси назди Ҳукумати ҶТ таъин шуданд.
    Бино ба иттилои расмӣ, дар мувофиқа бо Президенти Ҷумҳурии Тоҷикистон 1 қатор кадрҳои сатҳи роҳбарии дастгоҳи марказии Прокуратураи генералӣ, прокуророни ноҳияҳои Рӯшон ва Мурғоби ВМКБ, ноҳияҳои Шаҳринав, Файзобод, Нуробод, Лахш, шаҳрҳои Роғуну Норак, Хуҷанд, Панҷакент, ноҳияҳои Бобоҷон Ғафуров ва Шаҳристони вилояти Суғд, ноҳияҳои Ҷайҳуну Абдураҳмони Ҷомии вилояти Хатлон аз ҳисоби кадрҳои ҷавону соҳибтаҷриба, болаёқат ва поквиҷдони соҳа таъин гардиданд.
    Сардорони шуъбаҳои Вазорати корҳои дохилӣ дар ноҳияҳои Вахшу Шаҳритуси вилояти Хатлон иваз гардида, дар сохтори Хадамоти шиносномавию бақайдгирии Вазорати корҳои дохилии Ҷумҳурии Тоҷикистон низ тағйироти кадрӣ ба амал омад.

    Файзуллозода Хуршед Мирзо бо сабаби ба вазифаи Директори генералии Корхонаи Воҳиди Давлатии “Тоҷинвест”-и Кумитаи давлатии сармоягузорӣ ва идораи амволи давлатӣ таъин гардидан, аз вазифаи директори Муассисаи давлатии телевизиони “Варзиш” озод карда шуд. Ба ҷой ӯ Нориён Парвиз Исматулло директори Муассисаи давлатии телевизиони “Варзиш” таъин гардид.
   Ҳамчунин бо Қарори Ҳукумати ҶТ Назарзода Нурулло Ғаффор-директори Маркази ҳамоҳангсозии лоиҳаҳо оид ба таҷдид ва рушди иншооти инфрасохтори иҷтимоӣ таъин гардид.

Маркази вилояти Хатлон-шаҳри Бохтар хушбоду ҳаво ва сабзу хуррам асту сокинон омодагии ҷиддӣ ба ҷашни байналмилалии «Наврӯз» доранд. Бояд қайд кард, ки шаҳри Бохтар рӯз то рӯз мисли гул баҳорӣ шукуфтан дорад, бовар надоред? Пас метавонед аз дурбини мухбири СССР ин ҳамаро бинед!
Бояд гуфт, ки шаҳрдори маркази вилояти Хатлон Исмоилзода Абдуалим субҳи кориашро аз ободонӣ шуруъ кардаву ҳар 1 гулу гиёҳро шахсан назорат мекунад, ҳатто теъдоди гулҳои шукуфтаву ношукуфтаро аз ёд медонад. Барои ҳусни хоса бахшидан ба шаҳр бо супориши шаҳрдор гулҳои махсус аз хориҷа оварда, дар хиёбони марказии шаҳр шинонда шудааст, ки симои марказ ба шаҳрҳои Аврупо монанд мегардад. Таъмиру азнавсозии роҳҳои ҳудуди шаҳр ва ба талаботи замон ҷавобгӯ намудани онҳо дар маҳаки асосии фаъолияти мақомоти иҷроияи ҳокимияти давлатии ш.Бохтар ва сохторҳои дахлдори соҳа қарор дошта, танҳо соли гузашта бо дастгирии соҳибкорони маҳаллӣ ва бо маблағгузории мақомоти иҷроияи ҳокимияти давлатии шаҳр беш аз 15,8 км чароғонкунии кӯчаҳо, азнавсозӣ ва таъмири роҳу роҳравҳо 38,1 км ва 2 адад пул сохта шудааст.
Мақомоти иҷроияи ҳокимияти давлатии ш.Бохтар дар самти назорати давлатии истифода ва захираҳои об низ корҳои зиёдеро ба сомон расонидааст. Тибқи талаботи қонунгузории ҳифзи муҳити зист ва Кодекси оби ҶТ ҷиҳати таъмини аҳолӣ бо оби нушокӣ, истифодаи оқилона ва тоза нигоҳдории манбаъҳои обӣ ва баргузор намудани чорабиниҳои шаҳрӣ, корҳои ташвиқотиву тарғиботии судманд тавассути ВАО сурат гирифтаанд. Айни замон дар тамоми гӯшаю канори ш.Бохтар корҳои ободониву сабзкорӣ давом ёфта, сокинони шаҳр бо азму иродаи хеш ба ҳашару шанбегиҳо баромада, дар рушду нумӯи он саҳми худро мегузоранд. Ба хотири зебоии шаҳр бо дастури раис гулу буттаҳо ва ниҳолҳои кастонаву дигар намуди дарахтони ороишӣ аз хориҷи мамлакат оварда, дар хиёбонҳои шаҳр шинонида шудаанд.
Шаҳри Бохтар ба ҷашни байналмилалии «Наврӯз» комилан омодагӣ гирифта, ҳамчун тӯҳфа 19 иншооти навро омода кардааст, ки ҳалолашон бод!

Баҳодур Уроқов
СССР вилояти Хатлон

Петр Порошенко-президенти Украина гуфт, кишвараш ба хотири тинҷу осуда будан аз ҷониби Русия бояд ба Иттиҳодияи Аврупо ва НАТО ҳатман бипайвандад. Ӯ ин ҳарфҳоро дар оғози «гонка»-и интихоботии худ баён кард ва Маскавро ба тарҳрезии дахолат дар интихоботи Украина муттаҳам намуд. Ӯ ҳамчунин гуфт, Владимир Путин истиқлоли Украинаро вайрон хоҳад кард. Ёдрас мешавем, ки интихоботи президентии Украина бо 44 номзад 31 март баргузор мешавад.

Шоир Орзу Шодии 67-сола, аз деҳаи Дар-дари ноҳияи Айнии вилояти Суғд (тел: 92 908 41 42, 915 91 27 57) дар меҳмонии газетаи мардумии СССР гуфт, ки ман соҳиби 9 китоби шеърӣ мебошам ва аслан одати худтаърифкуниву ҳаваси узви Иттифоқи Нависандагони Тоҷикистон шудан ҳам надорам! Аммо дар бораи ҳаққу ҳуқуқи муаллиф 1 гапи гуфтанӣ дорам. Барои чӣ аксари ромишгарон ашъори маро дар риштаи оҳанг гузошта месароянду лек ному насаби маро чун муаллиф ба забон намеоранд? Ин магар поймол кардани ҳуқуқи муаллиф нест? Барои мисол, ҳофизони номии кишвар Дамирбек Олимов, Эркин Одинаев, Боҳир Қодиров, Ҳасани Ҳайдар, Афзалшоҳи Шодӣ… дидаву дониста, аз гирифтани исми ман дар поёни суруд худдорӣ мекунанд!!! Соли 2018 1 китобчаи шеърии ман таҳти унвони «Аҷаб дунёст ин дунё» зери таҳрири Мирзо Муллоаҳмад-доктори улуми филологӣ аз чоп баромад. Ва аз ҳамин маҷмуаи ман сарояндагон порчаҳои шеъриро гирифта, оҳанг бастаанд! Ман аз ҳамаи ромишгарон сидқан миннатдорам, ки барои обрӯву шарафи худ аз ашъори ман истифода мебаранду шеъри шоирро дар баробари худ дар байни ҳаводорони худ муаррифӣ менамоянд. Фақат хоҳишам ҳамин аст, ки ҳуқуқи муаллифро риоя кардан даркор. Охир, шеър вақте ки бе соҳиб шуд, вай албатта фолклор ё аз они халқ мешавад! Ё не?!

Дар наздикии боғча, мактаб ва корхонаву муассисаҳои ш.Ашқобод-пойтахти Туркманистон то рафт теъдоди бекорон меафзояд. Ҳамчунин шумори афиша-эъломҳои ҷустуҷӯи ҷои кор низ дар назди манзилҳои зист афзудааст. Ин вазъ баъди он бадтар шуд, ки дастури президенти Туркманистон Қурбонгулӣ Бердимуҳаммадов барои 15% кам кардани шумори ҷойҳои корӣ дар бахшҳои фарҳанг ва маориф баромад. Ҳоло дар миёни онҳое, ки кор меҷӯянд, вақтҳои охир номзадҳои илм низ ба назар мерасанд.