ХАБАРИ ДОҒ
Чоршанбе, 13 Феврал 2019 11:21


Салом ба СССР-и азиз! Ман Фаёзов Далерҷон, зодаи ш. Хуҷанд, вилояти Суғд мебошам. Мехостам дар бораи ҳодисае, ки бо ман гузашт, бароятон нақл намоям, то, ки мардум аз чунин муносибати хунукназарона ва саҳлангории бархе аз марказҳои тиббии кишвар бифаҳманду қазоват кунанд.    Санаи 13.10.2018 сол ман барои гузаштани ташхиси лабораторӣ оиди вируси гепатити DHDV ба филиали лабораторияи «Диамед», ки воқеъ дар суроғаи ш. Хуҷанд дар ҳудуди Беморхонаи клиникавии ш.Хуҷанд ҷойгир аст, муроҷиат намуда, тахлилҳои лозимаро ба онҷо супоридам. Баъдан ҳамшираи шафқат (лаборантка), ки ному насабашонро намедонам, аммо бубинам мешиносам, ному насаби маро бе пурсиши шиносномаи шахсии ман қайд намуда, аз ман таҳлили хун гирифта, ба пробирка андохта, ба рӯи он рақами тартиби 3676 гузошт ва ин рақамро ба ман супорида, таъкид намуд, ки аз сабаби он, ки таҳлилҳои ҷамъ карда шударо барои гузаронидани ташхис ба бинои асосӣ, ки дар ш. Душанбе ҷойгир аст мефиристанд ва бинобар ин баъди 4-5 рӯз бо тариқи телефон хабар гирам ва агар натиҷаҳои таҳлилҳоям тайёр шуда бошад, омада гирам.
   Ман санаи 17.10.2018 ба он рақамхои телефоние, ки лаборантка ба ман дода буд, занг зада, оиди тайёр шудани натиҷаҳои таҳлилҳоям пурсон шудам, ки дар ҷавоб он кас ба ман гуфт, ки натиҷаҳои таҳлилҳо нишон медиҳад, ки Шумо ба бемории вируси гепатити DHDV гирифторед ва таҳлилҳо мусбӣ баромадааст. Пас аз шунидани ин хабари нохуш пеши чашмонамро сиёҳӣ гирифту дасту поям ба ларзиш даромад, тапиши дилам зиёд гардид, давраи ҷавониам, аҳли оилаам фарзандонам ва тамоми лаҳзаҳои хушиҳои зиндагиам аз пеши назарам мегузашт, гумон мекардам, ки ҳаёти ман дар ин лаҳза тамом шуд ва марги ман наздик аст, имрӯз ё фардо ман бояд ин дунёро тарк намоям. Дастам ба ягон кор намерафт, ҳатто хуши аз хона баромадан, хоҳиши касеро дидан надоштам, танҳо фикри оилаю фарзандонамро мекардам, баъд аз сари ман ҳаёти онҳо чӣ мешуда бошад? Дар чор кунчи девори хона ин фикру хаёлҳо маро мехӯрданд, охир ман ҳоло аз ин ҳаёти ширинам намехоҳам маҳрум шавам, ман ҳоло ҷавон ҳастам ва орзую ҳаваси бисёре дорам…
    Ин хабари нохуш на танҳо ба ман рӯҳан ва ҷисман зарар расонид, балки ба аҳли оилаи ман низ, асосан ба падару модарам таъсири манфӣ расонида шуд, ки дар натиҷа саломатии онҳо низ дар зери хатар монда, то ҳол худро нотоб ҳис мекунанд. Аз ин сабаб ман аз саломатии наздиконам хавотир шуда, онҳоро низ аз ташхиси мазкур гузаронидам, ки хушбахтона онҳо ба ин бемории вазнин гирифтор набудаанд. Ҳангоми дар хона бо ин фикру хаёлҳои ғамгин нишастанам, ба ёдам омад, ки лабораторияе, ки ман муроҷиат намудам, яъне филиали лабораторияи «Диамед» дар Беморхонаи клиникавии в.Суғд низ мавҷуд будааст ва ба хаёлам омад, ки шояд аз сари нав аз ташхиси лабораторӣ оиди вируси гепатити DHDV гузарам, беҳуда намегӯянд, ки дунё ба умед аст ва бо умеди калон аз сари нав, бо иваз намудани ному насаби худ, яъне бо ному насаби Саидзода Далер аз ташхиси лабораторӣ оиди вируси гепатити DHDV ба филиали дигари лабораторияи «Диамед» муроҷиат намуда, хун супоридам. Баъди 3 рӯз ҷавоби натиҷаи таҳлилҳоям тайёр шуд, ки он нисбат ба бемории вируси гепатити DHDV манфӣ баромад, яъне ин аз он шаҳодат медиҳад, ки муносибати кормандони тиб нисбати ман хунукназарона ва бепарвоёна иҷро карда шудааст.
   Худо медонад чанд нафари дигар боз ҷабрдидаи муносибати хунукназарона ва бепарвоёнаи кормандони тиббии ин лаборатория гашта бошанд. Баъди ин ҳодиса, ки аз ҷониби кормандони тиб номатлуб иҷро гардидани вазифаи касбии худ ман ба ягон табибони Тоҷикистон бовар накарда, новобаста аз он, ки шароити иқтисодиам вазнин мебошад, аз ёру дӯстонам қарз гирифта, шиносномаи хориҷӣ тайёр намуда, барои боз хам аниқтар намудани натиҷа аз сари нав барои ташхиси пурраю ҳаматарафа ва аз ҳама муҳимаш бо сифат гузаштан санаи 04.11.2018 ба Федератсияи Руссия сафар карда, аз ташхиси лаборатории оиди вируси гепатити DHDV дар ш.Москав, дар Маркази тиббии «МедЭлит» бо супоридани якчанд таҳлилҳо гузаштам, ки натиҷаҳои таҳлилҳоям ба бемории вируси гепатити DHDV манфӣ баромад, яъне ман ба чунин беморӣ гирифтор намебошам!!!
    Албатта, имрӯз ман шукр мекунам, ки сиҳату саломат назди аҳли оилаву фарзандонам баргаштам, лекин барои барқарор намудани саломатии худ, ки дар натиҷаи муносибати хунукназарона, бепарвоёна ва номатлуб иҷро карда шудани кормандони маркази тиббии «Диамед» ба ман зарари моддӣ ва маънавӣ расонида шудааст, хеле ранҷ кашидам. Аз ҳама муҳимаш он аст, ки ман намехоҳам, ки дар оянда ин кирдорҳои кормандони лаборатория нисбати ягон шахси бечораи дигар, ки бовар карда муроҷиат мекунад, такрор ёфта, монанди ман ҷабрдида шавад.

Далер Фаёзов,
маҳаллаи 14-15, қитъаи 151, тел: 92 778 77 33  

Чоршанбе, 13 Феврал 2019 11:15


Ман кадри СССР-ам. Соли 1967 УДТ ба номи Ленин (ДМТ)-ро хатм кардам. Соҳиби маълумоти олӣ шуда, бо ихтисоси филолог-муаллими забон ва адабиёти тоҷик фаъолияти меҳнатиро оғоз намудаам. Тасмим гирифтам, мақолае дар бораи «Муаллим ва дарси ӯ» нависам…

Муаллимӣ ҳунар аст, на касаба!
Муаллимӣ касб неву ҳунар аст, заррофӣ, нозукандешӣ ва ҳавсала мехоҳад. Муаллим бояд ошиқи ҳунари худ бошад, агар дониши худро ҳамарӯза сайқал надиҳад, бозомӯзӣ накунад мисли тир дар торикӣ андохтан аст. Омӯзгори адабиёт метавонад умед, завқ, шавқу шеъру ишқу ростӣ ва донишу имонро, ки воситаи камоли инсонист, дар дилу мағзу хуни шогирд бикорад, борони раҳмат ва баракат ба замини поку беолоиши зеҳн ва қалби шогирд боронад. Муаллими адабиёт бо нутқи шевои худ метавонад ба шогирдон огоҳӣ ва ҳушёрӣ диҳад, бедориву бурдборӣ омӯзонад, ба худшиносии миллӣ роҳандозӣ кунад. Ҳар байти Рӯдакиву таҳлили достонҳои «Шоҳнома»-и Фирдавсӣ, «Маснавӣ»-и Мавлавӣ, «Гулистон»-и Саъдӣ, «Баҳористон»-и Ҷомӣ, ғазалиёти безаволи Ҳофизу Камол, насри Улуғзодаву Фазлиддин Муҳаммадиев…, назми дилангези Турсунзода ва ҳазорҳо пора шеъру каломи фаровони дилангез дар ихтиёри муаллими адабиёт аст.
Муаллими адабиёт бояд аз «Қуръон» ва тафсирҳои он огоҳӣ дошта бошад, зеро «Каломи Шариф» барои бисёре аз шуаро ва уламои мо манбаи илҳом ва рушди калом аст. Шукри беандоза аз Истиқлолият, ки имрӯз натарсида ба забони модарии худ «Қуръон» мехонем! Азбаски, банда дар оилаи омӯзгор тарбия ёфтааму ҳунари муаллимиро пешаи худ интихоб кардаам, падари бузургворам Бобоҷон Ҳусейнов, бародари Шарифҷон Ҳусейнзода руҳашон шоду манзилашон обод бошад, насиҳат карда гуфта буданд, ки «муаллим, ки шудӣ, чунин қоидаҳоро риоя намо:
-Аввал, синфро идора карда тавон, агар натавонӣ аз баҳри пешаи интихобкардаат баро.
-Сонӣ, барои шогирдонат худро қурбон намо, зеро бурду бохти онҳо, бурду бохти туст!
-Ба онҳо чун рафиқ муносибат намо.
-Барои хонандагонат намунаи ибрати одами замонавӣ шав. Зоҳиру ботинат ҷавобгӯи талабот бошад.
-Ҳама вақт дар зоҳири ҳар як шогирдат боигарии ботинии фардиашро биҷӯ, онҳо беохиранд.
-Ба имкониятҳои ҳар шогирдат бовар намо, ёрӣ расон ва барои амалӣ шудан ва такмил додан мадад расон.
-Ба шогирдонат зарар нарасон, қасд нагир.
-Дар такмил додани маҳорати худ ҳамеша бикӯш, чунки хонанда ҳама вақт чизи навро шунидан ва донистан мехоҳад. Дарси якранг бачаро дилбазан мекунад…

Синф саҳнаи зиндагонист!!!
Аз диди ман, синф саҳна асту шогирдон тамошобин, ман ҳунармандам ва нақш мебозам. Чашмакони ҷаззоби толибилмон ба ман нигаронанд, гӯё дар наздашон имтиҳон месупорида бошам. Вобаста ба мавзӯъ дар дарс ҳам хониши бадеӣ, ҳам сурудхонӣ, ҳам ҳазлу мутоиба, ҳам ҷиддият ҳукмфармост. Дарси якранг хонандаро дилгир мекунад. Бинобар ин, муаллим кӯшиш намояд, ки дар дарс чизи наве бигӯяд, хонандаро ба дарс ҷалб созад. Омӯзгороне ҳастанд, ки аз маводи китоби дарсӣ намебароянд. Маводи китоби дарсӣ барои хонанда аст. Муаллим бояд дар атрофи маводи китоби дарсӣ чизи нав бидиҳад. Барои ин заҳмат кашидани устод лозим аст. Асарҳоро-чи назму чи наср, ба пуррагӣ бояд аз худ кунад, ҷойҳои ҷолибашро бевосита аз ёд карда ба хонандагон хонаду фаҳмонад. Ҳамон вақт тири муаллим ба нишон мерасад… Дар натиҷаи рангин гузаронидани дарс дар дили шогирд ҳаваси хондани асари бадеӣ пайдо мешавад. Барои тасдиқи фикр мисолҳо аз таҷрибаи кориам бисёр аст. Барои намуна 2 мисолеро оварданиам:
1.Дар синфи 6-7 аз повести Ҷумъа Одина «Иншо дар мавзӯи озод» пораеро қироат кардам. Дар порча сухан дар бораи наврасони ҳамсинф мерафт. Ҳазлу шӯхӣ, аз дарсгурезӣ, ба ҳамдигар лақабмонӣ…, ки хоси мактаббачаҳо буд. Пора писандашон омад, хандиданд хушҳол шуданд, давомашро хоҳиш карданд. Гуфтам: -Агар шавқатон бедор шуда бошад, ҷӯянда-ёбанда, кобеду хонед, ба ман нақл кунед, 2-то баҳои «5» мемонам. Ёфтанд, хонданд, нақлаш карданд, мукофоташро гирифтанд ва Офаринашон гуфтам!
2.Дар синфи боло мавзӯи таҳлили достони «Юсуф ва Зулайхо»-и Ҷомӣ буд. Ҳини баёни мавзӯъ 2-3 пора ҷои ба хонандагон маъқулашро аз ёд хонда, ҷое, ки дар китоби дарсӣ набуд, нақл кардам. Дар синф хомӯшӣ ҳукмфармо буд. Шогирдон давомашро интизор буданд. Супориш додам, ки давоми қиссаи 2 дилдодаро худашон ёфта хонанд. Чи мегӯед, ки ёфтанду хонданд, ҳатто яке аз онҳо аз бозори «Корвон» достони ба наср баргардондаро ёфтааст, ки бехабар будам. Бо ҳамин баҳона, ман ҳам соҳиби китоб шудам.

Айб дар кӯдак нест, дар муаллим аст…
Бо ин гуфтаниам, ки бачаҳоро айбдор накунед! Завқи шогирдонро бедор кунед. Барои ин, пеш аз ҳама худи муаллим намунаи ибрат бошад! Албатта, ин кор заҳмат металабад. Чӣ бояд кард? Муаллимиро, ки ихтиёр кардем, заҳмат бояд кашид! Вагарна комёб нахоҳем шуд! Ҳунари муаллимӣ беҳавсалагиро намепарастад. Ҳеҷ гоҳ шахси тасодуфӣ муаллими хуб шуда наметавонад! Ҳол он ки дар байни омӯзгорон шахсони тасодуфӣ кам нестанд… Алҳол, дар ҳалқаи фарзанд, набера ва аберагон давлати пирӣ меронам. Дилам ба касбам гум мезанад, ёд мекунам… Тез-тез ба мактаб рафта дар дарсҳои наберагон иштирок мекунам. Баъзан ба хонандагон дилам месӯзад: Муаллим ба дарс дер меояд. Синф мағал бардошта мешинад, дар натиҷа дарс нимкола мегузарад. Мақсади дарс ҳалли худро намеёбад. Дар хусуси гуфтори омӯзгор эрод гирифтан хоҳиш надорам, чунки сухан гуфтан беҳуда… Барои пешрафти кор 3 андеша дорам:
1.То Истиқлолият дар мактабҳо дарсҳои муштарак вуҷуд доштанд. Хонандагони 1 мактаб ба дигар мактаб рафта дар дарсҳо иштирок мекарданд. Ин усул муаллим ва шогирдро ҳушёр мекард. Мабодо дар байни бегонагон шарманда нашаванд!
2.Тариқи ТВ дарсҳои телевизионӣ намоиш дода мешуд. Дарсҳои муаллимони беҳтарин бо шогирдон ё дар мактаб ё дар ТВ намоиш дода мешуд. Ҳар 2 усул ҳам ба пешрафти донишандӯзӣ ва сифати таълим мадад хоҳад расонд.
3.Дар синфхонаҳо «Гӯшаи синфӣ» буд. Дар он ҳатман вобаста ба синну сол рӯйхати адабиёти бадеӣ тавсия дода мешуд. Хонандагон он китобҳоро ёфта мехонданд ва муаллим таҳти назорат мегирифт.
Имрӯз шикоят дорем, ки шогирдон китоб намехонанд. Ба ин бовар намекунам! Муаллим, агар ҳавсала дошта бошад, касбашро дӯст дорад, ҳама гуна роҳу равишро истифода бурда шогирдашро китобхон карда метавонад! Шогирдонро дӯст доред, чунки ҳамин мактабу хонанда ҳаст, ки муаллим бо онҳо кор мекунад, маош мегирад ва зиндагиашро обод мекунад! Мо Ме-та-во-нем!

Каромат Ҳусейнова,
омӯзгори собиқадор, ш.Душанбе

Чоршанбе, 13 Феврал 2019 11:07

Мо ва мушкилоти мо

Чоршанбе, 13 Феврал 2019 11:03


  Шарипова Гавҳарбӣ, сокини ноҳияи Кӯшониён дар меҳмонии СССР гуфт, соли 2016 дар бонки «Агроинвестбок» маблағ гузошта, фикр кардем, ки ин маблағ дар 1 рӯзи сахти зиндагамон лозим мешавад. Аммо имрӯз баъди қариб ба муфлисӣ расидани фаъолияти бонки мазкур аз саргардонӣ ва садҳо маротиба рафтуомад ба ин бонк ҳама гирифтори беморӣ шудем. Мақсади муроҷиати ман ба газетаи мардумии СССР ин аст, ки мушкилии мардумро мақомоти болоӣ мехонанду шодя ин проблемаи оилаи мо низ ҳалли худро ёбад. Моро ин бонк ахмақ мекунад, ҳафтае 100- 120 сомонӣ медиҳад, ҳамин ҳам бо муомилаи дағалона. Пули ба бонк гузоштаи хешро бо миннат мегирему боз ҳам гап мешунавем, таҳқир мебинем, хоҳанд қабул мекунанд, нахоҳанд не. Ин чӣ муносибат ба муштарӣ аст, намефаҳмам!?

Чоршанбе, 13 Феврал 2019 10:43


9 феврали соли 1984 баъди бемории тӯлонӣ котиби аввали ҲК ИҶШС, Юрий Андропов аз олам чашм пӯшид. Андропов яке аз пурмуаммотарин чеҳраҳои сиёсии авохири СССР ба шумор мерафт ва марги ӯ сару садоҳои зиёд дар ҷомеаи шӯравӣ эҷод кард. Ӯро мешавад охирин эҳёгари суннатҳои фаромӯшшудаи кишвари Шӯроҳо унвон кард. Андропов аз зумраи ангуштшумор сиёсатмадорони шӯравӣ ба шумор мерафт, ки вазъияти ногувори Иттиҳоди Шӯравиро дарк мекард  ва кӯшиш кард кишвари Шӯроҳо аз хатари қарибулвуқӯъ ҳифз кунад. Давраи ӯ дар СССР бисёр кӯтоҳ вале аҷибу бисёр ғарбибе буд.                                                                                                       

Аз КГБ ба Политбюро
Ситораи сиёсии Андропов бо таъини ӯ ба ҳайси роҳбари вақти КГБ ба ҳамагон ҷилвагар гардид. Юрий Андропов то ин вақт ҳатто як рӯз ҳам дар ин ниҳод фаъолият накарда буд ва кам касе гумон мекард, ки рӯзе роҳбарии ин ниҳодро ба зимма мегирад. Аз ин болотар Андропов дар таърихи фаъолияти КГБ баъди Феликс Дзержинский шояд самараноктарин роҳбари ин ниҳод ба шумор мерафт. Замои роҳбарии ӯ КГБ и СССР ҳеҷ кӯтоҳи дар анҷоми вазифа намекард ва тамоми ҷанбаҳои ҳаёти ҷомеъаи шӯравиро таҳти назорат қарор дода буд. Пеш аз Андропов ба КГБ Владимир Семичастний роҳбарӣ мекард. Аммо миёнаҳои моҳи маи соли 1967 Брежнев якбора дар як нишасти Бюрои сиёсӣ ӯро бо сабаби ба кори дигар гузаштан аз вазифаи роҳбари КГБ холӣ кард ва Анропов раиси КБД гардид.    

Чоршанбе, 13 Феврал 2019 10:38


13.02.1918. Шӯрои Комиссарони Халқии РСФСР декрет оид ба таъсиси "биржаҳои меҳнатӣ"-ро ба тасвиб расонид. Ин биржаҳо ташкилотҳои давлатӣ маҳсуб меёфтанд ва вазифаашон миёнаравӣ дар бозорӣ меҳнат буд. Ин биржаҳо то авохири с.1930, то замони рафъи бекорӣ дар СССР фаъол буданд.
13.02.1921. Дар Маскав роҳбари анархистони рус княз Куропаткин вафот кард. Ҳукумати шӯравӣ дар ин рӯз барои ширкат дар маросими дафни княз, тамоми анархистони зиндониро танҳо ба ивази қавли бозгашт аз зиндонҳо озод кард. Князи марҳумро дар қабристони Наводевичийи Маскав ба хок супурданд. Анархистон ба қавлашон вафо карданд ва ҳамаашон бо шиори "анархия-модари амният" ба зиндонҳо бозгаштанд.
13.02.1923. Дар Петроград кормандони ГПУ яке аз маъруфтарин ҷинояткорони рус Леонид Пантёлкинро, ки бо лақаби Лёнка Пантелеев дар ҷаҳони ҷиноии рус маъруф буд, ба қатл расониданд. Лёнка воқеан аз маъруфияти зиёде миёни ҷинояткорон бархурдор ва ҳатто худи Ленинро ҳам ғорат карда буд.
13.02.1934.Дар баҳри Чукотск киштии "Челюскин" миёни яхҳо дармонда ғарқ шуд. Экипажи киштӣ, ки ба челюскинчиён маъруф шуданд, 2 моҳ болои яхпора зиндагӣ карданд.
13.02.1956. Пленуми КМ ҲКИШ қарор дод, дар рафти Анҷумани ХХ-и ҲКИШ нишасти пӯшидаеро доир намояд. Дар ин нишаст котиби генералии ҲК Никита Хрушев мебоист маърузаи маъруфи худ "Оид ба шахспарастӣ ва пасомадҳои он"-ро ба самъи вакилони Анҷуман мерасонид.

Чоршанбе, 13 Феврал 2019 10:30


   Соли 2018 дар доираи корҳои омодагӣ ба таҷлили ҷашни 30-солагии Истиқлолияти давлатии ҶТ дар дар маркази ш.Турсунзода ва ҷамоатҳои деҳоти он корҳои ободонӣ вусъат ёфта, барқарорсозӣ, бунёд ва ба истифода додани беш аз 310 иншооти мухталиф ба нақша гирифта шуда, 52 иншоот алакай ба истифода дода шудааст. Дар ин бора рӯзи 12.02.2019 зимни нишасти матбуотӣ Абдулқодир Вализода, раиси ш.Турсунзода ба намояндагони воситаҳои ахбори омма хабар дод.
   Бино ба иттилои раис, аз ҷумла дар арафаи ҷашни 27-солагии Истиқлолияти давлатии ҶТ 2 бинои баландошёна иборат аз 88 ҳуҷра, растаи арӯсию домодӣ дар наврӯзгоҳи «Баҳори Истиқлол», фаввора дар роҳи даврашакли марказӣ, ангора ва мавзеи гулкорӣ дар роҳи даврашакли маҳаллаи 5-ум, Маркази саломатии деҳавӣ дар деҳаи Боғи Ирами ҷамоати деҳоти Навобод, 57 синфхонаи иловагӣ дар 6 ҷамоатҳои шаҳр, таъмини аҳолии 2 ҷамоати деҳот бо оби нӯшокӣ, 8 сартарошхона дар 4 ҷамоати деҳот, 2 китобхона дар 2 ҷамоати деҳот, 1 майдончаи бозиҳои кӯдакона дар маҳаллаи 3-юми шаҳр, 2 толори варзишӣ дар 2 ҷамоати шаҳр, 3 майдончаи варзишӣ дар маркази шаҳр ва 3 нуқтаи хатнакунӣ дар 3 ҷамоати деҳот ба мардум барои истифода дода шуданд.
   Инчунин, дар деҳоти шаҳр 6 бунгоҳи тиббӣ, 10 утоқи кории раисони маҳаллаҳо, сардхона бо ғунҷоиши 80 тонна маҳсулоти кишоварзӣ, бинои хобгоҳ ва утоқҳои таълимии Муассисаи давлатии таълимии Коллеҷи тиббии шаҳр, ба истифода додани кӯпруки мошингузар дар байни деҳаҳои Сомониён ва Заркамари ҷамоати деҳоти ба номи Ҷӯра Раҳмонов, ифтитоҳи сардхона бо ғунҷоиши 1200 тонна маҳсулоти кишоварзӣ дар хоҷагии деҳқонии «Боғи Сомон», ангораи рамзии КВД «Ширкати Алюминийи Тоҷик», 2 ҳаммом дар ҷамоати деҳот, 3 дорухона дар 3 ҷамоати деҳот, 1 майдони хурди варзишӣ ва майдончаи бозиҳои кӯдакона, 3 истгоҳ дар маркази шаҳр, 1 нуқтаи фурӯши сӯзишворӣ ва 1 маркази хизматрасонӣ бунёд ёфта, барои истифода ба сокинон дода шуданд.

СССР

Чоршанбе, 13 Феврал 2019 10:13

саҳ 8 аз 14

Китобҳо

Flag Counter