Мавсими сафарбаркунии ҷавонон ба сафи Қувваҳои Мусаллаҳи ҶТ фаро расид. Бо ин мақсад 4.04.2019 таҳти унвони «Рӯзи даъватшаванда» дар варзишгоҳи нави Донишгоҳи давлатии Бохтар ба номи Н.Хусрав чорабини васеъ ҷараён гирифт. Ҷавонони даъватшаванда аз назди бинои комиссарияти ҳарбии вил.Хатлон то назди муҷассамаи Исмоили Сомонӣ омада, ҳамчун рамзи эҳтиром гулчамбар гузоштанд. Сипас раҳпаймоии ҷавонон то макони баргузории чорабинӣ идома кард. Дар ҷамъомад раиси вилоят Ҳакимзода Қурбон, роҳбарияти ш.Бохтар, намояндагони ташкилоту муассисаҳои дахлдор, комиссарони шаҳру навоҳӣ бо гурӯҳи ҷавонони даъватшаванда, волидайни наваскарон, омӯзгорону толибилмони муассисаҳои таълимии шаҳр иштироки фаъолона доштанд. Аз ҷониби раиси вилоят ба навдаъватшавандаҳо туҳфаҳои хотиравӣ дар вазъияти тантанавӣ супурда шуд…
Баҳодур Уроқов СССР, вилояти Хатлон
Мурод Сотиев, пуркортарин хабарнигори АМИТ «Ховар» ва сармуҳаррири рӯзномаи «Новый Хатлон» субҳи имрӯз (4.04.2019) бар асари бемории қалб дар ш.Бохтар аз олам чашм пӯшид. Гуфта мешавад, ҷанозаи марҳум ҳамин рӯз пеш аз намози пешин баргузор хоҳад шуд.
Дар ноҳияи Спитамен бо ширкати Президенти ҶТ Эмомалӣ Раҳмон бинои нави Китобхона, осорхонаи “Курушкада”-и таърихӣ ва мактаби мусиқии бачагонаи рақами 2-ро, ки бо тарҳи хеле зебои муосир бунёд гардидааст, ифтитоҳ карда шуд.
Бинои тозабунёди китобхона, осорхонаи таърихӣ ва мактаби мусиқии бачагона аз 3 ошёна ва таҳхона иборат мебошад. Сохтмони иншооти мазкур моҳи июни соли 2017 оғоз гардида, моҳи марти соли 2019 ба анҷом расонида шудааст. Иншооти китобхона, осорхонаи таърихӣ ва мактаби мусиқии бачагона дар н.Спитамен дар масоҳати 1,2 га дар маркази ноҳия қомат афрохта, масоҳати умумии сохтмон 540 метри мураббаъро ташкил медиҳад. Бинои замонавӣ дорои утоқҳои корӣ ва хизматрасонӣ буда, дар таҳхонаи он хазинаи китоб мавҷуд мебошад.
Дар ошёнаи якуми он китобхонаи электронӣ - шуъбаҳои феҳрист, хизматрасонӣ, толори васеъи хониш бо мизу курсиҳои истеҳсоли ватанӣ барои 100 ҷойи нишаст муҷаҳҳаз гардонида шуда ва дар дохили он адабиёт оид ба дастовардҳои Истиқлолият, осору адабиёти шоирону нависандагони муосиру классики тоҷик, гӯшаи китобҳо оид ба Даҳсолаи байналмилалии “Об барои рушди устувор”, солҳои 2018-2028 гирд оварда шудаанд.
Дар ошёнаи дуюм Осорхонаи таърихӣ таъсис дода шуда, ҳамчунин чор утоқи корӣ бо шароити васеъ барои кормандон муҳайё гардидааст. Осорхона “Курушкада”, ки дар байни мардум бо номи Куруши Кабир маълум аст, номгузорӣ гардида, мавзеи қадимтарин ва дар айни замон ноҳияи зебоманзари Спитаменро ифода менамояд.
Дар ошёнаи сеюми иншооти тозабунёд-Мактаби мусиқии бачагона ҷойгир буда, он дорои 11 синфхона, ба монанди танбӯр, назарияи мусиқӣ, рубоб, ғиҷҷак, фортепиано, доира, чанг, утоқҳои корӣ, толори барҳавои намоиши консертӣ мебошад. Дар мактаби мазкур 10 нафар омӯзгори баландихтисос ба кор ва маоши доимӣ барои фаъолият ҷалб гардидаанд. Айни замон дар мактаби мусиқӣ зиёда аз 100 нафар наврасони хуштолеъи даврони соҳибистиқлолии Ватан бо 10 номгӯй асбоби мусиқии миллӣ ба омӯзиш фаро гирифта шудаанд.
Шаҳри Хоруғ дар рӯзи 3-юми даъвати баҳории наваскарон ба сафи Артиши Миллӣ ва Қувваҳои мусаллаҳи ҶТ нақшаи даъватро пурра иҷро намуд.
Чуноне ки ба мухбири СССР дар Раёсати кор бо ҷавонон ва варзиши назди Ҳукумати ҶТ дар ВМКБ хабар доданд, маросими гусели наваскарон рӯзи 3.04.2019 ботантана баргузор гашт. Дар баробари ш.Хоруғ дар ноҳияи дигари вилоят-Мурғоб низ дар рӯзи якуми даъват нақшаи баҳорӣ пурра иҷро карда шуд.
СССР
Жогоргу Кенеш-Парлумони Ҷумҳурии Қирғизистон рӯзи гузашта масоили марзиро бо Ҷумҳурии Тоҷикистон баррасӣ намуда, санадеро ҳам ба тасвиб расонидааст, ки тибқи он аз ҳукумати кишвар хоста мешавад, ки ба мушкилоти сокинони ноҳия ва деҳаҳои наздимарзӣ расидагӣ карда шавад.
Вакилони Жогоргу Кенеш дар ҷаласаи навбатии парлумон аз мушкилоти сокинони деҳаҳои наздимарзии вилояти Бодканд, хосса аз норасоии хадамоти тиббиву маориф, оби тозаи ошомиданӣ ва об барои киштукор гуфта, вазъи роҳҳои маҳаллиро низ нигароникунанда арзёбӣ намуданд.
Инчунин, аз ҷониби чанд нафар вакилон пешниҳод карда шуд, ки осебдидагони муноқишаи марзии рӯзҳои 13-14 марти соли ҷорӣ аз тарафи ҳукумат қадрдонӣ карда шаванд…
Қаблан сокинони ш.Бохтари вилояти Хатлон аз тамбашави (пробка)-и мошинҳо шикоят карда мегуфтанд, ки дар атрофи 2 бозори бузурги шаҳр (пробка)-ҳо ба назар мерасид ва барои гузаштани роҳ вақти зиёд мегузашт. Дар рӯзҳои ид бошад аҳвол бадтар мешуд!!! Дар ин шабу рӯз бо дастури бевоситаи раиси шаҳр дар атрофи 2 бозор умуман мошинҳо дида намешавад. Кормандони БДА-и шаҳри Бохтар айни замон шабонарӯз талош доранд, ки атрофи 2 бозори шаҳр поку тамиз бошад. Махсус 2 нафар корманди БДА-Ҷасур Азимов ва Аҳлиддин Салимов вазифаашонро дар ин самт сидқан иҷро карда истодаанд. Аҳсан ба шумо!!!
Баҳодур Уроқов, СССР, вилояти Хатлон
Боре ба устоди равоншод Мирзо Файзалӣ гуфтам:
-Устод, Лутфулло Давлатов на танҳо актёр, балки филолог, биолог, физиолог, технолог... ҳам будааст.
Устод гуфт:
-Воҳ! 1 нари беҳунар мо будастем: чанг дар домани шоирӣ задастему дигар коре накардастем!
Он гоҳ дуди сигорашро чун дуди кабуди димоғи гулбастанигоре дарун кашиду бурун кашиду гуфт:
-Оҳангар будаст! Ӯ метавонад! Ман бовар дорам! Зан чӣ хел будаст? Ҳамааш ҷобаҷост, ё...?
Гуфтам:
-Бале! Нозанинзансозии ӯро ман аз оҳан дида, замзама кардам:
Зан месозад аз оҳан,
Зан менозад аз оҳан!
Аз оҳан зан месозад,
Аз оҳан зан менозад!
Аз оҳан месозад зан,
Аз оҳан меёзад зан!
Зан аз оҳан месозад,
Зан аз оҳан меёзад!
Оҳанзан хӯ мегирад,
Оҳанзан шӯ мегирад!
Шӯ мегирад оҳанзан,
Хӯ мегирад оҳанзан!
Нарзанзан аст оҳанзан,
Тарзанзан аст оҳанзан!
Оҳанзан тарзанзан аст,
Оҳанзан нарзанзан аст!
Устод гуфт:
-Зани зӯр будаст-ку?!
Гуфтам:
-Бисёр зани зӯр аст! Устод Убайдулло Раҷабови сарбарафрохта бо 1 дидан дилбохтаву ҷигаргудохтаи он забону лабону даҳону ҷаҳони бо бӯсаи тар нонавохтаи забардастзан шудаст.
Устод андар шигифт монду гуфт:
-Ба ин хел зан агар зӯри Убайдулло Раҷабов нарасад, аз ягон кас намерасад!
Он гоҳ сигори чун зарнигори борикро 1 дуд гирифту гуфт:
-Эҳ, Сайёдҷон! Ба Лутфуллоҷон бигӯ, ки барои мо 1 пахтазанак ё бирешимзанак бисозад!
Сайёд ҒАФФОР
Ғоибзода Сафаргул-сокини деҳаи «Колхози Ленинград»-и н.Вахш ва муваққатан истиқоматкунандаи н.Синои 1-и ш.Душанбе дар сӯҳбат бо СССР шикоят кард, ки «аввалҳои моҳи марти соли равон, ман аз н.Вахш ба самти ш.Душанбе равон будам. Дар роҳ бо духтараке бо ном Эшпулатова Ҳамида шинос шудам. Ӯ аз ваъзи бади зиндагияш изҳори нигаронӣ карда гуфт, ки ба ш.Душанбе корҷӯӣ меравад. Аз нақли ӯ озурда шуда, хостам кӯмакаш кунам. Ҳамидаро ба хонаи худам бурда ҷо кардам. 7-8 рӯз дар хонаам зист ва дар 1 корхона ба ҳайси пешхизмат ба кор мондам. 24.03.2019, соатҳои 14:00 аз хонаи ман 40.000 сомонӣ ва 200 доллари ИМАро дуздидида гурехтааст. Инак, то ҳол ӯро меҷӯем, лек намедонам ба куҷо рафтааст».
Ҳамсӯҳбати ман аз тамоми хонандагони СССР хоҳиш мекунад, ки барои пайдо кардани ӯ кӯмак намоянд. Телефон барои тамос: 917 81 39 89
Баҳодур Уроқов СССР, вилояти Хатлон
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар