Бо Қарори Раиси Ҳукумати ҶТ Эмомалӣ Раҳмон Наҷмуддинов Сафаралӣ Маҳсуддинович бо сабаби ба нафақа баромаданаш аз вазифаи директори Агентии суғуртаи иҷтимоӣ ва нафақаи назди Ҳукумати ҶТ озод карда шуд.
   Бо Қарори Раиси Ҳукумати ҶТ ба ҷойи ӯ Давлатзода Дилмурод Ашурбек директори Агентии суғуртаи иҷтимоӣ ва нафақаи назди Ҳукумати ҶТ таъин карда шуд.

   Бо Қарори Ҳукумати ҶТ Ганҷалзода Шералӣ Раҳмон сардори нави Хадамоти танзим ва назорат дар соҳаи нақлиёти Вазорати нақлиёти ҶТ таъин гардида, бо ин сабаб аз вазифаи муовини вазири нақлиёти ҶТ озод карда шуд.
   Ганҷалзода Шералӣ Раҳмон дар ин вазифа Қурбонзода Хуршед Ҳазратро, ки дар пайи интиқоди Президенти ҶТ Эмомалӣ Раҳмон аз вазъи роҳҳои кишвар ва ҳаракати мошинҳои гаронвазн тавассути роҳҳои ба тозагӣ таъмиру таҷдидшуда, ки зимни мулоқот бо кормандони мақомотҳои гумруку андоз ва соҳаи молияву бонкдорӣ рӯзи 10.05.2019 сурат гирифт, аз ин мақом сабукдӯш карда шуд.

Бо Фармоиши Раиси Ҳукумати ҶТ Эмомалӣ Раҳмон тибқи моддаи 32 Қонуни ҶТ «Дар бораи хизмати давлатӣ» ба Каримзода Хуршед Абдураҳмон-сардори Хадамоти гумруки назди Ҳукумати ҶТ бинобар ба таври дахлдор иҷро накардани ӯҳдадориҳои мансабӣ танбеҳ дода шуд. Инчунин, бо ҳамин сабаб ба Турсунзода Азим Ҳайдар-муовини якуми сардори Хадамоти гумрук, Ҳурматзода Иззатулло Зариф-муовини сардори Хадамоти гумрук, Шерализода Хуршед-муовини сардори Хадамоти гумруки назди Ҳукумати ҶТ ҳам бо сабаби ба таври дахлдор иҷро накардани ӯҳдадориҳои мансабиашон танбеҳ дода шуд. Бо Амри Президенти ҶТ ба Нурмаҳмадзода Ҷамшед-раиси БМТ, Нуралиев Ҷамолиддин Камолович-муовини якуми раиси БМТ, Машрабзода Ҳамидулло Маҳмадулло-муовини раиси БМТ, Салимова Лола Ҷумаевна-муовини раиси БМТ бинобар ба таври дахлдор иҷро накардани вазифаҳои хизматиашон танбеҳ дода шуд.

Беҳтарин хайрияи ҷорӣ, дар арафаи Моҳи Шарифи Рамазон, ин аз «Давлати исломӣ» ҷамъоварӣ ва ба Тоҷикистон овардани атфоли бесоҳиби собиқ «муҷоҳидине шуд, ки мисли саг дар набардҳои бемаънӣ кушта шудаанд». Инҳо дигар кӯдакони «фанат»-ҳо не, ки атфоли Давлати Тоҷиконанд. Мо Метавонем!

Ба истиқболи 82-солагии Устоди Ҳунар, Артисти халқии СССР, Барандаи Ҷоизаи Давлатии СССР ва Тоҷикистон, Ҳошим Гадоев

Шоир, таърихшинос ва журналист Ғулом Исоеви 86-сола, аз ноҳияи Данғара, дар меҳмонии газетаи мардумии СССР гуфт, воқеан СССР имрӯз дар арсаи майдони матбуоти Тоҷик шояд ягона нашрия бошад, ки комилан аз мушкилоту дарду дили мардум гӯяд. Барои ҳамин СССРро ҳама мехонад ва дӯсташ медорад, аз ҷумла, худи ман, ки ба зӯр роҳ гардам ҳам, чун пойтахт омадам, ҳатман редаксияи шумо меоям! Рӯзҳои наздик барои СССР як матлаб-ёддоштеро меорам, ки дар он оид ба фоҷиаи ярчи Гӯрдараи ноҳияи Балҷувон сухан меравад. Воқеан ин як ҳодисаи табиие буд, ки дар саҳифаи миллати тоҷик  доғи бузурге боқӣ гузошт. 8.05.1969 кӯҳе болои Гурдараи Балҷувон афтода, беш аз 250 нафарро кушт. Он сол барои рӯпуш кардани бузургии фоҷеа, гуфтанд, ки 130 кас фавтидааст… Ман соли 1933 дар рустои Чашмаи Зулфиқори н.Балҷувон таваллуд шуда, аз соли 1970 то кунун дар ноҳияи Данғара зиндагӣ дорам. Кӯдакии ман дар деҳаи Шаҳиди Бобохони ноҳияи Балҷувон гузашта, ҳамон ҷо ба воя расидам ва расо 7 сол (1963-1970) ба ҳайси директори мактаб кор мекардам. Кӯтоҳи гап, хотироти пора-пораи худро роҷеъ ба Гӯрдара навишта меорам, чопаш кунед, то хонандагони СССР аз асли он фоҷиа огоҳ шаванд. Бигзор ҳар касе шоҳиди ин ҳодиса буд, дидаву шунидаи худро нависад. Таърихро бояд барқарор кард. Мо Метавонем!

Чекистон ва сарбозони ҷангалӣ
16.05.1942 Артиши олмонӣ яке аз бузургтарин амалиётҳои зиддипартизанӣ "Барони лӯлиҳо"-ро амалӣ кард. Партизанҳо воқеан дарди сари сахте барои немисҳо дуруст карданд. Баъди ишғоли манотиқи зиёди СССР артиши олмонӣ ба муқовимати сахт дар ақибгоҳи худ дучор шуд. Партизанҳо, ки худро сарбозони ҷангалӣ меномиданд, ногаҳ ба душман зарба зада, зуд дар ҷангал руст мешуданд. Бештари мо филмҳои партизанҳоро дидаем ва ҳамаи онҳо партизанҳоро муборизони мардумӣ, ки барои муқобила бо фашистон дар ҷангалҳо таҷаммӯъ карда буданд, тасвир мекунанд. Аммо дар асл қазия ранги дигар дошт. Ин ҳаракат баъди чанде барои артиши олмонӣ дарди сари азим ва маҳз аз ҷониби чекистони шӯравӣ роҳандозӣ шуд. Тамоми амалиётҳои ҷосусиро зидди Олмон дар солҳои ҶБВ, раёсати 4-и НКВД амалӣ мекард. Баъди оғози ҷанг то моҳи август вазифаи асосии чекистон наҷот додани қисмҳои дар муҳосирамондаи Артиши Сурх буд, лек амалиётҳо натиҷаи дилхоҳ надоданд. Дар марҳалаи 2-ум чекистон дар якҷоягӣ бо мақомоти маҳаллии ҳизбӣ, ба фиристодани гурӯҳҳои тахрибкор ба ақибгоҳи душман оғоз карданд. Ин дастаҳои тахрибкор партизанҳо ном гирифтанд. Ба ҳар даста афсарони таҷрибадор ва радистҳо ҳамроҳ карда шуданд. Аввалин дастаҳои партизанӣ маҳз аз ҳисоби кормандони раёсати 4-и НКВД таъсис дода шуданд. С.1942 дар НКВД Ситоди марказии ҳаракати партизанӣ созмон дода шуд. Раёсати 4 тамоми имконияти мавҷударо дар ихтиёти Ситод қарор дод. Ин раёсат нақши муҳимеро дар таъмини пинҳонии ҳаракати партизанӣ дар Белорусия, Украина ва ҷамоҳири Назди Балтик ифшо намуд.