Тавре ба мухбири СССР аз МДК "Душанбенақлиётхадамотрасон" хабар доданд, бо мақсади таъмини иҷрои қарори раиси ш.Душанбе Рустами Эмомалӣ то санаи 25.05.2019 1920 адад воситаҳои нақлиёти сабукрави мусофирбари таксӣ, ки дар тавозуни 10 ҷамъияти воситаҳои нақлиёти автомобилии мусофиркаши таксӣ қарор доранд, зиёда аз 1200 нафар ронандагон намои зоҳирии воситаҳои нақлиётии худро ба намои зоҳирии ягонаи қабулгардида мутобиқ намудаанд.

    Дар ин робита роҳбарони ҳамаи ширкатҳои тавассути воситаҳои нақлиёти мусофирбари сабукрави кироякаши таксӣ фаъолияткунанда, ки хизматрасониро дар ҳудуди ш.Душанбе анҷом медиҳанд, муваззаф карда шуданд, ки то 15.06.2019 воситаҳои нақлиёти сабукрави таксиро бо намои зоҳирии ягонаи қабулгардида мутобиқ гардонанд.

   Ширкати ҳавопаймоии “Сомон эйр” ба иҷрои хатсайри мунтазам дар самти Хуҷанд-Нижневартовск-Хуҷанд оғоз мекунад. Парвозҳо дар самти нав дар 2 ҳафта 1 маротиба, рӯзҳои душанбе амалӣ мегарданд. Вақти парвоз аз Хуҷанд соати 09:20, аз Нижневартовск-15:20 бо вақти маҳаллӣ ба нақша гирифта шудааст. . Хатсайри аввалин дар ин масир рӯзи 3.06.2019 иҷро хоҳад гашт. Дар ин бора ба мухбири СССР Тимур Бандишоев, котиби матбуотии ширкати ҳавопаймоии “Сомон эйр” хабар дод.
   Илова бар ин, ширкати ҳавопаймоии “Сомон эйр” аз 8.05.2019 парвозҳои ҳафтаинаро дар самти Хуҷанд-Сургут-Хуҷанд иҷро карда истодааст. Парвози мазкур рӯзи чоршанбе дар ҳавопаймои Боинг-737 амалӣ гашта, вақти парвоз аз Хуҷанд-08:00 ва аз Сургут-16:30 бо вақти маҳаллӣ ба нақша гирифта шудааст.

Тибқи иттилои манобеи хабарӣ, дар ҷараёни амалиёти саркӯби ошӯб (бунт)-и шаби 19.05.2019 дар зиндони №3/2-и ш.Ваҳдат нафароне, ки саркардагони ин ошӯб номбар мешуданд, аз ҷумла, Беҳрӯзи Гулмурод ва Фахриддин Гулов - писар ва ҷияни полковники фирорӣ Гулмурод Ҳалимов, кушта шудаанд. Ошӯбгарон афсари зиндонбонро кушта, 5 маҳбус, аз ҷумла, Шайх Темур (бо ҷурми тасаввуфия), Махсуми Саттор (барои ором кардани вазъ) ва Эшони Қиёмиддин (барои шиа шудан)-ро ваҳшиёна сар бурридаанд. Гуфта мешавад, Зайд Саидов-миллионери зиндонии дигар, бо амри тасодуф, аз дасти он ҷаллодон фирор кардаву ҷон ба саломат бурдааст, ҳарчанд сахт захмӣ ҳам гардидааст. Воқеан ҳам шодихӯрдагони ДИИШ аҳли тасаввуф ва шиаро бераҳмона қатл мекунанд... ва амалашон дар зиндон собит сохт, ки онҳоро ягон маҳбасу дору расан ислоҳ намекунад. Ин мессенҷере буд ба онҳое, ки фикр доранд, зиндон роҳи халосӣ аз варта аст... Ғаробати кор дар он аст, ки ба ном “оппозитсионерҳои интеллигенти мо” аз Аврупову Русия дар марги ин ҷаллодони ДИИШ мотам гирифтаву ба пайвандон ва ҳатто (нахандед!) Миллати Тоҷик тасаллият мекунанд, на бар афсароне, ки амнияти хешони ҳамин сакалтуҳоро ҳифз кардаанд...

Ошӯб дар маҳбаси Ваҳдат
Дар пайи муноқиша ва ё «бетартибӣ»-е, ки дар маҳбаси ба ном «Кирпичний»-и ш.Ваҳдат ба вуқӯъ пайваст, 29 нафар кушта шуд. Тавре дар изҳороти Хадамоти матбуоти Сарраёсати иҷрои ҷазои ҷиноятии (СИҶҶ) Вазорати адлияи ҶТ, ки субҳи 20.05.2019 паҳн шуд, омадааст, соати 21:30 дақиқаи шоми 19.05.2019, дар муассисаи ислоҳии 3/2 воқеъ дар ш.Ваҳдат аз тарафи маҳбусоне, ки бо моддаи 401¹ Кодекси ҷиноятии ҶТ маҳкум шудаанд, бо мақсади номураттаб сохтани низоми муассиса ва фирор аз он бетартибӣ ба амал омад.

Роҳбари «бунт»-писари Гулмурод Ҳалимов!
Ташкилкунандагони бетартибӣ аъзои созмони террористиву экстремистии манъшудаи «Давлати исломӣ» буда, роҳбарони бевоситаи он Беҳрӯзи Гулмурод-писари собиқ полковники фирорӣ-Гулмурод Ҳалимов, Гулов Фахриддин, Шарипов Маҳмадулло ва Ҳасанов Рӯҳулло будаанд. Инчунин, мақомот аз безараргардонӣ ва фавти Асоев Абдуқодир Маҳманазарович, Ахмедов Эраҷ Ҷабборович ва Боев Ҷонмаҳмад Ятимович низ хабар медиҳанд. Ин гурӯҳ аввал 3 корманди муассисаи ислоҳӣ-майор Муродов Бурҳониддин, майор Ҳалимов Абдуҷаббор ва лейтенанти калон Асоев Маҳмудро бо корд ваҳшиёна ба қатл расонида, аз тавқифгоҳи ҷаримавӣ 8 тан маҳбуси дигарро, ки онҳо низ аъзои созмони террористиву экстремистии «Давлати исломӣ» буданд, озод кардаанд. Сипас, 5 нафар маҳбус, аз ҷумла, Саид Қиёмиддини Ғозӣ, Каримов Саттор Самадович (Махсуми Саттор) ва Сатторов Саидаҳмад (Шайх Темур)-ро бароварда, дар назди дигар маҳбусон бо мақсади тарс додани онҳо бо корд ваҳшиёна ба қатл расонида, даҳҳо нафар маҳбусони дигарро лату кӯб ва захмӣ карданд.

32 нафар кушта, 35 тан боздошт шуд
Баъди ин амали ваҳшиёна аъзои гурӯҳ қисми тиббии муассисаро оташ зада, якчанд нафар маҳбусонро гаравгон гирифта, бо мақсади фирор аз муассиса ба кормандони он ҳуҷум карданд. Дар натиҷаи амалиёти ҷавобӣ, ки тибқи талаботи қонун сурат гирифт, 24 узви гурӯҳи мазкур «безарар», 35 тан дастгир шуд. Ашхоси ба гаравгон гирифташуда озод гардиданд. Дар ин миён, гуфта мешавад, худи ошӯбгарон 5 касро сар буридаву 3 афсари дигарро куштаанд. Яъне дар ҷамъ, ин ҳодиса ҳадди ақалл 32 кушта бар ҷой гузошт. Оид ба ин ошӯб аз тарафи Прокуратураи генералӣ парвандаи ҷиноятӣ оғоз шуда, тафтишот идома дошта, низоми муқаррарӣ дар муассиса, ки дар он 1500 маҳбус адои ҷазо мекунанд, барқарор шуда, вазъият зери назорат қарор дорад. Гуфта мешавад, аз ҷониби раҳбарияти СИҶҶ ВА ҶТ ба наздикону пайвандони кушташудагон хабар дода шудааст, ки пас аз зӯҳри 20.05.2019 ҷасадҳои ақрабои худро барои гӯронидан бубаранд. Маҳбаси мазкур барои он нафароне, тибқи реҷа, ки ба дидорбинии хешу табори худ омадаанд, баста асту аз тарафи масъулон эълон шудааст, ки то 1 мӯҳлати муайян ба дидорбинӣ наоянд. Зангҳои пайдарпайи мухбирони СССР ба Сарраёсат натиҷа надод. Масъулин гуфтанд, раҳбарият дар маҳбаси ш.Ваҳдат ҳастанду вобаста ба қазия изҳороти расмӣ паҳн шудааст.

2 ошӯби хунин дар тӯли 7 моҳ
Дар муддати 7 моҳи охир ин бори дуввум аст, ки дар зиндонҳои кишвар ошӯб-«бунт»-бетартибӣ ба вуқӯъ пайваста, пайомадҳои нохуш ба бор меорад. Ноябри с.2018 дар зиндони №3-и ш.Хуҷанд ошӯб сар зада, он замон беш аз 20 нафар ҳам аз ҳисоби маҳбусон ва ҳам аз ҳисоби маъмурон кушта шуданд. Пас аз тафтишоти ошӯби зиндони Хуҷанд 30 тан дубора ба курсии айбдорӣ нишаста, 8 маъмури ин зиндон барои роҳ додан ба ошӯб маҳкум шуданд. Саркардагони ошӯби Хуҷанд низ маҳбусоне буданд, ки барои узвият дар созмонҳои ифротӣ ва мамнӯъ, амсоли ДИИШ маҳкум шуда, қасди фирор аз зиндонро доштанд. Дар тӯли ҳамагӣ 210 рӯз дар 2 зиндон аз ҳисоби афсарону зиндониён 52 нафар кушта шуд.

Шайх Темур кӣ буд?
16.02.2015. Шайх Темур, Эмом Маҳдии сонӣ ё худ шаҳрванд Саидмаҳдихон Сатторов ба 16 соли низомаш сангин маҳкум шуд. Ӯ бо гуноҳи тамаъҷӯӣ, монеъ шудан ба таҳсили фарзандон, таҳқири ҷасади фавтидагон, бисёрзанӣ ҳукм гирифт. Ин мошенники раҳматӣ ба ҳадде мардуми гӯлу гарангро фиреб медод, ки ҳисобаш гум. 1 навъи фиребаш ин буд, ки дар Ҷипи 2-чалака (бак) ба маъракае меомад, ки 1-и он холӣ буд. Ронанда ҳини рафтани Эмом Маҳдӣ мошинро гирён карда наметавонисту ба Шайх шиква мебурд, ки бензин адо. Шайх аз кӯлмаки наздиктарин 1 сатил об оварда, дуо хонда, ба чалаки холӣ мерехту ронанда баки 2-ро гардон месохт ва (о, чудо!) мошин ба кор медарояд! Э, дига бги дега! Мардуми аблаҳ бо нидои «Шайх обро ба бензин табдил дод» зери пойҳои мошенник мефитоданд… Худо раҳматаш кунад, ӯро барои тасаввуф ва…фолбиниву ҷодугарӣ куштаанд…

Қиёмиддини Ғозӣ кӣ буд?
Генерали мардумии майдони Шаҳидон, Ситсерони Тоҷик (ибораи Бозор Собир) аз таъсисдиҳандагони ҲНИ ва поягузорони майдони Озодиву Шаҳидон дар Тоҷикистон аст, ки бар ҷанги гражданӣ оварда, 200.000 куштаву 1 млн гуреза бар ҷой гузошт. Худаш боре дар сӯҳбат бо СССР гуфта буд, ки силоҳу муҳимоти ҷангиро маҳз ӯ аз охундҳои эронӣ ба «муҷоҳидони наҳзатӣ» ба Афғонистон меовард. Вале баъди имзои Протоколи Сулҳ ба шиа гаравид ва аз наҳзатиҳо канор рафт. Мегуфт, ин ҳизб дигар ҳизби исломӣ не, ки ҳизби 1 маҳалла шудаасту дар он ҷо танҳо маҳалгароён фаолият доранд. Чанд кӯлобие, ки дар ин ҳизб буд, ба иттилои ӯ, дар асл зодагони ҳамон 1 маҳалла будаанд. Ноябри с.2017 боздошт ва майи с.2018 ба 25 соли зиндон маҳкум шуд. Сипас 17 соли ҳукмаш афв шуд. Шоҳидон мегӯянд, бобои Эшон бояд авохири ҳамин Рамазон куллан озод мешуд, зеро сахт мариз буд. Ӯро бо иттиҳоми шиа шудан, фанатикҳои ошӯбгар гардан бурриданд.

Махсуми Абдусаттор кӣ буд?
Саттор Каримов маъруф ба Махсуми Абдусаттор аз авторитетҳои криминали собиқ «бачаҳои Кӯлобӣ» дар даврони шӯравӣ буд, ки гапаш қадру манзалати бештар аз қонун дошт! Бо 1 даъвати ӯ то 10.000 кӯлобӣ ҷамъ мешуд ва аз пасаш ба дилхоҳ набард мерафт. Хеле марди варзида, каратэист ва бақувват буд, ҳарчанд ҷуссаи хурде дошт. Ҳамин далели маъруфияташ кофист, ки то шуруъи ҷанги гражданӣ, Сӯҳроб Қосимов шогирд ва дасти рости Махсум буд. Борҳо бо ҳидояти ӯ, ҷавонони Тоҷик бо русу қафқозиву коресҳои беспредели маҳаллӣ задухӯрд кардаанд. Минҷумла, ошӯби кӯлобиҳо бар асари куштори Иззат-1 авторитети Тоҷик аз сӯи русҳо дар кинотеатри Тоҷикистон (дар навбат ба филми «Танцор Диско»), дар декабри с.1994, ки баъдан ба ин ошӯб тамомии Тоҷикони дигар вилоятҳо қӯш шуданд, зери назари Махсуми Абдусаттор сурат гирифт.
Дар баҳманмоҳи с.1990 (февралские события) пешвои Тоҷикони шӯрида маҳз ӯву Ёқуб Салимро шумурда, ҳардуро ҳабс карданд. Обрӯву мартабааш то ҷое буд, ки вақте Сангак Сафаровро баъди майдони Озодӣ оппозитсия ҳабс кард, маҳз ӯ рафта, бо дастони худаш ӯро аз такхона-қассобхонаи исломистҳо бароварда, ба Кӯлоб гусел кард. Вале дар с.1992, ки Кӯлобиҳо майдони Озодиро баргузиданд, Махсуми Абдусаттор хатои калидӣ кардаву ҷонибдори Шаҳидон шуд. Ин аст, ки тарафдорони наздики ӯро ба мисли Қурбонназари «Андреевӣ», Рэмбои Муминободӣ, Рами Кӯлобӣ ва ғ. силоҳшӯрони Талаб-кузнец (Одинамад Раҷабов, Шоҳрух Олимов ва ғ.) дар деҳаи Шобикаи Восеъ куштанд ва обрӯяш дар Кӯлоб фурӯ рехт. Бо ин ҳама яке аз чеҳраҳои калидии наҳзатиҳо боқӣ монд, ҳарчанд худаш мегуфт, ҳеч гоҳ узви ин ҳизб набудааст. С.2015 дар пайи ошӯби Ҳоҷӣ Ҳалим ва қатъи фаъолияти Ҳизби наҳзати исломӣ боздошт ва ба 26 соли зиндон маҳкум шуд. Саттор 60 сол дошт! Ӯро низ фанатикҳои ДИИШ гардан буриданд. Чӣ ҷавонмарде қурбони ин таассубгароёни ноҷавонмард шуд… Мегӯянд, Махсум сахт мариз буд, вагарна ҳич касе наметавонист ӯро гардан занад. Худо раҳмату мағфираташ кунад. Омин!

СССР

Дар ҳамин маврид: Ҳукми қатл барқарор гардад!
Вақте матлаб омодаи чоп буд, 1 нафар занг задаву худро коршиноси масоили динӣ дар бахши омӯзиши экстремизм, таассубгароӣ ва терроризм муаррифӣ карда, афзуд:
-Инҳое, ки боздошт ва суд шудаанд, ҳич гоҳ ислоҳ намешаванд. Баракс, аксарияти ишон барои ташвиқу тарғиби ғояҳои экстремистӣ амдан худро зиндонӣ мекунанд, то дар маҳбасҳо суфуфи хешро зиёд кунанд. Ҷамъияти Тоҷикон ҳоло намедонад, ки дар зиндонҳо дигар «авторитету вор в закону браткаҳову полеженец»-ҳо обрӯву нуфуз надоранд. Зимоми турмаҳо дар дасти «ҳизбӣ»-ҳост, яъне фанатикҳои исломӣ. Онҳо дар зиндон, фарзи мисол, ҳамон обрӯеро доранд, ки Сангак Сафаров чун «Пахан Зоны» дар водии Кӯлоб дошт. Оқибати ин обрӯро медонед, ки чӣ шуд: вақте ҳукумат фалаҷ гардид, беш аз 1 млн. сокини вилояти собиқи Кӯлоб аз паси Сангак хеста, кишварро гирифт! «Ҳизбиҳо» ана ҳамингуна авторитет доранд. Зимнан, онҳоро зиндон ислоҳ намекунад. Роҳи раҳоӣ 1-тост:
-Дар пасманзари 2 ошӯби хунин ва қатли велосипедронҳои хориҷӣ мораторияи қатл бардошта шаваду барои 2-3 моҳ ин ҳукм дар Тоҷикистон ҷорӣ гардад. Мисолҳо низ ҳастанд. Чанд сол пеш, Покистон, баъди ҳамлаи фанатикҳо ба мактаби кӯдакона мораториеро бардошт ва ҳудуди 300 мутаассиби ислоҳнашавандаро қатл кард ва ҷомеа орому таскин ёфт…

Гирди номи Фаррух Хушвахтов вақтҳои охир ҳарф зиёд аст. Эшон, ки масъули таъмини бозорҳои коммуналии пойтахт бо маҳсулоти тарутоза мебошад, чаро то ин дам лаб ба хомӯшӣ зада, барои нигоҳ доштани нарху роҳ надодан ба эътирози мардум дар рӯзҳои аввали моҳи шарифи Рамазон коре накард? Ҳол он, ки тибқи иттилои мо барои таъмини бозорҳо ба КВД «Оид ба истеҳсол, харид, захира ва фурӯши маҳсулоти ниёзи аввалия дар ш.Душанбе» аз ҷониби шаҳрдории пойтахт, хосса, раиси ш.Душанбе, мӯҳтарам Рустами Эмомалӣ, беш аз 30 млн. сомонӣ ҷудо гаштааст! Маблағи кам нест ва хеле аҷиб аст, ки он ба куҷо ва барои чӣ сарф гашта бошад?


Бо гузашти 2 ҳафтаи аввали моҳи шарифи Рамазон нарху навои маҳсулоти ниёзи аввалияи мардум, хосса, гӯшт ва маҳсулоти гӯштиву ширию нонӣ иваз нашуда, баракс, рӯ ба қиматшавӣ дорад. Бо супориши редаксия мухбирони СССР рейдҳои хешро ин ҳафта дар калонтарин бозорҳои шаҳрҳои Душанбеву Хуҷанду Бохтар идома дода, нархҳои бозорҳои минтақаҳои кишварро бо бозорҳои пойтахт қиёс карданд.

Дӯконҳои бастаи «Сафариён»
18.05.2019. Соат ба вақти Душанбе 9:00 дақиқа. Бозори «Сафариён» ё ба қавле бозори «Автовокзал»-у «Аҷина-бозор» дар ин соат камодам аст. Ҷолибтарин чизе, ки дарҳол ба назар мерасад ин дӯконҳои бастаи гӯшт бо навиштаи «Ба иҷора дода мешавад!» аст. Ба ҳисоби мо ин субҳ 12 дӯкони гӯшт дар «Сафариён» баста буду дар 3-4 дӯкони кушода нархи 1 кг гӯшти гов 40 сомонӣ! Гӯшти хуб кам буд, ба ҷои гӯшт ҷигару шуш ва забони говро бо чарбу низ ба растаҳо гузоштаанд. Гӯште, ки 40 сомонӣ арзиш дошт, ба назар рангпаридаву серравған менамуд, шояд ин аст, ки мардум як-як ба дӯкон наздик шуда, ба сифати гӯшт назар мекарданду мерафтанд-гӯшти пастсифати «Сафариён» харидор надошт! Нархи маҳсулоти дигари кишоварзӣ дар ин бозор субҳи рӯзи шанбе чунин буд: 1 кг картошка-2,2-3,2 сомонӣ, сабзӣ-3 сомонӣ, пиёз аз 1,6 то 3,5 сомонӣ, 1 кг помидор-12 сомонӣ, 1 кг бодиринг-4-5 сомонӣ, 1 баста тухми мурғ, ки то ин дам 22-23 сомонӣ арзиш дошт, 27-30 сомонӣ...

«Ҳоҷӣ Шариф» низ қафо намонд!
18.05.2019. Соат ба вақти Бохтар 11:10 дақиқа. Нархи 1 кг гӯшти гов дар бозори «Ҳоҷӣ Шариф» 42-43 сомонӣ, гӯшти гӯсфанд-44 сомонӣ, гӯшти буз-44 сомонӣ, гӯшти мурғ-21-22 сомонӣ, 1 дона тухм 0,80-1 сомонӣ, 1 литр равғани растанӣ-13-15 сомонӣ, 1 халта орд-60-180 сомонӣ, сабзӣ-3-3,30 сомонӣ, пиёз-2,50-3 сомонӣ, картошка-2,50-3 сомонӣ, бодиринг-2,50 сомонӣ, помидор-7-15 сомонӣ, 1 кг қаламфури булғорӣ-7-15 сомонӣ, 1 кг биринҷ-8-18 сомонӣ, қанди сафед ва шакар-6,5-7 сомонӣ! Нархи 1 кг себ 5-14 сомонӣ, зардолу 3-4 сомонӣ, нок-3-15 сомонӣ, мандарин-8-10 сомонӣ, олуча-14 сомонӣ, шафтолу-15 сомонист. Нархҳои мазкур аз тарафи масъулини бозор барои ҳукумати шаҳр расман пешниҳод шудаанд, вале дар асл он нисбат ба арзиши расмӣ аз 5 то 10% баландтар аст. Аксарияти мардуми минтақаи ш.Бохтар дар сомонаҳои иҷтимоӣ аз қассобон шиква карда, навиштанд, ки гарчанде арзиши 1 кг гӯшт дар бозорҳои шаҳр 42 сомонӣ бошад ҳам, ҳини баркашидан, ба он то 300 гр чарбу илова мекунанд. Дар ҳамин маврид Шерматов Маҳмадсабур, сокини ш.Бохтар ба мухбири СССР занг зада гуфт, ҳамин ҳоло аз бозори «Ҳоҷӣ Шариф» 2 кг гӯштро дар 90 сомонӣ харидааст…

«Панҷшанбе»-гӯшт 52 сомонӣ!!!
19.05.2019. Соат бо вақти Хуҷанд 10:30 дақиқа. Новобаста аз он, ки дар аксарияти растаҳои гӯштфурӯшии бозори «Панҷшанбе» нархи 1 кг гӯшти гов 40 сомонӣ навишта шудааст, бархе аз қассобон лаҳм гуфта, гӯшти гови босифати камустухонро 52 сомонӣ фурӯхта истодаанд! Бояд гуфт, дар бозорҳои ин вилоят қассобон гӯшти говро ба 2 навъ ҷудо ва савдо мекунанд-гӯшти устухондору равғандор ва лаҳми бе устухону равған. Мардум мегӯянд, сифати гӯшти гове, ки ҳамарӯза дар ярмаркаи шаҳрдории Хуҷанд, ки дар шафати Театри мусиқӣ-мазҳакавии ба номи К.Хуҷандӣ 40 сомонист, беҳбудӣ мехоҳад. Нархи маҳсулоти дигари кишварзӣ дар бозори «Панҷшанбе»-и ш.Хуҷанд дар ин соат чунин буд: 1 кг картошка 2,5-3,5 сомонӣ, пиёз-2,5-3 сомонӣ, сабзӣ-3 сомонӣ, 1 кг гелос-12-15 сомонӣ, зардолу 4-5 сомонӣ, қулфинай-8-10 сомонӣ, шафтолу-12-15 сомонӣ…

«Деҳқон»: гӯшт фаровону мева гарон!
19.05.2019. Соат бо вақти Душанбе 18:30 дақиқа. Ба ин бозори калонтарини яклухтфурӯшии пойтахт махсус дар ин вақти шом омадем, зеро бозорҳо айни замон 2 вақти «час-пик» доранд: яке субҳи барвақт ва дигаре пеш аз намози шом. Ба растаи гӯштфурӯшӣ, ки дар даромадгоҳи асосии бозор ҷойгир аст, роҳ пеш гирифтем. Тамоми дӯконҳо кушодаву гӯшти гов фаровон! Шояд таъсири танқидҳои матбуот бошад, ё ҷилавгирии мақомоту раҳбарияти бозор, ки ҳамакнун бо нархи 40 сомонӣ метавон 1 кг гӯшти хуби гов харид. Мешудаст-ку! Чизи дигаре, ки дар ин бозор моро нигарон кард-ин нархи меваю сабзавот буд, ки нисбат ба 2 ҳафта пеш гаронтар ба назар мерасид. Нархи 1 кг гелос 15 сомонӣ, қулфинай-6-7 сомонӣ, зардолу-4-10 сомонӣ, шафтолу-12 сомонӣ, помидор 8-10 сомонӣ, бодиринг-2,5-4 сомонӣ, пиёз 2,5-3,5 сомонӣ ва қаламфури булғорӣ-12 сомонӣ буд. Картошкаи ҳосили навро дар бозори «Деҳқон» метавон бо 2-2,5 сомонӣ харид, вале нархи картошкаи ҳосили кӯҳна ба маротиб гарон буд: 3,5-4 сомонӣ барои 1 кг!

Кӣ сабабгори ҷаҳиши нарх дар бозор аст?
Тавре мушоҳидаҳои мухбирони СССР нишон медиҳад, нарху навои маҳсулоти ниёзи аввалия бо гузашти 2 ҳафтаи аввали моҳи шарифи Рамазон каме ба эътидол омадааст. Имрӯз дигар мардум барои харидани гӯшти гов даст ба ҳаёҳӯй намезананду нархи меваю сабзавот низ дар аксари ҳолатҳо қонеъкунанда аст.
Бошад, ки мақомоти бозорҳо ва КВД «Оид ба истеҳсол,  харид, захира ва фурӯши маҳсулоти ниёзи аввалия дар ш.Душанбе» нархро комилан ба танзим дароранд. Дар сурати акс, онҳо, барои дарси адаб ба дигарон, бояд куллан ба истеъфо раванд. Мавзуъро пайгир мемонем. Мо Метавонем!

М.Аминзода,
Б.Абдуссалом
СССР

Журналист, муаллифи доимии газетаи мардумии СССР Нурулло Ҳасанов (тел: 918 67 08 05) дар меҳмонии СССР гуфт, ки ошӯб-бунт дар зиндони маъруф ба «Кирпичный»-и шаҳри Ваҳдат маро низ мисли садҳо нафар патриот бетараф гузошта наметавонад. Ҷумлагӣ шоҳид шудем, ки маҳбусони намозхон ба чӣ кори разилу палиду ғайриинсонӣ даст заданд! Лиҳозо, банда ҳамчун шаҳрванди қаторӣ 3 таклиф дорам:
1.Маъмурони маҳбасхона, вазорати адлия дигар ба мусулмонии ашхоси номусулмони зиндонҳо бовар накунанд ва ба онҳо комилан иҷозати тоату ибодатро надиҳанд. Зеро имону диёнатро ба қатлу куштору ғорат иваз кардаанд...
2.Ҳукумати ҷумҳурӣ, вазоратҳои дахлдор барои маҳбусон ҷойҳои кори вазнин, аз қабили, шахтазанӣ, чоҳканӣ, конканӣ, пойдеворканӣ… омода намоянд. То ҳам 1 нола нони аз ҳисоби зиндон хӯрдаро баргардонанду ҳам ба ягон фикру рафтори нопок фурсат наёбанд.
3.Ёдатон бошад, сентябри соли 2010 дар СИЗОи ш.Душанбе ва ҳам ноябри с.2018 дар зиндони ш.Хуҷанд бетартибиву фирори зиндониён маҳз дар вақти намозхонӣ рух дода буд. Инҳо ислоҳ намешаванд ва зимнан бояд ҳукми қатл дар Тоҷикистон барқарор гардад: Хас каму ҷаҳон пок!

Вежагии Рӯза
Хонандаи гиромиқадр! Дар ояи 185, сураи Бақараи Қуръони шариф омадааст: Шаҳру Рамазонал лази унзила фиҳил Қуръон. Яъне дар моҳи Рамазон Қуръон фиристода шуд, ки ҳидояткунанда аст мардумро бо далелҳои равшан ва ҷудокунанда ҳақро аз ботил аст. Чунончи
Моҳи Рамазон гуфт, Худо ҳар кӣ зариф аст,
Донад, ки дар он нозили Қурони шариф аст.
Ҳодисаи якум ин ки нузули Қуръони Шариф дар осмони аввал аст. Ҳодисаи дувуми таърихӣ, ки дар ин моҳ рӯй додааст, муҳорибаи бадр аст, ки дар 17-уми моҳ воқеъ шуда буд. Мусулмонон бо роҳбарии Ҳазрати Муҳаммад (с) ба шумораи каму аслиҳаи ночиз аз болои мушрикон, ки дорои адади сершумори аслиҳаи ҷангӣ буданд, бо ҳукми Худованд пирӯзӣ ёфтанд.

Ривоятҳои рамазонӣ
Ривоят мекунанд, ки Расул (с), ки бо омадани моҳи мубораки шарифи Рамазон ҳар касе фараҳманд гардад, Оллоҳ таъоло ҷасади ӯро бар оташи дӯзах ҳаром мегардонад. Ривоят аст, Оллоҳ таъоло мегӯяд: Кист он кӣ дӯст медорад маро ман дӯст медорам ӯро. Ва кист он кӣ ҳар чӣ талаб кунад аз ман, ҳоҷати ӯро раво гардонам. Ва кист мағфират талабад аз ман, мағфират кунам ӯро.
Пас амр кунад Оллоҳ таъоло, дар моҳи Рамазон кироманкотибинро, ки нависед дар номаи аъмоли бандаи мӯъмин ҳасаноти ӯро ва тарк кунед сайиоти ӯро. Ва маҳв кунад Оллоҳ таъоло аз номаи аъмоли он банда гунаҳҳои гузаштаи ӯро.

Ҳама кутуби Худо дар Рамазон омадаанд!
Ривоят кунанд, ки суҳуфи Иброҳим алайҳисалом дар шаби аввали Рамазон нозил шуд. Тавроти Мӯсо алайҳисалом баъд аз 70 соли суҳуфи Иброҳим дар шаби шашуми моҳи Рамазон нозил гардид. Забури Довуд алайҳисалом пас аз 500 соли Таврот дар шаби 12-уми моҳи Рамазон нозил шуд. Инҷили Исо алайҳисалом баъд вз 1100 сол пас аз Забур шаби 12-уми моҳи шарифи Рамазон нозил гардид. Қуръони Ҳазрати Муҳаммади Мустафо (с) пас аз 622 соли Инҷил дар шаби 27-уми моҳи шарифи Рамазон аз арш ба осмони дунё нозил шуд. Дар муддати 23 сол Ҷабраили амин ба амри Раббулҷалил аз осмони дунё ба гуселонидани ҳазорон ҳазор малоик оят-оят ба ҷаноби пайғамбар онро расониданд.

Биҳишт-муштоқи рӯзадорон
Ривоят мекунад ибни Аббос разияллоҳу анҳу, ки шунидам аз Расули Акрам (с) гуфт:
-Агар умматони ман шарафи моҳи Рамазонро медонистанд, ҳароина таманно мекарданд, ки тамоми сол Рамазон бошад, ки тоати он мақбулу дуои он мустаҷоб ва гуноҳи он мақҳур шавад ва муштоқи рӯзадорон биҳишт аст.
Ривоят кунанд Расул алайҳисалом, ки ҷаннат ба 4 гурӯҳ муштоқ аст: аввал, тиловаткунандаи Қуръон; дувум, нигоҳдорандаи забон, дурӯғ, дашном, бӯҳтон, ғайбат; савум, серкунандаи гуруснагон; чаҳорум, рӯзадорони моҳи шарифи Рамазон. Чи хеле ки мо ҷаннатро мехоҳем, ҷаннат ишонро мехоҳад.
Дар хабар омадааст, ҳар гоҳе, ки ҳилоли моҳи Рамазон рӯй намояд, аршу курсӣ ва фариштагон нидо кунанд, ки башорат бод бар уммати Муҳаммад (с)-ро, ки офтобу моҳу кавокиб,  дар ҳаво мурғон, дар баҳрҳо моҳиён ва кулли зиррӯҳ ҳама омурзиши гуноҳҳони умматони Муҳаммад (с)-ро аз парвардигори оламиён мехоҳанд. Оллоҳ таъоло бар фариштагон фармояд, ки савоби намозу тасбеҳи худҳоро дар моҳи Рамазон ба уммати Муҳаммади Мустафо (с) бибахшанд…

Ҳоҷӣ Исмоил Пирмуҳаммадзода,
махсус барои хонандагони СССР

Роҳи Душанбе-Чанок, ки нигоҳдориаш дар асоси шартномаи консессионӣ ба зиммаи филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон вогузор аст, асосан аз минтақаҳои сайёҳии кишвар мегузарад. Ба ғайр аз ин, истироҳаткунандагон ба осоишгоҳҳои машҳури «Хоҷа Оби гарм», «Баҳористон», «Шифо», «Зумрад» «Сафед-дара», «Гулобод», «Авис-сити», «Ҳавотоғ», «Кохи Малика» ва амсоли инҳо тавассути роҳи мазкур сафар мекунанд. Табиист, ки ҳолати роҳ ва раванди нигоҳдории он ба ҷалби бештари сайёҳон, таваҷҷуҳбарангез шудани минтақа барои ҷаҳонгардон, беҳбудӣ ёфтани инфрасохтори соҳаи сайёҳӣ... мусоидат карда, дар ин раванд омили калидӣ маҳсуб мешавад. Ҷоиз ба зикри алоҳида аст, ки аз ҷониби роҳбарияти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон пайваста навгониҳо ҷорӣ шуда, онҳа пеш аз ҳама, ба беҳтар намудани сатҳу сифати хизматрасонӣ, тавсеаи пардохти ғайринақдӣ, ба талаботи байналмилалӣ мутобиқ намудани ҳолати роҳ ва раванди нигоҳдории он рабт доранд. Мавриди истифода қарор гирифтани плазаҳои нави толлингӣ ба ҷои плазаҳои амалкунанда шаҳодати гуфтаи боло буда, дар баробари бартариҳои дигар, ба рушди соҳаи сайёҳӣ дар мамлакат низ мусоидат намуда истодааст. Далелу арқоми мавҷуда низ аз он шаҳодат медиҳанд, ки аксари сайёҳони дохилӣ ва хориҷӣ, ки тариқи роҳи Душанбе-Чанок сафар мекунанд, аз ҳолати роҳ ва ибтикороти амалинамудаи роҳбарият ва кормандони филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон қаноатманданд.
Эътироф бояд кард, ки чанд соли охир истифодаи кортҳои пардохтӣ аз ҷониби шаҳрвандони мамлакат тавсеа ёфта, раванди дастрасӣ низ ба онҳо хеле сода гардонида шудааст. Тибқи маълумоти оморӣ, айни замон дар ҷумҳурӣ теъдоди истифодабарандагони кортҳои пардохтӣ зиёда аз як миллион нафарро ташкил медиҳад ва ин раванд бемайлон идома ёфта истодааст. Ҳамрадиф бо ин иқдомот, бонкҳои кишвар низ фаъолияти хешро дар ин ҷода густариш бахшида, ҳатто дар дурдасттарин минтақаҳо банкоматҳои худро ба истифодаи мизоҷон вогузоштанд. Аммо фарҳанги истифодаи кортҳои пардохтӣ аз ҷониби шаҳрвандон «ба ҳар ду пой мелангад». Фаъол кардани марказҳои ҷараёникунӣ дар низоми бонкии мамлакат ва барориши кортҳои миллӣ имкониятҳои бонкҳо ва мизоҷони онҳоро дар самти истифодаи кортҳои пардохтӣ бояд васеътар мегардонид, аммо афсӯс...
Ҷои пӯшида нест, ки ҳоло қисми зиёди шаҳрвандони ҷумҳурӣ то чӣ ҳад муфид будани истифодаи кортҳои пардохтиро дарк накардаанд. Барои мисол, дар плазаҳои филиали Ширкат банкомат ва POS-терминалҳо насб шудааст, ки аз онҳо дорандагони кортҳои пардохтии Корти миллӣ, Visa International, Union Pay  метавонанд бе комиссия гузаришро аз плазаҳои толлингӣ бипардозанд. Мутаассифона аз имконияти фароҳамшуда ронандагону мусофирон таври бояду шояд истифода намекунанд. Лиҳозо, барои таваҷҷуҳ зоҳир намудани ронандагону мусофирон ба ин масъала таври мухтасар шарҳу тавзеҳ додани  манфиатҳои рӯ овардан ба пардохти ғайринақдиро мувофиқи мақсад мешуморем:
Ҳамватанон бояд дуруст дарк кунанд, ки истифодаи кортҳои пардохтӣ бартариҳои зиёд дорад. Аввалан, он воситаи хеле қулайи баҳравар шудан аз хизматрасониҳои молиявӣ маҳсуб ёфта, тавассути он харидории дилхоҳ молу маҳсулот аз марказҳои савдо, интиқоли маблағ, нигоҳдории маблағҳои амонатӣ (депозитӣ) имконпазир аст. Сониян, барои дорандагони кортҳо зарурати ба худ гирифтани маблағи зиёди нақд пайдо намешавад. Барои онҳо кифоя аст, ки дар он макон банкомат ё POS-терминалро пайдо карда, дар доираи хизматрасониҳои барои корти пардохтӣ пешбинишуда эҳтиёҷоти хешро қонеъ намоянд. Ин омил ба коҳиш ёфтани пули нақд дар гардиш, ки аз лиҳози иқтисодӣ хеле муҳим аст, боис мегардад. Дар маҷмӯъ, истифодаи васеи чунин кортҳо ба ғанӣ гардидани Буҷети давлат, ҷалби маблағҳои аз гардиши бонкӣ берунмонда, муътадил нигоҳ доштани қурби асъори миллӣ ва боз ҳам боло рафтани нуфузи Тоҷикистон дар арсаи байналмилалӣ ҳамчун кишвари бемайлон рушдёбанда кумаки амалӣ мерасонад. Насби  банкомат ва  POS-терминалҳо дар масири роҳи Душанбе-Чанок далели возеҳи он аст, ки роҳбарияти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон  дар  иҷрои ин муқаррароти қонунгузорӣ фаъол  буда, дар ин самт корҳои зиёдро ба иҷро расонидаанд. Боварӣ дорем, ки ояндаи наздик истифодаи кортҳои пардохтӣ ҳангоми пардохти хизматрасонии филиали Ширкат ба падидаи маъмул табдил ёфта, аксари шаҳрвандони аз истифода хоҳанд кард.

Маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон