Вазорати маориф ва илми ҶТ рӯзи 1.09.2019-ро дар кишвар рӯзи дарсӣ эълон намуд. Гуфта мешавад, ки бо назардошти ба рӯзи истироҳат-якшанбе рост омадани «Рӯзи дониш» 1.09.2019 дар ҳамаи муассисаҳои таълимии ҷумҳурӣ новобаста аз шакли ташкилию ҳуқуқӣ рӯзи дарсӣ эълон гардида, 7-уми сентябри соли 2019 (шанбе) рӯзи истироҳат муқаррар карда шавад.

   Чуноне ки ба мухбири мо дар маркази матбуоти вазорати номбурда хабар доданд, бо мақсади дар сатҳи баланд баргузор намудани «Рӯзи дониш» мутобиқи банди 49-и қарори Ҳукумати ҶТ аз 01.06.2016, №237, моддаи 33 Қонуни Ҷумҳурии Тоҷикистон «Дар бораи маориф» ва банди 11-и Низомномаи Вазорати маориф ва илми Ҷумҳурии Тоҷикистон фармоиши вазири маориф ва илми Ҷумҳурии Тоҷикистон «Дар бораи тағйир додани вақти баргузории дарс» аз 26.08.2019, №5862 ба тасвиб расид.

   Ҳамчунин, тибқи ҳамин фармоиш ба сардори Сарраёсати маорифи ш.Душанбе, сардорони раёсатҳои маорифи Вилояти Мухтори Кӯҳистони Бадахшон, вилоятҳои Суғду Хатлон ва мудирони шуъбаҳои маорифи шаҳру ноҳияҳои тобеи марказ, директорони мактабҳои президентӣ, мактаб-интернатҳои ҷумҳуриявӣ, роҳбарони муассисаҳои таҳсилоти ибтидоӣ, миёна ва олии касбӣ дастур дода шудааст, ки иштироки хонандагону донишҷӯёнро рӯзи 1.09.2019 ба дарс таъмин намоянд.

    Ширкати ҳавопаймоии «Тоҷик эйр» аз 2.09.2019 ба парвозҳои худ дар самти Душанбе-Маскав-Душанбе шурӯъ мекунад. Дар ин бора ба мухбири СССР дар маркази матбуоти ширкати номбурда хабар доданд.

    Гуфта мешавад, ки арзиши билет дар 1 самт 2844 сомониро ташкил намуда, парвозҳо дар ин хатсайр тавассути ҳавопаймои Boeing 767-300 анҷом хоҳанд ёфт. 

Қабл аз ин ширкати «Тоҷик эйр» парвозҳои нахустини худро дар масири Душанбе-Машҳад-Душанбе роҳандозӣ намуда, айни замон ин парвоз ҳафтае 1 маротиба анҷом дода мешавад.

    Кумитаи кор бо ҷавонон ва варзиш бо мақсади дастгирии ҳамаҷониба ва ҳавасманд намудани фаъолияти эҷодии соҳибистеъдодҳои ҷавон, адибону рӯзноманигорон, рассомону бастакорон, режиссёрону меъморон, санъаткорону ҳунармандон, техникону технологон ва навоварони ҷавон, ки дар рушду инкишофи соҳаи худ дар Ҷумҳурии Тоҷикистон саҳми босазо гузоштаанд, барои дарёфти ҷоизаи Кумита дар соҳаи адабиёт, рӯзноманигорӣ, санъат, меъморӣ, барномасозии компютерӣ, техника, технология ва навоварӣ ва эҳёи ҳунарҳои мардумӣ барои соли 2019 озмун эълон менамояд.

Ҷоиза аз рӯйи тартиби зайл баҳогузорӣ карда мешавад:

Адибон (китобҳои илмӣ, бадеӣ, адабӣ, ашъор, осор);

Рӯзноманигорон (мақолаҳо, маводҳои иттилоотӣ, барномаҳои телевизионӣ ва радиоӣ, гузоришҳои хабарӣ (ба корҳо дар самти татбиқи сиёсати давлатии ҷавонон бартарият дода мешавад);

Барномасозон (ихтирокорӣ дар самти технологияҳои иттилоотӣ, компютерӣ (ба корҳо дар самти ташаккули махзани иттилоотӣ, аз ҷумла дар соҳаи ҷавонон бартарият дода мешавад);

Санъаткорон (сарояндагӣ, раққосӣ, тарроҳӣ, ҳунармандии саҳнавӣ, расмҳои кашидаи хусусияти тарбиявидошта, портрет, пейзаж, нақшу нигор ва ғайра);

Меъморон (лоиҳаҳои сохтмонӣ, боғу гулгаштҳои фарҳангию фароғатӣ, марказҳои ҷавонон, фаввораҳо, майдончаҳои варзишӣ ва ғайра, ки истифодаи онҳо ба шароити Тоҷикистон мувофиқ бошад).

Эҳёгарони ҳунарҳои мардумӣ (тамоми навъҳои ҳунармандии миллӣ бо пешниҳоди корҳои амалии иҷрошуда)

Техникону технологон ва навоварон (татбиқи коркардҳои инноватсионӣ дар самти рушди нерӯи инсонӣ, рушди инфрасохтор, амалан татбиқ кардани чор самти стратегии мамлакат, кам кардани сатҳи камбизоатӣ, бехатарии фаъолияти инсон ва экология, амалисозии усулҳои нави таълим ва тадқиқоти илмӣ, истифодаи маводи навин бар ивази маводи мавҷуда, истифодаи технологияҳои иттилоотӣ, такмили сохти таҷҳизот ва мошинҳо, такмили конструксияҳои сохтмонӣ, бино ва иншоот, сарфаи энергия ва манбаҳои барқароршавандаи энергия, баланд бардоштани самаранокии истеҳсолот, истеҳсоли маҳсулоти воридотивазкунанда, такмили фаъолияти меҳнатӣ, паст кардани таъсири бӯҳрони молиявию иқтисодӣ).

   Ҳамчунин, барои иштирок дар озмун оид ба дарёфти Ҷоиза довталабон бояд ҳуҷҷатҳои зеринро пешниҳод намоянд: варақаи шахсӣ, нусхаи шиноснома, нусхаи ҳуҷҷатҳои тасдиқкунанда оид ба дараҷаи таҳсилот, тарҷумаи ҳол-ҳар кадом дар 2 нусха, тавсифнома дар бораи фаъолияти эҷодӣ ва ҷамъиятии довталаб-2 нусха,

расми андозаи 4Х6-4 адад; қарори муассисае, ки дар он довталаб адои вазифа ва ё таҳсил мекунад-1 нусха, рӯйхати корҳо, баста ва ё маҷмӯи маводҳои марбут ба кори пешниҳодшуда.

   Ҳамаи ҳуҷҷатҳои пешниҳодшуда бояд дар ниҳодҳои дахлдор тасдиқ шуда бошанд. Дар озмун хоҳишмандон тариқи инфиродӣ ва ё дар ҳайати гурӯҳи эҷодӣ (то 4 нафар дар синну соли 14–30) ширкат варзида метавонанд. Қабули ҳуҷҷатҳо барои иштирок дар озмун ба суроғаи дар поён овардашуда то 25 ноябри соли 2019, соати 14:00 сурат мегирад.

    Маълумоти иловагиро вобаста ба талаботи озмун метавонед аз суроғаи зерин дастрас намоед.

   Шаҳри Душанбе,, кӯчаи Спортивная 6; телефон барои тамос (+37) 2363726, 904.06.60.74. п/э. – www.youth.tj , Этот адрес электронной почты защищен от спам-ботов. У вас должен быть включен JavaScript для просмотра.

   Чанде пеш шаҳрванд Қурбонова Шаҳноза Маҳмадқуловна дар саҳифаи Фейсбукии худ аз дағалрафтории 1 нафар ҷавонписари пулчин-кондуктори микроавтобуси хатсайри №15 шикоят намуда буд. Дар натиҷа аз ҷониби масъулини хадамотҳои оперативии Раёсати ВКД дар ш.Душанбе дар якҷоягӣ бо Шуъбаи БДА дар асоси далелҳои дар мавод инъикосгардида, нафари ҳуқуқвайронкунанда боздошт ва ба милитсия дастрас карда шуд. 

    Муайян гардид, он ҷавонписаре, ки дар мавод аз ӯ ҳамчун пулчин ёдоварӣ мешавад, шаҳрванд Абдураҳмонов Бадриддин Шарбатович, соли таваллудаш 3. 09. 1992, истиқоматкунандаи ш.Душанбе будааст. Зимни пурсиш номбурда иброз дошт, ки дар ҳақиқат санаи 21-уми августи соли ҷорӣ ҳангоми фаъолияти корӣ ба ҳайси пулчин (кондуктор) дар микроавтобуси тамғаи Мерседес-спринтер рақамҳои қайди давлатиаш 3939 ТТ 05, ки дар хатсайри №15 ба мусофиркашонӣ машғул аст, ҳангоми дар маҳаллаи Ховарон расидан нисбати ин ҷавонзани мусофир, ки бо 2 фарзандаш қарор дошт, беэҳтиромӣ зоҳир намуда, бо алфози қабеҳ шаъну шарафашро дар байни дигар шаҳрвандон паст задааст. 

    Вобаста ба ҳолати мазкур аз ҷониби кормандони милитсия нисбати Абдураҳмонов Бадриддин Шарбатович бо дастрасии моддаи 460 Кодекси ҳуқуқвайронкунии маъмурии ҶТ(майдаавбошӣ) парвандаи маъмурӣ тартиб дода шуда, барои баррасӣ ба Суди ноҳияи Шоҳмансури ш.Душанбе ирсол гардид. Суд дар навбати худ барои кирдори майдаавбошӣ нисбати ҳуқуқвайронкунанда Абдураҳмонов Бадриддин Шарбатович ҷазо дар намуди ҷарима ба андозаи 7-нишондиҳанда барои ҳисобҳо баробар ба 385-сомонӣ таъин кард. Дар ин бора маркази матбуоти РВКД-и пойтахт хабар медиҳад.

   То охири соли ҷорӣ дар кӯчаи Н.Қаробоев ва хиёбони С.Шерозии пойтахт 25 адад истгоҳҳои наву замонавии мусофирбар бунёд карда мешаванд. Дар ин бора сомонаи расмии Мақомоти иҷроияи ҳокимияти маҳаллии ш.Душанбе хабар медиҳад.

   Бояд гуфт, ки айни замон дар пойтахт беш аз 76 адад истгоҳҳои замонавии нақлиёти ҷамъиятӣ мавриди истифода қарор гирифта, маблағи умумии сохтмони иншоот зиёда аз 9 миллион сомониро ташкил медиҳад.

   8.09.2019 дар Маҷмааи савдои «Меҳргон» бахшида ба 28-умин солгарди Истиқлолияти давлатии ҶТ Иди харбуза ва тарбуз баргузор мегардад. Иди мазкур бо ташаббуси Мақомоти иҷроияи ҳокимияти маҳаллии ш.Душанбе дар якҷоягӣ бо Вазорати кишоварзии ҶТ гузаронида шуда, қарор аст дар он тарбузу харбузапарварони тамоми мамлакат маҳсулоти беҳтарини худро ба пойтахт барои намоиш ва фурӯш биёранд.

   Бояд гуфт, ки дар баробари таҷлили Иди харбуза ва тарбуз дар ин рӯз ҷамъбасти Иди асал низ ба нақша гирифта шудааст, ки дар он навъҳои беҳтарини асали тоҷикӣ ба намоиш ва фурӯш пешниҳод мегарданд.

Камчинӣ ва гарон шудани арзиши тарбузро сокинони кишвар дар арафаи Иди саиди Қурбон хеле сахт эҳсос намуданд. Пеш аз ид нархи 1 дона тарбузи миёнҳаҷм аз 8-10 то 30 сомонӣ дакка хӯрд. 1 рӯз пеш аз ид бошад тарбуз ба китоби рекордҳои Гиннес ворид шудаву марзи 60-70 сомониро убур кард!!! Алорағми пешгӯии Изатулло Сатторӣ, вазири кишоварзии ҶТ, ки 1 моҳ пеш зимни нишасти матбуотӣ гуфта буд, ҳосили тарбуз дар кишвар имсол фаровону нархаш аз 10 сомонӣ боло намешавад ва пухта расидани ҳосили дуюми тарбуз нархи онро ба замин хоҳад зад, тарбуз ҳам камчин шуд ва ҳам гарон. 

Тарбуз дар полез «сӯхт»?

Фурӯшандаҳои ин меваи полезӣ ба суоли харидорон дар мавриди нархи осмонбӯси тарбуз мегуфтанд, бо сабаби гармии аз ҳад зиёд тарбуз дар сари заминҳо сӯхт. Иддае бошад, баръакс таъкид менамуданд, ки тарбуз бо теъдоди зиёд ба кишварҳои дигар, амсоли Афғонистон содирот шуда, деҳқонон онро аз сари замин бо нархи боло ба туҷҷори афғон яклухт фурӯхта истодаанд. Тавре хабарнигорони мардумии СССР аз ноҳияҳои Ҷайҳуну Ҷ.Балхиву Шаҳритус хабар медиҳанд, дар сари полез тарбуз қариб ки намондааст ва агар ҳам бошад танҳо дар майдончаҳои наздиҳавлигии сокинон. Тарбузи минтақаи Кӯлоб низ нав пухта расида, ҳамакнун ба бозорҳо баромада истодаасту тарбузи суғдӣ, хосса, Мастчоҳу Зафаробод аллакай тамом шудааст. Дар ҳақиқат, дар сари заминҳо тарбуз камчин аст, вале на сӯхтааст, на пӯсида-агар чунин мебуд мардум онро медиданду экологҳо бонги хатар мезаданд. Пас маълум мешавад, ки тарбуз «насӯхтааст», балки онро аз сари заминҳо яклухт нарх кардаву харида бурда истодаанд. Аммо ба куҷо?

Тарбуз ба Қирғизистону Литва рафт!

Бо ин суол мо ба маркази матбуоти Хадамоти гумруки назди Ҳукумати ҶТ муроҷиат намудем. Чуноне ки дар ин ниҳод хабар доданд, тибқи омори содироти маҳсулоти кишоварзии полезӣ аз 1.01 то 31.07.2019 аз ҳудуди ҷумҳурӣ ба хориҷи мамлакат 124 ҳазору 377 кг тарбузу харбуза бароварда шудааст. Аз ин рақам 39 тоннаву 235 кг ба давлати Литва, 11 тоннаву 142 кг ба Афғонистон, 54 тонна ба Қирғизистон ва 20 тонна ба Украина содирот шудааст. Бино ба иттилои хадамоти мазкур, аз ҳама зиёд тарбузу харбуза аз ш.Турсунзода ва вил.Хатлон ба хориҷ аз ҷумҳурӣ рафтааст. Тавре мебинем, содироти он ба Афғонистон мутаносибан кам буда, дӯстдорони тарбузу харбузаи тоҷикӣ асосан қирғизҳову литвониҳо ва украинҳо будаанд. Деҳқонони тоҷик дар ин маврид мегӯянд, новобаста аз хубу фаровон шудани ҳосил нархи сӯзишворӣ хеле гарон буда, онҳо имкони шахсан баровардани маҳсулоти полезиро ба бозор надоранд ва маҷбуранд ба миёнаравҳои дохиливу хориҷӣ тарбузро аз сари замин фурӯшанд. Дар баробари ҳосили фаровони полезиҳо деҳқонон аз нархи гарони тарбузу харбуза низ шоданд, ки метавонанд ҳосили хешро аз сари замин на бо нархи яклухт мисли қабл, балки бо нархи бозор фурӯшанд. Пажӯҳиши СССР маълум кард, ки тарбуз «ягон майда насӯхтааст»: тарбузро аз сари замин ва бо нархи гарон бурда истодаанд.

М.Аминова, СССР

Ҳама 1 тараф, Балҷувону Ховалинг 1 тараф!

16.08.2019. Сафари ман ба Ховалинг ғайричашмдошт сурат гирифт: 1 кори зарур пеш омаду бояд рафта дар ҷояш онро ҳаллу фасл карда меомадам.

Соат бо вақти Душанбе 7:30 дақиқа. Ба терминали мусофиркашонии Чимтеппа омадем-мошинҳои байнишаҳрӣ аз Душанбе ба самти Балҷувону Ховалинг маҳз аз ҳамин терминал мерафтаанд. Сабабашро аз Абдулнабӣ, ронандаи мошине, ки киро кардам, пурсидам. Ӯ гуфт, мизоҷони асосии ин масир маҳз дар атрофи бозори «Корвон»-у «Саховат» кору зиндагӣ намуда, рафтуомад аз ин терминал барояшон осонтар аст. Дар пайи ин барои ронандаҳо ҳам ин кор сабук буда, мизоҷони ҳамешагиро метавонанд тавассути зангҳои телефонӣ низ рафта, аз ҷои лозимӣ савор кунанду бубаранд. Терминали «Озод транс», ки ҳоло тамоми хатсайрҳои байнишаҳрӣ аз пойтахт ба шаҳру навоҳии минтақаи Кӯлоб тавассути он равуо доранд, барои мизоҷони Балҷувону Ховалинг дур будааст…

Нархи роҳкиро аз Душанбе то маркази ноҳияи Ховалинг 70 сомонӣ. Чун дидам Абдулнабӣ аз ин маблағ заррае ҳам кам накард, маҷбур розӣ шудам. «-1 нафар мизоҷи ҳамешагӣ дорам. Ӯро аз Автовокзал рафта мегирему меравем»- гуфт ронанда. То ба самти Автовокзали шаҳрӣ рафта, он мизоҷро байни биноҳо кофтаву пайдо карда гирифтем, соат 9-и расо шуд. Ба роҳ баромадем. 

То Ховалинг дар 2 соату 45 дақиқа!

Соат бо вақти Ховалинг 11:45 дақиқа. Абдулнабӣ ҳанӯз дар Душанбе гуфта буд, ки моро тавассути роҳи таҷдидшуда ва нави Кангурт-Балҷувон-Ховалинг дар 3 соат бурда мерасонад, аммо худ рекорд зад-дар 2 соату 45 дақиқа моро то маркази Ховалинг овард! Офарин! Инҷо бояд таъкид намуд, ки роҳи қаблан харобу валангори байни маркази н.Балҷувон ва Ховалинг ҳоло таҷдид ва азнавсозӣ карда шуда, масирро хеле наздик кардаасту ҳаракат аз болои он ба кас фараҳ мебахшад. Агар гӯям, ки ин роҳ ҳоло мисли оина аст, хато намекунам.

Бояд гуфт, ки маросими ботантанаи ба истифода супоридани ин роҳ субҳи рӯзи 6.08.2019 бо ширкати Президенти ҶТ Эмомалӣ Раҳмон сурат гирифта, пудратчии роҳи автомобилгарди Кангурт-Балҷувон-Ховалинг ширкати «Чайна роуд»-и Чин аст. Тибқи лоиҳа, дар масофаи 43 километри роҳ 6 пул бо дарозии 455 метр, 5 истгоҳ ва дигар инфрасохтори зарурӣ бунёд шуда, роҳ ба категорияи чоруми роҳсозӣ мутобиқ аст. 2 кӯпрук бо дарозии 339 метр аз нав сохта шуда, 4-тои дигар бо дарозии 114 метр таъмир шуданд. Корҳои сохтмонӣ дар роҳи автомобилгарди Кангурт-Балҷувон-Ховалинг моҳи июли соли 2018 оғоз гардида, пеш аз мӯҳлат бо сатҳу сифати баланд ба истифода дода шуд. Ин роҳ тӯҳфаи арзандаест ба сокинони ин 2 ноҳияи дурдаст дар арафаи 30-солагии Истиқлолияти давлатии ҶТ.

Ховалинг шаҳр шуд!

   Соат бо вақти Ховалинг 12:00 дақиқа. Ронанда Абдулнабӣ маро дар маркази ноҳия дар назди боғи нави фарҳангиву фароғатӣ фаровард. Ман, ки ҳанӯз 2 сол пеш ба ин ноҳия омада будам, ҳоло Ховалингро нашинохтам, гулгаштҳои нав дар шафати Гулгашти ҷавонон, рамзҳои давлатӣ-Парчам ва Нишони миллӣ, ки ба тозагӣ қомат афрохтаанд, маркази шаҳраки Ховалингро оро дода, шукуҳу шаҳомати хосса зоҳир менамуданд. Аз ҳама аҷиб барои ман он буд, ки то ба ин дам дар даромадгоҳи маркази ноҳия навиштаи «Деҳаи Ховалинг» насб шуда буд, имрӯз бошад дар даромадгоҳи ноҳия «Шаҳраки Ховалинг» навишта шудааст: Ховалинг воқеан ҳам акнун шаҳрак шуд! Муборак бошад!

Аз таҷдиди беморхона то бунёди Амфитеатр

   Соат бо вақти Ховалинг 15:00 дақиқа. Бо дӯстонам шаҳракро чарх задем. Агар қаблан танҳо 1 бинои баландошёна дар маркази ноҳия вуҷуд дошт, ҳоло шумораи онҳо афзуда, боз ҳам сохтмони чанд бинои дигари баландошёна идома дорад. Бинои беморхонаи марказӣ низ таҷдиду таъмир шуда, ҳоло бо имконоти наву замонавӣ дар хизмати мардум аст. Кӯчаҳои шаҳрак низ таъмиру асфалтпӯш гашта, дар паҳлӯи варзишгоҳи марказӣ Амфитеатр ва толори муосири варзишӣ бунёд шудааст. Майдончаҳои нави варзишӣ, сохтмони мактабҳои миёна ва биноҳои нав, меҳмонхонаҳои муосир аз қабили «Чилчанор» (бунёдкораш соҳибкор Қаландар Одинаев) ва даҳҳо иншооти дигар низ айни замон дар хизмати мардуми Ховалинганд. Зимни сафари сарвари давлат ба ин ноҳия танҳо дар 1 рӯз 14 иншооти нави ҳаётан муҳим расман ифтитоҳ ва ба истифода дода шуд, ки рақами рекордист! Браво, Ховалинг ва ховалингиҳо!

Ҷамила Ҳусейнова, СССР

Душанбе-Ховалинг-Душанбе, 

16.08.2019