27.12.2019 муовини Раиси Маҷлиси намояндагони Маҷлиси Олии Ҷумҳурии Тоҷикистон Хайриниссо Юсуфӣ ба Раёсати Бонки давлатии амонатгузории Ҷумҳурии Тоҷикистон «Амонатбонк» Дипломи дараҷаи 1 ва “Ифтихорнома”-и Маҷлиси намояндагонро аз номи Раиси ин мақоми олии қонунбарор Шукурҷон Зуҳуров тақдим намуд.

Зимни баромади хеш дар назди ҳозирин Хайриниссо Юсуфӣ иброз намуд, ки мутобиқи нақшаи корӣ Кумитаи миллӣ оид ба аҳолӣ ва рушд дар назди Маҷлиси намояндагони Маҷлиси Олии Ҷумҳурии Тоҷикистон дар оғози соли равон тасмим гирифт, ки ҷиҳати иҷрои Фармони Президенти Ҷумҳурии Тоҷикистон «Дар бораи тадбирҳои баланд бардоштани мақоми зан дар ҷомеа» (аз 3 декабри соли 1999, №5) ва дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати ҷалби бештари бонувон дар кулли бахшҳои ҳаёти ҷомеа, ҳамчунин ба муносибати 20—солагии Фармони мазкур нахустозмуни байнисоҳавиро эълон намояд.

Озмуни мазкур бо манзури рӯнамо намудани хидматҳои арҷманду бебадали Садри Олии кишвар, ки сабки модарнавозиву бонупарвариро ба ҳамагон илқо менамоянд, анҷом пазируфта, тамоми сохторҳои давлатӣ ва бахшҳои хидматрасониро фаро гирифт.

 Дар ин давра дар асоси талаботи озмун ҷадвали исму насаби бонувон, ки дар мақомоти гуногуни давлатӣ (вазорату идораҳо, мақомоти иҷроия, суд, бонкҳо) фаъолияти пурсамар доранд, дастрас гардида, мақомоте, ки дар он теъдоди бонувон аз шумори хизматчиёни давлатӣ ва фаъол зиёданд бо Диплом ва армуғонҳои самбулӣ қадрдонӣ шуданд.

Бонки давлатии амонатгузории Ҷумҳурии Тоҷикистон «Амонатбонк», ки дар он 1150 нафар бонувон кору фаъолияти пурсамар доранд, бо ишғоли ҷойи аввал сазори Дипломи дараҷаи 1-и ин озмун гардид.

Натиҷаҳои фаъолияти БДА ҶТ “Амонатбонк” дар соли 2019 ва вазифагузориҳо барои соли 2020

Ҷаласаи солона дар бинои асосии Раёсати БДА ЧТ “Амонатбонк” баргузор гардид. 

Дар ҷаласа Раиси Раёсат Икромӣ С.С. ва намояндагони Вазорати молия, Бонки миллии Точикистон ва мудирону муҳосибони тамоми филиалхои бонк иштирок намуданд.

Дар оғози ҷаласа Раиси Раёсат Сироҷиддин Икромӣ аз дастовардои соли 2019 ёдовар шуда, таъкид намуданд, ки соли сипаригардида дар таърихи «Амонатбонк» ҳамчун соли дастовардҳои арзишманд сабт шуд. Аз ҷумла ба истифода додани бинои наву замонавии дастгоҳи марказии Бонк, вохӯрӣ ва суҳбати самимии Пешвои муаззами миллат бо кормандони «Амонатбонк», ки дар таърихи фаъолияти тӯлонии Бонк бори аввал аст, ин хотироти фаромушнашаванда барои ҳар як корманди Бонк мебошад.

Инчунин, дар ин сол «Амонатбонк» дар асоси Карори ҳайати Мушовараи Кумитаи андози назди Ҳукумати Ҷумҳурии Тоҷикистон яке аз андозсупорандаи беҳтарин дониста шуд.

Аз ҳисоби ҷалби бештари бонувон ба кор бошад, аз рӯи натиҷаи ҷамъбасти озмуни байнисоҳавӣ бо Дипломи дараҷаи 1 ва “Ифтихорнома”-и Маҷлиси намояндагон сарфароз гардид.

Инчунин, дар ин сол Бонк дар озмуни ҷумҳуриявии «Қуллаи шараф» бо назардошти хизматрасониҳои муосири бонкӣ, сазовори ҷоизаи тиллоии «Бренди сол -2019» дар бахши бонкдорӣ гардид.

Ба санаи 31 декабри соли 2019 дороиҳои Бонк маблағи 4,2 млрд. сомонӣ ва уҳдадориҳои Бонк 3,7 млрд. сомониро ташкил додааст. Сармояи Бонк бошад, 8,1% афзоиш ёфта, ба 428,8 млн. сомонӣ баробар шудааст.

Даромади софи Бонк дар ин давра 42 млн. сомониро ташкил намуд, ки нисбат ба соли 2018  16,2% зиёд мебошад.

Бояд қайд намуд, ки «Амонатбонк» бо мақсади саҳмгузорӣ дар ғанӣ гардидани Буҷети давлатӣ дар соли ҳисоботӣ аз рӯи фаъолияти худ ба андозаи 80,6 млн. сомонӣ андозу пардохтҳои ҳатмиро ба буҷети давлат пардохт намудааст, ки нисбат ба соли 2018   28,6 млн. сомонӣ ва ё 55% зиёд мебошад.                           

    Дар соли 2019 Бонк аз ҳисоби захираҳои дохилию хориҷӣ ба наздики 40 ҳазор муштарӣ 675,3 млн. сомонӣ маблағҳои қарзӣ пешниҳод намудааст, ки ин нишондиҳанда нисбат ба соли гузашта 73% зиёд мебошад.         

Бақияи пасандозҳои шахсони ҳуқуқию воқеӣ дар «Амонатбонк» ба санаи 31 декабри соли 2019 маблағи 3,4 млрд. сомониро ташкил дод ва Бонк аз рӯи ин нишондиҳанда дар низоми бонкии кишвар яке аз ҷойҳои намоёнро ишғол намуд.

Дар соли ҳисоботӣ дар иртибот ба самтҳои афзалиятноки муайяннамудаи Бонк барои соли 2019, баҳри дастрасии ҳамаҷонибаи мизоҷону сайёҳон ба хизматрасониҳои бонкӣ, 150 адад ё 27%-и марказҳои хизматрасонии бонкӣ ба шафати роҳҳои байналмилалӣ, дохили маркази савдову бозорҳо ва чорроҳаҳо кӯчонида шуданд, ки ин ба самаранокии фаъолият ва барои фароҳам овардани шароити мусоид барои мизоҷон асос гузошт.

Дар баробари ин, фаъолияти 12 адад хазинаҳои шабонарӯзии дар шаҳрҳои Душанбе, Ҳисор, Исфара, Хуҷанд, Бохтар, Кӯлоб ва Хоруғ, ки 24 соат ба аҳолӣ ва сайёҳон хизматрасониҳои гуногуни бонкиро пешниҳод намуда истодаанд, пурзӯр карда шуд.    

Инчунин, ба хотири беҳтарнамоии шароити кору хизматрасонӣ 11 бинои кории замонавӣ бо ҷалби соҳибкорони маҳалӣ ва дастгирии Раёсати Бонк бунёд гардида, 200 бинои марказҳои хизматрасонии бонкӣ аз таъмири ҷорӣ бароварда шуд.

Бояд қайд намуд, ки дар соли 2019  284 нафар корманд дар «Амонатбонк» ба кор қабул карда шуд, ки зиёда аз 60%-и онҳоро бонувон ташкил медиҳанд.

Ба ҳолати имрӯза дар «Амонатбонк» 1166 нафар занон фаъолият доранд, ки 42%-и шумораи умумии кормандони соҳибтахассусро ташкил медиҳанд. Ҷаласаи мазкур аз ду қисмат иборат буд ва дар қисмати дуюм мутахассисони «Амонатбонк» ҳар як бахшро дар алоҳидагӣ тавассути слайд мавриди таҳлилу баррасӣ қарор доданд.

Шуъбаи матбуоти БДА ҶТ «Амонатбонк»

Шодибек  Халилов, Аълочии маориф, устоди фанҳои забон ва адабиёти тоҷик аз н. Муминобод ба меҳмонии идораи СССР омада гуфт, ки дар н. Муъмининобод, вақте ки корхонаи истеҳсоли орд дар ш. Кӯлоб буд, мардум барои дастрас карданаш мушкилие надоштанд. Аммо, ҳангоми корхонаро аз Кӯлоб, бо сабабҳои техникӣ, ба вилояти Суғд кӯчониданд, мушкилӣ барои мардум пеш омад. Аввал нархи орд чанд баробар зиёд шуд ва баъдан дастрас кардани орд низ мушкил гардид. Зеро аз вилояти Суғд ордро бо мошинҳои боркаш, дар ҳаҷми на он қадар бисёр ворид менамоянд ва ҳангоми бо мошинҳо овардани орд маълум, ки нархаш гарон мешавад-маблағи сӯзишворӣ низ арзон нест. Модоме, ки роҳи оҳан ҳаст (онро боз кушоданд!) намешавад, ки гандумро бо меъёри зиёдтар ба воситаи поезд, ба водии Кӯлоби вилояти Хатлон ворид намоянду дар Осиёби бузургтарини кишвар-Заказзернои шаҳрӣ коркард ва ба фурӯш гузоранд? Мешавад! Танҳо масъулият лозим. Мо Метавонем!  

(Ё ҚИССАИ МАҚОЛАНАВИСИҲОИ ОМӮЗГОРОНИ БОИСТЕЪДОД)

Бас будагист охир! Ин ҳама сохтакориҳо ба кӣ лозим? Ё биёед роҳи ҳалли масалаи ба миён омадаро ёбем ё....

Ҳамин шабу рӯз, хазинаи компютерӣ дар дафтари кории нашрияҳои даврӣ, редаксияи рӯзнома, маҷалла ва ҳафтаворҳо ғарам-ғарами мақолаҳои омӯзгорони тоҷик интизори навбати чопанд. 

Барои аз “атестатсия” гузаштан ва “котегория” –и навбтӣ гирифтан, кулли омӯзгорони Тоҷикистонро зарур ва ҳатмист, то на кам аз 2 мақолаи худро дар маҷалла, рӯзнома, ҳафтаворҳои ҷумҳуриявӣ нашр намоянд. 

Ана “проблема!”

Бо сабабҳои ба мову Шумо маълум, нашрияҳо имкони дар бар гирифтани чунин “аудуторияи” калонро надоранд. Гоҳо мавзу ҷавобгӯ ба талаботи замон нест ё мақолаҳо дар сатҳи паст навишта шуда, таҳлили дарси кушодаеро дар бар мегиранд, ки дилгиркунанда ва баъзан вақт хандаовар аст.

Омӯзгорон, (албатта бархеашон) роҳи ҳалли ин масоилро низ ёфта, акнун “ҳамкории” зич бо рӯзноманигорон доранд. Бовар кунед, ҳам хандаовар аст ва ҳам гиряи кас меояд. Охир бар ивази маблағи муайян: шуру карда аз 100 то 200 сомонӣ рӯзноманигорон ба ҷои муаллимон мақола менависанд.

Барои нашр гаштани мақола, аввал он бояд ҷолиб бошад ва воқеан мавзуи рӯз буда, ҳаллу фасли монеагӣ ё пешниҳоди беҳтаринро дар бар бигирад. Дар акси ҳол ягон сармуҳаррир иҷозат ба чопи маводи хому бемантиқро намедиҳад. Ҳамин тариқ рӯзноманигори нафақахӯреро мешиносам, ки  аз номи даҳҳо омӯзгорон мақола навишта, барои пешбурди зиндагиву рӯзғори хеш шабонарӯзӣ заҳмат мекашад. Мӯйсафеди бечора сари вақт мақолаҳоро навишта, кайҳо ба редаксияҳои рӯзномаву ҳафтаворҳо супоридааст, вале аз боиси бениҳоят зиёд будани чунин маводи чопӣ, бархеашон ҳанӯз нашр нагаштаанд.

Ҳамин тариқ, Рӯзноманигор (барои озурда нагардидани хотир ва иззати нафсаш инҷо ному насабашро намегирам) дар балои азим гирифтор гашта, маҷбур аст телефони мобилии худро хомӯш карда гардад ё ҳатто симкорташро иваз кунад. Ӯ бо таассуф мегӯяд:

-Ин чӣ балое буд, ки бар сарам омад!? Бори нахуст ба чунин ҳолат гирифторам. Як муаллима рӯзе сад бор занг зада аз ман мепурсад, ки кай мақолаи ӯ чоп мешавад!? Муаллимаи дигар таҳдид мекунад, ки агар худи ҳамин ҳафта мақолаи ваъдагӣ нашр нашавад ва ман нусхаи рӯзнома, ҳафтавор ё маҷалларо дастраси ӯ нанамоям, ҳолам табоҳ хоҳад гашт. Субҳи солеҳон то нимаи шаб 7 омӯзгор маро чунон терор доранд, ки ба ҷои онҳо шарм медорам. Хоҳ бовар кунед, хоҳ не, лекин ин ҳақиқати ҳол аст.

Ин муаллимаҳо намеандешанд, ки бо журналист сару кор доранд ва агар сиррашон фош гардад, шармандагист. Ман ку як поям ба лаби гӯр расидаву парвои чизе надорам, охир имрӯз ё пагоҳ падруди олам хоҳам гуфт, вале онҳо ҳоло ҷавонанд ва бояд андеша аз ояндаи хеш дошта бошанд.

Гап дар сари ҳамин аст: чаро омӯзгор шуда, устодони макотиби таҳсилоти ҳамагонӣ ё умумӣ намедонанд, ки ҳама кор раванди худро дорад. Газетаҳо дар 1 ҳафта 1 бор ва моҳномаҳо моҳе 1 маротиба нашр мегардаднд. Инро ҳатто талабаи мактабхон ҳам медонад ва ҳазорон ҳазор мақолаҳои омӯзгорон дар навбат истодаанду ба сармуҳаррирон одамоне занг мезананд, ки радъ кардани хоҳишашон маҳол аст. 

Яке ҷуръат намуда супориш ҳам медиҳад, бовар кунед. Атрофи ҳамин масоил дар қабулгоҳи сармуҳаррире сӯҳбати кӯтоҳ доштем. Ӯ бо асабоният чунин нақл кард, ки :

“-Аз номи ҳамсари ман 1 ё 2 мақола навишта дар газетаатон чоп кунед. Ному насаб ва № мактабашро навишта гиред. Ҳа, гуфтагӣ борин, мабодо ягон мақолаи пучу фач не, зӯраша нависед. Талаботи Вазорати илм ва морифи халқи Ҷумҳурии Тоҷикистон ҳамин будааст, гуфтани мансабдоре ва баъд аз муддате боз занг зада, бе салому бе алайк, чунин эътироз доштани ӯ ки:

-Ҳа, ако! Ҳамон мақолаҳоро чоп кардед, аммо чаро дастрас нанамудед? Аз ҳар шумора се чор нусхаи ба мо мефиристодед, чӣ мешуд...!?

На сипос, на ягон одамгарӣ ва бар замми заҳмати рӯзноманигорон боз таънаву маломат низ мешунавем. Мо якеро ака гуфта ҳурмату эҳтиром мекунем, дигарӣ хеш ё шиноси наздик аст, сеюмин метавонад истодгар “тормуз” –и пешравии кор гардад, ва минбаъд монеъагиҳо созад, гӯён маҷбурем бетараф ва лолу ҳайрони кор монем.

Барои пайгирии ин мавзу дар охири соли 2019 -ум 5 мақолаи дархостӣ аз номи 5 омӯзгори мактаби №... қабул кардем. Ҳар кадом 100 сомонӣ ба рӯзноманигор дода, таҳкид карданд, ки мақолаҳояшон бояд ҳарчӣ зудтар нашр гардад, зеро атестатсия ва категориягирӣ дар пеш аст.

Муаллимонро касе маҷбур накардааст, баракс онҳо худашон рӯзноманигорро пайдо карда, зориву тавалло намудаанд, тоинки бар ивази 100 сомонӣ аз номашон мақолаҳои илмӣ нависад. (Дар сурати баррасии Судӣ, тафтишоти ҷиддӣ ё даъвои ноҳақ мо  метавонем ному насаб, рақами макотиб ва номи мақолаҳо, исми муаллифи асосӣ, яъне Рӯзноманигорро бо далелҳои баҳснопазир) пешкаши аҳли ҷамоат ва пурсандагон намоем. 

Хулоса: атрофи ҳамин мавзу як олам гап!

Пешниҳод барои бартараф сохтани ин камбудӣ: хуб мебуд рӯзномаи нав бо унвони “Муаллимон” ё замимае ба “Омӯзгор” иловатан нашр гардад. Бигузор аз 12 ё 18 варақ не, балки 28 варақ иборат бошад ва ба омӯзгороне, ки дар воқеъ ҳунару салиқаи бо ҳам пайваст кардани ду ҷумларо надоранд, имкон дода шавад, ки бар ивази маблағи муайян, рӯзноманигорон аз номи онҳо мақолаҳо нависанд.  Бовари комил дорам, ки яке аз бойтарин нашрия тавлид хоҳад гашт. Бе ҳазл, охир як ҳисоб карда бароед, ки дар қаламрави ҷумҳуриямон чанд омӯзгор фаъолият доранд ва онро ба 2 маротиба ҷамъ кунед. Дар ин нашрия ҳар омӯзгор дар дафтари қайди навбат ҷойи муайяни худро ишғол карда, бепарво мегардад ва рӯзи нашри газета, рафта 100 донаҳакашро бар ивази маблағи муайян харидорӣ хоҳад кард “тибқи талабот” –и прескурант ва принсипи кории редаксия.

Бе хафагӣ ва бо ҷиддияти том!

Шояд он гоҳ рӯзноманигорон бо таассуф ва дилгирӣ аз номи омӯзгорон мақола нанавишта, сафҳаҳои нашрияҳои мо ранги дигар мегиранд. Агар хондани ин мақолаҳо ба ягон кас зарур бошад, минбаъд аз нашрияи махсуси алоҳида матни пурраи онҳоро пайдо хоҳанд кард. 

Рӯзноманигорони – омӯзгор пирони барнодил ва нафақахӯрони боистэъдод дар ҷумҳурӣ кам нестанд ва редаксияи рӯзнома ё ҳафтавор бе коргар нахоҳад монд. Ҷавонони чаққоне ҳам ҳаст, ки барояшон фарқ надорад, ки дар кадом мавзу менависанд, мӯҳимаш моҳона гиранд. Ана марҳамат: ҷойҳои кории нав ва бар замми ин 1 проблема кам...

Гули Зард – Зардова Гули Давлаталиевна

Махсус барои ҳафтавори “СССР”

Самти афзалиятнок

22 январи соли 1969 хизматчии оддии Артиши Шӯравӣ Виктор Илин ба ҷони котиби аввали КМ ҲКИШ Леонид Илич Брежнев сӯиқасд кард. Он шабу рӯз аввалин кишвари Шӯроҳо кайҳонавардони худро бо тантана истиқбол мекард.            Кайҳон ҳамеша яке аз самтҳои афзалиятноки давлатӣ буда аз абарқудратии СССР дарак медод. Ҳайати киштиҳои кайҳонии Союз-4 ва Союз-5 нав аз фазо ба замин фуруд омада, мардуми зиёде дар Маскав ба истиқболи онҳо баромада буд. Он шабу рӯз кайҳонавардони шӯравӣ боз ғалабаи навбатӣ ба даст оварда, ду киштӣ дар фазои озод ба ҳам васл гаштанд. Дар ҳамон лаҳазоте, ки кайҳонавардони қаҳрамонро дар майдони ҳавоии ҳукуматии "Внуково-2" пешвоз мегирифтанд, ҷавоне либоси милиса бар тан, бе ҳеҷ мамониати ба Кремл наздик мешавад ва дар сафи милисаҳои пояндаи роҳ қарор мегирад.                                                                                                                   

Аввалин террори советӣ 

Авохири солҳои 60 уми қарни ХХ-умро мешавад мавҷи амалҳои террористӣ дар дунё номид. Дар ҷаҳон ташкилотҳои террористии зиёд монанди ЭТА дар Испония, "Бригадаҳои сурх" дар Итолия, "Артиши ҷумҳурихоҳи Ирландия" дар Бритония, фаластиниҳо дар Ховари Миёна фаъолият мекарданд. Аммо дар СССР тинҷӣ ва оромӣ ҳукмфармо буда, шаҳрвандони шӯравӣ ҳамаи ин даҳшатро танҳо аз оинаи нилгун медиданд. Вале ҳамин дидан низ таъсири манфии худро гузошт. Ба андешаи таърихнигори хадамоти махсус Олег Хлобустов, ҷавони оддии шӯравӣ Виктор Илин маҳз таҳти таъсири воқеаҳои Ғарб қарор гирифта, даст ба ин иқдом зад.   

Дар Иттиҳоди Шӯравӣ ҳанӯз соли 1946 аз ҷониби худи Сталин Шӯъбаи мубориза бо терроризм ё шӯъбаи "Т" таъсис додашуда буд. Баъди анҷоми ҶБВ дар Украинаи Ғарбӣ ва Ҷамоҳири назди Балтик, дастаҳои мусаллаҳи "Бародарони ҷангалӣ" пайдо шуданд. Барои мубориза бо онҳо Муллои гурҷӣ ба генерал Абакумов дастур дод, ки дар чаҳорчӯби КБД шӯъбаи "Т" ро таъсис диҳад.   

 16.01.1918. Дар Анҷумани III- уми Шӯроҳо, казаки донӣ Шамов шиори ""-ро қироат кард. Ин шиор баъдан ба 1 дастуруламале табдил ёфт, ки тибқи он мардуми инқилобӣ амволу дороиҳои бойҳоро ғорат мекарданд. 

16.01.1919. Дар Украина ҳокимияти Директория сари қудрат омад. Аввалин иқдоми ҳукумати нав эълони ҷанг бо Русияи шӯравӣ гардид.

16.01.1963. Роҳбари СССР Никита Хрушев эълон кард, ки кишвараш дорои бомби ҳидрогении 100-мегатонна мебошад.

16.01.1969. Ду киштии кайҳонии СССР, "Союз- 4" ва "Союз- 5" барои бори аввал дар ҷаҳон, дар фазои кайҳонӣ бо ҳам пайвастанд ва кайҳонавардон дар фазои кайҳонӣ аз як киштӣ ба киштии дигар гузаштанд.  

17.01.1921. Дар Русияи шӯравӣ Декрети ШКХ "Бобати ҳаракат дар фазои ҳавоии РСФСР ва обҳои мутаалиқ ба он" ба тасвиб расид. Ин Декрет аввалин санади қонунгузорӣ дар соҳаи ҳуқуқи ҳаракат дар фазои ҳавоӣ ба шумор меравад.

17.01.1960. Се хизматчии ҳарбии Артиши Шӯравӣ, аскарон Зиганшин, Крючковский, Поплавский ва Федотов зери туфон монданд ва бод онҳоро ба Уқёнуси Ором бурд. Аскарон болои баржаи идоранашаванда қарор доштанд. Аскарони шӯравӣ бе ҳеҷ захираи об ва озуқа 49 рӯз болои Уқёнуси Ором шино карданд. Билохира аскарбачаҳҳо тавассути нерӯҳои дифои соҳилии ИМА наҷот дода шуданд. Дар бораи ин шиноварии таърихӣ ҳатто филми тасвири ҳам бо номи "49 рӯз" ба навор гирифта шудааст.

17.01.2000. Ҳукумати Толибон дар Афғонистон соҳибистиқлолии Ичкерия (Чеченистон)-ро ба расмия шинохт. Вазорати корҳои хориҷии Русия бошад ин амалкардро дахолат ба корҳои дохилии Русия унвон кард.

18. 01.1943. Нерӯҳои Артиши Сурх муҳосираи Ленинградро рахна карданд. Ленинград аз соли 1941 дар муҳосираи нерӯҳои Артиши олмонӣ, дивизияи кабуди испониёӣ ва нерӯҳои финнӣ қарор дошт ва мардумаш аз гуруснагӣ азияти зиёд кашиданд.

18.01.1961. КМ ҲКИШ лоиҳаи Никита Хрушев бобати азнавсозии хоҷагии қишлоқи СССР-ро ба тасвиб расонид. Дар Иттиҳоди Шӯравӣ давраи "ҷуворимакка" оғоз гардида, худи Хрушевро ҳам бо лақаби "кукурузник" маъруф шуд.

19.01.1992. Дар Ҷумҳурии Осетияи Ҷанубӣ раъйпурсии мардумӣ доир гардид ва 99% и мардум барои хориҷ шудан аз қаламравӣ Гурҷистон овоз доданд.