Пас аз 70 соли шӯравӣ, 100 соли асри пору садаи равон, ҳазорон соли мавҷудият, бо ибтикори Ҳукмати Марказӣ, водии Бартанг соҳиби барқ шуд…

Ҳанӯз мактабхон будам, ёд дорам ҳар боре, ки аз дарс хона бармегаштам, зуд ба иҷрои супориши муаллимон ( вазифаи хонагӣ) мепардохтам, то ки шаб нашуда, ҳамаи онро иҷро кунам. Аммо рӯзҳои кӯтоҳи зимистон ба ман даст намедоданд, то ин тасмимамро дар вақташ ба ҷо орам, бинобар ин маҷбур будам, шабона низ машғул бошам. Дуди ғализи чароғи керасинӣ гоҳе соляркагӣ ба димоғам мезад, ҳавосамро парешон мекард, аммо ман аз азмам намегаштам, дурусташ, нигоҳи ҷидди падарам, ки аз як гӯшаи хона, ба тарафам дӯхта шуда буданд, намегузошт хонданро як тараф гузорам ва рафта хоб кунам. Дар чунин лаҳзаҳо гоҳ- гоҳ ба тарафи дуди сиёҳу борике, ки аз шишаи чароғи берун мебаромад, нигоҳ карда ба фикр фурӯ мерафтам:

"... Пас аз хатми мактаб, дар донишгоҳе таҳсил хоҳам кард, ки дар он ҷо сохтани нерӯгоҳҳои барқӣ тадрис шавад. Муҳандис шуда, бармегардам ва барои мардуми деҳаҳои болооби водии Бартанг НОБ-и хурде хоҳам сохт". Ин орзӯи кӯдакиам буд ва танҳо дар лаҳзае ба сарам меомаданд, ки маҷбур будам, дуди ғализи чароғро тоқат карда, шабона китоб хонам ё машғулиятҳоямро ба итмом расонам..

Лаҳзаҳо ба ҳамин минвол гузаштанд, мактабро хатм кардам, аммо натавонистам муҳандис шавам. Аниқтараш он танҳо дар хаёлҳоям боқӣ монд, чун шавқам бештар ба равияи фаннҳои гуманитарӣ моил гардид ва дарк кардам, ки ҳамаи ин фикрҳо фақат аз алам майнаи сарамро банд мекардаанд.

Вале вазъи мардумам, ки аз бебарқӣ азоб мекашиданд, ҳамеша дар назарам ҷилвагар мешуд. Ин эҳсосҳо пас аз хатми донишгоҳ низ бо ман буданд ва ҳеҷ гоҳ таркам намекарданд. Гарчанде ки натавонистам муҳандис шаваму НБО кӯчаке бисозам, аммо тасмим гирифтам, ба ягон воситае, ин мушкилоташонро ақаллан ба гӯши масъулин бирасонам. 

Нахустин матлаби фарогирандаи мушкилоти мардум, ки ҳамзамон аввалин маводи журналистиам буд, таҳти унвони "Рошорвиҷбӯхч ё азоби сахти беҳезумӣ" дар нашрияи расмии кишвар " Ҷумҳурият" аз чоп баромад. Баъдан дар саҳифаҳои " Минбари Халқ" низ аз ин ва чанд мушкилоти ҷойдоштаи дигар гуфта шуданд. Мутаассифона, баъзе аз руасо ба ҷои ислоҳи камбудӣ, моро ба иғвоангезӣ ва носипосӣ низ мутаҳам карданд...

Ҳоло бошад, хаёлам дар зодгоҳам гирду атрофи "Хадфад" парвоз дорад. Оре , ҳамон фикрҳо ва аламҳое, ки дар даврони мактабхониам маро водор мекарданд, худамро мисли қаҳрамон китоби Мигел де Сервантес Дон Кихот дар образҳои гуногун, аз ҷумла "муҳандис" тасаввур кунам. 

Баъзан хоҳишҳо тадбиқшавандаанд, новобаста аз он ки аз тарафи кӣ ва чи гуна амалӣ мешаванд, танҳо бе ибо қадам гузоштан ва барои иҷор шудани онҳо заррае ҳам бошад, иқдом кардан лозим меояд.

Муддатест, ки бо дастгирӣ ва ташаббуси "Памир Энерҷи" сохтимони НБО бо иқтидори 450кв/ соат дар рӯдхонаи "Хадфад" ба роҳ монда шуда буд, чанд рӯз пеш мавриди истифода қарор гирифт. Шунидани ин навид боиси хушҳолӣ ва таҳсин аст. Умедворам ин нерӯгоҳ солҳои тӯлонӣ кор кунаду мушкилоти бебарқии сокинон низ осон гардад. Зеро ҳоло замоне аст, ки бе барқ тасаввур кардани зиндагии аҳолӣ хеле мушкил мебошад.

СИПОСГУЗОРИИ АМИҚИ ХЕШ ВА ҲАМЧУНИН СОКИНОНИ ДЕҲАИ РОШОРВ ВА ДИГАР ДЕҲАҲОИ АТРОФРО БА ДАСТАНДАРКОРОН МЕРАСОНАМ. АЗ ҲАМАИ ОНҲОЕ, КИ ДАР БУНЁДИ НЕРӮГОҲ САҲМ ГУЗОШТАНД, МИННАТПАЗИРЕМ. ДАСТАТОН ДАРДРО НАБИНАД. ХУДО КУНАД ҲАМАИ ОРЗӮҲОИ ЯКОЯКИ ШУМО АМАЛӢ ГАРДАД. МО МЕТАВОНЕМ!!!

Гулҳаё Мадимарова

журналист

Посбонони бозори маъруфи Деҳқон мизоҷонро пеш аз дохил шудан ба бозор нағз назорат намекарданд. Чаро бе санҷиши ҳарорати бадан харидоронро ба бозор роҳ медиҳанд? Инҳо хавф аз бемории коронавирус надорнд ё фикр мекунандд ин мараз ба зудӣ аз байн рафтаасту хатараш гузаштааст? 

Масъулин бояд донанд, ки саломати одамон картошкаву пучоқи пиёз нест, ки хариду фурӯш шавад! Беморӣ дар хунукӣ авҷ мегирад, пас хоҳиш худро ку не ҳади ақал ба фарзандони худ раҳм кунед. Рузи дароз такрор ба такрор тариқи телевизион мутахассисон тавсия медиҳанд, ки аз ҷойҳои серодам худро канора гиред, вале ин гапҳо ба бозори Гипрозем-Деҳқон дахл надорад? О, ақаллан 2 шиша «антисептик дар даромадгоҳ монед. Гарон нест-ку?!

Бозор ё вирусгоҳ???

Бо модарам ба бозори Гипрозем барои хариди помидор ва меваҷот рафтем. Ҳама ҷо ифлос, савдогарон бе ниқоб ба мардум хизмат мекарданд, нархи ҳама намуди маҳсулоти хӯрока ва меваҷот дар осмон, савдогарон гигиенаи санитариро иҷро намекарданд, бархе аз харидорон ҳамдигарро рӯ ба рӯ китф ба китф зада, ба харид банд мешуданд. Ҳеч кас дар фикри саломати худ набуда, ба тозагӣ бошад умуман аҳамият намедиҳанд. Бовар кунед, ҳамин бозорҳо бошанд, барои миллати мо бомбаи атомӣ лозим нест. Худамон худамонро сироят карда, мекушем!

Болои ҳама намуди маҳсулоти хӯрока кушода, аз ҷумла чакка, нон, салату гӯшт. КВД бозори Деҳқони шаҳри Душанбе ба талаботи имрӯза ҷавобгу нест. То ба охир бозори деҳқонбозоро бо модарам якҷо чарх зада, аз ҳоли бозор бохабар шудем, ҳатто савдогарони бозор либосҳои яклухти корӣ надоштанд, ягон кас ниқоб ҳам надораду дастпӯшак низ. Вале он чанд нафаре, ки гӯиё дастпӯш доранд, намедоштанд, беҳтар. Зеро чирку микробу ифлосӣ аз он дастпӯшакҳо мерехт!!!

Ногуфта намонад пеш аз дохил шуданамон моро ягон кас на ҳарорати баданамонро санҷиду на ниқоб пурсид. Вой бар ҳоли мо! Дили мо ба фарзандони хурди шумо месӯзад ҳамватанони азиз, худрову тифлаконатонро эҳтиёт намоед. Боқӣ худ медонед. 1000-ҳо маротиба оиди риояи санитарию гигиенаи бозорҳо гуфта будем, лек бе натиҷа. Зеро ба назар мерасад, ки бозорҳои Душанбе шаҳри бедарвоза шудаанд. Мо Метавонем

       Омирона Достиева, СССР

Шукрона Абудулоева донишҷӯ ва сокини ш.Душанбе меҳмони имрӯзаи редаксия шуда гуфт, ки аз субҳи содиқ мардуми мо ба тамошои сериалҳои туркӣ оғоз менамоянд ва дили маро ҳамин филмҳои туркӣ задааст. Кай мардуми содаи мо боақл мешуда бошанд? Яке аз филмҳои машҳури туркие, ки мардумро ба тамошо ҷалб кардааст “Илдиз- Чуқур” аст. Бовар накунед ба кӯча бароеду аз тифли 3 сола пурсон шавед, ки имрӯз кадом кинои туркӣ тариқи барномаи бо ном машҳур “Ҷем ТВ”, “Рубикс”, “Авғонистон” сар мешавад, дарҳол ҷавоб медиҳанд. Аммо аз Рӯдакию Ҷомӣ ғазал пурсед намедонанд ҳатто аксарияташон намешиносанд.  Дар вақти тамошои филмҳои туркӣ дар Тоҷикистон заминларза шавад ҳам, мухлисон ва ё фанатҳои турк хабардор намешаванд. Кай мо аз кино-филмҳои туркӣ халос мешавем???

Аз 4 ум то 11 октябри соли 1945 дар шаҳри Ялтаи Қрим, конфронси сарони кишварҳои итифоқчӣ СССР, ИМА ва Анлия баргузор гардид. Сталин, Рузвелт ва Черчил бори дигар гирди як миз ҷамъ шуданд, то қисмати ҷаҳони баъди ҷангиро мавриди муҳокима қарор диҳанд.

Заминаҳои дидор

Дар оғози соли 1945 Ҷангии ҷаҳонии дуввум вориди марҳилаи ниҳоии худ гардид.  Олмон қариб аз тамоми иттифоқчиёни худ маҳрум шуда буд ва дар Аврупои Ғарбӣ фронти дуввум амал мекард. Артиши шӯрави ҳам ба наздикиҳои Берлин расида буд. Бо ин вазъ, тақсими доираи нуфуз дар Аврупо барои кишварҳои иттифоқчӣ аҳамияти вежа пайдо кард. Дар ҳамин росто, се роҳбари ҷаҳонӣ Иосиф Сталин, Уинстон Черчил ва Франклин Рузвелт ба тавофуқ расиданд, ки дар Ялтаи Қрим бо ҳам дидор намоянд. Нерӯҳои ҳарбии иттифоқчиён аз шарқу ғарб ба ҳам наздик мешуданд ва ин низ метавонист мушкилотеро миёни онҳо эҷод кунад. Инчунин мебоист шарту шурути таслими бечунучарои Олмон муҳокима мегардид. Ба ҳамин хотир дар конфронси Ялта, дар қатори сарони кишварҳои иттифоқчӣ ва вузарои корҳои хориҷӣ, инчунин ҳарбиёни баландмақом, мушовирон ва коршиносони ин кишварҳо низ ширкат варзиданд. Барои мисол ҳайъати СССР ро дар қатори вазири корҳои хориҷӣ В. Молотов, ҳарбиён Н.Кузнетсов, А. Антонов ва С. Худяков, сафирони СССР дар ИМА ва Англия, А. Громико ва Ф. Гусев ва инчунин тарҷумони шахсии Сталин В.Н. Павлов намояндагӣ мекарданд. 

 Насли аргонавтҳо

30 январи соли 1945 қабл аз вохӯрии Ялта, Рузвелт ва Чечил дар ҷазираи Малта бо ҳам дидор намуданд.Роҳбарони Англия ва ИМА мехостанд нақшаи амалиёти стратегии кишварҳояшонро дар Аврупои Ғарбӣ муҳокима кунанд. Дар ин дидор, ду роҳбар таъкид карданд, ки пешравии аз ҳад зиёди Артиши шӯравӣ ба Аврупои Марказӣ ба нафъи Англия ва ИМА нест ва бояд амалкарди ояндаро бо Сталин дар миён гузоранд. Рузвелт ва Черчил ба Сталин пешниҳод карданд, дидори ояндаро дар Шотландия - минтақаи бетараф баргузор намоянд. Аммо Сталин бо шӯхи ҷавоб дод, ки туманро дӯст намедорад ва намехоҳад масоили муҳимро дар кишваре, ки мардонаш юбка мепӯшанд ҳаллу фасл кунад. Аммо дар асл Сталин мехост ба Черчилу Рузвелт бифаҳмонад, ки шароити дидорро ӯ муаян хоҳад кард. Маҳз Артиши ӯ дар дарвозаҳои Берлин қарор дошт. Сталин инчунин пешниҳоди дидор дар Малта,Рим, Байтулмуқаддас, Искандария ва Афинаро низ рад кард. Билохира қарор дода шуд, дидор дар шаҳри Ялтаи Қрим баргузор гардад.                                                                                                                             

Ҳангоми омодасозии конфронс, Черчил барои ин рӯйдоди муҳим номи рамзӣ ихтироъ кард ва  конфронсро "Аргонавт" номгузорӣ карданд. Черчил ба Рузвелт мактубе ирсол кард ва дар он навишта буд: "Мо насли бевоситаи аргонавтҳо ҳастем, ки тибқи асотири юнонӣ ба Баҳри сиёҳ барои ба даст овардани пусти тиллоӣ омада буданд". Ин истиораи зебо ба Сталин ҳам писанд омад ва пешниҳоди Черчил якдилона қабул карда шуд.   

 Гови муқаддас

Корҳои омодасозии конфронс ду моҳ тӯл кашид.

29.10.1918. Дар Русияи Шӯравӣ Иттиҳоди коммунистии ҷавонон (РКСМ) таъсис дода шуд. Ин ташкилот баъдан ба ВЛКСМ тағйири ном кард ва асоситарин созмонони ҷавонон дар собиқ Иттиҳоди Шӯравӣ ба шумор мерафт.

29.10.1956. Исроил ба Миср ҳамла кард. Баъди чанд рӯз Фаронса ва Англия низ вориди ҷанг шуданд. Танҳо дахолати СССР ва таҳдиди вурудаш ба ин даргирӣ, монеъи ишғоли коноли Суетс ва қисмате аз хоки Миср аз ҷониби Исроил, Фаронса ва Англия гардид.

30.10.1941. Дар рафти Ҷанги ҷаҳонии дуввум, президенти ИМА Франклин Делано Рузвелт барои кумак ба Иттиҳоди Шӯравӣ 1 миллиард доллар ҷудо кард.

30.10.1961. Иттиҳоди Шӯравӣ озмоиши қавитарин бомбро дар таърихи ҷаҳонӣ анҷом дод. Бомби 58 мегатоннаии ҳидрогенӣ, ки бо "Шоҳ бомба" маъруф аст дар майдони озмоишии ҷазираи Замини Нав тарконда шуд. Роҳбари СССР Никита Хрушев дар ин маврид изҳор дошт, ки мо мехостем бомби 100 мегатоннаиро битарконем, аммо ба хотири нашикастани шишаҳо дар Маскав вазни бомбро камтар кардем.

31.10.1922. Дар Итолиё, тарафдорони беннито Мусолинӣ, ки бо "куртасиёҳон" маъруф буданд ба пойтахти ин кишвар, шаҳри Рим ворид шуданд ва бо тантана аз назди қасри подшоҳӣ гузаштанд. Бо ин кор инқилоби фашистӣ дар Итолиё ба пирӯзӣ расид ва расман давраи фашистӣ дар дунё оғоз гардид.

31.10.1961. Ҷасади Иосиф Сталин аз Мавзолеи Ленин бароварда шуд ва дар назди девори Кремл дафн гардид.

1.11.1922. Импературии Усмонӣ ба мавҷудияти худ хотима дод ва Туркия ба ҷумҳурӣ табдил дода шуд.

2.11.1924. Дар панҷ манораи Кремл ситораҳои ёқутӣ насб карда шуданд.  

3.11.1931. Дар Иттиҳоди Шӯравӣ яке аз пурнуфузтарин ва бойтарин муассисаҳо - Институти марсизм-ленинизм таъсис дода шуд, ки бевосита ба КМ ВКП(б) итоат мекард.

3.11.1988. Дар Иттиҳоди Шӯравӣ расман ба омӯзиши забони ибрӣ (забони қадимаи яҳудиён ва забони расмии Исроил) иҷозат дода шуд.

4.11.1945. Оғози конфронси Қрим. Роҳбарони кишварҳои иттифоқчӣ дар ҷанги ҷаҳонии дуввум Иосиф Сталин, Уинстон Чечил ва Франклин Рузвелт дар шаҳри Ялтаи Қрим барои баррасии масоили баъдиҷангӣ бо ҳам дидор намуданд.

4.11.1946. Дар пойтахти Фаронса, шаҳри Порис ташкилоти Созмони Миллали Муттаҳид оиди масоили омӯзиш, илм ва фарҳанг (ЮНЕСКО) таъсис дода шуд.

4.11.1956. Нерӯҳои Артиши Шӯравӣ вориди пойтахти Венгрия, шаҳри Будапешт гардиданд. Роҳбари ин кишвар Имре Над дар сафорати Югославия паноҳ бурд ва ба ҷояш Янош Кадар сари қудрат омада, ҳукумати нави "инқилобии коргару-деҳқониро" таъсис дод.

Маъмурияти ҶСК «Автоколонна 2927» нисбати маводи «Ронандаи № 33-ро ҷазо диҳед!», ки дар рӯзномаи «СССР» таҳти №37 аз 24 сентябри  соли 2020 рӯи чоп омадааст, мавриди муҳокима қарор гирифт.

Ба маълумоти шумо мерасонем, ки он воситаи нақлиёти дар рӯзнома қайд шуда рақами давлатиаш 77-61 тт 05 бинобар сабаби рафтори бадахлоқонаи ронанда нисбати шаҳрвандон рақамҳои давлатиаш гирифта шартномаи ҳамкорӣ бо ҷамъият қатъ гардида ва худи ронанда аз кор озод карда шуд. Қобили зикр аст, ки воситаҳои нақлиёт зери назорати доимии роҳбарияти ҷамъият қарор дорад.

Хуршедҷон Хизиров, сардори ҶСК «Автоколонаи 2927»