Агентии авиатсияи граждании назди Ҳукумати Ҷумҳурии Тоҷикистон ба шаҳрвандони мамлакат дар робита ба ҷорӣ гардидани маҳдудияти вуруд ба Федератсияи Россия ва қатъ гардидани парвозҳо дар баъзе хатсайрҳо хабар медиҳад, ки бо мақсади  пешгирии паҳншавии бемории коронавируси нав-СOVID-19 Ҳукумати Федератсияи Россия қарор қабул намуд, ки аз 18 марти соли 2020 то 1 майи соли 2020 вуруди шаҳрвандони кишварҳои хориҷиро ба ҳудуди худ муваққатан манъ намояд.

Гуфта мешавад, ки маҳдудияти мазкур нисбат ба ронандагони автомобилҳои боркаш, сарнишинони ҳавопаймову қатораҳо, шахсоне, ки аз гузаргоҳҳои транзитии фурудгоҳҳои Федератсияи Россия мегузаранд ва ё ба Федератсияи Россия вобаста ба вафоти хешу табори наздик сафар менамоянд, татбиқ намегардад.

Дар асоси қарори қабулгардидаи Ҳукумати Федератсияи Россия, вуруди мусофирон-шаҳрвандони Ҷумҳурии Тоҷикистон, ки ба Федератсияи Россия сафар менамоянд, муваққатан манъ карда шудааст. Ин амал ба он оварда расонидааст, ки шумораи мусофироне, ки аз Ҷумҳурии Тоҷикистон ба Федератсияи Россия тариқи нақлиёти ҳавоӣ бояд сафар мекарданд, кам гардида, ба ин васила ширкатҳои ҳавопаймоии ҷонибҳо як қисми парвозҳои хатсайрҳои худро муваққатан қатъ карданд. 

Дар робита ба ин, шаҳрвандони Ҷумҳурии Тоҷикистон метавонанд чиптаҳои ҳавопаймоии худро, ки қаблан дастрас намудаанд, ба муҳлати дертар аз 1 майи соли 2020 иваз намоянд, ё ин ки метавонанд аз нуқтаҳои чиптафурӯшӣ, ки чиптаҳои ҳавопаймоиро дастрас намудаанд, маблағи пардохтнамудаи худро бозпас гиранд.

Дар сурати пайдо шудани саволҳои иловагӣ ё мушкилот шаҳрвандон метавонанд бо телефонҳои 222-22-36, 222-22-39, 222-22-35, 222-22-43 бо мутахассисони Агентии авиатсияи гражданӣ дар тамос шаванд.

   Зимни баргузор намудани чорабиниҳои оперативӣ-ҷустуҷӯӣ аз ҷониби кормандони милитсия марди 37-солаи сокини ш.Хуҷанд бо гумони қасдан расонидани зарари вазнин ба саломатӣ, дастгир карда шуд. 

   Номбурда, санаи 17-уми марти соли 2020, тахминан соатҳои 17:30-дақиқа, дар ҳудуди ш.Хуҷанд, бо собиқ ҳамсараш зани 34-сола ва писари ноболиғи 15-солааш, сокинони шаҳри мазкур вохӯрда, аз сабаби муноқишаи ба миён омада, ҳамсар ва писари ноболиғашро бо автомашинаи шахсиаш тамғаи «Опел-Вектра», қасдан пахш намудааст. Дар натиҷа, ҳамсари собиқаш аз ҷароҳатҳои ҷисмонии бардоштааш дар беморхона ба ҳалокат расида, писари ноболиғаш ҷароҳати ҷисмонӣ бардошта, дар беморхона бистарӣ гардидааст.

   Нисбати гумонбаршаванда парвандаи ҷиноятӣ бо моддаи 110 қисми 3 Кодекси ҷиноятии Ҷумҳурии Тоҷикистон оғоз карда шуда, тафтишот идома дорад.

Президенти Русия Владимир Путин бобати пошхӯрии Иттиҳоди Шӯравӣ изҳори назар ва инқилобчиҳоро сабабгори асосии пошхӯрии собиқ Иттиҳод унвон кард.                                                                                                                                         

Путин гуфт: "Ҳангоми инқилоб нафароне, ки ҳукумати пештараро вожгун кардаанд, худашон низ одатан дер дар сари ҳукумат намемонанд. Барояшон ҳукумате, ки бо ҷидду ҷаҳд сохта буданд, хело зуд манфур мешавад".                                         

Президенти Русия афзуд, ки болшевикҳо аз ин қавонини нонавишта истисно буданд. Путин таъкид кард: "Болшевикҳо пас аз таҳаввулоти сиёсии Октябр дертар сари қудрат монаданд. Сипас худашон пош хӯрданд ва кишварро ҳам аз паси худ бурданд". 

Ногуфта намонад, ки президенти Русия пештар ҳам як сабаби дигари пошхӯрии Иттиҳодро тавзеҳ дода, онро ба бесамарии сиёсати иқтисодӣ рабт дода буд.

 Салом СССР-и гиромӣ! Санаи 5.03.2020 бароям бисер рӯзи хотирмон буд. Ҳамкасби азизамон Раҷабгули Раҳматулло-омӯзгори синфи 2-юм дарси кушоди худ таҳти унвони “Модар фаришта буд”-ро дар ҳузури устодон ва волидони синфашон манзури мо намуданд. Муаллима бо як маҳорати баланд тавонистанд, ки бо шогирдонашон оиди бузургию меҳри модар бо шеъру таронаҳо, панду андарзи ниёгон, саҳначаҳои ҷолиби аҳамияти тарбиявӣ доштаашон дарсро хотирмон гузаронанд. Синфхона бо ороиши диққатҷалбкунанда, намоиши китобҳои бачагона, расму манзараҳои тасвир намудаи хонандагон, аз заҳмату талошҳои ин омӯзгори асил дарак медод. Муаллима дар ҳақиқат дӯстдори касби хеш буда, дар таълиму тарбияи насли наврас нақши воризашонро мегузоранд. 

Даврони Айниддин, Аълочии маорифи ҶТ, н.Восеъ, тел: 931230939

4.03.2020. Соат ба вақти Душанбе 10:46 дақиқа. Ба назди терминали истгоҳи Гулистон рафтам, то “Сity cart” дастрас намоям. Ҳол он ки дастрас намудани “Сity cart” аз терминалҳо айни ҳол барои мо сокинони шаҳри Душанбе хело душвор шудааст. Аҷиб аст, ки мардум пул медиҳаду саргардон аст. Мефаҳмам, агар “Сity cart” арзон, ройгон ё ақаллан имтиёзнок бошад. Пул медиҳем, вале карта нест. Инро чӣ хел фаҳмем? 

Бо чанд сокини пойтахт ҳамсуҳбат шудам. Маълум гашт, аз сабаби сари вақт дастрас накардани корти нақлиётӣ -“Сity cart” аз кор ва дарс дер мемонанд.

Сокини ш. Душанбе бо номи Фарибон зимни сӯҳбат бо мухбири СССР гуфт, ки дастрас намудани  “Сity card” барои мо ҷавонон хело душвор аст, бахусус дар рӯзҳои боронӣ ҳолатҳое мешавад, ки терминалҳо кор намекунанд. 

Ҳамсӯҳбати дигари мо донишҷӯи Донишкадаи санъати ба номи М.Турсунзода Азизи Муйин низ чунин ибрози ақида намуд:

   -Санаи 26.02.2020, соати 16:10 дақиқа ба автобуси хатсайри №2 савор шудам. Пеш  аз дохил шуданам доду ғавғои мардум гӯшамро харошид. Ҳайрон шуда, дохили автобус шудам. Дар дохили автобус  1 волонтёр ба ҳар мусофири саворшуда, дағалона муносибат намуда, мардумро маҷбур менамуд, ки “Сity card”-и дар дасташ бударо бихаранд. Дар ин ҳолат бисёре аз донишҷуён гуфтанд, ки ҳоло мо дар даст ҳамагӣ 1 сомонию 40 дирам дорем, чӣ кор кунем, пиёда ба хонаамон равем? Ин  волонтёр, ки таъби ҳамаро хира карда, худ шоҳу табъаш вазир буд,  то ҳадде бадахлоқ ҳам менамуд. Фарзи мисол, 1 зан дохили автобус шуд, волонтёр дод зада гуфт, ки зудтар корт харад, вагарна ронанда вайро аз дохили автобус берун хоҳад кард. 

Ман ба наздаш рафтаму худамро муаррифӣ намудам. Гуфтам хабарнигори СССР мебошам ва ин рафторатон аз рӯи қонун нест. Волонтёр ба мисли ҳавопаймо аз дохили автобус парида нопадид гашт. Пасон аз ронанда пурсидам, ки ин чӣ гап аст? Чаро ба ин волонтёр касе чизе намегӯяд? Ронанда дар ҷавоб гуфт:

 -Волонтёрон сари моро аллакай гаранг кардаанд, чӣ кор кунем, ки ҳар рӯз бо ҳамингуна бадахлоқон рӯ бу рӯ мешавем.

Мусофирони азиз! Агар зимни сафар дар нақлиёти ҷамъиятӣ бо чунин волонтёрони ҷавони дағал вохӯрдед, ҳатман аз чунин бархӯрди онҳо ба шӯъбаи нақлиёти МИҲД ш.Душанбе, ширкати “Авесто Гурӯҳ” ва Кумитаи кор бо ҷавонон ва варзиши назди Ҳукумати ҶТ ва газетаи мардумии СССР шикоят кунед. Мо онҳоро ба хари худашон мешинонем. Мо Метавонем!

Омиронаи Сайёф, СССР

Раёсати Бонки давлатии амонатгузории Ҷумҳурии Тоҷикистон «Амонатбонк» бо самимияту ифтихори бепоён Шумо-модарон ва бонувони азизро ба муносибати, Рӯзи модар ва фаро расидани фасли баҳор табрику муборакбод гуфта, саодатмандиву сарбаландӣ ва муваффақиятҳои нав ба навро дар кору рӯзгоратон таманно дорад.

Бо пешниҳоди Пешвои миллат 11-сол аст, ки дар кишвари офтобиамон санаи 8-уми март ҳамчун Рӯзи модар бо шукӯҳи хосса таҷлил мешавад ва қайд намудани ин ид дар байни ҳамватанони мо ба ҳукми анъана даромадааст. Дар кишвари мо ҳамчун иди расмии давлатӣ эълон гардидани Рӯзи модар яке аз барҷастатарин нишонаҳои вусъат ва азамати фарҳанги таърихии миллии мост, ки ғунҷонидани анвои арзишҳои волои инсонӣ ва маънавиро дорад. 

Модарон ва бонувони азиз! Шумо ба мисли баҳор пурнакҳату муаттар, сабзу хуррам ва шодобу шукуфо буда, бо оғози фасли баҳор ва арафаи соли нави аҷдодӣ, яъне ҷашни Наврӯз тавъам омадани Рӯзи модар дар кишвари зебову офтобии мо рамзи нек аст. Яъне, соли нави мо бо арҷ гузоштан ба мақому манзалат, қадру қимат ва ҳурмату эҳтироми модарону занони иззатманду меҳрубони мо шурӯъ мешавад.

Бори дигар бо як ҷаҳон самимияту меҳр Рӯзи модар ва фаро расидани фасли эҳёи табиатро табрику таҳният мегӯем. Модарони азиз ба Шумо ва наздикону пайвандонатон саломатии бардавом ва хушбахтии бепоёнро таманно дорем. Бигзор ҳар саҳифаи китоби рӯзгоратон бо рақами саодату нусрат, саломативу хуҷастафолӣ, хайру баракат ва иқболу муваффақият зиннат ёбад. 

Ид муборак!

Сироҷиддин Икромӣ, Раиси Раёсати Бонки давлатии амонатгузории Ҷумҳурии Тоҷикистон «Амонатбонк»

Таҷлили «Рӯзи модар» дар БДА ҶТ “Амонатбонк”

Дар иртибот ба ҷашни «Рӯзи модар» дар маҷлисгоҳи БДА ҶТ “Амонатбонк” бо иштироки Раиси Бонк Сироҷиддин Икромӣ, шоири халқии Тоҷикистон Гулназар Келдӣ, ҳунарпешаи халқии ИҶШС, роҳбари гурӯҳи рақсии “Зебо“, Зебо Аминзода ва аҳли кормандони дастгоҳи марказии Раёсати Бонк, чорабинӣ баргузор гардид.

Сараввал Раиси Раёсат ҳамаи бонувонро ба «Рӯзи модар» табрик намуда, перомуни бузургии зан-модар ва эҳтироми зан дар ҷомеа ба ҳозирин ёдовар шуда, иброз доштанд, ки ҳамчун ҷашни расмии давлатӣ эълон шудани “Рӯзи модар” аз ҷониби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон гувоҳи равшан аз ҷойгоҳ ва мақому манзалати воло доштаи бонувон дар Ҷумҳурии Тоҷикистони соҳибистиқлол мебошад.

Баъдан шоири халқии Тоҷикистон Гулназар Келдӣ, ҳунарпешаи халқии ИҶШС, роҳбари гурӯҳи рақсии “Зебо“, Зебо Аминзода аз фазилат ва бузургии модар ёдовар шуда, аз ашъори худ ва шоирону нависандагони адабиёти тоҷик порчаҳои шеър қироат намуданд.

Инчунин, Раиси Шӯрои ҷавонони Дастгоҳи марказии Бонк, Сарбоз Фаррухзода аз номи ҷавонон ва кормандон, иштирокчиёнро бо қироати шеър аз ашъори Лоиқ Шералӣ табрик намуд. 

Ҳамзамон аз ҷониби Раиси Раёсат ба ҳамаи бонувон туҳфаҳои молиявии омоданамудаи Иттифоқи касаби Бонк, тақдим карда шуд. 

Ҳамкории дуҷониба байни БДА ҶТ “Амонатбонк” ва ҶС «Ширкати содиротию суғуртавии «KazakhExport»- и Ҷумҳурии Қазоқистон

Чанде пеш дар бинои марказии БДА ҶТ «Амонатбонк» Раиси Раёсати Бонк Икромӣ Сирроҷиддин Салом бо ҳайати расмии ҶС «Ширкати содиротию суғуртавии «KazakhExport»-и Ҷумҳурии Қазоқистон, ки таҳти роҳбарии  Муовини Раиси Раёсати Ширкати мазкур Калигазин Аслан ҷиҳати ба роҳ мондани ҳамкориҳои дуҷониба ва бисёрҷониба бо бонкҳо ва ташкилотҳои молиявии кишвар ба Ҷумҳурии Тоҷикистон ташриф оварда буд, мулоқоти дуҷониба баргузор намуданд.

Дар рафти мулоқот намояндаи расмии ҶС «Ширкати содиротию суғуртавии «KazakhExport» иброз намуд, ки Ширкат омодааст дилхоҳ пешниҳод ва дархостҳои соҳибкорони Ҷумҳурии Тоҷикистонро, ки аз Ҷумҳурии Қазоқистон молу маҳсулот ворид менамояд тариқи миёнаравии БДА ҶТ «Амонатбонк» дастгирӣ намуда, то ба манзил расидани молу маҳсулотҳо суғуртаи маблағи онҳоро таъмин намояд.

Дар навбати худ, Раиси Раёсати Бонк Икромӣ Сироҷиддин Салом иброз намуданд, ки БДА ҶТ «Амонатбонк» дар раванди сиёсати пешгирифтаи давлату Ҳукумати Ҷумҳурии Тоҷикиистон ҳамеша омодааст соҳибкорони ватаниро дар самти рушд додани соҳибкории хурду миёна ва дарёфти шарикони рушди боэътимод дастгирӣ намояд.

Ҳамчунин, пас аз мулоқоти дуҷониба дар толори маҷлисгоҳи Осорхонаи Бонк, воқеъ дар ошёнаи 10-уми бинои марказӣ, Раиси Раёсати БДА ҶТ «Амонатбонк» ва Муовини Раиси Раёсати ҶС «Ширкати содиротию суғуртавии «KazakhExport» Созишнома оид ба рушд додани ҳамкориҳои дуҷониба ба имзо расониданд.

Ҳадафи асосии ба имзо расонидани Созишнома, ин пеш аз ҳама зиёд намудани ҳаҷми гардиши молу маҳсулот миёни соҳибкорони Ҷумҳурии Тоҷикистон ва Ҷумҳурии Қазоқистон ба шумор меравад.

Бонки давлатии амонатгузории Ҷумҳурии Тоҷикистон «Амонатбонк» кӯшиш менамояд, ки дар оянда ҳам, нисбати амалӣ намудани дастуру супоришхои Асосгузори сулҳу Ваҳдати миллӣ, Пешвои миллат, Президенти Ҷумҳурии Точикистон, муҳтарам Эмомали Раҳмон дар самти дастгирии сохибкорони ватанӣ ва дарёфти сарчашмахои нави сармояи арзону дастрас хамаи тадбирхои муассирро амалӣ намояд. 

Шӯъбаи матбуоти БДА ҶТ «Амонатбонк» 

“Модари матбуоти тоҷик”, “Духтари газета”- ин унвонҳои ифтихорӣ танҳо ба Гулчеҳра Фозилова хос аст. Апаи Гулчеҳра беш аз 50 сол мешавад, ки дар рӯзномаю маҷалаҳои гуногун ҳамкорӣ карда, пешрафту интишору паҳн намудани нашрияҳои кишварро бе ин бонуи хоксору зиндадил тасаввур кардан имконнопазир аст. Гулчеҳра Фозилова солҳои зиёд аст, ки дар  рӯзнома “Ҷавонони Тоҷикистон” ва ҳафтавори мардумии СССР кор ва фаъолият мекунад. Дили софу бекина, меҳнати ҳалолу ниятҳои некаш имрӯз ӯро миёни ҳама рӯзноманигорон соҳиби обрӯ ва эҳтирому эътибори бузург гардонидааст. Вақте ки дари редаксияи “Ҷавонони Тоҷикистон”-ро мекушоем, аввалин шахси пешвозгиранда Апа аст. Ҳамеша Апаро дар назди мошинкаи худ мебинем, ки чизе менависад. Ба наздаш рафтему, аз гузашта ва ҷавониҳояш пурсон шудем, аз гуфтаҳояш маълум гардид, ки рӯзгори пур аз хотирмон гузарондааст. Фоҷиаву шикастҳои зиёдеро паси сар намуда бо ҳама бешу камаш шукр мекунаду ҳар субҳи нави зиндагиро бо лабханд пешвоз мегирад.

Гулчеҳра Фозилова дар оилаи шахсони оддӣ, яъне коргар таваллуд шудааст.

  - Падарам дар яке аз муассисаҳои давлатӣ посбон буданду модарам бошад, фаррош кор мекарданд. Кӯдакии ман чун дигарон бо ҳазор орзую умедҳо пушти сар шудааст. Пас аз хатми синфи 10 мехостам ба факултаи забони хориҷӣ дохил шавам, вале падару модарам зид баромаданд. Ман пинҳонӣ аз онҳо ҳуҷҷатҳоямро ба донишгоҳ оварда ба факултаи филология супоридам, - мегӯяд Гулчеҳра 

Оғози кор дар “КТ”

 Пас аз он ки дар шуъбаи ғоибонаи факултаи филология дохил мегардад, аз пайи ҷустуҷуи ҷойи кор мешавад. Ҷавондухтари зебою дар тан либоси миллӣ ба идораи “Комсомоли Тоҷикистон” рафта, назди дари сармуҳаррир мешинад. Апаи Гулчеҳра мегӯяд: “вақте ки ба идора рафтам, ҳамон вақт сармуҳаррир Абдулло Зокиров дар сафари хизматӣ буд, маро ҷонишини сармуҳаррир Муқимҷон Абдураҳмонов қабул намуд. Баъд аз суҳбат ҳамчун хаткашони идора фармон гирифтам. Баъд аз чанд рӯз Абдулло Зокиров аз сафар баргашта, маро ходими шуъбаи мактуб ба кор гирифта, вазифаи хаткашониро ба каси дигар вобаста карданд”.

“Модари журналистон”

Умри Апа қариб, ки сарфи ин идора шуд. То ин дам бо журналистони зиёде кор кард.  Бисёриҳоро ҳамчун фарзанд дар хонаи хеш нигоҳубин ҳам кардааст.  Солҳои ҷангу қаҳтӣ, рӯзҳои пурдаҳшат нафарони зиёдро Апаи Гулчеҳра сари як дастархон ҷамъ кардааст. Кормандони собиқадоре, ки ҳамроҳаш кор мекарданд, мегӯянд, ки ҳамон солҳо пагоҳӣ ҳама дар идора мунтазири Апа будем, ки шояд хурдание биёрад. Ҳамин тавр ҳам мешуд. 

   - Давраҳои бениҳоят мушкил буд, ман баъзан вақт дар бозор ба савдои молу маҳсулот низ машғул будам, маблағи ба даст омадаро нону хурокворӣ харида ба назди бачаҳо оварда, якҷо мехурдем, - иброз медорад Гулчеҳра-апа. 

Ҳарчанд бо амри тақдир натавонист соҳиби фарзанд шавад, аммо ин зани бузург тавонистааст, ки чандин нафарро хуронда пушонда ба воя расонад, насиҳат, кумак ва дастгириашон кунад. Хонаи хурдакаки ин зани дилаш бузург, нафарони зиёдеро, чандин рӯзноманигоронро ҷо намудааст.

Рӯзи чопи газета соҳиби фарзанд мешавам!

  -Ман намегӯям, ки фарзанд надорам, ҳамаи кормандони ин идора фарзандони мананд. Ҳама он нафароне ки бо ман кору фаъолият карданд, бачаҳои ман, бародарони ман ҳастанд. Сайёфи Мизроб бошад додари ман аст. Хуллас, ҳар ҳафта рӯзи чопи газетаҳо ман соҳиби фарзанд мешавам, ба қавле фарзандони ман таваллуд мешаванд, - гуфт Гулчеҳра Фозилова.

Иди баҳору зебоӣ, ҷашни таваллуд муборак бошад, Модари журналистикаи тоҷик! То мо ҳастем, Шуморо фаромӯш намесозем. Мо Метавонем!

Ситораи Саҳар,

Махсус барои СССР