« Ҳамагуна ҷомеаи демократӣ, алалхусус ҷомеаи кишварҳое, ки нав ба ин ҷода қадам мегузоранд, ба воситаҳои ахбори омма ва фаъолияти пурсамари онҳо ниёзманд мебошанд»

                                                                                          Эмомалӣ Раҳмон

Дар ҳақиқат матбуот инъикоскунандаи идеалогияи ҳар як давлат мебошад. Маҳз мардум  тавассути рӯзномаҳо бо руйдодҳои олам огоҳӣ меёфтанду аз ин рӯ дар давраи шуравӣ ба табъу нашри рӯзномаҳо аҳамияти хоса медоданд. Ҳар 1 ноҳия ҳафтае 3 маротиба рӯзномаи худро аз 5 000 то 10 000 нусха чоп намуда, сари вақт дастраси одамон мегардонид. Ба ғайр аз шахсоне, ки обуна буданд, дигарон рӯзномаю маҷаллаҳои даркориро аз нуқтаҳои фурӯши рӯзномаҳо харидорӣ менамуданд. Танҳо дар як шаҳраки Восеъ (ҳозира Ҳулбук) 6-то нуқтаи фурӯши рӯзномаҳо фаъолият менамуд. 

Аз вақте ки собиқ раиси ноҳия Мусо Ғафурзода ба кор оғоз намуд, ягона дукони рӯзномафурӯширо, ки бо дастгирии «Тоҷикматбуот» дар маркази шаҳрак таъсис ёфта буд, барҳам дод. Ман, ки масъули ин соҳа мебошам гарчанде норозигӣ баён намудам, бо супориши раис дар дуконе марбут ба шуъбаи алоқаи ноҳия бударо ба ман иҷора доданд, ҳол он ки дар ин дукон тобистон аз гармӣ ва дар замистон аз сардӣ нишастан ғайримкон аст. Борҳо доири ин масъала бо раиси ноҳия суҳбат намудам. Ӯ танҳо ваъда медод, ки баъди чор-панҷ моҳ ин масъаларо ҳал мекунем ва шуморо соҳиби қитъаи замине барои сохтани дӯкон мегардонем ё ҳамин дӯкони чӯбинро ба шумо медиҳем, то ин ки ба таври замонавӣ азнавсозӣ намоед. Гарчанде, ки 2 маротиба аз ҷониби Дастгоҳи иҷроияи Президент ва ҶДММ «Тоҷикматбуот» ба мақомоти ноҳия, махсус ба раиси он мактуб оиди ҷудо намудани ду ҷой барои кушодани дӯкони рӯзномафурӯшӣ ирсол шуда бошад ҳам, мутаассифона ягон чорае наандешиданд. Муовини раиси ноҳия Алихон Худоёрзода вазифадор карда шуд, дар асоси мактуб ба ман як ҷои муайяне барои кушодани дӯкон замин ҷудо мекард, вале моҳҳо сипарӣ шуданду ба ғайр аз ваъдаҳои хушку холӣ ягон чорае надид. Вақте ки собиқ сармеъмори ноҳия Отабек Муқумов дар назди муовини раис Алихон Худоёрзода чунин ҷавоб дод: «Ман барои киоски газетафурӯшӣ замин надорам».

- Замин ки надоред, хуб мешуд ҳамин дӯконро ба ман диҳед, то ин ки бо тарҳи нав сохта ҳамчун дукони рӯзномафурӯшӣ ба истифода барам.

- Инро мо ҳал карда наметавонем-гуфт Алихон Худоёрзода-аз Бег Сабур пурсидан даркор.

Хонандагони гиромӣ ба фикри шумо 1 вазире, ки даҳҳо иншоотҳои боҳашомат бунёд менамояд, эҳтиёҷ ба як порча замине, ки андозааш 2x3 метрро ташкил медиҳад, дорад? Ҳеҷ гоҳ ва шахсан ман ба ин бовар надорам. Танҳо баҳона ҳасту халос, ё ба ибораи дигар гӯем дури ҷустан аз рӯзномаҳои мустақил ба хотири он ки дар онҳо бештар мушкилоти мубрами ҷомеа ва роҳи ҳалли онҳо дарҷ мегарданду дар онҷо фурӯхта мешаванд. Ҳатто кор ба он дараҷае аст, ки масъулони ноҳия нисбати мактуби Дастгоҳи иҷроияи Президенти ҶТ муносибати сардона мекунанд, пас чӣ ҷои шарҳу эзоҳ аст.  Аз ин рӯ баъди чунин муносибати   сардона ба матбуоти даври ба чунин хулоса омадам, ки фаъолиятамро қатъ   намоям. Ҳоло он ки дар дигар ноҳияҳо барои кушодани дуконҳои рӯзномафурӯшӣ   ҳукуматдорон кумак мерасонанд. 

Аз  ин сабаб аз ҳамаи муштариёни доимӣ, ки пайваста ҳафтаномаҳои давриро аз манн харидорӣ менамуданд узр мепурсам, зеро аз тарафи масъулони ноҳия  дастгирӣ наёфта, маҷбур шудам дӯконро баста, фарзандамро ба муҳоҷират гусел кунам…

Рузимади Тоҳир, н.Восеъ 

Як моҳ пеш ҳамроҳи дустонам ба ноҳияи Варзоб рафта будем. Нигоҳи маро зимни сафар на танҳо манзараҳои кӯҳу даман, ободии роҳҳо, балки теъдоди зиёди бӯстонсарову меҳмонхонаҳо, осоишгоҳҳову ва истироҳатгоҳҳои шахсию давлатӣ ва сарҷамъии гулдухтаракони чаканпӯш ҷалб менамуд, ки аз канори роҳ ба ба сӯи талу теппаҳо равона буданд. Медидем, ки онҳо бо ҳазор ҳавас дар назди чашмасорон, соҳилҳои пургулу гиёҳи рӯдҳои кӯҳӣ нишаста, машғули тамошо, наворгирӣ буданд... 

Баргаштагон зиёду ҷой кам...

Хуруҷ ва паҳн шудани коронавирус тамоми мардумро имрӯз ба таҳлука дароварда, зиёда аз 600 ҳазор нафар дар дунё гирифтори ин беморӣ гашта,  наздики 30 ҳазор нафари дигар алакай фавтидаанд. То ин дам зиёда аз 1000 нафар муҳоҷирони тоҷикро бо кӯмак ва дастгирии сарвари давлатамон ба Ватан  баргардонидаанд. Баргаштагон бояд то муддати 14 рӯз берун аз шаҳр дар карантин қарор гиранд ва табибон барои бартараф намудани ҳар гуна хавф саъю талоши худро карда истодаанд. Ва ҳоло мушкили асосӣ танҳо мутахассисон нест, мушкили асосӣ ин аст, ки барои таъмини бехатарии мардум макони бештар лозим буда, он истироҳатгоҳҳо ва лагерҳои мавҷуда алакай пур шуда, барои баргаштагон камбуди ҷой ба назар расида истодааст. Яъне, Вазорати тандурустӣ ва ҳифзи ичтимоии аҳолии ҶТ имрӯз ниёз ба ҷойҳои бештаре дорад, то мардуми аз хориҷ ба Ватан баргаштаро тавонад бо карантини 14-рӯза фаро бигирад.

Агар бо миллатед, пас миллат бо шумост!

Нафароне ҳастанд, ки бо фахр ва ғурур мегӯянд, ки мо миллати тоҷикем ва Тоҷикистони худро дӯст медорем. Агар ин тавр аст ман ба ана ҳамон нафарон гуфтаниям, ки Тоҷикистон ва Ҳукумати кишвар ҳоло ба дастгирии шумо сахт ниёз дорад! Агар шумо миллатро дар чунин рӯзи сахт танҳо гузоштаеду ба миллати худ кӯмак намекунед, пас дар рӯзи хурсандияш низ дар бараш набошед беҳтар аст! Андеша карда, аз пешомади ин ҳодиса ба миллати худ ёрӣ расонед, зеро агар дар рӯзи сахтарин миллатро танҳо гузоштаед, пас бидонед дигар шумо низ ба миллат даркор нестед! Баъд аз ин ҳама суханҳо суоле ба миён меояд, ки  оё нафаре пайдо мешавад, ки истироҳатгоҳои шахсии худро баҳри саломатии ҷомеа фидо намояд? Ку, вазирону раисон ва мансабдорон! Кадоме аз шумо дачаву хонаи истироҳату истироҳатгоҳҳои хешро холӣ карда, дар паҳлӯи миллату давлат хоҳад шуд!?

Омиронаи Сайёф, СССР

Ба гулзори ҳаёт аз баҳри худ не,

Барои дигарон бояд шукуфтан.

Боиси дастгирист, ки имрӯзҳо нафарони дилогоҳу қадршинос ва дилсӯз ба монанди рӯзноманигорони барҷаста, сардабири рӯзномаи мардумии «СССР» Сайёфи Мизроб, Ҷамила Ҳусейнова ва собиқадори меҳнат, нафақахӯр аз ш.Истаравшани вилояти Суғд Наби Ҷумъа ҳастанд, вуҷуд доранд, ки номи аз ёд рафтаи  бонуи меҳнатқарин, собиқадори меҳнат, собиқ калобарес ва бофандаи номиву машҳури Иттиҳодияи «Тоҷикатлас»-и ба номи 60-солагии СССР-и ш.Душанбе пири барнодил Аҳмадова Бозоройро дубора вирди забонҳо оварда, аз фаромӯшӣ агар гӯем хато намекунем, эҳё ва зинда гардониданд. Зиҳӣ ба ҳамаи шумоён! Зиҳӣ, марди бовиқору баномуси миллати тоҷик, қаламкаши номӣ Сайёфи Мизроб ва рӯзномаи дардошнои мо «СССР» барои чунин иқдомҳои инсонпарваронаву ҷавонмардонаву наҷибатон баҳри ёдоварӣ ва қадрдонӣ аз собиқадорони ҷангу меҳнати кишвар воқеан рӯзномаи «СССР»-ҳамдарду ҳамдам ва дардошнои дили ҳамаи мост. «СССР»- мурдаву зиндаи моро соҳибӣ намуда, пайваста аз бузургони мо, собиқадорони ҷангу меҳнат, зиёиёну аҳли илму адаб ва ҳунари мо ёдоварӣ менамоянд. Ман бисёртар аз заҳматкаши роҳи матбуоти тоҷик, паҳнкунандаи рӯзномаи «СССР», модари матбуоти тоҷик ва «Ҷавонони Тоҷикистон» апаи азизу меҳрубони ҳамагон Гулчеҳра Фозилова, ки имрӯзҳо дар остонаи ҳафтодумин солгарди баҳори нозанини умрашаон қарор доранд. Миннатпазирам ва сипосмандам барои ташвиқу тарғиботи чунин рӯзномаи ҷолибу хонданибоб «СССР»-и ба ҷону дил баробари мо ногуфта намонад, ки Гулчеҳра Фозилова-Гули шукуфони саҳарии «Шарқи озод» аст, ки бо накҳати хушу бӯйи атрноку мушки хутанаш ҳар бомдодии рӯзи панҷшанбе ба ҳар яки хонандагони боинтизори рӯзномаи «СССР» пайки хушу шодмониро мерасонад, худ низ собиқадори меҳнат, собиқадори  матбуоти тоҷик мебошад. Хонандаи закии рӯзномаи «СССР» ҳар рӯзи панҷшанбе бо интизориҳои зиёд шабро саҳар карда, пазмони бӯйи хушу насими тозаи саҳифаҳои дилошӯби рӯзномаи «СССР» мебошанд. 

Ҳамдиёри Сотим Улуғзодаву Мутеъулло Наҷмиддин

Боиси хушнудӣ ва сарафрозии мост, ки дар ҷомеаи имрӯзаи мо чунин инсонҳои дарёдил ба монанди Бозорой  Аҳмадова арзи вуҷуд менамоянд. Онҳо худ қомуси зиндаи ҳаёти имрӯзу фардои моянд. Бозорой Аҳмадова аз зумраи он занонест, ки бо меҳнати пурбаракату софдилонаи хеш ба дили инсонҳои дилоҷӯ қадршиноси зиёде роҳ ёфтаву сазовори эҳтироми ҳамагон гардидаанд. Саҳифаҳои таърихи  ҳафтодсолаи давлати Шӯравиро боз як бори дигар варақгардонӣ намуда, аз кору пайкори бонувони меҳнатқаринамон чун Бозорой Аҳмадова  ошно мегардем ва мебинем, ки  чи  хел як бонуи оддие, зодаи деҳаи Варзики Чусти водии Фарғона ба Душанбе  дили Тоҷикистони Шӯравии ҳамон замон солҳои 60-70-уми асри гузашта омада, дар коргоҳи  Иттиҳодияи  «Тоҷикатлас» кору фаъолият намуда, бо пешқадамӣ ва меҳнати ҳалол ном бароварда, машҳури ҷумҳурӣ гардид.

Аҳмадова Бозорой 5 майи соли 1936 мувофиқи ҳуҷҷатҳояш (дар асл соли 1934) дар деҳаи Варзики Чусти Фарғона таваллуд ёфтааст. Ӯ аз ҳамдиёрони нависандагони барҷастаи халқи тоҷик Сотим Улуғзода ва Мутеъулло Наҷмиддинов мебошад. Дар бораи  Бозорой Аҳмадова дар китоби Қурбон Мадалиев «Улуғзода ва ҳамдиёрони ӯ» Душанбе, соли 2016 нашриёти «Русская литература» ва китоби «Занони Тоҷикистон»-и профссор Роҳат Набиева, Душанбе соли 1986, нашриёти «Ирфон» маълумотҳо додаанд. 

Бофандаи номӣ, вале бе унвон…

Аҳмадова Бозорой-ин ҳамон бонуи меҳнатқарин мебошад, ки дар мусобиқаҳои сотсиалистӣ дар панҷсолаи ёздаҳум (солҳои 1981-1985) ташаббус нишон дода, дар зарфи панҷсола се нақшаро иҷро карда, бо сари баланд бо номи калобареси номӣ, бофандаи варзида ва мураббии хизматнишондодаи ҷумҳурӣ ном баровард. Хизматҳои бошарафи ӯро давлат ва ҳукумати Шӯравӣ бо орденҳои «Байрақи сурхи меҳнат», «Ленин» ва медали «Барои меҳнати шоён» қадрдонӣ кардааст. Бозорой Аҳмадова аллакай соли 1989 нақшаи соли 1990-ро барзиёд иҷро намуда буд. Аз ин боис, ӯро борҳо ба унвони «Қаҳрамони меҳнати сотсиалистӣ» пешниҳод намуданд, вале бо сабабҳои номаълум ва баъзе оинҳо натавонист соҳиби ин унвон бигардад. 

Ҳамин тавр ин қаҳрамонзани бошараф ва меҳнатқарин вале бе унвон солҳо зиста, дар дили халқаш ҷо гирифт. Одатан агар бигирем унвони «Қаҳрамони меҳнати сотсиалистӣ”-ро давлат, ҳукумат ва ҳизб ба нафароне сарфароз мекард, ки ба халқу давлат хизмати софдилона намудаанд, вале беҳтар аз ҳама болотар аз ҳама унвонҳо ин маҳбуби халқу диёр будан аст. Унвони беҳтарин ин одаму одамгарӣ мебошад, вақте, ки халқат туро дӯст медоранд, туро ҳурмату иззат менамоянд, туро наслҳои ........... ҷустуҷӯ менамоянд. Ин аст рисолати зиндагӣ. Устоди санъати тоҷик, пири ҳунари тоҷик Шариф Ҷӯраев на он қадар унвонҳои баланди давлатӣ доштанд, вале халқаш миллаташ ӯро бо унвони Акашариф солҳо ёд мекунанд. Шоир, устод Боқӣ Раҳимзодаро низ халқ бо унвонҳояш ёд намекунад, балки ҳамчун муаллим шоири халқ, инсони шариф ёд мекунанд. Таърих ҳазорон нафаронеро медонад, ки унвонҳои баланди «Қаҳрамони меҳнати Сотсиалистӣ», «Қаҳрамони Иттиҳоди Шӯравӣ», «Артистони халқии СССР» ва ғайраро соҳиб буданд, вале аз хотири халқ тез фаромӯш гардида, ба фаромӯшхонаи таърих рафтаанд.

Бозорой Аҳмадова бошад аз ёди халқ ҳеҷ гоҳ намеравад. Ӯ барои халқу миллаташ, барои Ватану диёраш, барои ёру дӯстон пайвандон, фарзандону наберагонаш то абад азизу муҳтарам мебошад, зеро меҳнати ҳалолаш  ин шарафу номус ва унвони ӯст. Шоири тавонои классики тоҷик Сайидои Насафӣ бисёр хуб гуфтааст:

Сарбаландони ҷаҳонро номи эҳсон асту бас,

Сарвро дар бӯстон қадди намоён  асту бас.

Аҳмадова Бозорой дар синни мубораки 85 дар ҳалқаи фарзандон, наберагон дар к.Гулшан-хонаи 130 воқеъ дар ноҳияи Сино умр ба сар мебарад. Имрӯзҳо ӯ каме саломатияшро аз даст дода, парешонхотир аст. Лекин дар ёди ҳамаи мо ҳамон 1 зани хушсалиқаву зебо, меҳнатқарину қаҳрамон хоҳад монд. 

Маҳмадҷон Сафаров, омӯзгор, таърихшинос   

Бонки миллии Тоҷикистон ҳамчун мақоми танзимкунандаи бахши молиявию бонкӣ, сиёсати пулию қарзиро баҳри нигоҳдории муътадилии сатҳи нархҳои дохилӣ, коҳиш додани фишорҳои қурбӣ, ба танзим даровардани афзоиши ҳаҷми пул дар муомилот бо истифода аз механизму фишангҳои монетарӣ, амалӣ карда истодааст.

Айни замон, тибқи муқаррароти “Дурнамои сиёсати пулию қарзии Ҷумҳурии Тоҷикистон барои соли 2020 ва давраи миёнамуҳлат”, сиёсати қурбии ба реҷаи “шинокунандаи танзимшаванда” татбиқ карда мешавад.

Таҳлилҳо нишон медиҳанд, ки хуруҷ ва паҳншавии пандемияи коронавирус дар ҷаҳон ва таъсири он ба иқтисодиёти ҳамаи давлатҳо, аз ҷумла давлатҳои тараққикарда, инчунин ба иқтисодиёти аксари кишварҳои шарикони асосии тиҷоратии Ҷумҳурии Тоҷикистон, зиёд гардидани лапишҳо дар бозорҳои молиявии ҷаҳонӣ, номуайяниҳо дар сиёсати иқтисодии ҷаҳон, ба маротиб паст шудани нархи нафт дар бозорҳои ҷаҳонӣ таҳдидҳои навро ба миён оварданд, ки бевосита таъсири манфии худро ба иқтисодиёти Ҷумҳурии Тоҷикистон мерасонанд.

Аз аввали сол то санаи 19 марти соли ҷорӣ тағйирёбии қурби расмии пули миллӣ нисбат ба доллари ИМА 0,6 фоиз коҳиш ёфтааст, ки нисбат ба ҳамин давраи соли 2019 ба андозаи 0,5 банди фоизӣ зиёд мебошад.

Қурби фурӯши доллари нақди ИМА бошад, дар бозори ғайрибонкӣ 6,2 фоиз баланд шудааст (аз 9,79 сомонӣ дар аввали сол то ба 10,40 сомонӣ дар санаи 19 март), ки нисбат ба ҳамин давраи соли гузашта 5,3 банди фоизӣ зиёд мебошад.

Бояд зикр намуд, ки бо назардошти вазъи номуътадили иқтисоди ҷаҳонӣ, дар ин давра қурби расмии асъори миллии аксари кишварҳои шарикони асосии тиҷоратии Ҷумҳурии Тоҷикистон низ, ноустувор гаштааст. Аз ҷумла, қурби рубли Федератсияи Россия – 24,7 фоиз, рубли Беларус – 15,8 фоиз, тангаи Қазоқистон – 14,8 фоиз, лираи Туркия – 8,6 фоиз, соми Қирғизистон – 4,7 фоиз, нисбат ба доллари ИМА коҳиш ёфтаанд.

Яке аз сабабҳои асосии баланд шудани қурби фурӯши доллари нақди ИМА дар бозори дохилии асъор ва зиёд шудани талабот ба он, ин афзоиш ёфтани тавозуни манфии савдои кишвар, коҳишёбии вуруди интиқолҳои пулӣ дар ин давра ва вобаста ба ин кам шудани пешниҳоди асъори хориҷӣ дар бозор ва ғайраҳо, мебошад.

Боиси таъсири омилҳои беруна ва дохилии мазкур, фарқияти байни қурби расмии Бонки миллии Тоҷикистон ва қурби фурӯши доллари нақди ИМА, тавассути анҷомдиҳии амалиётҳои хариду фурӯши асъори хориҷӣ дар бозори ғайрибонкӣ аз меъёри муқарраршуда - 2 фоиза гузашта, аз 2,2 фоиз дар санаи 25.02.с.2020 то ба 6,7 фоиз дар санаи 19.03.с.2020 зиёд гардид.

Қайд намудан зарур аст, ки гузариш ба реҷаи “ҳадафгирии таваррум” дар амалӣ гардонидани сиёсати пулию қарзӣ, ки аз соли 2018 оғоз гардидааст, аз Бонки миллии Тоҷикистон истифодаи механизм ва усулҳои ба он мутобиқро талаб менамояд.

Айни ҳол, Бонки миллии Тоҷикистон баҳри коҳиш додани фишорҳои қурбӣ дар бозори дохилии асъор, бо истифода аз тамоми манбаъ, имконияту воситаҳо, аз ҷумла механизми хариду фурӯши рубли русӣ, иҷро намудани уҳдадориҳои бо асъори хориҷӣ ифодаёфтаро, таъмин намуда истодааст.

Вале, новобаста аз ин, фарқияти аз меъёр зиёди қурби расмӣ ва қурби фурӯши доллари нақди ИМА дар бозори ғайрибонкӣ зиёд гардида истодааст, ки барои ба танзим даровардани он амалӣ намудани як қатор чораҳои иловагии фаврӣ, зарур мебошанд.

Бинобар ин, Бонки миллии Тоҷикистон барои коҳиш додани фишорҳои қурбӣ, таъсири хавфҳои асъории ҷойдошта ва таъмини риояи меъёри фарқияти то ба 2 фоизаи байни қурби расмӣ ва қурби фурӯши доллари нақди ИМА ва аз байн бурдани фарқият дар бозори ғайрибонкӣ, тасҳеҳи (коррексияи) якдафъаинаи қурби расмии доллари ИМА-ро ба андозаи то 5,0 фоиз амалӣ менамояд.

Ин имкон медиҳад, ки воридот ва интиқоли маблағҳо тавассути низоми бонкии кишвар бештар гардида, манфиати иниқолдиҳандагони маблағҳо аз хориҷи кишвар ҳимоя гардаднд, шаффофияти амалиётҳо бо мизоҷон таъмин карда шавад ва фаъолияти ҳаннотон дар бозорҳои ғайрибонкии нақдӣ маҳдуд гардад. Ҳамзамон, мутавозунии қурби пули миллӣ ба зиёд шудани ҳаҷми содирот ва воридот мусоидат намуда, боиси афзудани даромади буҷети давлатӣ мегардад.

Бонки миллии Тоҷикистон бо тамоми масъулият вазъияти сиёсати қурбиро зери мушоҳидаю таҳлил ва назорат қарор дода, барои таъмин кардани суботи бозори дохилии асъор ва муътадил нигоҳ доштани қурби пули миллӣ воситаю имконият ва захираҳои заруриро истифода менамояд.

Таҷлили Наврӯзи байналмилалӣ дар Бонки миллии Тоҷикистон

19 марти соли 2020 дар Бонки миллии Тоҷикистон ҷашни байналмилалии Наврӯз бо баргузории ҷаласаи идона ва ташкили озмуни намоиши либосҳои миллӣ таҷлил карда шуд.  Чорабинии идонаро муовини Раиси Бонки миллии Тоҷикистон Лола Салимова ифтитоҳ намуда, фарорасии ҷашни байналмилалии Наврӯзи оламафрӯзро ба кормандони низоми бонкӣ ва дар симои онҳо, ба тамоми сокинони кишвар муборакбод гуфт.

Лола Салимова зикр намуд, ки Наврӯз аз муборактарин ҷашнҳои миллии мо тоҷикон ва дигар мардумони ҳавзаи Наврӯз маҳсуб шуда, аз замонҳои қадим то ба имрӯз бо ғояҳои олии башарӣ, дӯстию иттиҳод, созандагӣ, ободкорӣ, инсонпарварӣ ва шукргузории бепоён аз неъматҳои табиат мардумро гирди ҳам овардааст. 

Бо шарофати Истиқлолият ва дастури Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон Наврӯз дар баробари ҷашни Истиқлолият муҳимтарин ҷашни миллии мо эълон шудааст ва ҳамасола бо шаҳомати хос дар саросари ҷумҳурӣ таҷлил карда мешавад.

Ҳамчунин, моҳи феврали соли 2010 бо кӯшиш ва ташаббуси Пешвои миллат иҷлосияи 64-уми Маҷмаи Умумии Созмони Милали Муттаҳид дар хусуси ҷашни байналмилалӣ эълон кардани Наврӯз қатънома қабул кард ва ҷашни фархундаи Наврӯз ба ҷашни ҷаҳонӣ табдил ёфт ва акнун дар тамоми ҷаҳон ҷашн гирифта мешавад,-таъкид намуд муовини Раиси Бонки миллии Тоҷикистон Лола Салимова. 

Зимни чорабинӣ таъкид гардид, ки ҳар ҷашну маросими мардумӣ ҳикмат ва баракате дорад. Хусусан дар айёми Наврӯз, ки зиндагию рӯшноӣ, некию накукорӣ, сулҳу созандагиро меситояд ва мақоми инсонро азизу гиромӣ медорад, баргузории ойинҳои ҷуфтбаророн, хонабаророн, оташафрӯзон, гулгардонӣ, суманакпазӣ, аёдати беморон, ёд кардани гузаштагон, навозиши сари ятимону бепарасторон, хайру эҳсон ба ниёзмандону дармондагон ба анъанаҳои нек табдил ёфтааст.

Бо назардошти ин оини наврӯзӣ, Бонки миллии Тоҷикистон низ ба сифати сарпараст ба Хона-интернати беморони рӯҳии ноҳияи Ҳисор пайваста дасти мадад дароз мекунад ва ҳамчунин, минбаъд ҷиҳати тозаю покиза нигоҳ доштани макони зисту кор ва дар чор фасли сол ба наврӯзгоҳи ҳақиқӣ табдил додани он талош менамояд. 

Дар идомаи чорабинӣ барои таҷлили бошукуҳи ҷашни фархундаи Наврӯзи байналмилалӣ озмуни намоиши либосҳои миллӣ гузаронида шуд. Зимни баргузории озмуни намоиши либосҳои миллӣ дар Бонки миллии Тоҷикистон бонувони бонк либосҳои миллӣ ва анъанавии мардуми тоҷик, аз ҷумла атлас, адрас ва чаканро ба намоиш гузоштанд. Озмуни мазкурро ҳайъати комиссия баҳогузорӣ намуда, ғолибони онро муайян ва бо туҳфаҳои хотиравӣ сарфароз гардонид. 

Дар ҳамин гуна фазои идона чорабинии наврӯзӣ ба поён расид ва зимни ҷамъбасти он муовини Раиси БМТ Лола Салимова бори дигар ҳозиринро бо фарорасии Наврӯзи фархундапай муборакбод гуфт ва ба ҳамаи иштирокдорон муваффақият ва комёбиҳо таманно кард.

Шуъбаи матбуоти БМТ

Авохири даҳаи 90-и асри ХХ барои Русия як давраи буҳронӣ ба шумор рафта, ин буҳрон тамоми соҳаҳои ҳаётӣ ин кишвар ва мардумашро фаро гирифта буд.                     Дар асл ин ҳангом, Русия дар садади аз даст додани тамоми манофеъи худ қарор дошт. Дар ин кишвар ҳамаи аслҳои давлатдорӣ, аз идоракунии давлатӣ гирифта, то танзими умур ва муҳофизати шаҳрвандон халалдор гардида буданд.Тамоми аслҳои асосӣ, ки дар тӯли қарнҳо давлати Русияро ба ҳам муттаҳид мекард аз қабили адолат, ҳамбастагӣ, вуҷуди як роҳбар, ки битавонад рушди ин ду аслро таъмин кунад, аз даст рафта буданд. Одамон комилан боварӣ ба кишварашон ва ба як ояндаи некро аз даст дода буданд. Ва маҳз дар чунин шароит 20 сол қабл Владимир Путин президентӣ нави Русия интихоб гардид. Дар он интихобот ба тарафдории В.Путин 52% интихобкунандагон, ё наздики 40 миллион нафар шаҳрвандони Русия овоз доданд.

Президентбозор ё аз Горбачев то Елтсин

Михаил Горбачев соли 1990 президентӣ СССР интихоб гардид. Замони ӯ ҳодисаи аҷибе рух дод, сарварони ҳамаи ҷамоҳири собиқ СССР якбора президент шуданд.  Сари кор омадани якбора 14 президент дар як кишвар воқеъан ба таъбире "нонсенс" буд, гарчӣ аксари ин президентҳо дар асли сиёсати кишвар чандон дахил ҳам набуданд. Истисно роҳбари Русия Борис Елтсин буд ва баъдан Назарбоев ва то ҳадде Гамсахурдияи гурҷиро ба худаш ҳамроҳ кард. Елтсин баъди президеншавии М.Горбачев дар СССР, президенти РСФСР гардид. Ва рӯи рост дар баробари Горбачев алам рост кард. Даргирии ин ду, билохира бо пошхурии Шӯравӣ ба охир расид ва Елтсин ҳокими мутлақи Русия гашт, ки меросбари собиқ СССР маҳсуб меёфт.

Аз Елтсин то Путин

Замони пошхурии СССР ва сари қудрат омадани Елтсин шояд мушкилтарин давраи таърихи Русия бошад. Борис Николаевич, ки аз Вашингтон идора мешуд, комилан кишварро зери султаи ғарбиён бурд ва баъди чанде Русия ба сахттарин буҳрони иқтисодӣ ва сиёсӣ мувоҷеҳ гардид. Замони Елтсин соҳаи саноатӣ ва аграрии кишвар аз ҳам пошид ва давлати вақт, вазифаи муҳофизатии худ ва пеш аз ҳама ҳифзи иҷтимоии шаҳрвандонашро аз даст дод.