Ҳамватанони азиз!

Дар мамлакати мо манбаи асосии истеҳсоли нерӯи барқ оби дарёҳо ба ҳисоб рафта, ҳамасола ҳаҷми истеҳсоли он аз рӯи захираҳои об дар аввали сол ба нақша гирифта мешавад. Ин дар ҳоле, ки захира кардани об дар обанборҳо дар фасли баҳор оғоз гардида, дар фасли тобистон ба анҷом мерасад. Маҷрои оби дарёҳо ва вобаста ба он захира намудани об дар обанборҳо ба тағйирёбии иқлим, шароити обу ҳаво ва омилҳои дигари табиӣ алоқамандии бевосита дошта, пешгӯии ҳолат ва сатҳи оби дарёҳо хеле душвор мебошад.

Тавре ки қаблан ба шумо иттилоъ дода будем, маҳз бо таъсири омилҳои зикршуда, яъне камшавии захираҳои об дар ҳавзаи ташаккулёбии дарёи Вахш дар соли сипаришуда ба нақшаи таъмини соҳаҳои иқтисодӣ ва иҷтимоии мамлакат бо нерӯи барқ мушкилоти зиёд овард. Вобаста ба ин, ҳанӯз 28 июли соли 2020 Ҳукумати Ҷумҳурии Тоҷикистон дар “Муроҷиатнома ба мардуми Тоҷикистон” сокинони мамлакатро ба яке аз роҳҳои асосии ҳалли мушкилоти баамаломада - сарфакории нерӯи барқ даъват намуд.

Дар баробари ин, аз тарафи Ҳукумати Ҷумҳурии Тоҷикистон ва Ширкати “Барқи Тоҷик” низ ҷиҳати қонеъ гардонидани талаботи аҳолӣ ва иқтисодиёти миллӣ ба барқ як қатор чораҳои таъҷилӣ андешида шуданд. Аввалан, пеш аз муҳлатҳои дар шартномаҳои байнидавлатӣ зикршуда интиқоли нерӯи барқ ба кишварҳои ҳамсоя қатъ карда шуд.

Бо сабаби сардиҳои шадиди оғози фасли зимистон ва тӯлонӣ пешбинӣ шудани сардиҳои имсола, хавфи нарасидани захираи об то охири зимистон дар обанбори нерӯгоҳи барқи обии “Норак” пеш омадааст. Ҳоло сатҳи обанбори нерӯгоҳи барқи обии “Норак” дар муқоиса бо ҳамин давраи соли гузашта чор метр паст аст.

Дар Тоҷикистон дар солҳои соҳибистиқлолӣ иқтидорҳои нави энергетикӣ бунёд ва як силсила нерӯгоҳҳои мавҷуда таҷдиду навсозӣ карда шуданд. Вале захираи об дар кишвари мо то ҳанӯз фақат ҳамин обанбори нерӯгоҳи барқи обии “Норак” мебошад. Илова бар ин, Маркази барқу гармидиҳии дуюми шаҳри Душанбе, ки он бо муваффақият фаъолият дорад ва ду агрегати нерӯгоҳи “Роғун” муназзам кор карда истодаанд. Вале дар баробари ин талабот ба барқ дар мамлакат сол то сол меафзояд.

Ҳамватанони муҳтарам!

Ҳоло вазъият ҷиддист ва эҳтимоли то баҳор нарасидани захираҳои об ба миён омадааст. Аз ин рӯ, лозим меояд, ки чанд муддат дар кишвар - дар он мавзеъҳое, ки биноҳои баландошёна мавҷуд нестанд ва имкони истифодаи дигар манбаъҳои гармӣ мавҷуд аст, интиқоли барқ маҳдуд карда шавад. Маҳдудият аз рӯзи 5 январи соли 2021 асосан шабона ҷорӣ гардида, аз соати 23-00 шаб то соати 06-00 субҳ идома меёбад. Мо бовар дорем, ки ҳамватанони гиромӣ моро дуруст мефаҳманд, ки ин тадбир аз рӯи зарурат мебошад. Мақсад аз он пешгирӣ намудан аз пурра сарф шудани захираҳои об буда, дар сурати гарм омадани моҳҳои минбаъдаи зимистон, зиёд гардидани сатҳи об дар маҷрои дарёи Вахш ва захираи оби обанбори “Норак” имкони бекор кардани маҳдудият ба назар гирифта шудааст.

Ҳамватанони азиз!

Ширкати “Барқи Тоҷик” ҳеҷ гоҳ хоҳишманди маҳдуд кардани интиқоли барқ ва бебарқ гузоштани мардум нест. Вале имрӯз вазъият ҳаминро тақозо менамояд.

Аз ҳамаи муштариён хоҳиш менамоем, ки дар ин вазъият низ дар ҷои кор ва дар манзилҳои истиқоматии худ аз барқ сарфакорона истифода баранд ва дар бобати таъмини бештари кишвар бо нерӯи барқ саҳми худро гузоранд.

Ширкати “Барқи Тоҷик”

Президенти Россия Владимир Путин, аз ВҲФ (МЧС)-и кишвараш барои саҳми арзанда гузоштан дар мубориза бо коронавирус изҳори қадрдонӣ намуд.                                             

 Путин кормандони ин ниҳодро барои кори самаранокашон дар соли ҷорӣ ташаккур гуфт. ВВП аз ҷумла кори хуби наҷотдиҳандагонро ҳангоми рафъи пасомадҳои сел ва тӯфон дар Шарқи Дур, рехтани сӯзишвории дизелӣ дар Норилск ва дигар ҳолатҳои фавқуллодда қайд карда, онҳоро барои кори ҳирфаияшон қадрдонӣ намуд. Президент дар баробари ин, саҳми арзандаи наҷотдиҳандагонро дар мубориза бо коронавирус қайд кард. 

- Салом СССР-и азиз! Дар маркази вилояти номдори Хатлон аз чӣ сабаб бошад, ки мағозаи фурӯши китобҳои бадеӣ, иқтисодӣ, илмӣ-техникӣ ва дигар ҷабҳаҳои илми муосири имрӯза, фаъолият надоранд.  Дар замони ҷаҳонишавии тамаддунҳо китобҳои бадеӣ, илмию техникӣ дар тамоми ҷабҳаҳои ҳаёти иҷтимоӣ ва иқтисодӣ дар сатҳи ҷаҳони муосири пазируфташударо мутолиа кардан, ҳамчун боду ҳаво лозим аст. Вагарна тамаддунофаринии мо ба садое дар биёбон шабоҳат дорад. 

 Ҳоло нархи китоб ба осмон дакка хӯрдааст, хонандаи китоб асосан зиёиён мебошанд, онҳо ба табақаи миёнаҳол шомил нестанд ва даромади моҳонаашон сабади истеъмолиро гоҳо таъмин мекунад гоҳо не. Оё вақти он нарасидааст, ки лоақал 50 % нархи китобҳоро аз буҷҷа ҷуброн намоянд. Ин иқдоме мешавад, ки мардум ба мутолиа рӯ оваранд.

 Меҳмонҳои хориҷию ватанӣ вақте, ки ба ш.Бохтар меоянд, аз суроғаи мағозаи фурӯши китобҳои дар сатҳи ватанию хориҷӣ пазируфташуда, пурсон мешаванд. Оё масъулони бахши китобу фарҳанги вилоят ва МИҲД ш.Бохтар аз ҷаҳонишавии тамаддунҳои ҷаҳони муосир бехабаранд? 

Сангалӣ Раҳимзода, 

корманди шоистаи Тоҷикистон

 Ҳокими Сафар, мухлис ва муаллифи доимии газета аз н.Файзобод занг зада (тел: 93 707 38 67), аз хизматрасонии ширкати Тселл шикоят намуд.

- Ширкати Тселл бо маънои томаш пулхӯраки мардум шудааст. Моҳи октябр ба телефони мобилиам, ки рақамаш 937073867 мебошад 20 сомонӣ пардохт кардам, аз байн 2 рӯз нагузашта, аз ширкат занг зада, иброз намуданд; лутфан пешпардохт намоед! Аҷабо, гуфтам, наход дар 1 шабонарӯз 20-сомонии пешпардохтам тамом шуда бошад? 3 декабри соли 2020 ба ҳамин ширкат 10-сомонӣ пешпардохт намудам, ба телефонам 8 сомонӣ гузаштаасту 2 сомонии дигараш ғайб зад. Оё ҳастанд назоратчиёне, ки ин ширкатро назорат кунанд?

   Вақтҳои охир теъдоди шахсоне, ки баъд аз сафар тариқи роҳи Душанбе – Чанок арзи сипоси хешро ба роҳбарият ва кормандони филиали ширкати “IRS”  барои масъулиятшиносӣ мерасонанд, тамоюли афзоишро касб намудааст. 

  Зеро онҳо шоҳиди ҳол мешаванд, ки тадбирандешиҳо дар роҳи мазкур хеле зиёд буда, филиали ширкат рисолати хешро дар сатҳи хуб ва сифати баланд ба ҷо оварда истодааст.

   Тавре ҳамватанони азиз иттилоъ доранд, дар чандин қитъаҳо роҳ пурра фурӯ рафт. Масъулиятшиносиву поквиҷдонӣ ва пойгоҳи пурқуввати техникӣ замина фароҳам овард, ки дар робита ба ҳолати баамаломада филфавр тадбирандешӣ шавад. Ин дар ҳолест, ки дар дигар роҳҳои мамлакат бар асари монеаи ҷузъӣ  рӯзҳои зиёд  ҳаракати воситаҳои нақлиёт қатъ мегардад.   

  Замони мавҷуд набудани роҳи муносиб дар ин самт истифодабарандагони роҳ ҳамарӯза бо мушкилоти зиёд дучор гашта, шумораи зиёди одамон ҳатто ҷонашонро аз даст додаанд. Имрӯз бо  шарофати фаъолияти «IRS», фароҳам омадани шароити муносиб чунин хатарҳо бартараф шуда, аҳолӣ  тамоми сол аз истифодаи роҳи автомобилгарди ба меъёрҳо ҷавобгӯ бархӯрдор аст. Пас, магар аз рӯи инсоф аст, ки ин омилҳоро нодида гирем? 

  Аз ҷониби дигар, вазъи ногувори роҳ боиси он мегардид, ки ронандагон хароҷоти зиёдатӣ намоянд. Барои мисол, бо сабабҳои фавқ мошинҳо сарфи назар аз сабукрав ва ё боркаш буданашон, зуд – зуд вайрон шуда, боиси нороҳатӣ ва хароҷоти зиёдатӣ мегардид. 

   Дар ёд дорем, ки бо мавриди истифода қарор гирифтани механизми институтсионалию инноватсионии истифодаи пулакии роҳи автомобилгарди Душанбе-Чанок баъзе «дӯстон» пешгӯӣ карданд, ки нархи роҳкиро дар масири мазкур баланд мегардад. Хушбахтона, ин «фолбинӣ»-и онҳо ғалат баромад ва нархи роҳкиро  хеле арзон шуд.

   Ҳамрадиф бо ин, қаноатмандии шаҳрвандон  ба тавсеаи таъмиру таҷдиди роҳ, мавриди истифода қарор гирифтани плазаҳои нав, коҳиш ёфтани шумораи плазаҳо, аз байн бардоштани дидбонгоҳҳои БДА ва ғайра рабт дорад.Азбаски механизми толлингии идоракунии роҳҳо барои минтақа иқдоми нисбатан нав аст,  роҳбарият ва кормандони  “IRS” баъзан бо фаҳмиши нодуруст, арзу шикоятҳо ва изҳороти дурушт дар мавриди фаъолияти ширкат рӯ ба рӯ мешаванд. Биноан, бо мақсади муайян сохтани талаботи истифодабарандагони роҳ аз ҷониби Ширкат дар ҳар хати ҳаракати назди плазаҳои толлингӣ сандуқҳо барои арзу пешниҳодҳо гузошта шудаанд. 

  Ҳоло ҳар як истифодабарандаи роҳ метавонад пешниҳоду эродҳои худро ба таври хаттӣ баён намуда, дар сандуқи яке аз плазаҳои толлингии Ширкат гузорад. Илова бар ин, хати доимоамалкунандаи филиали  Ширкат – 487011020 низ фаъол буда, дилхоҳ мусофиру ронанда метавонад шабонарӯзӣ занг зада, хоҳишу дархост ва эроди худро пешниҳод намоянд.     

   Бо хулоса аз корҳои анҷомёфта метавон гуфт, ки мавҷудият ва фаъолияти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон  ба манфиати кор буда, маҳз ба шарофати фаъолияти пурмаҳсули кормандони он рафтуомади шаҳрвандон аз тариқи Душанбе – Чанок дар ҳама фасли сол таъмин аст.   

Маркази матбуоти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон