Ғолибони озмуни IX-уми байналмилалии МАГ «Шаҳр дар оинаи ВАО-2020», ки аз ҷониби Ассамблеяи байналмилалии пойтахтҳо ва шаҳрҳои калон дар доираи Форуми байналмилалии «Мегаполиси асри XXI» баргузор гардид, бо Дипломҳо сарфароз гардонида шуданд. 

 Маросими супоридани ҷоизаҳо ба муаллифони мақолаҳое, ки дар Нашрияи Ҳукумати ҶТ "Народная газета" чоп шуда буданд, рӯзи 27.04.2021 дар редаксияи ин газета баргузор гардид. Маҳбуба Камолова, сармуҳаррири нашрия ба муовини директори Маҷмааи рӯзномаю маҷаллаҳои «Шарқи озод»-и Дастгоҳи иҷроияи Президенти ҶТ Умар Шерхонов, ки барои мақолаи таҳти унвони «Дили модар» дар номинатсияи «Ғалабаи бузург-75 сол. Мо дар ёд дорем ва фахр мекунем!" ҷойи дуввумро сарфароз гардид, Дипломи дараҷаи 2-юмро супорид. 

Бо ҳамин гуна Диплом муҳаррири шуъбаи нашрияи “Народная газета” Лутфия Эшонқулова барои мақолаи "Қаҳрамонони ин баҳор" дар номинатсияи "Шаҳри оқил-Шаҳри бехатар" сарфароз гардонида шуд. 

Ҳайати ҳакамон ба мақолаҳои дар газетаи "Народная газета" нашршуда доир ба 75-умин солгарди Ғалаба дар Ҷанги Бузурги Ватанӣ, ободонии пойтахт ва саҳми табибон дар мубориза бо коронавирус баҳои баланд доданд. 

Ёдовар мешавем, ки дар умум нашрия дар ин озмун соҳиби 8 ҷоиза гардид. Аз ҷумла, рӯзноманигори варзида Олег Соболев барои мақолаи худ таҳти унвони "Мо фашистонро мағлуб кардем" дар бахши "Ғалабаи бузург-75 сол. Мо дар ёд дорем ва фахр мекунем! " ҷои аввалро сазовор гашт. Ҷойи аввал бо ӯ ҳамчунин насиби нависанда-рӯзноманигор Владимир Фролов ба мақолаи "Фармондеҳи эскадрони достонӣ аз Дороб" шуд. Аз рӯи ҳамин номинатсия, ҷои дуюмро собиқадори мақомоти амнияти давлатии Ҷумҳурии Тоҷикистон Эркин Муҳиддинов барои мақолаи «Корнамоии ҷовидонӣ», муаллим, доктори илмҳои педагогӣ Умарҷон Юлдошев - «Корнамоии табибон дар давраи Ҷанги бузурги ватанӣ" ва Арбоби ҷамъиятии Ҷумҳурии Тоҷикистон Рафиқа Мусоева - "Таърихи сарбоз " сарфароз гардиданд. Инчунин, хабарнигори нашрияи “Народная газета” Сайидо Назаров бо мақолаи "Душанбе-шаҳри ҷаҳон" дар номинатсияи "Шаҳри оқил-шаҳри бехатар" мақоми аввалро соҳиб шуд.

Муборак бошад. Ҳамкорони азиз!

СССР

Сокинони маҳаллаи Ҳуснободи шаҳри Душанбе мегӯянд, пас аз се моҳи тахриби чанд манзил дар ин маҳалла, мақомоти ҳифзи ҳуқуқ дигарбора ба вайрон кардани манзилҳояшон шурӯъ намудаанд.

Рӯзи 21-уми апрел хонаи як сокини ин маҳалла аз сӯи кормандони мақомоти маҳалливу ҳифзи ҳуқуқ вайрон карда шуд ва ба чанде дигар ҳушдор додаанд, ки манзилҳояшон тахриб мешавад.

Ҳарчанд сокинон гуфтанд, дар даст ҳуҷҷатҳои расмӣ доранд, вале масъулон мегӯянд, хонаҳо худсарона ва ғайриқонунӣ бунёд шудаанд.

"Чаро заминро фурӯхтед?"

Фарзона Бобоева, сокини Ҳуснобод рӯзи 21-уми апрел ба сахтӣ тавонистааст аз тахриби манзилаш пешгирӣ кунад. Ӯ дар сӯҳбат ба Радиои Озодӣ гуфт, як гурӯҳ аз кормандони мақомот ба манзилаш омада, аз ӯ хостаанд, аз хона барояд, ки онро чаппа мекунанд.

"Гуфтам, чаро чаппа мекунед? Посух доданд, ки ин хона ҳуҷҷати қалбакӣ дорад, гуфтам, агар чунин аст, пас чаро дар вақташ ҳуҷҷати қалбакӣ карда мефурӯшед? Ҳашт сол мешавад кор карда, ду ҳуҷраашро ба зур сохтем, шавҳарам дар Маскав кор мекунад, ки хонаро пурра бунёд кунем, чаҳор фарзанди хурд дорам, гуфтанд, “ин гапҳо барои мо афсона аст”. Маро аз дари хона ба дарун партофтанд, даромада кӯдакҳоямро диданд, баромаданд. Дар ҳузури кӯдакон бо ман муносибати дағалона карданд, гуфтанд, ки боз омада чаппа мекунем",--афзуд, Фарзона Бобоева, сокини Ҳусунобод.

Ҳуснобод, як маҳаллаи навбунёдест, ки дар теппаҳои шимоли Душанбе қарор дорад. Қаблан ин заминҳо тобеи ҷамоати Чоряккорони ноҳияи Рӯдакӣ буд ва ду сол қабл қисми зиёди он ба ихтиёри ноҳияи Синои шаҳри Душанбе гузашт. Сокинонаш мегӯянд, чанд сол боз дар ин маҳалла ба сар мебаранд, вале аз одитарин шароит, ба мисли дастрасӣ ба обу мактаб, бархурдор нестанд.

Ҳушдорҳои батакрори мақомот ва нигаронии сокинон

Санифа Олимова, сокини дигари Ҳусунобод, рӯзи 22-юми апрел ба Радиои Озодӣ гуфт, онҳо обро мехаранд ва фарзандонро ба маҳаллаҳои дигар ба мактаб мефиристанд. Мусоҳиби мо таъкид намуд, ки ҳушдорҳои батакрори мақомоти маҳалливу ҳифзи ҳуқуқуқ дар мавриди тахриби хонаҳояшон, онҳоро нигарон намудааст.

"Мо аз зуромад ин ҷо истодаем, ба мо ҳуҷҷат доданд, мо ин заминро харидаем, чанд бор омаданд, гуфтанд, чаппа мекунем. Чаро дар вақташ сахт нагирифтанду фурӯхтанд ва имрӯз мегӯянд, ғайриқонунист, агар чаппа кунанд, бо ин фарзандони хурдам ҷое барои рафтан надорам",--гуфт, Санифа Олимова.

Чанде аз сокинони дигар гуфтанд, масъулони ҷамоати Чоряккорони ноҳияи Рӯдакӣ дар гузашта аз бунёди манзилҳояшон хабар доштанд, вале чизе нагуфтанд.

"Он вақт ман раис набудам"

Айни чунин савол ба Зоиршоҳ Гулов, раиси ҷамоати Чоряккорон дода шуд ва ӯ посух дод, ки замони бунёди манзилҳои баҳснок раҳбарии ҷамоатро бар дӯш надошт.

“Ман нав омадаам, он вақтҳо ин ҷо набудам, барои ҳамин намедонам",--гуфт ӯ.

Гулов гуфт, сокинон манзилҳои худро бидуни ҳуҷҷатҳои тасдиқкунанда ва ғайриқонунӣ сохтаанд. Аммо чанде аз ҳамсуҳбатон гуфтанд, "қарори сохтмону техпаспорти хонаҳояшонро доранд." Ба қавли раиси ҷамоат, дар ҳудуди заминҳои баҳсноки маҳалла тақрибан 20-30 оила зиндагӣ мекунад.

Нигаронии сокинон аз таҳдиди тахриби манзилҳояшон дар ҳолест, ки мақомоти ҳифзи ҳуқуқ рӯзи 21-уми январи имсол чанд хонаи навсохтро дар маҳаллаи Ҳуснобод пурра вайрон карда буданд. Он замон чанд сокини ин маҳалла ба Радиои Озодӣ гуфтанд, беш аз 15 хонаи навбунёд тахриб карда шудааст. Ба иттилои онҳо, дар ин маърака кормандони додситонӣ якҷо бо чанд маъмури милиса иштирок карданд.

Он замон ҳамсӯҳбатони мо дар мақомоти шаҳри Душанбе гуфта буданд, ки мувофиқи тарҳи генералии пойтахт дар заминҳои маҳаллаи Ҳусунобод бояд арча ва дарахтони дигари ороишӣ шинонда шавад, чун барои бунёди хона мувофиқ нестанд.

Пеш аз тахриб санадҳоро меомӯзанд

Сокинон бо таваҷҷӯҳ ба он ки дар даст санад доранду бо заҳмату харҷи маблағи солҳо ҷамъкардаашон хона сохтаанд, аз мақомот талаб доранд, ба тахриби манзилҳояшон хотима диҳанд. Дар ҳамин ҳол, як намояндаи Кумитаи замин, ки нахост номаш бурда шавад, гуфт, тахриби ҳар як манзил дар алоҳидагӣ мавриди омӯзиш қарор мегирад, ки то куҷо санадҳои соҳибони манзилҳои баҳснок қонунист.

Шикоятҳо аз вайрон намудани манзили сокинон дар гузашта низ борҳо садо додааст.

Додситонии кулли Тоҷикистон қаблан хабар дода буд, ки дар соли 2020 барои фурӯши замин ва пешниҳоди ҳуҷҷатҳои қалбакӣ нисбат ба 296 мансабдор парванда кушоданд.

Ориф Хоҷазода, раиси Кумитаи замин ва геодезии Тоҷикистон моҳи феврали имсол дар як нишасти матбуотӣ мавридҳои фурӯши заминро тасдиқ кард ва онро "ҳақиқати талх" номид.

Мавзӯи тақсими ноодилонаи замин барои бунёди хона ва бо гузашти солҳо тахриби онҳо, солҳо боз дар Тоҷикистон доғ мемонад. Ҳарчанд раҳбарияти Кумитаи замин мегӯяд, назоратро пурзур намудаанд вале дар гузашта коршиносон борҳо таъкид намудаанд, ки вуҷуди омилҳои фасод, набуди шаффофияту назорати ҷиддӣ, аз омилҳоянд, ки боиси тақсими ғайриқонунии қитъаҳои замин ва баҳс миёни сокинону мақомот шудааст.

Алишер Зарифӣ

Амриддин Олимов

Президенти Беларус Александр Лукашенко изҳор намуд, ки мақомоти қудратӣ гурӯҳеро дастгир кардаанд, ки мехостанд ба ҷони ӯ ва фарзандонаш сӯиқасд намоянд. Лукашенко дар ин бобат аз ҷумла гуфт: «Онҳо мехостанд фарзандони маро, ҳар кадомеро, ки битавонанд рабуда, дар таҳхона нигаҳ доранд. Мо гурӯҳро дастгир кардем ва онҳо ҳамаи нақшаҳояшонро ифшо намуданд».                                                  Ба гуфти Лукашенко, ба ин кор хадамоти ҷосусии ИМА даст дорад ва ин нақшаро онҳо кашидаанд. Ӯ инчунин қайд кард, ки гумонбарони ин суиқасд дар Маскав дастгир шуданд. 

PS: Маълум нест, амрикоиҳо чи падаркуштагие бо фарзандони Лукашенко доштаанд, ки онҳоро ҳам ба марг маҳкум кардаанд? Ё шояд Батко каме муболиға мекунад??? 

Дар рӯзҳои таҷлили иди Наврӯзи байналмилалӣ сокинони якчанд деҳаи Ҷамоати деҳоти Заргари ноҳияи Кӯшониён соҳиби мактаби наву замонавӣ гардиданд. Бояд гуфт, ки солҳои дароз фарзандони сокинони деҳаҳои А.Ҷомӣ, Обшорон ва қисман Заргар барои таҳсил ба муассисаҳои таълимии №9 ва №10, ки аз ин деҳаҳо дар масофаи зиёда аз 4-5 км дур ҷойгир мебошанд, мерафтанд. Дурии мактаб барои кӯдакони ин деҳаҳо хавфи калон дошта, боиси садамаҳо бо иштироки хонандагон мегардид. 

 Мактаби нав аз 1 бино бо 2 қисми 4-ошёна ва 23 синфхонаи таълимӣ барои 1240 хонанда дар 2 баст, иборат буда, дорои синфхонаҳои муҷаҳҳази фаннӣ, лабораторияҳои фаннҳои физика ва химия, синфхонаи омодагии ибтидоии ҳарбӣ, синфхонаҳои технологияи иттилоотии коммуникатсионӣ, китобхона, толори варзишӣ, маҷлисгоҳ, ошхона, утоқҳои кории омӯзгорон мавҷуд буда, ҳамчунин дар саҳни он майдончаҳои футбол, волейбол ва баскетбол, боғи дарахтони мевадиҳанда, бунёд шудааст.

Кишоварзӣ-маҳаки рушди ноҳия

Мавриди зикр аст, ки ноҳияи Кӯшониён яке аз ноҳияҳои калони кишоварзии ҷумҳурӣ буда, дар ин самт пешқадам аст. Мо чанде пеш меҳмони деҳқонони хоҷагии тухмипарварии «Ҳосилот» ва Кооперативи тиҷоратии «Имоми Аъзам» буда, худ шоҳиди заҳмати имсолаи деҳқонони ин ноҳия гардидем.

Хоҷагии тухмипарварии “Ҳосилот” соли 2005 дар майдони 336 гектар таъсис дода шуда, аз ин шумора 331 гектараш замини обӣ мебошад. Дар масоҳати 0,14 га барои парвариши бодиринг ва қаламфури булғорӣ гармхона, дар 1 га  парваришгоҳи лиму, дар майдони 27,4 га ғалладонагӣ, 10,8 га картошка, 4 га полезӣ, 28 га сабзавот ва дар 13,8 га  улуфаи хӯроки чорво кишт намуданд. Дар майдони 5,59 га боғ бунёд гардида, дар он парвариши ниҳоли зардолу, шафтолу ва олу ба роҳ монда шудааст.

 Кооперативи тиҷоратии “Имоми Аъзам” бошад дар майдони 16, 3 гектар таъсис дода шуда, дар майдони 1,2 гектар гармхонаи доимоамалкунанда ташкил кардааст. Дар 20 гармхонаи таъсисдодашуда кишоварзон ба кишт ва парвариши помидор, бодиринг, боимҷон, қаламфури тез ва қаламфури булғорӣ машғуланд.

Ҳаҷми умумии истеҳсоли маҳсулоти соҳаи кишоварзӣ дар н.Кӯшониён дар семоҳаи аввали соли 2021,  49  млн 287 ҳаз. 200 сомониро ташкил дода, нисбат ба ҳамин давраи соли 2020, 4 млн. 328 ҳаз. 100 сомонӣ зиёд иҷро гардидааст ва афзоиш 109,6 фоизро ташкил медиҳад. 

Ҳамзамон кишоварзони ноҳия барои ҳосили соли 2021 дар майдони 1198,5 га ғалладонагӣ, 453  га картошка, 1183,6  га сабзавот, аз он ҷумла 231,5 гектар пиёз, 106 гектар полезӣ ва 483,4  га зироатҳои хуроки чорво кишт намуданд. Дар моҳҳои январ-марти соли ҷорӣ дар ҳамаи шаклҳои хоҷагидорӣ аз майдони 30 гектар 525 тонна сабзавот ва аз майдони 4,77 га гармхонаҳои доимо амалкунанда 60 тонна сабзавот истеҳсол шуда, ҳосилнокии зироатҳо аз гармхонаҳо ба 125,8 сент/га ва аз заминҳо ба 175 сент/га расонида шудааст. 

Дар охир 1 хушхабар, ки бо чашми сар дидам.:Ҳудудан 10 рӯз пас ҳосили нав пурра пухта мерасад ва бозорҳои кишварро деҳқонони вилояти Хатлон бо картошкаву пиёзи нав, қулфинайу бодирингу қаламфури “свежи” таъмин мекунанд. Зимнан, хонандаи гиромӣ, саросема шуда, картошкаву пиёзи бисёр нахаред. Бовар кунед, ки арзонӣ  дар пеш аст. Мо метавонем!

Ҷамилаи Мақсуд, СССР

Душанбе-Ҷ.Балхӣ-Кӯшониён-Душанбе

Оҳ, обшори дидор!

Пагоҳии 11.04.21 ба ҳунарманди арҷманди Тоҷик устод Қиёмидин Чақалзода паём фиристодам. Бо хурсандӣ гуфт:

-Меойӣ?

Гуфтам:

-Бале!

Соат аз 11 гузашта буд, ки занг зад:

-Э бача, куҷо шудӣ?!

Гуфтам:

-Кофарниҳон пушти сар шуд! Файзобода чун дар таги бинӣ мебинӣ.

Хандида гуфт:

-Пиёдаӣ?

Гуфтам:

-Пиёда мебудам, кайҳо мерасидам!...

Ронанда Бобишо ном хушгуфторе будаст, пас аз ин сухан гашти мошинро дигар карду маро рост ба даҳани дарвозаи он дӯсти пуровоза расонд. Бузургвор дами дар интизор буд, хурсанд шуд. Бобишо аз пайи кори худ рафту мо хона даромадем. Нонишаста аз Нурулло Исобоев пурсид:

-Сармаст куҷост? Агар меовардиш, кори хуб мекардӣ! Ёдаш кардем.

Гуфтам:

-Имрӯз дар бозори Маҳмадалии Дарвозӣ дидамаш. Куҳнаколое оварда буд, ниме барои дӯхтану ниме барои фурӯхтан!  Саге ҳам сӯяш наҷакид!

Гуфт:

-О, бача-а! О, наовардиш, сарупойи наваш мекардем!

Гуфтам:

-2 ҳафта пас!

Ҳайрон шуд:

-Чӣ хел?

Гуфтам:

-Охир, моҳи худат даромадаст: 28-ум зодрӯз дорӣ-ку?!

Маҳин хандиду гуфт:

-Ё насиб!

Интизорӣ

Устод ба тиреза нигиристу гуфт:

-Аз ҳамин тиреза чашмам ҳамеша сӯйи дар аст, ку дӯсте биёяд, ки банди дилам бикшояд?

Маро ин сухан ба ёди падари раҳнигарам бурд, ки обашро ҳам баошӣ намехӯрд. Оҳ, падари арҷманд! Рӯзи дароз чашм аз тиреза намеканд...

Ободии хона

Ҳамсари меҳрубонаш бо пазироии хуш дастархон биёросту чун аз дар берун шуд, устод ба ман рӯ овард:

-Сайёд, ободии хонаи ман ҳамин занак аст! Мо марди кӯча будем: ҳамеша дар кору дар гашту гузор. Ин бечора на шаб хоб дошт, на рӯз. Дар ними шаб ҳам, дар дами барфу борону шамолу шӯриш деҳ ба деҳ мегашт, аз беморон хабар мегирифт. Духтури хуб аст! Кору бори хона, парвариши фарзандон, нигоҳубини гову мол... ин ҳамаро саришта мекард. Дар бораи ҳамин ягон чӣ менависӣ?

Даст рӯйи дил бигзоштам:

-Бале!

Ҳамсарашро фарёд карду бо хушнудӣ гуфт:

-Сайёд ягон чияк дар бораи худат менависад, коре, ки ту дар ин зиндагӣ кардӣ, осон нест, қаҳрамонист! Бачаҳову набераҳора гап зан, якҷоя сурат бигиранд... 

Дилбастаи Душанбе

Худаш дар Файзободу ҳушу ёдаш дар Душанбе буд. Бо ҳам дар кӯчаву бозору гулзори Душанбе ҳамеша сайр мекардем. Шеъри устод Бозор Собир “Гулзори Душанбе”-ро ширин замзама мекард:

Чидам гули садбарг зи гулзори Душанбе,

Бурдам ба дари хонаи дилдори Душанбе.

Маҳтоб авезон ба сари шохи чанораш,

Фонуси шаби шоири бедори Душанбе.

Ёди Гурез Сафар

Устод бо меҳр аз хонадони ошноёни суханпарвараш ёдовар гашт:

-Мо бо Ашӯр Сафар хуб ошноӣ доштем. Бо Гурез ҳам куҳна ошноем. Бисёр шоири нағз аст. Файзи додараш ҳам шоири хуб аст. Насиби зиндагӣ бошад, рӯзе Душанбе рафтем, якумин коре, ки мекунем, аз Гурез хабар мегирем. Вай бемор аст. Бузургони мо чӣ нек фармудаанд:

Шикастаустухон донад баҳои мӯмиёиро!

Ёди Сайёфи Мизроб

Устод чун ҳамеша номи Сайёфи Мизробро бо сарафрозию сипоси бисёр ба забон овард:

-Сайёф хуб ҷавонмард аст! Падарша раҳмат! Барои ман додар аст! Чизҳои хуб менависад, мехонам! Гоҳе бисёр сахт менависад, медонам, дилаш месӯзад! Насиб кунад, 1 рӯз редаксияи СССР меравем!

Орзуяш сафаре буд ба Ғарм...

Устод кайҳо орзу дошт, ки бо дӯстони азизи худ - Шодӣ Солеҳу Бозори Раҳим Ғарм равему дар боғи Мирзошои Акобир сайр намоем. Дар ин дидор ҳам аз Камоли Бекзодаву аз Мирзошои боғпарвар ёдовар гашт:

-Камол соз аст? Газетаи Ғарма дар ҳамон солҳои вазнин ҳам чоп кард, офаринаш! Бачаи зӯр аст! 3 сол шуд, ки Ғарм рафтанием, намешавад. Хостем, ки аз боғи Мирзошо ниҳол биёрем, нашуд...

Гуфтам:

-Ғам нахӯр, меваҳоша меорем!

Бо дӯст нишастан аст хубе...

Устод ҷӯраи бачагии худ - Ҷӯрабеки Муминро фарёд кард, ки Сайёд омадаст, биё! Он ошнои қаламӣ фарёдрас будаст, омад. Бисёр хуш нишастему ночор бархестем. Сахт хоҳиш кард, ки шом шудаст, имшаб нишинем. Гуфтам:

-Ягон рӯзи дигар шабнишинӣ меоем! 1 дуо бидеҳ!

Моро аз роҳи дигар суйи берун оварду гуфт:

-Дунё ҳам 2 дар дорад!

Дар бари хонааш чанд беду оби равон буд бо пайроҳаеву бо сабзазори хушнамуд, ки ҳушатро мерабуд.  Устод моро хуш ба оғӯш гирифту ғамгин гусел кард...

Эй дареғ!

Ин дидори вопасин будаст: ҳамагӣ пас аз 3 рӯз - бомдоди 14.04.21 ин дӯсти ширинсухан дида фурӯ баст. Ашки ҷонсӯзи азизонаш дар ҷигари санг нишаст. Осмон ҳам беист мегирист...

Ҷоят биҳишти нозанин бод, эй азизи ҳамешадарёд!

Сайёд ҒАФФОР

16.04.21

Пас аз арзу нигаронии мардум-хонандагони газетаи мардумии СССР вобаста ба қиматии нарху наво дар бозор, мо тасмим гирифтем ба рейд баромада, аз 2 бозори калонтарини ш.Душанбе-“Саховат”-у “Меҳргон” ва бозори хусусии “Сафариён” дидан намоем.

“Сафариён”: “Хоҳед харед-нахоҳед нахаред!”

Тибқи мушоҳидаҳои мо нархи маҳсулоти ниёзи аввалия дар бозор воқеан гарон шудааст. Дар бозори “Сафариён” ҳам мардуми харидор дар назди дӯконҳои гӯштфурӯшӣ аз нархи гарони он гиламанд шуда, бархе бо дасти холӣ мерафтанд. Ба мардуми норизо гӯштфурӯшон мегуфтанд “хоҳед харед, нахоҳед нахаред!”...

Дар бозори “Сафариён” қимати 1 кило гӯшт 60 сомонӣ, кӯфтаи гӯшти гов (фарши аслан аз  каллаи гов)-40 сомонӣ, каллаю почаи гов-40 сомонӣ арзиш дошт. Нархи  орди навъи 1-ум дар ин бозор 240 сомонӣ буд...

Нархи 1 халта орди навъи 1-ум дар бозори “Меҳргон”- 235-240 сомониро ташкил намуда, арзиши равғани 5 литраи растанӣ, аз он ҷумл “Олейна” то ба 145 сомонӣ дакка хӯрдааст. 1 кило гӯшти гов 60 сомонӣ буда, ба мардуми харидор қассобон, чун дар Сафариён 1 посух доштанд:

 “Хоҳед харед, нахоҳед нахаред!”

“Саховат”: ҳаёҳӯй нест

Дар бозори дигари пойтахт- “Саховат” нархи 1 кило гӯшти гов 55 сомонӣ буд, вале харидор надошт. Назди дӯконҳои гӯштфурӯшӣ мо на издиҳоме дидем ва на ҳаёҳӯйе. Ажиотаж нест! Ё харидор ахиран баақл шудаву телатумбак карда нархро намевардорад дигар, ё...пул надорад...

Сайвалӣ Сабзаев, директори КВД “Бозори “Саховат” зимни сӯҳбат бо мухбири мо афзуд, ки маъмурияти бозор 1 моҳи ахир нархи маҳсулоти ниёзи аввалияро ба танзим даровардаанд, вале омилҳои беруна ва худи мардум метавонанд дар арафаи ид бо ҳаёҳӯй боиси боло рафтани нархи гӯшту равғану орд шаванд. 

Арзиши маҳсулоти дигар, амсоли орду равған, картошкаву пиёз, сабзавоти барвақтӣ дар инҷо назар ба бозорҳои “Меҳргон”-у “Сафариён” арзонтар ба чашм мерасид.

Дар бозори “Саховат” нархи 1 халта орди навъи 1-ум 220-230 сомонӣ, равғани 2 литраи растанӣ-46-48 сомонӣ, 1 кило шакар-9 сомонӣ, картошка-4-4,40, пиёз 1,20-1,60 сомонӣ, 1 кило бодиринг 10 сомонӣ арзиш дошт. 1 кило дилу ҷигару каллаю почаи гов дар ин бозор 35-40 сомониро ташкил менамуд.

Назорати бозор дар дасти кист?

Нархи маҳсулоти ниёзи аввалия дар бозорҳои кишвар имрӯз ба маротиб боло рафтаву боиси нигаронӣ ва норизоии мардум шудааст. Воқеан ҳам, чаро мақомоти дахлдор, аз он ҷумла Хадамоти зиддиинҳисории назди Ҳукумати ҶТ, ки танзими нарху наво вазифаи ҷониаш аст, барои коҳиш додани нарх коре намекунад? Ё мекунаду намегӯяд? Агар мекард, мардуми харидор кори онҳоро бо чашму харҷи кисаи худ ҳатман медиду эҳсос мекард! 

Ва ё то кай савдогарони беэмони мо-“паразитҳои бозор” (ибораи дӯстдори М. Убайдуллоеви номӣ) бо баҳонаи болоравии қурби доллари ИМА, пандемияи коронавирус, кам шудани воридоти маҳсулот, хосса орду равғани растанӣ, аз вазъи имрӯзаи мардум суистифода бурда, нархҳоро ба фоидаи худ гарон мекунанд? Чаро мақомоти қудратӣ-Прокуратура, ВКД, КДАМ ва Агентии мубориза алайҳи коррупсия дасти чунин “паразитҳоро” ба қавле намешиканад, то ба мардум ҷабр нашавад? 

Омиронаи Сайёф, СССР

 Исфандиёр Сафаров, сокини н. Файзобод (тел: 93 930 6838) меҳмони редаксияи мо шуд ва гуфт: 

    - Хондани СССР шахсан маро рӯҳбаланд мекунаду бароям нерӯи тоза ато менамояд. Мақолаҳои СССР воқеан таъсиргузоранд ва дар ҷомеъаи мо бозтоби фаврӣ меёбанд. Барои мисол, ман дар СССР бобати бемасъулиятӣ ва хунукназарии роҳбарияти собиқи ноҳияи Файзобод мақолае нашр карда будам. Баъди нашри мақола, хушбахтона ҳақ ба ҳақдор расид ва Миралӣ Раҷабзода бо тамоми муовинонаш аз кор рафт. Ин нишонаи он аст, ки СССР дар ҳақиқат рисолати созандагӣ дорад. Ман дар паҳн кардани СССР низ саҳми кӯчаки худро гузоштаам. Ҳамеша 3-4 шумораи онро харидорӣ карда, ба ёру ошноён тӯҳфа менамоям. Имрӯз хушбахтона сафи СССР-хонон дар Файзобод зиёд гардидааст ва умед дорам, ки сафи онҳо боз ҳам бештар хоҳад гашт.  

Моҳи апрел 2 чеҳраи таърихии бисёр муҳим-Владимир Ленин ва Адолф Гитлер таваллуд шудаанд. Ин 2 нафар бо шеваи тафаккур ва хусусиёти амалкардашон, маҳсули замони хеш буданд, аммо ҳар кадом дар тақдири миллати худ ва миллатҳои дигар сахт таъсир гузоштаанд. 

Поярези марксизм дар Россия

Владимир Улянов-Ленин яке аз поярезони марксизм-ленинизм дар Россия ба шумор меравад. Ленин аввалин ҳизби коммунистиро дар ин кишвар роҳандозӣ карда, орзуи Марксу Энгелсро ҷомаи амал пӯшонд.                                                                                 

Қатли бародар

Ленин 22 апрели соли 1922 дар шаҳри Симбирски Россия, дар оилаи хизматчӣ ба дунё омадааст. Падараш бозраси мактабҳои халқӣ ва модараш низ зани таҳсилкарда ба шумор мерафт. Владимир солҳои 1879-1887 дар гимназияи Симбирск таҳсил намуда, онро бо медали тилло хатм кард.                                                                                                 

Лаҳзаи тақдирсоз дар зиндагии Ленин соли 1887 гардид. Дар ин сол ҳукумати вақт, бародари бузурги Ленин Александрро барои ширкат дар қатли император Александри III-юм ба қатл маҳкум кард. Марги бародар таъсире сахте дар Владимири ҷавон гузошт ва роҳи ояндаи ӯро муайян кард. 

Соли 1887 Ленин ба факултаи ҳуқуқшиносии Донишгоҳи давлатии Қазон дохил шуд, аммо бо сабаби ширкат дар тазоҳуроти донишҷӯён, баъди 1 сол аз Донишгоҳ хориҷ гардид. Аммо Володяи ҷавон рӯҳафтода нашуда, ҳуҷҷатҳояшро ба Донишгоҳи Санкт-Петербург супорида, соли 1891 ба таври экстернӣ факултаи ҳуқуқшиносии онро хатм мекунад. Соли 1895 бо иштироки бевоситаи Ленин дар Петербург "Иттиҳоди мубориза барои озодии синфи коргар" созмон дода шуд, ки аввалин ташкилоти марксистӣ дар Россия ба шумор мерафт. Барои ин кораш Ленинро ба ҳабс гирифта, ба муҳлати 3 сол ба деҳаи Шушинскоеи Сибир бадарға карданд. Дар ин бадарға Ленин бо Надежда Крупская ошно шуда, Крупская то охири ҳаёти доҳӣ ёвар ва ҳаммаслакаш гардид.                                                                                                                                                                                                                            

Тахаллуси тасодуфӣ

Соли 1900 Владимир Ленин Россияро тарк карда, ба Аврупо рафт. Ӯ дар Олмон, Англия ва Шветсария зиндагӣ карда, дар он ҷо бо Г.Плеханов ошно мешавад. Плеханов ҳам яке аз шахсиятҳои инқилобии рус ба шумор рафта, нақши зиёде дар ҳаёти Ленин бозидааст. Маҳз бо кӯмаки Плеханов Ленин аввалин нашрияи умумируссиягии марксистӣ "Искра"-ро нашр кард.                                                 

Пайдоиши тахаллуси Ленинро низ ба ҳиҷрати аввалини ӯ рабт медиҳанд. Бори аввал ин тахаллус соли 1901 садо дод, вале то ба ҳол пайдоиши ин тахаллус номаълум боқӣ мондааст. Баъдан аз зани Ленин борҳо бобати ин тахаллус пурсида буданд, аммо Надежна Константиновна ҳамеша посух медод, ки сабаби аслиашро намедонад. Ба андешаи ӯ шавҳараш тасодуфан тахаллуси Ленинро интихоб намудааст.

Номзад ба ҷоизаи Нобелӣ

Соли 1903 дар Анҷумани II сотсиал-демократҳои рус Ҳизби состиалистон ба 2 шоха-меншевикон ва болшевикон тақсимбандӣ гардиду Ленин роҳбарии болшевиконро ба ӯҳда гирифт. Ҳангоми инқилоби аввали рус дар соли 1905, роҳбари болшевикон дар Шветсария қарор дошта, моҳи ноябри ҳамон сол  пинҳонӣ ба Россия баргашт.