Субҳи имрӯз президенти Ҷумҳурии Тоҷикистон Эмомалӣ Раҳмон дар кӯчаи Фотеҳ Ниёзии ш.Душанбе бинои нави Раёсати кофтукови ҷиноятии Вазорати корҳои дохилӣ мавриди баҳрабардорӣ қарор дод.
Бинои нави Раёсати кофтукови ҷиноятии Вазорати корҳои дохилии Ҷумҳурии Тоҷикистон, ки аз 5 ошёна иборат аст, дорои 60 утоқи корӣ буда, дар ин ҷо барои фаъолияти ҳамаҷонибаи кормандон тамоми шароити зарурӣ фароҳам мебошад.
Корҳои сохтмонӣ дар бинои мазкур моҳи ноябри соли 2016 оғоз гардида, он аз ҷониби ширкатҳои сохтмонии ватанӣ дар асоси лоиҳаи тарҳрезишуда бо сатҳу сифати баланд сохта ба истифода дода шуд ва ҳамзамон тамоми утоқҳои кории Раёсат бо мебел, технологияи муосир ва дигар дастгоҳу таҷҳизоти соҳавӣ муҷаҳҳаз гардидааст.
Ҳамзамон бинои нав дорои 1 толори маҷлис бо фарогирии 150 ҷойи нишаст, хобгоҳ (казарма) барои 30 нафар афсар, толори варзишӣ ва ошхонаи замонавӣ буда, ҷиҳати пешбурди кор дигар иншооти ёрирасон низ бунёд карда шудааст.
Президенти Ҷумҳурии Тоҷикистон муҳтарам Эмомалӣ Раҳмон ифтитоҳи иншооти замонавиро, ки дар рӯзи 23-юмин солгарди қабули Конститутсияи Ҷумҳурии Тоҷикистон рост омад, барои кормандони Раёсати кофтукови ҷиноятии Вазорати корҳои дохилӣ туҳфаи арзишманди Ҳукумати мамлакат арзёбӣ карда, онҳоро ба хизмати содиқона бар нафъи давлату миллат ҳидоят намуданд.