Аммо Брежнев ва дигарон, ки мехостанд ба ҳар васила Семичастнийро аз роҳбарии ин ниҳод сабукдӯш кунанд, ба зиддияти Андропов эътино накарданд. Бо вуҷуди ин Юрий Андропов 15 сол ба қудратмандтарин ниҳоди СССР сарварӣ кард ва маҳз ишғоли ин вазифа ӯро ба як симои қудратманди ҲК табдил дод. Баъзеҳо ақида доштанд, ки Андроповро духтурон нодуруст табобат карданд ва котиби генералӣ пеш аз мӯҳлат дунёро тарк намуд. Аммо як иддаи дигар, ки миёни онҳо собиқ вазири дифои СССР Устинов, аъзоёни Бюрои сиёсӣ Громико ва Чебриков қарор доранд бар ин ақидаанд, ки Андропов бар асари захми тир аз олам чашм пӯшид. Баъди мурдани Андропов қудратро дар СССР боз командаи собиқи Брежнев дар симои Константин Черненко ишғол кард ва муборизаи тӯлонии Андропов ва Брежнев бо ғалабаи дуввуми поён пазируфт.
Поксозӣ
Давраи Брежневро одатан давраи “тиллоии” СССР ном мебаранд. Аммо дар авохири ҳукуматдории Иличи дуввум вазъияти СССР ба шиддат бӯҳронӣ буд. Тамоми зинаҳои ҳукуматиро фасод фаро гирифта, он дар зинаҳои болоӣ аз ҳама бештар ба назар мерасид.
Вазъият ба ҳадде расид, ки ҳар масъули ҳукуматиро мешуд бо ин айб зиндонӣ кард. Як кофтукоби сатҳии манзили ҳар масъул, фасодкории ӯро ба осонӣ собит мекард. Юрий Андропов баъди марги Брежнев роҳбарияти чунин кишварро ба ӯҳда гирифт. Андропов ба ҳайси сарвари КГБ аз ин вазъ ба хубӣ огоҳ буд ва баъди омадан ба сари қудрат хост ин вазъиятро ислоҳ кунад. Сар то сари кишварро тафтишҳо ва назоратҳо фаро гирифтанд. Дигар касе наметавонист то вақти муайяншуда ҷои кориашро тарк кунад. Мавҷи тозакуниҳо дар зинаҳои болоии ҳукумат ҳам дида мешуданд. Чандин нафар аз масъулини баландпоя худкушӣ карданд. Андропов пеш аз ҳама ВКД-и кишварро мехост поксозӣ кунад. Баъди чанде вазири Корҳои Дохилӣ Шёлоков, ки аз соли 1966 ба ин ниҳоди бо нуфуз сарварӣ мекард ва ҷонишинаш генерал Юрий Чурбанов (домоди Брежнев) ба ҳабс гирифта шуданд.
Суннати роиҷ
Дар Иттиҳоди Шӯравӣ ҳанӯз аз замонҳои Ленину Сталин суннате роиҷ гардида бад, ки манзили истироҳатӣ ба таъбири имрӯза “дача”-и роҳбарони ду ниҳоди қудратии СССР-ВКД ва КГБ дар ҳамсоягии ҳамдигар қарор доштанд. Миёни онҳо ҳатто девори муштарак вуҷуд надошт. Тибқи ин суннат роҳбарони ин 2 ниҳод мебоист бо ҳам дӯсту рафиқ мешуданд ва ҳамсоягӣ ба ин амр кӯмак мекард. Аммо Андропов бо вазири корҳои дохила Шёлоков ҳеҷ гоҳ дӯст нашуданд ва девор низ миёни манзили онҳо, танҳо ба хотири суннати қаблӣ бунёд нагардид.
Андропов бо Шёлоков дар Маскав низ дар як бино ҳамроҳи Брежнев зиндагӣ мекарданд. Андропов як ошёна болотар аз Брежнев истиқомат мекард ва манзили Шёлоков бошад як ошёна поинтар қарор дошт. Зани Шёлоков бошад, дугонаи аз ҳама наздики зани Брежнев буд.
Суиқасд
Баъди ҳабси Шёлоков ва Чурбанов утоқи кории Андроповро ёру ошноҳои вазири собиқ пур карданд. Андроповро илтимос мекарданд аз гуноҳи Шёлоков гузарад. Аммо Андропов андеша дошт, ки Шёлоков милисаи шӯравиро ба “клани мафиозӣ” табдил додасту бояд ҳатман ҷазо бинад. Он рӯзе, ки ин ҳодиса иттифоқ уфтод Андропов дар дачаи худ қарор дошт. Юрий Андропов дар айвони манзилаш китоберо мутолиа мекард. Баъди чанде аз хонаи Шёлоков зане берун шуд ва ҷониби манзили Андропов омадан гирифт. Муҳофизи котиби генералӣ инро дид ва Андроповро огоҳ кард, ки зани Шёлоков бо шумо кор дорад.
“Боз илтимос мекунад” гуфт Андропов ва ба муҳофиз дастур дод, ки монеаш нашавад. Касе аз зани Шёлоков сӯиқасдро интизор надошт ва ӯ наздиктар омада, таппочаашро берун кашид. Мегӯянд Андропов аз дасташ тир хурд. Тибқи назари расмӣ сабаби марги котиби генералии ҲК норасоии кори гурдаҳо буд, аммо ба андешаи ин гурӯҳ маҳз ин захм сабаби вуқӯи ин ҳолат гардид.
Ба андешаи Устинов сӯиқасд ба Андропов дар ҳузури писари дуввуми котиби генералӣ Юра ва котиби аввали кумитаи шаҳри Маскави ҲКИШ Гришин, ки аъзои Бюрои сиёсӣ ҳам буданд, иттифоқ уфтод. Ба ақидаи Устинов маҳз Гришин ба ин дидор пофишорӣ кард ва зани гирёни Шёлоковро ба ҳузури Андропов овард. Аммо роҳбари собиқи КГБ СССР Владимир Крючков, ки он замон сарварии шӯъбаи 4-уми КГБ ро ба ӯҳда дошт ин фарзияро рад мекунад ва мӯътақид аст Юрий Андропов бо марги табиӣ аз дунё рафт. Ба андешаи Крючков котиби генералии ҲК аз гипертония, диабети қанд, дарди рӯдаҳо, артрит, селмонеллёз, шукуфа, ниқриз, норасоии кори гурдаҳо азият мекашид ва дар охир дилаш низ аз кор монд.
Меҳрубон Салимшоев,
Муаррихи СССР
Тел.: 937-77-66-30
