РОҲИ ОҲАНИ ТИРМИЗ – ДУШАНБЕ - СССР

РОҲИ ОҲАНИ ТИРМИЗ – ДУШАНБЕ

Чоршанбе, Июн 01 2022

Смесители для душа и ванны
Детские игрушки, развивающие игры

Принт

4 ИЮНИ СОЛИ 1925 БЮРОИ СИЁСИИ КМ РКП (Б) ДАР БОРАИ СОХТМОНИ РОҲИ ОҲАНИ ТИРМИЗ – ДУШАНБЕ ҚАРОР ҚАБУЛ КАРД.

Сохтмони роҳи оҳани Тирмиз – Душанбе дар мубориза барои роҳсозӣ дар Тоҷикистон нақши бағоят калон бозид. Сохтмони роҳи оҳани мазкурро ҳанӯз дар солҳои 1923 – 1924 Ҳукумати Республикаи Халқии Советии Бухоро ба миён гузошта буд. Ҳайати вакилони РАСС Тоҷикистон дар съезди 1 – уми ПК (б) Ӯзбекистон, 6 – 12 феврали соли 1925 чунин таклиф ба миён гузошта буд.

Ҳукуматҳои РСС Ӯзбекистон ва РАСС Тоҷикистон дар нимаи дувуми моҳи феврали соли 1925 ба Бюрои Сиёсии КМ РКП (б) муроҷиат карда буданд, то ба сохтмони роҳи оҳани Тирмиз – Душанбе иҷозат диҳад ва ёрии зарурии моддӣ расонад.

4 июни соли 1925 Бюрои Сиёсии КМ РКП (б) дар бораи сохтмони роҳи оҳани Тирмиз – Душанбе қарор қабул кард. 16 апрели соли 1926 СММ – и СССР дар бораи сохтмони роҳи оҳани Тирмиз – Душанбе (дарозиаш 225 км) қарор қабул намуд. Сохтмони тамоми роҳи оҳани мазкур барои 4 сол муқаррар гардид.

23 феврали соли 1927 Бюрои Сиёсии КМ ВКП (б) бо сардории Валериан Владимирович Куйбишев «Дар бораи давоми додани сохтмони роҳи оҳани Тирмиз – Душанбе» қарор қабул намуд. Дар ин қарор гуфта мешавад, ки сохтмони роҳи роҳани мазкур дар муддати солҳои 1928 – 1939 ба охир расонда шавад. Ба Комиссариати халқии почтаю телеграф ва Госплани СССР супориш дода шуда буд, ки ин роҳи оҳан ба рӯйхати роҳҳои навбати якум дохил карда шавад.

Дар солҳои 1926 – 1927 ба сохтмон аввалин муҳандисони бинокор ва коргарони баландихтисос омаданд. Сохтмон дар шароити ниҳоят душвор давом мекард.

Аммо бинокорон ҳамаи душвориҳоро бартараф намуда, суръати корро метезонданд.

Зимистони соли 1927 дар қитъаи Сурхон – Шӯрчӣ кор вусъат гирифт. Ҳукумати РАСС Тоҷикистон аҳамияти бузурги роҳи оҳанро барои ҷумҳурӣ ба назар гирифта, аз Совети Комиссарони Халқии СССР илтимос намуд, ки барои соли 1929 ба охир расондани сохтмони роҳи оҳани Тирмиз – Душанбе маблағи зарурӣ ҷудо кунад. 14 сентябри соли 1928 қарор қабул карда, ба Комиссариати халқии почтаю телеграф супориш дода шуда буд, ки сохтмони роҳи оҳанро тезонда то тирамоҳи соли 1929 ба охир расонад.

Бинокорон суръати корро тезонданд ва қитъаи сеюмро сари вақт ба охир расонданд. Дар натиҷа стансияи нави Шӯрчӣ бунёд шуд.

Мувофиқи нақша сохтмони роҳ мебоист то 7 ноябри соли 1929 ба охир расонда мешуд, бинобар ин сохтмон зимистон ҳам давом кард. 25 марти соли 1929 Бюрои Иҷроия ва Комитети партиявии вилоятии РАСС Тоҷикистон маърӯзаи муовини сардори раёсати сохтмони роҳ В. Ҷ. Карамовро дар бораи рафти сохтмон шунид. Онҳо дар назди бинокорон вазифа гузоштанд, ки сохтмони роҳро то 7 ноябри соли 1929 ба охир расонанд. Бинокорони роҳ дар телеграммаи худ ба номи Ҳукумати Тоҷикистон навишта буданд: «Дар маҷлиси умумӣ ваъдаи қатъӣ медиҳем, ки роҳи Тирмиз – Душанберо пеш аз муҳлати муқарраршуда ба истифода медиҳем».

Сохтмони роҳи оҳани Тоҷикистон 2 моҳ пеш аз муҳлат 1 сентябри соли 1929 соати 2 – и рӯз ба охир расид. Соати 3 – и рӯз ба стансияи Душанбе нахустин поезд омад. Ба он В. Ҷ. Қарамов роҳбарӣ мекард. Ба муносибати ба охир расидани сохтмон ва ба Душанбе омадани поезд соати 7 – и бегоҳ митинги меҳнаткашони шаҳри Душанбе ва коргарони роҳи оҳан баргузор гардид.

Сохтмони роҳи оҳани Тирмиз – Душанбе алоқаи иқтисодии Тоҷикистонро бо дигар ҷумҳуриҳои Иттиҳоди Шуравӣ таъмин намуд ва меҳнаткашони Тоҷикистонро бо халқҳои бародарии СССР боз ҳам наздиктар кард.

Умар АЛӢ

23.5.2022