ХАБАРИ ДОҒ
Чоршанбе, Фев 26 2020

Меҳрона Ҳакимова, хонандаи мактаби миёнаи №30-и пойтахт ба идораи редаксияи Газетаи мардумии СССР занг зада хоҳиш намуд, ки дар бораи шустани ҳайкалҳои ш.Душанбе, хосса муҷассамаҳои Исмоили Сомонӣ дар майдони «Дӯстӣ», устод Абӯабдулло Рӯдакӣ дар боғи ҳамноми шоир ва муҷассамаи Абулқосим Фирдавсӣ дар боғӣ ба номи Фирдавсӣ маълумоти бештаре омода намоем. Мо ин дархости хонадаи газетаро пайгирӣ намуда, бо Толиб Раҳимзода, муовини раиси ш.Душанбе оид ба масъалаҳои ободонӣ сӯҳбат намудем.

Зангҳоро пок мекунанд…

Толиб Раҳимзода дар сӯҳбати ихтисосӣ бо мухбири газета иброз дошт, оне, ки мардум фикр мекунанд, ҳайкалҳоро бояд ҳафтае 1 маротиба ва пас аз боридани барфу борон шуст, аслан хатост.

- Ҳайкалҳоро шустан мумкин нест, зеро рангу намуди зоҳириашон метавонад иваз шавад. Муҷассаи Исмоили Сомониро мутахассисон умуман намешӯянд, зеро он аз маҳсулоти хеле ҳам гарон ва нозук бунёд ёфта, шустани он қатъиян манъ аст. Танҳо бо маҳлули махсусе, ки олимони Академияи илмҳои ҶТ тайёр менамоянд, доғҳои занги бархе аз қисматҳои муҷассамаро хеле эҳтиёткорона пок карда мегиранду халос. Муҷассамаи Абӯабдулло Рӯдакӣ ва Абулқосим Фирдавсиро низ ҳамин тавр аз зангу доғҳо пок мекунанд!

Ҳайкалҳоро шустан мумкин нест!

Толиб Раҳимзода мегӯяд, ки ҳайкалҳоро ҳатто тез-тез пок кардан мумкин нест, алалхусус бо маҳлули собуну хокаи шустушӯӣ. 

   - Истифодаи чунин моддаҳо ҳайкалҳоро хароб мекунад. Меъморон ҳангоми эҷоди онҳо иқлим, таъсири обу ҳаво, гармиву сардиро ба назар гирифта, маҳсулоти махсусро истифода мебаранд. Аз ин лиҳоз нигоҳубини муҷассамаву ҳайкалҳо корбарии хосро талаб менамояд ва хар кас иҷозати пок кардани онҳоро надорад, зеро ин ҳам 1 санъати бузург аст. Масъули тозаву озода нигоҳ доштани ҳайкалҳо Раёсатҳои истифодабарии роҳҳо ва ободонии ҳар 1 ноҳияи пойтахт буда, нигоҳубини муҷассамаҳои Исмоили Сомонӣ ва Абӯабдулло Рӯдакӣ бошад, ба мутахассисони Боғи ба номи Устод Рӯдакӣ вогузор шудааст, таъкид дошт муовини раиси ш.Душанбе.

   Тавре огаҳӣ ёфтем дар ҳудуди ш.Душанбе беш аз 50 муҷассамаву ҳайкалу нимпайкара гузошта шудаанду агар шумо гоҳе дидед, ки рӯи ҳайкалҳо паррандаҳо амсоли ҳайкали В.И.Ленин дар гузаштаву Камоли Хуҷандӣ  ва ғ. ва ҳ. «номаъқулӣ» кардаанд, нигарон набошед: мутахассисон медонанд, ки кай ва чӣ гуна онҳоро тоза кунанд.

Ҷамилаи Мақсуд, СССР

 

 

Панҷшанбе, Фев 20 2020

Шахси воқеӣ бо шахси мансабдоре ҷуръат карда, оиди танзим баҳс мекунад.

- Ҳоло инсоф тамоман аз байн рафтааст. Масъулони танзим фақат шахсони воқеиро ғам медиҳанд, ҷарима мекунанд, бо баҳонаи «обунаи рӯзнома» гуфта кисапулӣ мерӯёнанд, ки ин беинсофии маҳз аст.

- Чаро шумо ношукрӣ мекунед? Аз шахсони мансабдору ҳуқуқӣ дида, ба шахсони воқеӣ бештар ғамхорию сабукӣ додаанд.

- Чӣ хел ғамхорию сабукӣ?

- Масъулони қонун агар барои вайрон кардани тартиботи муқаррар намудан қонунгузории Ҷумҳурии Тоҷикистон оиди қонуни танзими анъана ва ҷашну маросимҳо ба шахсони мансабдору ҳуқуқӣ 250-500 ҳадди ақали музди меҳнат ҷарима муайян шуда бошад, ба шахсони воқеӣ 100 ҳадди ақали музди меҳнат. Магар ин ғамхорӣ ва сабукӣ ба шахсони воқеӣ нест?

- Ба шахсони мансабдор ва ҳуқуқӣ 1000 ҳадди ақалӣ музди меҳнат ҷарима муҳаё шавад ҳам, агар онҳо худро шоҳу табъашонро вазир гиранду тағоҳои дастдароз нагузоранд, ки ба мӯйи онҳо хоре халад, ба буҷаи давлат чӣ фоида?

Табаралӣ Авсақолов, узви Ихвон-ал-СССР, н.Фархор 

 

Чоршанбе, Фев 12 2020

 

Қарор аст, ки 1-уми марти соли ҷорӣ дар кишвар интихоботи вакилони  Маҷлиси намояндагони Маҷлиси Олии Ҷумҳурии Тоҷикистон ва вакилони халқи шаҳру ноҳияҳо баргузор гардад. Мувофиқи моддаи 31 Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» ва пешниҳоди Ҳизби Халқии Демократии Тоҷикистон, Ҳизби Аграрии Тоҷикистон, Ҳизби Демократи Тоҷикистон, Ҳизби Ислоҳоти Иқтисодии Тоҷикистон, Ҳизби Коммунистии Тоҷикистон, Ҳизби Сотсиалистии Тоҷикистон ва Ҳизби Сосиал-Демократи Тоҷикистон бо қарори Комиссияи марказии интихобот ва раъйпурсии Ҷумҳурии Тоҷикистон рӯйхати номзадҳои аз тарафи ҳизбҳои сиёсии кишвар пешниҳодшуда ҳанӯз 20.01.2020 тасдиқ карда шуда буд. СССР пайгир шуд, ки ин аҳзоб дар парлумон ҷавон мешаванд ва ё пиртар?

 

70 номзад кист?

 Тибқи рӯйхати тасдиқкардашуда 70 нафар, аз ҷумла аз ҲХДТ-28, ҲАТ-13, ҲДТ-4, ҲИИТ-7, ҲКТ-6, ҲСТ-8 ва ҲСДТ- 8 нафари пешниҳодшуда тасдиқ гардид. 

 Дар интихоби дарпешистода Саймурод Фаттоҳзода, Маҳмадалӣ Ватанзода, Ранохон Бобоҷониён, Насиба Содиқӣ, Дилрабо Мансурӣ, Сумангул Тағойзода, Фирӯза Шарифӣ, Идигул Қосимзода, Хайрулло Амонулло, Саодатшо Матробиён, Абдураҳим Холиқзода, Абдулло Табарӣ, Музаффарҷон Маҳмудов, Файзалӣ Идизода, Муҷибахон Ҷавҳарова, Бибиосия Аюбӣ, Шарофиддин Ҷӯразода, Файзалӣ  Назаров, Тағоймурод Ҳасанзода,  Рухсора Давлатзода, Сафиямоҳ Тешаева, Саёҳат Дадаҷонова,  Ҳабибулло Амирбекзода, Зулфия Давлатзода, Дилноза Аҳмадзода, Бахтиёр  Ҳамдамов, Фирдавс Ёдгорӣ, Фариза Абдуллозода ҲХДТ-ро намояндагӣ хоҳанд кард.

 Рӯйхати баъдиро Рустам  Латифзода, Фазлиддин Икромов, Мансур Усмонов,  Неъматулло Холбойзода, Зайниддин Сафаров, Мирзоанвар Ахмедов, Шодӣ Мӯсозода, Музаффар Мирзозода, Бахтиёр Аҳмадзода, Ҷонона Ҳайдарзода, Нуралӣ Ниёзов, Рупия Сафарова, Раҳмон Зиё ҳамчун  номзад аз ҲАТ, Саидҷаъфар Усмонзода, Диловар Холов, Таваралӣ  Зиёзода, Зӯҳро Мирзоева аз ҲДТ, Рустам Қудратов, Машраб Файзуллоев, Ғиёсиддин Ашӯров, Даринг Раҳмон Ҷаҳон Афруз Қурбонзода, Зафар Ализода, Абдулатиф Раҳимов, Баҳодур Раззоқов аз ҲИИТ, Мироҷ Абдуллоев, Зарагул Мирасанова, Қурбонҷон Мирзоева, Ҳабибулло Ёров, Ҳикматулло Ҳамидов,  Азизҷон Раҳмонов аз ҲКТ давом дода, Абдуҳалим Ғаффоров, Маъруфхуҷа Юсупов, Зариф Наимов, Миҷгона Рустамова, Фаррух Боқиев, Давлатхоним Саидошурова, Наргиза Бобоҷонова, Уғул  Қобилова аз ҲСТ,  Раҳматилло Зойиров, Шокир Ҳакимов, Дилбар Самадова,  Бахтиёр Насруллоев, Нигина Шоназарова, Маҳмурод Одинаев, Қиёмиддин Азизов, Сиддиқ Саидов аз ҲСДТ дар рӯйхати тасдиқшуда ҷой гирифтаанд.

Парламент пиртар мегардад!

 Аз пайгирии руйхати номзадҳо маълумамон гардид, ки  Аҳмадзода Дилноза Давроналӣ 31 сола буда, аз ҳама ҷавонтарин номзад дар интихоботи оянда ба ҳисоб меравад. Амирбекзода Ҳабибулло (41 сола),  Абдуллозода Фариза Саидқул (42 сола), Идизода Файзалӣ Фузайлшо (43 сола), Ҷавҳарова Муҷибахон Одиловна (44 сола) ва Аюбӣ Бибиосия Оймаҳмадзода (44 сола)-ро низ ба руйхати ҷавонон шомил кардан мумкин аст. Номзадҳои дигар ба сини нафақа наздиктаранд. Оё 2- 3 нафар ҷавонон сиёсати ҷавононро дар Парламенти нави тоҷик метавонанд ба пеш баранд? Ба фикри ман не! 

Ба забони дигар метавон гуфт, парлумони мо дар даврони бовар ба ҷавонон ва ҷавонсозии ҳукумат, ҳамагӣ 1 ҷавони он ҳам аз 31 сола боло дошта, пиртар мегардаду ҷавонтар не...

                                                                                                            

Омиронаи Сайёф, СССР

 

Чоршанбе, Фев 05 2020

(Кӣ ба онҳо иҷозаи фаолият додааст?)

Дар яке аз шумораҳои газета мо дар бораи фаъолияти шабонаи тарабхонаи «Караоке «Прайд», ки дар шафати бинои Сирки давлатии Тоҷикистон қарор дошта, мардуми майпарасту ҷанҷоливу занҳои сабукпо онҷо аз поси шаб то субҳи содиқ ҷамъ омада, бо садои баланду гӯшхароши худ ба оромиши сокинони биноҳои ҳамсоя халал мерасонанд, навишта будем. Дар мавриди он, ки мақомоти қудратӣ-Раёсати ВКД дар ш.Душанбе, ШВКД Фирдавсӣ-2, Прокуратураи н.Фирдавсии пойтахт оё нисбати шикояти мо ягон чораандешӣ кардаанд ё не, хабар надорем, зеро аз ин сохторҳои дар боло зикрёфта вокунише ба идораи редаксия ворид нашудааст. Аҷиб аст, ки онҳо ба кӯчактарин матлаби хонандагон эрод гирифта, парванда боз кардаву ҳафтаҳо таштишот мебаранд, лек нисбати шикояте, ки далели ҷиддӣ доштаву шоҳидонаш аз 17 нафар зиёданд, касе лаб во накард… 

    Мо сари ин мавзӯ боз ҳатман хоҳем баргашт, вале бояд ин нуктаро зикр намуд, ки пас аз нашри матлаби танқидӣ дар бораи «Караоке «Прайд» ба идораи редаксия садҳо нафар хонандагон ва сокинони пойтахт занг зада, дар бораи тарабхона, қаҳвахона ва даҳҳо клубҳои шабонаи дигар арзу шикоят карданд.

 «PMS»-бародари «Караоке «Прайд»?

   Давлатмурод Ҷабборов, 1 сокини пойтахт дар бораи тарабхонаи «PMS», воқеъ дар к.Борбади ш.Душанбе ба редаксия шикоят кард. Мавсуф иброз дошт. ки ин қаҳвахона ё тарабхона, ки дар ошёнаи 1-уми бинои истиқоматӣ ҷойгир аст, пас аз соати 21-и шаб ба кор сар карда, то субҳ ба макони айшу ишрат, даъвову додувойи майпарастону занҳои сабукпо ва фисқу фуҷур мубаддал гашта, мардуми маҳал аз дасти ин бетартибиҳо на осоиш доранду на оромиш. Шабе нест, ки дар ин ба ном клуби шабона ҷанҷолу низоъ ба вуқӯъ напайвандаду кӯдакон аз хоб бедор шуда, чунин ҷангҳои бидуни қоидаро тамошо накунанд.    Шикояти чандинкаратаи сокинон ба милисаву прокуратура бенатиҷа монд ва «PMS» ҳанӯз ҳам боз аст.

Иҷозат дар дасти кист?

    Тибқи Фасли 2-юми Қоидаҳои тартиботи ҷамъиятӣ, ободонӣ ва санитарӣ дар ш.Душанбе, бо имзои раиси ш.Душанбе ба тасвиб расида, омадааст, ки «Дар ҳудуди марзиву маъмурии шаҳри Душанбе манъ аст:

а) дар кӯчаҳо, майдонҳо, боғу соҳилҳои фароғатӣ (пляж), нақлиёт ва дар дигар ҷойҳои ҷамъиятӣ, инчунин аз соати 2300 то соати 600 дар хобгоҳҳои умумӣ ва манзили зист доду фарёд кардан, ҳуштак кашидан, бо овози баланд суруд хондан, навохтани асбобҳои мусиқӣ, ба кор андохтан ё истифодаи дастгоҳҳои садотақвиятдиҳанда ё таҷҳизоти таъмирии садобардор, ки боиси халалдор гаштани оромии ҷамъиятӣ мегарданд;». 

Саркашӣ аз ин Қоидаҳо ҷавобгарии маъмурӣ дошта сохторҳои қудратӣ ва назоратӣ барои риояи он муваззафанд. Вақте дастури шахсии раиси ш.Душанбе Рустами Эмомалӣ ҳаст, пас чаро мақомоти қудратӣ ва ниҳодҳои дигари марбута сари ин масъала ҷиддӣ намеандешанд?

 То ҷое хабар дорем барои фаъолияти тарабхона ва клубҳои шабона иҷозатномаи махсус дода мешавад. Мо дунболи ин мавзӯ ҳам ба Раёсати ВКД дар ш.Душанбе ва ҳам ба МИҲД ш.Душанбе муроҷиат намудем, аммо дар ягон сохтор бароямон ҷавоби аниқ ва дуруст надоданд. Пас, кӣ ба чунин тарабхонаҳои кӯчагӣ амсоли «Караоке «Прайд» ва «PMS» иҷозати фаъолияти шабона додааст? 

Зидди клубҳои шабона нестем, аммо…

Дар ш.Душанбе клубҳои шабонаи хеле ҳам хуб, амсоли «Гэтсби», «Гэлекси», «Роял Клаб», «Лофт», «Х.О.» хеле зиёданд ва хизматрасонии онҳо дар дараҷаи олист. Муҳимтар аз ин мо ҳеҷ гоҳ садои мусиқии баланд ва шурӯ мағали мардумро дар чунин ҷойҳо намешунавем, зеро дари онҳо баставу таҷҳизоти садобарории мусиқиашон ҳам тибқи талаботи меъёр асту касеро нороҳат намекунад. Бигузор чунин клубҳо бошанд, вале на клубҳое мисли «Караоке «Прайд»-у  «PMS» ва даҳҳо ба қавле «забегаловка»-ҳое, ки хизматрасониашон бад буда, на шароити хуби мусиқӣ доранду на ошхонаи хуб ва на ба талаботи санитариву эпидемиологӣ ҷавобгӯянд. То он ҳадде шароит надоранд, ки дар фасли зимистон дар ҳарорати -4 низ дар берун караоке гузошта, барои гарм шудани савдои худу мизоҷони майпараст дарёи арақ мерезанд, то каме ҳам бошанд гарм шаванд. Мавзӯро пайгирӣ хоҳем кард. Мо Метавонем!

 

Ҷамилаи Мақсуд, СССР

 

Панҷшанбе, Янв 30 2020

Масали Дер ояду Шеррр ояд, ба Аҳмадӣ Иброҳим дахл дорад. Ӯ дертарак ба журналистика омад, вале ин оламро шуре, таконе, таҳрике дод! Ба ҳар чизе даст зад, муваффак буд. Ёдам ҳаст, вақте ба ҷои Суҳробшои машҳур, Аҳмадро сармуҳаррири Оҷонсии Иттилоотии Хатлон-Пресс мондам, ҳама хайрон шуданд. Гуфтам, ҳоло мебинед, ки Ӯ чи шуре бар меоварад. Ва чунин ҳам шуд!...

Шери нар аст! Вақте хонаашро пок- покиза сел шуст, мерафтаму метарсидам, ки дар чашмонаш ашк мебинам (ман мардони гирёнчакро дуст надорам!). Вале Ахмаддд моро ба дастурхони пурнозу нузи мураттаб аз 2 пора нони хушк, вале хандаи "даҳон то бехи гуш" пешвоз гирифта гуфт: Биёед, мо-кулобиҳо мешканем, вале намерезем!".... Зиёд мехонад ва таҳлилҳояш низ ба умқи асрҳо мебаранд. Журналист аз ин муваффактар намешавад, ки аз корманди одди то сардабири яке аз газетахои фаъоли давр бирасад. Китобҳои таърихияш таккондиҳандаанд. Аз руи онҳо метавон кино сохт!!! 

Сахт миллист! То ҳадде, ки ҳатто манро ҳайрати мекунад. Русиро ба ҳадди Гоголу Пушкин медонад. Зиёдарави накардаам, ман руисро хуб медонам, вале Ӯ русии кадимаро медонад! Забонеро, ки кам урусе медонад. Вале дар ҳама семинархо мегуфту мегуяд, ки "ман намефаҳмам, шумо русзабонон дар бораи матбуоти тоҷики чаро шарм надошта, баҳс мекунед?! О, шумо-ку онро намехонед???".

Усулан грант намегирад аз хоричиҳо-зеро ба тоҷикони асил унҳо пул намедиҳанд! Вале ин ки Газетаи Пайкро ба дахсолаи 2-юм тавонист овардан ва он ҳам дар музофот...кофист, ки ба Аҳмад Хайкал гузорем. 

Неъ! Дар Кулоб не! Дар Душанбе!!! Зеро касе агар имруз арзанда аст, маҳз Ахмад аст!

Зодрузат муборак, дустам. Мо Метавонем!

 

Ҷумъа, Янв 24 2020

    Бо Фармони Президенти ҶТ Эмомалӣ Раҳмон аз 24.01.2020 Боймурод Шарифзода директори Институти забон ва адабиёти ба номи А.Рӯдакии Академияи илмҳои ҶТ таъин гашт.

    Ӯ дар ин симмат Сахидод Раҳматуллозодаро иваз намуд. Гуфта мешавад, ки Сахидод Раҳматуллозода яке аз номзадҳо ба курсии раиси Кумитаи забон ва истилоҳоти назди Ҳукумати ҶТ буда, шояд рӯзҳои наздик ба ин вазифа таъин карда шавад.

 

саҳ 2 аз 54

Китобҳо

Flag Counter