ХАБАРИ ДОҒ
Чоршанбе, Фев 27 2019


1 ҳафта мешавад, ки дар саҳифаҳои сомонаҳои хабарӣ ва шабакаҳои иҷтимоӣ хабаре аз нишасти матбуотии раиси ш.Истаравшан Баҳром Иноятзода дар мавриди баста шудани масҷидҳои ин шаҳр чарх мезанад. Дар ин хабар гуфта мешавад, ки дар тӯли 2 соли охир дар Истаравшан фаъолияти 36 масҷид қатъ гардида, бино ба гуфтаи раиси шаҳр дар соли 2017 фаъолияти 24 масҷид ва дар соли 2018 фаъолияти 12 масҷид қатъ карда шуд. Ин ягон хабари такондиҳанда ва ғайриоддӣ нест, ки боиси сар задани ин қадар ҳаёҳӯй бошад, зеро ҳамасола пас аз санҷишҳои назоратии Кумитаи дин, танзими анъана ва ҷашну маросимҳои назди Ҳукумати ҶТ садҳо масҷиди ба талабот ҷавобгӯ набуда баста ва ба ҷойҳои ҷамъиятӣ мубаддал мегарданд. Ба ин метавонад мисол шаҳри дигари вилояти суғд-Исфара бошад, ки дар муддати 2-3 соли охир фаъолияти 52 масҷид манъ ва ба ҷойҳои ҷамъиятӣ табдил дода шудаанд.
Ҳаёҳӯй-ажиотаж аниқтараш сари гуфтаҳои дигари Баҳром Иноятзода дар мавриди масҷидҳо меравад, ки дар саҳифаи яке аз сомонаҳои хабарии Тоҷик нашр шудааст:-“Касе масҷид даромада бо фикри солим аз он ҷо набаромадааст. Аксар ҷавононе, ки имрӯз ба гурӯҳҳои ифротӣ пайвастанд, ҳамааш аз фикрҳои носолим сарчашма гирифтааст ва ин гуна фикрҳо ҳамааш аз масҷид дар сари онҳо ҷой шудааст. Мо бояд ба ҷои ҷавонони масҷидравро зиёд кардан, сафи донишҷӯён ва кормандонро зиёд кунем. Танҳо соли 2018 1120 нафар ҷавононе, ки ба донишгоҳҳои олӣ дохил шуда натавонистанд, бекоранд. Аз ин рӯ масҷид не, мактабро бояд зиёд кард”-чунин омадааст дар хабар аз номи раиси Иноятзода.
 
Дурӯғи фейкие, ки сенсатсия шуд
Маҳз ҳамин қисмати хабар боиси сар задани баҳсу талош ва ҳатто то ҷое даъво низ шуда, дар сомонаҳои иҷтимоӣ яке дигареро ба қавле «мехӯрд»-дашном медоду таҳдиду таҳқир менамуд ва беш аз ҳама Баҳром Иноятзода мавриди тозиёнаи бештари танқиду таҳқир қарор дошт. Чанд нафар ба идораи ҳафтаномаи мо-СССР низ занг зада фикру ақидаи хешро дар ин бора баён намуданду мо тасмим гирифтем асли воқеаро аз худи Иноятзода пурсон шавем. Раиси ш.Истаравшан дар сӯҳбати ихтисосӣ бо мухбири СССР дар ш.Хуҷанд таъкид намуд, ки гуфтаҳояшро журналистон дигар хел фаҳмидаву навиштаанду эшон зимни ҷавоби худ ба суоли хабарнигорон масҷидҳои дохилиро дар назар надошт.
-Бубинед, дар с.2018 дар ш.Истаравшан 1200 ҷавони бекор ва бе шуғл ба қайд гирифта шуда, аз тарафи МИҲД дар ш.Истаравшан ҳамаи онҳо пайваста ба чорабиниҳои фарҳангиву сиёсии шаҳр даъват карда мешаванд. Пайвастани аксарияти ҷавонони истаравшанӣ ба гурӯҳҳои ифротӣ ҳангоми дар муҳоҷирати меҳнатӣ буданашон сурат гирифтааст. Маълум аст, ҷавон, ки бекор монда, ба муҳоҷирати меҳнатӣ ба хориҷи кишвар меравад, зери таъсири омилҳои гуногун зуд ба доми фиреб афтода, ба ҳар гуна гурӯҳу ҳизбҳои террористиву экстремистӣ ҳамроҳ мешавад. Дур будан аз таҳсилу бекорӣ ва назорати падару модар ҷавононро хеле зуд фирефтаи ҳар гуна таъсири берунаву бегона мекунад ва гоҳо масҷидҳои бархе аз кишварҳои хориҷи наздик-дар ин бора мо ҳамарӯза тавассути воситаҳои ахбори омма мебинему мешунавем, низ маҳз макони ифротгароӣ шудааст, манзури ман ҳамин буд,-гуфт Баҳром Иноятзода.
Воқеан ҳам, мантиқан агар гирем, масҷид ба миллати мо лозим аст, ё мактаб? Мактаб барои ҳар нафар дари илму ҳунар, донишу хирадро боз мекунад. Одам донишманду хирадманд, ки шуд, худ интихоб мекунад, кадом масҷид раваду чӣ кореро сомон диҳад. Ё не? Бедонишӣ дарҳои ифротро ба рӯи мардум мекушояд. Бубинед, ки мусалмонон дар сартосари қораи араб ба ҳамдигар ҷиҳод эълон кардаву хуни муслимин мерезанд. Зимнан, он нафароне, ки дар мантиқи афзоиши мактаб душманӣ бо масҷидро дидаву мардумро таҳрик медиҳанд, худ фанат, мутаассиб ва душмани дини исломанд, зеро пайғамбари мо сареҳатан гуфтааст:
-Аз гаҳвора то гӯр дониш омӯз!
Магар донишро дар мактаб намегиранд? Мактаб душмани масҷид не, душмани ифротгароёну мубаллиғини экстремизм аст. Мо метавонем!

Ҷ.Ҳусейн
СССР, Душанбе-Хуҷанд-Душанбе

Ҷумъа, Фев 22 2019


Парламенти Тоҷикистон дар иҷлосияи ахири худ (20.02.2019) протокол оид ба ворид кардани илова ба созишномаи Тоҷикистону Узбекистон дар бораи гузаргоҳҳои марзии давлатиро ба тасвиб расонд, ки тибқи он гузаргоҳи нави "Ҳисор-Боботоғ" ба унвони 13-умин гузаргоҳ миёни 2 кишвар мавриди истифода қарор мегирад. Генерал-полковник Раҷабалӣ Раҳмоналӣ, фармондеҳи Нерӯҳои марзбонии Тоҷикистон тарҳи протоколи гузаргоҳи мазкурро дар ҳузури вакилони мардумӣ муаррифӣ намуд. Тазаккур бояд дод, ки ин гузаргоҳ дар 60-километрии ғарби ш.Душанбе воқеъ аст ва н.Ҳисорро бо минтақаи Боботоғи вил.Сурхандарёи Узбекистон мепайвандад.

Панҷшанбе, Фев 21 2019


   Тибқи қарори нави Ҳукумати ҶТ, ки санаи 9.02.2019 ба тасвиб расидааст, шаҳрвандоне, ки шиносномаҳои нави пластикӣ надоранд, бояд шиносномаи нав гирифта, сипас сим-кортҳои худро дубора сабт намоянд. Яъне, акнун хариду фурӯши сим-кортҳо ва аз сари нав ба қайдгирии онҳо танҳо тавассути шиносномаҳои пластикӣ сурат хоҳад гирифт.
   Матни қарори мазкур рӯзи 15.02.2019 дар рӯзномаи "Ҷумҳурият" зери унвони "Дар бораи тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он" ба нашр расид ва дар он талаботи нави гирифтани симкортҳои телефонҳои мобилӣ зикр шудааст. Бо ин қарор ба Хадамоти алоқа дастур дода шудааст, ки барои ба номи 1 шахс ба расмият даровардани на зиёда аз 2 симкорт ва сабти дигарбораи симкортҳои шахсоне, ки шиносномаи соли 2014-ро надоранд, дар давоми 6 моҳ чора андешад.

Панҷшанбе, Фев 21 2019


Шурӯъ аз 11.02.2019 дар хатсайри микроавтобуси №4 (маҳаллаи Чиноро - маҳаллаи Пролетар) фаъолияти микроавтобусҳо манъ гардида, хизматрасонӣ тариқи автобусҳои тамғаи «Акиа» ба роҳ монда шудааст.
Мақомоти иҷроияи ҳокимияти давлатии ш.Душанбе ба таваҷҷуҳи сокинон ва меҳмонони пойтахт мерасонад, ки ҳамакнун аз хизматрасонии хатсайриавтобусии №4 (Терминали Шарқ-Транс - ҶДММ «Маром») истифода баранд.

Душанбе, Фев 18 2019


   Тибқи Нақшаи генералии ш.Турсунзода ба ҷойи бозори марказии шаҳр боғи фарҳангӣ-фароғатӣ бунёд гашта, бо ҳамин мақсад ин бозор дар ояндаи наздик тахриб хоҳад шуд. Дар ин бора ба намояндагони воситаҳои ахбори омма Абдулқодир Вализода, раиси ш.Турсунзода рӯзи 12.02.2019 зимни нишасти матбуотӣ хабар дод.
   Вобаста ба вазъи нороҳаткунандаи санитариву эпидемиологии ин бозор, ки аз ҷониби хабарнигори ҳафтаномаи СССР ба миён гузошта шуд, Абдулқодир Вализода ба сохторҳои марбута дастур дод, ки бори дигар ин проблемаро бардошта, масъулонро водор созанд, ки аз пайи тоза кардани бозор шаванд.

Ҷамилаи Мақсуд, СССР

Чоршанбе, Фев 13 2019


Салом ба СССР-и азиз! Ман Фаёзов Далерҷон, зодаи ш. Хуҷанд, вилояти Суғд мебошам. Мехостам дар бораи ҳодисае, ки бо ман гузашт, бароятон нақл намоям, то, ки мардум аз чунин муносибати хунукназарона ва саҳлангории бархе аз марказҳои тиббии кишвар бифаҳманду қазоват кунанд.    Санаи 13.10.2018 сол ман барои гузаштани ташхиси лабораторӣ оиди вируси гепатити DHDV ба филиали лабораторияи «Диамед», ки воқеъ дар суроғаи ш. Хуҷанд дар ҳудуди Беморхонаи клиникавии ш.Хуҷанд ҷойгир аст, муроҷиат намуда, тахлилҳои лозимаро ба онҷо супоридам. Баъдан ҳамшираи шафқат (лаборантка), ки ному насабашонро намедонам, аммо бубинам мешиносам, ному насаби маро бе пурсиши шиносномаи шахсии ман қайд намуда, аз ман таҳлили хун гирифта, ба пробирка андохта, ба рӯи он рақами тартиби 3676 гузошт ва ин рақамро ба ман супорида, таъкид намуд, ки аз сабаби он, ки таҳлилҳои ҷамъ карда шударо барои гузаронидани ташхис ба бинои асосӣ, ки дар ш. Душанбе ҷойгир аст мефиристанд ва бинобар ин баъди 4-5 рӯз бо тариқи телефон хабар гирам ва агар натиҷаҳои таҳлилҳоям тайёр шуда бошад, омада гирам.
   Ман санаи 17.10.2018 ба он рақамхои телефоние, ки лаборантка ба ман дода буд, занг зада, оиди тайёр шудани натиҷаҳои таҳлилҳоям пурсон шудам, ки дар ҷавоб он кас ба ман гуфт, ки натиҷаҳои таҳлилҳо нишон медиҳад, ки Шумо ба бемории вируси гепатити DHDV гирифторед ва таҳлилҳо мусбӣ баромадааст. Пас аз шунидани ин хабари нохуш пеши чашмонамро сиёҳӣ гирифту дасту поям ба ларзиш даромад, тапиши дилам зиёд гардид, давраи ҷавониам, аҳли оилаам фарзандонам ва тамоми лаҳзаҳои хушиҳои зиндагиам аз пеши назарам мегузашт, гумон мекардам, ки ҳаёти ман дар ин лаҳза тамом шуд ва марги ман наздик аст, имрӯз ё фардо ман бояд ин дунёро тарк намоям. Дастам ба ягон кор намерафт, ҳатто хуши аз хона баромадан, хоҳиши касеро дидан надоштам, танҳо фикри оилаю фарзандонамро мекардам, баъд аз сари ман ҳаёти онҳо чӣ мешуда бошад? Дар чор кунчи девори хона ин фикру хаёлҳо маро мехӯрданд, охир ман ҳоло аз ин ҳаёти ширинам намехоҳам маҳрум шавам, ман ҳоло ҷавон ҳастам ва орзую ҳаваси бисёре дорам…
    Ин хабари нохуш на танҳо ба ман рӯҳан ва ҷисман зарар расонид, балки ба аҳли оилаи ман низ, асосан ба падару модарам таъсири манфӣ расонида шуд, ки дар натиҷа саломатии онҳо низ дар зери хатар монда, то ҳол худро нотоб ҳис мекунанд. Аз ин сабаб ман аз саломатии наздиконам хавотир шуда, онҳоро низ аз ташхиси мазкур гузаронидам, ки хушбахтона онҳо ба ин бемории вазнин гирифтор набудаанд. Ҳангоми дар хона бо ин фикру хаёлҳои ғамгин нишастанам, ба ёдам омад, ки лабораторияе, ки ман муроҷиат намудам, яъне филиали лабораторияи «Диамед» дар Беморхонаи клиникавии в.Суғд низ мавҷуд будааст ва ба хаёлам омад, ки шояд аз сари нав аз ташхиси лабораторӣ оиди вируси гепатити DHDV гузарам, беҳуда намегӯянд, ки дунё ба умед аст ва бо умеди калон аз сари нав, бо иваз намудани ному насаби худ, яъне бо ному насаби Саидзода Далер аз ташхиси лабораторӣ оиди вируси гепатити DHDV ба филиали дигари лабораторияи «Диамед» муроҷиат намуда, хун супоридам. Баъди 3 рӯз ҷавоби натиҷаи таҳлилҳоям тайёр шуд, ки он нисбат ба бемории вируси гепатити DHDV манфӣ баромад, яъне ин аз он шаҳодат медиҳад, ки муносибати кормандони тиб нисбати ман хунукназарона ва бепарвоёна иҷро карда шудааст.
   Худо медонад чанд нафари дигар боз ҷабрдидаи муносибати хунукназарона ва бепарвоёнаи кормандони тиббии ин лаборатория гашта бошанд. Баъди ин ҳодиса, ки аз ҷониби кормандони тиб номатлуб иҷро гардидани вазифаи касбии худ ман ба ягон табибони Тоҷикистон бовар накарда, новобаста аз он, ки шароити иқтисодиам вазнин мебошад, аз ёру дӯстонам қарз гирифта, шиносномаи хориҷӣ тайёр намуда, барои боз хам аниқтар намудани натиҷа аз сари нав барои ташхиси пурраю ҳаматарафа ва аз ҳама муҳимаш бо сифат гузаштан санаи 04.11.2018 ба Федератсияи Руссия сафар карда, аз ташхиси лаборатории оиди вируси гепатити DHDV дар ш.Москав, дар Маркази тиббии «МедЭлит» бо супоридани якчанд таҳлилҳо гузаштам, ки натиҷаҳои таҳлилҳоям ба бемории вируси гепатити DHDV манфӣ баромад, яъне ман ба чунин беморӣ гирифтор намебошам!!!
    Албатта, имрӯз ман шукр мекунам, ки сиҳату саломат назди аҳли оилаву фарзандонам баргаштам, лекин барои барқарор намудани саломатии худ, ки дар натиҷаи муносибати хунукназарона, бепарвоёна ва номатлуб иҷро карда шудани кормандони маркази тиббии «Диамед» ба ман зарари моддӣ ва маънавӣ расонида шудааст, хеле ранҷ кашидам. Аз ҳама муҳимаш он аст, ки ман намехоҳам, ки дар оянда ин кирдорҳои кормандони лаборатория нисбати ягон шахси бечораи дигар, ки бовар карда муроҷиат мекунад, такрор ёфта, монанди ман ҷабрдида шавад.

Далер Фаёзов,
маҳаллаи 14-15, қитъаи 151, тел: 92 778 77 33  

саҳ 2 аз 97

Китобҳо

Flag Counter