ХАБАРИ ДОҒ
Чоршанбе, Май 20 2020

Паҳншавии пандемияи сирояти нави коронавирус (COVID-19) таъсири манфии худро ба иқтисодиёти ҷаҳон расонида истода, ба иқтисодиёти Ҷумҳурии Тоҷикистон низ бинобар зиёд шудани таъсири омилҳои беруна бетаъсир намонд.

Бонки миллии Тоҷикистон  баҳри иҷрои Нақшаи чорабиниҳои Ҳукумати Ҷумҳурии Тоҷикистон оид ба пешгирӣ ва кам кардани таъсири хавфҳои эҳтимолии коронавирус (COVID-19) дар ҷаҳон ба иқтисодиёти миллӣ ва бо мақсади пешгирӣ аз таъсири эҳтимолии пандемия Нақшаи чорабиниҳо оид ба пешгирии таъсири эҳтимолии пандемияи COVID-19 ба иқтисодиёти миллӣ, низомҳои бонкӣ ва суғуртаи мамлакат таҳия намуда, барои пурзӯр намудани чораҳои зиддиэпидемикӣ ҷиҳати пешгирии интиқол ва пайдоиши сирояти нави коронавирус ситод ташкил додааст.

Бо мақсади тақвият додани корҳо дар бозори пули миллӣ ва асъори хориҷӣ, истифодаи фишангҳои самараноки пулию қарзӣ ва дар сатҳи муътадил нигоҳ доштани таваррум баҳри иҷрои Нақшаи чорабиниҳои Ҳукумати Ҷумҳурии Тоҷикистон оид ба пешгирӣ ва кам кардани таъсири хавфҳои эҳтимолии коронавирус (COVID-19) дар ҷаҳон ба иқтисодиёти миллӣ Бонки миллии Тоҷикистон тадбирҳои зеринро андешида истодааст. Аз ҷумла, ҷиҳати дастгирии иқтисодиёти кишвар ва пеш гирифтани сиёсати ҳавасмандгардонии монетарӣ Бонки миллии Тоҷикистон аз 1 майи соли 2020 меъёри бозтамвилро 1 банди фоизӣ паст карда, дар сатҳи 11,75 фоизи солона муқаррар намуд.

Захираҳои ҳатмӣ яке аз фишангҳои асосии татбиқи сиёсати пулию қарзии Бонки миллии Тоҷикистон ба ҳисоб рафта, механизми танзими пардохтпазирии умумии низоми бонкиро, ки барои назорати унсурҳои пулӣ (дар сатҳи муайян нигоҳ доштани ҳаҷми пул дар муомилот) истифода мешавад, ифода мекунанд. Аз ин рӯ, бо мақсади андешидани тадбирҳои саривақтӣ ва дастгирии пардохтпазирии ташкилотҳои қарзии молиявӣ, бинобар эҳтимолияти зиёд гардидани таъсири хавфҳои ба пандемияи cирояти нави коронавирус (COVID-19) вобаста, меъёри захираҳои ҳатмии ташкилотҳои қарзии молиявӣ аз рӯи пасандозҳо ва уҳдадориҳои дигари ба онҳо монанд, аз 1 апрели соли 2020 бо пули миллӣ аз 3 фоизи амалкунанда ба 1 фоиз (2 банди фоизӣ) ва бо асъори хориҷӣ аз 9 фоизи амалкунанда ба 5 фоиз (4 банди фоизӣ) паст карда шуд. Иқдоми мазкур метавонад имкониятҳои молиявии ташкилотҳои қарзии молиявиро дар давраи буҳронӣ беҳтар намуда, ба маблағи 241,7 млн.сомонӣ пардохтпазирии иловагиро барои низоми бонкӣ пешниҳод намояд.

Руйдодҳои вақтҳои охир, яъне паҳншавии бемории коронавирус (СOVID–19) дар ҷаҳон ва таъғирёбии нархи нафт ба самтҳои мухталифи иқтисодиёти ҷаҳон таъсири манфии худро расонида истодааст. Ҷорӣ намудани ҳолатҳои карантинӣ дар мамлакатҳои шарикони стратегӣ, баста шудани сарҳадҳо ва давомёбии чунин ҳолатҳо метавонад хафвҳои эҳтимолиро ба соҳаҳои гуногуни иқтисодӣ, аз ҷумла низоми бонкии кишвар баланд бардошта, фаъолияти самараноки низоми бонкии кишварро халалдор намояд.

Вобаста ба ин, бо назардошти муҳиммияти масъала бо мақсади ҳифзи ҳуқуқи истеъмолкунандагони хизматрасониҳои молиявӣ, пешгирӣ намудани зиёдшавии ҳиссаи қарзҳои ғайрифаъол, нигоҳ доштани ҳолати пардохтпазирӣ ва ғ. Бонки миллии Тоҷикистон ташкилотҳои қарзии молиявиро бо мактуби хеш №05.1-630/1591 аз 15.04.2020с. вазифадор намудааст, ки нақшаи чорабинии дахлдор омода намуда, ҷараёни иҷроиши онро таҳти назорати қатъӣ қарор диҳанд.  

Дар баробари ин, ба ташкилотҳои қарзии молиявӣ ҷиҳати зиёд кардани қарздиҳӣ ба соҳибкории истеҳсолӣ, аз ҷумла истеҳсолоти воридотивазкунанда бо назардошти пешгирии хавфҳои бонкӣ, тавсияҳои дахлдор дода шуд.

Ба ташкилотҳои қарзии молиявӣ имконият фароҳам оварда шуд, ки бо назардошти таъмин намудани ҳифзи манфиатҳои истеъмолкунандагони хизматрасониҳои молиявӣ то 1 августи соли 2020 фаъолияти марказҳои хизматрасониҳои бонкии муаммодор ва зараровари худро мувақаттан мавқуф гузоранд.

Бонки миллии Тоҷикистон ҷиҳати дастгирии  низоми бонкӣ ва истеъмолкунандагони хизматрасониҳои молиявӣ, ташкилотҳои қарзии молиявиро аз ҳаққи хизматрасонии ҳисоббаробаркунии байнибонкӣ тавассути низомҳои Бонки миллии Тоҷикистон, аз ҷумла низоми автоматишудаи байнибонкӣ (RTGS) ва низоми автоматишудаи байнибонкӣ (АБС) то 01 сентябри соли 2020 озод карда, ба ташкилотҳои қарзии молиявӣ тавсия додааст, ки ҳаққи хизматрасониҳои байнибонкиро ба мизоҷони худ таҷдиди назар намоянд.     

Ҳамзамон бояд қайд намуд, ки тибқи нақша-чорабиниҳои пешниҳоднамудаи ташкилотҳои қарзӣ, айни ҳол ташкилотҳои қарзӣ вобаста ба имкониятҳои ҷойдоштаи худ бо назардошти ҳолати молиявии муштариён қисми қарзҳои онҳоро тамдид ва таҷдид намуда, барои баъзе қарздороне, ки ҳолати молиявии мушкил доранд, муҳлатҳои имтиёзнок пешниҳод намуда истодаанд.

Дар баробари ин, ташкилотҳои қарзии молиявӣ вазифадор карда шудаанд, ки ҷиҳати ҳифзи саломатии истеъмолкунандагони хизматрасониҳои молиявӣ ва пешгирӣ намудан аз паҳншавии вируси сироятии COVID-19 чораҳои дахлдор андешида, лавозимоти санитарӣ-гигиениро дар ташкилотҳои хеш таъмин намоянд.

Бояд қайд намуд, ки ҳанӯз аз пайдо шудани пандемияи   COVID-19 дар Осиёи Марказӣ, Бонки миллии Тоҷикистон ба Ҳукумати Ҷумҳурии Тоҷикистон, вазорату идораҳои марбута пешниҳодҳоро оид ба пешгирии таъсири хавфҳои эҳтимолӣ ба иқтисодиёти ҷумҳурӣ ва низоми бонкӣ ирсол намуд.

Алҳол Бонки миллии Тоҷикистон бо ташкилотҳои молиявии байналмилалӣ, назири Хазинаи Байналмилалии Асъор, Гурӯҳи Бонки ҷаҳонӣ, Бонки Аврупоии Таҷдид ва Рушд, Бонки Осиёии Рушд, Гурӯҳи Бонки Исломии Рушд, Бонки рушди АвруОсиё, Бонки байнидавлатӣ, Иттиҳод оид ба дастрасии молиявӣ, фондҳои байналмилалӣ, бонкҳои марказӣ (миллӣ) ва сохторҳои бонкии кишварҳои хориҷи наздику дур ҳамкории судманд роҳандозӣ намудааст.

Бонки миллии Тоҷикистон минбаъд низ татбиқи сиёсати пайгиронаи пулию қарзиро ҷиҳати ноил гардидан ба сатҳи муътадили нархҳо дар давраи миёнамуҳлат ва таъмини пардохтпазирии низоми бонкӣ идома хоҳад дод.

 

Меъёри бозтамвил 1 банди фоизӣ паст карда шуд

Дар ҷаласаи навбатии Кумитаи сиёсати пулию қарзии Бонки миллии Тоҷикистон бо мақсади андешидани тадбирҳои саривақтӣ, бинобар эҳтимолияти зиёд гардидани таъсири хавфҳои ба пандемияи коронавируси COVID-19, инчунин дар семоҳаи минбаъда бо назардошти эҳтимоли кам шудани хавфҳои таварруми дохилӣ аз ҳисоби нисбатан зиёд шудани таклифот бинобар ҷамъоварии ҳосили нави соҳаи кишоварзии истеҳсоли дохилӣ, маҳдуд намудани содироти баъзе аз маҳсулоти хӯрокворӣ ҷиҳати дастгирии иқтисодиёти кишвар ва пеш гирифтани сиёсати ҳавасмандгардонии монетарӣ аз ҷониби Кумита пешниҳод гардид, ки меъёри бозтамвил, ҳамчун инъикоскунандаи мавқеи сиёсати пулию қарзӣ 1,0 банди фоизӣ паст карда шавад.

Сатҳи таваррум ва омилҳои таъсиррасон. Тибқи маълумоти оморӣ сатҳи таварруми солона дар моҳи марти соли ҷорӣ ба 9,3 фоиз баробар гардид, ки дар муқоиса ба ҳамин давраи соли қаблӣ 1,5 банди фоизӣ зиёд мебошад. Қайд намудан зарур аст, ки раванди тағйирёбии сатҳи нархҳо дар натиҷаи таъсири омилҳои дорои хусусияти мавсимӣ, таклифотӣ ва фишорҳои берунӣ ба вуқӯъ пайваст.

Интизориҳо ва хавфҳо. Мавриди зикр аст, ки аз интиҳои моҳи декабри соли 2019 то инҷониб бинобар пайдо шудани вируси сироятии “коронавирус” дар Ҷумҳурии Мардумии Чин садҳо ҳазор нафар одамон гирифтори он гардида, даҳҳо ҳазор ба ҳалокат расиданд. Ин вирус аллакай аксари давлатҳои ҷаҳонро фаро гирифтааст.

Мутобиқи маълумоти Созмони Ҷаҳонии Тандурустӣ то санаи 27 апрели соли 2020, дар ҷаҳон зиёда аз 2 млн. 971 ҳаз. нафар гирифтори ин беморӣ гардиданд, ки аз давлатҳои шарикони асосии савдои кишвар бошад, ба Туркия 110,1 ҳазор нафар, Федератсияи Русия 80,9 ҳазор нафар, Қазоқистон 2,7 ҳаз. нафар, Ӯзбекистон 1,9 ҳаз. нафар, Афғонистон 1,5 ҳаз. нафар, ва Қирғизистон 682 нафар рост меояд.

Дар Федератсияи Русия ҳамчун яке аз кишварҳои асосии стратегии Ҷумҳурии Тоҷикистон, аллакай аз таъсири вируси мазкур номуайяниву ноустувории иқтисодӣ, коҳишёбии қурби рубли русӣ ва мушкилоти тиҷорати байналмилалӣ ба амал омадааст. Тибқи дурнамои Хазинаи Байналмилалии Асъор (апрели соли 2020) дар соли 2020 иқтисодиёти Федератсияи Русия 5,5 фоиз коҳиш хоҳад ёфт.

Бояд зикр намуд, ки ба санаи 26 апрели соли 2020 нархи нафти навъи брент (Brent) дар биржаҳои ҷаҳонӣ ба ҳисоби миёна барои 1 баррел ба 25,1 доллари ИМА баробар шуд, ки нисбат ба 31 декабри соли 2019 62,0 фоиз коҳиш ёфтааст. Таҳлилҳо нишон медиҳанд, ки нархи нафт яке аз нишондиҳандаи муҳим барои иқтисодиёти Федератсияи Русия ба ҳисоб рафта, коҳишёбии он ба қурби пули миллии ин кишвар (рубли русӣ) таъсири зиёд дорад. Ба ҳолати 27 апрели соли 2020 қурби рубли Русия нисбат ба доллари ИМА дар муқоиса ба аввали сол 20,7 фоиз коҳиш ёфт.

Вобаста ба ҳолати пандемияи коронавирус (COVID-19), кам шудани талабот, суст шудани фаъолнокии иқтисодиёт ва дигар омилҳо аксари бонкҳои марказии давлатҳои хориҷӣ ҷиҳати дастгирии иқтисодиёт сиёсати ҳавасмандгардонии монетариро амалӣ намуда истодаанд, аз ҷумла, дар минтақаи Аврупо, Русия, Туркия, ИМА, Канада, Покистон, Молдова, Хитой, Арманистон, Украина, Ӯзбекистон ва дигар кишварҳо.

Паҳншавии пандемияи коронавируси COVID-19 таъсири манфии худро ба иқтисодиёти ҷаҳон расонида истода, ба иқтисодиёти Ҷумҳурии Тоҷикистонниз бинобар зиёд шудани таъсири омилҳои беруна, аз ҷумла маҳдуд гардидани равобити марзӣ ва коҳиш ёфтани муомилоти тиҷоратӣ метавонад бо роҳи болоравии нархи молу маҳсулотҳои воридотӣ, кам шудани ҳаҷми сармоягузориҳо, паст шудани сатҳи даромаднокии аҳолӣ, инчунин тавассути коҳишёбии қурби пули миллӣ ва эҳтимолияти зиёд гардидани хавфҳои молиявӣ дар ташкилотҳои қарзии молиявӣ дар давраи кутоҳмуддат таъсири худро расонад.

Мавқеи сиёсати пулию қарзӣ. Бо дарназардошти омилҳои эҳтимолии болозикр ҷиҳати дастгирии иқтисодиёти кишвар ва пеш гирифтани сиёсати ҳавасмандгардонии монетарӣ аз ҷониби Кумита қарор қабул карда шуд, ки меъёри бозтамвил 1 банди фоизӣ паст карда шуда, дар сатҳи 11,75 фоизи солона аз 1 майи соли 2020 муқаррар карда шавад.

Бонки миллии Тоҷикистон минбаъд низ татбиқи сиёсати пайгиронаи пулию қарзиро ҷиҳати ноил гардидан ба сатҳи муътадили нархҳо дар давраи миёнамуҳлат ва таъмини пардохтпазирии низоми бонкӣ идома хоҳад дод. 

 

Шуъбаи матбуоти БМТ

 

 

Чоршанбе, Апр 22 2020

Ҳафтаи байналмилалии Global Money Week-2020 моҳи саводнокии молиявиро масъулини БДА ҶТ Амонатбонк дар як қатор филиалҳои Бонк баргузор намуданд.

“Омӯзед! Захира кунед! Пул кор кунед!” -шиори расмии Global Money Week-2020. Таҳти ин шиор гуруҳи кории Бонк чорабинии худро дар филиали №61-и «Амонатбонк» дар ноҳияи Фархор дар ҳамкорӣ бо Фонди хазинаи байналмилалии Олмон оғоз намуданд.

Дар оғози чорабини муовини Раиси Раёсат Шаҳло Сайфзода ҳамаи иштирокчиёни чорабинии мазкурро бо имкониятҳои муосири имрӯзаи «Амонатбонк» ошно карда таъкид намуданд, ки ҳадафи асосӣ чорабинии мазкур баланд бардоштани саводнокии молиявии аҳолӣ, рӯҳбаланд кардани кӯдакон ва ҷавонон барои нигоҳубини пул ва дар ниҳоди онҳо сайқал додани малакаи соҳибкорӣ мебошад, зеро дар шароити кунунӣ ҷалби кӯдакон ва ҷавонон ба бахши молиявӣ аҳамияти махсус дорад.

Дар филиали №61-и «Амонатбонк» дар ноҳияи Фархор семинари машваратӣ дар мавзӯи “Такмили маърифати молиявии аҳолӣ” гузаронида шуд. Дар рафти семинар ба иштирокдорон корманди Фонди хазинаҳои амонатгузорӣ оид ба ҳамкориҳои байналмилалии Олмон дар мавзуҳои нақши пул, қоидаҳои идоракунии пул, банақшагирии молиявӣ ва буҷети оила, таваррум ва таъсири он ба имкониятҳои иқтисодии давлат ва субектҳои хоҷагидор, нақши бонкҳо дар рушди иқтисодиёт дарси омӯзишӣ гузаронид.

Маъракаи Global Money Week-2020 дар филиалҳои Бонк ва марказҳои хизматрасонӣ идома дошта, давоми як моҳ оид ба саводнокии молиявӣ барои хонандагон ва донишҷӯён семинару тренинг аз ҷониби мутахассисони “Амонатбонк” гузаронида мешавад. Чун анъана иштирокчиёни фаъол дар охир бо туҳфахои хотиравӣ сарфароз гардиданд.

 

Оғози курсҳои бозомӯзии кормандон дар БДА ҶТ "Амонатбонк"

Бо мақсади баланд бардоштани савияи дониш, малака, касбияти кормандони Бонк, бо дастур ва супориши  Раиси Раёсати Бонки давлатии амонатгузории Ҷумхурии Тоҷикистон «Амонатбонк» Сироҷиддин Икромӣ Идораи методология ва бозомӯзии кормандон таъсис дода шуд. Бояд қайд кард, ки дар бинои нави Бонк барои омӯзиш ва такмили ихтисос ҳамаи шароитҳо фароҳам оварда шуда, толорҳои омӯзишӣ, утоқи тарҷумаи синхронӣ, бо технологияҳои муосири иттилотиву дафтардорӣ муҷҷаҳаз гардонида шудааст.

Маврид ба зикр аст, ки аз ҷониби Идораи методология ва бозомӯзии кормандон, барои кормандони филиалҳои БДА ҶТ «Амонатбонк», дар шаҳри Душанбе ва ноҳияҳои тобеи марказ, давоми 5-рӯз тренинги омӯзишӣ дар мавзӯи «Таҳлил ва пешниҳоди қарзҳои хурд» гузаронида шуд. Дар тренинги мазкур тамоми ҷабҳаҳои таҳлили молиявӣ, аз ҷумла ҷалби мизоҷон ва пешниҳоди қарз, таҳияи ҳисоботҳои молиявӣ, хавфҳои қарзӣ ва пешгирии он, гарав ва баҳодиҳии амволи гарав, мониторинг, истифодаи мақсадноки қарз ва ғайра фаро гирифта шуд. 

Ба иштирокчиёни тренинг аз ҷониби мутахассисони Раёсати Бонк, аз ҷумла Сардори идораи методология ва бозомӯзии кормандон Умарзода З, кормандони Идораи мазкур Буриев У.Н, Зокирова С, мушовири Раиси Раёсат оид ба масъалаҳои ҳуқуқӣ-Икромов З. ва сардори Идораи қарздиҳии Департаменти қарздиҳӣ, Фаррухзода С, дарсҳо гузаронида шуданд.

Дар хотима тренинг тавассути саволу ҷавоб ҷамъбаст гардида, ҳаллу фасли мушкилотҳо, пешниҳоду таклифҳои филиалҳо мавриди муҳокима қарор дода  шуданд. Идораи методология ва бозомӯзии кормандон, минбаъд низ тасмим гирифтааст, ки дар тамоми филиалҳои Бонк, оид ба мавзуъҳои самти афзалиятноки фаъолияти бонкӣ, инчунин масъалаҳои рӯзмарраи ҷомеа, тренингу семинарҳои омӯзишӣ, конфронсу мизҳои мудаввар ташкил намояд.

 

Кортҳои пардохтии «Амонатбонк»

Кортҳои  пардохтии бонкӣ – ин воситаи қулаи нигоҳ доштани маблағ буда, хавфи гум кардан ва дуздидан аз байн бардошта мешавад. Ҳамзамон кортҳои пардохтӣ - сарфаи вақт, хизматрасонии қулай, тахфифҳо ҳангоми харидорӣ ё пардохти ҳаққи хизматрасонӣ дар ташкилотҳои савдо ва хизматрасонӣ мебошад. 

 

Намудҳои кортҳо аз Низоми байналхалқии VISA International

Афзалияти кортҳои мо-Бехатарии маблағҳои Шумо.

Имконияти шабонарӯзӣ дастрас намудани маблағҳои нақдӣ дар зиёда аз 50 банкомат. Дар ҳар нуқтаи дунё метавонед бо тарзи ғайринақдӣ ё бо Интернет маҳсулот харидорӣ намоед ва ё ҳаққи хизматрасониро пардохт намоед.

Ҳангоми сафар кардан ба хориҷа зарурияти баёноти маблағҳо вуҷуд надорад.

Хабардор шудан аз ҳар як амалиёт бо корти худ тариқи SMS-хабар.

Суратҳисоби шуморо наздикону пайвандонатон метавонанд  пур кунанд.

Бонк ба мизоҷони худ кортҳои пластикии локалӣ, Корти миллӣ, VISA Electron, VISA Classic  ва боз ҳам бонуфуз VISA Gold пешниҳод мекунад. Кортҳои миллӣ (пардохти миллӣ)-ба ҳамаи хоҳишмандон барои истифода намудан дохили ҷумҳурӣ, ҳамчунин амалӣ шудани лоиҳаҳои маош бо ташкилотҳои шакли моликияташон гуногун дода мешавад. Арзиши корт 20 сомониро ташкил медиҳад.

Афзалияти асосии корти мазкур: дастрасӣ ба маблағ; бо ҳисоби сомонӣ бароварда мешавад; муаммои вобаста ба пасту баландшавии асъор ва бақияи корт.

 

Корти VISA Electron

Кортҳои байналхалқии арзон ба Шумо дар сафарҳо ва ҳаёти ҳамарȳза кȳмак мерасонад. Дар ҳар банкомат ва POS-терминалҳои дигар кишварҳои дунё хизмат расонида мешавад.  Арзиши корт 50 сомониро ташкил медиҳад.

Афзалияти асосии  корт:  Дар ҳар нуқтаи дунё метавонед хизматрасониро анҷом диҳед. Имконияти пардохти молҳо ва хизматрасониҳо дар ширкатҳои тиҷоратию хизматрасонӣ.

 

Корти VISA Classic

Кортҳои пардохтии маъмул барои сафар ба хориҷа пешбинӣ шудааст. Дар ҳама нуқтаҳо хизмат расонида мешавад, ки логотипи низоми пардохтии Visa аст.

Арзиши корт 145 сомониро ташкил медиҳад. Амонати суғуртавӣ-500 сомонӣ 

Афзалияти асосии  корт:  Дар ҳар нуқтаи дунё метавонед бо тарзи ғайринақдӣ ё бо Интернет маҳсулот харидорӣ намоед ва ё ҳаққи хизматрасониро пардохт намоед. Имконияти пардохти молҳо ва хизматрасониҳо дар ширкатҳои тиҷоратию хизматрасонӣ. Корт барои онҳое пешбинӣ шудааст, ки даромади миёна доранд ва таҷрибаи муомила бо кортҳои бонкӣ доранд.

 

Корти VISA Gold

Корт дорои имконияти васеъи истифодабарӣ буда, ҳолати дорандаи худро ҳамчун шахси сарватманд муаррифӣ мекунад. Арзиши корт 195 сомониро ташкил медиҳад. Амонати суғуртавӣ-2500 сомонӣ

Афзалияти асосии корт:  Дар ҳар нуқтаи дунё метавонед бо тарзи ғайринақдӣ ё бо Интернет маҳсулот харидорӣ намоед ва ё ҳаққи хизматрасониро пардохт намоед. Имконияти пардохти молҳо ва хизматрасониҳо дар ширкатҳои тиҷоратию хизматрасонӣ. Тахфифҳои калон ва пешниҳоди фоиданок аз рȳи барномаи байналхалқии «Visa Special Offers».

VISA Gold барои кӣ  пешбинӣ шудааст? Барои мизоҷони бонуфуз ҷиҳати нигоҳ доштани обрȳ ва нуфуз.

 

Лоиҳаи музди меҳнат

БДА ҶТ «Амонатбонк» барои корхонаҳо ва ташкилотҳои сохторашон гуногун, хизматрасонии пардохти музди меҳнатро тариқи кортҳои пардохтии бонкӣ пешниҳод менамояд. Лоиҳаи мазкур барои ташкилот чунин имкониятҳо медиҳад:

Саривақт ворид намудан ва пардохт кардани маоши кормандон тариқи  Банкомат ва ПОС-терминалҳо; Таъмин намудани махфияти маълумот оиди ҳаҷми маоши кормандон; Кам кардани ҳаҷми хароҷоти корхона ва ҳал намудани масъалаи ҳамлу нақли дороиҳо ва нигоҳдории он; Озод шудан аз мушкилии маблағҳои аз тарафи кормандон гирифта нашуда ва кам намудани хароҷоти хазинавӣ;

Баланд бардоштани нуфузи ташкилот аз ҳисоби истифодабарии технологияҳои замонавӣ ва пешқадам; Таъмин намудани хизматрасонии шабонарузӣ тариқи банкоматҳо барои кормандон. Новобаста аз соати кории бонк, кормандон метавонанд маблағҳои дар корти пардохтии бонкӣ доштаи худро гиранд; Аз байн бурдани навбат дар назди хазинаи ташкилот ҳангоми тариқи нақдӣ гирифтани маош дар рузҳои гузаронидани музди меҳнат. 

 

Кормандони ташкилот чунин имконият ба даст меоранд:

Гирифтани маоши худ аз хамаи шабакаҳои терминалии Бонк; Пардохт кардани маҳсулотҳои харидашуда ва хизматрасониҳо бо корти пардохтии бонкӣ дар мағозаҳо тариқи ПОС-терминал; Нест кардани хавфи гум шудани маблағ ҳангоми гум кардани корти пардохтии бонкӣ; Доштани кафолат оиди ҳаҷми даромад;

Мувофиқи талаботи корманд сарф намудани маблағи дар корт буда. Беруннависӣ (выписка) бонк, имконияти банақшагирии маблағҳои худро барои корманд дастрас менамояд. Гирифтани маблағи дилхоҳ ҳангоми гузаронидани амалиёт;

Новобаста аз ҷои қарордошта имконияти гирифтани маблағҳои худ (сафари хизматӣ, рухасатии меҳнатӣ, рухсатии табобатӣ ва ғ.).

 

Шуъбаи матбуоти БДА ҶТ «Амонатбонк»

 

 

 

Чоршанбе, Апр 15 2020

Ронандагонро мебояд аз  имкониятҳои бо ин мақсад  фароҳамшуда самаранок истифода баранд    

   Далелҳо аз он шаҳодат медиҳанд, ки аз ҷониби роҳбарияти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон пайваста навгониҳо ҷорӣ шуда, ба беҳтар намудани сатҳу сифати хизматрасонӣ, тавсеаи пардохти ғайринақдӣ, ба талаботи байналмилалӣ мутобиқ намудани ҳолати роҳ ва раванди нигоҳдории он рабт доранд. 

   Мавриди истифода қарор гирифтани плазаҳои нави толлингӣ ба ҷои плазаҳои амалкунанда шаҳодати гуфтаи боло буда, дар баробари бартариҳои дигар, ба рушди соҳаи сайёҳӣ дар мамлакат низ мусоидат намуда истодааст.  Садҳо далел мавҷуд аст, ки аксари сайёҳони дохилӣ ва хориҷӣ, ки тариқи роҳи Душанбе – Чанок сафар мекунанд, аз ҳолати роҳ ва ибтикороти амалинамудаи роҳбарият ва кормандони филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон қаноатманданд.

      Эътироф бояд кард, ки чанд соли охир пардохти ғайринақдӣ аз ҷониби шаҳрвандони мамлакат тавсеа ёфта, раванди дастрасӣ низ ба онҳо хеле сода гардонида шудааст. Тибқи маълумоти оморӣ, айни замон дар ҷумҳурӣ теъдоди истифодабарандагони кортҳои пардохтӣ қариб ду миллион нафарро ташкил медиҳад ва ин раванд бемайлон идома ёфта истодааст. Ҳамрадиф бо ин иқдомот, бонкҳои кишвар низ фаъолияти хешро дар ин ҷода густариш бахшида, ҳатто дар дурдасттарин минтақаҳо банкоматҳои худро ба истифодаи мизоҷон вогузоштанд. Аммо фарҳанги пархти ғайринақдӣ аз ҷониби шаҳрвандон «ба ҳар ду пой мелангад».

  Пӯшида нест, ки ҳоло қисми зиёди шаҳрвандони ҷумҳурӣ то чӣ андоза манфиатовар будани пардохти ғайринақдиро дарк накардаанд. Бинобар ин, рӯ овардан ба пардохти ғайринақдиро мувофиқи мақсад ва заруру ногузир аст. Ронандагон бояд дуруст дарк намоянд, ки истифодаи RFID (чипе, ки онро дар пештоқи оинаи автомобил насб карда, бидуни таваққуф плазаро гузаштан имконпазир аст) ва  кортҳои электронии филиали Ширкат бартариҳои зиёд дорад. 

   Аввалан, он воситаи хеле қулайи баҳравар гаштан аз хизматрасониҳои пешниҳодменамудаи филиали Ширкат  ба ҳисоб рафта, вақти ронандагону мусофиронро сарфа менамояд.  

  Сониян, ин иқдом   то андозае ба коҳиш ёфтани пули нақд дар гардиш, ки аз лиҳози иқтисодӣ хеле муҳим аст, боис мегардад. Таъкид менамоем, ки истифодаи ин намуди хизматрасонӣ ба майлу иродаи шаҳрвандон вобаста буда, шахсони воқеӣ ва ҳуқуқӣ метавонанд дар низоми толлингии филиали Ширкат дар муддати кутоҳ суратҳисоби худро кушоянд ва аз имкони пардохти маблағи гузариш аз плазаҳо бо роҳи ғайринақдӣ баҳравар шаванд.    

   Муҳим он аст, ки истифодаи RFID (чипе, ки онро дар пештоқи оинаи автомобил насб карда, бидуни таваққуф плазаро гузаштан имконпазир аст), кортҳои марбут ба филиали Ширкат бе иштироки хазинадор, ки қаблан тариқи нақд маблағро қабул мекард, имконпазир аст. 

   Барои онҳое, ки дар пештоқи оинаи автомобилашон RFID насб шудааст, имкон фароҳам меояд, ки умуман дар палазаҳо таваққуф накунанд. Ба ибораи дигар, барои чунин ашхос зимни ҳаркат дар роҳи автомобилгарди Душанбе – Чанок филфавр “чароғаки сабз” фурузон мегардад. 

   Ҳамрадиф бо ин, онҳое, ки аз  кортҳои пардохтии “IRS”  истифода мекунанд, аз бисёр лиҳоз бурд хоҳанд кард. Масалан, ба дорандаи чунин корт кофӣ аст, ки кортро ба панели берунаи пардохт, ки дар ҷойгоҳи хазинадор насб шудааст, наздик барад.  Таҷҳизоти замонавии насбшуда фавран ба кор даромада, маблағи пешбинишуда гирифта, роҳ барои гузариши воситаи нақлиёт кушода мешавад. 

  Истифодаи чунин корт дар баробари бартариҳои зикршуда, ҳамчунин, замина фароҳам меорад, ки тамбашавии автомобилҳо дар плазаҳои толлингӣ умуман  аз байн равад. Зеро сураъати хизматрасонӣ бамаротиб афзуда, сифати он беҳбуд меёбад.

    Хотиррасон бояд кард, ки кушодани суратҳисоб ва гирифтани корт осон ва дар муддати кутоҳ имконпазир буда, шаҳрвандонро мебояд нусхаи шиноснома, нусхаи РМА  (ИНН), нусхаи шиносномаи техникии автомобил, нусхаи ваколатномаро (агар воситаи нақлиёт таҳти соҳибияти дигар шахс бошад), ба пешниҳод намояд. Бо мақсади осон намудани дастарсии шаҳрвандон ва сарфи вақти онҳо шароит фароҳам шудааст, ки дар сомонаи филиали Ширкат – www. irs.tj аз тариқи онлайн ба ин намуди хизматрасонӣ пайваст гарданд.  Ҳамрадиф бо ин, пардохт аз тариқи кортҳои бонкӣ низ мумкин буда, ин амал  бо кумаки хазинадор амалӣ гардида, доштани корти бонки дахлдор ҳатмӣ мебошад. Маълумоти иловагӣ дар саҳифаи филиали Ширкат дар шабакаи иҷтимоии Фейсбук, сайти филиали Ширкат ва аз тариқи телефони 48 701 10 20 қобили дарёфт аст.  

    Ибтикори мавриди назар далели возеҳи он аст, ки роҳбарияти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон  , дар ин самт корҳои зиёдро ба иҷро расонидаанд. Боварӣ дорем, ки ояндаи наздик истифодаи кортҳои пардохтӣ ҳангоми пардохти хизматрасонии филиали Ширкат ба падидаи маъмул табдил ёфта, кулли шаҳрвандони аз истифода хоҳанд кард. 

 

Маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон

 

 

Чоршанбе, Апр 08 2020

Бонки миллии Тоҷикистон ҳамчун мақоми танзимкунандаи бахши молиявию бонкӣ, сиёсати пулию қарзиро баҳри нигоҳдории муътадилии сатҳи нархҳои дохилӣ, коҳиш додани фишорҳои қурбӣ, ба танзим даровардани афзоиши ҳаҷми пул дар муомилот бо истифода аз механизму фишангҳои монетарӣ, амалӣ карда истодааст.

Айни замон, тибқи муқаррароти “Дурнамои сиёсати пулию қарзии Ҷумҳурии Тоҷикистон барои соли 2020 ва давраи миёнамуҳлат”, сиёсати қурбии ба реҷаи “шинокунандаи танзимшаванда” татбиқ карда мешавад.

Таҳлилҳо нишон медиҳанд, ки хуруҷ ва паҳншавии пандемияи коронавирус дар ҷаҳон ва таъсири он ба иқтисодиёти ҳамаи давлатҳо, аз ҷумла давлатҳои тараққикарда, инчунин ба иқтисодиёти аксари кишварҳои шарикони асосии тиҷоратии Ҷумҳурии Тоҷикистон, зиёд гардидани лапишҳо дар бозорҳои молиявии ҷаҳонӣ, номуайяниҳо дар сиёсати иқтисодии ҷаҳон, ба маротиб паст шудани нархи нафт дар бозорҳои ҷаҳонӣ таҳдидҳои навро ба миён оварданд, ки бевосита таъсири манфии худро ба иқтисодиёти Ҷумҳурии Тоҷикистон мерасонанд.

Аз аввали сол то санаи 19 марти соли ҷорӣ тағйирёбии қурби расмии пули миллӣ нисбат ба доллари ИМА 0,6 фоиз коҳиш ёфтааст, ки нисбат ба ҳамин давраи соли 2019 ба андозаи 0,5 банди фоизӣ зиёд мебошад.

Қурби фурӯши доллари нақди ИМА бошад, дар бозори ғайрибонкӣ 6,2 фоиз баланд шудааст (аз 9,79 сомонӣ дар аввали сол то ба 10,40 сомонӣ дар санаи 19 март), ки нисбат ба ҳамин давраи соли гузашта 5,3 банди фоизӣ зиёд мебошад.

Бояд зикр намуд, ки бо назардошти вазъи номуътадили иқтисоди ҷаҳонӣ, дар ин давра қурби расмии асъори миллии аксари кишварҳои шарикони асосии тиҷоратии Ҷумҳурии Тоҷикистон низ, ноустувор гаштааст. Аз ҷумла, қурби рубли Федератсияи Россия – 24,7 фоиз, рубли Беларус – 15,8 фоиз, тангаи Қазоқистон – 14,8 фоиз, лираи Туркия – 8,6 фоиз, соми Қирғизистон – 4,7 фоиз, нисбат ба доллари ИМА коҳиш ёфтаанд.

Яке аз сабабҳои асосии баланд шудани қурби фурӯши доллари нақди ИМА дар бозори дохилии асъор ва зиёд шудани талабот ба он, ин афзоиш ёфтани тавозуни манфии савдои кишвар, коҳишёбии вуруди интиқолҳои пулӣ дар ин давра ва вобаста ба ин кам шудани пешниҳоди асъори хориҷӣ дар бозор ва ғайраҳо, мебошад.

Боиси таъсири омилҳои беруна ва дохилии мазкур, фарқияти байни қурби расмии Бонки миллии Тоҷикистон ва қурби фурӯши доллари нақди ИМА, тавассути анҷомдиҳии амалиётҳои хариду фурӯши асъори хориҷӣ дар бозори ғайрибонкӣ аз меъёри муқарраршуда - 2 фоиза гузашта, аз 2,2 фоиз дар санаи 25.02.с.2020 то ба 6,7 фоиз дар санаи 19.03.с.2020 зиёд гардид.

Қайд намудан зарур аст, ки гузариш ба реҷаи “ҳадафгирии таваррум” дар амалӣ гардонидани сиёсати пулию қарзӣ, ки аз соли 2018 оғоз гардидааст, аз Бонки миллии Тоҷикистон истифодаи механизм ва усулҳои ба он мутобиқро талаб менамояд.

Айни ҳол, Бонки миллии Тоҷикистон баҳри коҳиш додани фишорҳои қурбӣ дар бозори дохилии асъор, бо истифода аз тамоми манбаъ, имконияту воситаҳо, аз ҷумла механизми хариду фурӯши рубли русӣ, иҷро намудани уҳдадориҳои бо асъори хориҷӣ ифодаёфтаро, таъмин намуда истодааст.

Вале, новобаста аз ин, фарқияти аз меъёр зиёди қурби расмӣ ва қурби фурӯши доллари нақди ИМА дар бозори ғайрибонкӣ зиёд гардида истодааст, ки барои ба танзим даровардани он амалӣ намудани як қатор чораҳои иловагии фаврӣ, зарур мебошанд.

Бинобар ин, Бонки миллии Тоҷикистон барои коҳиш додани фишорҳои қурбӣ, таъсири хавфҳои асъории ҷойдошта ва таъмини риояи меъёри фарқияти то ба 2 фоизаи байни қурби расмӣ ва қурби фурӯши доллари нақди ИМА ва аз байн бурдани фарқият дар бозори ғайрибонкӣ, тасҳеҳи (коррексияи) якдафъаинаи қурби расмии доллари ИМА-ро ба андозаи то 5,0 фоиз амалӣ менамояд.

Ин имкон медиҳад, ки воридот ва интиқоли маблағҳо тавассути низоми бонкии кишвар бештар гардида, манфиати иниқолдиҳандагони маблағҳо аз хориҷи кишвар ҳимоя гардаднд, шаффофияти амалиётҳо бо мизоҷон таъмин карда шавад ва фаъолияти ҳаннотон дар бозорҳои ғайрибонкии нақдӣ маҳдуд гардад. Ҳамзамон, мутавозунии қурби пули миллӣ ба зиёд шудани ҳаҷми содирот ва воридот мусоидат намуда, боиси афзудани даромади буҷети давлатӣ мегардад.

Бонки миллии Тоҷикистон бо тамоми масъулият вазъияти сиёсати қурбиро зери мушоҳидаю таҳлил ва назорат қарор дода, барои таъмин кардани суботи бозори дохилии асъор ва муътадил нигоҳ доштани қурби пули миллӣ воситаю имконият ва захираҳои заруриро истифода менамояд.

 

Таҷлили Наврӯзи байналмилалӣ дар Бонки миллии Тоҷикистон

19 марти соли 2020 дар Бонки миллии Тоҷикистон ҷашни байналмилалии Наврӯз бо баргузории ҷаласаи идона ва ташкили озмуни намоиши либосҳои миллӣ таҷлил карда шуд.  Чорабинии идонаро муовини Раиси Бонки миллии Тоҷикистон Лола Салимова ифтитоҳ намуда, фарорасии ҷашни байналмилалии Наврӯзи оламафрӯзро ба кормандони низоми бонкӣ ва дар симои онҳо, ба тамоми сокинони кишвар муборакбод гуфт.

Лола Салимова зикр намуд, ки Наврӯз аз муборактарин ҷашнҳои миллии мо тоҷикон ва дигар мардумони ҳавзаи Наврӯз маҳсуб шуда, аз замонҳои қадим то ба имрӯз бо ғояҳои олии башарӣ, дӯстию иттиҳод, созандагӣ, ободкорӣ, инсонпарварӣ ва шукргузории бепоён аз неъматҳои табиат мардумро гирди ҳам овардааст. 

Бо шарофати Истиқлолият ва дастури Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон Наврӯз дар баробари ҷашни Истиқлолият муҳимтарин ҷашни миллии мо эълон шудааст ва ҳамасола бо шаҳомати хос дар саросари ҷумҳурӣ таҷлил карда мешавад.

Ҳамчунин, моҳи феврали соли 2010 бо кӯшиш ва ташаббуси Пешвои миллат иҷлосияи 64-уми Маҷмаи Умумии Созмони Милали Муттаҳид дар хусуси ҷашни байналмилалӣ эълон кардани Наврӯз қатънома қабул кард ва ҷашни фархундаи Наврӯз ба ҷашни ҷаҳонӣ табдил ёфт ва акнун дар тамоми ҷаҳон ҷашн гирифта мешавад,-таъкид намуд муовини Раиси Бонки миллии Тоҷикистон Лола Салимова. 

Зимни чорабинӣ таъкид гардид, ки ҳар ҷашну маросими мардумӣ ҳикмат ва баракате дорад. Хусусан дар айёми Наврӯз, ки зиндагию рӯшноӣ, некию накукорӣ, сулҳу созандагиро меситояд ва мақоми инсонро азизу гиромӣ медорад, баргузории ойинҳои ҷуфтбаророн, хонабаророн, оташафрӯзон, гулгардонӣ, суманакпазӣ, аёдати беморон, ёд кардани гузаштагон, навозиши сари ятимону бепарасторон, хайру эҳсон ба ниёзмандону дармондагон ба анъанаҳои нек табдил ёфтааст.

Бо назардошти ин оини наврӯзӣ, Бонки миллии Тоҷикистон низ ба сифати сарпараст ба Хона-интернати беморони рӯҳии ноҳияи Ҳисор пайваста дасти мадад дароз мекунад ва ҳамчунин, минбаъд ҷиҳати тозаю покиза нигоҳ доштани макони зисту кор ва дар чор фасли сол ба наврӯзгоҳи ҳақиқӣ табдил додани он талош менамояд. 

Дар идомаи чорабинӣ барои таҷлили бошукуҳи ҷашни фархундаи Наврӯзи байналмилалӣ озмуни намоиши либосҳои миллӣ гузаронида шуд. Зимни баргузории озмуни намоиши либосҳои миллӣ дар Бонки миллии Тоҷикистон бонувони бонк либосҳои миллӣ ва анъанавии мардуми тоҷик, аз ҷумла атлас, адрас ва чаканро ба намоиш гузоштанд. Озмуни мазкурро ҳайъати комиссия баҳогузорӣ намуда, ғолибони онро муайян ва бо туҳфаҳои хотиравӣ сарфароз гардонид. 

Дар ҳамин гуна фазои идона чорабинии наврӯзӣ ба поён расид ва зимни ҷамъбасти он муовини Раиси БМТ Лола Салимова бори дигар ҳозиринро бо фарорасии Наврӯзи фархундапай муборакбод гуфт ва ба ҳамаи иштирокдорон муваффақият ва комёбиҳо таманно кард.

 

Шуъбаи матбуоти БМТ

 

 

 

Душанбе, Март 30 2020

То имрӯз 457171 адад кортҳои пластикии “City Card” ба мардум дастрас шуда, шумораи умумии терминалҳои “Express pay” 454 адад ва шумораи волидаторҳои насбшуда дар автобусу тролейбусҳо ва микроавтобуси “Мусича” 573 ададро ташкил медиҳад. Татбиқи ин лоиҳа боиси аз байн рафтани баҳсҳои тӯлонӣ миёни мусофиру ронанда ва кондуктор гашта, ҳаракати нақлиёти ҷамъиятӣ. Хосса автобусу троллейбус низ ба низоми нав даромад.  

Дар чанд шумораи гузашта мухбирони газетаи СССР дар бораи низоми электронии роҳкиро дар нақлиёти истифодаи умуми пойтахт ва фаъолияти корти нақлиётиву терминалҳои “City Card” навишта буданд. Пас аз нашри матлабҳои па дар пай масъулони ширкати “Авесто Гурӯҳ” бо мухбири газета вохӯрда. Эшонрог ба дафтари марказии худ даъват намуданд ва дар мавриди камбудиҳову нофаҳмиҳои ин низом шарҳи бештаре доданд.

Бояд гуфт, ки имрӯз дар ш. Душанбе  пардохти роҳкиро дар нақлиёти ҷамъиятӣ, махсус дар автобусу тролейбусҳои пойтахт тавассути низоми электронии пардохти “City Card” амалӣ шуда, татбиқкунандаи ин навгонӣ ширкати “Авесто Гурӯҳ” мебошад. Мутахасисони лоиҳа мегӯянд, ки ҳангоми роҳандозӣ намудани ин низом бовар надоштанд, ки дар ин мудати кӯтоҳ лоиҳа дар чунин сатҳ қарор мегирад. То имрӯз 457171 адад кортҳои пластикии “City Card” ба мардум дастрас шуда, шумораи умумии терминалҳои “Express pay” 454 адад ва шумораи волидаторҳои насбшуда дар автобусу тролейбусҳо ва микроавтобуси “Мусича” 573 ададро ташкил медиҳад. Татбиқи ин лоиҳа боиси аз байн рафтани баҳсҳои тӯлонӣ миёни мусофиру ронанда ва кондуктор гашта, ҳаракати нақлиёти ҷамъиятӣ. Хосса автобусу троллейбус низ ба низоми нав даромад.  

 

Пули терминалҳоро медузданд...

Бархе аз истифодабарандагони кортҳои нақлиётии “City Card” ҳанӯз ҳам тарзи дуруст истифода бурдани кортро пурра аз худ накарданд. Сокинон шикоят мекунанд, ки имрӯз дастрасӣ ва пур кардани суратҳисоби корт барояшон мушкил гардидааст. 

Зафар Бурҳонзода, директори иҷроияи ширкати “City Card” дар ин маврид мегӯяд, ки 3-4 ҳолати кор накардани терминал вуҷуд дорад, ки ин қабл аз ҳама қатъ шудани қувваи барқ, таъмин набудани шабакаи Интернет ва нодуруст истифода бурдани терминал мебошад. 

   -Яке аз сабабҳои асосии аз кор мондани терминалҳо дар он мебошад, ки сокинон ҳангоми дастрас ва ё пур намудани суратҳисоби худ ба терминалҳо пулҳои кӯҳнаю фарсуда, кортҳои нимшикаста, танга ва баъзан вақт, ҳатто коғаз ворид менамоянд, ки дар натиҷа терминалҳо аз кор мемонанд. Ҳолатҳое шудааст, ки бархе аз сокинон хунукназарона ё аз нодонӣ ба терминалҳо ҳатто шиносномаҳои пластикии худро ворид менамоянд. Ин амали онҳо ба дастрас кардани корт ва пур намудани мувозинати он ба дигар мусофирон халал мерасонад. Кормандони ширкати мазкур ҳамеша аз фаъолияти терминалу волидаторҳои насбшуда бохабар буда, назорати ҷиддӣ мебаранд. Назорат тариқи онлайн, яъне дар монитори насбшуда дар корхона ва телефонҳои мобилии шахсони масъул бурда мешавад ва дар ҳолати аз фаъолият мондани терминал мутахасисон аз ин бохабар шуда, ба макони қарордоштаи терминал ҳозир мешаванд, то мушкилиро бартараф созанд. Барои бартараф намудани ин мушкилиҳо ба мо вақт лозим аст, вале аз чӣ бошад сокинон ин нозукиҳоро фаҳмидан намехоҳанд. Баъзан вақт дар 1 шабонарӯз то 4-5 терминалҳои “Exspress Pay”, шикаста, маблағи дохили он дуздида мешавад. То аз нав барқарор намудани онҳо барои мо вақт ва маблағи калон лозим меояд, - афзуд Зафар Бурҳонзода.

 

Код ба ҷойи корт!

Бархе аз сокинон хоҳиш карда буданд, ки хизматрасонӣ ва истифодаи корти нақлиётиро афзун намоянд, ки тавассути 1 корт тавонанд на танҳо пули роҳкиро, балки маблағи дигар хизматрасиниҳо, аз ҷумла коммуналиро низ пардохт кунанд. Имрӯз ширкати “Авесто Гурӯҳ”  дар ин маврид як иқдоми хубе ба роҳ мондааст-бо гирифтани корт сокинон ва меҳмонон метавонад чӣ пардохти сӯзишворӣ, чӣ хариди мағоза, чӣ пули хӯрок дар тарабхона ва дигар хизматрасониҳоро супоранд. 

   -Ин лоиҳа тавассути корти миллии Бонки миллии Тоҷикистон роҳандозӣ шудааст. Ин кортҳо инчунин, дорои ҳамёни электронӣ низ ҳастанд. Ҳолатҳое мешаванд, ки мусофирон корти нақлиётии худро фаромуш ё гум карда, вориди нақлиёти ҷамъиятӣ шуда наметавонанд. Барои ҳамеша дастрас будани “City Card” мусофирон метавонанд дар телефони мобилии худ QR-коди корти худро ҷорӣ намуда, бе мушкилӣ ба волидатор наздик намоянду вориди автобус шаванд. Ин иқдомҳо баҳри сокинон бисёр хуб ва дар сатҳи баланд роҳандозӣ шудаанд, - қайд намуд Ҷомӣ Шарипов, роҳбари ширкати “City Card”.

 

Аз терминалҳо бояд дуруст истифода кард

Ба солҳои қабл қиёс карда метавон гуфт, ки имрӯз ин ширкати мазкур тавонист дар мудати кутоҳ ба бисёр мушкилиҳои мардум дар соҳаи нақлиёт, алалхусус баҳсу нофаҳмиҳо байни мусофир ва ронанда, баргардонии бақияпулӣ ва пардохтҳои хизматрасониҳои гуногун мусоидат намуда, барои сафар ва иҷрои дигар хизматрасониҳои ғайринақдӣ ба сокинон ва меҳмонони хориҷӣ шароити хубро фароҳам овард. Инчунин кортҳои имтиёзнок барои маъюбону нафаққахӯрон ва баъзе кормандони соҳаҳои мухталиф низ роҳандозӣ шудаасту онҳо имрӯз аз он бе мамониат истифода мебаранд. Татбиқкунандаҳои лоиҳа кӯшиш бар он медиҳанд, ки камбудию пешрафти ин лоиҳаро назорат кунанд. Дар оянда барои татбиқи дигар низому усулҳо дар ин соҳа корҳои муидро ба роҳ монда, мушкилиҳоро бартараф созанд. Сокинонро мебояд ба тарзи дуруст ва истифода аз терминалу волидаторҳо аҳамият дода, инчунин  хизмату фаъолият ва талоши кормандони ширкати “City Card”-ро ба назар гирифта, ҳангоми фаъол набудани терминал сабабҳои зикршударо дар хотир дошта, барои беҳтар шудани сатҳи хизматрасонӣ аз терминалҳо дуруст истифода баранд. 

 

Ситора Сафара, СССР

 

Чоршанбе, Март 18 2020

Раёсати Бонки давлатии амонатгузории Ҷумҳурии Тоҷикистон «Амонатбонк» бо самимияту ифтихори бепоён Шумо-модарон ва бонувони азизро ба муносибати, Рӯзи модар ва фаро расидани фасли баҳор табрику муборакбод гуфта, саодатмандиву сарбаландӣ ва муваффақиятҳои нав ба навро дар кору рӯзгоратон таманно дорад.

Бо пешниҳоди Пешвои миллат 11-сол аст, ки дар кишвари офтобиамон санаи 8-уми март ҳамчун Рӯзи модар бо шукӯҳи хосса таҷлил мешавад ва қайд намудани ин ид дар байни ҳамватанони мо ба ҳукми анъана даромадааст. Дар кишвари мо ҳамчун иди расмии давлатӣ эълон гардидани Рӯзи модар яке аз барҷастатарин нишонаҳои вусъат ва азамати фарҳанги таърихии миллии мост, ки ғунҷонидани анвои арзишҳои волои инсонӣ ва маънавиро дорад. 

Модарон ва бонувони азиз! Шумо ба мисли баҳор пурнакҳату муаттар, сабзу хуррам ва шодобу шукуфо буда, бо оғози фасли баҳор ва арафаи соли нави аҷдодӣ, яъне ҷашни Наврӯз тавъам омадани Рӯзи модар дар кишвари зебову офтобии мо рамзи нек аст. Яъне, соли нави мо бо арҷ гузоштан ба мақому манзалат, қадру қимат ва ҳурмату эҳтироми модарону занони иззатманду меҳрубони мо шурӯъ мешавад.

Бори дигар бо як ҷаҳон самимияту меҳр Рӯзи модар ва фаро расидани фасли эҳёи табиатро табрику таҳният мегӯем. Модарони азиз ба Шумо ва наздикону пайвандонатон саломатии бардавом ва хушбахтии бепоёнро таманно дорем. Бигзор ҳар саҳифаи китоби рӯзгоратон бо рақами саодату нусрат, саломативу хуҷастафолӣ, хайру баракат ва иқболу муваффақият зиннат ёбад. 

Ид муборак!

Сироҷиддин Икромӣ, Раиси Раёсати Бонки давлатии амонатгузории Ҷумҳурии Тоҷикистон «Амонатбонк»

 

Таҷлили «Рӯзи модар» дар БДА ҶТ “Амонатбонк”

Дар иртибот ба ҷашни «Рӯзи модар» дар маҷлисгоҳи БДА ҶТ “Амонатбонк” бо иштироки Раиси Бонк Сироҷиддин Икромӣ, шоири халқии Тоҷикистон Гулназар Келдӣ, ҳунарпешаи халқии ИҶШС, роҳбари гурӯҳи рақсии “Зебо“, Зебо Аминзода ва аҳли кормандони дастгоҳи марказии Раёсати Бонк, чорабинӣ баргузор гардид.

Сараввал Раиси Раёсат ҳамаи бонувонро ба «Рӯзи модар» табрик намуда, перомуни бузургии зан-модар ва эҳтироми зан дар ҷомеа ба ҳозирин ёдовар шуда, иброз доштанд, ки ҳамчун ҷашни расмии давлатӣ эълон шудани “Рӯзи модар” аз ҷониби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон гувоҳи равшан аз ҷойгоҳ ва мақому манзалати воло доштаи бонувон дар Ҷумҳурии Тоҷикистони соҳибистиқлол мебошад.

Баъдан шоири халқии Тоҷикистон Гулназар Келдӣ, ҳунарпешаи халқии ИҶШС, роҳбари гурӯҳи рақсии “Зебо“, Зебо Аминзода аз фазилат ва бузургии модар ёдовар шуда, аз ашъори худ ва шоирону нависандагони адабиёти тоҷик порчаҳои шеър қироат намуданд.

Инчунин, Раиси Шӯрои ҷавонони Дастгоҳи марказии Бонк, Сарбоз Фаррухзода аз номи ҷавонон ва кормандон, иштирокчиёнро бо қироати шеър аз ашъори Лоиқ Шералӣ табрик намуд. 

Ҳамзамон аз ҷониби Раиси Раёсат ба ҳамаи бонувон туҳфаҳои молиявии омоданамудаи Иттифоқи касаби Бонк, тақдим карда шуд. 

 

Ҳамкории дуҷониба байни БДА ҶТ “Амонатбонк” ва ҶС «Ширкати содиротию суғуртавии «KazakhExport»- и Ҷумҳурии Қазоқистон

Чанде пеш дар бинои марказии БДА ҶТ «Амонатбонк» Раиси Раёсати Бонк Икромӣ Сирроҷиддин Салом бо ҳайати расмии ҶС «Ширкати содиротию суғуртавии «KazakhExport»-и Ҷумҳурии Қазоқистон, ки таҳти роҳбарии  Муовини Раиси Раёсати Ширкати мазкур Калигазин Аслан ҷиҳати ба роҳ мондани ҳамкориҳои дуҷониба ва бисёрҷониба бо бонкҳо ва ташкилотҳои молиявии кишвар ба Ҷумҳурии Тоҷикистон ташриф оварда буд, мулоқоти дуҷониба баргузор намуданд.

Дар рафти мулоқот намояндаи расмии ҶС «Ширкати содиротию суғуртавии «KazakhExport» иброз намуд, ки Ширкат омодааст дилхоҳ пешниҳод ва дархостҳои соҳибкорони Ҷумҳурии Тоҷикистонро, ки аз Ҷумҳурии Қазоқистон молу маҳсулот ворид менамояд тариқи миёнаравии БДА ҶТ «Амонатбонк» дастгирӣ намуда, то ба манзил расидани молу маҳсулотҳо суғуртаи маблағи онҳоро таъмин намояд.

Дар навбати худ, Раиси Раёсати Бонк Икромӣ Сироҷиддин Салом иброз намуданд, ки БДА ҶТ «Амонатбонк» дар раванди сиёсати пешгирифтаи давлату Ҳукумати Ҷумҳурии Тоҷикиистон ҳамеша омодааст соҳибкорони ватаниро дар самти рушд додани соҳибкории хурду миёна ва дарёфти шарикони рушди боэътимод дастгирӣ намояд.

Ҳамчунин, пас аз мулоқоти дуҷониба дар толори маҷлисгоҳи Осорхонаи Бонк, воқеъ дар ошёнаи 10-уми бинои марказӣ, Раиси Раёсати БДА ҶТ «Амонатбонк» ва Муовини Раиси Раёсати ҶС «Ширкати содиротию суғуртавии «KazakhExport» Созишнома оид ба рушд додани ҳамкориҳои дуҷониба ба имзо расониданд.

Ҳадафи асосии ба имзо расонидани Созишнома, ин пеш аз ҳама зиёд намудани ҳаҷми гардиши молу маҳсулот миёни соҳибкорони Ҷумҳурии Тоҷикистон ва Ҷумҳурии Қазоқистон ба шумор меравад.

Бонки давлатии амонатгузории Ҷумҳурии Тоҷикистон «Амонатбонк» кӯшиш менамояд, ки дар оянда ҳам, нисбати амалӣ намудани дастуру супоришхои Асосгузори сулҳу Ваҳдати миллӣ, Пешвои миллат, Президенти Ҷумҳурии Точикистон, муҳтарам Эмомали Раҳмон дар самти дастгирии сохибкорони ватанӣ ва дарёфти сарчашмахои нави сармояи арзону дастрас хамаи тадбирхои муассирро амалӣ намояд. 

 

Шӯъбаи матбуоти БДА ҶТ «Амонатбонк» 

 

 

 

саҳ 6 аз 49

Китобҳо

Flag Counter