ХАБАРИ ДОҒ
Чоршанбе, Фев 12 2020

4 феврали соли ҷорӣ дар маҷлисгоҳи Раёсати БДА ҶТ «Амонатбонк» нишасти матбуотӣ оид ба натиҷаҳои фаъолияти солонаи БДА ҶТ «Амонатбонк» дар соли 2019 бо иштироки васеи рӯзноманигорон аз васоити ахбори оммаи дохилу хориҷи кишвар баргузор гардид.

Сараввал Раиси Раёсат Сироҷиддин Икромӣ оид ба натиҷаҳои молиявии Бонк дар соли 2019 ба ҳозирин маълумот пешниҳод намуданд. Сипас, рӯзноманигорон вобаста ба масъалаҳои мавқеи «Амонатбонк» миёни бонкҳои дохилӣ ва хориҷӣ, пешниҳоди қарзҳои ипотекӣ, қарзҳои батаъхирафтода ва баргардиши ин қарзҳо, арзиши кортҳои пардохтии бонкӣ, мӯҳлати қарзҳои истеъмолӣ ба шаҳрвандон бо фоизҳои дастрас, маблағҳои ғайринақдии воридшуда тариқи постерминалҳои Бонк дар соли сипаригардида, кӯмакпулиҳо ба ниёзмандон дар як сол, зиёд намудани марказҳои хизматрасонии бонкии фаъолияти шабонарӯзидошта дар пойтахт ва ҷалби бештари занон ба кор дар Бонк суолҳо пешниҳод гардиданданд, ки аз ҷониби Раиси Раёсат посухҳои мушаххас дода шуд.

Бояд қайд намуд, ки дар нишасти матбуотии мазкур Раиси Раёсат Сироҷиддин Икромӣ,сардори Раёсати молияи Дастгоҳи иҷроияи Президенти Ҷумҳурии Тоҷикистон Аламхон Наимӣ, муовинони Раиси Раёсат Фирдавс Зикр, Шаҳло Сайфзода, сардорони воҳидҳои сохтории Раёсати Бонк ва беш аз 40 рӯзноманигор ширкат доштанд, инчунин ҳамаи рӯзноманигорон бо варақаҳои иттилоотии натиҷаҳои молиявии «Амонатбонк» дар соли 2019 таъмин карда шуданд.

Раиси Раёсат Икромӣ С.С. аз ҳамаи рӯзноманигорон барои ширкат дар нишасти матбуоти сипосгузорӣ намуда, даъват ба амал оварданд, ки танҳо ҳамкориҳо бо ВАО ва Бонк омили пешравиҳо дар кор ва рафъи камбудиҳо дар ҳама соҳа хоҳад буд. Дар хотима, ҳамаи меҳмонон аз Осорхонаи «Амонатбонк» дидан намуда, якҷо бо Роҳбарияти Бонк акси хотиравӣ гирифтанд.

 

Ҷаласаи кории Раиси Раёсати БДА ҶТ "Амонатбонк" бо кормандони МХБ ва масъулони филиалҳои БДА ҶТ «Амонатбонк» дар ш. Душанбе

   Рӯзи 08.02.2020 дар бинои асосии Раёсати БДА ҶТ «Амонатбонк» ҷаласаи кории Раиси Раёсати БДА ЧТ «Амонатбонк» бо кормандони МХБ ва масъулони филиалҳои БДА ҶТ «Амонатбонк» дар ш.Душанбе баргузор гардид. 

Дар оғози ҷаласа Раиси Раёсат С.Икромӣ оид ба фаъолияти марказҳои хизматрасонии бонкии филиалҳои ш.Душанбе маълумот пешниҳод намуд.

Шумораи МХБ-и филиалҳои БДА ҶТ “Амонатбонк”дар ш.Душанбе ба санаи 31.01.2019 с.- 56 адад ё 10 %-и МХБ-и «Амонатбонк»-ро ташкил медиҳад.

Дар соли гузашта бобати иҷрои саривақтии амалиётхои бонкӣ, бартараф намудани тамбашавии мизоҷон ва беҳтар намудани сифати хизматрасонӣ ҳамаи марказҳои хизматрасонии бонкии филиалҳои ш.Душанбе пурра бо компютер ва таҷҳизоти муосири бонкӣ таъмин гардиданд. 

   Дар доираи ҷаласа натиҷаи нишондиҳандаҳои Марказҳои хизматрасонии бонкӣ дар монитор пешкаши кормандон гардида, барои бартараф намудани камбудиҳо пешниҳодҳои сардорони идора ва кормандон шунида шуд.

   Дар Паёми навбатии худ низ Президенти Ҷумҳурии Тоҷикистон Эмомалӣ Рахмон вобаста ба масъалаи ҷалби бештари бонувон дар «Амонатбонк» дастуру супориш доданд. Бо мақсади амалӣ намудани дастуру супоришҳои Роҳбари давлат дар зерсохторхои БДА ҶТ “Амонатбонк” шумораи занону духтарон дар марказҳои хизматрасонии бонкӣ 65 нафар ё 45% буда, 24%-и шумораи умумии занҳои МХБ-и БДА ҶТ “Амонатбонк”-ро ташкил медиҳад, ки ин нисбат ба соли гузашта (14%) зиёд мебошад.

Дар ҷаласа Раиси Раёсат С.Икромӣ барои боз ҳам беҳтар намудани сатҳу сифати хизматрасонӣ, муносибат бо мизоҷон, риояи давомоти корӣ, иштирок намудан дар корҳои ҷамъиятӣ ва ғайра супориш доданд. 

   Инчунин, роҳбарияти «Амонатбонк» барои пешравии кор ва ҳавасманд намудани кормандони бонк пешниҳод намуданд, ки соли 2020 дар миқёси кишвар озмуни “Беҳтарин МХБ- сол” баргузор карда шавад. 

 

Ташрифи собиқадорони «Амонатбонк» ба бинои нави Раёсати БДА ҶТ «Амонатбонк»

    Як гурӯҳ собиқадорони бонк, ки ҳанӯз 40-50 сол пеш ба ҳайси кадрҳои роҳбарикунанда дар «Амонатбонк» кор ва фаъолият мекарданд, аз шароити муосири имрӯзаи Бонк диданд карданд. Раиси Раёсат Сироҷиддин Икромӣ ва ҷавондухтарони фаъол меҳмононро дар ошёнаи якуми Бонк истиқбол намуда, ба ҳайси роҳбалад аз хизматрасониҳои бонкии муосир ошно карданд.

Ёдовар мешавем, ки дар ошёнаи 10-уми Бонк Осорхонаи «Амонатбонк» ҷойгир аст. Дар осорхонаи мазкур таърихи таъсиёбии аввалин хазинаҳои бонкдорӣ дар Тоҷикистон, намунаҳои пулу қоғазҳои қимматбаҳо ҷойгир буда, осорхона бо услиби шарқӣ сохта шудааст. Меҳмонон ҳар яке бо шавқу меҳри беандоза дар ин толори таърихӣ хотираҳои гузаштаи хешро ёдовар шуданд.

Баъд аз дидани осорхона собиқадоронро, дар толор-маҷлисгоҳ мутахассисони касбӣ ва ҷавонони Бонк истиқбол намуданд. Дар рафти вохӯрӣ собиқадорон ба ҷавонони имрӯза аз аввалин рӯзҳои фаъолияти кории худ, шароит ва бурду бохти Амонатбонки пешин ёдовар шуда, шароити имрӯзаи кориро афсонаи амалишудаи худ арзёбӣ карданд.

     Собиқадорон ба ҷавонон тавсия доданд, ки ба халқу миллат содиқона хизмат расонад, зеро Амонатбонк бонки мардумӣ аст ва дар Бонк барои халқу миллат фаъолият кардан мояи шараф ва ифтихор мебошад. Дар охир аз тарафи роҳбарияти Бонк ба собиқадорон чун рамзи нек, тӯҳфаҳо супорида шуд.

 

Шуъбаи матбуоти БДА ҶТ «Амонатбонк»

 

 

 

Панҷшанбе, Фев 06 2020

   Сироҷиддин Икромӣ, раиси Раёсати БДА ҶТ «Амонатбонк» дар мавриди низоми интиқоли маблағҳои «Золотая корона» гуфт, ки ин низом дар ягон рӯйхати Бонки марказии Россия ба қайд гирифта нашуда, ҳамчун ташкилоти қарзӣ низ эътироф нагардидааст. Ӯ ин нуқтаро дар нишасти ахири матбуотии хеш зикр карда, афзуд, ки ин низом новобаста аз надоштани сармояи асосӣ ва кафолатпулии муштариён, беш аз 80% ин бозори интиқоли маблағҳоро дар даст дошт.

   - Ин низом бояд ба бонк табдил ёфта, худро тибқи талаботи Бонки марказии Россия ба қайд бигирад ва бо риояи талаботи қонунгузории ҶТ пасон метавонад фаъолияти хешро дар кишвари мо идома диҳад. То ин корро накунад, наметавонад дар Тоҷикистон кор кунад, таъкид дошт Сироҷиддин Икромӣ.

   Дар идомаи сӯҳбат мавсуф қайд намуд, ки фаъолияти низоми «Золотая корона» барои муштариёни тоҷик хавф дошт, зеро ин низом сармояи бузурге дар даст надошта, дар сурати муфлисшавӣ имкони баргардонидани маблағи муштариёнро надошт. 

 

Чоршанбе, Фев 05 2020

    Ҷамолиддин Нуралиев, муовини аввали раиси Бонки миллии Тоҷикистон таъкид медорад, ки роҳандозии фаъолияти Маркази протсессингии интиқоли пул, ки дар оғози моҳи декабри соли гузашта дар кишвар ба кор шуруъ кард, ба хотири таъмини шаффофияти маблағҳои мардум, ҳифзи маблағҳои муҳоҷирон ва ба низом даровардани ин раванд, яъне интиқоли пул ба Тоҷикистону аз Тоҷикистон буда, он алакай натиҷаҳои хуб дода истодааст.

    - Муҳимтарин нуқта он аст, ки 20 соли гузашта шаҳрвандони тоҷик бидуни боз кардани суратҳисоб бо пешниҳоди код маблағро интиқол медоданду ба даст мегирифтанд. Дар ин самт тӯли ин солҳо механизми ҳимояи маблағи мардум аслан вуҷуд надошт ва низомҳои пулинтиқолдиҳанда, ки сармояи лозимаро надоштанду бе маблағи кафолатӣ фаъолият менамуданд, метавонистанд ҳар лаҳза муфлис гашта, пули интиқолшуда бисӯзанд. Ҳамакнун низомҳои пулинтиқолкунанда бо талаботҳои нави Бонки миллии Тоҷикистон мувофиқа намуда, кори худро дар асоси тартиби нави муқарраргардида ва бо гузоштани маблағи муайани кафолат-дар сурати муфлисшавӣ оғоз кардаанду бибунед, ки танҳо дар моҳи январи соли ҷорӣ ҳаҷми маблағи интиқолшуда назар ба ҳамин моҳи соли 2019 беш аз 8 миллион доллари амрикоӣ афзоиш ёфтааст. Ин маънои онро дорад, ки маълумотнокии молиявии шаҳрвандон ба маротиб беҳтар шуда, мардум ба кортҳо рӯ овардаанд. Ин худ 1 реформаи беҳамтост,-таъкид дошт Ҷамолиддин Нуралиев зимни нишасти матбуотӣ рӯзи 5.02.2020.

 

Ҷ.Ҳусейн, СССР

 

 

Чоршанбе, Фев 05 2020

    Мувофиқи иттилоои Бонки миллии Тоҷикистон дар соли 2019 дороии умумии ташкилотҳои қарзии молиявӣ 22-млрд. сомониро ташкил додааст. Нишондоди мазкур нисбат ба соли қабли 3,7 дарсад зиёдтар аст. 

    Тавре Ҷамшед Нурмуҳаммадзода, раиси БМТ иттиллоъ дод, соли 2019 дар кишвар дар маҷмуъ, 75 ташкилоти қарзии молиявӣ аз ҷумла 16 бонк, 1 бонки исломӣ, 22 ташкилоти амонатии қарзии хурд, 6 ташкилоти қарзии хурд, 30 фонди қарзии хурд инчунин 328 филиал  ва 1500 маркази хизматрасонии бонкии ташкилотҳои қарзии молиявӣ фаъолият намудаанд. 

Исмоилҷон Маликов, СССР

 

Чоршанбе, Фев 05 2020

    Дар нишасти матбуотии Бонки милли Тоҷикистон, имрӯз, 5.02.2020 баргузор шуд, хабар доданд, ки дар соли 2019 маърифати молиявии шаҳрвандони кишвар ба маротиб боло рафта, миқдори сураҳисобҳои бонкӣ барои муштариён дар ташкилотҳои қарзӣ кушодашуда нисбат ба соли 2018 15,4 дарсад афзоиш ёфта, 4 057 782 ададро ташкил додааст. 

    Миқдори умумии кортҳои пардохтӣ дар ин давра аз ҷониби бонкҳои ватанӣ  ба муомилот бароҷвардашуда, 2 483,9 ҳазорро ташкил дод. Нишондиҳандаи бола нисбати соли гузашта 36,7 дарсад бештар аст. 

Исмоилҷон Маликов, СССР

 

Ҷумъа, Янв 31 2020

 

Ҳавопаймоеро, ки чанд сол пеш дар фурудгоҳи Кӯлоб ба ҳабс гирифта буданд, фурухтаанд.

Як чархи ҳавопаймои “Аэробус А320”-и ширкати «East Air»  шаш сол пеш ҳангоми нишаст дар фурудгоҳи Кӯлоб осеб дид. Ба дунболи ҳодиса фаъолияти «East Air» тафтиш карданду муҷаввизи фаъолияташро гирифтанд.

Алӣ Комилзода, раиси фурӯдгоҳи байналмилалии Кӯлоб  дар бастагӣ ба қазия гуфт, 

“Додгоҳи иқтисодӣ бо чи маблағ он ҳавопайморо ба Суҳроб Баротов дод, ки ӯ ба мо маълум нест. Ин нафар ҳавопайморо ба касеи дигар савдо кард ва ӯ омада ҳавопайморо гирифта бурд. Рости чи қадар маблағ буд ва бо чи қадар маблағ онро савдо кард, ба мо дақиқ нест, вале ин ҳавопаймо дар фурудгоҳи мо буд”

Коршиносон арзиши ин ҳавопайморо ҳудуди 50 миллион доллар медоданд. Вале дар музоядае, ки 30-уми ноябри соли гузашта шуд, арзиши ибтидоии он 2млну 300 ҳазор сомонӣ, ё беш аз 230.000$ ИМА гуфта шуд. Соли 2015 мақомоти Тоҷикистон гуфтанд, ки ширкати «East Air»-ро бинобар риоя накардани талаботи бехатарӣ аз ҳаққи фаъолият маҳрум карданд.  Владимир Куимов, роҳбари ширкати “East Air” гуфта буд, ки дахолати рақибону рақобати носолим сабаби қатъи фаъолияти онҳо шуд. Ширкати «East Air» бо 5 ҳавопаймо 10 сол дар Тоҷикистон фаъолият дошт.

 

Баҳодур  Уроқов

 

саҳ 2 аз 43

Китобҳо

Flag Counter