Президенти Ҷумҳурии Тоҷикистон муҳтарам Эмомалӣ Раҳмон рӯзҳои 2-3 июни соли 2022 бо сафари расмӣ дар Ҷумҳурии Узбекистон қарор доштанд.

Дар доираи сафари мазкур сарони давлатҳои Тоҷикистону Узбекистон муҳтарам Эмомалӣ Раҳмон ва муҳтарам Шавкат Мирзиёев ба масъалаи рушди ҳамкорӣ ва истифодаи имкониятҳои мавҷуда дар соҳаҳои энергетика ва саноат, аз ҷумла дар бахшҳои саноати нассоҷӣ, хӯрокворӣ, пойафзолдузӣ, металлургӣ, коркарди маъдан, металлургияи ранга, дорусозӣ, нақлиёту коммуникатсия, сармоягузорӣ ва бонкдорӣ, инчунин дигар соҳаҳои барои ҳар ду кишвар манфиатовар таваҷҷуҳ зоҳир карданд.

Баъди анҷоми мулоқоту музокироти сатҳи олии Тоҷикистону Узбекистон дар ҳузур ва бо иштироки сарони давлатҳо 7 санади ҳамкорӣ ба имзо расид. Аз ҷумла “Ёддошти тафоҳум байни Департаменти мониторинги молиявии назди Бонки миллии Тоҷикистон ва Департаменти мубориза бо ҷиноятҳои иқтисодии назди Прокуратураи генералии Ҷумҳурии Узбекистон оид ба ҳамкорӣ дар соҳаи муқовимат ба қонунигардонии (расмикунонии) даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом” яке аз ин санади муҳим маҳсуб меёбад.

Дар маҷмӯъ, дар ҳошияи сафари расмии Президенти Ҷумҳурии Тоҷикистон ба Ҷумҳурии Узбекистон 15 санади нави ҳамкорӣ ба имзо расонида шуд.

Маврид ба зикр аст, ки дар сафари расмӣ ба Ҷумҳурии Узбекистон Президенти Ҷумҳурии Тоҷикистонро муовини якуми Сарвазири Ҷумҳурии Тоҷикистон, Вазири корҳои хориҷӣ, Ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ, вазирони энергетика ва захираҳои об, кишоварзӣ, нақлиёт, фарҳанг, саноат ва технологияҳои нав, Раиси Кумитаи давлатии сармоягузорӣ ва идораи амволи давлатӣ, Раиси Бонки миллии Тоҷикистон, Президенти Академияи миллии илмҳои Тоҷикистон, Сардори КВД “Роҳи оҳани Тоҷикистон”, Раиси Иттифоқи “Тоҷикматлубот”, Раиси вилояти Суғд ва дигар шахсони расмӣ ҳамроҳӣ намуданд.

Ба ҶСП “Душанбе Сити Бонк” иҷозатнома дода шуд

Бо қарори Раёсати Бонки миллии Тоҷикистон аз 9 июни соли 2022, таҳти №68, дар асоси Қонуни Ҷумҳурии Тоҷикистон “Дар бораи Бонки миллии Тоҷикистон”, Қонуни Ҷумҳурии Тоҷикистон “Дар бораи ташкилотҳои маблағгузории хурд” ва Қонуни Ҷумҳурии Тоҷикистон “Дар бораи фаъолияти бонкӣ” ба Ҷамъияти саҳомии пӯшидаи “Душанбе Сити Бонк” Иҷозатнома барои анҷом додани амалиёти бонкӣ бо пули миллӣ ва асъори хориҷӣ дода шуд.

Раиси Бонки миллии Тоҷикистон Холиқзода Ҳоким Ҳикматулло зимни супоридани Иҷозатнома ба И.в. Раиси Раёсати ҶСП “Душанбе Сити Бонк” Ақдодов Хуршед Назарабдолович барои боз ҳам беҳтар кардани фаъолият ва саҳм доштан дар рушди низоми бонкии кишвар, бахусус дар самти иҷрои дастуру супоришҳо аз Паёми Пешвои миллат ҷиҳати зиёд кардани қарздиҳӣ, баланд бардоштани сатҳу сифати хизматрасонӣ ба аҳолӣ муваффақият хост.

Тибқи қарори мазкур Иҷозатномаи ҶДММ ТАҚХ “Душанбе Сити” барои анҷом додани амалиёти бонкӣ аз 16 июли соли 2018, №0000092, ки бо қарори Раёсати Бонки миллии Тоҷикистон аз 13 июли соли 2018, №96 дода шудааст, бинобар табдилёбӣ ба бонк аз эътибор соқит дониста шуд.

Департаменти назорати бонкӣ ва Идораи низоми пардохт уҳдадор гардиданд, ки дар Феҳристи ташкилотҳои қарзӣ ва Маълумотномаи “Рамзҳои мушаххаси бонкии ташкилотҳои қарзии молиявии Ҷумҳурии Тоҷикистон” сабти дахлдорро ворид намоянд.