ХАБАРИ ДОҒ
Чоршанбе, Июл 31 2019

 

   Дар соли равон тибқи маълумоти омории Вазорати маориф ва илми ҶТ дар қаламрави ҷумҳурӣ аз ҳисоби ҳамаи сарчашмаҳои маблағгузорӣ дар нимсолаи аввали соли 2019 25 бинои муассисаи таълимӣ ва бинои иловагӣ дар назди муассисаҳои таълимӣ барои 6409 ҷойи нишаст бо маблағи умумии 89 миллиону 891 ҳазор сомонӣ сохта ба истифода дода шуд.

   Бино ба иттиллои Нуриддин Саид, вазири маориф ва илми мамлакат, ҳамзамон сохтмони 244 бинои муассисаи таълимӣ ва бинои иловагӣ дар назди муассисаҳои таълимӣ барои 70 ҳазору 591 ҷойи нишаст идома дошта, аз ин шумора сохтмони 37 бинои муассисаи таълимӣ барои 12 ҳазору 446 ҷойи нишаст аз ҳисоби соҳибкорон ва ба тариқи ҳашар сохтмони 48 бинои иловагӣ дар назди муассисаҳои таълимӣ барои 5 ҳазору 659 ҷойи нишаст давом дорад.

 

 

Панҷшанбе, Июл 25 2019

   Шодиён Муҳаммад, ректори Донишгоҳи давлатии Бохтар зимни нишасти матбуотӣ иброз намуд, ки дар тӯли 6 моҳи соли ҷорӣ 87 нафар донишҷуён хориҷ карда шудаанд. 

   Сабаби хориҷшудан аз донишгоҳ-ин пардохт нагардидани маблағи шартнома ва роҳ додан ба қонуншиканӣ мебошад. 

   

Баҳодур Уроқов, СССР

 

Душанбе, Июл 22 2019

   Нуриддин Саид, вазири маориф ва илми ҶТ дар нишасти ахири матбуотӣ, ки рӯзи 19.07.2019 сурат гирифта, ба ҷамъбасти натиҷаҳои соҳаи маориф ва илми кишвар дар нимсолаи 1-уми соли ҷорӣ бахшида шуда буд, гуфт, ки вазорат ният дорад дар назди коллеҷи техники Донишгоҳи техники Тоҷикистон фабрикаи истеҳсоли пойафзоли бачагона таъсис диҳад ва барои ин кор алакай муттахассисон аз Ҳиндустон низ ҷалб шудаанд.

   - Модоме, ки сарулибоси мактабӣ ягона аст, пас попӯш ҳам ягона мешавад. Чӣ бадӣ дорад, вақте хонандагони мактаб бо пойафзоли ватанӣ таъмин шаванд? Тасаввур кунед, 2 миллион хонанда ба ғайр аз студентҳо дорем. Агар дар 1 мавсим 1 хонанда се ҷуфт пойафзол пӯшад, солона шаш миллион ҷуфт ва шояд аз ин бештар шавад. Ҳоло мо донишҷӯёнро ҳисоб накардем. Дар тамоми гӯшаю канори мамлакат марҳила ба марҳила истеҳсоли пойафзори бачагона роҳандозӣ мешавад ва соҳибкорони ватанӣ низ ба ин раванд ҷалб гарданд. Гумон мекунам, ин қарор дуруст аст. Майда-майда истеҳсоли пойафзорро сар мекунем, фурӯш озод мешавад, - таъкид намуд Нуриддин Саид. 

СССР

 

Ҷумъа, Июл 19 2019

 

 Ҳукумати Федератсияи Россия тасмим гирифтааст дар минтақаҳои гуногуни Ҷумҳурии Тоҷикистон 5 мактаб бисозад. Дар ин бора рӯзи 19.07.2019 зимни нишасти матбуотӣ Нуриддин Саид, вазири маориф ва илми кишвар хабар дод.

   Бино ба иттилои вазир, айни замон тарҳи бинои ин мактабҳо лоиҳакашӣ шуда, ба ҳукумати Федератсияи Россия барои пешниҳоду баррасӣ фиристода шудаанд. Ин мактабҳо барои 1240 нафар хонанда бо назардошти тамоми имконоти муосири омӯзишӣ дар Душанбеву Хуҷанду Бохтару Кӯлоб ва Турсунзода бунёд хоҳанд ёфт. 

Арзиши лоиҳавии ҳар 1 мактаб 4,7 миллион долларӣ дар назар дошта шудааст.

 

СССР

 

Ҷумъа, Июл 19 2019

  Нуриддин Саид, вазири маориф ва илми ҶТ имрӯз зимни нишасти матбуотӣ оид ба ҷамъбасти фаъолияти нимсолаи соҳаи маориф ва илми кишвар афзуд, ки айни замон дар мамлакат ҳеҷ зарурияте барои гузаштан аз алифбои кириллӣ ба алифҳои форсӣ нест.

   - Мо нияти аз алифбои кириллӣ ба алифбои форсӣ гузаштанро надорем ва ҳеҷ зарурияте барои ин гузаришро намебинем. Дар баробари ин хонандагони синфҳои 7-8-и мактабҳои миёна фанни «Алифбои ниёгон»-ро меомӯзанд ва дар ин муддат метавонанд ин алифборо аз худ карда, хондану навиштанро ёд бигиранд, ин кофист, - таъкид дошт Нуриддин Саид, вазири маориф ва илми ҶТ.

СССР

 

Ҷумъа, Июл 05 2019

 

    Доктори илмҳои химия, мудири лабораторияи Институти химияи ба номи В.И. Никитини  АИ ҶТ Зайниддин Муҳиддинов барои 14 ихтирооти дар истеҳсолот татбиқшуда, доктори илмҳои биологӣ, сарходими илмии Институти  ботаника, физиология ва генетикаи АИ ҶТ Қурбоналӣ Партоев барои 10 ихтирооти дар истеҳсолот татбиқшуда ва устоди Донишгоҳи техникии Тоҷикистон ба номи М.С. Осимӣ Парвиз Солиев барои 21 шаҳодатномаи навоварӣ, ки ҳамаи онҳо дар соҳаи маориф татбиқ шудаанд, ғолибони озмуни  ҷумҳуриявии «Ихтироъкорон ва навоварони беҳтарини Тоҷикистон» гардиданд. Онҳоро бо «Ҷоми Академияи илмҳои Ҷумҳурии Тоҷикистон» сарфароз намуданд.

    Чуноне ки АМИТ «Ховар» хабар медиҳад, озмун аз рӯйи 3 номинатсия-«Ихтироъкори беҳтарини Тоҷикистон» аз рӯйи патент ё нахустпатенти ҶТ, ҳамчунин аз рӯйи патенти авруосиёгӣ ё патенти дигар давлати бо ишораи Тоҷикистон ҳифзшаванда, «Ихтироъкори беҳтарини Тоҷикистон» аз рӯйи шаҳодатномаи муаллифӣ барои ихтироъ, «Навовари беҳтарини Тоҷикистон» аз рӯйи  санадҳои тасдиқкунандаи навоварӣ эълон ва гузаронида шуд. Дар озмун қариб 60 нафар ихтироъкорон ва навоварон аз муассисаҳои илмии мамлакат иштирок намуда, дастовардҳои илмии хешро муаррифӣ намуданд.

   Мақсад аз эълон ва гузаронидани озмун ин пурзӯр намудани фаъолияти инноватсионӣ ва ихтироъкорию навоварӣ дар муассисаҳои илмию таҳқиқотӣ ва таҳсилоти олии касбӣ,  муаррифии ихтироот ва татбиқи онҳо дар иқтисодиёти кишвар,  ҳамчунин  аз ҷиҳати моддӣ ҳавасманд гардонидани беҳтарин ихтироъкорон ва навоварони ҷумҳурӣ буд.

   

 

саҳ 2 аз 17

Китобҳо

Flag Counter