ХАБАРИ ДОҒ
Ҷумъа, Фев 14 2020

   Бо Фармонҳои Президенти ҶТ Эмомалӣ Раҳмон аз 14.02.2020 Гулмаҳмадшозода Давлатшоҳ Қурбоналӣ ва Исматуллозода Ширин Исматулло муовинони Сарвазири мамлакат таъин гардиданд. 

   Гуфта мешавад, ки Фармонҳои мазкур барои тасдиқ ба Маҷлиси Олии ҶТ пешниҳод шуданд.

 

Ҷумъа, Фев 14 2020

Раиси вилояти Суғд Раҷаббой Аҳмадзода доир ба масоили вобаста ба делимитатсия ва демаркатсия дар марзи Тоҷикистону Қирғизистон дар минтақаи Исфара ва Боткент  ибрози назар карда, таъкид намуд,  ки ҳоло аз ҷониби комиссияи байнидавлатӣ масъали додугирифти замин байни 2 кишвар идома дорад:

 “Гуфтушунид рафта истодааст. Ман боварии комил дорам, ки масъалаҳо бо роҳи дипломатӣ ва гуфтушунид ҳал карда мешавад. Мо ягон ваҷаб заминро намедиҳем. Ворух анклав нест”,- гуфт раиси вилояти Суғд, зимни нишасти матбуотии худ ба рӯзноманигорон. Вале раиси вилоят, дар мавриди он ки Тоҷикистон кадоме аз минтақаҳои худро ба ҷониби Қирғизистон барои иваз пешниҳод кардааст, чизе нагуфт.         

Қаблан итилоъ дода шуда буд, ки  Қирғизистон 2 қитъаи наздисарҳадӣ – Ариқ-Аста дар деҳаи Оқсойи ноҳияи Ботканд ва Самарқандак дар деҳаи Самарқандакро барои иваз ба Тоҷикистон пешниҳод кардааст. 

 Гуфта мешавад, комиссия бо дарназардошти харитаҳои солҳои пешин масъалаи делимитатсия ва демаркатсия дар марзро баррасӣ дорад ва қарор аст, ки ҷонибҳо ба наздикӣ ба тафоҳум оянд. Ба иттилои сарчашмаҳо аз рӯйи натиҷаҳои 6 вохӯрӣ 134 харитаи топографӣ таҳия шудаанд. Гурӯҳҳои корӣ 120 километр қитъаи сарҳадро таҳқиқ карда, ба хулосае расиданд, ки дар ҳамаи харитаҳо 114 километр дуруст нишон дода шудааст.

 Ҷоиз ба зикр  аст, ки Тоҷикистону Қирғизистон 976 километр марзи муштарак доранд, ки танҳо 504 километри он аломатгузорӣ шудааст. Азбаски 472 километри дигар то ҳол  номуайян аст, сари ҳар вақт бо сабабҳои мухталиф муноқишаҳо дар минтақаҳои марзии ин 2 кишвар сар мезанад. Ба маълумоти сарчашмаҳо аз оғози соли 2019 дар сарҳади ҳамсоякишварҳо ҳудуди 10 низои марзӣ ба амал омадааст, ки бо марги чанд нафар аз сокинони Тоҷикистон ва ҳам Қирғизистон анҷомид. 

Ҷаҳонгир Мирсалимов

Махсус барои СССР

 

Чоршанбе, Фев 12 2020

 

(Оё мардум вакили худро мешиносад? Хулоса дар шахсияти 1 тан...)

5 сол муқаддам, аз ҳавзаи интихоботии Панҷакент №21, собиқ раиси шаҳри Панҷакент Хисрав Абдуназар вакили парлумон таъин гардид. Барномаи пешазинтихобии ӯ беш аз 30 бандро ташкил медод, ки барои ба ёди худи вакилу интихобкунандагони ҳавза овардан онро инҷо кӯтоҳ карда меорем: 

1.Андешидани чораҳои мушаххас ҷиҳати таъмини ғановати буҷети давлатӣ ва маҳаллӣ тавассути ҷалби сарчашмаҳои истифоданашуда ва баланд бардоштани маърифати андозсупорандагон;

2.Воридоти технологияи муосир бо ҷалби сармояи хориҷӣ ва соҳибкорони ватанӣ ҷиҳати ташкили  корхонаҳои нави хурду миёна...

3.Мусоидат дар эҳё ва рушди ҳунарҳои суннатии кашидадӯзиву қолинбофӣ ва пазандагӣ...

4.Мусоидат дар таъмини иштироки фаъолонаи соҳибкорони ватанӣ дар ғановати бозори дохилӣ...густариши шарикии бахшҳои хусусӣ ва давлатӣ;

5.Ширкат дар таҳияи Барномаҳои миллии таъминоти аҳолӣ бо оби нӯшокӣ, нерӯи барқ ва гармӣ тавассути бунёди неругоҳҳои барқи обии хурд ва истифодаи сӯзишвориҳои алтернативӣ;

6.Чораҷӯӣ ҷиҳати таъмини фаъолияти мӯътадили корхонаҳои саноатии муваққатан азкорбозмонда ва тозабунёд, дар самти истеҳсоли молҳои рақобатпазир ва воридотивазкунанда;

7.Ба анҷом расонидани таҷдиди шоҳроҳи Айнӣ-Панҷакент;

8.- Ба истифода додани коргоҳи дуюми ҶДММ КМ «Зарафшон»;

9.- Сохтмони хати баландшиддати 220 кВ «Айнӣ – зеристгоҳи Рӯдакӣ»;

10.- Сохтмони зеристгоҳҳои барқии 110 кВ «Қавола» ва «Хамиртеппа»;

11.- Сохтмони хонаи саломатӣ дар мавзеи навбунёди Деваштичи Ҷамоати деҳоти Халифа  Ҳасан;

12.- Сохтмони бинои шӯъбаи ёрии таъҷилӣ дар беморхонаи марказии шаҳр; 

13.- Таъмир ва тармими шабакаҳои гармидиҳии  беморхонаи марказии шаҳри Панҷакент.

14.- Аз таъмири асосӣ баровардани кӯдакистони №7;…

   Ба фиркам кофист…!

Коршиносони шаҳри Панҷакент мегӯянд, қариб нисфи пунктҳои барноми Хисрав Абдуназар иҷроношуда боқӣ мондааст. Он корҳое, ки дар ин муддат амалӣ гардиданд, на бо мусоидати депутаташон амалӣ шудаанд.  Балки кори ҳамарӯза иҷро мешудаи идораву корхонаҳо буд. Мактабҳо боз чун ҳамешагӣ аз ҳисоби хонандагон таъмир гардиданд, роҳу ҷодаҳоро шахсони сахӣ ва ё тариқи ҳашар поккорӣ намуданд ва ғ. ва ҳ. 

Вале ин нуктро мӯҳтарам вакили халқ аз Панҷакенти бостонӣ радд карда наметавонад, ки дар муддати 5 сол депутатии ӯ, чанд корхонаи саноатӣ аз қабили корхонаи “Тамоку”, Заводи биринҷ  ва “Шарбат” пурра аз байн рафтанд. 

Хуршед Фозилов, Панҷакент, СССР

PS: Он бандҳое, ки зерашон хат кашида шудааст, тамоман иҷроношуда боқӣ мондаанд.

 

Панҷшанбе, Фев 06 2020

 

Агар вакилони ояндаи парлумони Тоҷикистон низ аз ҳамдиёри худ - депутати Думаи давлатии Россия Раҳим Азизов ибрат гирифтаву ба ӯ пайравӣ мекарданд, нур бар болои нур мешуд...

Азизов Раҳим Азизбоевич – ходими намоёни сиёсиву давлатии Россия, депутати Думаи давлатӣ аз ҳавзаи интихоботии якмандатии вилояти Киров, дар шабакаи ҷаҳонии интернет сомона ва дар шабакаи Фейсбук саҳифаи расмии худро (https://www.facebook.com/azimov2016/) дорад.  Ӯ аз фаъолияти вакилии хеш мунтазам ахборот пахш мекунад, дорои қабулгоҳи электронии худ буда, бо интихобкунандагони хеш ҳамеша дар тамос аст.

Хотиррас мешавем, ки Раҳим Азизов ҳамдиёри мо, зодаи шаҳри Исфара, нахустин тоҷик дар парлумони Россия аст.

Мавсуф тавассути сомонаи расмӣ ва саҳифаи фейсбукиаш фаъолияти депутатӣ, раванди амалигашти Барномаи пешазинтихоботӣ ва иҷрои дархостҳои интихобкунандагони худро ошкору шаффоф инъикос мекунад.

Чун айни замон дар арафаи чорабинии муҳими сиёсӣ - Интихоботи даъвати нави вакилон ба Маҷлиси намояндагони Маҷлиси Олии Ҷумҳурии Тоҷикистон қарор дорем, тавсия мегардад, ки вакилони нави парлумони мо низ аз чунин иқдоми ҳамкасбони руси худ- депутатҳои Думаи давлатии Россия бояд амалан пайравӣ бикунанд.

Икбол Тешаев

Журналист

 

Аз редаксия: Воқеан ҳам кадоме аз депутатҳои мо, ки ҳамакнун мӯҳлати ваколаташон поин мерасад, сайти интернетӣ, саҳифаи фейсбукӣ, твиттер, блог доранд? Медонем, ки аксарият бо номҳои мустаор ба Фейсбуку шабакаҳои иҷтимоӣ дохил мешаванд, вале аз ифшои номи аслии хеш метарсанд. Суоле матраҳ аст, вакиле, ки бо номи худ дар олами виртуолӣ 1 ҳарф гуфта натавонад, магар манофеи миллату давлатро ҳифз карда метавонад? Посух аз туст, хонанда.

Рӯиҳамрафта, вакили мардумӣ аз ҳамин ноҳияи бостонӣ-Мавзуна Шамсиддинзода, ки вакили мардумӣ дар парлумони касбӣ буду ӯро боз ҳам барои навбати 2-ум ба номзадӣ пешбарӣ кардаанд ва 100% гарант ҳаст, ки боз депутат мешавад, боре ҳам назари худро дар мавриди хушунат дар марз бо Қирғизистон нагуфтаву расман аз манофеи мрзии Тоҷикистон, ҳуқуқи даҳҳо ҳазор сокини Воруху Чоркӯҳ, ки пайваста поймол мешаванд, ҳифозат накардааст. Ӯ на саҳифаи Фейсбукии фаол дораду на твиттеру на блог ва на сайти вежаи интернетӣ. Пас, меарзад, ки чунин нафарро дубора депутат интихоб куне(м)д? Шояд нафаре аз Исфара ба парлумон равад, ки ақаллан манофеи марзии ватани моро дар сатҳи баландтарин ҳаллу фасл кардаву дар набардҳои иттилоотии интернетӣ чизе гуфта тавонад??? 

 

 

Панҷшанбе, Янв 30 2020

Иззат ва шарафи миллатро дар назди дигар миллатҳо баргардонидан, оташи фахри миллиро дубора афрӯхтан барои «одамвор, озодона, дар ватани худ зистан ва роҳат фавтидан дар хонаҳои худ»…

Тезиси 13-уми Сионизм…

…Ҳоло саросема нашавед ва барои ҳукми банда сабр кунед: Зеро ман чизеро ба шумо мегӯям, ки тӯли даҳсолаҳо гӯшатон бо ҳақорат садо медод;

-Барои раҳоӣ аз вартаи имрӯза Тоҷикистон бояд аз методи давлатдориву давлатсозии Исроил кор бигирад!

Тоҷикистон, агар хусумати пиндор ва ҷаҳолати таассубро канор гузорем, ки бо номи яҳудро шунидан, аз ғазаб мӯямон сих мехезаду худ намедонем чаро…бояд бо ана ҳамон роҳе сӯи давлатсозӣ ҳаракат кунад, ки Исроил мекард. Зеро ин 2 давлат шабоҳати хеле олӣ ба ҳам доранд. Бори дигар мегӯям, ки таассуби мазҳабиро канора гузоред. Сухан сари методи давлатдорист, на чизи дигар:

Тоҷикистон давлатест, ки бо ақвоми турку муғултабор ҳаммарз аст. Ӯзбакистон, Қирғизистон, Қазоқистон, Туркманистон (бо дуи ахир марз ҳам надошта бошем, дар маҳдудаи умумӣ ба сар мебарем) ва аз ҷониби шарқ Хитойи Бузург. Агар ба антропологияи ин ақвом назар андозем, маълум мешавад, ки ягон умумияти хуниву фарҳангӣ онҳо бо мо надоранд. Ин дар ҳолест, ки бо ҳамдигар хеши наздиканд! Чизе монанд байни давлати Исроилу атрофиёнаш ҳис кардед?

Имрӯз, мо худро фиреби назар медиҳем, ки Қазоқистону Туркманистон дӯстони моанд. Бовар кун, хонанда, ин дӯстӣ то соатест, ки бо бародарони ҳамхуни ишон нифоқ надорем. Вагарна чеҳраи асили ин дӯстонро медидем!

Ҳоло ки конфликт бо Қирғизистон сар зад, дидем, ки Бишкек дар ситам на камтар аз Тошканд будааст. Тошканд, бо ҳама бадкорияш роҳҳои моро куллан намебаст. Аммо қирғизҳо дар 2 соат ҳама самтҳоеро, ки моро бо Хитой ва Русияву Қазоқистон мебурданд, баст!!! Огаҳон медонанд, ки қирғизу қазоқ аслан 1 миллати қарақирғизанд, ки онҳоро СССР ба 2 республика ҷудо карда буд. Дар сурати ташдиди конфликт ба фикри ту, хонанда, оре, маҳз туе, ки фикр дорӣ, «Сайёф ту гуфта, маро ҳам дар назар дорад?», қазоқҳо ба кадом ҷониб майл мекунанд: Тоҷикистони бегона ва ё Қирғизистони ҳамхуну ҳамфарҳангу ҳамзабон?

Аз сӯи дигар мо низ давлатҳои ҳамхуну ҳамфарҳангу ҳамзабон дар ин қора дорем: Афғонистони ба коми бало ғӯтида ва Эрони ғайрмазҳаб. Ҷои пӯшиш нест, ки барои Эрон мазҳаб ва он ҳам шиъа болотар аз забону фарҳанг меистад ва мутаассуф, ин ҳақиқати ҳол аст. Афғонистон бошад ба коми фашизми паштуӣ ва таассуби мазҳабӣ чунон дармондааст, ки роҳи раҳоӣ дар ҳамин … аср надорад. Ягона роҳ тақсими Афғонистон ба 2 давлати Тоҷику паштун аст, ки табиист, то дарки ин ҳақиқат, мутаассибин боз чанд даҳсола ҷангу хунрезӣ хоҳанд кард. Яъне Тоҷикистон аз 4 тараф 1 иттифоқчии воқеӣ надорад. Боз чизе ба хотират наомад, хонанда? Оре, давлати Исроил ҳам маҳз чунин аст!

Акнун роҳу усули давлатсозии қавми яҳудро бояд омӯхт, ки чигуна тавонистанд, дар миёни ақвоми бегона ва ҳамхун (он ҷо ҳама арабу ин ҷо ҳама турктабор!) давлати қавӣ созанд? Онҳо такя ба дониш ва ҳаммиллатон карданд! Пас чаро мо такя ба ин 2 ҷанбаи ҳаётсоз накарда бошем?

Дар аввалҳои асри 20 муҳоҷирини яҳудро, дар Аврупо фашистон таҳқиру табъиз мекарданд ва дар кӯчаҳо бе ягон ҷазову бозпурсие мекуштанд, месӯзониданд, сарашонро мебурриданд. Еврей ҳатто ҳуқуқи сагу гурбаи хонагиро дар Германия надошт. Вазъияти шинос не? Ва ана ҳамин қатлу куштору таҳқиру дашноми миллат ин қавмро маҷбур кард, ки пас аз Ҷанги дуввуми ҷаҳонӣ аз маҳалгароиву ҷудоихоҳии мазҳабӣ, яке шаванд ва давлати абарқудрати худро созанд!

Маскавро кашф намекунам, агар гӯям, ки он чӣ дар Русия сари миллати шарифи Тоҷик меравад, дар Германия сари қавми яҳуд мерафт! Онҳо аз ин дарси ибрат гирифтанду иттифоқ бастанд, такя бар донишу маърифат заданд ва давлати худро мустаҳкам намуданд. Мо чӣ мекунем?

Агар ба маҳалгароӣ, низоъандозӣ, таборпарастӣ, ихтилоф ва ҷудоихоҳӣ ҳатто дар соате давом диҳем, ки «таджик» аллакай худ ҳақорат шудааст дар Русия ва ҳамсоякишварҳои мо, пас рӯ ба нестӣ мениҳем. Мо на беҳуда таклифи 1 сокини Бадахшонро, дар шумораи қаблӣ, нашр кардем, ки мехост дар паспорт миллаташро «помирӣ» нависад: бовар кун, хонанда, ин на танҳо иддаои 1 нафар аз Помир аст. Ҳадафи душманони мо дар Русия, Ӯзбаку Қирғизу Қазоқ…истон ҳам ин аст, ки тавассути таҳқири миллӣ Тоҷикро маҷбур кунанд, то аз ҳайсияташ ор кунаду поратар гардад ва ҳам мегардад. Вале агар аз методи яҳудӣ кор гирему иттифоқ бандем ва банди 13-и қонуни сионизмро кор фармуда, шарафу Ғурури Миллиро ҳифз ва барқарор кунем, он гоҳ чӣ мешавад? Суоли матраҳ аст, албатта…

PS: Сиони́зм (ивр. צִיּוֹנוּת, тсийону́т-аз номи кӯҳи Сино дар Иерусалим-Байтулмуқаддас)-ҳаракати сиёсӣ, ки ҳадафаш иттиҳод, эҳёи қавми яҳуд, бунёди давлати миллӣ ва ҳифзи шарафу ғурури ҳар яҳудӣ дар сартосари олам аст…

 

Ҷумъа, Янв 24 2020

   Тавре қаблан хабар дода будем, бо Фармони Президенти ҶТ Маҳмадсаид Шоҳиён аз вазифаи раиси Кумитаи телевизион ва радиои назди Ҳукумати ҶТ озод карда шуда, ба ҷойи Носир Раҳмон раиси киностудияи «Тоҷикфилм» таъин гардид.

    Инчунин, тибқи иттиллои дарёфта, Завқӣ Завқизода, ки то ин дам ба ҳайси муовини вазири рушди иқтисод ва савдои ҶТ фаъолият мекард, ба ҷойи Неъматулло Ҳикматуллозода вазири рушди иқтисод ва савдо таъин карда шуд. Неъматулло Ҳикматуллозода аз ин пас дар вазифаи ёрдамчии Президенти ҶТ оид ба масаъалаҳои иқтисодӣ кор хоҳад кард.

    Бино ба хабари расида Аҳтам Абдуллозода, раиси Кумитаи кор бо ҷавонон ва варзиши назди Ҳукумати ҶТ низ аз вазифаи бар дӯш доштааш, барканор гашта, ба вазифаи муовини аввали раиси Дастгоҳи иҷроияи Президенти ҶТ таъин гардид. Гуфта мешавад, ки Шамсиддин Орумбекзода ба нафақа гуселонида шудааст.

Тағийротҳо давом доранд ва мо пайгири он ҳастем. Мо метавонем!

 

саҳ 5 аз 81

Китобҳо

Flag Counter