Ассалому алейкум ҳайати эҷодӣ ва аҳли  ихвон-ал СССР! Дар бораи китобхонаҳои хурдакаки сарироҳии Лондон мутолиа намуда, фикр кардам, ки дар мо ҳам бояд чунин китобхонаҳо бошанд. Бисёр олӣ мешуд, ки дар истгоҳҳо, боғҳои истироҳатӣ ва дигар ҷойҳои ҷамъиятии Душанбею Хуҷанд, Панҷакенту Бохтар, Кӯлобу Хоруғ, Ҳисору Истаравшан ва умуман дар шаҳрҳои бузургу серодам чунин ҷевонҳо гузошта мешуд. Шумо дар ин маврид чи мегӯед СССР-чиёни азиз?

Исмоилҷони Саиднуриддин, 

ш. Душанбе, тел: 911099049

Аз СССР: Мо розӣ! Вале масъулини китобқимоби шаҳру навоҳӣ чӣ мегуфта бошанд ба ин пешниҳодатон? Оё то амр аз Боло шудан қарор мешинанд ва ё коре мекунанд?-суоли матраҳ ин аст...

 Истифодабарандагони шабакаҳои иҷтимоӣ, хосса занон тарафдори ба маҳбас кашида шудани ин 3 нафар, алалхусус Матлуба Кулиева, ки худ модар аст, буда, ҷазои ба инҳо додашударо ҷиддӣ ва сахт ҳисоб намекунанд. Бархе ҳатто пешниҳод намуданд, ки ҷавонзанро барои ин кирдораш аз ҳуқуқи модарӣ маҳрум созанд!

«Арӯси замонавӣ», ҳабси «блогерон», таҳқири ноболиғ 

Яке аз чунин ҳолатҳо, яъне истифодаи кӯдаки ноболиғ дар навори таҳқиромез аз ҷониби 3 нафар ба ном блогеру пранкерҳо 11.08.2020 рух дода, навори он дар 1 қатор сомонаҳои иҷтимоии интернетӣ нашр гардид. Мавриди масхараву мазаммат қарор гирифтани 1 наврас, ки шояд ноқисулақл бошад, мавриди вокуниши шадиди шаҳрвандону истифодабарандагони шабакаҳои иҷтимоии интернетӣ қарор гирифта, ҳамзамон 1 қатор корбарон аз Раёсати ВКД дар ш.Душанбе дархост намуданд, то пеши роҳи чунин бетартибӣ гирифта шуда, нисбати ин «блогерон» чораҳои дахлдори қонунӣ андешида шавад. 

Ҳайати эҷодии газетаи мардумии СССР низ он наворро дид, ки дар он 1 нафар ба ном ҷавонзан, ки садқаи номи модарӣ шавад, бо ҳамроҳии 2 нафар ҷавон, ки садқаи номи мардӣ шаванд,  ба тани писарбачае либоси чакани (таҳқири либоси миллӣ-чакан!) духтарона пушонида, рӯяшро бо маҳсулоти ороишӣ (косметикӣ) рангубор намуда, ба сараш тоқиву тӯри арӯсӣ пӯшонида, пасон бар замми ин дар сараш тухм мешикананд. Дар давоми ин ҳама кирдорҳои зиддиқонунӣ «блогерҳо» наврасро ба масхара мегиранд, ки “ранги арӯси замонавӣ шуд”, “мо арӯс кофта гашта будем”, “гап нест дар ин арӯс” ва аз ин гуна суханҳои дур аз маданияти тоҷикона. Он нафари ба ном зан бошад, бо усулу методи хеш ин кӯдакро аз мард ба зан табдил медод…

 Ҳабси 5-7 рӯза ва 406 сомонӣ ҷарима…

Тавре ба мухбири мо дар маркази матбуоти Раёсати ВКД дар ш.Душанбе хабар доданд, дар натиҷаи пешбурди корҳои фаврӣ-ҷустуҷӯӣ омодакунандагони ин навор (ба гуфти худи ин одамсуратони ҳайвонтиннат-ПРАНК) муайяну дастгир ва ба мақомоти милитсия дастрас карда шуданд. 

Инҳо:

1. Хоҷаев Аҳлиддин Зайниддинович соли таваллудаш 26.01.1989, истиқоматкунандаи к.Борбад, бинои 82, дар байни блогерон ва шабакаҳои иҷтимоӣ бо тахаллуси “Кучкар” маъруф аст;

2. Муҳаммадиев Акбар Одилович соли таваллудаш 23.06.1993, истиқоматкунандаи к.Маяковский, бинои 22;

3. Кулиева Матлуба Баҳодуровна соли таваллудаш 14.03.1994, истиқоматкунандаи к.Профсоюз, хонаи 12 мебошанд.

Зимни таҳқиқи ҳодисаи мазкур муайян карда шуд, ки банаворгирии «пранк»-и ғайриахлоқӣ ва дур аз фарҳангу маданияти тоҷикона бо маслиҳати пешакӣ ва розигии худи ноболиғ Д.Ф, соли таваллудаш 2006 сабт карда шуда, охирон яке аз хешовандони наздики боздоштшуда Хоҷаев Аҳлиддин ба ҳисоб мерафтааст. Бояд донист, ки ин писарбачаи ноболиғ 100 маротиба ҳам розигӣ дода бошад, қабул нест, зеро вай ноболиғ буда, масъулияташ бар дӯши падару модараш аст.

Бо назардошти ҳолатҳои мазкур барои поймол намудани ҳуқуқҳои ноболиғ, ба таври оммавӣ паст задани шаъну шараф ва мавриди масхараву мазаммат қарор додани писарбачаи ноболиғ, ки муқаррароти Қонуни ҶТ«Дар бораи масъулияти падару модар дар таълиму тарбияи фарзанд» вайрон гардидааст, нисбати ҳамаи боздоштшудаҳо парвандаи маъмурӣ тартиб дода шуда, бо Қарори Суд Хоҷаев Аҳлиддин ва Муҳаммадиев Акбар ба мӯҳлатҳои 5 ва 7 шабонарӯзӣ ба ҳабс гирифта шудаанд. Илова бар ин, бо назардошти дар тарбияи шаҳрванд Кулиева Матлуба мавҷуд будани кӯдаки ноболиғ (тасаввур кунед ин зан боз фарзанд доштааст!!!), нисбаташ шартан ҷаримаи маъмурӣ ба андозаи 7 нишондиҳанда барои ҳисобҳо, баробар ба 406 сомонӣ таъин карда шуд.

Ҷойи «Кучкар» ва дӯстонаш маҳбас аст!

Истифодабарандагони шабакаҳои ичтимоӣ, хосса занон тарафдори ба маҳбас кашида шудани ин 3 нафар, алалхусус Матлуба Кулиева, ки худ модар аст, буда, ҷазои ба инҳо додашударо ҷиддӣ ва сахт ҳисоб намекунанд. Бархе ҳатто пешниҳод намуданд, ки ҷавонзанро барои ин кирдораш аз ҳуқуқи модарӣ маҳрум созанд! Воқеан ҳам, оё замоне нарасидааст, ки чунин блогер-панкер-тик-токҳои навбаромади тоҷик, ки бо пахши наворҳои бемаънӣ ва таҳқиромези худ шабакаҳои интернетиро пур кардаанд, ба ҷавобгарии сангинтар, то маҳбас кашида шаванд? Зеро тибқи Конвенсияи ҳифзи ҳуқуқи кӯдак ин кор ҷиноят ба ҳисоб рафта, ҷинояткорон бояд ҳукми сангин бигиранду чанд соли хешро паси панҷара гузаронанд, то бидонанд, ки ҳар амали бад подоши муносиб дорад.

Шералӣ Давлатов, СССР

Ҳамасола 18 август рӯзи таваллуди Ҳаким Абӯалӣ ибни Сино ҳамчун Рӯзи касбии табибони тоҷик таҷлил карда мешавад (Воқеан ҳам ин ҳафта Абу Алӣ Ҳусейн ибни Абдуллоҳ ибни Ҳасан ибни Алӣ ибни Сино (سینا‎ بن عبدالله بن حسین علیبوا) расо 1040 сола шуд, ки ин санаи фархундаро аҳли ҷомеа, ба вежа журналистон фаромӯш кардем!).

Хуруҷи бемории сироятии коронавирус дар авохири соли гузашта ва баҳори соли 2020 барои табибони на танҳо тоҷик, балки олам имтиҳоне буд сангин. Новобаста аз он ки давраи мушкилтарини он паси сар шуд, то ба имрӯз табибони мо дар ҷабҳаанду баҳри наҷоти ҳаёте шабурӯз мубориза мебаранду бо аҷал даст ба гиребон мешаванд. Зимнан тасмим гирифтем дар арафаи рӯзи касбӣ аз пешравию дастовардҳои табибони пойтахт ёд карда, бо Духтури №1-и пойтахт-Хушвахт Шарифзода, сардори Раёсати тандурустии ш.Душанбе вохӯрда сӯҳбати кӯтоҳе анҷом диҳем. 

Беморхонаҳое, ки дар Осиёи Марказӣ ҳамто надоранд

Тавре Хушвахт Шарифзода зимни суҳбати ихтисосӣ бо мухбири СССР таъкид дошт, бо дастгириҳои пайвастаи Ҳукумати ҶТ, ба хусус Президенти ҶТ Эмомалӣ Раҳмон маблағгузории соҳаи тандурустӣ дар 7 соли охир 3 маротиба афзуда, дар тайи 2 соли ахир бо маблағгузории МИҲД ш.Душанбе Муассисаи давлатии Беморхонаи клиникии шаҳрии бемориҳои пӯст бо маблағи 11.336.641 сомонӣ, ки аналогаш дар Осиёи Марказӣ (ҳамчун соҳавӣ) вуҷуд надорад, азнавсозӣ гардида, бо маблағи 10.892.220 сомонӣ бо таҷҳизотҳои замонавӣ ва лавозимотҳои тиббӣ муҷаҳҳазонида шудааст. 

Инчунин, Беморхонаи замонавии бемориҳои сироятии кӯдакона ба маблағи 28.198.505 сомонӣ (22 651 036 сомонӣ барои сохтмон ва 5 547 474 сомонӣ барои харидории таҷҳизот) ва Таваллудхонаи шаҳрии №2 ба маблағи 23.500.000 сомонӣ (18 400 000 сомонӣ барои сохтмон ва 5 100 000 сомонӣ барои харидории таҷҳизот) сохта шуда, ба фаъолият шурӯъ намудааст. Баҳри хизматрасонии ёрии таъҷилии тиббии бо сифат ва саривақтӣ бошад бо дастгирии раиси ш.Душанбе-8 адад нақлиёти замонавии ёрии таъҷилии тиббӣ бо ҳамаи таҷҳизот ва лавозимоти зарурӣ дастрас шудааст.

Яке аз нуқтаҳои муҳим он аст, ки бо дастгирии бевоситаи раиси ш.Душанбе Рустами Эмомалӣ бо мақсади дастгирии табақаҳои ниёзманди аҳолӣ аз ҳисоби фонди захиравии Раиси ш.Душанбе дар соли 2017-700 000, солҳои 2018-800 000 сомонӣ ва 2019-800 000 сомонӣ ҷудо карда шуд, ки дар Маҷмааи тандурустии “Истиқлол” дар соли 2017-31, 2018-35 ва 2019 ба 30 кӯдаки гирифтори нуқсонҳои модарзодии дил ҷарроҳиҳо гузаронида шуд.

Навгониҳо дар ташхису табобат

Мавсуф афзуд, ки имрӯз табибони пойтахт омодаанд ва метавонанд мушкилтарин амалиётҳои ҷарроҳиро мустақилона анҷом дода, аз ӯҳдаи табобати ҷиддитарин бемориҳо бароянд. Аз он ҷумла стендгузории рагҳои хунгарди дил, аортаи садрӣ ва шараёни брахиосефалӣ дар дастгоҳи нодири ангиограф, бо мақсади пешгирии БИД, сактаи дил, гузоштани ангиопластикаи фаврӣ бо натиҷаи хуб, бо дастгоҳ амалиёти бартараф намудани нуқсонҳои модарзодии дил дар кӯдакон, амалиётҳо дар шараёни бачадон, гурдаҳо ва мағзи сар. Инчунин, эмболикунонии шараёни ғадуди простата дар мардон, бо таври ҷарроҳӣ табобат намудани беморони гирифтори фалаҷи геморрагӣ, ба роҳ мондани усули амалиёти мустаҳкамнамоии транспедикулярии сутунмуҳра ва краниопластикаи нуқсони устухони косахонаи сар бо пластинкаи титанӣ. 

   -Дар беморхонаҳои пойтахт айни замон ба роҳ мондани амалиёти бидуни буриш гирифтани аденомаи гипофиз, амалиёти чурраи байнимуҳравӣ, табобати консервативии инсулти ишемикӣ бо истифодаи тромболитикҳо (актевизе, стрептокиназа, алтеплаза), амалиёти аз 1 шараёни маммарӣ барқароркунии шараёни иллатёфтаи коронарӣ, амалиёти гирифтани аневризмаи шараёни хоби дохила аз тарафи рост бо усули асситенсияи эндоскопӣ, шунтикунонии маммарокоронарӣ бо истифодаи 2 шараёни маммарӣ, аз 1 шараёни маммарӣ шунтикунонии 2 шараёни коронарӣ, амалиёти симултантии протезкунонии дарғоти аорталӣ ва шунтикунонии маммарокоронарӣ бомуваффақ анҷом дода мешаванд. Табибони тоҷик истифодаи шираи (клей) Гистоакрил дар кӯдакони гирифтори гипоспадия, литотрипсияи контактӣ, нефролитотрипсияи перкутанӣ дар навзодон, амалиёти видеолапароскопӣ дар беморони ҷарроҳии шуш ва ковокии плевра, амалиёти Рашкинд-сохтани девораи сунъии байни даҳлезӣ мавриди нуқсони модарзодии дил бо усули эндоваскулярӣ (дар ҳамбастагӣ бо мутахассисони хориҷӣ), стендгузории шараёни шуш бо усули эндоваскулярӣ мавриди тетрадаи Фалло, спленэктомия бо усули лапароскопӣ, буриши венаи ковалии поён бо пластикаи венаи гурдаи чап, плазмоферез ҳангоми бемориҳои тарқиши маъқад ва усули табобати носурҳои мураккаби такрорирохеле хуб ба роҳ мондаанд. Ҳамаи ин навгониҳо ва вусъат ёфтани амалиётҳои нодир бо истифода аз технологияи муосир сабаби коҳиш ёфтани сафари беморону ниёзмандон ба хориҷи кишвар гардидааст,- мегӯяд духтури №1-и пойтахт.

Иди касбӣ муборак, фариштагони наҷот!

Тавре маркази матбуоти Вазорати тандурустӣ ва ҳифзи ичтимоии аҳолии ҶТ хабар медиҳад, дар муддати аз 30 апрел то 17 августи соли ҷорӣ шумораи беморони гирифтори коронавирус дар кишвар ба 8099 нафар расида, то ба имрӯз дар мамлакат 6897 (85,1%) гирифторони COVID-19 шифо ёфта, аз ин беморӣ 64 нафар фавтидаанд. Мавриди зикр аст, ки имрӯзҳо дар 85 беморхонаи ҷумҳурӣ зиёда аз 7 ҳазору 500 табиб ва 25 ҳазор корманди миёнаи тиб сафарбар шудаанд. Ба ғайр аз ин, дар муассисаҳои кӯмаки аввалияи тиббию санитарии ҷумҳурӣ 7 ҳазору 600 табиб ва зиёда аз 24 ҳазор корманди миёнаи соҳаи тиб бо мақсади дарёфт, пешгирӣ ва расонидани кӯмаки аввалия ба маризон хизмат мерасонанд.

Табибон имрӯз воқеан қаҳрамон ва фариштагони наҷотанд. Агар онҳо дар оғози пандемия ба мушкил рӯбарӯ шуда бошанд ҳам, ҳоло бо ин вабои нави аср далерона даст ба гиребон мешаванд. Шумо метавонед, фариштагони хилъати сафедпӯши тоҷик! Иди касбӣ муборак! 

Ҷамила Ҳусейнова, СССР

Ҳамзаи Абдуссалом, сокини н. Кӯшониён ба идораи газетаи мардумии СССР дар вилояти Хатлон меҳмон шуда, аз рафтори дағалонаи кормандони БДА-и вилоят шикоят кард.

    -Ман зиндагиамро бо мусофиркашонӣ пеш мебарам ва нисбати хислат ва муомилаву муоширати кормандони БДА-и вилояти Хатлон арз дорам. Ман ва аксарияти мусофиркашони минтақаи ш.Бохтар ҳамеша дар роҳ ҳастем, лек кормандони БДА аксар вақт бе ягон асос моро манъ карда, дағалона сӯҳбату рафтор мекунанд, бо фишору зӯроварӣ ҳуҷҷатҳоро мегиранд, ки ин бар хилофи қонун аст. Тибқи қонун ҳар 1 корманди БДА ҳамарӯза бояд ҳуҷҷати тасдиқкунандаи ҳамон мавзеи дислокатсияашро дошта бошад. Лекин онҳо дар дилхоҳ ҷой ва ё мавзеъи махсус интихобкардаашон зери сояи дарахтон истода, аз пушт дурбинашонро гирифта мешинанд. Магар ин дуруст аст? Ман аз роҳбарияти РБДА ВКД хоҳиш дорам, ки ин масъаларо зери назорат бигиранд, зеро чунин кормандон обрӯ ва нуфузи БДА-ро мерезонанд.

Аз СССР: Бо ҳама иззат аз ронандагон, хоса таксистҳои самти Бохтару Кӯлоб гуфтанием, ки агар нозирони БДА набошанд, шумо ин шоҳроҳро ба мавзеъи ҷанги одамкуш табдил мекунед. Хулоса, хубатон мекунанд!!!

Устоди сухан, афсонаи зинда, Хоҷа Насриддини асри ХХ ва ХХI, Темур Зулфиқоров, марзи 84-ро убур карда, сӯи 85 гом ниҳод. Ба ифтихори ин ҷашнвора номаи саркушоди Хоҷаи муосир ба пулдортарин ва ҳаристарин Қорани муосир ба дасти чоп рафт. Мо Метавонем!

 Дӯстони азиз!

Аз Ҳиндустон нома гирифтам, ки дар он навишта шуда:

«Дар кишвари Тибет мегӯянд, ки 7 Хирадманди Махфӣ оламро идора мекунад. Онҳо ба бадӣ имкон намедиҳанд, ки Некиро мағлуб созад. Шумо яке аз Онҳоед».

Ман ташаккур гуфтаму илова намудам: «На ман, балки устоди бузургворам  Хоҷа Насриддин, бегумон, ба ин Ҳафтгона ворид мешавад. Ана, мактуби ӯро ба Билл Гейтс бихонед.

 Мактуби кушодаи Хоҷа Насриддини ҷовид ба Билл Гейтс

Бародари азизам Билл!

Ман бо шоҳ Салмон аз боби Хирадмандӣ суҳбат доштам…

Бо худи Ҳомер –  аз боби Назм…

Бо Конфутсий –  аз боби Давлатдорӣ…

Бо Чингизхон –  аз боби Ҷанг…

Бо Сталин  –  аз боби Империя…

Акнун фурсате расид, ки бо Ту суҳбат ороям…

 Ғояи ҳокими саросари олам будан аз рӯзи Офариниши Дунё вуҷуд дорад…

Чингизхон ба ман гуфта буд:

Дар осмон  –  Худо…Дар Замин – Ман…Аз ман болотар – фақат телпаки ман…Аммо  ку телпаки ӯ? Ҳамон фавҷ – фавҷ лашкари савораи фотеҳи қийғосиаш ку? Устухонҳояш куҷост? Касе намедонад…Оре!.. 

Аммо ғояи пучу ботили Ҳукмрони Дунё  шудан боз рӯи Замин мехазад –  мисли каждуми заҳрноке, ки моҳи май аз зери санги гарм берун меояд…

Ва худи ҳамин каждуми саросарӣ ИМА аст… 

Ин Иёлоти Муттаҳидаи Ҷаҳаннам аст, ки аз сӯи тӯдаяки бонкдорони ҷунундор идора мешавад… онҳо дар даст триллионҳо коғазакҳои сабзи тавоно доранд…Онҳоанд, ки дар таҳхонаҳои бонкҳояшон гашта, хиштҳои тиллоиро сила мекунанду навозиш…Магар онҳо беақл нестанд?..Магар онҳо Саворагони нави Апокалипсис – Қиёмат ҳастанд?..Оре…

Пештарҳо ҳокимони кӯтоҳбин бо ёрии шамшер мехостанд Ҳокими Дунё шаванд…ё бо ёрии тир…бомбаи атомӣ… доллар…Акнун бо ёрии компютер, васоити ахбори дурӯғгӯ ва вируси корона, ки яке аз офарандаҳояш туӣ, бародари раҳгумзадаам Билл…Оре…

Хирадманде мегӯяд, ки интернет ин Бурҷи уфуқии Бобил аст…Боз ҳамон пири хирадманд мегӯяд, ки байни бинокорони ин бурҷ худи шайтон ҳам буд…Ҳангоми сохтани интернет ва вируси корона низ ӯ истода буд…

Бародарам Билл!..

Оё ту ӯро надидаӣ?...Ҳаври сӯзони даҳонашро ҳис накардаӣ?...Маълум аст, ки шайтон маймуни Худост…Шайтон мепиндорад, ки Худо ӯст… Ӯст соҳиби ин замин, Шоҳи олам…

Бародарам Билл!..

Фикри ту чист? Ё андешаҳои қадимаатро пинҳон медорӣ? Ғояи фартути гаҳворагиат -  Ҳокими Дунё шуданро низ? Оре…

Аммо ҳар касе, ки фикр мекунад, Худо ӯст, оқибат ба чангу хоки  талхи роҳҳои заминиву осмонӣ табдил меёбад… Оре!..

Иёлоти Муттаҳида чӣ?..

Оре, ҳамон ИМА… Ҷое, ки  рекламаи дурӯғин ин қадар пурқудрату марговар аст, ки одамон дар ҷаҳаннам зиста мегӯянд, дар Биҳиштем… Оре, чунин аст! ИМА ин каждуми сабзи доллармонанди чашмонаш дар тахтапушт аст…Ин чашмон ба ақиб менигаранд – ба Бобили мурда… нохалаф…Оре…

Мардумони хапу хамӯши олам чӣ? Хамӯшанд… хамӯш…Хамӯшие, ки хиёнат ба Худост… Халқҳо чӣ?...Галаи гӯсфандони мутеъ?..Ҳамту?...Аммо ғизои дӯстдоштаи гӯсфандон каждуми наврасидаи сабззаррин аст…Ана ҳамин тавр халқҳо Каждумро  –  ИМА-ро мехӯранд…Инчунин ҳокимони махфии… нобинои онро дар таҳхонаҳо бо хиштҳои тиллоиашон...Оре!..

Ва ба онҳо паноҳгоҳҳояшон аз ҳамлаи атомӣ низ ёрӣ нахоҳанд дод… ки он ҷо онҳо тани афсурдаи худро аз ҷанги атомӣ мехоҳанд пинҳон кунанд…ҷанге, ки ба шуданаш бовар доранд… чун машрукони нав…

Эҳ, бародарам Билл!...Ту ҳам чунин паноҳгоҳ дорӣ - ҳа?..

Воқеан, ман дарҳои ин паноҳгоҳҳои махфиро сахт махкам мекардам, зеро онҳо эҳтимоли оғози Ҷанги Охирини Шайтониро тахмин мекунанд…

Бародарам Билл! Ту гӯё барои хариди доруворӣ пул ҷудо мекунӣ…

Гӯё барои Ҳаёт…Дар асл – барои тарсу ваҳм… Воҳима… 

Барои ҳарос…Барои марг…Пулҳои ту пулҳои марганд, на Ҳаёт…Оре…

Пулҳои  сарватмандон – пулҳои марг…Худи сарватмандӣ бошад, гуноҳ аст!..

Ин дуздӣ аст...Ин марг аст…Ин ҷунун аст…Ин дӯзах дар зиндагист…Оре, чунин аст!..

Сарватмандӣ роҳи тӯлониву махуфест то Худо! Ва маълум нест, ки то Ӯ мерасӣ ё на? Оре…

Ҳамсуҳбати хирадманди ман Конфутсий мегуфт: «Вазифаи ҳоким иборат аз тақсими боигарист…».

Имрӯз боигарӣ чӣ гуна тақсим мешавад? Миллиардер миллиарди шайтонии худро мегирад…Муаллим, духтур, деҳқон – маоши ночизи худро…Чӣ, магар миллиардер миллиард даҳону меъда дорад? Ҳамин тавр ҷарӣ байни дорову камбағал торафт амиқтару бетаг мешавад…Ва ба ин ҷар тамоми одамизоди гӯсфандтабиат бо роҳбаладони ҳариси ҳашаматхоҳи худ  фурӯ меравад…Оре…

Ҳол он ки аз даврони Спартаи қадим  маълум аст, ки ҷалолу ҳашамат империяҳову халқҳоро фурӯ мебарад…Мисли кирме, ки дарахтро аз дарун хӯрда меояд… Беҳуда дар Спарта зидди шукӯҳу ҳашамат қонунҳои сахти Ликург қабул нашуда буданд… Ва то замоне, ки онҳо амал доштанд, зиндагии мардум равнақ меёфт, Спарта мағлубнопазир буд. Куҷоянд Ликургҳои ин замон? Дар кадом кремлҳо? Дар кадом қасрҳои сафед? Дар кадом қасрҳои Елисей ё Букенгем? Куҷоянд онҳое, ки дар бораи Ватан фикр кунанд, на дар бораи ҷайби хеш? Ҳол он ки роҳбари ҳақиқӣ худро аз карру фару ҳашамат дур мегирад… зеро тақдири 1  кампираке дар деҳоти фаромӯшгардида барои ӯ аз лимузину яхтаву виллаҳо муҳимтар аст… 

Воқеан, Ҳокимияти Одилона ҷалолу ҳашамати Худовандист. Ҷалоли некӣ кардан ба Халқ! Бузургтарин… ширинтарин ҳашамуту ҷалоле, ки Худованди замину осмонҳо ба инсони заминӣ бахшидааст…  Оре, чунин аст!..

Рӯзе, ки Сталинро мегӯронданд, маълум гашт, ки вай ҳамагӣ 1 ҷуфт мӯза доштааст ва он ҳам сурохшуда будааст…Ҳокимони имрӯза – дурӯяҳову дузданд ва ҳокимиятро танҳо барои пур кардани шиками серинопазири худ истифода мебаранд… Ҳайфо… ҳайфо…

Бародари оқилам, Билл!..

Баргардон! Пулҳои дуздидаатро ба соҳибонашон баргардон! Он гоҳ роҳи ту то Худованд ҳамвору кӯтоҳ мешавад! Розӣ шав! Орзуи ҳокими дунё буданро аз сар дур кун! Ё ту кӯр-кӯрона бовар дорӣ, ки бо компютеру вируси корона, васоити ахбори фурӯхташудаву нохалаф халқҳо – гӯсфандонро ғулом месозӣ?

Бародарам Билл! Ту каждум машав! Ман намехоҳам, ки туро гӯсфандон бихӯранд…Инак, Ту ҳамаро ба мардум додӣ…Ва дар соҳили уқёнус озодона чун боди озод мегардӣ…Дар дастат пораи нон ва  шишае бо оби чашма… Ва ин Роҳ сӯи Биҳишт аст...

Бо муҳаббат ва умеди ноумедона, Хоҷа Насриддини ту…

(Аз русӣ тарҷумаи Нур Табаров)

20 августи соли 1940 дар пойтахти Мексика шаҳри Мехико, яке аз меъморони инқилоби октябрӣ Лев Тротский ба ҳалокат расид. Тротский соли 1929 аз ҳудуди СССР бадарға гардида, солҳои тӯлонӣ дар кишварҳои гуногун паноҳанда буд. Ин инқилобии ҳирфаӣ дар ҳеҷ ҷое ором намегирифт ва билохира дар Мексикаи дур иқомат гирифт. Аммо дурии масофа низ натавонист ҷони ӯро наҷот диҳад ва кормандони НКВД-и шӯравӣ дар ин кишвари амрикоӣ амалиёти қатли ӯро ба иҷро дароварданд.  

Бадарға

Лев Тротскийро яке аз меъморони инқилоби октябрӣ муаррифӣ мекунанд. Ҳатто Сталин низ инро эътироф мекард ва дар ёддоштҳояш навишта буд: "тамоми кор оиди баргузории шӯриши мусаллаҳона, зери роҳбарии бе воситаи раиси Шӯрои Петроград, рафиқ Тротский амалӣ гардида буд". Тротский дар пирӯзии болшевикон дар ҷанги гражданӣ ҳам нақши вежа дошт. Артиши Сурх маҳз зери роҳбарии Тротский таъсис ёфта, дар ҷанг пирӯз шуд. Аммо баъди вафоти Ленин дар дохили ҳизби болшевикӣ муборизаи шадид миёни Тротский аз як тараф ва Сталин аз тарафи дигар ба вуқӯ пайваст, ки саранҷом бо шикасти Тротский мунҷар гардид.                                                                                                                     Моҳи январи соли 1925 пленуми КМ-и ВКП (б) Тротскийро аз вазифаҳои ишғолкардааш (ӯ Комиссари халқии ҳарбӣ баҳрӣ ва раиси Шӯрои ҳарбӣ инқилобӣ буд) сабукдӯш карда, моҳи октябри соли 1926 ӯро аз Бюрои сиёсӣ низ ихроҷ кард. Билохира 7 ноябри соли 1927 дар рӯзи инқилоб, ҳаммаслакони собиқаш, Тротскийро аз ҳайати ВКП(б) ҳам хориҷ намуданд. Моҳи январи соли 1928 Тротский ба Алма Ато бадарға гардид. Аммо ин инқилобии сарсахт дар Қазоқистон низ ором нагирифт ва билохира 18 январи соли 1929 бо қарори ҷаласаи махсуи ОГПУ Лев Давидович аз ҳудуди СССР бадарға карда шуд. Тротский дар фаъолияти зиддиинқилобӣ ва тайёрии шӯриши мусаллаҳона алайҳи ҳукумати Шӯравӣ айбдор карда мешуд. 

"Гурезаи сурх"

Аммо шуҳрати Лев Давидович дар олам чунон паҳн гашта буд, ки кам кишваре мехост ӯро дар ҳудудаш паноҳ диҳад. Танҳо Туркия розӣ шуд ин "гурезаи сурхро" бипазирад ва барояш паноҳгоҳ диҳад. Худи Лев Давидович бисёр мехост ӯро ба ватани Марксу Энгелс Олмон интиқол диҳанд, аммо ҳукумати олмонӣ ин тақозоро қотеъона рад кард. Ҳукумати Туркия ин гурезаи шӯравиро дар яке аз ҷазираҳои Принтс ҷойгир кард ва Тротский дар ин ҷазира китоби "Зиндагии ман"-ро навишт. Мутахассисон бар ин назаранд, ки Сталин дар ин марҳила ҳанӯз қасди аз миён бардоштани Тротскийро надошт. Ҳадафи асосии Сталин дар ин марҳила, ба даст овардани бойгонии (архив) Тротский буд. Тротский бе ҳеҷ мамониат тавонист бойгониашро ба хориҷ барорад ва чекистон дар оғоз мутаваҷҷеҳи қазия нашуданд.