Дар 6 моҳи соли ҷорӣ, дар ш.Панҷакент ҳамагӣ барои 1 нафар эҳтиёҷманд қарори раиси шаҳр барои тақсимоти замини наздиҳавлигӣ ба тавсиб расидаасту  халос. 

Абдухолиқ Холиқзода, раиси ш. Панҷакент дар нишасти матботӣ гуфт, ки мо дар ин муддат танҳо ба 1 нафар ятими кулл замин ҷудо намудаем. Дар ҳоле, ки тӯли ин муддат беш аз 200 парванда вобаста ба замин омода гардидаву мунтазири қарорҳои раиси шаҳр мебошанд. Имзо нашудани қарорҳои вобаста ба замин ва ё тақсим нагардидани замини наздиҳавлигӣ ба эҳтиёҷмандон, боиси нигаронии сокинони Панҷакент гардидааст.

Масъалаи замин дар минтақа мушкилоти рақами 1 мебошад. Ин дар ҳолест, ки ба гуфтаи раиси шаҳр Абдухолиқ Холиқзода беш аз 70 %-и  муроҷиати сокинон вобаста ба мушкилоти замин аст. Дар ин вақт дар кумитаи идораи замини ш.Панҷакент низ 3 роҳбар иваз гаридааст.

Хуршед Фозилов, барои СССР, 

ш.Панҷакент 

Маҳмадюсуф Имомзода, вазири маориф ва илми мамлакат дар робита ба баргардонидани донишҷӯёни тоҷик, ки дар макотиби олии Ҷумҳурии Қирғизистон таҳсил мекунанд, гуфт, ки ҳамаи онҳо пас аз баргашт ба мактабҳои олии кишвар дохил мешаванд.

   - Донишҷӯёне, ки дар мактабҳои олии Ҷумҳурии Қирғизистон таҳсил мекунанд, метавонанд барои идомаи таҳсил ба вазорат муроҷиат кунанд. Дар Қирғизистон беш аз 2000 донишҷӯйи тоҷик таҳсил доранд. 1 қисми ками онҳо дар асоси квотаҳои байниҳукуматӣ ва боқимонда худашон барои таҳсил ба Қиғизистон рафтаанд. Бештари онҳо дар Бодканд, Уш ва ш.Бишкек мехонанд. Бо мақсади ёрӣ дар сомонаи худ гуфтем, ки ҳар касе мехоҳад ба инҷо биояд, ба мо муроҷиат кунад. Аризаҳои зиёд ворид шуданд, ҳатман кумак мекунем. Ягон шаҳрванди мо аз таҳсил берун намемонад. Чанде пеш бо сафири Тоҷикистон дар Қирғизистон суҳбат доштем. Шаҳрвандоне, ки ҳуҷҷатҳои худро гирифтан наметавонанд, мо ба сафорат муроҷиат мекунем, то кумак намоянд, - таъкид дошт Маҳмадюсуф Имомзода.

Дар вилояти Суғд ба истиқболи ҷашни 30-солагии Истиқлоли давлатии Ҷумҳурии Тоҷикистон бунёди зиёда аз 300 корхонаву коргоҳи нави саноатӣ ба нақша гирифта шудааст. Аз ҷумла, тибқи нақша танҳо дар соли 2021 ба истифода додани 120 корхонаву коргоҳҳои нави саноатӣ бо 3027 ҷойи нави корӣ пешбинӣ гардида, дар натиҷаи тадбирҳои андешидашуда давоми 6 моҳи соли 2021 дар миқёси вилоят 61 корхонаву коргоҳҳои нав бо 475 ҷойи корӣ ба фаъолият шурӯъ намуданд. Дар ин бора шуъбаи иттилоотӣ-таҳлилии Дастгоҳи раиси вилояти Суғд хабар медиҳад.

Бояд гуфт, ки давоми 6 моҳи соли 2021 ҳаҷми истеҳсоли маҳсулоти саноатӣ дар вилояти Суғд ба маблағи 8 миллиарду 976 млн. сомонӣ расонида шуда, нисбат ба ҳамин давраи соли гузашта суръати афзоиш бо назардошти индекси нархҳо 133,2%таъмин гардид. Аз ҷумла, дар моҳҳои январ-июни соли 2021 ба миқдори 664,5 ҳазор тонна семент ва 722,5 ҳазор тонна ангишт истеҳсол карда шуда, ҳамзамон, нисбат ба ҳамин давраи соли 2020 суръати афзоиши истеҳсоли ресмони пахтагин 140,6 фоиз ва газвори пахтагини тайёр 105,7% таъмин гардида, дар маҷмӯъ, бо назардошти эҳтиёҷоти худӣ 2835,8 тонна калоба ва 3608,8 ҳазор метри мураббаъ газвори пахтагин истеҳсол карда шуд. Истеҳсоли маҳсулоти хӯроквории ивазкунандаи воридот сол аз сол тавсеа ёфта, дар 6 моҳи соли 2021 ба миқдори 253,1 ҳазор тонна орд ва 1955,3 тонна равғани растанӣ тавлид шудааст.

Афзоиши ҳаҷми истеҳсоли маводи асосии сохтмонӣ аз қабили қубурҳои пластикӣ ба миқдори 668,8 ҳазор метр, рехтаи пӯлодӣ 2833,4 тонна, маҳсулоти кабелӣ 397,7 тонна, профилҳои алюминӣ барои дару тирезаҳо 2782,9 тонна, профилҳои металлӣ 12185,2 тонна, профилҳои пластикӣ 854,0 тонна, халтаҳои полипропиленӣ барои бандубасти маҳсулоти корхонаҳо 23,4 млн. дона, халтаҳои полиэтиленӣ 402,3 тонна, маҳсулоти пластмассагӣ 53,6 млн. дона, бомпӯши оҳанин 41,0 ҳазор метр ва зарфи шишагин ба ҳисоби 0,5 литр 9,6 млн. дона истеҳсол карда шудааст. 

Меҳрдоди Мурод, СССР

Салом ба аҳли эҷоди газетаи мардумии СССР! Ман 1 чизро намефаҳмам: чӣ лозим иваз кардани рақами хатсайрҳо? Моҳе қабл хатсайри №33 ба рақами №55 иваз карда шуда, ин амал мо мусофиронро гаранг кард. Зеро дар истгоҳҳо мо микроавтобусҳои хатсайри №33-ро интизорему ба ҷойи он беогоҳӣ №55 меояд, ки ноошност. 

Дигар ин, ки мо мусофирони хатсайри №33 маршрутро хуб медонистем-он тавассути кӯчаи Соҳилӣ равуо менамуд. Ҳамакнун микроавтобусҳои №55 сарҳуй шудаанду тавассути дилхоҳ кӯчаву хиёбон рафтуомад мекунанд. Ман 3 маротиба шуд ба микроавтобуси №55 нишаста, сарсон мешавам-якум он маро ба ҷойи к.Соҳилӣ, тавассути к.Н.Қаробоев бурд, дуввум он ки дар гардиши Маркази автомобилӣ (Автосент) «дигар намеравам» гуфта, партофт, сеюм бошад, дар истгоҳи Маркази савдои «Садбарг» «ман Ваҳдат бор мекунам»-гуфта, мардумро фаровард. Аксари ронандагон то истгоҳи охирин-Чимтеппа намераванду аз назди бозори «Корвон» мегарданд…

Ин чӣ гап аст? Чаро хатсайри беҳтарини пойтахтро тағйири ному рақам карда, ба бадтарин табдил додед, муҳтарам масъулин? 

Муҳаббат Ализода, омӯзгор, 

ш.Душанбе

СССР воқеан Давлат буд! Ва сарварони ин давлат ҳама дар мошинҳои истеҳсоли давлати советҳо мегаштанд. 

-Ленин-асосгузори ин давлат истисност. Зеро вақте ӯ сари қудрат омад, ки мошинсозӣ дар кишвар вуҷуд надошт. Зимнан Ленин савори Rolls-Royce Silver Ghost мегардиду бо ҳамин мошин тобуташро то Мавзолей оварданд.

-Сталин гапи дигар. Русҳои натсист ӯро кам мегиранд. Вале ин маҳз Сталин буд, ки саноати мошинсозӣ тараққӣ кард ва шахсан ӯ мошини ЗИС-115 («ЗИС-110СО») — якумин автои зиреҳпӯш-тирногузарро саворӣ карда, ҷаҳонро гирифт!

-Хрушев мошини броневойи Сталинро бо варианти кабриолет, яъне саркушодааш иваз кард. Ӯ савори ЗИС-110Б шуда гуфт, «сарвари халқ набояд аз халқи худ тарсад!». Хрушёв-да усунаш!

-Леонид Брежнев-маҳбубтарин сарвари давлати шӯроҳо, ошиқи авто буд ва худаш дар кӯчаҳои холии Маскав аз рӯи 200 км\соат мошин меронд. Албатта, барои ӯ роҳҳои Маскавро мебастанд. Мошини дӯстдоштааш Чайка ГАЗ-14 буд. Ҳарчанд, Шевролет, Линколн ва Кадиллак пух дода мегашт! Вале Чайка символи СССР буд ва табиист ГенСек маҷбур буд бештар савори он параду марад равад.

-Черненко, ки умри сарварии дароз надид, ба ҳар ҳол савори  ЗИЛ-115 шуд. Дар СССР ҳамагӣ 106 дона аз ин марка истеҳсол шуда буду 102-аш насиби ГенСек гардид.

-Андропов, ки ӯро Сталини нав ва ё Дэн Сяопини советӣ мехонданд, танҳо дар автоҳои шӯравӣ мегашт ва мошини асосияш ЗИЛ-117— сабукрави советии навъи олӣ, истеҳсоли 1971 буд.

-Горбачёв-сархӯри СССР дар автои ЗИЛ-41052 бо лақаби БронеКапсула мегашт. Ин мошинро на тир мегирифту на аҷал ва шояд ҳамун мошин саба шуда, ки Мишка сари давлатро хӯрду худаш то ҳол зинда аст…

-Елтсин ҳамонгуна, ки давлаташро иваз намуд, мошини Чайкаашро низ бо  Mercedes-Benz S-класс табдил дод.

-Путин В.В. имрӯз савори  Aurus-41231 «Сенат»  аст ва ин амалаш собит сохт, ки саноати мошинсозии Россия бо 2 по лангида, аз саноати даврони советӣ чунон қафо мондааст, ки дигар ҳатто барои президенти худ ин кишвари меросхӯри СССР мошин сохта наметавонад.

Зимнан тамомии 15 президенти собиқ 15 республикаи советӣ мошинҳои броневой ва гаронарзиши хориҷӣ доранд ва ягон нафари онҳо аз автоҳои русӣ истифода намебаранд.

Мавзуъ ҷолиб буд? …Мо Метавонем!