Санаи 26-уми апрели соли ҷорӣ бо ибтикори Вазорати рушди иқтисод ва савдои Ҷумҳурии Тоҷикистон дар Кохи Суруши шаҳри Душанбе маросими ҷоизасупорӣ ба ғолибони озмуни Бренди сол - 2022 таҳти унвони «Қуллаи Шараф» баргузор гардид.
Дар чорабинии мазкур намояндагони Ҳукумати Ҷумҳурии Тоҷикистон, вазорату идораҳо, иштирокчиёни озмун ва намояндагони бахши хусусӣ иштирок намуданд.
Маросими бошукуҳ бо сухани ифтитоҳии Вазири рушди иқтисод ва савдои Ҷумҳурии Тоҷикистон, муҳтарам Завқизода Завқи Амин оғоз гардида, сипас ба иштирокчиён - ғолибони озмуни ҷумҳуриявии Бренди сол таҳти унвони «Қуллаи Шараф» бо тантана ҷоизаҳо супорида шуданд.
Боиси хушнудист, ки КВД БА ҶТ “Амонатбонк” бо назардошти доираи фарогирии шабакаҳо, иқтидор, мавқеъ, нишондиҳандаҳои молиявӣ ва ҷиҳати саҳми бевосита гузоштан дар татбиқи сиёсати молиявӣ ва рушди устувори иқтисодиёти мамлакат бо ҷоизаи тиллоии «Бренди сол 2022» сарфароз гардонида шуд.
Мақсад аз гузаронидани озмуни мазкур, ин ташвиқ ва тарғиби соҳаи ҳифзи ҳуқуқии тамғаҳои молӣ ва тамғаҳои хизматрасонӣ дар Ҷумҳурии Тоҷикистон, муайян ва пешниҳод намудани намунаҳои идоракунии боэътимоди брендҳо, ҳавасмандгардонии ширкатҳо барои истифодабарии брендинг мебошад.
Иштироки Амонатбонк дар Ҷаласаи Шӯрои Иттиҳоди байнибонкии СҲШ
Санаи 26 уми апрели соли 2023, дар иёлоти Гоаи Ҷумҳурии Ҳиндустон таҳти раёсати Корпоратсияи инфрасохториву молиявии Ҳиндустон ҳамчун раисикунанда ва бо иштироки роҳбарони бонкҳои аъзо ҷаласаи Шӯрои Иттиҳоди байнибонкии Созмони ҳамкории Шанхай (ИББ СҲШ) баргузор гардид.
Дар кори ҷаласаи Шӯрои Иттиҳоди байнибонкии Созмони ҳамкории Шанхай ҳайати расмии Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк»» таҳти роҳбарии Раиси Раёсати Бонк муҳтарам Икромӣ Сироҷиддин Салом иштирок ва суханрони намуданд.
Дар кори ҷаласа беш аз 5 масъалаи муҳим дар самтҳои бонкдорӣ, сармоягузории мустақим байни бонкҳои аъзои Иттиҳод, табодули таҷриба ва маблағгузории савдо ҷиҳати рушд додани гардиши молу маҳсулот байни кишварҳои аъзои Созмони ҳамкории Шанхай мавриди баррасии роҳбарони бонкҳо қарор дода шуд.
Қайд кардан ба маврид аст, ки дар интиҳои чорабинии Иттиҳоди байнибонкии Созмони ҳамкории Шанхай аз ҷониби раисони бонкҳои аъзо протоколи ҷаласа ба имзо расонида шуд.
Боиси ёдоварист, ки пас аз ба имзо расидани протоколи мазкур имконият фароҳам омад, ки фаъолияти молиявии бонкҳои аъзои Иттиҳод боз ҳам ҷоннок карда шуда, дар самтҳои мухталиф ҳамкориҳои дуҷониба густариш ёбанд.
Пас аз ба итмом расидани қисмати асосии ҷаласа руйхати мулоқотҳои дуҷонибаи роҳбарон ва ҳайатҳои бонкҳои аъзои Иттиҳод барои санаи 27 апрели соли 2023, бо ҷонибҳо мувофиқа гардида, омода карда шуд.
Айни ҳол, ҳайати расмии Амонатбонк таҳти роҳбарии Раиси Раёсати Бонк муҳтарам Икромӣ Сироҷиддин Салом нақша доранд, ки санаи 27 апрели соли ҷори дар идомаи ҷаласаи Иттиҳоди байнибонкӣ бо якқатор роҳбарони бонкҳои аъзои Иттиход мулоқоту вохӯриҳои судманди дуҷониба баргузор намоянд.
Мулоқоти дуҷонибаи Раиси Раёсати Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк»» бо ноиби Президенти Бонки давлатии рушди Хитой
Нимаи дуюми санаи 27 уми апрели соли 2023, дар иёлоти Гоаи Ҷумҳурии Ҳиндустон мулоқоти дуҷонибаи Раиси Раёсати Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк»» муҳтарам Икромӣ Сироҷиддин Салом бо ноиби Президенти Бонки давлатии рушди Хитой муҳтарам Ван Вэйдун баргузор гардид.
Дар оғози мулоқоти дуҷониба Раиси Раёсати Амонатбонк аз дастовардҳои молиявии Бонк маълумот манзур намуда, қайд карданд, ки дар доираи Иттиҳоди байнибонки, Бонки давлатии рушди Хитой яке аз шарикони муҳим ва боэътимоди мо ба шумор меравад.
Ноиби Президенти Бонки давлатии рушди Хитой муҳтарам Ван Вэйдун қаноатмандии хешро аз натиҷаи ҳамкориҳои муштарак иброз дошта, қайд намуд, ки Амонатбонк ягона бонке ҳаст, ки бо Бонки давлатии рушди Хитой таърихи хуби ҳамкориҳои муштарак дорад ва ин барои мо муҳим ва қобили эҳтироми хоса аст.
Дар заминаи мулоқоти пурмуҳтаво роҳбарони бонкҳо ба муфовиқа расиданд, ки дар моҳи майи соли ҷорӣ дар ҳошияи сафари Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Халқии Хитой дар ҳузури роҳбарони харду кишвар Ёддошти тафоҳум ҷиҳати ба имзо расонидани боз ду созишномаи хати нави қарзӣ, ба имзо хоҳанд расонид.
Ҳамкориҳои Амонатбонк бо Бонки давлатии рушди Хитой таърихи тулонӣ дошта, аз солҳои 2008 яъне аз лаҳзаи пазируфтани Амонатбонк ба Иттиҳоди байнибонкии Созмони ҳамкории Шанхай, сарчашма мегирад.
Амонатбонк ва Бонки давлатии рушди Хитой дар тули солҳои ҳамкориҳои муштараки худ беш аз 8 созишномаҳои қарзӣ бо маблағҳои гуногун ҷиҳати рушд додани соҳибкории хурду миёна ва Ёддошти тафоҳум оид ба бозомӯзии кормандони Бонк дар донишгоҳҳои бонуфузи Ҷумҳурии Халқии Хитой, ба имзо расонидаанд.
Мулоқоти дуҷонибаи Раиси Раёсати Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк»» бо Раиси Раёсати ҶС «Бонки рушди Қазоқистон» дар иёлоти Гоаи Ҷумҳурии Ҳиндустон
Нимаи аввали санаи 27 уми апрели соли 2023, дар ҳошияи ҷаласаи Шӯрои Иттиҳоди байнибонкии Созмони хамкории Шанхай мулоқоти дуҷонибаи Раиси Раёсати Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк»» муҳтарам Икромӣ Сироҷиддин Салом бо Раиси Раёсати ҶС «Бонки рушди Қазоқистон» муҳтарам Нурлан Байбазаров баргузор гардид.
Дар рафти мулоқот масоили ҳамкориҳои дуҷонибаи Амонатбонк ва Бонки рушди Қазоқистон дар самтҳои мухталиф аз қабили, табодули таҷриба ва маблағгузории савдо барои рушд додани гардиши молу маҳсулот байни кишварҳо мавриди барраси қарор дода шуд.
Боиси кайд аст, ки Раиси Раёсати ҶС «Бонки рушди Қазоқистон» муҳтарам Нурлан Байбазаров дар оғози мулоқот қайд намуд, ки тавассути васоити ахбори оммаи кишвараш аз дастовардхои молиявии Амонатбок ва мавқеи он дар бозори бонкии Ҷумҳурии Тоҷикистон бархурдор аст. Дар ин замина, муҳтарам Нурлан Байбазаров пешниход намуд, ки омодааст дар ояндаи наздик бо Амонатбонк Созишномаи хати қарзӣ ҷиҳати рушд додани гардиши молу маҳсулот байни Ҷумҳурии Қазоқистон ва Ҷумҳурии Тоҷикистон ба имзо расонад.
Раиси Раёсати Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк»» муҳтарам Икромӣ Сироҷиддин Салом низ пешниҳоди роҳбарияти Бонки рушди Қазоқистонро бо хушнуди пазируфта, омодагии ҳамаҷонибаи хешро дар дилхоҳ самтҳои манфиатнок иброз намуданд.
Дар маҷмуъ мулоқоти дуҷониба дар фазои дӯстӣ ва ҳусни тафоҳуми ҷонибҳо баргузор гардида, нақшаи ҳамкориҳои муштарак байни роҳбарони бонкҳо барраси гардид.
Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк»» ҳамчун, як институти молиявии кишвар ҳамеша кӯшиш менамояд, ки дар рушди босуботи иқтисоди миллӣ ва баланд бардоштани сатҳи некуаҳволии аҳолии кишвар саҳми арзандаи худро гузорад.
