ХАБАРИ ДОҒ
Шанбе, Май 08 2021

Тоҷикистон намояндагии созмони байналмилалии “Saferworld” (“Дунёи бехатар”)-ро пас аз ҳафт соли фаъолият барои гӯиё риоя накардани талаботи қонунгузории Тоҷикистон барҳам дод. Намояндагони ин созмон ба даъвои Вазорати адлия ва ҳукми додгоҳ розӣ нестанд.

Додгоҳи Исмоили Сомонӣ рӯзи 3-уми май дар сомонааш хабар дод, ки даъвои Вазорати адлия нисбат ба намояндагии созмони ғайритиҷоратии байналмилалии “Сейферворлд” дар Тоҷикистон дар бораи барҳам додани созмон, қонеъ карда шуд.

Мақомот: Созмон 4 банди қонунро нақз кардааст

Дар ин хабар гуфта мешавад, ки суратҳисоби бонкии “Saferworld” дар Тоҷикистон баста шуда, ҳамагуна амалиётҳои ин созмон дар қаламрави кишвар манъ аст.

Як намояндаи Вазорати адлия бидуни зикри номаш ба Радиои Озодӣ гуфт, ташкилоти “Сейферворлд” дар муддати фаъолияти худ чаҳор банди қонуни Тоҷикистонро нақз кард ва ба ҳамин хотир барои барҳам доданаш ба суд муроҷиат кардаанд.

Аз ҷумла, ба гуфтаи ӯ, бархе аз банду фаслҳои Кодекси андоз, қонуни забон ва қонун дар бораи ташкилотҳои ҷамъиятиро вайрон кардааст.

Аммо намояндагии созмони “Сейферворлд” дар Тоҷикистон далелҳои худро дар мавриди нақз накардани қонунҳои Тоҷикистон ба додгоҳ пешниҳод кардааст, вале додгоҳ аз мавқеи Вазорати адлия ҳимоят намуд.

 

Хирад Каргасов

Хирад Каргасов, намояндаи созмони “Saferworld” дар Тоҷикистон рӯзи 5-уми май ба Радиои Озодӣ гуфт, ҳоло созмони онҳо фаъолият надорад.

Ӯ гуфт, бар асоси шикояти Вазорати адлия созмони “Saferworld” ҳақ надоштааст, ки дар доираи тарҳи алоҳида масъалаи зӯроварии занон дар хонаводаҳоро ба роҳ монанд.

“Мо дар ибтидо бо Вазорати корҳои дохилӣ мувофиқа кардем ва дар чаҳорчубаи ин машварат тарҳи мазкурро, ки як масъалаи ҷиддӣ дар ҷомеъа мебошад, хостем ба нишони кӯмаку пуштибонӣ ва ба даст овардани роҳҳали ин масъала дар хонаводаҳои тоҷик рӯи даст гирем”, --гуфт Хирад Каргасов.

Вазорати адлия аз чӣ норозӣ буд?

Ба қавли Хирад Каргасов, Вазорат дар мавриди нақзи қонуни забон шикоят пеш овард, ки созмон ҳангоми навиштани номаву тарҳҳо аз забони русиву англисӣ истифода кардааст.

Ҳарчанд, ба гуфтаи ӯ, эродҳо хурд буданд ва имкони ислоҳашон вуҷуд дошт. “Мо ба қароргоҳи асосиамон дар Лондон машварат кардем. Ҳоло тасимим гирифтем, ки ҳеҷ гуна амал ва тарҳу фаъолияте дар қаламрави Тоҷикистон анҷом надиҳем”,--гуфт ӯ.

“Saferworld” аз соли 2015 амалан дар Тоҷикистон ба фаъолият шурӯъ намуд ва дар он ҳудуди 70 нафар ба кор ҷалб шудаанд.

Тавре як намояндаи Вазорати корҳои дохилӣ бо шарти зикр нашудани номаш гуфт, созмони мазкур дар роҳи ислоҳи милитсияи тоҷик бо тарҳҳои худ саҳми муҳим дошт.

Созмоне, ки бо ВКД ҳамкорӣ дошт

Ба гуфтаи ӯ, "аз моҳи феврали соли 2016 дар доираи тарҳи "Ҳамкории милитсия бо ҷомеа" ҷиҳати амалӣ намудани "Стратегия ва барномаи ислоҳоти милитсия барои солҳои 2014– 2020" чорабиниҳо баргузор кардааст".

 

Нишасти САҲА бо ВКД дар доираи тарҳи ислоҳи милитсия

Вазорати корҳои дохилӣ бо мақсади пешгирӣ кардани зӯроварӣ дар оила, таъмини амният ва фароҳам овардани шароити муносиби зиндагӣ барои мардум бо “Saferworld” ("Дунёи бехатар") ҳамкорӣ кардааст.

 

Ин манбаъ мегӯяд, шурӯъ аз соли 2017 “Saferworld” ("Дунёи бехатар") оид ба ислоҳоти милитсия дар Норак, Ҳамадон, ноҳияи Шамсиддин Шоҳин, Рашт, Исфара, Ишкошим ва Кӯлоб ҳамкорӣ намудааст.

Созмони мазкур дар сомонаи худ навиштааст, ки тарҳҳои дигареро барои бештар намудани саҳми занон дар ниҳодҳои қудратии Тоҷикистон ҷиҳати коҳиши зуроварӣ ба занон дар ҷомеъа рӯи даст гирифта буд.

Ин созмон навиштааст, аз тариқи дафтарҳояш дар кишварҳои ҳамсоя бо Тоҷикистон дар соли 2010 ҳамкориро шурӯъ намуд ва дар соли 2015 расман фаъолияти худро дар дохили кишвар ба роҳ мондааст.

Мирзонабии Холиқзод

 

Чоршанбе, Май 05 2021

 

Муҳаммад Тиллобердиев истиқоматкунандаи деҳаи Роҳи нави Ҷамоати деҳоти Тоҷикободи ноҳияи Вахш мебошад. Ӯ соҳиби 5 фарзанд буда, аз ин 3 нафар маъюб-ду нафараш маъюби гуруҳи 1-ум ва 1 нафараш маъюби гуруҳи 2-юм аст. Айни ҳол 13 нафар дар таъминоти ин мард қарор доранд.   

Замин доданд, аммо…

Соли 2010 ба бо ҳузур ва дастгирии ду намояндаи Дастгоҳи иҷроияи Президенти ҶТ аз ҳудуди деҳаи Роҳи Нави ҷамоати деҳоти Тоҷикободи ноҳия ба Муҳаммад Тиллобердиев бинобар сабаби калон будани оилаву барои 3 кӯдаки маъюбаш 15 сотих замини наздиҳавлигӣ ҷудо карда шуд. Бинобар душвор будани шароити зиндагонӣ ин мард имконияти сохтмони манзили истиқоматиро надошта, ноилоҷ барои хӯрондани аҳли оила ин замини наздиҳавлигиро кишту кор карда, истифода бурда истодааст. Аммо вай хуб медонад, ки мақсади ҷудо намудани ин замин сохтмони манзили истиқоматист.   

7 сол дар интизори ҷавоб…

Муҳаммад Тиллобердиев чандин маротиба ба МИҲД ноҳияи Вахш барои қонунӣ ҳуҷҷатгузорӣ намудани ин замини наздиҳавлигӣ муроҷиат намудаст, зеро замини ҷудошуда ягон ҳуҷҷат надорад ва муайян нест, ин мард соҳибмулк аст ё не? Вале мақомотҳои дахлдор то ҳол ба ин масъала монеа эҷод намуда истодаанд. Мавсуф 7 сол дар интизории мактуби ҷавобӣ буда, дар ин муддат бо 3 фарзанди маъюбаш дар пушти дари МИҲД ноҳияи Вахш ҳамоно овораанд. 

Падари ин 3 маъюб мегӯяд, ки аз ин рафти кор хаста шуда, якчанд маротиба аризаи шикоятӣ ба мақомотҳои дахлдор навиштааст, аммо ягон натиҷа нест, боз ҳамон ваъдаҳо аз тарафи ҷамоат ва намояндаҳои Мақомоти иҷроияи ҳокимияти давлатӣ дар ноҳияи Вахш... 

Кӯдакони маъюб чӣ гуноҳ доранд ?

Илова бар ин Музаффар, Исмоил ва Роҳиллахон Тиллобердиевҳо нафақаи хеле ками маъюбӣ мегиранду аламовар ин аст, ки дар ҷашну маросимҳо аз ҳоли онҳо касе на хабар мегирад, на касе онҳоро барои гирифтани кӯмакпулиҳо даъват мекунад. Ин дарду ранҷҳояшон басанда набуд, ки келини ин хонадон моҳи апрели соли 2018 баъди таваллуди фарзандаш 2 моҳ зиста вафот кард ва айни замон 3 кӯдаки хурди келин низ дар таъминоти Муҳаммад Тиллобердиев қарор доранд. 

Шароити зисту зиндагонии ин оила бениҳоят вазнин асту дигар намедонад ба куҷо раваду дарди дилашро ба кӣ арз намояд. Чаро дар маҳал супоришҳоро масъулини ҷамоати деҳоти Тоҷикобод иҷро намекунанд? Заминро ҳамчун таҳҷоӣ ҷудо карда додаанд, вале ҳуҷҷатгузории онро ба иҷро намерасонанд. Мавсуф хоҳиши расмӣ гардонидани замини наздиҳавлигиро дорад, вале МИҲД аз додани қарор "оиди вобаста намудани замини наздиҳавлигӣ барои сохтмони манзили истиқоматӣ" беэътиноӣ зоҳир карда истодааст. Шояд дар таги ин коса ба қавле нимкосае ҳаст? 

Нуриддин Қосимзода, журналист, вилояти Хатлон

 

Панҷшанбе, Апр 29 2021

 

Сокинони маҳаллаи Ҳуснободи шаҳри Душанбе мегӯянд, пас аз се моҳи тахриби чанд манзил дар ин маҳалла, мақомоти ҳифзи ҳуқуқ дигарбора ба вайрон кардани манзилҳояшон шурӯъ намудаанд.

Рӯзи 21-уми апрел хонаи як сокини ин маҳалла аз сӯи кормандони мақомоти маҳалливу ҳифзи ҳуқуқ вайрон карда шуд ва ба чанде дигар ҳушдор додаанд, ки манзилҳояшон тахриб мешавад.

Ҳарчанд сокинон гуфтанд, дар даст ҳуҷҷатҳои расмӣ доранд, вале масъулон мегӯянд, хонаҳо худсарона ва ғайриқонунӣ бунёд шудаанд.

"Чаро заминро фурӯхтед?"

Фарзона Бобоева, сокини Ҳуснобод рӯзи 21-уми апрел ба сахтӣ тавонистааст аз тахриби манзилаш пешгирӣ кунад. Ӯ дар сӯҳбат ба Радиои Озодӣ гуфт, як гурӯҳ аз кормандони мақомот ба манзилаш омада, аз ӯ хостаанд, аз хона барояд, ки онро чаппа мекунанд.

"Гуфтам, чаро чаппа мекунед? Посух доданд, ки ин хона ҳуҷҷати қалбакӣ дорад, гуфтам, агар чунин аст, пас чаро дар вақташ ҳуҷҷати қалбакӣ карда мефурӯшед? Ҳашт сол мешавад кор карда, ду ҳуҷраашро ба зур сохтем, шавҳарам дар Маскав кор мекунад, ки хонаро пурра бунёд кунем, чаҳор фарзанди хурд дорам, гуфтанд, “ин гапҳо барои мо афсона аст”. Маро аз дари хона ба дарун партофтанд, даромада кӯдакҳоямро диданд, баромаданд. Дар ҳузури кӯдакон бо ман муносибати дағалона карданд, гуфтанд, ки боз омада чаппа мекунем",--афзуд, Фарзона Бобоева, сокини Ҳусунобод.

Ҳуснобод, як маҳаллаи навбунёдест, ки дар теппаҳои шимоли Душанбе қарор дорад. Қаблан ин заминҳо тобеи ҷамоати Чоряккорони ноҳияи Рӯдакӣ буд ва ду сол қабл қисми зиёди он ба ихтиёри ноҳияи Синои шаҳри Душанбе гузашт. Сокинонаш мегӯянд, чанд сол боз дар ин маҳалла ба сар мебаранд, вале аз одитарин шароит, ба мисли дастрасӣ ба обу мактаб, бархурдор нестанд.

Ҳушдорҳои батакрори мақомот ва нигаронии сокинон

Санифа Олимова, сокини дигари Ҳусунобод, рӯзи 22-юми апрел ба Радиои Озодӣ гуфт, онҳо обро мехаранд ва фарзандонро ба маҳаллаҳои дигар ба мактаб мефиристанд. Мусоҳиби мо таъкид намуд, ки ҳушдорҳои батакрори мақомоти маҳалливу ҳифзи ҳуқуқуқ дар мавриди тахриби хонаҳояшон, онҳоро нигарон намудааст.

"Мо аз зуромад ин ҷо истодаем, ба мо ҳуҷҷат доданд, мо ин заминро харидаем, чанд бор омаданд, гуфтанд, чаппа мекунем. Чаро дар вақташ сахт нагирифтанду фурӯхтанд ва имрӯз мегӯянд, ғайриқонунист, агар чаппа кунанд, бо ин фарзандони хурдам ҷое барои рафтан надорам",--гуфт, Санифа Олимова.

Чанде аз сокинони дигар гуфтанд, масъулони ҷамоати Чоряккорони ноҳияи Рӯдакӣ дар гузашта аз бунёди манзилҳояшон хабар доштанд, вале чизе нагуфтанд.

"Он вақт ман раис набудам"

Айни чунин савол ба Зоиршоҳ Гулов, раиси ҷамоати Чоряккорон дода шуд ва ӯ посух дод, ки замони бунёди манзилҳои баҳснок раҳбарии ҷамоатро бар дӯш надошт.

“Ман нав омадаам, он вақтҳо ин ҷо набудам, барои ҳамин намедонам",--гуфт ӯ.

Гулов гуфт, сокинон манзилҳои худро бидуни ҳуҷҷатҳои тасдиқкунанда ва ғайриқонунӣ сохтаанд. Аммо чанде аз ҳамсуҳбатон гуфтанд, "қарори сохтмону техпаспорти хонаҳояшонро доранд." Ба қавли раиси ҷамоат, дар ҳудуди заминҳои баҳсноки маҳалла тақрибан 20-30 оила зиндагӣ мекунад.

Нигаронии сокинон аз таҳдиди тахриби манзилҳояшон дар ҳолест, ки мақомоти ҳифзи ҳуқуқ рӯзи 21-уми январи имсол чанд хонаи навсохтро дар маҳаллаи Ҳуснобод пурра вайрон карда буданд. Он замон чанд сокини ин маҳалла ба Радиои Озодӣ гуфтанд, беш аз 15 хонаи навбунёд тахриб карда шудааст. Ба иттилои онҳо, дар ин маърака кормандони додситонӣ якҷо бо чанд маъмури милиса иштирок карданд.

Он замон ҳамсӯҳбатони мо дар мақомоти шаҳри Душанбе гуфта буданд, ки мувофиқи тарҳи генералии пойтахт дар заминҳои маҳаллаи Ҳусунобод бояд арча ва дарахтони дигари ороишӣ шинонда шавад, чун барои бунёди хона мувофиқ нестанд.

Пеш аз тахриб санадҳоро меомӯзанд

Сокинон бо таваҷҷӯҳ ба он ки дар даст санад доранду бо заҳмату харҷи маблағи солҳо ҷамъкардаашон хона сохтаанд, аз мақомот талаб доранд, ба тахриби манзилҳояшон хотима диҳанд. Дар ҳамин ҳол, як намояндаи Кумитаи замин, ки нахост номаш бурда шавад, гуфт, тахриби ҳар як манзил дар алоҳидагӣ мавриди омӯзиш қарор мегирад, ки то куҷо санадҳои соҳибони манзилҳои баҳснок қонунист.

Шикоятҳо аз вайрон намудани манзили сокинон дар гузашта низ борҳо садо додааст.

Додситонии кулли Тоҷикистон қаблан хабар дода буд, ки дар соли 2020 барои фурӯши замин ва пешниҳоди ҳуҷҷатҳои қалбакӣ нисбат ба 296 мансабдор парванда кушоданд.

Ориф Хоҷазода, раиси Кумитаи замин ва геодезии Тоҷикистон моҳи феврали имсол дар як нишасти матбуотӣ мавридҳои фурӯши заминро тасдиқ кард ва онро "ҳақиқати талх" номид.

Мавзӯи тақсими ноодилонаи замин барои бунёди хона ва бо гузашти солҳо тахриби онҳо, солҳо боз дар Тоҷикистон доғ мемонад. Ҳарчанд раҳбарияти Кумитаи замин мегӯяд, назоратро пурзур намудаанд вале дар гузашта коршиносон борҳо таъкид намудаанд, ки вуҷуди омилҳои фасод, набуди шаффофияту назорати ҷиддӣ, аз омилҳоянд, ки боиси тақсими ғайриқонунии қитъаҳои замин ва баҳс миёни сокинону мақомот шудааст.

Алишер Зарифӣ

Амриддин Олимов

 

Чоршанбе, Апр 28 2021

Пас аз арзу нигаронии мардум-хонандагони газетаи мардумии СССР вобаста ба қиматии нарху наво дар бозор, мо тасмим гирифтем ба рейд баромада, аз 2 бозори калонтарини ш.Душанбе-“Саховат”-у “Меҳргон” ва бозори хусусии “Сафариён” дидан намоем.

“Сафариён”: “Хоҳед харед-нахоҳед нахаред!”

Тибқи мушоҳидаҳои мо нархи маҳсулоти ниёзи аввалия дар бозор воқеан гарон шудааст. Дар бозори “Сафариён” ҳам мардуми харидор дар назди дӯконҳои гӯштфурӯшӣ аз нархи гарони он гиламанд шуда, бархе бо дасти холӣ мерафтанд. Ба мардуми норизо гӯштфурӯшон мегуфтанд “хоҳед харед, нахоҳед нахаред!”...

Дар бозори “Сафариён” қимати 1 кило гӯшт 60 сомонӣ, кӯфтаи гӯшти гов (фарши аслан аз  каллаи гов)-40 сомонӣ, каллаю почаи гов-40 сомонӣ арзиш дошт. Нархи  орди навъи 1-ум дар ин бозор 240 сомонӣ буд...

Нархи 1 халта орди навъи 1-ум дар бозори “Меҳргон”- 235-240 сомониро ташкил намуда, арзиши равғани 5 литраи растанӣ, аз он ҷумл “Олейна” то ба 145 сомонӣ дакка хӯрдааст. 1 кило гӯшти гов 60 сомонӣ буда, ба мардуми харидор қассобон, чун дар Сафариён 1 посух доштанд:

 “Хоҳед харед, нахоҳед нахаред!”

“Саховат”: ҳаёҳӯй нест

Дар бозори дигари пойтахт- “Саховат” нархи 1 кило гӯшти гов 55 сомонӣ буд, вале харидор надошт. Назди дӯконҳои гӯштфурӯшӣ мо на издиҳоме дидем ва на ҳаёҳӯйе. Ажиотаж нест! Ё харидор ахиран баақл шудаву телатумбак карда нархро намевардорад дигар, ё...пул надорад...

Сайвалӣ Сабзаев, директори КВД “Бозори “Саховат” зимни сӯҳбат бо мухбири мо афзуд, ки маъмурияти бозор 1 моҳи ахир нархи маҳсулоти ниёзи аввалияро ба танзим даровардаанд, вале омилҳои беруна ва худи мардум метавонанд дар арафаи ид бо ҳаёҳӯй боиси боло рафтани нархи гӯшту равғану орд шаванд. 

Арзиши маҳсулоти дигар, амсоли орду равған, картошкаву пиёз, сабзавоти барвақтӣ дар инҷо назар ба бозорҳои “Меҳргон”-у “Сафариён” арзонтар ба чашм мерасид.

Дар бозори “Саховат” нархи 1 халта орди навъи 1-ум 220-230 сомонӣ, равғани 2 литраи растанӣ-46-48 сомонӣ, 1 кило шакар-9 сомонӣ, картошка-4-4,40, пиёз 1,20-1,60 сомонӣ, 1 кило бодиринг 10 сомонӣ арзиш дошт. 1 кило дилу ҷигару каллаю почаи гов дар ин бозор 35-40 сомониро ташкил менамуд.

Назорати бозор дар дасти кист?

Нархи маҳсулоти ниёзи аввалия дар бозорҳои кишвар имрӯз ба маротиб боло рафтаву боиси нигаронӣ ва норизоии мардум шудааст. Воқеан ҳам, чаро мақомоти дахлдор, аз он ҷумла Хадамоти зиддиинҳисории назди Ҳукумати ҶТ, ки танзими нарху наво вазифаи ҷониаш аст, барои коҳиш додани нарх коре намекунад? Ё мекунаду намегӯяд? Агар мекард, мардуми харидор кори онҳоро бо чашму харҷи кисаи худ ҳатман медиду эҳсос мекард! 

Ва ё то кай савдогарони беэмони мо-“паразитҳои бозор” (ибораи дӯстдори М. Убайдуллоеви номӣ) бо баҳонаи болоравии қурби доллари ИМА, пандемияи коронавирус, кам шудани воридоти маҳсулот, хосса орду равғани растанӣ, аз вазъи имрӯзаи мардум суистифода бурда, нархҳоро ба фоидаи худ гарон мекунанд? Чаро мақомоти қудратӣ-Прокуратура, ВКД, КДАМ ва Агентии мубориза алайҳи коррупсия дасти чунин “паразитҳоро” ба қавле намешиканад, то ба мардум ҷабр нашавад? 

 

Омиронаи Сайёф, СССР

 

 

Сешанбе, Апр 20 2021

Бархе аз омӯзгорони шаҳри Душанбе, ки ҳафтаи гузашта ваксинаи зидди бемории COVID-19 гирифтаанд, мегӯянд, баъди дарёфти он, як муддат ҳарорати баданашон баланд шуд.

Вазорат: Шикоятҳо ҷиддӣ нестанд

Дар Вазорати тандурустӣ ва ҳифзи иҷтимоии аҳолии Тоҷикистон аз сабти даҳҳо ҳолати номатлуб, ки дар пай дарёфти ваксинаи "AstraZeneca" ошкор шудааст, хабар доданд. Дар ин ниҳод таъкид намуданд, ҳолатҳоеро, ки ба қайд гирифтаанд, ҷиддӣ нест.

 

Замира Юсупова, омӯзгори мактаби рақами 21-и Душанбе ҳафтае пеш бо гурӯҳе аз ҳамкоронаш ваксина гирифтааст.

"Хоҳем нахоҳем инро бояд гирем, зеро барои саломатиямон лозим аст. Баъди ваксина задан одам каме сустар мешавад, лекин пас аз ду-се рӯз худамонро хуб ҳис кардем",--гуфт, Замира Юсупова.

Меҳрубон Саидова, омӯзгори дигар, ки дарёфти ваксинаро таҷриба кардааст, афзуд, "бо ваксина задан каме ҳарорати бадан баланд мешавад, вале ин ягон ҷои тарс надорад".

Маъракаи эмкунӣ бар зидди COVID-19 се ҳафта пеш дар Тоҷикистон шурӯъ шуд. Тибқи иттилои расмӣ, аз 15 ҳазору 690 нафар омӯзгор дар Душанбе, беш аз 60 дарсадашон ваксина гирифтаанд. Ба қавли масъулин, ҳамарӯза беш аз ду ҳазор нафар ба ваксиназанӣ фаро гирифта мешаванд, ки инҳо асосан кормандони бахши тандурустӣ, маориф ва фурудгоҳу меҳмонхонаҳои пойтахт ҳастанд.

Беш аз 5 миллион нафар ваксина мегиранд

Асомиддин Бобозода, намояндаи Раёсати маорифи шаҳри Душанбе гуфт, то ҳол дар мавриди паёмадҳои дарёфти ваксина шикояте дастрас накардаанд.

Файзалӣ Саидзода, директори Маркази "Иммунопрофилактика"-и Вазорати тандурустӣ мегӯяд, аз 28 ҳазору 300 нафаре, ки то ҳол эм карда шуданд, 107 ҳолати номатлубро ба қайд гирифтаанд.

“Инҳо ҳамон ҳолатҳое ҳастанд, ки бевосита баъд аз гузаронидани ҳамин ваксинатсия сабт шудааст. Ҳолатҳои ҷиддӣ набуда, ба муддати як ду се рӯз ба монанди ҳароратбаландӣ, дарди сар, дарди буғумҳо, дарди мушакҳо, мумкин қайдкунӣ дида мешавад, ки ҳатман мегузаранд",--афзуд, Файзалӣ Саидзода.

Тоҷикистон дар доираи маъракаи ваксиназанӣ бар зиди коронавируси нав дар се марҳила беш аз 5 миллиону 800 ҳазор нафарро ваксина хоҳад зад. Кишвар 192 ҳазор воя ваксинаи "AstraZeneca"- ро ройгон дастрас кардааст ва қарор аст дар навбати баъдӣ 624 ҳазор воя аз ин навъи ваксинаро ворид кунад. Тибқи нақшаи пешбинишудаи маъракаи ваксиназанӣ, сокинони аз 18 сола болои Тоҷикистон бояд эм карда шаванд.

Назари сокинон чист?

Ҳарчанд дар Вазорати тандурустии кишвар гуфтанд, маъракаи ваксиназанӣ ба хубӣ пеш меравад, вале баъзе сокинон дар ин бора назари дигар доранд.

Усмон Саидов, сокини шаҳри Душанбе аз зумраи онҳоест, ки мепурсад, чаро онҳоро барои гирифтани ваксина касе чизе намегӯяд.

“Аз 55-сола болоро гуфтанд, даъват мекунанд ва эм мекунанд. Лекин моро то ҳол касе даъват накардааст. Ман дар ноҳияи Сино зиндагӣ мекунам. Агар даъват кунанд, рафта ваксина мегирам",--гуфт ӯ.

Намояндагони Вазорати тандурустии Тоҷикистон мегӯянд, талош доранд, фарогирии сокинон ба дарёфти ваксинаро васеъ намоянд.

Як пурсиши хабарнигорони Радиои Озодӣ аз роҳгузарон дар Душанбе нишон дод, ки назари мардум дар бораи дарёфти ваксина мухталиф аст.

Яке аз ҳамсӯҳбатони мо гуфт, “ман ваксина заднӣ нестам. Чунки саломатиам хуб аст, эҳтиёҷ надорам”.

Мусоҳиби дигари мо таъкид намуд, ки "ҳама ҳозир ваксинатсия карда истодааст, агар барои мо мумкин бошад, ман ҳам мегирам.”

Роҳгузари дигаре мегӯяд, " беморӣ, ки нест, ваксина ҳам даркор нест. Бигзор дар куҷое вазнинтар асту бисёртар мурда истодаанд, ҳамон ҷо зананд".

Музокира барои ваксини русӣ ва чинӣ

Ба қавли Файзалӣ Саидзода, масъули Вазорати тандурустӣ бо ворид намудни ваксинаи чинӣ ва русӣ доираи эмкунӣ миёни аҳолӣ васеъ хоҳад шуд.

"Ҳоло музокира бо Чину Русия идома дорад ва боварӣ дорам дар наздиктарин фурсат аз ин кишварҳо ваксина ворид мешавад",--гуфт ӯ.

Тоҷикистон 20 дарсади ваксинаи заруриро дар доираи барномаи COVAX дарёфт карда, боқии ваксинаро бояд харидорӣ кунад.

Бонки Ҷаҳонӣ барои хариди ваксинаҳои зидди COVID-19 барои Тоҷикистон 8,63 миллион доллар кумак ҷудо кардааст. Дар Вазорати тандурустӣ дақиқан дар бораи харҷи маблағҳои грантии Бонки Ҷаҳонӣ, ки барои хариди ваксина пешбинӣ шудааст, посух надоданд.

Ин бонк дар ҷавоб ба як номаи Радиои Озодӣ посух дод, ки бо 8,63 миллион долларе, ки моҳи феврал барои барномаи “Лоиҳаи изтирории СOVID-19 Тоҷикистон” тасдиқ кардаанд, то ҳанӯз хариди ваксина шурӯъ нашудааст. Зеро, ба иттилои Бонки Ҷаҳонӣ, ҳанӯз ин лоиҳа аз сӯи порлумони Тоҷикистон тасвиб нашудааст ва ба иҷро надаромадааст.

Барномаи Бонки Ҷаҳонӣ ва баҳси дарёфти ваксинаҳои дигар

Саидҷаъфа Усмонзода, вакили Маҷлиси намояндагони Тоҷикистон гуфт, чунин тарҳе дар мавриди ҷудо гардидани беш аз 8 миллион доллар гарнти Бонки Ҷаҳонӣ барои харидории ваксина то ҳол дастраси онҳо нашадааст.

Бонки Ҷаҳонӣ дар посухи худ таъкид намудаст, ки "Барномаи ҷаҳонии ҳимоят аз ваксинзании COVAX тақрибан 16 дарсади аҳолиро бо ваксинаҳои ройгон таъмин менамояд ва сармоягузории Бонки Ҷаҳонӣ эмгузаронии 4 дарсади аҳолиро (бо фарогирии зиёда аз 380,000 нафар) таъмин мекунад".

Норушаниҳо дар мавриди хариди дигар навъи ваксинаҳо дар ҳолест, ки баъзе мутахассисони бахши тандурустӣ мегӯянд, дар шароити набудани имкони интихоби шакли эмгирӣ, ночоранд аз "AstraZeneca" истифода кунанд.

Абдухалил Холиқзода, раиси Бемористони Ибни Сино" дар Душанбе ҳафтаи гузашта ба Радиои Озодӣ гуфт, ба хулосае омадаанд, ки дар шароити набудани ваксинаҳои дигар бояд ҳама аз ваксинаи "AstraZeneca" истифода кунанд. Ӯ гуфт, "хубтар мебуд агар бароямон ваксинаҳои дигар низ пешниҳод шавад".

Номи "AstraZeneca" як моҳи пеш дар сархати хабарҳои ҷаҳон қарор гирифт. Як қатор кишварҳои аврупоӣ гуфтанд, баъд аз хабарҳо дар бораи лахташавии хуни баъзе афроде, ки ин ваксинаро дарёфт кардаанд, аз истифодаи ин ваксина муваққатан даст мекашанд. Вале худи ин ширкат ва ҳам Созмони Ҷаҳонии Тандурустӣ гуфтанд, далели мустақими лахташавии хуни муштариён баъд аз қабули ваксинаи "AstraZeneca" вуҷуд надорад. Масъулони Вазорати тандурустии Тоҷикистон ҳам мегӯянд, аз истифодаи ин ваксин то имрӯз ягон шикояти ҷиддӣ аз сокинон нарасидааст.

Дар бештар аз як моҳи ахир мақомоти кишвар аз сабт нашудани ҳолати нави гирифтори ба коронавируси нав хабар медиҳад. Тибқи иттилои Вазорати тандурустӣ, дар Тоҷикистон бемории COVID-19 ба беш аз 13 ҳазор нафар сироят карда, 90 нафарро куштааст. Оморе, ки иддае ба дурустияш шубҳа доранд ва миқёси бемориву талафот аз онро бештар аз рақамҳои эълоншуда медонанд.

 

Видеоро ин ҷо тамошо кунед.

 

https://www.ozodi.org/a/31205319.html 

  •  << 
  •  < 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  > 
  •  >> 
саҳ 1 аз 136

Китобҳо

Flag Counter