Майори Қӯшунҳои марзӣ, Абдушафеъ Тоҷов (тел: 98 107 23 37) нафақагир дар меҳмонии СССР гуфт, ки «Фоҷиаи Сичароғ» ҳич аз пеши назарам дур намешавад. Ҳақиқатан ҳам русҳо намехостанд, ки ҳифзи марзи давлатиро ба соҳибонаш баргардонанд. Вақте онҳо диданд, ки Тоҷикон воқеан ҳам Ватани азизи худро дӯст медоранд, содиқона хизмат мекунанд, роҳи дигари айбдоркуниро пеш гирифтанд. «Разведка»-и русҳо нафари худро аз он тарафи соҳил, яъне афғоне, ки ба онҳо ҳамкорӣ дошт, гузоштанд. Ба ӯ маслиҳат карданд, ки соатҳои 19 ва 20-и шаб, аз нуқтаи рӯбарӯи деҳаи Потхнови н.Дарвоз гузарад ва ба онҳо вохурда соҳиби амволи зиёд, аз ҷумла, тиру яроқу аслиҳа мешавад. Баъдан русҳо гурӯҳи «оперативии» худро пинҳонӣ бо роҳи нақлиёт ва пайроҳаҳо ба деҳаи «Дровак» оварда, дар хонаи яке аз шаҳрвандон то шом нигоҳ дошта, шаробнушӣ мекунанду пас ба амалиёт мегузаранд. Бояд гуфт, ки с.1998 1 қитъаи марзи давлатӣ аз минтақаи Яхш-Пун то Қалъаи Хумро, ки зиёда аз 80 км аст, ба ӯҳдаи марзбонони Тоҷик, ҳамчун «эксперимент» супорида буданд. Яъне мехостанд донанд, ки Тоҷикон аз ӯҳдаи ҳифзи сарҳад баромада метавонанд ё не? Инро провокатсия мегӯянд! Дар бораи ин Фоҷиа ҳамчун шоҳиди бевосита барои шумораи ояндаи СССР ҳатман менависам.
Узви Ихвон-ал-СССР, кондуктори хатсайри мусофиркашонии №33, Юсуф Хоҷаев (тел: 902 02 45 53, 900 64 55 33) сокини пойтахт дар меҳмонии СССР гуфт, ман 1 хоҳиш ё таклифи ронандаҳои хатсайри №33-ро ба шумо расонданиям, чун онҳо нек медонанд, ки ман пайваста СССРро мехонам, барои ҳамин сахт хостанд, ки инро ба СССР бирасонам. Ронандаҳои автокалоннаи №2927 мехоҳанд, роҳкирои хатсайри №33 андак тағйир дода шавад. Масалан, аз бозори Корвон то бинои Сирк 1 сомонӣ, баъди он то истгоҳи охирин (Хитойбозор) 2 сомонӣ. Ин дархост ва андешаи ронандаҳо аз он пайдо шуд, ки вақте аз бозори Корвон то маҳаллаи Сирк мусофиронро меорем, дигар бақияпулӣ-пули майда надорем, ки ба онҳо 20 дирам ёфта бидиҳем. Чунки тавре шоҳидем, маҳз дар ҳамин масъала ва бисёр маврид мусофирон бо ронандаҳо дар баҳс мешаванд ва бисёр асабӣ. Ҳоло тибқи нархномаи расмӣ аз аввал то “конечка”-истгоҳи охири хатсайр роҳкиро 1 сомониву 60 дирам аст. Агар инро 2 сомонӣ мекарданд, дигар ягон ҷои баҳсу асабоният намемонд. Мо бовар дорем, ки Хуршед Хизиров-раҳбари “Автоколонна-2927” хоҳиши ронандаҳоро дастгирӣ мекунад.
Муаллими собиқадор Ғозибеки Авазиён аз деҳаи Эшонои ноҳияи Кӯҳистони Мастчоҳ (тел: 92 811 85 97) дар меҳмонии газетаи СССР гуфт, ки ноҳияи мо аз аввал то охир проблема аст. Мисол, на барои раиси ноҳия-Муҳаммадҷобир Раҷабзода ва на ба Абдураҳмон Қодирӣ-раиси вилояти Суғд ягон аҳамият надорад, ки мо-мардум зиндаем, ё мурда. Инро ба чӣ хотир гуфтам? Тамоми он мушкилоте, ки то имрӯз чандин бор дар газетаи СССР гуфтам, ягонтои он ҳал шудагӣ нест ва проблемаҳо ҳамон хеле ҳаст, ки 1 сол пеш буд! Агар дар бораи дилхоҳ проблема нависем, аз мақомоти ноҳия ба сари мо фишор меоранд, ки “барои чӣ навиштӣ, ё ба ҳама ҷо эълон кардӣ?”. Ман фикр мекунам, ки ноҳияи мо назар ба шаҳри Ваҳдат 100 сол ақиб мондааст, зеро ягон корхонае, ки мардум шабонарӯз дар он ба кор фаро гирифта шавад, нест!!! Новобаста аз он, ки ноҳияи мо баъд соҳибистиқлолии Тоҷикистон таъсис ёфтааст, аммо чаро ягон пешравӣ, рушд ва навигарӣ дида намешавад? Инро то сатҳи вилоят ҳама медонад, лек ягон парво надоранд.
Табиби собиқадор Хосият Ҳомидова, аз деҳаи Навкорами н.Ёвон (тел: 93 527 79 60) дари меҳмонхонаи СССРро кӯфт ва гуфт, ки ман бо 1 алам омадаам. Аз с.1973 то ҳол узви Ҳизби коммунистам. Аз 2.01.2014 тибқи шартномаи меҳнатӣ дар шуъбаи ҷарроҳии кӯдаконаи Беморхонаи марказии ноҳия ҳамчун ҳамшира кор мекардам. Ҳоло дар нафақа ҳастам, лек он ба рӯзгорам намерасид, лиҳозо, ноилоҷ тибқи шартнома ба Беморхонаи ноҳия ба кор даромадам. Вале ҳар боре, ки бо сардухтури беморхона-Халилов Б.Ғ. шартномаи меҳнатӣ бастанӣ мешудам, бо ҳар баҳона инро намехост. Соле пештар вақте оид ба ин мушкил ба Вазорати тандурустӣ муроҷиат кардам, масъала ҳал шуд, аммо баъди ин ӯ ба ман хусумат пайдо кард. Баъди ин ҳам ӯ бастани шартномаи кориро бо ман рад кард. Боз ба Вазорат арз кардам, аммо ин дафъа ӯ бо ман танҳо барои 6 моҳ шартномаи меҳнатӣ басту халос. Ҳол он ки бо дигар кормандони дар нафақа буда шартномаро ба муҳлати дароз бастааст. То ҳол дар беморхона аз болои ман ягон арзу шикояте нест, ки асосе барои аз кор озод шуданам шуда бошад. Аз вазири тандурустӣ эҳтиромона хоҳиш дорам, ки дар асоси қонун ба рафтори Халилов баҳо бидиҳад...
Футболисти маъруфу собиқадор-Азим Наимович Яқубови 56-сола (тел: 919 01 24 00) дар меҳмонии СССР гуфт, ки аз кӯдакӣ мухлиси футбол будаму дертар ва тадриҷан дар гурӯҳи футболистони номӣ-Рашид Раҳимов, Мӯҳсин Муҳаммадиев, Манасян, Азимов, Ермолаев, Ҳаким Фузайлов… пайваста ва якҷоя футбол мезадем. Ҳамин муҳаббати ман ба футбол буд, ки 1 асари калонҳаҷмеро ҳафтае пеш таҳти унвони «От рассвета до расцвета: Футболные вершины «Памира» бо теъдоди 100 нусха дар матбааи «Ношири Сайҳун»-и ш.Хуҷанд ба чоп расонидам. Асар аслан дар шакли энсиклопедия асту ба таъриху фаъолияти ФК Помир бахшида шудааст, аммо мутаассифона, дар фурӯш нест ва шояд камтиражтарин китоб дар Тоҷикистон бошад! Зеро онро бо пули худам чоп кардам. Ҳарчанд барои нашр спонсор кофтам, касе дастгириям накарду баҳона ҷустанд, ки «ҳоло кризис аст, пул нест…!». Тамоми маълумоти энсиклопедиро дар 2 сол ҷамъ кардам… Ҳоло берун аз мавзуъ гуфтание дорам. Матлаберо дар шумораи гузаштаи СССР оид ба «дзюдо»-чиёни Тоҷик хонда, хело хандаам гирифт. Бовар кунед, ин шармандагист, вақте дар 7 сония мағлубат мекунанд!
Хонанда, дӯст ва мухлиси ҳамешагии газетаи мардумии СССР Талбак Холов, сокини шаҳри Душанбе (тел: 919 82 01 37) дар меҳмонии СССР гуфт, дар шумораи гузаштаи газетаи СССР хондам, ки Ҳоҷӣ Шамсиддини Қудрат дар робита ба бесифатии набот ва дигар маҳсулоти қаннодӣ гуфтааст. Ин бародари гиромӣ 100% рост мегӯяд! Ман ҳоло дар идома ва барои тақвияти андешаи Ҳоҷӣ гуфтаниям, ки натанҳо набот, балки тамоми анвоъи шакару қандҳои сафеди ватанӣ ягон таъму ширинӣ надоранд. Ёдатон бошад, агар 1 дона қанд ё 1 қошуқ шакари советиро дар 1 пиёла чой мепартофтед, ба ҳадде ширин мешуд, ки... Ҳоло 5-6 қошуқ шакар андозед ҳам ширин намешавад! Яъне аз ин бармеояд, ки найрангбозӣ ва “ҳаромкориву” мардумфиребӣ дар ҳама ширкатҳои қаннондӣ ҳаст! Ҳамчунин, Нурулло Ҳасанов ҳам оид ба заҳматҳои деҳқонони мо бисёр хуб гуфтааст, ки “чинӣ пухтаву тухмҳояш пуч”. Тоҷикстандарт ба ҷои дурӯғкобиву таҳдиду фишор ба мардум бояд чунин халтураву сохтакориҳоро фош кунад ва ба Ҳукумат нишон диҳад!!! Ва дар охир 1 суол, оё раҳбарияти Тоҷикстандарт қанду шакари ватаниро истеъмол мекунад?
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
