ХАБАРИ ДОҒ
Ҷумъа, Март 19 2021

ДӮСТОНИ АЗИЗ, ҲАМВАТАНОНИ ГИРОМӢ!

Он гунае, ки шумо огоҳӣ доред, ман дар тӯли 1,5 соли охир барои барқарор кардани шарафи номи худ мубориза бурдам. Мутаассифона, тамоми кӯшишҳои маънавию ҷисмонӣ ва молиявии ман бенатиҷа буданд, зеро ҳамаи далелҳои барои исботи бегуноҳиям, ки аз ҷониби адвокати аврупоии кирояшудаи ман пешниҳод гардиданд, пешакӣ аз ҷониби айбдоркунандагон ба тӯҳмат эътимоднок карда шуданд. Ман дар майдони муборизаи ҳалоли варзишӣ барои онҳо як рақиби пурқуввату тавоное будам, ки ба таври дуруст ва аз рӯи меъёрҳои варзишӣ бо ман рақобат кардан барояшон мушкил буд ва онҳо аз роҳи ҳалоли рақобат даст кашида, тасмим гирифтанд, ки маро ба майдони ҷангашон кашанд. Бо онҳо дар майдони худашон мубориза бурдан бошад, ба мисли бо “осиёи бодӣ” ҷанг кардан аст, ки анҷомаш нокомӣ мебошад. 

Ман намефаҳмидам, ки чаро вақте ки ман ва тими ман ҳар вақте ки ба пирӯзӣ наздик мешудем, санаи муҳокимаҳо мавқуф гузошта мешуд ва баъдан гаштаю баргашта ин саҳна такорор меёфт. Ҳеҷ намефаҳмидем, ки барои чи ба номаҳои мо моҳҳо посухе намерасад?

Ахиран ман қарор кардам, ки ба ин бозиҳо хотима гузорам, аммо баъд аз 2 рӯз бароям номае расид, ки ман то 24 сентябри соли 2021 аз ҳуқуқи иштирок намудан дар мусобиқаҳо барканор шудам.

Баъдан, муҳлатро ҳисоб карда, фаҳмидам, ки ки ҳузури ман дар Олимпиадаи Токио барояшон мувофиқ нест. Бино бар ин, то 24-уми сентябри соли 2021 аз ҳаққи иштирок дар бозиҳо маҳрум карданд. Онҳо ин ҳақро аз ман гирифтанд, аммо ман мисли пешина қаҳрамони Бозиҳои олмипии соли 2016 дар Рио ҳастам ва медали тилло дар хазинаи мунтахаби Ҷумҳурии Тоҷикистон маҳфуз аст."

Ман ба Пешвои муаззами миллат, Президенти мӯҳтарамамон Эмомалӣ Раҳмон, шаҳрдори Душанбе, мӯҳтарам Рустами Эмомалӣ ва тими ӯ барои дастгирӣ ва кӯмакҳои расонидашудаашон, инчунин ба ҳамаи онҳое, ки дар ин давраи тӯлонӣ аз ин қазия изҳори нигаронӣ карданд, миннатдории самимонаи худро баён менамоям.

Бо эҳтиром,

Қаҳрамони олимпӣ

Дилшод Назаров.

 

 

Ҷумъа, Фев 05 2021

Доварони Тоҷикистон дар Мадина бозии Лигаи шоҳзода Муҳаммад бин Салмон-двизиони якуми Арабистони Саудиро хизматрасонӣ карданд. 

Ҳалолашон бод! Ватанро ана ин хел бояд мураррифӣ намуд!

Ҳайати доварони Тоҷикистон бозии даври навбатии Лигаи шоҳзода Муҳаммад бин Салмон-дизиони якуми Арабистони Саудиро хизматрасонӣ намуд.

Дар даври нуздаҳуми двизиони якуми Арабистони Саудӣ ҳайати доварони Тоҷикистон бо сардории рефери ФИФА Сайёдҷон Зайниддинов бозӣ байни дастаҳои “Уҳуд” (Мадина) ва “Ал-Наҷран”-ро хизматрасонӣ намуд. Бозӣ дар шаҳри Мадина баргузор шуда, бо ҳисоби 2 бар 1 ба фоидаи соҳибони майдон анҷом ёфт.

Сайёдҷонро дар ин бозӣ, дар канори майдон ёварони рефери ФИФА – Акмал Буриев аз Турсунзода ва Хусрави Сиддиқзод аз Душанбе кӯмак намуданд. Вазифаи довари захираро Насрулло Кабиров иҷро дошт.

 

Нуралӣ Хоркашев

Махсус барои СССР

 

Чоршанбе, Фев 03 2021

23 январи соли равон варзишгари ҷавони тоҷики зодаи Исфара Баҳодур Яқубов дар шаҳри Екатеринбурги Федератсияи Россия, дар мусобиқоти байналхалқӣ аз намуди бокси ҳирфаӣ RCC Boxing Promotions бар ҳарифи худ Виктор Вежливцев пирӯзӣ ба даст овард. Ҷоизи зикр аст, ки ин нахустин пирӯзии Баҳодур дар чунин мусобиқоти сатҳи баланд асту ӯ додари варзишгари маъруф Муҳаммадхӯҷа Яқубов аст, ки шукрона бохт надорад (16:0).

ТОҶИКИСТОН БА ПЕШ!

ВА БОЗ ЯК ПАЙКИ ПИРӮЗИИ ҶАҲОНПАҲЛАВОНИ ТОҶИК. 23 январи соли равон боз 1 варзишгари маъруфи тоҷики зодаи Исфара, Чемпиони ҷаҳон Асрор Воҳидов дар шаҳри Екатеринбурги Федератсияи Россия, дар мусобиқоти байналхалқӣ аз намуди бокси касбӣ RCC Boxing Promotions бар ҳарифи африкоии худ Тото Бонокоане пирӯз гардид!

Пирӯзӣ, Камарбанди Қаҳрамонӣ муборак, додари гиромиқадри мо!

Номбардори Тоҷикистони азиз бошед!

 

Иқбол Тешаев

Махсус барои СССР

Дар акс Муҳаммадхӯҷа Яқубов, Баҳодур Яқубов ва Шарифҷон Тошматов

 

Панҷшанбе, Янв 28 2021

Мусобиқаи ҷашнӣ

Чун анъана, имсол низ мавсими футболи ватанӣ бо баргузории мусобиқаи ҷумҳуриявӣ барои дарёфти Ҷоми Федератсияи футболи Тоҷикистон -2021 шурӯъ шуд. Қобил ба зикр аст, ки мусобиқаи имсола бо чанд вижагии худ аз мусобиқаҳои пешин фарқ мекунад.  Аввалан, мусобиқа бахшида ба 30 солагии Истиқлолияти давлатии Ҷумҳурии Тоҷикистон бахшида мешавад ва сониян мусобиқаи имсола барои бори 10-ум баргузор гашта, худ мусобиқаи ҷашнӣ мебошад. Мусобиқаи имсола ҳам аз ду марҳила-пешакӣ ва ниҳоӣ иборат буда, марҳилаи аввали он тибқи Низомнома дар се минтақа-Душанбе, Хатлон ва Суғд баргузор мешавад. Дар навбати худ марҳилаи пешакии Ҷоми ФФТ-2021 дар вилояти Хатлон низ дар ду минтақа-Бохтар ва Кӯлоб доир мегардад. Дар ҳар минтақаи вилояти Хатлон 6 дастагӣ баромад мекунанд. Ғолибони марҳилаи гурӯҳии минтақавӣ ба марҳилаи ниҳоӣ роҳ меёбанд. Марҳилаи ниҳоии мусобиқа моҳи феврал дар шаҳри Душанбе баргузор мешавад. Мо аз рафти он ҳатман барои хонандаи худ матлаб таҳия хоҳем кард. Мо Метавонем. 

 

Харҷҳои мусобиқа

Зимнан, тамоми харҷҳои баргузории мусобиқа, аз ҷумла иҷораи майдонҳои бозӣ, ороиши варзишгоҳҳо бо навиштаҷотҳои таблиғӣ, ҳаққи хизмати доварону нозирони хизматрасон, ҳақи хизмати духтур ва дигар харҷҳои марбут ба ташкилу баргузории бозиҳоро Лигаи футболи Тоҷикистон пардохт менамояд. Ин мусобиқа, ки пеш аз мавсимӣ буда бо мақсади омодагии дастаҳо ба масими нав гузаронида мешавад, дар омодагии онҳо нақши бориз мегузорад. Ҳар даста метавонад то 45 бозигарро ба рӯйхати дархостии худ шомил созад. Ҳадафи асосӣ аз баргузории мусобиқа омода намудани варзишгоҳҳо, майдонҳои футболбозӣ, футболбозон, доварон ва дар маҷмӯъ тамоми дастаҳо ба мавсими нави футбол дар кишвар мебошад.  

 

Лигаи футболи Тоҷикистон-муаррифгари Ватан

Бо истифода аз фурсати муносиб, ба унвони Лигаи футболи Тоҷикистон ҳамчун масъули ташкилу баргузоркунандаи мусобиқаҳо ташаккури алоҳида бояд гуфт. Новобаста аз мушкилоти мавҷуда Лига барои дар сатҳи беҳтарин ташкил кардани тамоми чорабиниҳои худ талошҳои арзанда мекунад. Қобили қайд аст, ки аз ҷониби Лига ба сатҳу сифати майдонҳои бозӣ, варзишгоҳҳо ва дигар иншоотҳои ба футбол марбут дошта,  таваҷҷӯҳи  махсус зоҳир карда мешавад. Қариб 90 фоизи бозиҳои мусобиқаҳои Лига ба воситаи Шабакаҳои телевизиони “Варзиш” ва “Футбол”  ба таври мустақим намоиш дода мешаванд, ки онҳо дар садҳо кишвари олам пахш шуда, Тоҷикистони азизи моро намояндагӣ мекунанд. Аз ҳамин лиҳоз, аз ҷониби дар паи иҷрои дастуру супоришҳои роҳбарияти Федератсияи футболи Тоҷикистон  Лигаи футболи мамлакат ҳамеша барои дар сатҳи арзандаву муносиб муаррифӣ намудани футболи ватанӣ дар арсаи байналмилалӣ кӯшишҳо дорад. 

 

Ҷоми ФФТ дар минтақаи Душанбе

Рӯзи душанбеи 25 январ марҳилаи пешакии Ҷоми Федератсияи футболи Тоҷикистон-2021 дар минтақаи Душанбе шурӯъ шуд.

Дар гурӯҳи “А” “Регар-ТадАЗ”-и Турсунзода бо ҳисоби калони 4 бар 1 “Шоҳмансур”-и пойтахтро шикаст дод. Бозии дигари ин гурӯҳ байни дастаҳои “Кӯктош”-и ноҳияи Рӯдакӣ ва КМВА-и Душанбе мусовии бе гол анҷом ёфт.

 

 БҒМБТ/ТИ

1«Регар-ТадАЗ» (Турсунзода)11004-13

2«Кӯктош» (Рӯдакӣ)10100-01

3КМВА (Душанбе)10100-01

4«Локомотив-Помир» (Душанбе)00000-00

5«Шоҳмансур» (Душанбе)10011-40

 

Дар гурӯҳи “Б” «Истиқлол» бо ҳисоби калони 5 бар 0 дастаи “Ваҳдат”-и шаҳри Ваҳдатро шикаст дод. «Барқчӣ»-и Ҳисор бошад бар «Душанбе-83»-и Душанбе бо ҳисоби 2 бар 1 зафар ёфт.

 

Даври 2-юм

28 январ (панҷшанбе)

10:30 – «Шоҳмансур» – «Кӯктош». Душанбе, варзишгоҳи марказӣ

14:00 – «Локомотив-Помир» – «Регар-ТадАЗ». Душанбе, Варзишгоҳи марказӣ

 

 БҒМБТ/ТИ

1«Истиқлол» (Душанбе)11005-03

2«Барқчӣ» (Ҳисор)11002-13

3«Душанбе-83» (Душанбе)10011-20

4«Ваҳдат» (Ваҳдат)10010-50

 

Даври 2-юм

28 январ (панҷшанбе)

10:30 – «Барқчӣ» – «Истиқлол». Ҳисор, варзишгоҳи марказӣ

14:00 – «Душанбе-83» – «Ваҳдат». Ҳисор, Варзишгоҳи марказӣ

 

Дар шумораҳои оянда оиди рафти ин мусобиқа ва дигар рӯйдодҳои олами футболи ватанӣ барои шумо матлаб хоҳем навишт. 

Нуралӣ Хокашев

Махсус барои СССР

 

 

 

 

Ҷумъа, Дек 25 2020

Ассотсиатсияи журналистони риштаи варзиш 10 варзишгари беҳтарини Тоҷикистонро дар соли 2020-ро муайян кард. Бар асоси натиҷагирии назархоҳии хабарнигорони варзишӣ ба даҳгонаи беҳтаринҳо инҳо дохил шуданд:

Баҳодур УСМОНОВ (бокс) – дорандаи роҳхат ба Олимпиадаи Токио-2020. Ӯ дар мусобиқаи интихобӣ дар минтақаи Осиё/Уқёнус дар Урдун дар вазни 63 кг соҳиби роҳхати олимпӣ шуд.

Шаббос НЕЪМАТУЛЛОЕВ (бокс) – дорандаи роҳхат ба Олимпиадаи Токио-2020 . Ӯ дар мусобиқаи интихобӣ дар минтақаи Осиё/Уқёнус дар Урдун дар вазни 81 кг соҳиби роҳхати олимпӣ шуд.

Акмалиддин КАРИМОВ (самбо) – дорандаи медали нуқраи чемпионати ҷаҳон дар вазни 57 кг дар Сербия.

Хушқадам ХУСРАВОВ (самбо) — дорандаи медали биринҷии чемпионати ҷаҳон дар вазни 62 кг дар Сербия.

Комроншоҳи УСТОПИРИЁН (самбо)– дорандаи медали биринҷии чемпионати ҷаҳон дар вазни 90 кг дар Сербия.

Ҳикматулло ВОҲИДОВ (гӯштини озод)  – дорандаи медали нуқраи чемпионати Осиё дар вазни 57 кг дар Ҳиндустон.

Муҳаммад ИКРОМОВ (гӯштини озод) – дорандаи медали нуқраи чемпионати Осиё дар вазни 61 кг дар Ҳиндустон.

Искандари РУСТАМ (гӯштини озод) – дорандаи медали биринҷии чемпионати Осиё дар вазни 97кг дар Ҳиндустон.

Мубинҷон АҲМАДОВ (гӯштини юнониву румӣ)– дорандаи медали биринҷии чемпионати Осиё дар вазни 63 кг дар Ҳиндустон.

Муниса ОЙМАТОВА (таэквон-доWT) — дорандаи медали тиллои мусобиқаи байналмилалии Fujairah Open G2 дар вазни 49 кг дар Аморати Муттаҳидаи Араб.

 

Панҷшанбе, Нояб 26 2020

 

Тамоми ҷаҳон пас аз марги Марадона мотам мегирад.

Вокуниши афроди маъруф ба марги ҳамлагари афсонавии Аргентина Диего Марадона.

Пеле- шоҳи футбол, футболбози афсонавии Бразилия:

- Чӣ хабари ғамангез. Ман 1 дӯсти хубамро аз даст додам ва ҷаҳон 1 афсонаро аз даст дод. Ҳанӯз бисёр чизҳоро бояд гуфт, аммо дар ҳоли ҳозир, Худо ба аъзои оилаи ӯ нерӯ бубахшад, то қуввати таҳаммули ин фоҷиаро дошта бошанд. Умедворам, ки рӯзе мо метавонем бо ӯ дар осмон ҳам футбол бозӣ кунем.

Ҷозеф Блаттер, собиқ президенти ФИФА:

- Ман мехоҳам бигӯям, ки Марадона воқеан дар 3 даҳсолаи охир дар футболи ҷаҳон осоре боқӣ гузошт. Вай футболбози фавқулодда буд. Диего мардест, ки дастаи худро соли 1979 ба чемпионати ҷаҳонии ҷавонон дар Токио бурд, ки Аргентина дар финал дастаи мунтахаби СССР-ро мағлуб карда, дар охири бозии ҳалкунанда 3 гол зад. Ҷоми ҷаҳонии соли 1986 дар Мексика хотирмону фаромӯшнашаванда аст. Дар он ҷо ӯ ба дастаи миллӣ ғалаба овард. Он голи фаромӯшнашавандаро бо "Дасти Худо" дар бозӣ бо бритониёиҳо ба ҳадаф расонд. Ва акнун Худо ӯро ба хона даъват кард. Ором бихоб, Диего. Ташаккур барои ҳама бозиҳоят!

Лионел Месси, капитани мунтахаби миллии Аргентина:

- Рӯзи хеле ғамангез барои тамоми Аргентина ва барои футбол. Ӯ моро тарк кард, аммо нарафт, зеро Диего абадист. Ман ҳама лаҳзаҳои аҷоибро, ки якҷоя аз сар гузаронидаем, дӯст медорам ва мехоҳам ба оила ва дӯстони ӯ изҳори тасаллият кунам. Равонаш шод бод!

Криштиану Роналду, капитани мунтахаби миллии Португалия

- Имрӯз ман бо дӯст ва ҷаҳон бо нобиғаи ҷовид видоъ мекунем. Яке аз беҳтаринҳо дар ҷаҳон. Ҷодугаре. Вай хеле барвақт меравад, аммо мероси бепоён ва боқимондаро боқӣ мегузорад, ҷои ӯро ҳеҷ каси дигар пур карда наметавонад. Дар осоиштагӣ истироҳат кунед, ас. Шумо ҳеҷ гоҳ фаромӯш нахоҳед шуд.

Нуралӣ Хоркашев

Махсус барои футболдӯстдорони СССР

 

Аз редаксия: Дасти Худо пеши Худо рафт!!!

Хотиррас мешавем, ки Армандо Диего Марадона ситораи тобонтарин ва Шоҳбаччаи Футболи асри ХХ ва ҳама давру замонҳо, 25.11.2020, дар ватанаш Аргентина, дар синни ҳамагӣ 60-солагӣ, бар асари сактаи қалб фавт ёфт. 

…Чӣ қадар лаҳзаҳои хушу хубе Ту-Диего бар мо-мухлисони футбол ҳадя карда будӣ. Ҳамин хайрияи ҷорият кофист, ки абадан озими Ҷаннати Худо шавӣ. 

Дасти Худо, ба пеши Худо баргаштанат муборак бод. 

Мо Метавонем!

 

  •  << 
  •  < 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  > 
  •  >> 
саҳ 1 аз 34

Китобҳо

Flag Counter