ХАБАРИ ДОҒ
Ҷумъа, Нояб 17 2017


Даври интихобии Ҷоми Ҷаҳон-2018 дар тамоми қораҳо ба анҷом расид. Ба ғайр аз мунтахаби Русия, ки роҳхатро ҳамчун мизбон гирифтааст, 31 дастаи мунтахаби дигар роҳхатро ба ин бозиҳои муҳташам гирифтанд. Ин ҷо ном, қора, мақом дар рейтинги ФИФА, беҳтарин футболбози даври интихобӣ, нишондоди даста дар ин давр ва як факти ҷолиб оварда мешавад.
1.Бразилия. Конфедератсия: Амрикои Ҷанубӣ; Мақом дар ФИФА: 2-юм; Футболбози беҳтарини даври интихобӣ: Неймар; Бозӣ: 18; ғолибият: 12; мусовӣ: 5; бохт: 1; Қаҳрамони 5-каратаи ҷаҳон, 4 ҷоми даста дар он мусобиқоте ба даст омадаанд, ки дар он Ҳолланд иштирок надошт. Аввалин ҷомашро бошад, соли 1958, дар мусобиқоте, ки Италия иштирок надошт, ба даст овардааст.
2.Эрон. Конфедератсия: Осиё; Мақом дар ФИФА: 34-ум; Футболбози беҳтарини даври интихобӣ: Сардор Озмун; Бозӣ: 18; ғолибият: 12; мусовӣ: 6; бохт: -; Мунтахаби Эрон рекорди бозиҳои голсарнадодаро гузоштааст, ки он 12 сабқатро дарбар мегирад.
3.Япония. Конфедератсия: Осиё; Мақом дар ФИФА: 44-ум; Футболбози беҳтарини даври интихобӣ: Мая Ёсида; Бозӣ: 18; ғолибият: 13; мусовӣ: 3; бохт: 2; Футболбозони даста барои гузаронидани машғулияти пешазбозӣ бо Арабистони Саудӣ бо сабаби тамба шудани роҳҳо, бо таксӣ ба варзишгоҳ рафтанд.
4.Мексика. Конфедератсия: Амрикои Шимолу Марказӣ; Мақом дар ФИФА: 16-ум; Футболбози беҳтарини даври интихобӣ: Эктор Эррера; Бозӣ: 16; ғолибият: 11; мусовӣ: 4; бохт: 1; Дар бозии интихобӣ бо Гондурас дарвозабони Мексика Очоа ба дарвозаи худ, баъди расидани тӯб ба сараш, автогол зад.
5.Белгия. Конфедератсия: Аврупо; Мақом дар ФИФА: 5-ум; Футболбози беҳтарини даври интихобӣ: Кевин Де Брёйне; Бозӣ: 10; ғолибият: 9; мусовӣ: 1; бохт: -; Ромелу Лукаку дар ин даври интихобӣ беҳтарин голзан дар таърихи дастаи мунтахаб шуд(31).
6.Кореяи Ҷанубӣ. Конфедератсия: Осиё; Мақом дар ФИФА: 62-юм; Футболбози беҳтарини даври интихобӣ: Сон Хин Мин; Бозӣ: 18; ғолибият: 12; мусовӣ: 3; бохт: 3; Ягона мунтахаби осиёиест, ки дар даври ниманиҳоии ҶҶ иштирок кардааст(2002).
7.Арабистони Саудӣ. Конфедератсия: Осиё; Мақом дар ФИФА: 63-юм; Футболбози беҳтарини даври интихобӣ: Муҳаммад Ас-Саҳлавӣ; Бозӣ: 18; ғолибият: 12; мусовӣ: 3; бохт: 3; Дар Арабистони Саудӣ аз соли 2018 сар карда, ба занон иҷозати ба варзишгоҳ барои тамошои футбол рафтанро медиҳанд.
8.Олмон. Конфедератсия: Аврупо; Мақом дар ФИФА: 1-ум; Футболбози беҳтарини даври интихобӣ: Ҷошуа Киммих; Бозӣ: 10; ғолибият: 10; мусовӣ: -; бохт: -; Дар задани голҳо “Машинаи олмонӣ” рекорди давраи интихобии Аврупоро бо 43 гол гузошт, сипас Белгия низ ин нишондодро такрор кард.
9.Англия. Конфедератсия: Аврупо; Мақом дар ФИФА: 12-ум; Футболбози беҳтарини даври интихобӣ: Гарри Кейн; Бозӣ: 10; ғолибият: 8; мусовӣ: 2; бохт: -; Дар бозии рафиқона бо Бразилия, пеш аз ҶҶ, сармурабии англисҳо Гарет Саутгейт дарвозабони “Манчестер Ситӣ” Ангусс Ганна, ки ягон бозӣ дар ҳайати асосии клубаш нагузарондааст, даъват карда буд.
10. Испания. Конфедератсия: Аврупо; Мақом дар ФИФА: 8-ум; Футболбози беҳтарини даври интихобӣ: Иско; Бозӣ: 10; ғолибият: 9; мусовӣ: 1; бохт: 0; Херард Пике барои дастгирии референдуми Каталония, қариб ки аз мунтахаби Испания хориҷ карда шавад.
11.Нигерия. Конфедератсия: Африқо; Мақом дар ФИФА: 41-ум; Футболбози беҳтарини даври интихобӣ: Виктор Мозес; Бозӣ: 8; ғолибият: 5; мусовӣ: 3; бохт: -; Собиқ футболбози “ССКА”-и Маскав Аҳмад Мусо, ки дар ҳайати асосии “Лестер Ситӣ” ягон бозӣ накардааст, то ҳол ба мунтахабаш мунтазам даъват мешавад.
12.Коста – Рика. Конфедератсия: Амрикои Шимолу Марказӣ; Мақом дар ФИФА: 22-юм; Футболбози беҳтарини даври интихобӣ: Кристиан Боланёс; Бозӣ: 16; ғолибият: 9; мусовӣ: 5; бохт: 2; Имсол собиқ Президенти Федератсияи футболи Коста – Рикаро барои амалҳои коррупсионӣ то абад аз футбол дур сохтанд.
13.Полша. Конфедератсия: Аврупо; Мақом дар ФИФА: 6-ум; Футболбози беҳтарини даври интихобӣ: Роберт Левандовски; Бозӣ: 10; ғолибият: 8; мусовӣ: 1; бохт: 1; Левандовски бо 16 гол беҳтарин голзани даври интихобӣ, инчунин, бо 51 гол беҳтарин голзан дар таърихи мунтахабаш шуд.
14.Миср. Конфедератсия: Африқо; Мақом дар ФИФА: 30-юм; Футболбози беҳтарини даври интихобӣ: Муҳаммад Салоҳ; Бозӣ: 8; ғолибият: 5; мусовӣ: 1; бохт: 2; Мухлисони мунтахаби Мисрро, ки бо дастаашон ба Русия меоянд, ҳукуматдорони кишвар огоҳ кардаанд, ки “бо сабаби пулдӯстдории духтарони рус” бо онҳо муносибат накунанд.
15.Исландия. Конфедератсия: Аврупо; Мақом дар ФИФА: 21-ум; Футболбози беҳтарини даври интихобӣ: Гилфӣ Сигурдссон; Бозӣ: 10; ғолибият: 7; мусовӣ: 1; бохт: 2; Сармураббии ин мунтахаб Хеймир Халлгримссон, дар навбати худ, баъди кори мунтахаб, ҳамчун табиби дандон кор мекунад.
16.Сербия. Конфедератсия: Аврупо; Мақом дар ФИФА: 38-ум; Футболбози беҳтарини даври интихобӣ: Душан Тадич; Бозӣ: 10; ғолибият: 6; мусовӣ: 3; бохт: 1; Мунтахаби Сербия бо 21 имтиёз аз мақоми аввали гурӯҳ баромадааст, ки ин аз ҳамаи дастаҳои ҷойҳои 1-ум ва баъзе мақомҳои дуюм низ камтар аст.
17.Фаронса. Конфедератсия: Аврупо; Мақом дар ФИФА: 7-ум; Футболбози беҳтарини даври интихобӣ: Антуан Гризманн; Бозӣ: 10; ғолибият: 7; мусовӣ: 2; бохт: 1; 78%-и фаронсавиҳо зидди ба мунтахаб баргаштани Карим Бензема ҳастанд.
18.Португалия. Конфедератсия: Аврупо; Мақом дар ФИФА: 3-юм; Футболбози беҳтарини даври интихобӣ: Криштиану Роналду; Бозӣ: 10; ғолибият: 9; мусовӣ: 0; бохт: 1; Роналду дар 9 бозии даври интихобӣ иштирок кард ва Португалия ҳамаи онҳоро бо ғалаба анҷом дод. Вале дар як бозии набудаи ин ситораи футбол португалиҳо бохтанд.
19.Аргентина. Конфедератсия: Амрикои Ҷанубӣ; Мақом дар ФИФА: 4-ум; Футболбози беҳтарини даври интихобӣ: Леонел Мессӣ; Бозӣ: 18; ғолибият: 7; мусовӣ: 7; бохт: 4; Мунтахаби Аргентина бо Мессӣ дар 10 бозӣ 21 имтиёз ва бе ӯ дар 8 бозӣ 7 хол ба даст овардааст.
20.Колумбия. Конфедератсия: Амрикои Ҷанубӣ; Мақом дар ФИФА: 13-ум; Футболбози беҳтарини даври интихобӣ: Хамес Родригес; Бозӣ: 18; ғолибият: 8; мусовӣ: 2; бохт: 7; Дар бозии охири интихобӣ Колумбия бо Перу мусовӣ карданд. Дар рафти он Фалкао ба рақибон фаҳмонд, ки ин натиҷа ҳарду дастаро ба ҶҶ мебарад. Чилӣ аз ин шикоят кард, вале то ҳол натиҷае нест.
21.Уругвай. Конфедератсия: Амрикои Ҷанубӣ; Мақом дар ФИФА: 17-ум; Футболбози беҳтарини даври интихобӣ: Эдинсон Каванӣ; Бозӣ: 18; ғолибият: 9; мусовӣ: 4; бохт: 5; Каванӣ ва Суарес беҳтарин голзанони ду давраи интихобии ҶҶ дар Амрикои Ҷанубӣ мебошанд. Имсол Каванӣ 10 гол зад , Суарес бошад, дар давраи гузашта 11 гол зада буд.
22.Панама. Конфедератсия: Амрикои Шимолу Марказӣ; Мақом дар ФИФА: 49-ум; Футболбози беҳтарини даври интихобӣ: Роман Торрес; Бозӣ: 16; ғолибият: 6; мусовӣ: 5; бохт: 5; Футболбози даста Амилкар Энрикес баҳори соли ҷорӣ дар назди хонааш кушта шуда буд. Дар ҳоле, ки вай ҳамагӣ 3 ҳафта пеш аз он охирин бозиашро дар ҳайати тими миллиаш гузаронида буд.
23.Шветсария. Конфедератсия: Аврупо; Мақом дар ФИФА: 11-ум; Футболбози беҳтарини даври интихобӣ: Штефан Лихтштайнер; Бозӣ: 12; ғолибият: 10; мусовӣ: 1; бохт: 1; Баъди бозӣ бо Ирландияи Шимолӣ, швейтсариҳо ба ҶҶ баромаданашонро аҷоиб ҷашн гирифтанд: футболкаҳое пӯшиданд, ки дар он бо ҳуруфи кириллӣ “Шветсария” навишта шуда буд.
24.Марокко. Конфедератсия: Африқо; Мақом дар ФИФА: 48-ум; Футболбози беҳтарини даври интихобӣ: Мбарк Буссуфа; Бозӣ: 8; ғолибият: 4; мусовӣ: 3; бохт: 1; Баромадани дастаро мухлисонаш чи дар Марокко, чи дар Фаронса ва чи дар Брюссел бо раҳпаймоиҳо ҷашн гирифтанд.
25.Тунис. Конфедератсия: Африқо; Мақом дар ФИФА: 28-ум; Футболбози беҳтарини даври интихобӣ: Ваҳбӣ Хазрӣ; Бозӣ: 8; ғолибият: 4; мусовӣ: 3; бохт: 1; Яке аз футболбозони калидии мунтахаб – ҳимоятгари “Марсел” Аймен Абденнур дар аксари бозиҳои давраи интихоби иштирок надошт. Мегӯянд, ки ин ҳолат аз рӯйи нофаҳмӣ бо сармураббӣ рӯй додааст.
26.Шветсия. Конфедератсия: Аврупо; Мақом дар ФИФА: 25-ум; Футболбози беҳтарини даври интихобӣ: Андреас Гранквист; Бозӣ: 12; ғолибият: 7; мусовӣ: 2; бохт: 3; Дар бозии шведҳо бо Италия ҳамлагар Маркус Берг бинии ҳимоятгар Леонардо Бонуччиро шикаст.
27.Дания. Конфедератсия: Аврупо; Мақом дар ФИФА: 19-ум; Футболбози беҳтарини даври интихобӣ: Кристиан Эриксен; Бозӣ: 12; ғолибият: 7; мусовӣ: 3; бохт: 2; Сармураббии даниягиҳо Оге Харейде соли 2002 аз дастаи “Брондбрю” ба истеъфо рафт, то ба ҳамсараш барои ғалабаи бемории саратон кӯмак кунад. Инро вай танҳо баъд аз 2 сол гуфт.
28.Сенегал. Конфедератсия: Африқо; Мақом дар ФИФА: 32-юм; Футболбози беҳтарини даври интихобӣ: Садио Мане; Бозӣ: 8; ғолибият: 5; мусовӣ: 3; бохт: -; Бозӣ бо Ҷумҳурии Африқои Ҷанубиро аз он ки довари асосӣ дар бозиҳои шартномавӣ доварӣ намудааст, аз нав баргузор намуданд. Дар ҳарду бозӣ ҳам сенегалиҳо ғолиб баромаданд.
29.Австралия. Конфедератсия: Осиё; Мақом дар ФИФА: 43-юм; Футболбози беҳтарини даври интихобӣ: Тим Кэхилл; Бозӣ: 22; ғолибият: 14; мусовӣ: 6; бохт: 2; Австралиягиҳо пеш аз бозии ҳалкунанда бо Гондурас, барои тамошои тайёрии онҳо аз усули махсус истифода карданд.
30.Хорватия. Конфедератсия: Аврупо; Мақом дар ФИФА: 18-ум; Футболбози беҳтарини даври интихобӣ: Марио Манҷукич; Бозӣ: 12; ғолибият: 7; мусовӣ: 3; бохт: 2; Сармураббии даста дар рафти даври интихобӣ гуфта буд, ки мехоҳад, дар дастааш 11 Манҷукич бошанд.
31.Перу. Конфедератсия: Амрикои Ҷанубӣ; Мақом дар ФИФА: 10-ум; Футболбози беҳтарини даври интихобӣ: Ҷеферсон Фарфан; Бозӣ: 20; ғолибият: 8; мусовӣ: 6; бохт: 8; Аз барои бозии Перу бо Зеландияи Нав гурӯҳи консертии “GreenDay” маросими консертии худро ба рӯзи дигар гузаронида буд.

Маҳмадшариф Муродов,
шореҳи футбол

Чоршанбе, Нояб 15 2017


Дирӯз дар Варзишгоҳи марказии ш.Ҳисор бо вуҷуди ҳавои сард, бештар аз 12.000 мухлис барои дастгирии дастаи мунтахаби кишвар омада, тӯли 90 дақиқаи бозӣ “То-ҷи-кис-тон”, “Оле-оле”, “Гол-гол-гол”... гуфтанд. Ҳамаи онҳо ба боварӣ омада буданд, ки тими миллиамон соҳиби 3 имтиёз ва роҳхати Чемпионати Осиё мегардад. Сармураббӣ ва капитани даста низ пеш аз бозӣ бо итминон аз омодагии хуби мунтахаб ба ин бозӣ ҳарф зада, аз мухлисон дастгирӣ хоҳиш менамуданд. Сармураббии Яман бошад, дар майдони тоҷикон гузаштани ин вохӯриро аз афзалиятҳои дастаи Фузайлов дониста буд. Албатта, ин суханҳои онҳо мухлисонро водор мекард, ки бо боварӣ ба варзишгоҳ оянд ва шоҳиди ғолибияти футболбозони тими миллии худ шаванд. Дар нимаи аввали бозӣ мо ду дастаи баробарқувваро дидем, ки ҳарду ҳам бо эҳтиёт бозӣ мекарданд ва нияти аввал гол сар доданро надоштанд. Аз лиҳози ҳолатҳои хатарнок ва дигар омор низ ҳарду тим қариб ки баробар буданд. Дар қисмати дуюми рақобат бошад, мизбонон нисбат ба меҳмонон фаъолтар буданд ва як-ду имконияти хуби голзанӣ ҳам доштанд, вале дирӯз бахт ба рӯйи футболбозони тоҷик нахандид ва ин дидор бо ҳисоби 0:0 хотима ёфт. Дар бозии дигари ин давр мунтахабҳои Непал ва Филлипин низ бо ҳисоби якранги 0:0 вохӯриашонро анҷом доданд. Акнун барои баромадан аз гурӯҳ, дастаи мунтахаби моро мебояд дар сафар Филлипинро мағлуб кунад ва бо се имтиёз ба хона баргардад.
“Албатта, ин бозӣ аст, ҳар ранг гирифтанаш мумкин. Вале Мо метавонем дар дидори минбаъда ғолибият ва роҳхатро соҳиб шавем”-гуфт баъди бозӣ, Ҳаким Фузайлов, сармураббии мунтахаби Тоҷикистон. Мо ҳам боар дорем, ки онҳо метавонанд ва бо роҳхат аз Филиппин бармегарданд.

Маҳмадшариф Муродов,
шореҳи футбол

Чоршанбе, Нояб 08 2017


Президенти клуби футболи “Истиқлол” Шоҳрух Саидзода бозии финалии Ҷоми КФО-2017-ро бо «Эйр Форс» (Ироқ) натиҷагирӣ намуда, сипосгузории худро ба мухлисон баён кард ва изҳор дошт, ки ғалабаҳои бузурги клуби футболи тоҷик ҳанӯз дар пешанд.
-“Дӯстони азиз, мухлисони гиромӣ! Аз Шумо барои оне ки давоми баргузории Ҷоми КФО-2017 моро гарму ҷӯшон дастгирӣ намудед, сидқан сипосгузорам. Барои ман дидани истиқболи гарми шумо аз клуб боиси ифтихор аст. Дастгирии шумо махсусан дар бозии финалӣ эҳсос мешуд. Ташаккур ба ҳамаи онҳое, ки ба ин бозӣ омада, моро дастгирӣ карданд ва ҳам ба онҳое, ки дар хона пеши экранҳои ТВ моро мухлисӣ доштанд. Баъди анҷоми бозӣ мо аз оне ки натавонистем орзуҳои шуморо бароварда созем, на камтар аз шумо маъюсу ошуфтаем. Натавонистем он бозиеро нишон диҳем, ки шумо интизорашро доштед ва бароятон шодии зиёд оварда, ҷоизаро соҳиб шавем. Ҳамаи мо медонем, ки бозиҳои финалӣ озмоишу имтиҳони вазнину мушкиле мешаванд, ки на ҳама вақт дар онҳо имконияти маҳорати худро нишон додан ҷо дорад. Дар аксари мавридҳо тақдири бозиро як иштибоҳ ва ё як гол ҳал мекунад. Ин варзиш мебошад ва дар он бурду бохт, офтодану бархостан ва гиряву ашки хурсандӣ ҳаст. Вале мо набояд сарафканда бошем ва биёед ба хотир меорем. Дар се мавсим “Истиқлол” ду маротиба ба финал роҳ ёфт. Бохтҳо сабақ мешаванд, мо ваъда медиҳем, ки боз ҳам пурқувваттару қавитар гашта, ба оянда бо боварӣ менигарем. Натиҷаҳои солҳои охир ба таври ҳисоботӣ нишон медиҳанд, ки футболи тоҷик ба самти дуруст рушд карда, дар роҳи боварнок қарор дорад ва дар ин муваффақият нақши Федератсияи футболи Тоҷикистон беназир аст. Давоми ташкилу баргузории бозии финалӣ дар Ҳисор корҳои бузурге ба анҷом расонида шуданд. Ин бозӣ дар таърихи Ҷоми КФО ҳамчун яке аз сермухлистарин ва зеботарин бозиҳои дидании финалӣ шомил гардид. Алоқамандона ба ин мехоҳам ба роҳбарият ва ҳамаи кормандони Федератсияи футболи Тоҷикистон изҳори ташаккур намуда, инчунин ба роҳбарият ва кормандони ТВ “Варзиш” ва дигар ВАО барои тарғиб ва инъикоси саривақтии мавзуҳои марбут ба ин бозӣ сипосгузорӣ баён созам. Барои дастгирии ҳамаҷониба ва дар сатҳи зарурӣ ташкилу баргузор намудани бозӣ ба маъмурияти шаҳри Ҳисор низ изҳори ташаккур мекунам. Натоиҷи мусбате, ки дар чанд соли охир футболи тоҷик ба онҳо муваффақ шуд бо дастгирии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба амал омаданд. Маҳз бо ташаббусу ибтикор ва ҳидояти бевоситаи Пешвои муаззами миллат соҳаи варзиш, бахусус футбол дар кишварамон рушду пешрафт мекунад. Дастаҳоямон дар мусобиқаҳои мухталифи сатҳи байналмилалӣ иштирок намуда, натиҷаҳои намоёнро соҳиб мешаванд. Боварӣ дорам, ки рушди бомароми варзиши рақами як дар кишвар, дар наздиктарин маврид футболи тоҷикро ба сатҳи ҷаҳонӣ мебарорад”, - изҳор намуд роҳбари “Истиқлол”.

Чоршанбе, Нояб 08 2017


Дар даври навбатии топ-лигаҳои Аврупо бозиҳои ҷолиб зиёд буданд. Даври 11-уми Премйер-лигаи Англия 1 не, 2 бозии марказӣ дошт. Сараввал пешгоми мавсими имсола “Манчестер Ситӣ” дар майдони худ “Арсенал”-и Лондонро қабул намуд. Чуноне ки интизорӣ мерафт, ин бозӣ аз ҳолатҳои хатарнок бой буд ва голҳо низ кам нашуданд. Вале дар он натанҳо ин ҳолатҳо буд, балки пеналтии баҳсбарангез ва голи аз оффсайдзадашударо низ дар он дидан мумкин буд. Инро Венгер низ баъди бозӣ гуфт, ки сатҳи касбияти доварони ПЛА торафт паст шуда истодааст ва ӯ аз ин зиёд дар ташвиш аст. Гвардиола низ дар ҷавоб ба мутахассиси фаронсавӣ қайд кард, ки ин футбол аст ва бе иштибоҳ намешавад. Ин гуна иштибоҳҳо натанҳо боиси фоидаи “шаҳриҳо”, балки ба лондониҳо низ кам нафъ навардааст. Лекин новобаста аз шикояти Венгеру баъзе футболбозони дигари “Арсенал”, манчестериҳо 3 имтиёзи навбатии худро соҳиб гаштанд. Ҳисоби бозӣ – 3:1.
“Моуриню акнун дигар “Махсус” нест”- чунин мегӯянд, расонаҳои варзишии олам баъди бохти навбатии “Манчестер Юнайтед” дар “Стэмфор Бриҷ” аз дастаи қаблиаш. Воқеан, ин гуфтаҳо то ҷое асос доранд, чунки ба бозии дастаи вай нигариста, дигар наметавон фикр кард, ки ин ҳамон дастаи “ташна”-и пирӯзиҳои Моуриню аст. Вай дигар он ҳиссиёту хоҳишеро, ки барои дастаи ғолиб зарур аст, ба футболбозонаш дода наметавонад. Дастаи ӯ ҳангоми баромадан аз хати ҳимоя ва гузаштан ба ҳамла чунон мушкилии ҷиддие дорад, ки инро аксари мухлисони даста пай бурдаанд. Худи мутахассис бошад, ин ҳолатҳоро ба хастагии футболбозон ва набудани Погба, Иброҳимович ва Рохо бо сабаби ҷароҳат доштанашон, рабт медонад. Вале агар иштибоҳ накунам, соли гузашта ҳарсеи онҳо қариб то охири мавсим бозӣ карда буданд ва “МЮ” чемпионатро дар ҷойи 6-ум ба итмом расонид. Яъне, шояд гап дар Погба ё дигарӣ бошад, вале на ба он ҳадде, ки Жозе мепиндорад.
Бояд зикр кард, ки акнун лидерони ҳозираи ПЛА –“Мачестер Ситӣ” аз ҳамсогони худ – “Девҳои сурх” баъди ғалабаи худ ва бохти онҳо, 8 имтиёз пеш гузаштаанд ва Моуриню гуфт, ки ин 8 хол ӯро ба ташвиш овардааст, вале боз илова намуд: “Ин Примераи Испания ё Бундеслигаву Лигаи 1-у Серияи А нест ва мо метавонем, аз онҳо гузарем”.
Дар Англия хабари дигари муҳим ин барканор шудани Славен Билич аз курсии сармураббигии “Вест Хэм Юнайтед” мебошад. Баъди оне ки даста мавсими имсоларо бо натиҷаҳои нохуб шурӯъ намуд, “Вест Хэм” ҳоло дар мақоми афтиш аз ПЛА, яъне ҷойи 18-ум ҷойгир аст ва ин роҳбарияти дастаро маҷбур сохт, ки сармураббиро иваз кунанд. Хабари барканор шудани вай рӯзи 6-уми ноябр дар сомонаи расмии даста пахш шудааст. Мувофиқи баъзе сарчашмаҳо, довталаби асосӣ барои ин вазифа Дэвид Мойес, ки қаблан дар Премйер-лига, дар дастаҳои “Сандерленд”, “Манчестер Юнайтед” ва “Эвертон” низ кор кардааст, ба шумор меравад.
Роналу ва Мессӣ дар бозиҳои охирин: 0 гол! Бовар мекунед?...
Дар даври навбатии Ла-лигаи Испания “Барселона” дар майдони худ “Севиля”-ро пазируфт ва новобаста ба он ки ситораи асосии даста – Лео Мессӣ кӯшиши зиёде намуд, то амали натиҷадореро анҷом бидиҳад, вале натавонист. Мессӣ ки назад, бояд кӣ занад? – Суарес ? На, вай 5 бозӣ шуд, ки гол назадааст. Ба фикр кардан шояд номи ӯро наёбем, вале Пако Алкасер дар ин дидор дубл кард ва ғалабаи дастаи худро таъмин намуд. Вай баъди бози иброз дошт, ки аз имконияти омада дар “Барса” бояд 100% истифода намуд, вагарна аз бозӣ кардан дар ҳайат мондан мумкин аст.
“Реал Мадрид” баъди нокомиҳо каме ҳам бошад, ба худ омад ва инро дар бозӣ бо “Лас-Палмас” нишон дод. Ин бозӣ дар варзишгоҳи “Сантяго Бернабеу” баргузор шуда, бо ҳисоби бузурги 3:0 ба фоидаи “Дастаи шоҳона” хотима ёфт. Шояд нафарони ин сабқатронадида фикр кунанд, ки 1 ё 2 ва ё худ ҳарсеяшро Роналду зада бошад. Лекин на. Вай голе назад. Аммо гол назаданаш тамоман маънои онро надорад, ки вай бад бозӣ карда бошад. Роналду яке аз беҳтаринҳои майдон буд ва як паси головар ба Иско дод. Баъди ин бозӣ қариб ҳамаи футболбозони Мадрид якдигарро дастгирӣ намуданд ва ба он суханоне, ки гӯё муносибати касе бо дигар кас дар даста “сард шуда бошад”, қатъиян ҷавоб доданд, ки ягон мушкилии ҷиддие нест.
Мбаппе рекорди нав гузошт
Дар вохӯрии даври навбатии Чемпионати Фаронса клуби “ПСЖ” дар майдони худ ба дарвозаи “Анже” 5 голи беҷавоб зада, ғалабаи комили худро ҷашн гирифт. Неймар бо сабаби дар даври гузашта корти сурх гирифтанаш дар ин дидор ширкат надошт. Вале Мбаппеи ҷавону Кавании ботаҷриба бо дублҳои худ барои ғалабаи бузурги даста шароит фароҳам оварданд. Акнун дар шумури голҳо Мбаппе футболбози ҷавонтарини муаллифи 20 гол дар Лигаи 1-и Фаронса шуд.
Бош наздик ба барканорист
Дар ин даври Бундеслига “Классико”-и олмонӣ баргузор шуд. Он дар варзишгоҳи “Сигнал Идуна Парк” доир гашт. Мизбонон – “Боруссия”-и Дортмунд яке аз бозиҳои беҳтарини мавсимро нишон доданд, вале чун дар нуқтаи ҳалкунанда муваффақ набуданд,он кифоя набуд, ки “Бавария”-ро мағлуб кунанд. Баръакси ин, мюнхениҳо қариб ҳамаи ҳолатҳои дар назди дарвозаи соҳибони майдон ба миён овардаашонро бо гол анҷом доданд. Натиҷаи бозӣ 1:3.  Пас аз ин бохт эҳтимоли аз вазифааш барканор шудани сармураббии “Боруссия” Петер Бош хеле баланд шуд, агарчи то ҳол хабари расмие дор ба ин мавзӯъ нест.

Маҳмадшариф Муродов,
шореҳи футбол

Чоршанбе, Нояб 08 2017

ПЕШ АЗ ДАВР

Ҷумъа, Нояб 03 2017


Даври 4-уми марҳилаи гурӯҳии Лигаи Аврупо дишаб ба поён расид, ки дар он бозиҳои ҷолиб кам набуданд

  •  << 
  •  < 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  > 
  •  >> 
саҳ 1 аз 16

Китобҳо

Flag Counter