ХАБАРИ ДОҒ
Панҷшанбе, Фев 18 2021

Бонки миллии Тоҷикистон дар соли 2020 сиёсати пулию қарзӣ ва асъориро баҳри нигоҳдории сатҳи муътадили нархҳо бо назардошти раванди ҳадафгирии таваррум,  танзими ҳаҷми пул дар иқтисодиёт, таъмини суботи молиявӣ ва мусоидат ба рушди устувори иқтисодиёт равона намуд.

Рушди иқтисодиёт дар соли 2020 муътадил арзёбӣ гардида, маҷмӯи маҳсулоти дохилии кишвар ба 82,5 млрд. сомонӣ баробар шуда, афзоиши воқеии он 4,5 фоизро ташкил дод. Афзоиши ММД аз ҳисоби истеҳсоли маҳсулоти саноатӣ 9,7 фоиз ва кишоварзӣ 8,8 фоиз таъмин гардид.

Сатҳи таваррум дар соли 2020 9,4 фоизро ташкил намуд, ки нисбат ба ҳамин давраи соли 2019 1,4 банди фоизӣ зиёд мебошад. Нишондиҳандаи мазкур асосан аз афзоиши сатҳи нархҳои маҳсулоти хӯрокворӣ 13,0 фоиз, ғайрихӯрокворӣ 5,8 фоиз ва арзиши хизматрасониҳои пулӣ ба аҳолӣ 4,0 фоиз ба амал омад. 

Дар сохтори маҳсулоти хӯрокворӣ дар ин давра бештар тағйирёбии нархи маҳсулоти ниёзи аввалия, ки асосан маҳсулоти воридотӣ ва мавсимӣ мебошад, аз қабили орди навъи якум 16,4 фоиз, шакар 40,8 фоиз, равғани пахта 50,7 фоиз, равғани офтобпараст 42,6 фоиз, гӯшти гов 6,2 фоиз, тухм 18,9 фоиз, картошка 19,8 фоиз ва сабзӣ 12,8 фоиз ба қайд гирифта шуданд. Афзоиши нархи маҳсулоти ниёзи аввалия дар натиҷаи таъсири омилҳои берунӣ вобаста ба авҷ гирифтани пандемияи коронавирус (COVID-19) ва дар ин замина маҳдуд шудани ҳамлу нақл тавассути сарҳади давлатҳои шарикони савдо ба вуқӯъ пайваст.

Сиёсати пулию қарзии Бонки миллии Тоҷикистон дар соли ҳисоботӣ баҳри коҳиш додани фишорҳои таваррумӣ, қурбӣ, идоракунии самараноки сатҳи пардохтпазирии бонкҳо ва нигоҳ доштани раванди муътадилии ҳаҷми пул равона карда шуд. Дар ин давра бо мақсади татбиқи босамари сиёсати пулию қарзӣ, рушди низоми молиявӣ ва бозори аввалияи коғазҳои қиматнок ба маблағи 14,3 млрд. сомонӣ коғазҳои қиматнок ба муомилот бароварда шуда, тавассути амалиёти амонатҳои шабонарӯзӣ аз ташкилотҳои қарзӣ ҳамарӯза ба ҳисоби миёна 1,2 млрд. сомонӣ ҷалб карда шуд.

Меъёри бозтамвил ҳамчун фишанги асосии монетарӣ дар соли ҳисоботӣ бо мақсади коҳиш додани осебпазирии иқтисодиёт аз буҳрон, нигоҳ доштани суботи молиявӣ ва мусоидат ба рушди бахши воқеии иқтисодиёти кишвар тадриҷан 2,0 банди фоизӣ паст карда шуда, дар сатҳи 10,75 фоизи солона нигоҳ дошта шуд.

Ҷиҳати андешидани тадбирҳои саривақтӣ ва дастгирии пардохтпазирии низоми бонкӣ дар муқобили таъсири манфии пандемияи коронавирус (COVID-19), меъёри захираҳои ҳатмии ташкилотҳои қарзии молиявӣ аз рӯи пасандозҳо ва уҳдадориҳои дигари ба онҳо монанд, аз 01 апрели соли 2020 муваққатан то 

31 декабри соли 2020 бо пули миллӣ ба андозаи 2,0 банди фоизӣ ва бо асъори хориҷӣ 4,0 банди фоизӣ паст карда шуда, мувофиқан 1,0 фоиз ва 5,0 фоиз муқаррар карда шуданд. 

Иқдоми пешгирифта дар самти татбиқи чораҳои зиддибуҳронӣ андешида шуда,  имкониятҳои молиявии ташкилотҳои қарзиро дар давраи мазкур беҳтар намуда, ба маблағи 241,7 млн. сомонӣ дастрасии манбаъҳои иловагии пардохтпазириро барои ташкилотҳои қарзӣ  таъмин намуд.

Дар давраи ҳисоботӣ қурби расмии сомонӣ 16,6 фоиз коҳиш ёфта, баъд аз тасҳеҳи (коррексияи) якдафъаина барои 1 доллари ИМА 11,30 сомонӣ муқаррар гардид, ки фарқияти байни қурби расмӣ ва қурби бозори ғайрибонкии доллари ИМА ба 0,8 фоиз баробар шуд. 

Тағйирёбии қурби асъор дар соли ҳисоботӣ асосан дар натиҷаи вазъи номуътадили иқтисоди ҷаҳонӣ бинобар идома ёфтани таъсири пандемия, коҳиш ёфтани қурби асъори миллии кишварҳои шарикони асосии савдо,  камшавии вуруди интиқолҳои пулӣ  ва сармояи хориҷӣ ба ҷумҳурӣ, маҳдуд гардидани равобити марзӣ, болоравии нархи молу маҳсулотҳои воридотӣ, инчунин идома ёфтани касри тавозуни савдои кишвар  ба амал омад. 

Ба ҳолати 31 декабри соли 2020 дар қаламрави Ҷумҳурии Тоҷикистон дар маҷмӯъ 69 адад ташкилоти қарзии молиявӣ, аз ҷумла 18 бонки анъанавӣ, 

1 бонки исломӣ, 18 ташкилоти амонатии қарзии хурд, 5 ташкилоти қарзии хурд ва 27 фонди қарзии хурд фаъолият менамоянд.

Шумораи филиалҳо бо назардошти равзанаи бонкии исломӣ ва марказҳои хизматрасонии бонкии ташкилотҳои қарзии молиявӣ дар соли ҳисоботӣ 1 935 ададро ташкил дода, нисбат ба ҳамин давраи соли 2019 10 адад зиёд шуданд, ки ин ба васеъ намудани доираи амалиётҳои бонкӣ, таъмини дастрасии аҳолӣ ба захираҳои қарзӣ, пешниҳоди хизматрасониҳои босифату муосири молиявӣ ҷиҳати рушди иқтисодиёти ҷумҳурӣ мусоидат менамояд.

Дороиҳои умумии ташкилотҳои қарзии молиявӣ ба  санаи 31 декабри соли 2020 маблағи 26,3 млрд. сомониро ташкил дода, нисбат ба ҳамин санаи соли 2019 19,7 фоиз зиёд шудаанд. Уҳдадориҳои умумӣ ва сармояи тавозунии ташкилотҳои қарзии молиявӣ бошанд, мувофиқан ба 19,1 млрд. сомонӣ ва 

7,2 млрд. сомонӣ баробар шуда, зиёдшавии онҳо дар муқоиса ба ҳамин санаи соли 2019 мутаносибан 21,5 фоиз ва 15,2 фоизро ташкил доданд. Меъёри кифоятии сармоя ва пардохтпазирӣ дар низоми бонкӣ дар доираи талаботи нишондиҳандаи мақбул таъмин гардида, даромаднокии дороиҳо ва сармоя нисбат ба соли қаблӣ афзуданд.

Ба ҳолати 31 декабри соли 2020 бақияи умумии пасандозҳо 11,4 млрд. сомониро ташкил дод, ки нисбат ба ҳамин давраи соли 2019 1,7 млрд. сомонӣ  ё 17,2 фоиз зиёд мебошад. Фоизи миёнавазни пасандозҳои муҳлатнок дар низоми бонкӣ бо пули миллӣ 9,9 фоиз ва бо асъори хориҷӣ 5,1 фоизро ташкил медиҳад, ки нисбат ба соли қаблӣ мувофиқан 0,7 ва 1,1 банди фоизӣ зиёд мебошанд.

Теъдоди пасандозҳои ҷалбшуда бошад, 5,9 млн. ададро ташкил намуда, нисбат ба ҳамин давраи соли 2019 ба андозаи 7,0 фоиз зиёд мебошад. Нишондоди мазкур аз зиёд шудани эътимоди аҳолӣ ба ташкилотҳои қарзӣ гувоҳӣ дода, аз ҷониби дигар далели беҳтар гардидани сатҳи некӯаҳволии мардум мебошад.

Соли 2020 ҳаҷми умумии қарзҳои додашудаи ташкилотҳои қарзӣ     10,0 млрд. сомониро ташкил дод, ки нисбат ба соли 2019 4,7 фоиз ё ба маблағи 446,1 млн. сомонӣ зиёд мебошад. Ҳаҷми бақияи умумии сандуқи қарзӣ дар ин давра ба 11,0 млрд. сомонӣ баробар шуда, нисбат ба соли 2019 12,0 фоиз ё 

1,2 млрд. сомонӣ афзуд. 

Аз ҷумла, аз ҳаҷми умумии қарзҳои додашуда дар соли 2020 41,0 фоиз ё 

4,1 млрд. сомонӣ ба соҳибкорони истеҳсолӣ рост меояд. Меъёри фоизи ба соҳаи соҳибкории истеҳсолӣ додашуда ба 17,7 фоиз бо пули миллӣ ва 13,3 фоиз бо асъори хориҷӣ ташкил намуда, нисбат ба соли 2019 мувофиқан 1,2 ва 3,4 банди фоизӣ паст мебошад.

Ҳамзамон, ҳаҷми умумии қарзҳои дар ин давра додашуда 29,7 фоиз ба соҳаҳои истеъмолот, 15,8 фоиз савдои хориҷӣ, 15,3 фоиз кишоварзӣ, 12,3 фоиз хизматрасонӣ, 11,6 фоиз саноат, 10,5 фоиз сохтмон, 1,0 фоиз хӯроки ҷамъиятӣ, 0,7 фоиз нақлиёт, 0,2 фоиз миёнаравии молиявӣ ва  дигар соҳаҳо 2,9 фоиз рост меояд.

Ба ҳолати 31 декабри соли 2020 шумораи банкоматҳо ва терминалҳои электронӣ дар ҷумҳурӣ мувофиқан 1 281 адад ва 5 710 ададро ташкил намуда, дар муқоиса ба ҳамин санаи соли 2019 шумораи банкоматҳо 403 адад ва терминалҳои электронӣ 362 адад зиёд шудааст. 

Миқдори умумии кортҳои пардохтии аз ҷониби бонкҳои ватанӣ ба муомилот баровардашуда ба санаи ҳисоботӣ 3,25 млн. ададро ташкил дод, ки ин нишондиҳанда нисбат ба соли 2019 дар ҳаҷми 30,8 фоиз зиёд мебошад. 

Теъдоди умумии ҳамёнҳои электронии ташкилотҳои қарзии молиявӣ дар давраи ҳисоботӣ 1 ,7 млн. ададро ташкил дода, дар муқоиса нисбат ба ҳамин давраи соли 2019 наздики 1,4 млн. адад (4,9 маротиба) афзудааст. Дар давраи ҳисоботӣ тавассути ҳамёнҳои электронӣ 10,7 млн. адад амалиётҳои пардохти ғайринақдӣ ба маблағи 543,1 млн. сомонӣ анҷом дода шудаанд, ки ин нишондиҳандаҳо нисбат ба соли 2019 аз рӯи шумораи амалиёт 8, 8 млн. адад 

(5,7 маротиба) ва аз рӯи ҳаҷми амалиёт 440,8 млн. сомонӣ (5,3 маротиба) зиёд мебошанд.   

Умуман, дар муассисаҳои савдою хизматрасонии кишвар тавассути воситаҳои электронии пардохтӣ 48,8 млн. адад амалиёти ғайринақдӣ ба маблағи 1,9 млн. сомонӣ гузаронида шуданд, ки ин нишондиҳандаҳо нисбат ба соли 2019 аз рӯи шумора 40,2 фоиз ва аз рӯи ҳаҷми амалиёти гузаронидашуда 

2,2 маротиба зиёд мебошанд.

Дар самти ҳимояи ҳуқуқҳои истеъмолкунандагони хизматрасониҳои молиявӣ Бонки миллии Тоҷикистон қабули муроҷиати шаҳрвандонро тариқи шифоҳӣ, телефонӣ, хаттӣ ва тавассути почтаи электронӣ ба роҳ монда, тибқи тартиби муқарраргардида ва дар доираи салоҳияти ҷойдошта аз рӯи онҳо чораҳои дахлдор андешида шуданд.

Ба санаи 31 декабри соли 2020 дар бозори суғуртаи Ҷумҳурии Тоҷикистон шумораи ташкилотҳои суғуртавӣ 18 ададро ташкил намуданд, ки аз онҳо 

2 ташкилоти суғуртавии давлатӣ, 15 ташкилоти суғуртавии ғайридавлатӣ ва 

1 Маркази дастгирии суғуртаи мутақобила мебошанд.

Дороиҳои ташкилотҳои суғуртавӣ ба санаи ҳисоботӣ 412,4 млн. сомониро ташкил дода, уҳдадориҳои қабулгардидаи ташкилотҳои суғуртавӣ вобаста ба шаклҳои суғурта 50,4 млрд. сомониро ташкил дод. Воридоти мукофоти суғуртавӣ (ҳаққи суғуртавӣ) ба андозаи 0,7 фоиз зиёд гардида, 235,8 млн. сомониро ташкил дод, ки дар таркиби он суғуртаи ихтиёрӣ раванди зиёдшавӣ дорад. Пардохту ҷубронҳои суғуртавӣ бошанд, дар соли 2020 ба 19,0 млн. сомонӣ баробар гардиданд, ки нисбат ба соли қаблӣ ба андозаи 24,6 фоиз афзудааст.

Дар маҷмӯъ, фаъолияти молиявии ташкилотҳои суғуртавӣ дар соли 2020 бо фоида ба маблағи 75,9 млн. сомонӣ ҷамъбаст шуд, ки ин нишондиҳанда нисбат ба соли 2019 ба андозаи 39,2 фоиз зиёд мебошад. 

 

Шуъбаи матбуоти БМТ

 

Ҷумъа, Фев 12 2021

   Дар ш.Турсунзода дар ояндаи наздик минтақаи нави иқтисодӣ-технопарк дар ҳудуди 21 гектар замин таъсис хоҳад ёфт. Дар ин бора Парвиз Акрамзода, раиси ш.Турсунзода рӯзи 12.02.2021 зимни нишасти матбуотӣ хабар дод.

   Бино ба иттилои мавсуф дар минтақаи нави иқтисодӣ корхонаҳои саноативу истеҳсолии нав бунёд шуда, он дар чаҳорчӯбаи амалиёбии ҳадафи 4-уми стартегӣ-саноатикунонии мамлакат анҷом меёбад. 

   Дар умум, бахшида ба ҷашни 30-солагии Истиқлолияти давлатии ҶТ дар ш.Турсунзода дар ҳамкорӣ бо соҳибкорон дар маркази шаҳр ва ҷамоатҳои деҳот барқарорсозӣ, бунёд ва ба истифода додани 382 иншооти мухталиф ба нақша гирифта шуда, то ба имрӯз 12 коргоҳи саноатӣ мавриди истифода қарор дода шудааст.

СССР

 

Панҷшанбе, Фев 11 2021

   Қурбон Ҳакимзода, раиси вилояти Хатлон барои азму заҳмату талош баҳри ободии маҳал ва саҳм гузоштан дар рушди деҳот ба мардуми вилоят ва соҳибкорони хатлонӣ арзи сипос баён намуд. Мавсуф зимни нишасти матбуотӣ, ки рӯзи 10.02.2021 баргузор гашт, гуфт, ки новобаста аз авҷу хуруҷи пандемияи коронавирус мардум натарсида ба сари заминҳо баромаданд ва ба киштукору нигоҳубини боғоту ҳосили хеш идома дода, аз пайи захираи маҳсулот шуданд. 

   - Соҳибкорони вилояти Хатлон дар 1 соли ахир ба маблағи то 30-40 миллион сомонӣ дар маҳалҳо иншооти ҳаётан муҳим, аз қабили мактабу муассисаҳои томактабӣ, корхонаҳои муосири саноативу истеҳсолӣ ва марказҳои хизматрасонӣ бунёд намуданд, ки бархе дар ҷумҳурӣ аз лиҳози сифати сохтмону технология ҳамто надоранд, таъкид дошт Қурбон Ҳакимзода.

   Бояд гуфт, ки ба ифтихори ҷашни 30-солагии Истиқлолияти давлатии ҶТ дар 25 шаҳру ноҳияҳои вилояти Хатлон бунёду азнавсозии 7667 адад бинову иншоот ба нақша гирифта шуда, то ба 1.01.2021 дар 5811 адад бинову иншоот корҳои сохтмонӣ ба анҷом расонида шудааст. Дар соли 2020 бошад 2105 иншооти нав ба мавриди истифода қарор гирифт. 

Ҷ.Максуд, СССР   

 

Чоршанбе, Фев 10 2021

 Кормандони Раёсати Бонки давлатии амонатгузории ҶТ «Амонатбонк» Паёми солонаи Асосгузори сулҳу ваҳдати миллӣ-Пешвои миллат, Президенти ҶТ Эмомалӣ Раҳмонро дастаҷамъона тамошо намуда, нуқтаҳои таъкиднамудаи  Сарвари давлатро дар Паёми имсола ҳамчун барномаи муккамали бунёдӣ ва роҳнамо барои ояндаи неки кишвар ниҳоят самимӣ пазируфтанд.

   Президенти Ҷумҳурии Тоҷикистон дар Паёми солонаи худ ба Маҷлиси Олии Ҷумҳурии Тоҷикистон иброз доштанд, ки дар натиҷаи паҳн шудани бемории сироятии коронавирус ва вобаста ба он, босуръат паст рафтани фаъолнокии иқтисодӣ ва афзоиши бесобиқаи бекорӣ вазъияти сайёра боз ҳам печида гардида, ба буҳрони бисёр шадиди иқтисодиву молиявӣ ва иҷтимоӣ рӯ ба рӯ омад. Гуфта шуд, ки соли 2020 мо дар вазъияти бошиддати иқтисодиву молиявии ҷаҳонӣ фаъолият карда, бо вуҷуди мушкилоти пешомада, ҷиҳати пешгирӣ намудани пайомадҳои буҳрон ва ҳифзи амнияти иқтисодии мамлакат як қатор чораҳои фавриро роҳандозӣ кардем.

Бо вуҷуди таъсири манфии омилҳои зикршуда, дар натиҷаи амалӣ гардидани тадбирҳои таъхирнопазир аз ҷониби Ҳукумати кишвар устувории нишондиҳандаҳои макроиқтисодӣ таъмин гардида, дар самти беҳтар намудани сатҳу сифати зиндагии аҳолӣ тамоюлҳои мусбат нигоҳ дошта шуданд. Иқтисодиёти кишвар дар соли 2020-ум 4,5% афзоиш ёфта, ҳаҷми маҷмӯи маҳсулоти дохилӣ ба 82,5 миллиард сомонӣ баробар гардид.Дар ин давра 9,7% афзоиш ёфтани ҳаҷми истеҳсоли маҳсулоти саноатӣ, кишоварзӣ 8,8 ва гардиши савдои хориҷӣ 0,8%, аз ҷумла содирот дар ҳаҷми 19,8% заминаи рушди иқтисоди кишварро ба вуҷуд овард.

   Дороиҳои низоми бонкӣ аз 311 миллион сомонии соли 2000–ум ба беш аз 26 миллиард сомонӣ дар соли 2020 расонида шуданд. Дар соли сипаришуда аз ҷониби ташкилотҳои қарзӣ ба соҳаҳои гуногуни иқтисоди кишвар қариб 10 миллиард сомонӣ қарз дода шуд, ки нисбат ба соли 2019–ум 4,6% зиёд мебошад. Вале ин нишондиҳанда барои расидан ба ҳадафҳои рушди кишвар қонеъкунанда нест.

   Ҳанӯз ҳам нокифоя будани ҳаҷми қарздиҳӣ ба соҳаҳои иқтисоди миллӣ, низоми сусти идоракунии корпоративӣ, зиёд будани хавфҳои амалиётӣ ва қарзӣ, боқӣ мондани қарзҳои ғайрифаъол, кофӣ набудани ҷалби сармоя ба низоми бонкӣ ва таъсиси намояндагии бонкҳои хориҷӣ ҷиҳати беҳтар намудани маблағгузории корхонаҳои истеҳсолӣ аз ҷумлаи камбудиҳое гуфта шуданд, ки бояд ҳарчи зудтар бартараф карда шаванд.

   Аз ин лиҳоз, ба Бонки миллии Тоҷикистон дастур дода шуд, ки санадҳои меъёрии ҳуқуқии дахлдорро бо дарназардошти таҷрибаи муосири ҷаҳонӣ ба талабот мутобиқ сохта, раванди идоракунии корпоративиро дар ташкилотҳои қарзии молиявӣ ва тадриҷан афзоиш додани сармояи ойинномавии онҳо таъмин намояд.

   Дар ин раванд, бояд якҷо бо ташкилотҳои қарзӣ оид ба беҳтар намудани сифати дороиҳои низоми бонкӣ, афзоиш додани пешниҳоди қарзҳои дарозмуддат ба соҳибкорони истеҳсолӣ ва фаъол намудани низоми рейтинги миллӣ барои ташкилотҳои қарзӣ ва ширкатҳои суғурта тадбирҳои зарурӣ андешида шаванд.

Бонки миллии Тоҷикистон ва ташкилотҳои қарзӣ барои ба низоми бонкӣ ҳарчи бештар ҷалб кардани сармояи дохиливу хориҷӣ бо роҳандозии технологияҳои молиявию инноватсионӣ васеъ намудани хизматрасониҳои бонкӣ ва дар ин замина якҷо бо вазорату идораҳои дахлдор пурра ҷорӣ кардани амалиёти ғайринақдӣ, аз ҷумла ҷиҳати аз байн бурдани омилҳои инсонӣ ҳангоми ҳисоббаробаркуниҳои пулӣ бо аҳолӣ ҳамаи чораҳои заруриро бояд амалӣ намоянд.

   Бо мақсади фароҳам овардани шароити мусоид барои ҷалби сармояи шаҳрвандон ба иқтисоди миллӣ пешниҳод карда шуд, ки соли ҷорӣ дар Ҷумҳурии Тоҷикистон бо мақсади қонунигардонии маблағҳо ва дигар дороиҳо афв гузаронида шавад.

 

Натиҷаи фаъолияти Ташкилоти ибтидоии ҳизбии “Амонат”-и БДА ҶТ “Амонатбонк” дар соли 2020

  Дар Раёсати БДА ҶТ “Амонатбонк” бо иштироки мудири шуъбаи умумии дастгоҳи Кумитаи иҷроияи марказии ҲХДТ Абдураҳимова Дилбар, Раиси Кумитаи иҷроияи ҲХДТ дар ш.Душанбе -Мирзозода Иброҳим ва муовини-роҳбари дастгоҳи Кумитаи иҷроияи ҲХДТ дар н.И.Сомонӣ Ҷурахонзода Ҷумахон ва аъзоёни ташкилоти ибтидоии “Амонат”-и БДА ҶТ “Амонатбонк” аз фаъолияти Ташкилоти ибтидоии ҳизбии “Амонат”-и БДА ҶТ “Амонатбонк” дар соли 2020 натиҷагирӣ намуданд.

   Дар оғози ҷаласа раиси ташкилоти ибтидоии “Амонат”-и БДА ҶТ “Амонатбонк” Сироҷиддин Икромӣ баромад намуда, иброз доштанд, ки ташкилоти ибтидоии “Амонат”- и БДА ҶТ “Амонатбонк” фаъолияти худро дар соли ҳисоботӣ дар асоси нишондодҳои Паёми солонаи Президенти ҶТ, Пешвои миллат Эмомалӣ Раҳмон, Қарори Ҳукумати ҶТ «Дар бораи натиҷаҳои рушди иҷтимоию иқтисодии Ҷумҳурии Тоҷикистон дар соли 2019 ва вазифаҳо барои соли 2020», «Нақшаи чорабиниҳо оид ба иҷрои дастуру супоришҳои Президенти ҶТ, Пешвои миллат Эмомалӣ Раҳмон, ки зимни ифтитоҳи биноҳои нави Агентии назорати давлатии молиявӣ ва мубориза бо коррупсияи ҶТ ва Бонки давлатии амонатгузории Тоҷикистон «Амонатбонк» 17 декабри соли 2019 баён доштанд» ва омодагиҳо ба истиқболи сазовор аз таҷлили 30-солагии Истиқлоли давлатии Ҷумҳурии Тоҷикистон ба роҳ мондааст.

   Дар партави дастуру супоришҳои Асосгузори сулҳу ваҳдати миллӣ-Пешвои миллат, Президенти ҶТ Эмомалӣ Раҳмон мавқеи сиёсати давлатии ҷавонон дар фаъолияти «Амонатбонк» баланд бардошта шуда, ҷиҳати мустақилона ва бо ҳисси масъулият ширкат кардани ҷавонон дар ҳаёти ҷамъиятӣ, шароити зарурӣ муҳайё гардидааст.

   Қайд кардан зарур аст, ки кормандони Амонатбонк дар аксияи эълон намудаи Дастгоҳи Кумитаи иҷроияи марказии Ҳизби Халқии Демократии Тоҷикистон таҳти унвони “Ватан, ҳар гӯшаатро сарсабз хоҳем кард”, ки бахшида ба 26-солагии таъсисёбии ҲХДТ дар саросари ш.Душанбе амалӣ гардида истодааст, фаъолона иштирок намуда, дар шафати роҳи мошингарди Душанбе-Чаноқ, воқеъ дар н.И.Сомонии ш.Душанбе 270 бех ниҳоли дарахтони сояафкану ороишӣ шинониданд. Аъзои ташкилот аз усулҳои муосири таблиғот, роҳу равиши истифодаи босамар аз васоити ахбори оммаи чопиву электронӣ, хусусан шабакаҳои иҷтимоӣ васеъ истифода бурда, дар тарғибу ташвиқи барномаҳои ҲХДТ саҳми назарраси худро гузошта истодаанд. Ҳамасола ба нашрияҳои ҳизбии “Минбари халқ” ва “Мароми пойтахт” ташкилоти ибтидоии “Амонат” аз аввалинҳо шуда, обуна мешавад.

   Қайд кардан ба маврид аст, ки дар соли ҷорӣ 8 ҷаласаи ҳизбӣ ва соатҳои сиёсӣ баргузор гардид, ки дар он кормандони «Амонатбонк», ки аксарияти онҳо аъзои Ҳизби Халқии Демократии Тоҷикистон мебошанд, фаъолона иштирок намуданд.

Инчунин зиёда аз 40 нафар кормандони фаъоли Бонк дар ин давра аъзои ҳизб гардиданд.

   Раиси Кумитаи иҷроияи ҲХДТ дар ш.Душанбе ва намояндагони ҲХДТ дар н. И. Сомонӣ дар ҷаласа баромад намуда, иброз доштанд, ки имрӯз сулҳу субот ва осоиштагӣ дар Тоҷикистони соҳибистиқлол пойдор аст, ки саҳми арзандаи Раиси ҲХДТ Эмомалӣ Раҳмон дар ин ҷода назаррас мебошад.

   Аз ҷавонони худогоҳу хештаншиноси даврони истиқлол, ки имрӯз аз тамоми шарту шароити мусоид барои таҳсилоту фаъолият ва рушди зеҳнии худ баҳравар мебошанд, даъват ба амал оварда шуд, ки ба қадри неъмати бебаҳои Истиқлол расида, дар пешрафту шукуфоии кишвар саҳми арзандаи худро гузоранд. Зеро ҷавонон ояндаи давлату миллат ва фардои дурахшони Ватани азизу маҳбубамон Тоҷикистон мебошнад.

   Дар охири ҷаласа раиси ташкилоти ибтидоии “Амонат”- и БДА ҶТ “Амонатбонк” Сироҷиддин Икромӣ барои саҳми арзанда дар татбиқи ҳадафҳои Оинномаи ҲХДТ, инчунин анҷом додани корҳои ташкилию сиёсии ҳизб, иштироки фаъолона дар корҳои ҷамъиятӣ ва устувор гардонидани мавқеи ҳизб дар ҷомеа, бо Ифтихорномаи Кумитаи иҷроияи ҲХДТ дар ш.Душанбе сарфароз гардонида шуд.

 

Шуъбаи матбуоти БДА ҶТ «Амонатбонк» 

 

Ҷумъа, Фев 05 2021

   Ширкати «Комил-2010», ки ба хонаводаи Бег Сабур, раиси Хадамоти алоқаи назди Ҳукумати ҶТ марбут аст, ба «рӯйхати сиёҳ»-и Мақомоти иҷроияи ҳокимияти давлатӣ дар ш.Душанбе ворид шуда, ба ин ширкат барои бунёди иншооти истиқомативу маъмурӣ дигар иҷозатнома ва қитъаи замин дода намешавад. Дар ин бора Маҳмадсаид Зувайдзода, раиси Кумитаи меъморӣ ва сохтмони назди Президенти ҶТ рӯзи 5.02.2021 зимни нишасти матбуотӣ хабар дод.

   Бино ба иттилои Маҳмадсаид Зувайдзода, 3 бинои истиқоматии ин ширкат, ки 2- тоаш дар маҳаллаи Зарафшони пойтахт ҳанӯз 8 сол пеш сохта, ҳоло мардум дар он зиндагӣ мекунанд, айни замон барои гузаштан аз комиссияи давлатӣ омодагӣ мебинанд.

   - 3 бинои баландошёнаи истиқоматии ин ширкатро барои гузаштан аз комиссияи давлатӣ тайёр карда истодаем, яъне барои ислоҳи камбудиҳо вақт додаем ва бояд барои мардуме, ки дар ин биноҳо зиндагӣ мекунанд, барои гирифтани паспорти техникии манзил шароит фароҳам оварем. 1 бинои дигари ин ширкат, ки дар назди Беморхонаи сироятии ш.Душанбе бардошта шудааст, камбудиҳои хеле зиёд дорад. Мо наметавонем иҷозатномаи «Комил 2010» бозпас бигирем, чун мардум хона харидаву пул додаанд, бояд фикри онҳоро ҳам кунем. Ба хотири роҳ додан ба камбудиҳо ширкати «Комил 2010» ба «рӯйхати сиёҳ»-и шаҳрдории Душанбе ворид карда шуда, МИҲД ш.Душанбе минбаъд барои бунёди биноҳои истиқоматии баландошёна бо ин ширкат қарордод намебандад. Инчунин барои ин ширкат қитъаи замин низ дигар дар ҳудуди пойтахт ҷудо карда намешавад, - таъкид дошт Маҳмадсаид Зувайдзода.

   Бояд гуфт, ки ширкати «Комил 2010» ба писари Бег Сабур-Сиёвуш Зуҳуров дахл дошта, он 11 сол пеш бо мақсади истеҳсоли қум, шағал ва корҳои сохтмонӣ бунёд шуда буд. Ин ширкат дар баробари ш.Душанбе дар дигар минтақаҳои кишвар, алалхусус ш.Кӯлобу н.Восеъ объектҳои зиёд дошта, бино ба иттилои СССР ширкати дигаре, ки ба феҳристи «сиёҳ»-и шаҳрдории Душанбе дохил карда шудааст-«Ниагара» (пудратчӣ) низ ба ин хонавода марбут мебошад.  

 

Ҷ.Ҳусейнова, СССР

 

Панҷшанбе, Янв 21 2021

 

20.01.2021 дар ш.Душанбе Қарордоди иҷрои марҳилаи дуввуми лоиҳаи нақби «Истиқлол» байни ширкати “Фароб”-и Ҷумҳурии Исломии Эрон ва Вазорати нақлиёти Ҷумҳурии Тоҷикистон имзо шуд. Дар маросими имзои ин қарордод, вазири нақлиёти ҶТ Азим Иброҳим сафири ҶИЭ дар кишвари мо Муҳаммадтақии Собирӣ ва раиси ширкати “Фароб” Алӣ Вакилӣ ширкат карданд. Дар ин бора ба мухбири СССР дар сафорати ҶИЭ дар ҶТ хабар доданд.

Ба гуфтаи вазири нақлиёти ҶТ Азим Иброҳим, марҳилаи дуввуми ин лоиҳа бо сабабҳои гуногун ба таъхир афтода буд, аммо бо имзои қарордод корҳои марбут ба он, аз ҷумла, равшанидиҳӣ, ҳавокашӣ, оташнишонӣ, насби дурбинҳои назоратӣ, ки барои таъмини бехатарии ҳаракат дар дохили нақб муҳиманд, иҷро хоҳад шуд. 

Раиси ширкати “Фароб” гуфт, ки саҳми Тоҷикистону Эрон дар ин лоиҳа 50 дарсадӣ буда ва агар ҳарду тараф тааҳҳудоти худро бамавқеъ иҷро кунанд, то ҷашни 30 солагии Истиқлолияти давлатии ҶТ он ба истифода дода хоҳад шуд. 

 

  •  << 
  •  < 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  > 
  •  >> 
саҳ 1 аз 50

Китобҳо

Flag Counter