ХАБАРИ ДОҒ
Панҷшанбе, Сен 16 2021

 Имрӯз, 16.09.2021 дар ш.Душанбе таҳти роҳбарии Президенти ҶТ Эмомалӣ Раҳмон ҷаласаи Шӯрои амнияти дастҷамъии Созмони Аҳдномаи амнияти дастҷамъӣ (СААД) баргузор гардид. 

 Дар кори ҷаласа Раиси Шӯрои амнияти дастҷамъии СААД, Президенти Ҷумҳурии Тоҷикистон Эмомалӣ Раҳмон, Сарвазири Ҷумҳурии Арманистон Никол Пашинян, Президенти Ҷумҳурии Беларус Александр Лукашенко, Президенти Ҷумҳурии Қазоқистон Қосим-Жомарт Токаев, Президенти Ҷумҳурии Қирғизистон Садир Жапаров, Президенти Федератсияи Россия Владимир Путин (тариқи видеоконференсия) ва Котиби генералии СААД Станислав Зас иштирок карданд. 

 Тавре пас аз анҷоми ҷаласаи Шӯрои амнияти дастаҷамъӣ Станислав Зас, Дабири кулли СААД ба хабарнигорон гуфт, яке аз масъалаҳои асосие, ки имрӯз сарони давлатҳо муҳокима карданд, вазъи Афғонистон буд, ки пас аз хуруҷи неруҳои амрикоӣ ва қӯшунҳои низомии НАТО аз он ба куллӣ тағйир ёфт. 

   - Барои суръат бахшидан ба кори қабули Барномаи мақсадноки байнидавлатӣ оид ба таҳкими сарҳади Тоҷикистону Афғонистон, ки Тоҷикистон дар доираи СААД пешниҳод кардааст, созиш ҳосил шуд. Тоҷикистон, тавре ки медонед, тӯлонитарин марз бо Афғонистонро дорад-1344 км, ки бисёр мавзеъҳои он аз минтақаи баландкӯҳи дастнорас мегузаранд. Ҳамлаи босуръати ҷунбиши «Толибон», таҳти назорати он гузаштани қариб тамоми қаламрави Афғонистон, аз ҷумла марзҳои давлатӣ ва пойтахт-шаҳри Кобул, инчунин тағйири қудрат дар кишвар ба вазъияти минтақаи Осиёи Марказии амнияти дастҷамъии СААД таъмири назаррас гузошта, моро ба ташвиши амиқ меорад. СААД рушди вазъ дар марзи Тоҷикистону Афғонистонро бодиққат назорат мекунад. Ҳадафи аслии Созмон дар шароити мавҷуда таъмини амнияти кишварҳои узви СААД боқӣ мемонад. Ҳамзамон мо дар фаъолияти худ афзалияти сиёсӣ ва дипломатиро идома медиҳем, гуфт Станислав Зас.

    Мавсуф зикр кард, ки роҳбарони кишварҳои узви СААД ба мувофиқа расиданд, ки барои рушди ҳамкорӣ дар мубориза бо мушкилот ва таҳдидҳое, ки аз қаламрави Афғонистон ба вуҷуд меоянд, саъю кӯшишҳои иловагӣ ба харҷ диҳанд. Ин созмон чораҳои амалии дастҷамъӣ таҳия кардааст, ки барои таъмини амнияти Тоҷикистон дар сурати шиддат ёфтани вазъи сарҳад пешбинӣ шудаанд. Бо ҳамин мақсад дар 1 моҳ дар наздикии марзи Тоҷикистону Афғонистон силсиламашқҳои густурдаи Неруҳои дастҷамъии СААД-«Ҷустуҷӯ-2021», «Эшелон-2021», «Ҳамкорӣ-2021» ва «Кобалт -2021» баргузор мешаванд, ки ҳамаи онҳо тибқи нақшаи ягона  мегузаранд, таъкид дошт Дабири кулли СААД.  

 

Ҷ.Хусейнова, СССР

Қасри Миллат

 

Чоршанбе, Сен 15 2021

 

Чоршанбе, Сен 01 2021

24.08.2021. Соат ба вақти Киев 14:24 дақиқа. Дар ана ҳамин вақту соату моҳу рӯз  (воқеан ҳам матлаби болоии мо, аккурат, 24 соат пеш навишта шудаасту бо ин сана ҳич рабте надорад), Вл. Зеленский укази нав имзо кард. Тибқи ин Указ, ки дар рӯзи таҷлил аз 30-солагии Истиқлолияти давлатии Украина роҳандозӣ шуд, минбаъд, ҳар рӯзи 28 июл дар Киев чун Рӯзи Давлатдорӣ таҷлил хоҳад шуд!!!

Ба гуфтаи Владимир Зеленский Украина то ҳамроҳ шудан бо СССР ва зери зулми Маскав мондан, мамлакат буд ва сохторҳои давлатдорӣ низ дошт. Ва ин ки тӯли 70-сол дар ҳайъати СССР буд, моҳияту сифати ин давлатдориро кам накард. Зимнан Украина ҳар 28 июл аз…1000 солагии давлатдории худ ҷашн хоҳад гирифт.

Дар Рӯзи Истиқлолияти Украина дар баробари президенти фаол, 3 раисиҷумҳури собиқи ин кишвар-Леонид Кучма, Виктор Ющенко ва Пётр Порошенко низ ширкат доштанд. 4 президент ҳатто набуди №5, бечора Януковичи фирориро, ки мисли Аскар Акаев дар Россия пинҳон аст, эҳсос накарда, барои Рӯзи «отдых» эълон шудани 28.07. кафкӯбӣ карданд.

Дар ин рӯзи Истиқлолият ба фарқ аз 70-соли шӯравӣ, на Армияи Советӣ, ки Армияи НАТО аз майдони марказии Киев қадам зада, ба ҳозирин гӯшзад мекард, ки Украина аз СССР озод шуда ҳам бошад, ҳоло хеле солҳо зери нақораи НАТО хоҳад рақсид.

Зеленский бошад ба ваҷд омада, аз трибуна гуфт, аннексияи Қрим чӣ ғасб аст, ки русҳои москолит ҳатто «адибони моро аннексия кардаанд» ва мисол овард, Гогол Николай ва Шевченко Тарас. Ба пиндори президент русҳо ҳаққу ҳуқ надоранд, ин 2 абармарди хохолро рус хонанд, асарҳояшонро нашр созанд ва ҳатто мутолиа кунанд!

Зеленскийро ҳатто напурсиданд, ки чаро Гоголу Шевченкоро ғайриурус мехонад, ҳол он ки онҳо ба хохолӣ чизе наофаридаанд? Зеро ҳама медонист, ки Владимир ҳамчун Илҳом Алиев-президенти Озарбойҷон дар ин маврид посухҳои романтикӣ дорад.

Хонанда посухи Илҳомро шуниданист? Марҳамат!  Ӯ дар мавзуъи «агар Насимӣ ва Ганҷавӣ озарии турканд, пас чаро тоҷикӣ-форсӣ менавиштанд?» посухи лирикӣ дода буд:

- О, забони давлатӣ, забони ғосибон (форсӣ) бошад, боз ба кадом забон менавиштанд?

Ҳайрон шудӣ, хонанда? Ҳиҷ ҷои таҳаййур нест. Дар соате, ки мо, намедонам, амри киву чиро мунтазирему технократҳоямон ақаллан 100 солагии давлатдориамонро ҷашн гирифтанӣ нестанд, технократҳои дигар давлату ҳукуматҳо фарзандони фарзонаи миллати моро кашида бурда истодаанд. Оқибаташ ба хайр шавад.

…Тантанаҳои 30-солагии Истиқлолияти давлатии Украина, аккурат, то 28 август давом мекунад, то рӯзе, ки раҳматии Акбари Саттори нозанин, раиси билоивази ИЖТ, дар соли 2015, 6 сол қабл, аз сифлагони ҳамқаламу ҳамаламаш бибридаву ба олами улвӣ пайваста буд. Худо ӯро биомурзад ва бо дуо ту ҳам ёдаш кун, хонандаи ин сутур…

PS: Газетаи мардумии СССР ҳар рӯзи 28 август, дар рӯзи фавти Акбаралӣ Сатторов дар Шарқи Озод-ГЖК оши худоӣ медод. Мутаассуф, чанде аз сокинони ин бино (ошёнаи…худаш ҳам медонад, ки дар кадом этаж аст!), ошро хӯрдаву ба ниҳодҳо менавиштанд, ки мо гӯиё «Қонуни Танзим»-ро вайрон мекунем. Зимнан мо дигар оши худоӣ нахоҳем дод. Дар ин бино!!! Рӯҳи Акбар моро бубахшаду нотавонбину бадхоҳонашро, ки ҳатто пас аз марг низ бо ӯ душманӣ доранд, 1 боракак…таконад!!! 

 

Чоршанбе, Авг 25 2021

18.08.1991. Геннадий Янаевро шояд имрӯз касе нашносад. Вале ӯ нахустин нафаре буд, ки расо 30 сол пеш нахустин табаддулоти давлатӣ ва президентро канор кардаву худро президенти мо эълон намуд. Оре, аккурат, президенти мову шумо, хонандаи ин сутур. Зеро сӯҳбат сари ГКЧП дар СССР меравад. Табаддулоте, ки ҳамагӣ 3 рӯз давом кард...

ГКЧП охирин талоши “верхушка” барои ҳифзи СССР буд. Имрӯз аксарият, бо шумули ун нафароне, ки барои шикасти ин Путч камар баста буданд, афсӯс мехӯранд, ки агар тарафдорони табаддулот пирӯз мешуданд, шояд СССР боқӣ мемонд. Вале он чӣ шуд, ки шуд!!!

Ҳамааш аз он сар шуд, ки бо сари кор омадани Горбачеви камхирад дар соли 1986, СССР ба оҳистагӣ мақому манзалати хешро аз даст додан гирифт. Мишка Раискаашро ба ҳама ҷо таки каш карда мебурд ва ин 2 сакалту зери фишори равонии Амрикову Аврупо қарор гирифтанд. Баъдан СРУ дар депешаҳо менависад, ки Раискаву Мишка кореро ба осониву ройгонӣ карданд, ки олами капитал дар тӯли 70 сол бо сарфи миллиардҳо доллар наметавонист. Тавассути таблиғу ташвиқи дурӯғини “акам зӯрай! Апамда гап нест!” ва бардор-бардорҳову таърифу тавсиф, ки ТВ ва Радиоҳои Ғарб 1 соат бе чеҳраҳои манфури ин 2 тан набуданд, ишонро реформатори бузургтарини ҳама давру замонҳо эълон карда, ба зери деворҳои Кремл об монданд. 

Бозсозиву демократияву “сухой закон”-и Горбачёв аккурат то ҳамин 18-21 август давом кард. Бо хатми ГКЧП СССР барҳам хӯрд ва Горбачёву занашро дигар саг суроғ накард. Воқеан ҳам сарнавишти инҳо дарси ибрат ба тамоми сарварони давлатҳост, ки ба таърифу таблиғу ташвиқу подхалимизм дода нашаванд, ки оқибаташ, гуфти Бобои Ғулом “турб аст”.

Вале баргардем сари ГКЧП. Чун Горбачёв бо Раискааш ба Форос дамгирӣ рафт, Янаев, Пуго, Павлов, Лукянов, Язов... дар кишвар соати комендантӣ эълон кардаву ӯро “бо сабаби маризӣ” аз вазифа канор ва Янаеви витсе президенташро садри абарқудрат қарор доданд. Вале ба кор Амрикову Аврупо қӯш шуда, ба Елтсин, Кравчук, Шушкевич-президентҳои Россия, Украина ва Белорусия амр карда шуд, ба кор дахолат кунанд. Бо даъвати Елтсин халқ ба кӯчаҳои Маскав рехт. Полки Таманӣ, ки бар ҳифзи СССР омада буд, бо танкҳояш сӯи халқ гузашт. Зеро он вақт мардуми гумроҳ воқеан ҳам тарафи Елтсинро гирифт.

Баъди шикасти ГКЧП ин 3 президент, ки аз асосгузорони СССР буданд, пресс-конфронс дода, аз барҳамрезии СССР ва бунёдгузории СНГ дарак медиҳанд. Елтсин бошад, дар ҳолате, ки ҳама телефонҳои давлатии “сотка” фаол нест, тавассути телефони ба истилоҳ 2-тина, ба Ҷорҷ Буш занг зада, рапорт медиҳад:

-Ҷаноби Президент. СССР дигар вуҷуд надорад!!!

Албатта, коллапси СССР ба 15 ҷумҳурӣ, истиқлолияту озодӣ овард. Ва тавре мегӯянд, ҳар коре мешавад, бе ҳикмат нест. Вале бар ивази чӣ ва кӣ? Дар СССР ҷангу ҷидолҳо шуруъ шуданд. Олам ба коми хунрезӣ рафт, ки то ҳанӯз оқубати он норавшан аст. Қораи арабу пораи ислом дар хун ғарқ аст. Магар СССР мебуд, НАТО ба чунин густохӣ даст мезад? Суоли матраҳ ва риторикист, албатта.

Ва муҳимтар аз ҳама. Беҳтарин посухро роҷеъ ба пошхӯрди СССР Путин В.В. гуфта буд:

-Касе барои СССР зиқ намешавад-дил надорад. Вале касе дар фикри барқарории СССР аст-ақл надорад!

Муҳимтарин афроди иштирокчии ГКЧП дар таърихи 18-21.08.1991.

 

•Тарафдорон

oЯнаев Г. И.

oПавлов В. С.

oЛукянов А. И.

oКрючков В. А.

oЯзов Д. Т.

oПуго Б. К.

oАхромеев С. Ф.

oВаренников В. И.

oМакашов А. М.

oКалинин Н. В.

oШенин О. С.

oСамсонов В. Н.

•Муқобилон

oЕлтсин Б. Н.

oРутской А. В.

oСилаев И. С.

oХасбулатов Р. И.

oКобетс К. И.

oИваненко В. В.

oБаранников В. П.

oГрачёв П. С.

oПопов Г. Х.

oСобчак А. А.

oБурбулис Г. Э.

oЛобов О. И.

 

 

Панҷшанбе, Авг 19 2021

 

Чоршанбе, Авг 18 2021

21.07.2021. Владимир Зеленский, президенти Украина Қонун дар бораи «миллатҳои муқимӣ»-ро имзо кард. Акнун тоторҳои Қрим, қараимҳо ва қримчакҳо қавму миллатҳои муқимии Украина маҳсуб мераванд. Русҳо неъ! Ба ҳамин тартиб русҳо куллан мақоми маскунии хешро дар ин кишвари, ба гуфти худи фашистак-скинхедҳои маскавӣ, «бародар-славянӣ» гум карданд.

Кремл ба худ наомада, зарбаи муҳликтару мудҳиштаре ба Россия ва маданияти русӣ аз Назди Балтика расид. Латвия ва Эстония, ки беш аз 30 сол аст, бо «гузаштаи нангини советӣ», яъне бо урусҳо ҳарб мекарданд, ба ҳуҷуми барқосо гузаштанд. Дар ин 2 кишвар мактабҳои русӣ баста, ҷамъияту ташкилотҳои фарҳангии урусӣ пӯшида ва тамомии каналҳои ТВ Россия дастнорас шуд. Барои тамошои шабакаҳои урусӣ штраф мекунанд: 640 евро!!!

Эгилс Левитс, президенти Латвия бошад, сареҳатан ба русҳои муқимӣ расонид, ки онҳо дигар «одамони дуввумдараҷаанд». Ӯ гуфт:

-Мо бояд ба мероси советӣ хотима гузорем, зеро дар бозори меҳнат талабот ба русзабонҳо аз англису немисиву латвондонҳо бештар аст!!!

Президент ба он ишора кард, ки дар аксарияти корхонаҳо ба русдонҳо тарҷеҳ медиҳанд. Зеро 24,5% аҳолии кишвараш…просто урусанд!

Латвия ба русзабонҳо бархӯрди баде дорад-мегӯянд дар Маскав ва мисол меоранд-дар ин кишвари Аврупоӣ мардумро ба 2 сорт, 2 қисмат ҷудо карда, ҳатто 2 навъи паспорт медиҳанд. Паспорти русҳо ва афроде, ки баъди соли 1940 ба ин кишвар омадаанд, сиёҳи осмонӣ буда, мӯҳри «на-шаҳрванд» (негражданин) гузошта шудааст. Ва ин дар Иттиҳоди Аврупо. «Негражданин», яъне урус ҳуқуқи кор дар мақомоти қудратӣ, ҳукумат, ширкат дар интихобот ва ҳатто ҳаққи хизмат дар Армия надорад! Абсурди кор ба ҳаддест, ки ҳатто 131 тифли навзодро аз таваллудхона бо тамғаи «негражданин» баровардаанд.

Соли 2021 тамомии мактабҳои миёнаву олии русӣ дар кишвар баста шуда, сар аз 01.02.2021 Первый канал, «НТВ Мир», «РЕН ТВ Балтия», «Кинокомедии», «Киномикс» дар ҷамъ 16 ТВ русӣ баста шуд.

Эстония низ паспорт бо тамғаи «негражданин» дорад, вале «на шаҳрвандони Эстония» ақаллан ҳуқуқи ширкат дар интихобот доранд. Дар ҷамъ онҳо низ одам нестанд, чизе миёни одам ва одамони навъи 1, яъне эстониҳо мебошанд.

Президент, парлумон ва мақомоти давлатӣ расман ва бидуни ягон шарму айб русзабонҳо ва маданияти ишонро «мусори СССР» мехонанд ва Иттиҳоди Аврупо хомӯш аст.

Керсти Калюлайд-президенти Эстония бошад, ин ҳама чораҳоро боз ҳам кам дида, мехоҳад фишор сари маданияту фарҳанги русӣ афзоиш ёбад:

«Худи факти будани урусҳо ҷамъиятро рахна месозад. Идомаи фаолияти мактабҳои русӣ таҳдид бар мавҷудияти забони эстонӣ фарҳанги эстонӣ ва ягонагии Эстония аст!»

Гуфта мешавад, фишору тазйиқ сари русҳои Назди Балтика пас аз аннексияи Қрим аз ҷониби Путин афзудааст. Зеро кишварҳои собиқи шӯравӣ баъди ин амал тарсиданд, ки Кремл онҳоро низ ишғол мекунад. Воқеан ҳам, агар фишор ҳамингуна давом кардан гирад, ВВП просто маҷбур аст, ки барои ҳифзи русҳои худ…ин корро кунад. Неъ???

Боз дар ҳоле, ки Русия 200% медонад, Аврупо ва Амрико дӯстон не, душманонаш шудаанду гуфти бобои Ғулом «Бор барака!» гуфта, шояд онҳоро 1 бор биҷумбонад?

 

  •  << 
  •  < 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  > 
  •  >> 
саҳ 1 аз 89

Китобҳо

Flag Counter