Идибек Пириев, раиси маҳаллаи Роҳи нави ҷамоати Тоҷикободи ноҳияи Вахш меҳмони идора шуда, гуфт, ки дар деҳаи мо мактаб, ё худ муассисаи таълимии рақами 47 фаолият мекунад, вале пулталабкунии омӯзгорон мардумро ба дод овардааст.
- Ҳар рӯз мардуми деҳа бо шикоят ба наздам меоянд, ки аз ҳамин пулҷамъкуниҳои мактабӣ безор шудаем. Имрӯз пули театр, пагоҳ пули обуна, пасфардо пули ҷорӯбу сатилу лата, пасфардоҳои дигар маблағи ину он. Ҳамаи ин басанда нест, ки замони ахир хонандагон барои картошкабарӣ барои муассиса аз мо волидон боз пул талаб менамоянд. Ҳамин пулҷамъкуниҳои то кай идома меёфта бошанд?!
Агар хонандае картошка набарад, ӯро намегузоранд ба дарс дарояд ва ӯ муҷозот мегирад. Дар деҳаи мазкур аз 1 оила дар ин муассиса то 4 нафар таҳсил менамоянд. Шароити деҳот, пӯшида нест, ки хеле мушкил аст. Бечораҳо аз куҷо пул ёбанд?!
Пирак Сафаров, сокини н.Шоҳмансури шаҳри Душанбе (тел: 919360746) гуфт, ки соли 2019 дар ҷойи бинои дуошёнаи мо, воқеъ дар кучаи М.Собирова 18/4 сохтмони бинои баландошёнаи нав оғоз ёфт.
- Бинои моро тахриб намуда, тибқи шартнома сохтмон бояд дар тӯли 15 моҳ ба итмом мерасид. ҶДММ «Шаҳри зебои мо» роҳбараш Бахтиёр Ибодуллозода бо назардошти ин ба мо барои 15 моҳ иҷорапулӣ доданд. Аммо сохтмон тӯл кашиду то ба ҳол маълум нест, ки онро ба комиссияи давлатӣ супориданд ё не? Аз бинои нав ба мо хона доданд, вале ширкат он ваъдаҳоеро, ки дар шартнома зикр карда буд, ба сомон нарасонид. Моҳи январи соли 2022 калидҳои хонаро гирифта, ба таъмири хона сар кардем, аммо иҷорапулии моро ширкат танҳо то моҳи июли соли 2021 доду халос. Чандин моҳе, ки мо аз ҳисоби худ иҷора мешиштем, пардохт нашуд. ҶДММ «Шаҳри зебои мо» ва Бахтиёр Ибодуллозода бояд ба ваъдаҳояшон амал кунанд.
Оламгули Мазлум, журналист, меҳмони идора шуда, гуфт, ки дӯстро воқеан дар рӯзҳои мушкил мешинохтаанд.
- Ман зодаи Бадахшон ҳастаму дар шаҳри Душанбе зиндагӣ мекунам. Вақти фаромадани тарма дар шаҳри Хоруғ ман берун аз шаҳр будам ва дар он ҷо барқ набуд. Бегоҳ барқ доданд ва мо аз ТВ Бадахшон вазъи баамаломадаро дидем. Ман аз номи худ ва аз номи кулли бадахшониҳое, ки дар дигар шаҳру ноҳияҳои ҷумҳурӣ зиндагӣ мекунанд, ба мардуме, ки дар офати табиӣ азизони худро аз даст додаанд, ҳамдардӣ баён мекунам ва ба тамоми сокинони Бадахшони азизам сабри ҷамил мехоҳам.
Инчунин, ба кормандони ҳафтаномаи «СССР» ва ба шоирон Аскар Ҳаким, Давлат Сафар, Нозир Ёдгорӣ ва Шоираи Раҳимҷон низ барои ғамшарик буданашон изҳори сипос менамоям.
Нодирхони Алихон, муаллиф ва хонандаи фаоли мо аз ш.Турсунзода меҳмони идора шуда гуфт, ки ба баҳсу мунозираҳои рафиқоне, ки шӯравиро танқид мекарданд, нуқта бояд гузошт.
- Вақте расидааст, ки ба ин гуна баҳсҳои давомдор хотима дода, нуқта гузорем. Банда ҳам тарафдори бародар Х. Имомов буда, таклиф менамоям, ки саҳифаи 13 тағйири ном кунад. Аагр саҳифаи адабӣ ва панду ахлоқӣ гардад, олам гулистон мешавад. Ба ғайр аз ин чунин саҳифаи адабӣ барои ҳар сокини кишвар ба мисли обу ҳаво лозим мебошад. Зимнан шеъру ғазалу гуфторҳои бадеӣ беҳтар аз баҳсу муноқишаҳои бемаънии баъзе бародарон аст.
Басирхон Зоҳидбоев аз Ворухи шикастнопазир, ҳамсояи девордармиёни Меҳрӯзиддин Болтаеви раҳматӣ, меҳмони СССР шуда, гуфт, аз шумораи нахустин ба газетаи мо обуна ва узви Ихвон ал СССР аст:
- Салому паёми тамомии ворухиёнро ба шумо мерасонам. Шахсан ман 748 шумораи газетаро пурра аз саҳ-1 то 16 хондаам!!! Ҷумъа меоранд газетаро ва то шаби шанбе хонда тамом мекунам! Наркоман шудаам, муътоди газета. Ман ҳатто саҳифаҳои рекламаи шуморо мехонам. Агар нахонам намешавад! Хонда ба дигарон медиҳам ва дастобадаст ҳама дар Ворух СССР мехонанд.
Дар бораи анклави Ворух гуфтанӣ дорам: 31.12.1974 аввалин ҷанги қирғизу тоҷик сар зад. Қирғиз ҷангро нахустин шуда сар кард. Сафо Абдураҳимов ва Музаффарҷон ном сокинони Ворух дар он тирпарронӣ захм бардоштанд. Баъдан КГБ ба пурсуҷӯ сар кард. Хулласи калом, моҳи январи с. 1975 замини 2 тарафи роҳи мошинравро ба қирғиз доданду тоҷиконро дур карда, аз латок боло замин доданд. Ин супориш аз Маскав буд. Ин амали ноадолатонаи Маскав сабаб шуд, ки то ҳанӯз ин конфликт давом дорад ва бо ҳамин Ворух анклави сунъӣ гардид. Дар асл таърихан собитшуда асту ҳама, ҳатто қирғиз ҳам, медонад, ки Ворух сарзамини ориён ва Тоҷикон буд, ҳаст ва мемонад. Мо Метавонем!
Алихон Шарипов, муаллиф ва хонандаи фаоли газетаи мардумӣ аз ш.Кӯлоб, ҷанговар-башардӯст, корманди соҳаи нақлиёти минтақаи Кӯлоб меҳмони идора шуда, гуфт, ки ба 3 вазири кишвар 1 гуфтанӣ дорад.
- Аз вазирони нақлиёт, молия ва ҳифзи иҷтимоӣ даъват менамоям, ки дар 1 рӯзи сарди зимистон ба ҷойи синфи коргар, ки ба таври шабонарӯзӣ дар ағбаҳо кор карда, маоши ночиз – 700-800 сомонӣ мегиранд, баромада, кор кунанд. Онҳо дар утоқҳои гарму барҳаво, рӯбарӯи ТВ-ҳои калон нишаста, аз куҷо медонанд, ки ҳоли коргар чӣ гуна аст? Оё инҳо боре фикр кардаанд, ки ин маоши ночиз талаботи 1 оилаи коргарро қонеъ мекунад ё не?
Хуб мешуд, агар Азим Иброҳим, вазири нақлиёт, Файзиддин Қаҳҳорзода- вазири молия ва Гулнора Ҳасанзода, вазири меҳнат, муҳоҷират ва шуғли аҳолии кишвар 1 рӯзи кории хешро дар ағбаҳо гузаронанд, оё тоқат карда метавониста бошанд!? Наметавонанд! Пас оё замоне нарасидааст, ки маоши синфи коргар, ки хеле кам аст, бо назардошти фаслҳои сол боло бардошта шавад? Агар коргар набошад, вазир чӣ лозим?
ХАБАРҲОИ ОХИРИН
- Марҳабо, Наврӯз ба Тоҷикистони азиз! Назар
- Фархор: дар 1 рӯз 18 маротиба барқ қатъ шуд... Назар
- Блогерҳои тоҷик: кӣ бепарвову кӣ боинсоф? Назар
- Резаахбор Назар
- Низорамоҳ Зарифова 100 сола шуд! Назар
- Мактаби Иқбол Назар
- Картошкаҷамъкунӣ – талаби нав дар мактаб… Назар
- Андар ному завқ Назар
- ҶОМИ МИЛЛАТҲОИ ЗЕРИ 20-СОЛИ ОСИЁ Назар
- КАЪБА Ё ҚИБЛА? Назар
- Нишасти матбуотӣ оид ба натиҷаи фаъолияти БДА ҶТ «Амонатбонк» давоми соли 2022 Назар
- Дар як сатр Назар
