ва вазифаҳо барои нимсолаи дуюми соли 2023
11 июли соли 2023 таҳти роҳбарии раиси Бонки миллии Тоҷикистон Ҳоким Холиқзода ва иштироки Ёрдамчии Президенти Ҷумҳурии Тоҷикистон оид ба масъалаҳои иқтисодӣ Неъматулло Ҳикматуллозода, муовини якуми раиси Бонки миллии Тоҷикистон Фирдавс Толибзода, муовинони раиси Бонки миллии Тоҷикистон Фирӯз Шарифзода ва Алиҷон Салимзода, роҳбарони ташкилотҳои қарзии молиявӣ, Ассотсиатсияи бонкҳои Тоҷикистон, Ассотсиатсияи ташкилотҳои маблағгузории хурди Тоҷикистон, Хазинаи суғуртаи пасандозу амонатҳои Тоҷикистон ва Бюроҳои таърихи қарзӣ ҷаласаи васеъ оид ба ҷамъбасти натиҷаҳои фаъолияти низоми бонкӣ дар нимсолаи якуми соли 2023 ва вазифаҳо барои нимсолаи дуюми соли 2023 баргузор гардид.
Нахуст, раиси Бонки миллии Тоҷикистон Ҳоким Холиқзода ба Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон барои дастгирии доимии рушди низоми бонкии мамлакат миннатдории худро баён намуда, зикр дошт, ки сарфи назар аз таъсири манфии омилҳои берунӣ корҳо дар самти устувор нигоҳ доштани нишондиҳандаҳои макроиқтисодӣ, коҳиш додани таъсири хавфҳои эҳтимолӣ ба иқтисоди миллӣ, фаъолияти босуботи низоми бонкӣ, афзоиши истеҳсоли маҳсулоти саноативу кишоварзӣ, беҳтар гардонидани фазои сармоягузорӣ ва дастгирии соҳибкорӣ тақвият ёфта, рушди иқтисоди миллӣ таъмин гардид.
Аз ҷумла, дар шаш моҳи соли 2023 Маҷмӯи Маҳсулоти Дохилии (ММД) кишвар ба 54,2 млрд. сомонӣ расида, рушди воқеии он ба 8,3 фоиз баробар гардид. Сатҳи таваррум бошад, дар давраи ҳисоботӣ 2,3 фоизро ташкил намуд, ки нисбат ба ҳамин давраи соли гузашта 1,8 банди фоизӣ кам мебошад.
Меъёри бозтамвил, ки фишанги калидии сиёсати пулию қарзӣ барои анҷом додани амалиётҳои монетарӣ ба ҳисоб меравад, дар асоси дурнамои таъсири хавфҳои эҳтимолии дохилию берунӣ ба иқтисодиёт бо назардошти дар сатҳи поёнии ҳадафи муқарраргардида қарор доштани сатҳи таваррум ва беҳтар шудани интизориҳои таваррумии аҳолӣ таҷдиди назар гардида, то ба 10,0 фоизи солона паст карда шуд.
Дар идомаи суханронӣ Ҳоким Холиқзода афзуд, ки Бонки миллии Тоҷикистон ҷиҳати татбиқи сиёсати пулию қарзӣ ва таъмини устувории низоми бонкӣ дар ҳамкорӣ бо дигар ниҳодҳои дахлдори кишвар тамоми чораҳои заруриро андешида, раванди ислоҳоти соҳаи бонкдориро бо мақсади баланд бардоштани рушди иқтисодию иҷтимоии кишвар идома дода истодааст.
Бонки миллии Тоҷикистон бо мақсади таъмини муътадилии вазъи бозори дохилии асъор сиёсати қурбиро дар реҷаи “шинокунандаи танзимшаванда, бе муайян ва эълон кардани ҳудудҳои тағйирёбии қурб” ҷиҳати татбиқи самараноки сиёсати пулию қарзӣ ва афзун намудани ҳаҷми захираҳои байналмилалӣ амалӣ карда истодааст. Қурби расмии миёнадавраи доллари ИМА нисбати сомонӣ дар ин давра ба 10,7 сомонӣ баробар гардида, дар муқоиса ба ҳамин давраи соли 2022 ба андозаи 9,0 фоиз паст мебошад.
Зимни суханронӣ мавсуф афзуд, ки бо мақсади дар амал татбиқ намудани муқаррароти Қонуни Ҷумҳурии Тоҷикистон “Дар бораи авф бинобар қонунигардонии дороиҳо ва маблағҳои шаҳрвандони Ҷумҳурии Тоҷикистон” Бонки миллии Тоҷикистон дар якҷоягӣ бо ташкилотҳои қарзии ваколатдор тадбирҳои зарурӣ андешида истодааст.
Ҳамзамон зикр карда шуд, ки Бонки миллии Тоҷикистон ба рушди низоми пардохтӣ таваҷҷуҳи хоса зоҳир намуда, ба фаъолияти устувору мунтазами низоми молиявии кишвар, татбиқи сиёсати пулию қарзӣ ва фискалӣ ҷиҳати гузаронидани пардохтҳои саривақтӣ ва ҳисоббаробаркуниҳои бехатарро таъмин намуда истодааст.
Дар доираи гузаронидани ислоҳотҳои пайваста аз тарафи Бонки миллии Тоҷикистон ҷиҳати мусоидат ба фаъолияти самаранок ва мунтазами низоми пардохт як қатор корҳои назаррас ба анҷом расонида шуданд. Аз ҷумла, ба роҳ мондани фаъолияти низоми пардохтии нави “ВАТАН”, ки ба шахсони воқеӣ имконияти интиқоли маблағҳоро бе кушодани суратҳисоби бонкӣ дар дохили ҷумҳурӣ фароҳам меоварад, аз ҷумлаи тадбирҳои андешида дар ин давра маҳсуб меёбад.
Инчунин, барои тавсеаи инфрасохтори пардохтӣ дар дохили кишвар модули QR-рамзи ягона татбиқ шуда истодааст, ки ба мизоҷони ташкилотҳои қарзӣ пардохт намудани молу хизматрасониҳоро тариқи дилхоҳ ҳамёни электронӣ имконият медиҳад.
“Аллакай ҳазорҳо амалиётҳои пардохтӣ тавассути модули номбурда бомуваффақият гузаронида шуда, ҳамроҳшавии ташкилотҳои қарзӣ ба низоми мазкур идома дорад”- қайд кард Ҳ.Холиқзода.
Дар идомаи ҷаласа роҳбарони як қатор воҳидҳои сохтории Бонки миллии Тоҷикистон (директори департаменти назорати бонкӣ Зафар Абдуллоев, директори департаменти идораи захираҳои байналмилалӣ ва сиёсати қурби асъор Зиёратшо Бояков, директори департаменти мониторинги молиявӣ Ҳалим Мирзоалиев, директори департаменти технологияҳои иттилоотӣ Дилшодбек Ғаниев, сардори идораи низоми пардохт Шуҳрат Салоҳиддинов ва сардори шуъбаи баррасии муроҷиатҳо ва назорати ташкилотҳои молиявии идораи ҳимояи ҳуқуқҳои истеъмолкунандагони хизматрасониҳои молиявӣ Улуғбек Бозоров) оид ба мавзӯъҳои вазъи низоми бонкӣ дар нимсолаи якуми соли 2023, татбиқи сиёсати асъорӣ, такмили қонунгузорӣ дар самти МҚД/МТ МПСҚО, татбиқи сиёсати самараноки низоми пардохт ва муроҷиати шаҳрвандони ҷумҳурӣ ба Бонки миллии Тоҷикистон дар назди ҳозирин бо рӯнамоҳои муфассал баромад намуданд.
Сипас, Ҳоким Холиқзода аз роҳбарони ташкилотҳои қарзии молиявӣ (КВД БА ҶТ “Амонатбонк”, ҶСК “Ориёнбонк”, КВД “Саноатсодиротбонк”, ҶСП "Бонки байналмилалии Тоҷикистон", ҶСП “Спитамен Бонк”, ҶСП "Аввалин бонки молиявии хурд", ҶСК “Коммерсбонки Тоҷикистон” ва ҶСК “Алиф Бонк”) оид ба беҳтар намудани сатҳу сифати хизматрасониҳои бонкӣ, пурзӯр намудани низоми назорати дохилӣ ва идоракунии хавфҳо, кам кардани сатҳи қарзҳои ғайрифаъол, мустаҳкам намудани заминаи сармоявӣ ва ҷалби бештари сармоягузориҳо, баланд бардоштани савияи тахассусии кормандон, зиёд намудани ҳиссаи дороиҳои даромаднок, таъмини амнияти иттилоотӣ ва шаффофияти фаъолият, иҷроиши саривақтии талаботи дастурамалҳо ва дастурҳои БМТ дар самти амалиёти асъорӣ, баланд бардоштани маърифатнокии молиявии аҳолӣ, иҷрои саривақтии стратегияи рушди фаъолияти ташкилотҳои қарзӣ барои солҳои 2022-2026, таъмини талаботи Қонуни Ҷумҳурии Тоҷикистон “Дар бораи авф бинобар қонунигардонии дороиҳо ва маблағҳои шаҳрвандони Ҷумҳурии Тоҷикистон”, пешниҳоди қарзҳои дастрас ба аҳолӣ ва субъектҳои хоҷагидор,ҷорӣ кардани хизматрасониҳои нави муосир, вусъат бахшидани ҳисоббаробаркуниҳои ғайринақдӣ, беҳтар намудани нишондиҳандаҳои молиявӣ, инчунин зиёд намудани ҳаҷми қарздиҳӣ ба соҳаҳои мухталифи иқтисодиёт, аз ҷумла ба бахшҳои истеҳсолӣ, бо дарназардошти идоракунии хавфҳо ва имкониятҳои ҷойдошта посухҳои мушаххас гирифт.
Дар идомаи ҷаласа Ёрдамчии Президенти Ҷумҳурии Тоҷикистон оид ба масъалаҳои иқтисодӣ Неъматулло Ҳикматуллозода суханронӣ намуда, таваҷҷуҳи аҳли нишастро ба чанд нуқтаи муҳими самти фаъолият ва вазифаҳое, ки дар назди низоми бонкӣ истодаанд, ҷалб намуд.
Аз ҷумла, мавсуф изҳор дошт, ки сарфи назар аз таҳаввулоти дар иқтисоди ҷаҳон идомадошта ва таъсири манфии омилҳои берунӣ ба иқтисоди миллӣ, аз ҷониби низоми бонкии кишвар фаъолияти ҳадафманду натиҷабахш ба роҳ монда шудааст. Дар натиҷа сатҳи начандон баланди тавварум ва устувории қурби пулли миллӣ нигоҳ дошта шуда, пасандозҳо дар низом зиёд гардидаанд ва ҳиссаи қарзҳои батаъхирафтода коҳиш дода шуд.
Қайд гардид, ки дар давраи ҳисоботӣ аз ҷониби низоми бонкии кишвар дар маҷмӯъ 9 миллиарду 276 миллион сомонӣ қарз пешниҳод шуда, нишондиҳандаи мазкур нисбат ба ҳамин давраи соли гузашта беш аз 2,7 миллиарду сомонӣ ё 42 фоиз зиёд мебошад, вале иҷрои супоришҳои Роҳбари давлат ҷиҳати ба таври назаррас зиёд намудани пешниҳоди қарзҳо ба мизоҷон, андешидани тадбирҳои иловагии судмандро дар ин самт талаб менамояд.
Мавриди зикр аст, ки ба санаи ҳисоботӣ бақияи пасандозҳо қариб 17,0 миллиард сомониро ташкил намуда, нисбат ба ҳамин давраи соли гузашта 47,9 фоиз ё 5,5 миллиард сомонӣ зиёд гардидааст, ки аз ҷумлаи нишондиҳандаҳои мусбии фаъолияти низоми бонкии кишвар мебошад.
Инчунин, дар нимсолаи аввали соли ҷорӣ ба низоми бонкии кишвар 611 миллион доллар сармоягузориҳои хориҷӣ ҷалб карда шуданд, ки ин нисбат ба ҳамин давраи соли гузашта 20 фоиз зиёд мебошад.
Бо вуҷуди ин, дар самти ҷалби бештари сармоя ба низоми бонкӣ, паст кардани фоизи қарзҳо, таъсиси ташкилотҳои қарзии нав, аз ҷумла зиёд кардани шумораи бонкҳо, васеъ намудани хизматрасониҳои электронӣ фаъолияти низоми бонкии кишвар ҳоло ҳам тақвият металабад.
Неъматулло Ҳикматуллозода таъкид намуд, ки ҷиҳати татбиқи самараноку муваффақонаи сиёсати иқтисодии давлату ҳукумат нақши фаъолияти низоми бонкӣ ниҳоят муҳим арзёбӣ гардида, дар таъмини рушди устувори иҷтимоию иқтисодии кишвар, ғанӣ гардонидани буҷети давлатӣ, ташаккули бахши хусусӣ ва соҳибкорӣ, ҳалли мушкилоти иҷтимоӣ саҳми беандоза дорад.
Аз ин лиҳоз, - гуфт номбурда, - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатии худ ба Маҷлиси Олии кишвар ва маҷлиси ҷамъбастии Ҳукумати кишвар дар соли 2022 ба Бонки миллӣ ва ташкилотҳои қарзии молиявии ҷумҳурӣ ҷиҳати устувор нигоҳ доштани вазъи иқтисодию молиявии мамлакатамон вазифаҳои мушаххас гузоштанд.
Аз ҷумла, бо мақсади ҷалби ҳарчи бештари сармояи хориҷӣ, бахусус сармояи мустақим ба низоми бонкии кишвар ҳамкории судмандро бо ташкилотҳои молиявӣ ва сармоягузорони хориҷӣ вусъат бахшида, чораҳои заруриро роҳандозӣ намуда, ҷиҳати зиёд намудани пешниҳоди қарзҳои дастрас ба соҳаҳои иқтисодиёт, бахусус соҳибкории истеҳсолӣ ва боз ҳам паст намудани фоизи қарзҳо тадбирҳои судманд андешанд. Илова бар ин, барои зиёд намудани теъдоди ташкилотҳои қарзии молиявӣ, аз ҷумла бонкҳои тиҷоратӣ ва афзоиш додани филиалу марказҳои хизматрасонии ташкилотҳои қарзӣ дар шаҳру ноҳияҳои дурдасти мамлакат чораҳои иловагӣ андешида, оид ба саривақт ва бечунучаро иҷро намудани Фармони Президенти Ҷумҳурии Тоҷикистон аз 22 июни соли 2023, №586 “Дар бораи тадбирҳои вусъат додани ҳисоббаробаркунии ғайринақдӣ” тамоми татбирҳоро роҳандозӣ намоянд.
Инчунин, вобаста ба татбиқи фармони мазкур корҳои тавзеҳотию фаҳмондадиҳиро бо истифода аз тамоми воситаҳои ахбори омма, аз ҷумла шабакаҳои иҷтимоӣ мунтазам амалӣ созанд ва ҷиҳати татбиқи самараноки сиёсати пулию қарзӣ, идомаи ислоҳот баҳри гузариш ба реҷаи “ҳадафгирии таваррум” ва коҳиш додани фишорҳои қурбӣ дар доираи имкониятҳои худ чораҷӯйи намоянд.
Дар идомаи суханронӣ Неъматулло Ҳикматуллозодаба тамоми кормандони низоми бонкии кишвар барору комёбиҳо орзу намуда, изҳори умед намуд, ки тавассути фаъолияти самарабахши бонкдорон он вазифаҳое, ки дар назди низом дар нимсолаи дуввуми соли 2023 гузошта шудаанд, саривақт ва пурра таъмин мегарданд.
Дар ҷараёни ҷаласаи васеъ оид ба натиҷаҳои фаъолияти низоми бонкӣ дар нимсолаи якуми соли ҷорӣ ва вазифаҳо барои нимсолаи дуюми соли 2023 раиси Бонки миллии Тоҷикистон Ҳоким Холиқзода аз ташкилотҳои қарзии молиявии кишвар даъват ба амал овард, ки ҷиҳати иҷрои Фармони Президенти Ҷумҳурии Тоҷикистон “Дар бораи тадбирҳои вусъат додани ҳисоббаробаркунии ғайринақдӣ”, аз 22 июни соли 2023, №586, ки барои таъмини шаффофияти амалиётҳои молиявӣ, ғанӣ гардонидани буҷети давлатӣ, пешгирии омилҳои коррупсионӣ, коҳиш додани амалиётҳои нақдӣ ва кам намудани таъсири омилҳои инсонӣ заминаи мустаҳкам мегузорад, тадбирҳои зарурӣ андешида, корҳои тавзеҳотию фаҳмондадиҳиро дар байни аҳолӣ барои қабули пардохтҳои ғайринақдии хизматрасониҳои давлатӣ тақвият дода, инфрасохтори пардохти ғайринақдӣ дар тамоми манотиқи ҷумҳурӣ, хусусан дар ноҳияҳои дурдаст бо роҳи афзудани шумораи воситаҳои электронии пардохтӣ, васеъ намудани шабакаи POS-терминалҳо, QR-рамзҳо, зиёд кардани теъдоди истифодабарандагони зами-мабарномаҳои мобилӣ, ҷалби агентҳои бонкии пардохтӣ ва ғайра тавсеа бахшанд.
Ҳамзамон, КВД БА ҶТ “Амонатбонк” муваззаф карда шуд, ки ҳамкорӣ ва ҳамгироии мутақобиларо бо ташкилотҳои қарзии молиявӣ барои қабули пардохтҳои ғайринақдии ҳама намудҳои хизматрасониҳои давлатӣ таъмин намояд.
Дар интиҳои ҳамоиш раиси Бонки миллии Тоҷикистон Ҳоким Холиқзода миннатдории самимонаи кормандони низоми бонкии мамлакатро ба Ҳукумати Ҷумҳурии Тоҷикистон барои дастгирии доимии низоми бонкӣ ҷиҳати рушди бемайлони иқтисодиёти кишвари маҳбубамон изҳор намуда, иброз дошт, ки моро зарур аст, соли ҷориро бо дастовардҳои арзанда ҷамъбаст намуда, дар таъмини рушди устувори иқтисоди миллиамон саҳми босазо гузорем.
Шуъбаи матбуоти
БМТ
