Даъвии сӯхтагӣ пеши ман, эй лола, макун,

Мешиносад  дили ман, бӯйи дили сӯхтаро!!!

Чун дар анҷоми солҳои кӯҳани қаблӣ, СССР муваззаф аст, пеши хонандаи худ, дӯстон, мухлисин ва аъзои Ихвон ал СССР, дар арафаи Соли Нав ҳисобот диҳад, ки дар соли 2019 мо бо чӣ коре банд будем. Зеро мо мардумием ва ҳатман аз кори кардаи хеш ба мардум ҳисобот медиҳем. Амале, ки дар ягон газетаи, на танҳо ватанӣ, ки дар ақсои олам, дучор нахоҳед гашт. Мо Метавонем!

Омодаӣ, хонанда? Пас, рррааафффтттееемммм….

Шуморае, ки дар дастдорӣ, №589 аст. Яъне, дар тӯли ин 12 соли боҳамӣ, танҳо сардабир ҳудуди 600 сармақола навиштааст, ки мавзуъҳои бикр ва обношустаро фароҳам дар мегирифтанд. Дар поин аз арифметикаи оддӣ кор мегирем. 

2356 нафар меҳмони мо гаштаву дар бораи мушкилоти рӯзмарра сӯҳбат кардаанд:

Х=589х4

Х=2356

Ва агар дар ҳар шумора 7-8 хонанда занг задаву ибрози назар карда бошанд, пас мо теле-матлабҳои 4417,5 нафарро нашр кардаем:

Х=589х7,5

Х=4417,5

Дар ҳар шумора ҳудуди 30 СМС-паёмак ба мо мерасид, ки мо аз ин теъдод беҳтаринҳо, то 15 тояшро чоп мекардем, ки мешавад  8835 пайки мардумӣ:

Х=589х15

Х=8835

Дар рубрикаи 7 рӯз дар таърих, ба таври ҳамешагӣ то 17-20 рӯйдоди таърихӣ чоп мешуд, ки ҳудудан 10.602 санадро фароҳам меорад:

Х=589х18

Х=10602

(Акнун офарини майнаи Меҳрубон Салимшоев намегӯед?!)

Рӯиҳамрафта Меҳрубоншоҳ дар тӯли ин маҳдуда ҳудуди 600 матлаби таърихӣ нигоштаасту устод Умари Шерхон моро бо 400 қаҳрамони ҶБВ дар ҷабҳа ва ақибгоҳ шинос кардан дорад: ва ин ҳама дар саҳ-4.

Рубрикаи Носталжи бошад беш аз 1178 аксу тоблуи таърихи муосир ва даврони советиро ба мо муаррифӣ кардааст, ки ҳалоли Идибек бод!

Х=589х2

Х=1178

Гӯшаи АНИҚ…дот бошад 400 бор нашр шудаву латоифи воқеиро дар бораи кору пайкори журналистон, адибон, фарҳангиён ашхоси номдори кишвар ба табъ расонид.

Дар пурбаҳстарин саҳифа- «СССР: Мо ва баҳси мо» тӯли 12 сол хонандагон бо ҳам баҳсҳои созанда карда, беш аз 1800 матлаб роҷеъ ба чараёни босмачизм ва таърихи муқовимат навиштаанд. Бархе мегӯянд, мавзуъ қатъ гардад, вале ба пиндори мо мавзуъ ҳанӯз бикр асту баҳогузории сиёсӣ ва дипломатӣ нашудааст ва ба масале «таба-тобеъин», яъне онҳое, ки агар шоҳиди бевосита ҳам набошанд, солдидаву аз забони падарону модарон-шоҳидони солҳои 1920-30, таърихи моҷароро шунидаанд, дар ин бора менависанд, ки фардо чанд кори докоториву номзадӣ хоҳад шуд. Яъне, баҳсро давом медиҳем. Нависед. Мо нашр мекунем. Мо Метавонем!

Яке аз муҳимтарин саҳифаи мо, албатта, Газетаи Мардумист,  ки дар худ ҳудуди 100 Хабарнигори Мардумӣ ва даҳҳо тани дигар фаолони ҷамъиятӣ ва аъзои Ихвон ал СССРро гирд овардааст. Ин саҳифа дар тӯли ин маҳдуда на кам-на ғам, 4123 мақола роҷеъ ба мушкилоти мардум дар соҳоти мухталиф нашр кард. Мо Метавонем!

Х=589х7

Х=4123

Дар Газетаи Раисон моҳе 1 бор, ҳудуди 7-8 вазиру раису кабиру сағир ба мо посух навиштанд, ки хонанда худ шоҳид аст. Рубрикаҳои вежаи Ҷамилабону Ҳусейнова, ки пору пайкор, созандагиву халтураҳои раисони шаҳру навоҳиро дар бар мегирифт, ҳар ҳафта то 6-7 матлаб нашр мекард. Рубрикаҳое, ки наванд, омори расмӣ намеорем. Вале дар тӯли ин 589 шумора кормандони ҳафтанома, муаллифони доимӣ ва хабарнигорони мардумии СССР, дар ҳар шумора тақрибан 73 матлаб,  дар ҷамъ 42997 (!!!) макола, хабар, гузориш, репортаж, очерки таърихӣ, лавҳа, шарж, шеър, ҳаҷвия… чоп кардаанд, ки ҳалоли якояки мо бод!

Х=73х589

Х=42997…

Вале ин ҳама охири кор нест. Мо фикр дорем, ки ҳанӯзам проблеми обношуста, мушкили ҳалталаб дар ҷамъият хеле зиёд аст ва ману ту-хонандаи ин сутур дар Соли Муш-2020 барои ҳаллу фасли он камари ҳиммат мебандем. Мо Метавонем!

Сутун бар боми миллат қомати мост,

Ва медонӣ чаро? Мо Метавонем!

(Чмо интеллигент нест ва интеллигент чмо буда наметавонад!!!)

10 рӯз дам гирифтам. Дар осоишгоҳи Хоҷа Оби Гарм, ки воқеан ҳам бо кӯшишу талоши Давлат Самизода-раиси ин коргоҳ, 1 осоишгоҳи сатҳи байнулмилалӣ шудааст. Тамомии табибон бо пешхидматону кормандонаш зиёд муомилаи хушу сара доранд, ки боиси афзоиши роҳату фароғату табобату фараҳ аст. Ва аммо сӯҳбат сари ин Осоишгоҳ нест. Ман дар ин ҷо камтар кор мекардаму бештари авқотамро харҷи мутолиа, сарфи филм, тамошои телевизионҳои чандин кишвар, бо шумули Ӯзбакистону Русияву Тоҷикистон намуда, ахиран умқан газетаву журналу саҳафоти интернетро варақ задаву ба хулосае омадам, ки ба Тоҷикон нависам, ки чмо (человек морально об…тёсанный-яъне одаме, ки маънан худбохтааст: дар Армия пасттарин солдат!) ҳич вақт зиёӣ нест. Интеллигент нафарест, ки синаро барои Шараф сипар мекард ва хунашро мерехту обрӯяшро на:

Хуни худро гар бирезӣ бар замин,

Беҳ, ки оби рӯй резӣ бар канор!

Ин шиори интеллигентҳои Тоҷик буд! Зиёӣ ҳодии ҷамъяит аст ва интеллигенти Тоҷик ана ҳамон Рустаму Суҳробҳо буданду Гурдофариду Манижаҳо. Зиёии Тоҷик дар ҷанг дар сафи аввал меистод! Мани худро дошт. Шахсият буд. Инсон буд. Гапро дар рӯи одам мезад. Ҷавонмард буд!!!

Мутаассуф, бо болғаи идеологии шӯравии а ля русӣ бар сари миллати мо чунон куфтаанд, ки то ин рӯз мо дар бораи интеллигентсияи то инқилоби октябрии худ ҳеҷ иттилоъе надорем. Ҳамаро бо 1 ҷорӯб-босмачӣ руфта партофтанд. Ҳаргиз тарафдори босмачӣ набудаму нестам, аз рангу рӯшон безорам. Вале магар он чанд лақайу туғайу турку муғули дузд табори ману ту буданд хонанда? Инҳо билкулл босмачӣ буданд, дузду роҳзан буданд. Вале магар бидуни инҳо Тоҷик ҷадд, авлод, табор, зод ва зот надошт? Дошт! Ва аммо куҷо шуданд онҳо? Аз архивҳои тошкандиву маскавӣ бояд ҷуст. Аҳмади Донишу Шоҳину Ҳайрату Туғрал чун зиёӣ дар хотири мо мондаанд ва он ҳам бо…шеъру шоҳасарҳои назмиву насрӣ. Аз ин ҷост, ки фикр дорем, шоиру нависанда интеллигент асту бас! Ҳаргиз! Зиёӣ танҳо аҳли эҷод нест. Рустами Дастон магар шеър менавишт ва ё шамшер мезад? Ва агар Шоҳномаро умқан бихоне(д)м, дарк месозем, ки Рустам интеллигенти пеши пеш буд. Шамшер низ дастгоҳи зиёист! Зиё танҳо дар насиҳату панд ва шеъру румону повесту ҳикоят нест. Магар мешавад дасти тааррузи душманро танҳо бо насиҳат баст? Корду камону дору расан лозим аст барои ҳифзи Шарафи Ватан ва ин корро бояд интеллигент кунад!

Зимнан ителлигенти мо бояд Рустамвор зиндагонӣ кунад… Нафаре сақат гуфт, интеллигент нест! Муштзӯрӣ кард (дар ҳолати ҳифзи шараф) зиёӣ нест!! Сарватманд бошад-ку…эҳаааа тамоман аз марзи интеллигенсия каноратарак аст. Яъне интеллигент тарсу, беқувват ва камбағал бояд буда бошад? Магар Айниву Лоҳутӣ камбағал буданд? Дуртарак равам? Тазкираҳо мегӯянд, бори маъишати Рӯдакиро (мисле, ки ҳозир Варзоб истироҳат меравем) садҳо шутур мекашид! Фирдавсӣ 60 ҳазор тангаи ғайритилоии Султон Маҳмудро дар 1 ҳаммом партофта рафт (он тангаҳо пули андаке набуданд, ба масале ӯ 60000 евро мехосту ба ӯ 60000 доллар доданд!). Ҷомӣ, ки аз ӯ мо танҳо 1 хислат-шикастанафсӣ омӯхтан дорем, сарвате дошт, ки Алишери Навоӣ-садри аъзами Ҳирот надошт! Яъне камбағал интеллигент нест, зеро зиёии бепулу хонаву дар ҳич гоҳ Ватанашро Рустамвор ҳифз нахоҳад кард…

Воқеан ҳам, шукри Худо ва истиқлолият, ки имрӯз шоирону муаллимони макотиби олии мо хелееее сарватманданд, ҳарчанд пинҳон медоранд. Ҷои пинҳон кардан нест. Бояд муаллим бой бошад, то мактаббачча сӯи дониш дилгарм гардад…

Интеллигентҳои рус (аз моро ҳазф карда, аз худашонро таблиғ мекарданду мо рӯзгорашонро медонем), мисли Пушкин, Грибоедов, Лермонтов барои Шараф дар дуэл кушта шудаанд. Магар инҳо графзода, дворянин, яъне душман набуданд? О, инқилоби октябр бар ҳаминҳо пирӯз шуда буд-ку?! Ин ҳушдор ба дастгоҳи идеологии мост, ки соате расида, мо низ зиндагиномаи табори бузургу интеллигенти худро бознигарӣ кунем.

Интеллигенти фаронсаву англису испанӣ…агар беш аз 35-40 сол умр медид, мавриди танзу ханда қарор мегирифт, ки чаро дар дуэл барои шараф ва ё ҷанг зидди душманони ватанаш фавт наёфта, ба ин синну соли бузург расидаанд.

Яъне чӣ? Яъне интеллигент онест, ки аз Шарафи худ, Шарафи Миллати худ, Шарафи Ватани худ, Шарафи дӯстдоштаи худ, Шарафи зани худ, Шарафи марзу буми худ бо хун ҳифз мекунад ва ҳаргиз тарсӯ нест!

Ин фикри шахсии ман аст, ки метавонад бо андешаи аксарият муғаййир бошад. вале ҳар касе маро аз наздик мешносад, медонад, ки ин иддаоям сухани холӣ нест. Ман, масалан чунинам!

Зи ғайрат гар яке мардонагӣ кард,

Ту гӯӣ ҷоҳиле девонагӣ кард?

Магӯ ҷоҳил, ки ҷои ҳайрат аст ин,

Ки беҳ аз оқили бе ғайрат аст ин!

Ин, аллакай, моли Ҳилолист. Нафаре, ки барои Шараф кушта шуда буд. Классика!...