ХАБАРИ ДОҒ
Панҷшанбе, Дек 26 2019

    Дар натиҷаи тадбирҳои андешидашуда дар 7 соли охир ҳаҷми истеҳсоли маҳсулоти саноатӣ қариб 3 баробар (аз 10 миллиард сомонӣ ба 27,5 миллиард сомонӣ) ва ҳиссаи соҳа дар маҷмӯи маҳсулоти дохилии кишвар 5,1 банди фоизӣ (аз 12,6 ба 17,7 фоиз) зиёд гардидааст. Вале нишондиҳандаҳои соҳа ҷиҳати иҷрои босифати барномаҳои қабулгардида ҳанӯз нокифоя буда, корҳо дар самти баланд бардоштани рақобатнокии маҳсулоти истеҳсоли ватанӣ, татбиқи сиёсати мусоидат ба содирот ва воридотивазкунӣ қонеъкунанда нестанд. Дар ин бора Президенти ҶТ Эмомалӣ Раҳмон дар Паёми худ, ки имрӯз ба Парлумони кишвар ироа гашт, таъкид намуд.

   Сарвари давлат ба роҳбарони вазоратҳои саноат ва технологияҳои нав, рушди иқтисод ва савдо, кишоварзӣ, корҳои хориҷӣ, Кумитаи давлатии сармоягузорӣ ва идораи амволи давлатӣ, Кумитаи рушди маҳал ва Агентии содирот бояд якҷо бо роҳбарони вилоятҳо ва шаҳру ноҳияҳо доир ба интихоби минтақаҳо тибқи занҷираи “ашёи хом-истеҳсоли маҳсулоти ниҳоӣ-дарёфти бозори фурӯш” тадбирҳои зарурӣ андешанд.

 

Чоршанбе, Дек 25 2019

   Бонки миллии Тоҷикистон ба таваҷҷуҳи шаҳрвандон мерасонад, ки низоми пардохтии “Вестерн Юнион” бо иҷрои талаботҳои қонунгузории ҶТба Маркази миллии протсессингии интиқоли маблағҳо пайваст шуда, фаъолияти худро дар Ҷумҳурии Тоҷикистон барқарор намуд.

   Тавре аз маркази матбуоти БМТ хабар доданд, ҳамакнун шаҳрвандони кишвар имконият пайдо карданд, ки аз 23.12.2019 маблағҳои аз хориҷи кишвар ба Ҷумҳурии Тоҷикистон интиқолшударо аз ташкилотҳои қарзии кишвар дастрас намоянд.

   Сараввал низоми мазкур фаъолияташро бо ҶСП “Бонки Арванд” оғоз намуда, сипас марҳила ба марҳила дар давоми 1 ҳафта ҳамаи ташкилотҳои қарзие, ки бо низоми мазкур ҳамкорӣ доштанд, ба ин низом пайваст мешаванд.

 

Чоршанбе, Дек 25 2019

 

   17 декабр Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси шаҳри Душанбе муҳтарам Рустами Эмомалӣ дар хиёбони Рӯдакии пойтахт бинои нави Бонки давлатии амонатгузории Тоҷикистон «Амонатбонк»-ро мавриди баҳрабардорӣ қарор доданд. Сарвари давлат бо шароити корӣ ва имкониятҳои иншооти нав аз наздик шинос шуда, бо кормандони он суҳбати самимӣ анҷом доданд. 

   Тавре иттилоъ дода шуд, бинои нави “Амонатбонк” бо дарназардошти талаботи муосир бунёд ёфта, дар ҳудуди он шароити замонавии кор ва хизматрасонӣ фароҳам оварда шудааст. Аз ҷумла, дар дохили бино 121 утоқи корӣ ҷойгир буда, барои 500 нафар корманди дастгоҳи марказӣ ва дигар шуъбаҳои хизматрасонии бонк пешбинӣ гардидааст. Дар ошёнаи аввали бино Маркази хизматрасонии мизоҷон ва Департаменти пардохти нафақаву кортҳои пластикӣ ҷойгир шудааст. Бояд тазаккур дод, ки дар баробари ифтитоҳи бино, ҳамчунин Бонки давлатии амонатгузории Тоҷикистон «Амонатбонк» ба тозагӣ дастгоҳи чоп ва омодасозии кортҳои пластикиро дастрас кард, ки ин имконият медиҳад минбаъд дар ҳамин ҷо кортҳои пластикӣ омодаву дастраси мизоҷон карда шавад.

   Зимни боздид ба Сарвари давлат муҳтарам Эмомалӣ Раҳмон иттилоъ доданд, ки утоқҳои кории кормандон пурра бо дастгоҳу таҷҳизоти зарурии соҳавӣ муҷаҳҳаз мебошад. Дохили иншоот ва утоқҳои корӣ бо дарназардошти талаботи замони муосиру меъёрҳои байналмилалии бонкдорӣ бунёд ёфта, ҳамчунин бино аз толору маҷлисгоҳ ва утоқҳои мулоқоту қабули меҳмонон иборат мебошад. Аз ҷумла, бинои навбунёд дорои толор барои нишастҳои матбуотӣ ва толори хурди маҷлисӣ буда, барои гузаронидани ҳамоишу чорабиниҳо як толори дигар низ бо 200 ҷойи нишаст бунёд ёфтааст. Ҳамзамон бо дарназардошти талабот 4 утоқи машваратӣ низ сохта шудаанд, ки бо дастгоҳҳои зарурӣ ва айёнияти корӣ таъмин мебошанд. Ҷиҳати таъмини бехатарӣ бонк бо 300 адад камераи муосири назоратӣ таъмин буда, ҷараёни фаъолият ва омаду рафт ба таври қатъӣ зери назорат қарор дорад ва дар маҷмӯъ 9 ҳуҷраи техникӣ дар дохили иншооти тозабунёд ташкил гардидааст.

   Аснои шиносоӣ Пешвои муаззами миллат муҳтарам Эмомалӣ Раҳмон ҳамчунин аз Осорхонаи бонк, ки дар ошёнаи 10-ум бунёд ёфтааст, дидан намуданд. Дар ин ҷо дастоварду натиҷаҳои кории “Амонатбонк”, ки таърихи бештар аз 130-сола дорад, маҳфуз дошта мешаванд. Осорхона бо усули муосири меъморӣ бунёд ёфта, ҳамчунин барои гузаронидани конфронсҳои хурд дар ин ҷо имконият фароҳам аст. Дар ҳамин ҷо Сарвари давлат дар китоби меҳмонони олиқадри Осорхона соядаст гузоштанд.

   Зимни шиносоӣ иброз гардид, ки дар ду ошёнаи зеризаминии бино таваққуфгоҳ барои нақлиёти хизматӣ, анбор ва таҳвилхона бунёд ёфтааст. Дар маҷмӯъ бинои нав аз 10 ошёна ва 2 ошёнаи зеризаминӣ иборат буда, намои берунаи он бо санъати баланди меъморӣ ва унсурҳои муосири шаҳрсозӣ бунёд ёфтааст. Атрофи иншоот ва роҳравҳои он бо гулу буттаҳои ороишӣ ва дарахтони сояафкан зебу оро ёфта, ин иншоот ба зебоии хиёбони Рӯдакӣ ҳусни дигар зам менамояд.

Дар толори бинои нав Сарвари давлат муҳтарам Эмомалӣ Раҳмон бо кормандони бонк мулоқоти самимӣ анҷом дода, ифтитоҳи иншоотро ба онҳо таҳният гуфтанд.    Таъкид гардид, ки “Амонатбонк” дар низоми бонкдории мамлакат нақши калидӣ бозида, бо дастгирии Ҳукумати Ҷумҳурии Тоҷикистон барои беҳтар намудани шарту шароити кории он тадбирҳои зарурӣ амалӣ карда мешавад. Аз ҷумла, ба сифати корҳои сохтмонӣ дар ин иншоот Сарвари давлат баҳои баланд дода, кормандонро вазифадор намуданд, ки ин имкониятҳоро баҳри боз ҳам баланд бардоштани сатҳу сифати хизматрасонӣ истифода баранд.

 

Навгонӣ дар самти интиқоли маблағҳо - тариқи низоми пардохтии “ЮНИСТРИМ” ва “CONTACT”

   БДА ҶТ «Амонатбонк» аз санаи 3.12.2019 амалиёти интиқоли маблағҳоро танҳо тавассути Маркази миллии протсессингии интиқоли маблағҳои Бонки миллии Тоҷикистон ба роҳ мондааст.

    БДА ҶТ «Амонатбонк» дар баробари дигар ташкилотҳои қарзӣ интиқоли маблағҳоро тариқи Маркази миллии протсессингӣ анҷом дода истодааст.

Бо назардошти омилҳои мусбати ин марказ Бонки давлатии амонатгузории Ҷумҳурии Тоҷикистон “Амонатбонк” дар амалигардонии интиқолҳои пулӣ тадбирҳои заруриро роҳандозӣ намудааст. Аз ҷумла дар тамому шаҳру ноҳияҳои мамлакат филиал ва марказҳои хизматрасонии "Амонатбонк" интиқоли маблағҳоро саривақт анҷом дода, аз ҷониби мутахассисон корҳои фаҳмондадиҳӣ ва омӯзишӣ низ ба роҳ монда шудааст.

    Маркази мазкур имконияти навро баҳри рушди бозори интиқолҳои пулӣ таъмин намуда, барои баланд бардоштани эътимоди аҳолӣ ба низоми бонкӣ мусоидат мекунад, сифати хизматрасониро барои интиқолгирандагон беҳтар намуда, имкони назоратро дар заминаи ҳуқуқӣ дар сатҳи давлатӣ ва таъминнокии молиявии ҳар як амалиёти фаромарзии интиқоли маблағҳо таъмин менамояд. 

Имрӯзҳо дар тамоми филиал ва марказҳои хизматрасонии “Амонатбонк” зимни интиқоли маблағҳо, ки тариқи низомҳои пардохтии “ЮНИСТРИМ” ва “CONTACT” амалӣ мешаванд, мушкилот вуҷуд надорад ва сатҳи хизматрасонӣ низ ба мизоҷон хуб роҳ монда шудааст.   

   Маълумоти бештар тариқи телефони: +992 44 600 00 34 ё рақами кӯтоҳи 1885.

 

 

Панҷшанбе, Дек 12 2019

    Мэрилин Йосефсон, сафири Иттиҳоди Аврупо дар ҶТ ва Андреас Шнайдер, раҳбари намояндагии KfW дар кишвари мо Созишнома оид ба саҳмгузорӣ дар бунёди НБО-и хурди Себзор дар н.Роштқалъаи ВМКБ ба имзо расониданд. Тибқи ин Созишнома барои сохтмони ин НБО-и хурд иловатан боз 20 миллион Евро ҷудо карда мешавад.

    Чуноне ки ба мухбири мо дар Намояндагии ИА дар ҶТ хабар доданд, ҳамакнун маблағи умумии бунёди ин лоиҳа 37 миллион Евроро ташкил намуда, пас аз ба истифода додани ин НБО на танҳо н.Роштқалъа ва тамоми шаҳру ноҳияҳои ВМКБ бо барқи тоза пурра таъмин мегарданд, балки таъмини 1 қисмати аҳолии вилояти Бадахшони Афғонистон низ имконпазир хоҳад шуд. НБО-и хурд дар дарёи Шохдара бо имконияти истеҳсоли 74,5 миллион кВт/соат нерӯи барқ бунёд шуда, масъулияти амалиёбии ин лоиҳа бар дӯши ширкати «Помир Энержи» гузошта шудааст.

 

 

Ҷумъа, Дек 06 2019

    Низоми пардохтии байналмилалии “Юнистрим” ҳаққи хизматрасонӣ барои интиқоли маблағҳоро барои Ҷумҳурии Тоҷикистон аз санаи 6.12.2019 то ба 0,99 фоиз коҳиш дод. Лозим ба ёдоварист, ки то ба фаъолият оғоз намудани Маркази миллии протсессингии интиқоли маблағҳо ҳаққи хизматрасонии “Юнистрим” ба ҳисоби миёна ба Тоҷикистон 1,5 фоизро ташкил медод. Тавре шуъбаи матбуоти Бонки Миллии Тоҷикистон хабар медиҳад, дар ин бора рӯзи 5.12.2019 зимни мулоқоти муовини якуми раиси БМТ Ҷамолиддин Нуралиев бо Президенти низоми пардохтии байналмилалии интиқоли маблағҳо “Юнистрим” Кирилл Палчун хабар дода шуд.

    Гуфта мешавад, ки тибқи пешниҳоди Ҷамолиддин Нуралиев ва мувофиқ омадани Президенти низоми пардохтии байналмилалии “Юнистрим” Кирилл Палчун, минбаъд ҳаққи хизматрасонӣ барои интиқоли маблағи то 5 ҳазор рубли русӣ, ки қаблан 100 рубли русиро ташкил медод, 50% тахфиф шуда, 50 рубли русиро ташкил хоҳад дод, ки ин имтиёз дар шабакаи нуқтаҳои хизматрасонии “Юнистрим” имконпазир аст. 

     Низоми пардохтии байналмилалии “Юнистрим” шабакаи васеи хизматрасониро барои мизоҷонаш муҳайё карда, дар Федератсияи Русия беш аз 15 000 нуқтаҳои интиқоли маблағ (МТС-4300; Теле2-2150; ПочтаБанк (Почта России)-4600 ва ғайраҳо) дорад. 

 

 

 

Панҷшанбе, Дек 05 2019

    

     Бонки миллии Тоҷикистон аз ташкилотҳои қарзӣ ва шаҳрвандони ҷумҳурӣ хоҳиш менамояд, ки ба муштариён ва наздикони худ дар давлатҳои хориҷа расонанд, ки дар рӯзҳои наздик ҳангоми интиқоли маблағҳо аз хориҷа ба Ҷумҳурии Тоҷикистон аз хизматрасонии низомҳои пардохтии “Юнистрим” ва “Контакт” истифода баранд. Коди “Юнистрим” 12 рақама ва коди “Контакт” 9 рақама буда, ин низомҳо дар тамоми гушаву канори Федератсияи Русия филиал ва намояндагиҳои худро доранд.

    Мизоҷон инчунин метавонанд, маблағҳои худро тариқи аз 1 корт ба корти дигар гузаронидан, яъне аз корти бонкҳои Русия ба корти бонкҳои Тоҷикистон, аз ҷумла ҶСП “Аввалин бонки молиявии хурд”, ҶСК “Комерсбонк Тоҷикистон”, ҶДММ ТАҚХ “Душанбе Сити”, ҶСП “Спитамент Бонк”, ҶСК “Ориёнбонк” ва ҶСП “Халиқ Бонк Тоҷикистон” дастрас намоянд. Интиқоли маблағҳо тавассути операторони низомҳои пардохтие, ки ба Маркази миллии протсессингии интиқоли маблағҳо пайваст нашудаанд, амалӣ карда намешавад. Минбаъд аз ҷониби ташкилотҳои қарзӣ кодҳои 9 рақамаи низоми пардохтии “Золотая Корона” мавриди баррасӣ қарор дода намешаванд. 

    Бояд гуфт, ки шурӯъ аз 3.12.2019 тамоми интиқоли маблағҳо бе кушодани суратҳисобҳои бонкӣ тавассути низомҳои пардохтие, ки ба Маркази миллии протсессингии интиқоли маблағҳо пайваст гардидаанд, амалӣ мешаванд. Айни замон низомҳои пардохтии “Юнистрим” ва “Контакт” ба Маркази миллии протсессингии интиқоли маблағҳо пурра пайваст шудаанд. Аз 3 декабри соли равон шаҳрвандон метавонанд тавассутии ин низомҳо бе мамониат интиқоли маблағҳоро анҷом диҳанд.

    Инчунин низоми пардохтии “Вестерн Юнион” пайвастшавиро ба Маркази миллии протсессингии интиқоли маблағҳо босуръат идома дода, рӯзҳои наздик тавассути низоми мазкур низ интиқоли маблағҳо имконпазир мегардад.

     Муштариёне, ки маблағҳоро тавассути низомҳои пардохтии “Золотая Корона”, “Близко” ва “MoneyGram” интиқол дода, ин мабалғҳоро то  3 декабри соли 2019 дастрас накардаанд, метавонанд маблағҳои худро аз ин низомҳо бозпас гирифта, тавассути низомҳои “Юнистрим” ва “Контакт”, инчунин суратҳисобҳои бонкӣ интиқол диҳанд.

     Бояд зикр намуд, ки низоми пардохтии “Золотая Корона”, ки ҳаҷми зиёди маблағҳо тавассути он интиқол мегардид, ба Маркази миллии протсессингии интиқоли маблағҳо пайваст нашудааст ва иҷрои талаботи қонунгузории Ҷумҳурии Тоҷикистонро таъмин накардааст. Аз ин лиҳоз интиқоли маблағҳо тавассути низоми мазкур ғайриимкон мебошад.

     Дар сурати аз ҷониби дигар низомҳои пардохтӣ иҷро гардидани талаботи қонунгузории Ҷумҳурии Тоҷикистон ва пайваст гардидани онҳо ба Маркази миллии протсессингии интиқоли маблағҳо фаъолияти онҳо дар ҷумҳурӣ барқарор мегардад.

    Тавре шуъбаи матбуоти БМТ хабар медиҳад, мақсади асосии таъсиси Маркази миллии протсессингӣ аз баланд бардоштани самаранокии фаъолияти низоми интиқоли маблағҳо, таъмин намудани шаффофияти амалиёт ва коҳиш додани хавфҳои транзаксионӣ бо мақсади таъмин намудани устувории низоми бонкию молиявӣ дар мамлакат ва ба амал овардани заминаи мусоид барои амалиёти бехавф иборат мебошад.

 

саҳ 31 аз 70

Китобҳо

Flag Counter