ХАБАРИ ДОҒ
Чоршанбе, Окт 16 2019

(Номаи доди 1 мухлис)

Боби 1. Истаравшан-Истиқлол

Давраи 11 ва 12-и чемпионати Лигаи Олии ҶТ ҷамъбаст шуд. Дар давраи 11-уми Чемпионат дастаи «Истаравшан» бо чемпиони чандкаратаи Тоҷикистон дастаи «Истиқлол» вохӯрд. Бозӣ тамошобобу диданӣ буд. Меҳмонҳо бозиро бо ҳисоби 1:0 бурд карданд. Аз маҳорати бозингарони ҳар 2 даста мухлисон қонеъ буданд. Зеро «Истиқлол» яке аз тимҳои барӯманду номдори Тоҷикистон ва ҳомии мо дар бозиҳои байналхалқист. Ҳама дастаи яккачинро мухлисӣ мекунем. Ин даста шарафи моро ҳимоя мекунад. Аммо мехоҳад, ё на, дар бозии ЛО ҳар шахс тими дӯстоштаи худро дорад. Гап сари ин, ки дар бозии байни ин 2 даста доварон 6 корти зардро танҳо ба бозингарони «Истаравшан» нишон доданд. Инро чӣ хел фаҳмидан мумкин?! Доварон бозингарони «Истиқлол»-ро танҳо шифоҳӣ меогоҳониданд. Ба хаёлам меҳмонҳо имтиёз доштанд. Магар ҳар 2 даста аз Тоҷикистон ва лагандбардории доварон бар зиёни пешравии бозии «Истиқлол» нест?

 

Боби 2. Истаравшан-Хатлон

Дар давраи 12-уми чемпионат «Истаравшан» тими овозадори «Хатлон»-ро қабул намуд. То бозӣ байни мухлисон миш-мишҳо буд, ки гӯё дар даври якуми дидор байни «Хатлон»-у «Истаравшан», дар 1 лаҳзаи бозӣ Шаҳром Исмоилов дарвозабони «Хатлон» нисбати бозингари «Истаравшан» беҳурматӣ зоҳир карда, бо мушт задааст. Ин лаҳзаро аз ТВ борҳо намоиш доданд. Ин ҷо бояд тан дод, ки дар қисми аввали бозӣ афзалият пурра ба тарафи меҳмонҳо буд. Дар қисми дуюм соҳибони майдон ба худ омада, ҳисобро 2:2 карданд. Аммо афсӯс, довари канорӣ голи дуюми истаравшаниҳоро ба инобат нагирифт. Гӯё сардори даста Илҳом Баротов дар ҳолати нобозӣ қарор дошт. Ин рафтори ноҷояи довари канорӣ мухлисонро ба шӯр овард. Дар ин лаҳзаи ҳассос довари асосӣ марказро нишон дод. Назди довари канорӣ мураббии «Хатлон» меистод. Бо фишори довари канорӣ байрақча бардошта шуд. Баъди ин довари асосӣ қарори аввали худро дигар кард. Он лаҳза гӯиё ба ҷароҳати мухлисон намак пошида бошанд, судяро гапҳои пасту баланд гуфтанд. 

 

Боби 3. Чаро Истаравшанро дӯст намедоранд?

Доварони бе виҷдон намеандешад, ки бо ин рафтори ноҷо 2 тимро бо ҳам зид мекунанд. Дар охир комиссия қарор бароварда, довари канориро аз 4 бозӣ дур кард. Довари асосӣ чӣ? Ҳисоби бозӣ чӣ? Зарари маънавии мухлисонро кӣ ҷуброн мекунад? Аз доварон инсоф металабем. Аз кормандони ҳафтаномаи СССР хоҳишу илтиҷо дорам, ки ҳамчун мухлиси 69-сола ин матлаби маро ба самъи доварон расонанд. Истаравшаниҳо ба ивази ягон чиз виҷдонро нафурӯхтаанд. Гузаштагони мо барои ҳимояи хоки Ватан то ҷон дар рамақ доштанд, ҷангидаанд.

Бо салом, Набӣ Ҷумъа,

адиб, ш.Истаравшан

Аз СССР: Мо матлаби мухлиси КФ «Истаравшан»-ро нашр кардем ва медонем, ки Истаравшан яке аз дастаҳои сермухлистарин ва дӯстдоштанӣ дар Лигаи Олист. Вале!!! Чаро шумо-мухлисони солдида ба бозингарону фанатҳои ҷавонатон панду насиҳат намедиҳед, ки футбол ҷои латукӯби футболбозони меҳмон нест? 3 бозингари Истаравшан-Баротов, Азизбоев, Азизов бо кадом ақлу фаросат бозингарони меҳмонро хобондаву лату кӯб мекунанду садҳо «мухлис» меҳмононро сангборон??? Магар ин аст одоби мухлисиву варзишкорӣ??? Хафа нашавед, ҳар ҳақиқат 2 паҳлӯ дорад. Ва баъди чунин бенизомӣ фикр доред, ки Истаравшанро дар тамоми Тоҷикистон бояд дӯст доранд? Ҷав корӣ-ҷав даравӣ… Мо Метавонем!

 

Чоршанбе, Окт 09 2019

 

Рақиби Равшани Турсунов

Сайфиддин Шарифов 2.03.1952 дар деҳаи Газаи Қипчоқи н.Муъминобод ба дунё омада, с.1960 ҳамроҳи аҳли оила ба н.Фархор мекӯчанд. Ӯ ба футболбозӣ аз 13-солагӣ шуғл варзида, парвардаи мактаби бачагонаи варзишии ноҳия буда, дар мусобиқаҳои футбол дар минтақаи Кӯлоб иштирок мекард. Ибрач Тӯрабоеви қазоқ, Главик Козлови рус ва Пётр Кими карес, ки он солҳо дар ин мактаб ба сифати мураббӣ фаъолият мекарданд, дар тарбияи Сайфиддин саҳми бориз доштанд. Солҳои 1971-73 ҳангоми дар сафи Қувваҳои Мусаллаҳ, дар шаҳри Владивостоки Русия хизмат кардан симои баҳодуронаву тану ҷуссаи рустамонаи ӯ диққати роҳбарони қисми ҳарбиро ба худ ҷалб месозад ва ӯро ба дастаи футболи «Звезда»-и қисми ҳарбӣ қабул намуданд. Чун таҷрибаи футболбозиро дар «Ҳосилот» омӯхта буд, ба фарқ аз дигар ҳамхизматонаш хеле хуб бозӣ мекард. Баъди адои хизмат ба Донишкадаи тарбияи ҷисмонӣ ҳуҷҷат супорида, солҳои 1971-74 дар ин боргоҳи паҳлавонӣ таҳсил кард. Солҳои 1974-81 дар «Ҳосилот» фаъолияти футболбозии худро идома дода, марҳила ба марҳила маҳорату касбияташ боло ва барои ҳамдастаҳояш намунаи ибрат мегардад. Ҳини суҳбати хоса ӯ ёди ҷавониҳояш карду гуфт: - Аввалин бозиям дар ҳайати «Ҳосилот» с.1974 бо дастаи овозадори «Равшан»-и ш.Кӯлоб буд. Он солҳо дар ин даста бозингарони соҳибтаҷриба ба мисли Валерий Турсунов, Валерий ва Володя Губановҳо бозӣ мекарданд. Гоҳ мо ғалаба мекардему гоҳ «Равшан». «Вахш»-и Қӯрғонтеппа низ ҳарифи пурзӯрамон буд. Ҳини бозӣ варзишгоҳҳои ҳар 2 даста моломоли тамошобин мешуд. 

Ҳарифи Гессу Муродов

Баъди ин 2 даста рақиби азалию пурзӯри «Ҳосилот» «Помир»-и ш.Душанбе буд. Солҳои 1976-77 бо ин даста, ки дар Лигаи якум ва баъдан Лигаи Олии СССР шуҳрати беандоза дошт, вохӯрдем. Он солҳо дар «Помир» беҳтарин бозингарон-Владимир Ғуломҳайдаров, Эдгар Гесс, Абдулло Муродов, Валерий Турсунов, Александр Азимов бозӣ мекарданд. Дар 2 бозие, ки «Ҳосилот» бо ин дастаи шуҳратёр дошт, бо ҳисоби 3:1 ва 4:1 бозиро бохтем. Мо бозингарони «Ҳосилот» ҳамчун узви 1 хонадон ва дар шодию нишоти якдигар шарик будем. Сармураббӣ Абдуғаффор Раҳимов моро мисли фарзандонаш тарбия менамуд ва мо низ ӯро чун падар дӯст медоштем. Ҳамдастаҳоямон Мирвалӣ Акрамов, Шариф Валиев, Мурод Арабов, Сайфулло Сафаралиев, Шариф Саидов, Ҷаҳонгир Абдуллоев, Юсуф Куганов, бародарон Абдулло, Нуралӣ ва Шералӣ Гулоновҳо, бародарон Владимир ва Виктор Скопиновҳо, дугоникҳо Николай ва Михаил Фёдоровҳои машҳур бо лақаби «Колмиш», Владимир Мамедов, Анатолий Холодников, Леонид Ким, Юрий Сталповский, Мӯсо Макоев, Олег Азарин, Александр Маркин, Женя Худжаков буданд.

Баъди хатми фаъолияти футболбозӣ С.Шарифовро дар даста ба вазифаҳои роҳбарикунанда даъват карданд. Даъватро бо хушнудӣ пазируфт. Солҳои 1995-2000 ба ҳайси муовини сардори «Ҳосилот» фаъолият карда, дар тарбияи чандин бозингарон саҳми босазо гузошт. Ӯ чун рамзи садоқат ба «Ҳосилот» ва ба хотири гиромидошти ҳамдастаҳояш, ки иддае аз онҳо дар қайди ҳаёт нестанд, ҳуҷҷат ва шиносномаҳои варзишии ҳамдастаҳояшро то ҳол чун гавҳараки чашм нигоҳ медорад. Шукргузор аз он аст, ки фарзандонаш Қурбоналӣ ва Саймуҳиддин ҷодаи футболро интихоб кардаанд. 

Акбар Абдусамадов,

мухлиси футбол, ш.Душанбе

 

Панҷшанбе, Сен 26 2019

   Дилшод Назаров-варзишгари машҳури тоҷик ва қаҳрамони Бозиҳои олимпии соли 2016 дар Рио-де-Жанейро пас аз шунидани хабар дар бораи ба истифодаи допинг гумонбар шуданаш дар ҳолати шокӣ қарор дошта, таъкид намуд, ки тамоми натиҷаҳои ба даст омадаашро дар натиҷаи муборизаҳои ҳақиқӣ ба даст овардааст.

   Бояд гуфт, ки The Athletics Integrity Unit, ниҳоди мустақили мубориза бо падидаҳои манфӣ дар варзиши сабук, рӯзи 24.09.2019 номи Дилшод Назаровро ба рӯйхати варзишгароне шомил кард, ки дар истифодаи допинг муттаҳам мешаванд.

    Тавре ин созмон менависад, тафтиши дубораи допинг дар мусобиқаи қаҳрамонии ҷаҳон дар соли 2011 дар Кореяи Ҷанубӣ "дар намунаи Дилшод Назаров маводи мамнӯи метаболити туринаболи даҳонӣ-metaboliteof oralturinabol-ро ошкор кардааст."

    Дилшод Назаров дар сӯҳбат бо хабарнигорони тоҷик шоми дирӯз афзуд, ки тамоми саъю талоши хешро барои рафъи ҳамаи гумонҳо нисбаташ равон намуда, 1 вакили машҳури аврупоиро ҳам ҷалб кардааст.

 

Чоршанбе, Сен 25 2019

   Дастаи мунтахаби наврасони зери 16 соли Тоҷикистон шаби гузашта ба Ватан баргашт. Бояд гуфт, ки дастаи мунтахаби наврасони Тоҷикистон (U-16) дар даври ҷамъбастии марҳилаи интихобии қаҳрамонии Осиё-2020 ба тими миллии наврасони Урдун (5: 2) ғолиб омада, дар гурӯҳи “А” ҷой аввалро ишғол кард ва ба қисми ниҳоии мусобиқа роҳ ёфт.

    Дар марҳилаи интихобии мусобиқа, ки аз 14 то 22 сентябр дар давлати Урдун баргузор шуд, дастаи Аҳлиддин Турдиев чаҳор бозӣ гузаронд ва дар ҳама бозиҳо ғалабаҳои калонро ба даст оварда, бо 12 имтиёз дар гурӯҳи худ мақоми якумро ишғол намуд.

    Чуноне ки маркази матбуоти Федератсияи футболи Тоҷикистон хабар медиҳад, ба қисмати ниҳоии чемпионати Осиё байни наврасон, ки аз 16 сентябр то 3 октябри соли 2020 дар Баҳрайн баргузор мешавад, ғолибони ёздаҳ гурӯҳ - Тоҷикистон (гурӯҳи А), Ҳиндустон (гурӯҳи B), Эрон (гурӯҳи C), Арабистони Саудӣ (гурӯҳи "D"), Қатар (гурӯҳи "E"), Аморати Муттаҳидаи Араб (гурӯҳи "F"), Чин (гурӯҳи "G"), Австралия (гурӯҳи "H"), ҶХДК (гурӯҳи "I"), Ҷопон ( Гурӯҳи «J») ва Кореяи Ҷанубӣ (гурӯҳи «К») роҳ ёфтанд.

     Инчунин, ба марҳилаи ниҳоии чемпионати Осиё-2020 чор даста аз байни дастаҳое, ки дар гурӯҳҳои худ бо нишондиҳандаҳои беҳтар ҷойҳои дуввумро гирифтаанд, соҳиби роҳхат шуданд. Инҳо Яман (гурӯҳи "E"), Индонезия (гурӯҳи "G"), Узбакистон (гурӯҳи "B") ва Уммон (гурӯҳи "D") мебошанд. Аз кишварҳое, ки аъзои Ассотсиатсияи футболи Осиёи Марказӣ (CAFA) мебошанд, 3 даста-Тоҷикистон, Эрон ва Ӯзбекистон тавонистанд ба қисми ниҳоии Чемпионати Осиё-2020-ёбанд.

     Бояд қайд кард, ки дар таърихи худ дастаи мунтахаби наврасони Тоҷикистон бори чаҳорум дар марҳилаи ниҳоии чемпионати Осиё иштирок мекунад. Қаблан наврасони мо солҳои 2006, 2010 ва 2018 мусобиқаи мазкур ширкат варзиданд. Дастоварди беҳтарини даста ин медалҳои нуқраест, ки соли 2018 дар Малайзия ба даст овардааст.

 

Чоршанбе, Сен 11 2019

   

   Дастаи мунтахаби Тоҷикистон оид ба футбол дар чаҳорчӯбаи бозиҳои даври дуюми марҳилаи гурӯҳии интихобии Ҷоми ҷаҳон-2022 дар гурӯҳи «F» бар дастаи мунтахаби футболи Муғулистонро бо ҳисоби 0:1 пирӯз шуд. Ягона голи ин бозиро Давронҷон Эргашев дар дақиқаи 81-уми бозӣ ба ҳадаф расонид.

   Тавре ба мухбири СССР дар маркази матбуоти Федератсияи футболи Тоҷикистон хабар доданд, ин бозӣ рӯзи 10.09.2019 дар ш.Улан-Батор сурат гирифта, чанд рӯз пеш, аниқтараш рӯзи 5.09.2019 бозии нахустини гурӯҳии марҳилаи интихобии Ҷоми ҷаҳон-2022 дар гурӯҳи «F» миёни  дастаҳои  мунтахаби футболи Тоҷикистон ва Қирғизистон дар Варзишгоҳи марказии ш.Душанбе баргузор шуд. Дар ин  рақобат футболбозони тоҷик бо ҳисоби 1:0 пирӯз гашта, ягона голи ин дидорро Алишер Ҷалилов дар дақиқаи 41-ум ба дарвозаи ҳариф зад. 

 

Чоршанбе, Сен 04 2019

Валерий Турсунов….Бо шунидани ин ном пеши назари ҳар нафаре, ки бозиҳои “Помир”-Душанбеи маъруфро тамошо кардааст, бозии зебо, зарбаҳои сахту нишонрас ва голҳои ба дарвозаи дастаҳои рақиб задаи ӯ ҷилвагар мешаванд. Валера 23.08.1954 дар ш.Кӯлоб ба дунё омадааст. Падараш тоҷик ва модараш рус буданд. Аз хурдӣ ба футбол шавқ дошт ва мисли дигар ҳамсолонаш футболро аз кӯчаҳои шаҳри Кӯлоб оғоз кард. Шавқу рағбат ба ин бозии маъруф ӯро ба ДЮСШ-и шаҳри Кӯлоб овард. С.1965 иштирокчии бозиҳои ниҳоии мусобиқаи умумиттифоқии “Тӯби чармин” шуд. Солҳои донишҷӯӣ дар дастаи Институти политехникии Тоҷикистон баромад мекард ва аз он ҷо ба чашми селексионерҳои “Помир” афтоду Валераи 18-соларо шомили ҳайати омодагии “Помир” намуданд. Бозии нахустинро дар ҳайати асосии дастаи “Помир” Турсунов с.1974 гузаронидааст. Дар ин бозӣ “Помир” дар сафар муқобили “Торпедо” Кутаисӣ рақобат мекард. Бозии дебютӣ барои Валера бобарор ва муваффақ гашт, ки дар ин бозӣ 2 гол ба дарвозаи дарвозабони маъруфи замони шӯравӣ-Отар Габелияи гурҷӣ занад. Валера тамоми собиқаи бозикунияшро дар чемпионати СССР аз с.1974 то с.1988 дар ҳайати “Помир” гузаронида, дар 542 бозӣ иштирок намуда, ба дарвозаи рақибон 173 гол задааст!!!

С.1988 барои ба лигаи олии СССР баромадан ба “Помир” кӯмаки худро расонд. Лек латбардориҳои зиёде, ки дар давоми собиқаи бозикунияш бардошта буд, ба ӯ имкон надоданд, ки дар Лигаи Олии СССР бозӣ кунад. Миёнаи солҳои 1990 якҷо бо Александр Азимов барои бозӣ кардан ба клуби дивизиони 2-юми «Аустрия»-и Клагенфурти Австрия рафт. Дар гузариши миёнамавсимии солҳои 90\91 бошад ба клуби «Клопайнерзее» гузашт, ки дар дивизиони 3-юми чемпионати Австрия баромад мекард. Аммо латбардориҳо ба ӯ дигар имкони пурра бозиданро надоданд ва тобистони с.1991 собиқаи бозикунияшро анҷом дода, ба дастаи “Помир” ба кори мураббигӣ бозгашт. Давоми солҳои 1996-2013 бо танаффус дар Федератсияи футболи Тоҷикистон ба ҳайси Ноиби президент ва Ноиби аввали президент фаъолият кардаст. Ман аз с.2003 то с.2013 бо Валерий Юлдошевич дар ФФТ якҷоя фаъолият доштем ва хушбахтона то ҳол ҳам бо ҳамдигар риштаи дӯстиву бародарии қавӣ дорем. Ба ҳайси роҳбар ва ҳамчун инсон дар сифати Валера танҳо беҳтарин суханҳоро гуфта метавонам. Ӯ яке аз бузургтарин шахсиятҳоест, ки мешиносамаш.

Синни ҷашнӣ муборак, Юлдошевич!!! Худованд ба Шумо умри дароз, тани сиҳат ва саодату комёбиҳоро насиб гардонад!!!

Нуралӣ Хоркашев

Махсус барои СССР

 

саҳ 3 аз 31

Китобҳо

Flag Counter