ХАБАРИ ДОҒ
Панҷшанбе, Июн 28 2018


Сенсатсия мехостед? Марҳамат қаппед!!! Германия-гранди футболи олам, чемпиони феълии ҷаҳон, супер-гиганти футболи Аврупо шармандавор Мундиали Русияро тарк кард! Вале сенсатсия ин нест, ки Машинаи Олмонӣ бозии ахирини худро ба мунтахаби миёнаҳоли Осиё-Кореяи Ҷанубӣ бохт. Сенсатсия ин аст, ки Германияи таърифӣ ва мунодии футболи Аврупо 2 бозияшро ба намояндагони қораи Амрико (Мексика) ва Осиё (Корея) бохта, исбот кард, ки футболи Аврупо варшикаста шудааст. Шербаччаҳои амрикоиву осиёӣ барои шарафу номуси ватан бозӣ мекардаанду гургбаччаҳои аврупоӣ барои пул.
Эххх, охир ҳақ аст, Сӯҳробшои Фаррухшо-шореҳи варзишии мо, ки баъди шикасти Олмон аз Корея бо ҳисоби шармшикани 0:2 гуфта буд:
-Кай немисҳо дар Русия ғалаба карда буданд?...

Ҳайл Корея!!!


Ҳамин дирӯз фаҳмидам, ки Ҳайл (Хайл Гитлер-тибқи кинофилмҳои шӯравӣ)… маънии «Зинда бод!» не, ки Муқаддас (святой) доштааст. Ва дар ин шом Корея воқеан ҳам, ҳадди ақалл барои аҳолии 2 кишвар-Мексика ва Шветсия ҲАЙЛ, яъне Муқаддас шуд. Зеро кореявиҳо Олмонро шикаст намедоданд, яке аз ин дастаҳо дақиқан ба 1\16 финал намебаромад.
Воқеан ҳам Шветсия Мексикаеро, ки ҳам Кореяву ҳам Германияро шикаст дода буд, бо ҳисоби бузурги 3:0 мағлуб кард. Аммо ин бохт ҳаргиз монеъи давоми қаҳрамонии Мексикоиҳо дар Мундиал намешавад. Зеро тавре гуфтем, Корея дабдалаи Германияро баровард!

Бразилия, Ховартия, Аргентина ва ғ.
Месси&Co бо азоби алиму азияти солим ахиран тавонистанд роҳхат ба плей-оффро ба даст оваранд. Месси голи нахустинро дар қисмати аввал ба дарвозаи Нигерия заду фикр кардем, «кори хирс тамом!». Аммо «не тут-то было!»-гуфти бародарони рус. Мозес дар қисмати 2-ум аз пеналтӣ голи зебое зад (Оре, ин гол воқеан зебо ва таҳқиромез буд!). Сиёҳбаччаҳо (тарҷумаи таҳтуллафзи нигерийцы) боз метавонистанд аз пеналти гол зананд. Аммо туркбачча-Текир тӯби ба дасти Рохо расидаро ҷарима набаст ва хуб ҳам кард. Зеро тӯб баъди расиш ба дасти ӯ пеши пои нигериявӣ омад, ки қариб гол мезад. Дар навбати худ, Рохо ин мини-хатояшро бо голи афсонавӣ талофӣ кард. Аргентина Нигерия 2:1 ва мунтахаби Месси дар 1\16 финал. Ошашон шавад! Метавонанд.
Вале Хорватия усулан дар ин пирӯзии Аргентина даст гузошт, ки Исландияро шикаст дод! Дар акси ҳол Месси 1\16 финалро чун 2 гӯши сихаш намедид! Коре кард Хорватия, ки набояд мекард. Зеро бе ин пирӯзӣ низ Хорватия ба плей-офф баромада буд…
Неймар бошад бо бозии олирутба ва олиҷанобаш Бразилияро бе ягон ишкол ба даври навбатӣ баровард.

Роналдо, Неймар, Месси, Суарес, Гризманн, Кейн дар 1\16 финал
Ба ин галаситораҳо метавон исми Кавани, Погба, Мбапе, Куадрадо, Инйеста, Пике, Стерлинг, Рэшфорд, Азар, Витсел, Фелаини ва ғ. ва ҳ. шомил кард. Аммо даст рӯи сина бояд гуфт, ки мо бештар аз ҳаминҳо чашми умед дорем, ки ин Чемпионатро низ орову торо медиҳанд…
Дар ҷамъ ин дастаҳо ба плей-офф баромадаву байни ҳам сабқат мекунанд:
Русия-Испания
Уругвай-Португалия
Аргентина-Фаронса
Хорватия-Дания
Мексика-Бразилия
Шветсия-Шветсария
Ғолибони 2 гурӯҳи дигар шоми 28.06. муайян мешаванд. Шаби 30.06. марҳалаи бурдбарак-плей-офф бо бозиҳои Фаронса-Аргентина ва Уругвай-Португалия сар мешаванд.

Диққат ва Таваҷҷӯҳ:
СССР ба пирӯзии Аргентина гарав мебандад. Қаблан инро мегӯем. Мо Метавонем!

Аниқ…доти Ноларду
Нуралӣ Хоркашев-шореҳи футболи СССР дирӯз гуфт:
-Назди хона баромадам, ки нафаре пурсид, маълими Нуралӣ, Нолардуро мешиносӣ? Ана ҳамонро баъди бозии Аргентина дилаш задааст.
Нуралӣ фикр кардааст, ки Ноларду гуфта сароғоз ин маст Роналдоро дар назар дорад. Вале таври маълум дар ун бозӣ дили…Марадона зада буд…
Ана ҳамин хел мухлисин дорем. Мо Метавонем!

Ҷумъа, Июн 22 2018


Шореҳи футболи дар Русия бо сухани қабеҳу дағалаш маъруф, Василий Вячеславович Уткин, дар сафҳаи Твиттераш Равшан Ирматов-реферии баландмақоми ӯзбектабори ФИФА-ро писари хар (ишачий сын), ё худ, хутик хонд. Ӯ навиштааст, «Равшан Ирматов-ишачий сын где карточки?». Аллакай дар сайтҳои иҷтимоӣ мрдум талаб мекунанд, ки Уткини бадахлоқ аз Ирматови довари ӯзбек расман бахшиш пурсад.
Хотиррас мешавем, ки ба фарқ аз Уткини «хартабиат», ки ҳанӯзам дар сар андешаи фашистӣ-бадбинии миллатҳои собиқи шӯравиро дорад, Ирматов реферии тозатарини ФИФА аст. Чемпионати мазкур, саввумин қаҳрамонии олам оид ба футбол аст, ки Равшани тошкандӣ дар он доварӣ мекунад.


Дебюти Равшан-ако аз ҶҶ дар соли 2010 шуруъ шуд, ки дар Африқо баргузор гардида буду Испания чемпион шуд. Он замон Равшан ҷавонтарин реферии бозиҳо буд (32 сол).
Баъдан дар соли 2014, дар Бразилия низ ӯ ҳунарнамоӣ кард.
Ҳоло ҳадс зада мешавад, ки Равшан Ирматов шояд дар финали ин сабқат, дар Москва доварӣ кунад.
Дар ҷамъ Ирматови 40-сола 5 бор беҳтарин довари Осиё ва 10 маротиба судяи хубтарини Ӯзбакистон баргузида шудааст. Дар соли 2015 бошад ӯ Ҷоизаи беҳтарин довари оламро гирифта буд.

Панҷшанбе, Июн 14 2018


Иди футбол - Ҷоми ҷаҳон - 2018 дар Россия баъди чанд соат оғоз меёбад. Ифтихорманду сарбаланд аз онам, ки як тоҷикписари фарзона АВРАНГЗЕБИ АСРОРИЁН тарҷумони ходимони баландрутбаи ФИФА мебошад. Аврангзеб (писари озодаву фарҳехтаи фарҳангшинос ва журналист ҶОНИБЕК АСРОРИЁН) донандаи 7 забон, айни замон донишҷӯи соли 3-юми Донишгоҳи шоҳии Шоҳигарии НИДЕРЛАНДИЯ буда, соли 2015 зимни дар синфи 12 хонданаш дар Амрико маҷозан дар имтиҳонҳои ин Донишгоҳ иштирок ва дохил шудааст. Хоҳишмандам зери ин матлаб "суппер" гузореду таҳнияташ бигӯед.

Абдуқодири АБДУҚАҲҲОР

Чоршанбе, Июн 06 2018


   Аз 14 июни соли ҷорӣ дар Федератсия Россия Чемпионати ҷаҳон оид ба футбол-2018 шурӯъ гашта, он то 15 июли соли ҷорӣ идома хоҳад дошт. Бояд қайд намуд, ки чемпионати оид ба футбол 21-умин буда, он бори нахуст дар Россия баргузор мешавад.
   Бозиҳои чемпионат дар 11 шаҳри ин кишвар-Маскав, Калининград, Санкт-Петербург, Нижний Новгород, Волгоград, Қазон, Самара, Саранск, Ростови лаби Дон, Сочи ва Екатеринбург дар 12 варзишгоҳи наву замонавӣ, ки ҳар яке аз 35 ҳазор то 45 ҳазор ҷойи нишаст доранд, баргузор хоҳад гашт.
   32 тими мунтахаб қарор аст барои ба даст овардани Ҷоми ҷаҳонӣ байни ҳам қувваозмоӣ намоянд: Россия, Бразилия, Ҷумҳурии исломии Эрон, Ҷопон, Мексика, Белгия, Корея, Арабистони Саудӣ, Олмон, Англия, Испания, Нигерия, Коста-Рика, Лаҳистон, Миср, Исландия, Сербия, Португалия, Фаронса, Уругвай, Аргентина, Колумбия, Панама, Сенегал, Марокко, Тунис, Швейсария, Хорватия, Шветсия, Дания, Австралия ва Перу.

Ҷумъа, Июн 01 2018


Имрўз дар Рўзи байналмилалии ҳифзи кўдакон Раҷаббой Аҳмадзода, раиси вилояти Суғд шиногоҳи шаҳриро дар лаби дарёи Сир, ки 20 сол инҷониб бинобар номутобиқатӣ ва хатарнок буданаш истифода намешуд, мавриди баҳрабардорӣ қарор дод. Бо ташаббуси Раҷаббой Аҳмадзода он аз сари нав дар худуди 5 гектар фаъол гашт.
Бино ба итиллои аз маркази матбуоти ҳукумати вилояти Суғд ба мо расида, дар шиногоҳ майдончаи волейбол, мизи теннис ва дигар бозиҳои варзишӣ низ ташкил гардида, бояд қайд намуд, ки барои азнавсозии шиногоҳ беш аз 200 ҳазор сомонӣ маблағ харҷ шуда, дар он соябонҳои истироҳатию обутобдиҳӣ, ҳуҷраҳои либосивазкунӣ ва дигар эҳтиёҷоти шиногоҳ муҳайё карда шудааст. Дар шиногоњ заврақҳои моторӣ, резинӣ, гидросикли обӣ, киштӣ барои бурдани назорати патрулӣ, автомашинаи махсуси наҷотдиҳӣ, садамавӣ-наҷотдиҳӣ, ғаввосӣ барои бурдани корҳои рӯйи обӣ ва зериобӣ мавҷуд буда, ҳамарӯза 10 нафар кормандони бомаҳорат тибқи нақша фаъолияти навбатдориро ба роҳ мемонанд.
Раиси вилоят зимни маросими ифтитоњи ин мавзеъ таъкид намуд, ки дар ояндаи наздик боз 2 шиногоҳи азкормонда барқарор карда мешавад. Шиногоҳҳо бо назардошти меъёрҳои байналхалқӣ бунёд ва на фақат барои шаҳрвандони Тоҷикистон, балки барои истифодаи хориҷиён низ пешбинӣ мегардад.







Панҷшанбе, Май 24 2018


Ҳаҷиме Китаока, сафири давлати Япония дар ҶТ дар моҳи мубораки Рамазон ба аёдати варзишгарони маъюби Тоҷик ба Федератсияи варзишгарони маъюби кишвар рафта, дар анҷоми лоиҳаи «Таъмин намудани лавозимоти варзишӣ-тамринӣ барои варзишгарони маъюб» ширкат варзид.
Чуноне ки ба мухбири мо дар сафорати давлати Япония дар ҶТ хабар доданд, лоиҳаи мазкур барои фароҳам овардани шароит барои одамони маъюб тарҳрезӣ шуда, татбиқи он имкон медиҳад, ки нафарони имконияташон маҳдуд  бо аробачаҳои маъюби варзишӣ таъмин гардида, дар марафон, баскетбол, тенниси рӯи миз ва ҷудои паролимпӣ ва ғайраҳо иштирок намоянд.Тибқи ин лоиҳа толорҳои варзишии Федератсия воқеъ дар шаҳрҳои Душанбе, Хуҷанд, Бохтар ва н.Шаҳринав бо  8 аробача барои баскетбол, 8 аробачаи фаъол барои тенниси рӯи миз, 3 аробача барои марафон, 4 адад  роҳдавак, велотренажер, курсии маҳскунӣ ва 300 м2 тати гӯштингирӣ  таъмин гардиданд. Таҷҳизоти мазкур барои тайёр кардани варзишгарон барои мусобиқаҳои байналмилаллӣ ва боз ҳам беҳтар намудани фаъолияти Федератсия дар саросари кишвар мусоидат менамояд.
Маблағи умумии лоиҳаи мазкур 82,929 доллари ИМА буда, дар доираи кумакҳои бебозгашти фарҳангии Ҳукумати Япония  ва барномаи “SPORT FOR TOMORROW” (Варзиш барои фардо) ҷудо  шудааст.

саҳ 10 аз 29

Китобҳо

Flag Counter