Ман, ки алоқамандии бештар ба футбол дорам, инро менависам. Зеро ҳуқуқ дорам. Мо Метавонем!
Аввалтар аз ҳама ғалаба бар Аргентина барин тим...ин хобу хаёли хоми афродест, ки зери пафоси люмпен-пролетаризм мерақсанд. Прогматик бояд буд! Мардони бо футбол алоқаманд медонанд, ки ман дирӯз гуфтам, мо 1 гол мезанем! Ва задем!!! Вале чун 2 гол сар додем, бахт ба рӯямон нахандид. Зеро барои боз ҳам бадар шудан аз гуруҳ бояд Камерун Испанияро шикаст медод... Испания...батар аз Аргентина сахт ҳарифе буду Камерун низ "бачаи ҷайра" набуду нест. Ақаллан Самуэл Это-Оро мешносед? Мо дар гуруҳи марг қарор доштем ва бачаҳо хуб бозиданд. Офаринашон!
Акнун ба онҳое, ки Локомотив-Помири ин бачаҳоро механданд. Оё медонед, ки ҳамаи ин бачаҳо дар Лигаи 1 бозӣ мекунанд? Дар 16-солагӣ бо ҳарифони 25-30-сола!!! Ва дар раддаи аввал қарор доранду имсол насиб бошад ба Лигаи Олӣ мебароянд! Рақобат танҳо бо Равшани Кӯлоб барои ин бачаҳо дар Лигаи 1 медонед чӣ қадар мушкил буду ҳаст? Вале ҳисобро мусовӣ карданду Равшанро марҳум аз Лигаи Олӣ (қариб кардаанд!).
Ва маҳз ана ҳаминҳо устухонбандии дастае ҳастанд, ки ба Чемпионати Осиё роҳхат гирифт! Ва маҳз (ин нукта ИФТИХОРИ ману мост) ана ҳамин бачаҳо 2 бор Ҷоми СССР оид ба футболро гирифта буданд, бо сарварии Зайниддин Раҳимов!
Барои пешрафти футбол, гуфти бобои Ғуломи таърихӣ, зуқ-зуқ не, коре бикунед, агар метавонед, вале агар наметавонед, хомӯшиатон низ кор аст!
Тоҷикистон ба пеш! Мо Метавовнем!
С.Мизроб
Пули акаи Сафарро кӣ дуздид?
Муҳтарам, Сайф Достиев! Шояд шумо дарак дошта бошед, Сафар-муаллим даруни варзишгоҳи эҳтиётӣ, дохили 1 вагон, ки ҳамчун ҷои либосивазкунии бозингарон низ маҳсуб мешавад, зиндагӣ мекунад, дина шаб кадом нокасе ин вагонро ғорат карда, 1 миқдор пули бо арақи ҷабин ҷамъ намудаи акои Сафарро дуздидааст!
Дилшод Шарифов,
Мухлиси футбол
Гиряи ӯ ашки номус аст!
Гиряи ту ашки номус аст,
Беҳтар аз он аблаҳони хокбӯси
Пеши ҳар хору хасакҳо чун гадои пойбӯс.
Ашки ту оре, басо пайғоми номус аст,
Гиряҳоят бозгӯи нангу номус!
Сар зи хоки ғайр бардор!
Ин бародарҳои чашм бар ғолибият,
Дар Ватан, дар интизорат, аз ҳамон мардиву номус,
Сар ба афлок, ифтихор аз ту бидоранд, к-осмонбӯс аст.
Ғолибият бозу бозам интизори туст,
Ҷамъи ёрони ту дар меҳан, биёянду ба поят гул бирезанд!
Ору номус аст!
Оре, номус аст!
Вақти сарафрозиҳои ту бувад, дар пеш,
Бирав бар пеш!
Нанги кишвардории ту баски номус аст!
Тӯби футболат кунун бар ту мудаввом гарчи побӯс аст,
Пойбӯс, оре, бидон он бо муҳаббат боз побӯс аст!
Ашки ту, баски писарҷон, ашки номус аст!
Ҳуриннисо Ализода
Варзишгари маъруфи кишвар Сомон Маҳмадбеков пас аз ғолибият дар Чемпионати ҷаҳон оид ба дзюдо дар Марокаш довталаби асосии Ҷоизаи Президенти ҶТ дар ҳаҷми беш аз 50000 сомонӣ гардид. Бояд гуфт, ки Комиссияи ҷумҳуриявии Ҷоизаи Президенти ҶТ барои варзишгарон то охири сол натиҷаи Сомон Маҳмадбековро мавриди баррасӣ қарор дода, бо зиёд гардидани натиҷаи ин варзишгар то охири сол эҳтимоли зиёд гардидани маблағи ҷоизапулӣ дар назар дошта мешавад.
Тавре ба мухбири СССР дар маркази матбуоти Кумитаи кор бо ҷавонон ва варзиши назди Ҳукумати ҶТ хабар доданд, Сомон Маҳмадбеков аз дастгирии молиявии Кумитаи миллии олимпии Тоҷикистон ҳар моҳ дар ҳаҷми 300 доллари ШМА низ бархӯрдор мебошад.
Ёдовар мешавем, ки дар Чемпионати ҷаҳон дар Марокаш паҳлавони шинохтаи тоҷик Сомон Маҳмадбеков дар вазни 73 кг миёни ҷавонон аз рӯи варзиши дзюдо қаҳрамони ҷаҳон гардид. Дар ин мусобиқаи сатҳи баланди ҷаҳонӣ, ки 517 варзишгар аз 81 кишвари олам ширкат варзиданд, варзишгари шинохтаи кишвар ба ҳамаи рақибон пирӯз гардида, медали тиллои мусобиқаро ба даст овард.
Сомон Маҳмадбеков дар даври аввал дар 1,27 сония варзишгари Кипр Семедо Скавдиниоро бо ғолибияти тоза (иппон), шикаст дода, дар даври дуюм Масабиров Асад варзишгар аз Ҷумҳурии Қирғизистонро дар 2,38 сония бо ғалабаи тоза низ шикаст дода ба даври сеюм роҳхат пайдо намуд. Дар даври сеюм Сомон бо Умаев Абдумалик аз Белгия рақобат намуда, дар 3,15 сония ба ин варзишгар ғолият соф ба даст овард. Дар даври ниманиҳоӣ Сомон бо варзигари австралиягӣ Гаснер Самуел дар 19 сония ғолибияти соф ба даст оварда, ба финали мусобиқа роҳхат пайдо намуд. Дар дидори ниҳоӣ Сомон бо варзишгари рус Елбакиев Георгий дар 3,42 сония ғолибияти тоза ба даст оварда, чемпиони ҷаҳон оид ба дзюдо дар вазни 73кг гардид.
(Номаи доди 1 мухлис)
Боби 1. Истаравшан-Истиқлол
Давраи 11 ва 12-и чемпионати Лигаи Олии ҶТ ҷамъбаст шуд. Дар давраи 11-уми Чемпионат дастаи «Истаравшан» бо чемпиони чандкаратаи Тоҷикистон дастаи «Истиқлол» вохӯрд. Бозӣ тамошобобу диданӣ буд. Меҳмонҳо бозиро бо ҳисоби 1:0 бурд карданд. Аз маҳорати бозингарони ҳар 2 даста мухлисон қонеъ буданд. Зеро «Истиқлол» яке аз тимҳои барӯманду номдори Тоҷикистон ва ҳомии мо дар бозиҳои байналхалқист. Ҳама дастаи яккачинро мухлисӣ мекунем. Ин даста шарафи моро ҳимоя мекунад. Аммо мехоҳад, ё на, дар бозии ЛО ҳар шахс тими дӯстоштаи худро дорад. Гап сари ин, ки дар бозии байни ин 2 даста доварон 6 корти зардро танҳо ба бозингарони «Истаравшан» нишон доданд. Инро чӣ хел фаҳмидан мумкин?! Доварон бозингарони «Истиқлол»-ро танҳо шифоҳӣ меогоҳониданд. Ба хаёлам меҳмонҳо имтиёз доштанд. Магар ҳар 2 даста аз Тоҷикистон ва лагандбардории доварон бар зиёни пешравии бозии «Истиқлол» нест?
Боби 2. Истаравшан-Хатлон
Дар давраи 12-уми чемпионат «Истаравшан» тими овозадори «Хатлон»-ро қабул намуд. То бозӣ байни мухлисон миш-мишҳо буд, ки гӯё дар даври якуми дидор байни «Хатлон»-у «Истаравшан», дар 1 лаҳзаи бозӣ Шаҳром Исмоилов дарвозабони «Хатлон» нисбати бозингари «Истаравшан» беҳурматӣ зоҳир карда, бо мушт задааст. Ин лаҳзаро аз ТВ борҳо намоиш доданд. Ин ҷо бояд тан дод, ки дар қисми аввали бозӣ афзалият пурра ба тарафи меҳмонҳо буд. Дар қисми дуюм соҳибони майдон ба худ омада, ҳисобро 2:2 карданд. Аммо афсӯс, довари канорӣ голи дуюми истаравшаниҳоро ба инобат нагирифт. Гӯё сардори даста Илҳом Баротов дар ҳолати нобозӣ қарор дошт. Ин рафтори ноҷояи довари канорӣ мухлисонро ба шӯр овард. Дар ин лаҳзаи ҳассос довари асосӣ марказро нишон дод. Назди довари канорӣ мураббии «Хатлон» меистод. Бо фишори довари канорӣ байрақча бардошта шуд. Баъди ин довари асосӣ қарори аввали худро дигар кард. Он лаҳза гӯиё ба ҷароҳати мухлисон намак пошида бошанд, судяро гапҳои пасту баланд гуфтанд.
Боби 3. Чаро Истаравшанро дӯст намедоранд?
Доварони бе виҷдон намеандешад, ки бо ин рафтори ноҷо 2 тимро бо ҳам зид мекунанд. Дар охир комиссия қарор бароварда, довари канориро аз 4 бозӣ дур кард. Довари асосӣ чӣ? Ҳисоби бозӣ чӣ? Зарари маънавии мухлисонро кӣ ҷуброн мекунад? Аз доварон инсоф металабем. Аз кормандони ҳафтаномаи СССР хоҳишу илтиҷо дорам, ки ҳамчун мухлиси 69-сола ин матлаби маро ба самъи доварон расонанд. Истаравшаниҳо ба ивази ягон чиз виҷдонро нафурӯхтаанд. Гузаштагони мо барои ҳимояи хоки Ватан то ҷон дар рамақ доштанд, ҷангидаанд.
Бо салом, Набӣ Ҷумъа,
адиб, ш.Истаравшан
Аз СССР: Мо матлаби мухлиси КФ «Истаравшан»-ро нашр кардем ва медонем, ки Истаравшан яке аз дастаҳои сермухлистарин ва дӯстдоштанӣ дар Лигаи Олист. Вале!!! Чаро шумо-мухлисони солдида ба бозингарону фанатҳои ҷавонатон панду насиҳат намедиҳед, ки футбол ҷои латукӯби футболбозони меҳмон нест? 3 бозингари Истаравшан-Баротов, Азизбоев, Азизов бо кадом ақлу фаросат бозингарони меҳмонро хобондаву лату кӯб мекунанду садҳо «мухлис» меҳмононро сангборон??? Магар ин аст одоби мухлисиву варзишкорӣ??? Хафа нашавед, ҳар ҳақиқат 2 паҳлӯ дорад. Ва баъди чунин бенизомӣ фикр доред, ки Истаравшанро дар тамоми Тоҷикистон бояд дӯст доранд? Ҷав корӣ-ҷав даравӣ… Мо Метавонем!
Рақиби Равшани Турсунов
Сайфиддин Шарифов 2.03.1952 дар деҳаи Газаи Қипчоқи н.Муъминобод ба дунё омада, с.1960 ҳамроҳи аҳли оила ба н.Фархор мекӯчанд. Ӯ ба футболбозӣ аз 13-солагӣ шуғл варзида, парвардаи мактаби бачагонаи варзишии ноҳия буда, дар мусобиқаҳои футбол дар минтақаи Кӯлоб иштирок мекард. Ибрач Тӯрабоеви қазоқ, Главик Козлови рус ва Пётр Кими карес, ки он солҳо дар ин мактаб ба сифати мураббӣ фаъолият мекарданд, дар тарбияи Сайфиддин саҳми бориз доштанд. Солҳои 1971-73 ҳангоми дар сафи Қувваҳои Мусаллаҳ, дар шаҳри Владивостоки Русия хизмат кардан симои баҳодуронаву тану ҷуссаи рустамонаи ӯ диққати роҳбарони қисми ҳарбиро ба худ ҷалб месозад ва ӯро ба дастаи футболи «Звезда»-и қисми ҳарбӣ қабул намуданд. Чун таҷрибаи футболбозиро дар «Ҳосилот» омӯхта буд, ба фарқ аз дигар ҳамхизматонаш хеле хуб бозӣ мекард. Баъди адои хизмат ба Донишкадаи тарбияи ҷисмонӣ ҳуҷҷат супорида, солҳои 1971-74 дар ин боргоҳи паҳлавонӣ таҳсил кард. Солҳои 1974-81 дар «Ҳосилот» фаъолияти футболбозии худро идома дода, марҳила ба марҳила маҳорату касбияташ боло ва барои ҳамдастаҳояш намунаи ибрат мегардад. Ҳини суҳбати хоса ӯ ёди ҷавониҳояш карду гуфт: - Аввалин бозиям дар ҳайати «Ҳосилот» с.1974 бо дастаи овозадори «Равшан»-и ш.Кӯлоб буд. Он солҳо дар ин даста бозингарони соҳибтаҷриба ба мисли Валерий Турсунов, Валерий ва Володя Губановҳо бозӣ мекарданд. Гоҳ мо ғалаба мекардему гоҳ «Равшан». «Вахш»-и Қӯрғонтеппа низ ҳарифи пурзӯрамон буд. Ҳини бозӣ варзишгоҳҳои ҳар 2 даста моломоли тамошобин мешуд.
Ҳарифи Гессу Муродов
Баъди ин 2 даста рақиби азалию пурзӯри «Ҳосилот» «Помир»-и ш.Душанбе буд. Солҳои 1976-77 бо ин даста, ки дар Лигаи якум ва баъдан Лигаи Олии СССР шуҳрати беандоза дошт, вохӯрдем. Он солҳо дар «Помир» беҳтарин бозингарон-Владимир Ғуломҳайдаров, Эдгар Гесс, Абдулло Муродов, Валерий Турсунов, Александр Азимов бозӣ мекарданд. Дар 2 бозие, ки «Ҳосилот» бо ин дастаи шуҳратёр дошт, бо ҳисоби 3:1 ва 4:1 бозиро бохтем. Мо бозингарони «Ҳосилот» ҳамчун узви 1 хонадон ва дар шодию нишоти якдигар шарик будем. Сармураббӣ Абдуғаффор Раҳимов моро мисли фарзандонаш тарбия менамуд ва мо низ ӯро чун падар дӯст медоштем. Ҳамдастаҳоямон Мирвалӣ Акрамов, Шариф Валиев, Мурод Арабов, Сайфулло Сафаралиев, Шариф Саидов, Ҷаҳонгир Абдуллоев, Юсуф Куганов, бародарон Абдулло, Нуралӣ ва Шералӣ Гулоновҳо, бародарон Владимир ва Виктор Скопиновҳо, дугоникҳо Николай ва Михаил Фёдоровҳои машҳур бо лақаби «Колмиш», Владимир Мамедов, Анатолий Холодников, Леонид Ким, Юрий Сталповский, Мӯсо Макоев, Олег Азарин, Александр Маркин, Женя Худжаков буданд.
Баъди хатми фаъолияти футболбозӣ С.Шарифовро дар даста ба вазифаҳои роҳбарикунанда даъват карданд. Даъватро бо хушнудӣ пазируфт. Солҳои 1995-2000 ба ҳайси муовини сардори «Ҳосилот» фаъолият карда, дар тарбияи чандин бозингарон саҳми босазо гузошт. Ӯ чун рамзи садоқат ба «Ҳосилот» ва ба хотири гиромидошти ҳамдастаҳояш, ки иддае аз онҳо дар қайди ҳаёт нестанд, ҳуҷҷат ва шиносномаҳои варзишии ҳамдастаҳояшро то ҳол чун гавҳараки чашм нигоҳ медорад. Шукргузор аз он аст, ки фарзандонаш Қурбоналӣ ва Саймуҳиддин ҷодаи футболро интихоб кардаанд.
Акбар Абдусамадов,
мухлиси футбол, ш.Душанбе
Дилшод Назаров-варзишгари машҳури тоҷик ва қаҳрамони Бозиҳои олимпии соли 2016 дар Рио-де-Жанейро пас аз шунидани хабар дар бораи ба истифодаи допинг гумонбар шуданаш дар ҳолати шокӣ қарор дошта, таъкид намуд, ки тамоми натиҷаҳои ба даст омадаашро дар натиҷаи муборизаҳои ҳақиқӣ ба даст овардааст.
Бояд гуфт, ки The Athletics Integrity Unit, ниҳоди мустақили мубориза бо падидаҳои манфӣ дар варзиши сабук, рӯзи 24.09.2019 номи Дилшод Назаровро ба рӯйхати варзишгароне шомил кард, ки дар истифодаи допинг муттаҳам мешаванд.
Тавре ин созмон менависад, тафтиши дубораи допинг дар мусобиқаи қаҳрамонии ҷаҳон дар соли 2011 дар Кореяи Ҷанубӣ "дар намунаи Дилшод Назаров маводи мамнӯи метаболити туринаболи даҳонӣ-metaboliteof oralturinabol-ро ошкор кардааст."
Дилшод Назаров дар сӯҳбат бо хабарнигорони тоҷик шоми дирӯз афзуд, ки тамоми саъю талоши хешро барои рафъи ҳамаи гумонҳо нисбаташ равон намуда, 1 вакили машҳури аврупоиро ҳам ҷалб кардааст.
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
