ХАБАРИ ДОҒ
Чоршанбе, Июл 26 2023

 

Гулдаста Расулова, сокини ш.Душанбе ба редаксия меҳмон шуда (тел: 988782499), гуфт, ки падараш Сайҳамид Расулов пеш аз вафот дар шоҳидии апаҳояш ба бародараш Зоҳир Расулов ба миқдори 26 ҳазор доллари амрикоӣ пул дода буд.

   - Аммо пас аз вафоти падар З.Расулов хонаҳои дар шаҳри Кӯлоб, воқеъ дар кӯчаҳои Вализода ва Ш.Шоҳинро аз худ мекунад. Апаҳояш Рухшонаву Гулдаста маҷбур мешаванд, ки ба суди ноҳияи И.Сомонӣ муроҷиат намоянд. Зеро бародараш З.Расулов талоши гирифтани хонаи падарро низ дошт.

Бародарам дар он хона қайд надошт, лекин бо кадом роҳе худро дар хонаи падар низ ба қайд гузошта, соҳиби хонаи падарӣ ҳам шуд.

Мехостам, ки бародарам хонаи падарамонро баргардонад ва бо ин мақад ба суд муроҷиат кардем. Ҳукми суд ба фоидаи ҳоҳарон баромад, лек бародарам

то ба имрӯз онро иҷро намекунад...

Чоршанбе, Июл 19 2023

 

Суман Неъмонова, сокини к.С.Шарипови н.Шоҳмансури ш.Душанбе (тел: 919994002) меҳмони идора шуда, гуфт, ки ниёз ба адвокат дорам, вале бо назардошти шароити бади иқтисодиам наметавонам хизмати ӯро пардохт намоям.

   - Ман бо аҳли бародарону янгаҳоям 10 моҳ боз ҷанҷол дорам. Падарамон 1 асту модарамон ҷудо, ман моиндарамро то лаҳзаи охири ҳаёташ нигоҳубин кардам, вале пас аз маргаш, бародаронам маро латукӯб намуда, аз хона пеш карданд. Падарамон дар қайди ҳаёт асту хонаро ба ман тӯҳфа кардааст. Медонам сабаб хона аст ва ман ҳам ба 1 гӯшаи он ҳуқуқ дорам. Ман бо 1 фарзандам дар манзили падарӣ зиндагӣ мекунам, 8 сол пеш аз шавҳарам, ки шаҳрванди Ҷумҳурии Ӯзбекистон аст, ҷудо шудам. Бар замми ҳамаи ин мушкил падари фарзандам низ моро суроғ намекунад. Аз ин лиҳоз дар ҷустуҷӯи адвокате ҳастам, ки бароям кӯмаки бародарона карда, аз ҳуқуқҳои ман дар назди хонавода ва падари писарам ҳимоят кунад.

Чоршанбе, Июл 12 2023

 Ромини Муҳаммадамин, хонандаи синфи 10-и МТМУ №30, сокини ш. Душанбе меҳмони идора шуда, гуфт, ки чанде пеш барои оббозӣ ба маҷмааи «Кӯли Душанбе» рафта буд.

   - Ба маҷмаа бо пардохти 120 сомонӣ сари ҳар 1 нафар даромадем. Аз соати 10-и субҳ то соати 18:00 онҷо будем. Мавзеи хуб, обаш тоза, ҷойи тафреҳ аст. Аммо хӯроке, ки дар дохил мефурӯшанд хеле гарон аст. Ба меҳмонон иҷозати ворид кардани хӯрока нест, ҳатто об ҳам. 1 оби нимлитра, ки дар берун 7-8 сомонӣ аст, дар «Кули Душанбе» 12-14 сомонист. Оббозӣ одамро тез гурусна мекунад, маҷбур мешавӣ рафта, гарон ҳам бошад, чизе харида бихӯрӣ. Агар мо 3 нафар бо пардохти 360 сомонӣ даромада бошем, хурду хӯроки сабукамон он рӯз беш аз 200 сомонӣ шуд. Ман фикр мекунам нархнома, лоақал арзиши обу яхмос дар чунин маҷмааҳои тафреҳӣ бояд мисли аквапаркҳои дунё гуногун бошад, барои наврасон арзонтар, барои калонсолон гаронтар, барои кӯдакон дастрастар...

Ҷумъа, Июл 07 2023

 Раҷаб Холмаҳмадов, сокини деҳаи Туркироҷи ҷамоати Амондараи ш.Панҷакент меҳмони идора шуда, гуфт, ки чанд шикоят дар самти фаъолияти нақлиёти ҷамъиятии истифодаи умум дорад ва онҳоро мехоҳад ба гӯши масъулини соҳа расонад.

   - Ман аз ш.Панҷакент ба ш.Душанбе бо автобуси ширкати “Азиан Экспресс” омадам. Роҳкиро аз он тараф то пойтахт дар автобус 65 сомониро ташкил намуд. Дар автовокзали ш.Душанбе барои маълумот гирифтан диспетчерро кофтам. Аз 1  гӯшаи автовокзал то дигараш хуб гаштам, билохира диспетчерро аз 1 кунҷи хеле дур аз мусофирону автобусҳо пайдо кардам. Чаро нуқтаи маълумотдиҳӣ ва диспетчерӣ дар автовокзали пойтахт аз мардум хеле дур ҷойгир аст?

Дигар ин, ки чаро нархи роҳкиро дар микроавтобусҳои хатсайри Душанбе –Турсунзода гуногун асту як ронанда 10 сомонӣ мегӯяд, 1 ронандаи дигар 12 сомонӣ ва сеюми 8 сомонӣ? Чаро тарофаи ягонаи роҳкиро дар хатсайрҳои байнишаҳрӣ нест, ё ҳасту риоя намешавад?

Чоршанбе, Июн 14 2023

 

 Ҳошим Гадо, Ҳунарпешаи халқии СССР, муаллиф ва хонандаи доимии газетаи мардумӣ меҳмони идора шуда, гуфт, ки мехоҳад ба мухлисонаш арзи сипос намояд.

   - Ман аз тамомии мардуми шарифи Тоҷикистон, аз ҳамаи онҳое, ки маро бо ҷашни зодрӯзам табрик намуданд, сипосгузорам! Ман ҳамаи навиштаҳоеро, ки дар матбуот, алалхусус дар газетаи мардумии СССР ба ман эҳдо мешаванд, мехонаму меболам. Аз ҳамаи онҳое, ки дар кӯча маро дида, наздам меоянду салому ҳолпурсӣ мекунанд, мефахрам. Шод аз онам, ки мардуми одӣ маро дӯст медорад! Ман худам одами одӣ ва аз они халқам ва Ман бо шумо зиндаам!

 

Чоршанбе, Июн 07 2023

Рамазон Усмонов, нафақахӯр, фарди баробаршуда ба иштирокчии Ҷанги Бузургӣ Ватании солҳои 1941 – 1945, сокини деҳаи Ҳаёти нав, ҷамоати Қалъаи ш.Ҳисор меҳмони идора шуда (тел: 934862223), гуфт, ки аз ҳайати эҷодии газетаи СССР хоҳиш менамояд, ки 1 маротиба ба маҳаллаи зисти онҳо рафта, бо  вазъи воқеӣ ошно шавад.

   - Гап сари он аст, ки мо дар бинои 5 – ошёна – хобгоҳҳои собиқ Комбинати нобиноён зиндагӣ мекунем. Ҳоло комбинати куҳна ба 2 корхонаи нав мубаддал гардида, дар шафати бинои мо беморхонаи касалиҳои рӯҳӣ ва асаб низ ҷой гирифтааст. Мушкили мо он аст, ки ба ошёнаҳои болоӣ оби ошомиданӣ намебарояд. Об танҳо то табақаи 3- юм баромада, мо бошандагони ошёнаҳои болоӣ маҷбурем, об кашонем. Проблемаи камобӣ аз ҳисоби хурд ва фарсуда будани лӯлаҳои об аст, ки бояд иваз шаванд.

  •  << 
  •  < 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  > 
  •  >> 
саҳ 1 аз 62

Китобҳо

Flag Counter