ХАБАРИ ДОҒ
Чоршанбе, Авг 04 2021

 

Салом ба СССР-и гиромӣ! Мехоҳам дар бораи 1 мушкили ҷиддӣ дар н.Темурмалик бигӯям, то масъулон ба он расидагӣ кунанд. Агар имрӯз ин проблема ҳалли худро наёбад, пагоҳ дер хоҳад шуд. 

   Мушкил он аст, ки чарогоҳҳои ноҳия, алалхусус Ҷамоати деҳоти ба номи Лақай Қармишевро одамони пулдор гирифта, ба манфиати шахсии хеш истифода бурда истодаанд. Моли мардуми оддӣ оҳиста-оҳиста бе ҷой монда истодааст. Ба ягон кас гап зада намешавад. Молатро чаронданӣ ба чарогоҳ бурдӣ, зуд «соҳибаш» меояду аз он ҷо меронад. Охир дар ҷое, ки бояд гову мол бичарад, шахсе ҳуқуқ дорад, онро харида гандум ё ҷав бикорад? Дар ин сурат молҳои мардум дар куҷо чаранд? 1 буз ё 2 гов даромад тамом, ё зада маъюб мекунанд ё «зиндонӣ». Ин хел рафтан гирад, пагоҳ дар сари чарогоҳ барои 1 буз ё гов задухӯрд пеш меояд.

   МИҲД н.Темурмалик бояд ба ин қазия назар карда, чарогоҳҳои мардумро баргардонад, ки дигар бо «заминдорон» дастбагиребон нашаванд. 

Меҳрдоди Меҳроб,

Темурмалик

 

Чоршанбе, Июл 28 2021

Дар 6 моҳи соли ҷорӣ, дар ш.Панҷакент ҳамагӣ барои 1 нафар эҳтиёҷманд қарори раиси шаҳр барои тақсимоти замини наздиҳавлигӣ ба тавсиб расидаасту  халос. 

Абдухолиқ Холиқзода, раиси ш. Панҷакент дар нишасти матботӣ гуфт, ки мо дар ин муддат танҳо ба 1 нафар ятими кулл замин ҷудо намудаем. Дар ҳоле, ки тӯли ин муддат беш аз 200 парванда вобаста ба замин омода гардидаву мунтазири қарорҳои раиси шаҳр мебошанд. Имзо нашудани қарорҳои вобаста ба замин ва ё тақсим нагардидани замини наздиҳавлигӣ ба эҳтиёҷмандон, боиси нигаронии сокинони Панҷакент гардидааст.

Масъалаи замин дар минтақа мушкилоти рақами 1 мебошад. Ин дар ҳолест, ки ба гуфтаи раиси шаҳр Абдухолиқ Холиқзода беш аз 70 %-и  муроҷиати сокинон вобаста ба мушкилоти замин аст. Дар ин вақт дар кумитаи идораи замини ш.Панҷакент низ 3 роҳбар иваз гаридааст.

 

Хуршед Фозилов, барои СССР, 

ш.Панҷакент 

 

Чоршанбе, Июл 21 2021

- Эҳтимолан 30% сокинони вилояти Хатлон рӯзғорашонро бо мусофиркашонӣ пеш мебаранд. Дар муддати 1 моҳ нархи сӯзишвории гази моеъ 2 маротиба баланд шуда, ваъзи иқтисодӣ, иҷтимоию молиявии мо ва сокинони эҳтиёҷманд боз ҳам бадтар шуд. Хадамоти зиддиинҳисории кишвар магар дар хобби ғафлат аст, ки ин қиматиро намебинад? 

Анвари Мирзоалӣ, сокини н.Ҷ.Балхӣ 

 

Панҷшанбе, Июл 15 2021

Дуруд ба аҳли эҷоди газетаи мардумии СССР! Ман сокини Ҷамоати деҳоти Эсанбойи н.Рӯдакӣ буда, бо тақози кору фаъолият дар деҳоти дурдасти ноҳия зиёд мегардам. Бахшида ба ҷашни 30-солагии Истиқлолияти давлатии ҶТ дар тамоми шаҳру ноҳияҳои мамлакат корҳои ободонӣ вусъат гирифта, иншоотҳои гуногун бунёд шудаанд ва инро дида шодии кас меояд. Бо иваз шудани раиси ноҳия мо низ фикр кардем, ки ҳамакнун таваҷҷӯҳ ба ҷамоатҳои дур аз маркази ноҳия меафзояд, вале ин тавр нашуд. Мисли раисони қаблӣ раиси нав низ барои обод намудани маркази ноҳия кӯшиш карда истодаасту ҷамоатҳои дур аз маркази ноҳия ба ҳоли худ мондаанд.

Дур намеравем, бубинед вазъи роҳҳои ҷамоатҳои Эсанбой, Чорряккорон, Қиблаӣ, Зайнабобод, Роҳатӣ, Султонобод, Чортеппа, Чимтеппа ва Сарикиштиро. Роҳҳо вайрону валангор, дастрасӣ ба об нест-мардум обро мехаранд, инфрасохтори дар замони шӯравӣ бунёдшуда ҳоли табоҳ доранд. Он бунгоҳҳои тиббие, ки солҳои охир сохта шудаанд, алакай таъмирталабанд. 

Ноҳияи Рӯдакӣ калонтарин ноҳияи ҷумҳурӣ буда, пойтахти кишварамон-шаҳри Душанберо пурра иҳота кардааст ва айб аст, агар сокинони ноҳияи наздиктарин ба пойтахт обро харанду барои партов ҷой надошта бошанд.

Зулфия Шодиева, н.Рӯдакӣ

 

Чоршанбе, Июл 07 2021

Мутаассифона, имсол боду ҳавои номусоиди баҳору аввали тобистон дар ҷануби кишвар боиси офатҳои табиӣ ва дар шимол сабаби хушксолӣ гардид. Дар талу теппаҳо алафҳои табиӣ нарӯид ва ҷаву гандуми баҳорӣ ба молҳои сарҳуй хӯронда шуд. Ин омилҳо ба нарху навои чорво дар бозорҳо таъсири худро расонд. 

Нархи гови ширдеҳу гӯсолаҳо нисбати соли гузашта 4000-5000 сомонӣ арзон шуд. Агар 1 адад (пресс)-и пахоли гандуми соли гузашта дар бозори ш. Истаравшан 10-15 сомонӣ буд, имсол 20-30 сомонӣ шудааст. Дар замони советӣ дар ин гуна мавридҳо аз ҷануби кишвар ба шимол ё худ аз ФР ба тариқи роҳи оҳан алафҳои гуногуни хушк ворид мешуд. Имрӯз ҳам мошинҳо аз ноҳияҳои  вилояти Хатлон ба Суғд алаф оварда истодаанд, азбаски ба 1 баста алаф 10 сомонӣ шуд, 1 кг кунҷора низ то 5-5,50 сомонӣ баромад….

Ҷумабой Яҳёев, н.Деваштич

Чоршанбе, Июн 30 2021

- Салом ба кулли кормандони газетаи мардумии СССР! Дар арафаи пешвозу таҷлили ҷашни тақдирсози 30-солагии Истиқлолияти давлатии ҶТ қарор дорем. Дар муддати 3 соли ахир дар тамоми ҳудуди мамлакат чӣ қадар дигаргунӣ ба амал омада, Тоҷикистони азизи мо шукуфт. Инро мебинаму меболам, вале вақте ба ёдам роҳҳои ноободи ш.Исфара меояд, нигарон мешавам. 

30 сол мешавад, ки роҳи байни ҷамоатҳои Чилгазӣ-Лаккон обод нест, раисони қаблӣ, ки омаданду рафтанд, дар ҳар мулоқот ваъда медоданд, ки то ҷашни 30-солагии истиқлолияти давлатии кишвар ин роҳ таъмир мешавад, вале 30 солагӣ ҳам расиду аз таъмиру азнавсозии ин 22 км роҳ дараке нашуд. 

Раиси собиқ Сулаймон Акрамзода вобаста ба ин масъала боре гуфта буд, ки барои таъмири ин роҳ ҳатто буҷҷаи вилояти Суғд ҳам намерасад, ин тавр бошад ин роҳ боз чандин даҳсола ҳамин тавр хоҳад монд? Вазъи ин роҳ хеле бад буда, вақҳои ахир садамаҳои автомобилӣ дар ин масир афзудаанд. Ронандаҳое, ки дар ин масир равуо доранд, ҳар моҳ то 1500 сомонӣ андоз месупоранд, лоақал аз ҳамин маблағ қисмеро ҷудо карда, роҳро таъмир кунед, мансабдорони азиз! 

Дигар ин, ки 86 км роҳи байни Конибодом ва Б.Ғафуров низ, ки байналмиллалист, таъмирталаб буда, бояд то ҷашни 30-солагии Истиқлолият азнавсозӣ мешуд, вале он ҳам ҳамин тавр монд…

Юсуфбой Файзиев, ш.Исфара, тел: 98 704 05 54

 

  •  << 
  •  < 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  > 
  •  >> 
саҳ 1 аз 139

Китобҳо

Flag Counter