Фазилати намози таровеҳ

Ривоят мекунанд, ки Ҳазрати Алӣ карамаллоҳу ваҷҳаҳу аз Ҳазрати Расули акрам (с) аз фазоили таровеҳ пурсиданд. Гуфтанд, ки ё Алӣ, шахсе аз уммати ман дар шаби аввали Рамазон бо ҷамоат таровеҳ гузорад, чун рӯзи таваллуд аз гуноҳ пок шавад. Дар шаби 2-ум мағфират кунад оллоҳ таъоло падару модари ӯро, агар мӯъмин бошанд. Дар шаби 3-ум фаришта аз таҳти арш мунодӣ кунад, ки оллоҳ таъоло гунаҳҳои гузаштаи туро мағфират кард. Дар шаби 4-ум савоби қироати Тавроту Инҷил ва Забуру Фурқонро дар номаи аъмоли ӯ нависанд. Дар шаби 5-ум оллоҳ таъоло савоби намозгузорони масҷидулҳаром ва масҷиди Мадинаи мунаввара ва масҷиди Ақсоро рӯзӣ бигардонад. Дар шаби 6-ум савоби зиёрати Байтулмаъмурро дарёбад. Дар шаби 7-ум савоби нусрати Мӯсо (а)-ро, ки бар Фиръавн ва Ҳомон ёфта буд, ёбад. Шаби 8-ум атое, ки Худованд ба Иброҳим (а) дода буд, дарёбад. Дар шаби 9-ум аз савоби ибодати Ман баҳра бигирад. Дар шаби 10-ум хайри дунёву охират биёбад. Дар шаби 11-ум аз дунё бегуноҳ ба хонаи охират биравад. Дар шаби 12-ум рӯзи қиёмат мисли қамар тобон бошад. Шаби 13-ум эмин бошад аз азоби қиёмат. Дар шаби 14-ум дар вақти ҳисоби қиёмат фариштае омада, ба таровеҳ хондани ӯ шоҳид гардад. Дар шаби 15-ум фариштагони аршу курсӣ ба ӯ салавот фиристанд. Дар шаби 16-ум амри оллоҳ таъоло бароати ҳуҷҷати наҷоти ӯ аз дӯзахро китобат кунад. Дар шаби 17-ум ато кунад оллоҳ таъоло савоби пайғамбаронро бар ӯ. Дар шаби 18-ум фариштае нидо кунад, ки эй банда, оллоҳ таъоло аз ту розӣ гардид. Дар шаби 19-ум оллоҳ таъоло дараҷоти ӯро дар биҳишт баланд гардонад. Дар шаби 20-ум савоби шуҳадоро дар номаи аъмоли ӯ Худованд сабт кунад. Дар шаби 21-ум оллоҳ таъоло аз барои он банда дар ҷаннат қасре бино гардонад. Дар шаби 22-ум эмин гардонад оллоҳ таъоло ӯро аз ҳар ғам ва дар шаби 23-ум бино гардонад шаҳреро ба номаш дар биҳишт. Дар шаби 24-ум 24 ҳоҷати ӯро Худо раво бигардонад. Дар шаби 25-ум оллоҳ таъоло азоби қабр аз ӯ бардорад. Дар шаби 26-ум оллоҳ таъоло ато кунад ба он банда савоби ибодати 40-соларо. Дар шаби 27-ум аз Сирот чун барқ гузарад. Дар шаби 28-ум оллоҳ таъоло дар биҳишт 1000 дараҷа ӯро ато фармояд. Дар шаби 29 савоби 1000 Ҳаҷ дар номаи аъмоли ӯ нависанд. Дар шаби 30 оллоҳ таъоло гӯяд, эй банда, ту абди манӣ ва ман парвардигори туам! Ҷалла ҷалолуҳу!

Лайлатулқадр

Сар аз шаби қадр, ки ба шаби 27-уми Рамазон рост меояд, таровеҳро аҳли эътиқод бо алвидоъ ба моҳи шарифи Рамазон шуруъ мекунанд ва ин намоз 3 рӯз давом мекунад. Дар шаби охири Рамазон усулан таровеҳ намехонанд, зеро ин намоз 1 шаб қабл аз Рамазон сар мешавад. Вале онҳое, ки шабе пеш нахондаанд, намози таровеҳ гузоранд ҳам, бок нест. 

Дар баёни фазилати шаби қадр овардаанд, ки тамомии кутуби Худованд дар Рамазон омадааст ва аммо Қуръон маҳз шаби 27-и он нузул кардааст. Дар маънии лайлатулқадр ҷамии умурот ва ҳукумоти илоҳӣ аз ин сол то соли дигар таслим аст. Ва ба 4 фариштаи муқарраб, дафтари раҳмат ва дафтари азоб ба Ҷабраил (а), дафтари арзоқ ва дафтари наботот ба Микоил (а) ва дафтари борон ва дафтари бодҳо ба Исрофил (а), дафтари қабзи рӯҳ ва аҷали махлуқот ба Азроил (а) таслим шудааст.

Ҳоҷӣ Исмоил Пирмуҳаммадзода,

махсус барои хонандагони СССР

Журналист Қурбон Аламшоев, ки 3.05.2019, дар рӯзи Озодии Сухан дипломи вежаи СССР-ро соҳиб шуда буд, аз ш.Хоруғ барои гирифтани ҷоиза омадаву дар меҳмонии СССР гуфт, «Сароғоз сипоси худро ба газетаи мардумӣ мерасонам, ки мо-журналистони музофотиро қадрдонӣ мекунад. Дипломи шумо боиси фараҳмандии мост. Ва баъдаҳу роҷеъ ба 1 проекти навам гуфтаниям: Тӯли 4 соли охир дар Вилояти Мухтори Куҳистони Бадахшон Фестивали табиати ваҳширо мегузаронем. Ин идея аслан дар Иттиҳодияи ҷамъиятии «Кӯҳҳои Помир» пайдо шуд, ки банда роҳбараш ҳастам. Табиати ваҳшӣ онест, ки берун аз назари мо уфтодааст. Дар табиати ваҳшӣ ҳазорҳо рустанӣ ва ҷонварон ҳаст, минҷумла, озодапаланг, ки баъзе бабри барфӣ меноманд. Чаро озодапаланг? Зеро озода асту ҳаргиз ба одам ҳамла намекунад. Инчунин фақат сайди ҳалол (харгӯш, суғур, бӯзи кӯҳӣ…)-ро мехӯрад. Проблема чист? Шикорчиёни бераҳм маҳз ҷониби чунин ҷонвари камёфту беозор тир холӣ мекунанд. Ҳадафи мо ҳифзи озодапаланг аст. Ва на танҳо ин, ки нисбати тамоми ҳайвоноти табиати ваҳшӣ бераҳм шудаем. Хаёл мекунам, имрӯз табиати мо бесоҳиб аст. Зимнан ба хулосае омадем, ба мардуми олам ва шикорчиҳои маҳаллӣ нишон диҳем, ки табиати ваҳшӣ бесоҳиб нест!!! Мо соҳиби ӯем ва Мо Метавонем! Дар бораи ин проблема дар шумораҳои ояндаи СССР ҳатман менависам.

Ҳукумати яҳудӣ

Инқилоби болшевикии Русияро бе тардид мешавад яке аз инқилобҳои аҷиби дунё номид. Инқилоб бо шиорҳои зиддиистисморӣ ва зиддияҳудӣ пирӯз шуд, лек 1 ҳукумати комилан яҳудиро сари кор овард. Аҷиб аст, аммо аз 22 нафар комиссари халқии аввалин ҳукумати болшевикӣ 17 тан яҳудӣ буданд. Теъдоди яҳудиҳо дар комиссариатҳои халқии ин ҳукумат низ аксариятро ташкил медод. Барои мисол, дар Комиссариати халқии бехатарӣ аз 5 масъул 4 кас яҳудӣ ва дар комиссариати корҳои дохила аз 64 масъул 45 нафар яҳудӣ, дар комиссариати умури молия аз 30 корманд 26 нафар яҳудӣ буданд. Дар ин раванд комиссариати корҳои хориҷа низ истисно набуд. Дар оғоз Лев Тротский ба ин комиссариати халқӣ сарварӣ мекард, аммо баъди чанде зимоми қудратро дар ин ҷо, яке аз олитарин узви ҳизби болшевикӣ Чичерин ба ӯҳда гирифт.

Геннадий Василевич Чичерин с.1872 дар вил.Тамбови Русия, дар оилаи ашрофзода (дворян) ба дунё омад. Дар кӯдакӣ ба мусиқӣ ва таърих рағбати зиёд дошт ва баъди хатми гимназия ба факултаи таърих ва филологияи Донишгоҳи Санкт-Петербург дохил шуд. С.1898 бо маслиҳати амуяш ба бойгонии Вазорати корҳои хориҷии Русия (ВКХ) ба кор даромада, дар навиштани таърихи ВКХ ширкат варзид. Тӯли фаъолият дар ин даргоҳ дониши хуби дипломатӣ гирифта, ба нозукиҳои кори 1 дипломат ба хубӣ ошно шуд. Маҳз ин ҳангом ӯ бо адабиёти инқилобиёни сотсиалист ошно шуда, ба ҳаракати инқилобӣ пайваст. С.1904 ба хориҷа рафта, мехост бо ҳаракати сотсиал-демократии Ғарб ошно гардад. Ӯ дар Олмон, Фаронса ва Англия зист ва бо инқилобиёни зиёде робита барқарор намуд. Ин кор боис шуд, зери назорати раёсати хориҷии пулиси рус қарор гирад ва ӯро акнун чун 1 инқилобӣ ошно кунанд.

29.05.1965. Дар пойтахти Олмони Демократӣ-шаҳри Берлин, чемпионати XVI-уми Аврупо оид ба бокс баргузор шуд. Дар он боксчиёни шӯравӣ аз 10 медали тилло 8 медали тилло ба даст оварданд.

29.05.1975. Дар РСС Беларуссия истеҳсоли бузургтарин мошини боркаш дар СССР - "БелаАЗ-7520" ба роҳ монда шуд.

29.05.1988.Сафари расмии президенти ИМА Роналд Рейган ба СССР. Ӯ дар ин сафар шахсан бо М.Горбачев, ки тибқи назари баъзе, дастнишондаи ғарбиҳо буд, вохӯрд. Аслан вазифаи Горбачев таҳрики мардум ва амал накардан ба ваъдаҳояш буд, ки хеле хуб аз ӯҳдаи вазифааш баромад. Ҳеҷ ваъдаи додаашро амалӣ накард ва мардум ҳам аз ин ба дод омада, ба майдонҳо рехтанд.

30.05.1918.Дар Русияи Шӯравӣ Георгий Чичерин Комиссари халқии корҳои хориҷӣ таъин шуд. Ӯ дар ин симмат Лев Тротскийро ҷойгузин карда, яке аз боистеъдодтарин афрод дар ҳукумати болшевикӣ будӣ.

31.05.1918. Баъди пошхӯрии импературии Австро-Венгрия, дар Питсбурги ИМА чехҳо бо словакҳо иттиҳоди сиёсӣ баста, кишвари нав-Чехословакияро таъсис доданд. Ин кишвар чанд даҳсола арзи вуҷуд карда, ахир чехҳо ва словакҳо дубора аз ҳам ҷудо шуда, ҳар кадом кишвари мустақили худро созмон доданд.

31.05.1943.Дар совхозҳо ва МТСҳои шӯравӣ шӯъбаҳои сиёсӣ барҳам дода шуданд.

1.06.1922.Дар СССР аввалин хатсайри ҳавоии байналмилалӣ Маскав-Кёнигсберг ифтитоҳ ёфт.

15 майи соли 2019 дар бинои Бонки миллии Тоҷикистон таҳти роҳбарии Раиси Бонки миллии Тоҷикистон Ҷамшед Нурмаҳмадзода ва бо иштироки роҳбарони бонкҳо ва ташкилотҳои амонатии қарзии кишвар, оид ба иҷрои дастуру супоришҳои Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон, ки санаи 10 майи соли 2019, зимни мулоқот бо кормандони мақомоти молия, андоз, гумрук, сармоягузорӣ ва бонкҳо дода шуда буд, ҷаласаи корӣ баргузор гардид. Ҷаласаро Раиси Бонки миллии Тоҷикистон Ҷамшед Нурмаҳмадзода ифтитоҳ карда, таваҷҷуҳи ҳозиринро бори дигар ба дастуру супоришҳои Пешвои миллат, муҳтарам Эмомалӣ Раҳмон, ки дар мулоқот бо кормандони мақомоти молия, андоз, гумрук, сармоягузорӣ ва бонкҳо ироа гардида буд, ҷалб намуд.

“Низоми бонкии кишвар, яке аз омилҳои муҳими рушди иқтисодиву иҷтимоии Тоҷикистон ба ҳисоб рафта, аз ҳар кадоми мо тақозо менамояд, ки барои рушду такомули он фаъолияти босамар дошта бошем. Ва бо истифода аз имконияту шароитҳои мусоид баҳри бартараф намудани камбудиҳои соҳа, ки Пешвои миллат зимни суханронӣ дар мулоқот бо кормандони мақомоти молия, андоз, гумрук, сармоягузорӣ ва бонкҳо ироа намуданд, кӯшиш ба харҷ диҳем, то эътимоди аҳолиро ба бонкҳо барқарор намоем. Татбиқи сиёсати пулию қарзии Бонки миллии Тоҷикистон, назорат ва баҳодиҳии дурусти низоми бонкӣ, пешгирии талафоти имконпазир ва коҳиш додани сатҳи хавфҳои эҳтимолӣ ба низоми бонкӣ, дуруст ба роҳ мондани сиёсати қарздиҳӣ ва коҳиш додани меъёрҳои фоизӣ, кам кардани ҳиссаи қарзҳои ғайрифаъол, ҷалби бештари сармояи хориҷӣ ба иқтисодиёти кишвар ва баланд бардоштани маърифати молиявии аҳолӣ метавонад барои бартараф намудани камбудиву норасоиҳои соҳа ҳиссагузор бошад”,- иброз дошт Ҷ.Нурмаҳмадзода. Дар идома лоиҳаи Нақшаи чорабиниҳои БМТ оид ба иҷрои дастуру супоришҳои Пешвои миллат, Президенти Ҷумҳурии Тоҷикистон зимни вохӯрӣ бо кормандони соҳаҳои молия, андоз, гумрук ва бонкҳо ба баррасӣ ҷиҳати пешниҳоди таклифҳо манзур карда шуд. Бояд тазаккур дод, ки лоиҳаи нақшаи чорабиниҳо вобаста ба бартараф намудани камбудиҳои зимни мулоқот аз ҷониби Пешвои миллат ироагардида таҳияшуда, тамоми паҳлуҳои соҳаи низоми бонкӣ ва суғуртаро фарогир мебошад, аз ҷумла баланд бардоштани эътимоди аҳолӣ ба низоми бонкӣ, истифодаи фишангҳои иловагӣ баҳри татбиқи сиёсати пулию қарзӣ, дастрасии аҳолӣ ба хизматрасониҳои молиявӣ, ҳимояи ҳуқуқҳои истеъмолкунандагони низоми молиявӣ, ҷалби бештари бонувон ба низоми бонкӣ, коҳиш додани қарзҳои ғайрифаъол дар сандуқи қарзӣ, паст кардани меъёрҳои фоизӣ дар сиёсати қарзии бонкҳо, зиёд кардани доираи марказҳои хизматрасонии бонкӣ, интихоби дурусти кадрҳои баландихтисос дар воҳидҳои сохтории бонкҳо ва ташкилотҳои қарзӣ ва ғайра. Дар баробари ин, ба бонкҳо ва ташкилотҳои қарзӣ барои таҳия намудани пешниҳодҳои худ ҷиҳати ворид намудан ба нақшаи чорабиниҳои мазкур дастур дода шуд.

Дар рафти ҷаласа, инчунин масъалаҳои бедолларикунонии иқтисодиёт, поён бурдани таъсири асъори хориҷӣ дар бозори хизматрасониҳои бонкӣ, қобилияти пардохтпазирӣ ва сармояи бонкҳо, афзоиши дастрасии аҳолӣ ба хизматрасонии арзон, воситаҳои молиявӣ, таъсиси бештари филиалҳо ва марказҳои хизматрасонӣ, омода кардани мутахассисони баландихтисоси соҳаи бонкдорӣ ва ҷалби бештари бонувон ба низоми бонкии мамлакат, бахусус ба вазифаҳои масъулияти моддидошта мавриди баррасӣ қарор дода шуд. Муовини Раиси Бонки миллии Тоҷикистон Ҳамидулло Машрабзода дар навбати худ доир ба ҷараёни иҷрои қарори Ҳукумати Ҷумҳурии Тоҷикистон "Оид ба тадбирҳои вусъат бахшидани ҳисоббаробаркуниҳои ғайринақдӣ" (30.11.2018,№565) суханронӣ карда, зикр намуд, ки бо вуҷуди иҷрои корҳои назаррас дар самти тадбиқи қарори мазкур, зиёд кардани ҳиссаи ҳисоббаробаркунии ғайринақдӣ дар муомилот ҳоло ҳам баъзе мушкилот, аз ҷумла, аз ҷониби ташкилотҳои карзӣ фароҳам овардани шароити мусоид барои таъмини терминалҳои электронӣ ва истифодаи онҳо дар марказҳои савдою хизматрасонӣ дида мешавад. Аз ин рӯ, Раиси Бонки миллии Тоҷикистон Ҷ.Нурмаҳмадзода таъкид дошт, ки бонкҳо ва ташкилотҳои қарзӣ барои ҳарчи зудтар амалӣ намудани таъмини татбиқи қарори Ҳукумати Ҷумҳурии Тоҷикистон "Оид ба тадбирҳои вусъат бахшидани ҳисоббаробаркуниҳои ғайринақдӣ" чораҳои таъхирнопазир андешида, барои қабули ҳақи ҳама намуди хизматрасониҳо бо истифода аз воситаҳои электронӣ бо вазорату идораҳои дахлдор ҳамкории судмандро ба роҳ монанд. Дар охир ба намояндагони бонкҳо ва ташкилотҳои қарзии кишвар, ҷиҳати бартараф намудани камбудиҳои дар мулоқот зикргардида дастурҳои мушаххас дода шуд.

Фаъолияти ташкилотҳои суғуртавӣ ва рушди бозори суғурта

Дар робита ба иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки зимни мулоқот бо кормандони мақомоти молия, андоз, гумрук, сармоягузорӣ ва бонкҳо дода шуда буд, 24 майи соли 2019 дар Бонки миллии Тоҷикистон таҳти роҳбарии Раиси Бонки миллии Тоҷикистон Ҷамшед Нурмаҳмадзода бо иштироки роҳбарон ва сармуҳосибони ташкилотҳои суғуртавии кишвар ҷаласаи корӣ доир гардид. Ҷаласаро Раиси Бонки миллии Тоҷикистон Ҷамшед Нурмаҳмадзода ҳусни оғоз бахшида, қайд кард, ки cуғурта ҳамчун фишанги ҳимоя ва дастгири манфиатҳои шахсони воқеӣ ва ҳуқуқӣ дар самти таъмини бехатарии ҳаёт, саломатӣ ва молу мулк унсури асосии иҷтимою иқтисодии ҷомеа ба ҳисоб рафта, барои пешрафти соҳаҳои хоҷагии халқ муҳим арзёбӣ мегардад. 

Зимни мулоқоти Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, санаи 10 майи соли 2019, бо кормандони мақомоти молия, андоз, гумрук, сармоягузорӣ ва бонкҳо, Бонки миллии Тоҷикистон вазифадор карда шуд, ки доир ба рушди низоми суғурта чораҳои зарурӣ андешад ва бешак, татбиқкунандагони вазифаҳои гузошташуда, албатта ташкилотҳои суғуртавии ватанӣ ба ҳисоб мераванд. Дар рафти ҷаласаи корӣ Раиси Бонки миллии Тоҷикистон Ҷ.Нурмаҳмадзода вобаста ба кору фаъолияти ташкилотҳои суғуртавӣ ибрози назар намуда, таъкид бар он дошт, ки фаъолияти бархе аз ташкилотҳои марбута ба талаботи имрӯза ҷавобгӯ набуда, ҳисоботҳои расмӣ саривақт ва босифату эътимоднок дастрас намегарданд. Тавре аз рӯи маълумотҳои оморӣ бармеояд, воридоти ҳаққи суғуртавии ташкилотҳои суғуртавии ватанӣ дар соли 2018 наздик ба 235 млн. сомониро ташкил дода, пардохтҳои суғуртавӣ дар ин давра 11 млн. сомониро ташкил дод, ки ҳамагӣ 5%-и ҳаҷми умумии воридоти ҳаққи суғуртавиро дар бар мегиранд. 

Имрӯз ширкатҳои суғуртавии ватанӣ ба муштариёни худ аз рӯи 50 намудҳои суғурта хизмат мерасонанд, ки барои рушди соҳа кифоят намекунад. Таъкид гардид, ки мушкилоти асосии бозор аз як тараф нокифоягии имкониятҳои молиявии мизоҷони потенсиалӣ бошад, аз тарафи дигар мавҷуд набудани ҷаззобияти аҳолӣ ҷиҳати бастани шартномаҳои суғуртавӣ мебошад. Раиси Бонки миллии Тоҷикистон Ҷ.Нурмаҳмадзода зимни муҳокимаронӣ махсус ба масъалаҳои гуногуни рушди бахши суғурта таваҷҷуҳ зоҳир намуда, вобаста ба мушкилоти ҷойдоштаи соҳа, аз ҷумла риоя накардани талаботҳои қонунгузорӣ, паст будани сатҳи пардохпазирӣ, дар сатҳи паст қарор доштани корҳои фаҳмондадиҳӣ ва таблиғотӣ, пешниҳод накардани намудҳои нави суғурта ва механизмҳои татбиқи он, вуҷуд надоштани технологияи нав ва барномаҳои муосир, саҳми ночизи бахши суғурта дар пешбурди иқтисодиёт изҳори назар карда, барои минбаъд рушди бахши суғурта аз ташкилотҳои суғуртавӣ даъват ба амал овард.

Дар идома, Муовини Раиси Бонки миллии Тоҷикистон Ҳамидулло Машрабзода ба сухан баромада, изҳор дошт, ки яке аз самтҳои муҳими дигар дар бахши суғурта ҳимояи ҳуқуқи ташкилотҳои суғуртавӣ мебошад ва Ассотсиатсияи миллии ташкилотҳои суғуртавии Тоҷикистон, ки навтаъсис аст, маҳз барои тақвият бахшидани ин раванд вазифадор аст. Ҳ.Машрабзода инчунин вобаста ба бурдани корҳои тарғиботӣ ва ташвиқотӣ барои рушди бозори суғурта ба ташкилотҳои суғуртавӣ тавсия дода, оид ба тақвият додани ҳисоббаробаркунии ғайринақдӣ дар соҳа дастур дод. Дар рафти ҷаласаи корӣ аз фаъолияти низоми суғурта дар семоҳаи аввали соли 2019 сардори Идораи назорати суғуртавӣ Ҳусейнова Дилбар рӯнамоиро манзури ҳозирин гардонида, оид ба вазъи воқеии соҳа таҳлили мушаххас манзур намуд. Дар интиҳо Раиси Бонки миллии Тоҷикистон Ҷамшед Нурмаҳмадзода вобаста ба бандҳои алоҳидаи Нақшаи чорабиниҳо ҷиҳати иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон аз мулоқот бо кормандони мақомоти молия, андоз, гумрук, сармоягузорӣ ва бонкҳо, ки барои рушди бахши суғурта ва бартараф кардани камбудиҳо равона шудааст, ба роҳбарони ташкилотҳои суғуртавӣ дастуру супоришҳо дод. Аз ҷумла, аз масъулини соҳа даъват ба амал оварда шуд, ки бо истифода аз имкониятҳои мавҷуда барои бартараф намудани камбудиҳои ҷойдошта кӯшиш ба харҷ дода, фаъолияти худро мувофиқи талаботҳои иҷозатномадиҳӣ ва дар асоси рақобати солим ба роҳ монда, хизматрасонии босифатро таъмин намоянд ва ба ин васила ба боварии мардум сазовор гарданд. Бояд зикр кард, ки имрӯз дар ҷумҳурӣ 18 ташкилоти суғуртавӣ фаъолият доранд.

Шуъбаи матбуоти БМТ

Масъулини МИҲД н.Айнӣ матлаби “Барои раис маргу мир фарқ надорад?” (СССР, №18(555), 2.05.2019)-ро мавриди баррасӣ қарор доданд. Вобаста ба шароити иқлимиву табиӣ, мавсими зимистони с.2018-19 нисбатан сербориш ва сербарфтар омада, вобаста ба он дар шоҳроҳи автомобилгарди Душанбе-Чаноқ якчанд ҳолати баста шудани роҳ ба қайд гирифта шуд. Баҳри бартараф намудани оқибатҳои офатҳои табиӣ сохторҳои дахлдори давлативу ғайридавлатӣ, аз ҷумла, МИҲД н.Айнӣ низ таҳти роҳбарии бевоситаи Раиси ноҳия Муродзода Муқим Қаюм ситод ташкил шуда, ҷиҳати мусоидат ба кори сангину пуршарафи роҳкушоён, аз қабили муваққатан боздоштани мусофирон дар ҷойҳои бехавф, ташкили хуроки умумӣ барои мусофирон, ба низом даровардани тамбашавии мошинҳо тавассути кормандони БДА-и ноҳия, расонидани ёрии аввалияи тиббӣ, ҷойгиркунонии занону кӯдакон дар меҳмонхонаҳо ва ҷойҳои гарм, аз ҷойҳои хавфнок баровардани мусофирони дар роҳ монда, ки бевосита бо ҳамроҳии кормандони бахши раёсати КҲФ ва мудофиаи граждании вил.Суғд ширкат доштанд. Ҳамчунин 14-15 феврали соли ҷорӣ раис шахсан дар км 81-400 шоҳроҳи автомобилгарди Душанбе-Чаноқ ҷиҳати бартараф намудани оқибати офатҳои табиӣ иштирок карда, афроди дар роҳ мондаро бо хуроки гарм ва касоне, ки зарурияти ба ш.Душанбе сафар карданро доштанд, ҳатто мошини сабукрав ташкил намуда, тавассути ш.Хуҷанд ва ҳавопаймо гусел намуданд. Набояд фаромуш сохт, дар 1 соат баста шудани шоҳроҳ чи қадар автомашинаҳо ҷамъ шуда, хоҳ-нохоҳ бенизомии тартиботи мошинҳо дар баъзе мавридҳо дида мешаванд, ки ин аз интизоми ронандаҳо  гувоҳӣ медиҳад, на аз масъулияти ин ё он раиси ноҳия.

Раҳматзода С.М. муовини якуми Раиси ноҳия